Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutaat nr. 4, 15. april 2003-meersussatut siunnersuut
(Kommunit inissiaataannut attartortittakkanut tapersiissutit aammalu boligstøttikkut illuliat, akiitsut sinneri akiliutissallu akiligassat isumakkeerneqarsimasut, iluarsaannerinut, allilernerinut pitsanngorsarnerinulluunniit tapersiisarnerup allanngortinneqarneri)
§ 1.
Inissialiornernut tapersiissuteqartarneq pillugu inatsisartut peqqussutaanni nr. 1, 9. april 1992-imeersumi, inatsisartut peqqussutaatigut nr. 3-kkut, 30. oktober 1998-imeersukkut kingullermillu inatsisartut peqqussutaatigut nr. 3-kkut, 21. maj 2002-meersukkut allanngortinneqartumi, makku allannguutigitinneqassapput:
1. § 1, imm. 1, nr. 1 ima oqaasertaqassaaq:
"1) Inissianik attartortittakkanik, matumanissaaq ilaqutariinnut ataatsinut illulianik, sananissamut kommuninut tapiissutit, tak. kap. 3."2. § 7 ima oqaasertaqassaaq:
"§ 7. Kommunit attartortittakkanik inissialiornerannut aalajangersimasumik kommuni tapiiffigineqarsinnaavoq. Tapiissuteqarnissamut tunngavissaatitaavoq inissiap minnerpaamik 45 kvadratmeteritut angitiginissaa. Annerpaamik 130 kvadratmeterinut tapiissuteqartoqarsinnaavoq, inissiaq anginerugaluarpalluunniit apeqqutaatinnagu.
Imm. 2. Kommunit inissiaataannut attartortittakkanut tapiissutit imatut aalajangersarneqarput:
1) inissianut 60 kvadratmeterit tikillugit ineqarfissatut angitigisunut tapiissutit kvadratmeterimut 9.700 kr.-iupput.
2) inissianut 60-iniit 85 kvadratmeterit akornanni ineqarfissatut angitigisunut tapiissutit kvadratmeterimut 8.500 kr.-iupput, aamma
3) inissianut 85-iniit 110 kvadratmeterit akornanni ineqarfissatut angitigisunut tapiissutit kvadratmeterimut 8.000 kr.-iupput,
4) inissianut 110-niit 130 kvadratmeterit akornanni ineqarfissatut angitigisunut tapiissutit kvadratmeterimut 7.500 kr.-iupput.
Imm. 3. Imm. 2 malillugu tapiissutit aatsaat tapiissutigineqarsinnaapput init amerlassusissaannik piumasaqaatit kinguliiniittut eqqortinneqarpata:
1) inissiaq marlunnik initalik ineqarfissatut minnerpaamik 45 kvadratmeterisut annerpaamillu 60 kvadratmeterisut angitigissaaq,
2) inissiaq pingasunik initalik ineqarfissatut minnerpaamik 60 kvadratmeterinik annerpaamillu 85 kvadratmeterinik angitigissaaq,
3) inissiaq sisamanik initalik inissatut initussuseqassaaq minnerpaamik 85 kvadratmeterinik annerpaamillu 110 kvadratmeterinik, aamma
4) inissiaq sisamanit amerlanerusunik initalik ineqarfissatut minnerpaamik 110 kvadratmeterinik angitigissaaq.
Imm. 4. Nunatta Karsiata tapiissutai atorunnaassapput allanngortinneqarsinnaanngitsumik isumaqatigiissuteqartoqarpat, imaluunniit Namminersornerullutik Oqartussanit aningaasaliissutit inaarutaasumik atugassanngortinneqarnissaat sioqqullugu sanaartorneq aallartinneqarsimappat."3. § 9, imm. 2, nr. 1 imatut oqaasertaqassaaq:
"1) inissiat attartortittakkat najugarineqartut ineqartunut inissiani ineqarnissamut isumaqatigiissuteqarsimasunut neqeroorutigineqassapput,"4. § 17-mi imm. 5 peerneqassaaq.
5. § 21a-p kingorna ilanngunneqassaaq:
"§ 21b. Inuit ukiuni akileraarfiusuni kingullerni marlunni inoqutigiittut 128.000 kr.-it ataallugit akileraaruteqaataasussanik isertitaqarsimasut akiliutissanillu aamma akiitsut sinnerinik § 21a malillugu isumakkeerinniffigineqarsimasut inigisamik iluarsaanneqarnissaanut, allineqarnissaanut nutarsarneqarnissaanulluunniit tapiiffigineqarnissaminnik qinnuteqarsinnaapput. Tapiissutit annerpaamik 50.000 kr.-inik amerlassuseqarsinnaapput.
Imm. 2. Meeqqamut 18 inorlugit ukiulimmut inuit allattorsimaffiat malillugu najukkami angerlarsimaffeqartutut nalunaarsorsimasumut ataatsimut, taamaattorli amerlanerpaamik meeqqanut arfinilinnut, isertitat killingat, tak. imm. 1, meeqqamut ataatsimut 4.000 kr.-inik qaffanneqartassaaq.
Imm. 3. Tapiiffigineqarnissamik qinnuteqaatit Naalakkersuisunut nassiunneqassapput. Qinnuteqaatit naliliivigineqarneranni iluarsaassinissap, allilerinissap pitsanngorsaanissalluunniit annertussusii qinnuteqartup aningaasaateqassusianut suliassallu suliarineqarnissaanut nammineq pisinnaassuseqassangatinneqarneranut kiisalu illup pisoqaassusianut niuerutigineqarneranilu nalinganut tunngassutillit eqqarsaatigineqassapput.
Imm. 4. Naalakkersuisut inissiap iluarsaanneqarnissaanut, allilernissaanut nutarsarneqarnissaanulluunniit tapiiffigineqarnissamik qinnuteqaatit aqutsivigineqarnissaat pillugu maleruagassanik aalajangersaasinnaapput."6. § 22-mi imm. 5-itut ilanngunneqassaaq:
"Imm. 5. Taarsigassarsisitsinissap akuerineqarnerani illup sananeqarnissaanut piffissaliussaq taarsigassarsisumut nalunaarutigineqarsinnaavoq. Piffissaliussaq qaangerneqarpat taarsigassarsisoq sanaassamut atugassanik atuisinnaajunnaarsitaassaaq taarsigassarsisitsinerlu atorunnaassalluni, Naalakkersuisut allatut aalajangiinngippata."
§ 2.
Peqqussut 1. juni 2003 atuutilerpoq.
Namminersornerullutik Oqartussat, ulloq 15. april 2003
Hans Enoksen/
Mikael Petersen