Peqqussutissatut siunnersuummut nassuiaatit
Nalinginnaasumik nassuiaatit
Piginneqatigiilluni inissiaateqarnerup nutarteriffigineqarneranut ingerlasumut ilaatillugu peqqussutissatut siunnersuut iluarsiineruvoq. Sanaartornermi aningaasartuutit mē-mut ataatsimut 15.000 kr.-init amerlanerusimatillugit peqatigiiffiup pigisanik aalaakkaasunik qularnaveeqqusiussilluni taarsigassarsisitsisarfimmit taarsigassarsisinnaanerata pisariillisaavigineqarnera matumani pineqarpoq. Kiisalu Sanaartugassanut Iluarsagassanullu Aningaasaateqarfiup pitsaanerusumik aqunneqarnissaanik kissaateqarnerup peqqussutissatut siunnersuut kinguneraa. Taarsigassarsisitsinissamik neriorsuutit piviusunngortinneqarnissaat imaluunniit atorunnaarsinneqarnissaat aammalu Sanaartugassanut Iluarsagassanullu Aningaasaateqarfimmit peerneqartarnissaat qularnaarniarlugu neriorsuutit killilimmik piffissalerneqarnerat pillugu aalajangersagaq ilanngunneqarpoq.
Siusinnerusukkut Nunatta Karsiata kommunalbestyrelsillu taarsigassarsisitsinerminni pigisanik aalaakkaasunik qularnaveqqusiussilluni taarsigassarsisitsisarfinniit taarsigassarsiat mē-mut ataatsimut 15.000 kr.-it 26,33 %-iinut naapertuuttut ataqqisarsimagaluarpaat. Sanaartornermi aningaasartuutit mē-mut ataatsimut 15.000 kr.-init amerlanerusimagaangata piginneqatigiillutik inissiaatilittut peqatigiiffiit taakku pigisanik aalaakkaasunik qularnaveeqqusiussilluni taarsigassarsisitsisarfitsigut aningaasalersortartussaagaluarpaat imaluunniit piginneqatigiillutik inissiaatilittut peqatigiiffimmi ilaasortat immikkut aningaasaleeqqinnerisigut.
Sanaartornermi aningaasartuutit mē-mut 15.000 kr.-init amerlanerusimagaangata taakku pigisanik aallaakkaasunik qularnaveeqqusiussilluni taarsigassarsisitsisarfitsigut aningaasalersorneqarsinnaanngitsut paasinarsisimavoq. Aammattaaq nammineq akiliutissat 126.000 kr.-it qaavatigut 215.000 kr.-it tikillugit piginneqataasunit aningaasalersorneqarnissaat ajornartorujussuusoq paasinarsisimavoq.
Peqqussutissatut siunnersuut inatsisilerinikkut misissuataarneqarsimavoq tusarniaatigineqarsimallunilu KANUKOKA-mut, Aningaasaqarnermut Pisortaqarfimmut aammalu Piginneqatigiillutik inissiaatilittut peqatigiiffiit ataatsimoorlutik peqatigiiffiannut.
Allaffissornikkut kingunerisassatPeqqussutissatut siunnersuut kommunimut imaluunniit Namminersornerullutik Oqartussanut allaffissornikkut nammakkersuutaanerulissanngilaq.
Aningaasatigut kingunerisassatPeqqussutissatut siunnersuut Piginneqatigiilluni inissiaatilittut peqatigiiffiit taarsigassarsiniartarnerinut pisariillisaataassaaq. Peqqussutissatut siunnersuut kommuninut imaluunniit Namminersornerullutik Oqartussanut aningaasatigut kinguneqassanngilaq.
Aalajangersakkanut ataasiakkaanut nassuiaatit
§ 1, nr. 1-mut
Aalajangersakkakkut pingaarnertut siunertaavoq neriorsuutit tunniunneqarsimasut atorneqarnissaasa imaluunniit atorunnaarsinneqarsinnaanerisa qularnaarneqarnissaat. Neriorsuuteqartoqarneratigut aningaasaliissutit Sanaartugassanut Iluarsagassanullu Aningaasaateqarfimmut nuunneqassapput. Tamanna pereerpat sanaartukkap naammassineqareerneratigut aningaasaliissutit aningaasaateqarfimmiit akilerneqassapput. Sanaartorneq naammassineqanngippat aningaasaliissutit aningaasaateqarfimmiit peerneqartarnissaat siunertanullu allanut tulleriiaarissutigineqarsinnaanissaat pingaaruteqarpoq.
