Peqqussutissatut siunnersuummut nassuiaatit
Nalinginnaasumik nassuiaatit
Peqqussutissatut siunnersuutip saqqummiunneqarnera ineqarnermut tunngasut tamanut tunngatillugu allanngortiteriffigineqarnerannut ilaavoq, tamatuma ilaatigut nassataraa kissaatigineqarmat inuit amerlanerit namminerisaminnik inigisaqalernissaat aammalu inuit namminneq inigisassaannut kommunillu inissiaataannut attartortitakkanut tapiissuteqartarneq pillugu maleruagassat eqaannerulersinneqarnissaat.
Maleruagassat atuuttut malillugit 60/40 atorlugu attartortittakkanik inissialiornermut kommunit sanaartornermut aningaasartuutaasa 60 %-ii Nunatta Karsiata tapiissutigisinnaavai. Kommunip pilersaarutitut kissaatigisani Naalakkersuisunut nassiutissavai, kissaatillu takkussimasut taakkunannga Inatsisartut aningaasanut inatsisissaattut siunnersuummi tulleriiaariffigineqassallutik.
Kommunit ataasiakkaat sanaartugassaatitik suliariumannittussarsiuutereeraangatigit sanaartugassap sananeqarnerani aningaasartuutissaviit aatsaat paasinarsisarput. Suliariumannittussarsioreernermi missingersuutit C-t imaluunniit missingersuutit B-t inaarutaasumillu missingersuutit A-t akornanni nikingassutit annertoorujussuusarnerat nalinginnaavoq. Taamaattumik aamma aningaasat Inatsisartut aningaasanut inatsisaanni ilanngunneqarsimasunut tunngatillugu nikingassuteqartoqartarpoq, tamatuma kingunerigajuppaa Aningaasaqarnermut Ataatsimiititaliaq akuersiteqqaartinnagu aningaasaliissutinik Naalakkersuisut atuisinnaalersitsisinnaasannginnerat. Tamatuma nassatarisinnaavaa sanaartugassap aallartinneqarnissaata kinguarsangaatsiarneqarnera.
Peqqussutissatut siunnersuutip kingunerissavaa kommunip attartortittakkanik inissialiornerminut tapiissutinik aalajangersimasunik tigusisalernissaa inissiani kommunip sanassallugit kissaatigisaani inissiami ineqarfissatut initussutsip kvadratmeterit amerlassusiat tunngavigalugu naatsorsorneqartunik. Taamaalilluni pilersaarutip pineqartup suliarinnittussarsiuunneqarnerata inernera tapiissutinut aalajangiisuujunnaassaaq. Tamatuma kingunerissavaa suliarinnittussarsiuussereernikkut kommunip sanatitsisutut atuisinnaatitaalernissaminik qinnuteqarsinnaanera sanaartugassamillu aallartitsisinnaanera.
Naalakkersuisut isumaqarput sanaartugassanut aningaasartuutit sapinngisamik appasinnerpaamiitinnissaat anguniarneqartariaqartoq. Taamaattumik ilaatigut piginneqatigiilluni inissialiornerit kvadratmeterimut 15.000 kr.-it taamaallaat tikillugit aammalu 10/40/50 atorlugu sanaartugassanut taarsigassarsiarititat kvadratmeterimut 13.500 kr.-it tikillugit tapiiffigineqartarput. Taamaattumik pitsaasuussanngilaq pisortat namminersortumik sanatitsisut unammillertigalugit kvadratmeterimut 19.000 kr.-it tikillugit akeqartunik pisortat attartortittakkanik inissialiortarnissaat akuerineqarpat. Taamatut pisoqarpat inuinnaat sanaartornermut akiliutissaat suli qaffasinnerulersinneqassapput.
Tamanna tunuliaqutaralugu peqqussutissatut siunnersuutip imaraa periusissaq, taanna malillugu tapiissutit inissiami inissatut initussutsimut kvadratmeterimut ataatsimut aalajangersimasumik tapiissutitut tunniunneqartalissallutik inissiat angissusiisa assigiinngitsut iluini naatsorsorneqartoq.
