Piginneqatigiilluni inissiat pillugit inatsisartut peqqussutaata allanngortinneqarneranik inatsisartut peqqussutaat nr. 7, 15. april 2003-meersoq
(mē-mut pigisanik aalaakkaasunik qularnaveeqqusiussilluni taarsigassarsisitsisarfimmit taarsigassarsiat aningaasartaasa amerlanerpaaffissaat aammalu taarsigassarsisitsinissamik neriorsuummut piffissaliussap sivisunerpaaffissaa)
§ 1.
Piginneqatigiilluni inissiat pillugit inatsisartut peqqussutaanni nr. 1-imi, 31. oktober 1991-imeersumi, inatsisartut peqqussutaatigut nr. 11, 6. november 1997-imeersukkut, inatsisartut peqqussutaatigut nr. 17, 12. november 2001-imeersukkut aamma inatsisartut peqqussutaatigut nr. 4, 21. maj 2002-meersukkut allanngortinneqartumi, makku allannguutigitinneqassapput:
1. § 9 ima oqaasertalerneqassaaq:
"§ 9. Naalakkersuisut kommunalbestyrelsilu piginneqatigiillutik inissiaatilittut peqatigiiffimmut najugaqalersussaannarnik inuttalimmut piginneqatigiilluni inissialiap sananeqarnissaanut tapersiinissamik neriorsuuteqarsinnaapput, tak. § 1, nr. 1.
Imm. 2. Naalakkersuisut kommunalbestyrelsilu piginneqatigiillutik inissiaatilittut peqatigiiffimmut inissianik sanatitsisumit namminersortumit sananeqarsimasunik tigusisunut tapersiinissamik aamma neriorsuuteqarsinnaapput, tak. § 1, nr. 3.
Imm. 3. Tapersiinissamik aatsaat neriorsuuteqartoqarsinnaavoq tapersiinissaq Naalakkersuisut kommunalbestyrelsillu isumaqatigiissutigippassuk. Inissianik, imm. 1 imaluunniit 2 malillugu tapersiiffigineqarnissaanik neriorsuuteqarfiusimasunik, sananeq ukiut marluk qaangiutinnginneranni aallartinneqareersimassaaq sanaartornerlu naammassineqareersimassalluni atorneqalereersimassallunilu neriorsuuteqarluni allagaqarnerup kingorna ukiut pingasut qaangiutsinnagit. Taamatut pisoqanngippat neriorsuut nalunaaruteqaqqigani atorunnaarsinneqassaaq.
Imm. 4. Piginneqatigiilluni inissiaatilittut peqatigiiffiup neriorsuuteqarluni allakkap ullulerneqarneraniit ukiut marluk qaangiutinnginneranni Naalakkersuisunut nalunaarutigissavaa sanaartorneq aallartinneqarsimanersoq aallartinneqarsimannginnersorluunniit. Sanaartorneq aallartinneqareersimappat tamatumunnga piginneqatigiilluni inissiaatillit peqatigiiffiata uppernarsaata kommunimit ilumoornerarneqartoq ilanngunneqassaaq. Neriorsuuteqarluni allakkap nassiunneqarnerata ulluaniit ukiut pingasut qaangiutsinnagit atuilernissamut akuersissutip nuutinnera piginneqatigiilluni inissiaatilittut peqatigiiffiup Naalakkersuisunut nassiutissvaat.
Imm. 5. Pisuni immikkut illunnartuni imm. 3-mi piffissaliussat sanioqqunneqarnissaat Naalakkersuisut akuerisinnaavaat. Taamatut pisoqartillugu imm. 4-mi piffissaliussat sanioqqutsinissamik akuersissut naapertorlugu nikisinneqassapput."2. § 11, imm. 5 ima oqaasertalerneqassaaq:
"Imm. 5. Piginneqatigiilluni inissiaatilittut peqatigiiffiup imm. 3 aamma § 10, imm. 6 naapertorlugit taarsigassarsiai katillutik mē-mut ataatsimut annerpaamik 6.000 kr.-inik amerlassuseqarsinnaapput."
§ 2.
Inatsisartut peqqussutaat manna 1. maj 2003-miit atuutilerpoq sunniuteqassallunilu taarsigassarsinissamik neriorsuutinut inatsisartut peqqussutaata atuutilereerneratigut tunniunneqartunut.
Imm. 2. Piginneqatigiilluni inissiaatilittut peqatigiiffik inatsisartut peqqussutaata matuma atuutilereerneratigut taarsigassarsinissamik neriorsuummik tigusaqartoq Namminersornerullutik Oqartussanut kommunalbestyrelsimullu nalunaaruteqarnermigut inatsisartut peqqussutaanni matumani § 1, nr. 2 naapertorlugu piginneqatigiilluni inissianik sananissaq aningaasalersorneqassasoq aalajangersinnaavoq.
Namminersornerullutik Oqartussat, ulloq 15. april 2003
Hans Enoksen/
Mikael Petersen