Aalajangersakkap kingunerissavaa pisuni immikkut ittuni piffissaliussat sanioqqunneqarnissaannik Naalakkersuisut aalajangiisinnaanerat. Matumani pingaartumik eqqarsaataapput sanaartornerup aallartilluarsimanera aammalu atuilernissamut akuersissutip tunniunneqarnissaata kisimi utaqqisaanera.
Sanioqqutsinissamik aalajangersakkakkut pingaartinneqartoq tassaavoq aningaasat Sanaartugassanut Iluarsagassanullu Aningaasaateqarfimmut nuunneqarsimasut sulisinneqarnissaat aammalu sanaartornerit piffissanik annikitsuinnarmik nikingasoortut ajornanngitsumik naammassineqartarnissaat.
Inuit suli amerlanerusut namminneq pigisaminnik inissialiornissaat siunertat suli pingaarnersaraat. Taamaallaat qularnaarneqassaaq neriorsuilluni allakkat Sanaartugassanut Iluarsagassanullu Aningaasaateqarfimmi asuli uninngatinneqannginnissaat.
§ 1, nr. 2-mut
Aalajangersakkap kingunerissavaa piginneqatigiilluni inissiaatilittut peqatigiiffiup pigisanik aalaakkaasunik qularnaveeqqusiussilluni taarsigassarsisitsisarfimmit taarsigassarsiaasa mē-mut ataatsimut amerlanerpaamik 6.000 kr.-inik amerlassuseqarnissaat. Piginneqatigiilluni inissiaatilittut peqatigiiffiup sanaartornermi aningaasartuutit 15.000 kr.-it 26,33 %-iisa 3.950 kr.-inut naapertuuttut taarsigassarsisitsisarfikkut aningaasalersorsinnaavai.
Sanaartornermi aningaasartuutit mē-mut ataatsimut 15.000 kr.-it sinnersimappatigit sanaartornermi aningaasartuutit ilaat taakku piginneqatigiilluni inissiaatilittut peqatigiiffiup aningaasalersussavai piginneqataasut 7 %-imik namminneq akiliutaasigut sinnerilu taarsigassarsisitsisarfimmit taarsigassarsinikkut annerpaamik mē-mut ataatsimut 2.050 kr.-inik amerlassuseqarsinnaasutigut.
Taamaattumik taarsigassarsisitsisarfikkut aningaasalersorneqarsinnaasut mē-mut ataatsimut sanaartornermi aningaasartuutit 17.204 kr.-iusinnaapput.
Kommunimit taarsigassarsiat, 15.000 kr.-it 33,33 %-ii 5.000,00 Nunatta karsianit taarsigass., 15.000 kr.-it 33,33 %-ii 5.000,00 Piginneqataasut namminneq akil. 15.000 kr.-it 7 %-ii 1.050,00 Taarsigassarsisitsisarfinnit 15.000 kr.-it 26,33 %-ii 3.950,00 Katillugit 15.000,00 Piginneqataasut immikkut akiliutaat 2.204 kr.-it 7 %-ii 154,00 Taarsigassarsisitsisarfinnit immikkut 2.204 kr.-it 93%-ii 2.050,00 Katillugit 17.204,00 Taakkunannga:
Piginneqataasup nammineq akiliutai 1.204,00 Taarsigassarsisitsisarfinnit 6.000,00 pisortanit taarsigassarsiat 10.000,00 Katillugit 17.204,00
§ 2-mut
Siunnersuutigineqarpoq allannguutit 1. maj 2003-mi atuutilissasut. Peqatigitillugu siunnersuutigineqarpoq nooriarnermi aaqqissuussisoqassasoq tamatumuuna piginneqatigiillutik inissiaatilittut peqatigiiffiit maleruagassat atuuttut malillugit taarsigassarsinissamik neriorsorneqareersimasut aalajangersinnaassallugu aaqqissuussineq nutaaq atussanerlugu, tassa piginneqatigiilluni inissiaatilittut peqatigiiffik inissianik sanaartorluni aallartereersimappat.