Tabel 1: Inissiamut ineqarfissatut 75 kvadratmeterinik angitigisumut
m2-mut sanaart. aningaasartuutit 60/40 malillugu tapersiissutit Siunnersuut nutaaq malillugu tapers. 13.500,00 607.500,00 709.500,00 14.500,00 652.500,00 709.500,00 15.750,00 708.750,00 709.500,00 16.500,00 742.500,00 709.500,00 17.500,00 787.500,00 709.500,00
Tabel 2: Inissiamut ineqarfissatut 90 kvadratmeterinik angitigisumut
m2-mut sanaart. aningaasartuutit 60/40 malillugu tapersiissutit Siunnersuut nutaaq malillugu tapers. 13.500,00 729.000,00 834.500,00 14.500,00 783.000,00 834.500,00 15.450,00 834.300,00 834.500,00 16.500,00 891.000,00 834.500,00 17.500,00 945.000,00 834.500,00
Tabel 3: Inissiamut ineqarfissatut 105 kvadratmeterinik angitigisumut
m2-mut sanaart. aningaasartuutit 60/40 malillugu tapersiissutit Siunnersuutnutaaq malillugu tapers. 13.500,00 850.500,00 954.500,00 14.500,00 913.500,00 954.500,00 15.150,00 954.450,00 954.500,00 16.500,00 1.039.500,00 954.500,00 17.500,00 1.102.500,00 954.500,00 Tabelini 1, 2 aamma 3-mi takuneqarsinnaasutut 60/40 malillugu tapersiissutit aamma aalaja-ngersimasumik tapiissuteqartarnissamik aaqqissuussinissamik siunnersuut malillugu tapersiissutit nikinganeqanngiffiat kvadratmeterimut ataatsimut 15.150 aamma 15.750 kr.-it akornisa missaanniippoq inissiap angissusia apequtaalluni.
Kommunip 75 kvadratmeterinik inissamik initussusilimmik inissialiortup aaqqissuussinissatut siunnersuut iluaqutigissavaa sanaartornermi aningaasartuutit kvadratmeterimut 15.750 kr.-it ataanniitissinnaagunit. Kommunip 105 kvadratmeterinik inissamik initussusilimmik inissialiortup aaqqissuussineq iluaqutigissavaa sanaartornermi aningaasartuutit kvadratmeterimut 15.150 kr.-it ataanniitissinnaagunigit.
Tassunga atatillugu oqaatigineqassaaq misilittakkat takutikkaat angisuunik inissialiorani mikisunik inissialiornerit atortulersuutit masattuleriffiillu pissutigalugit akisunerungaatsiartartut. Atortulersuutinut masattuleriffinnullu aningaasartuutit inissianut anginernut naleqqiullugu inissiani mikisuni aningaasartuutaanerusarput.
Peqqussutissatut siunnersuutip imaraattaaq boligstøttikkoortumik illuutillit akiliutissaminnik akiitsullu sinnerinik isumakkeerinniffigineqarsimasut illuminnik iluarsaanissamut, allilerinissamut nutarsaanissamulluunniit tapiiffigineqarnissaminnik periarfissinneqarnissaannik siunnersuut. Taamaattumik inuit pineqartut boligstøtte pillugu maleruagassat malillugit iluarsaassinissamut pitsanngorsaanissamulluunniit taarsigassarsiniarnissaminnut periarfissaarutissapput. Taakku isumakkeerinniffigineqarnerminnut atatillugu taarsiullugu 10/40/50 malillugu taarsigassarsiniarnissaminnut periarfissinneqaraluarput, sumiiffinnili arlalinni naatsorsuutigisariaqarpoq Namminersornerullutik Oqartussaniit taarsigassarsiarisinnaasamik 40 %-iusut sinnerisa pissarsiariniarnissaat ajornartorsiutigissagaat.
Peqqussutissatut siunnersuut KANUKOKA-mut, SIK-mut, Isumaginninnermut Suliffeqarnermullu Pisortaqarfimmut, Aningaasaqarnermut Pisortaqarfimmut kiisalu A/S Inissiaatileqatigiiffik INI-mut isummerfigeqqusissutigineqarsimavoq (tusarniaassutigineqarsimavoq). Aammattaaq siunnersuut inatsisissanik nalilersuisarfimmit misissuataarneqarsimavoq. Tamakku kingorna oqaaseqaatit naleqquttut tunuliaqutaralugit siunnersuut iluarsaanneqarsimavoq.
Peqqussutissatut siunnersuutip allaffissornikkut kingunerisassaiKommunit inissiaataannut attartortittakkanut sanaartornermut tapiissutit aqutsivigineqarnerat maleruagassanut atuuttunut naleqqiullugu pisariinnerulissaaq, tassa kommunit ataasiakkaat qinnuteqaataat ataasiaannarluni suliarineqartalissammata. Taamaattumik qinnuteqaammut aalajangiisuujunnaarpoq missingersuutit C-t, B-t imaluunniit A-t ilanngullugit nassiunneqarnissaat.
Peqqussutissatut siunnersuutip aningaasatigut kingunerisassaiSiunnersuutip nassataraa inuit boligstøttemit taarsigassarsiaminnut akiliutissaminnik akiitsullu sinnerinik isumakkeerinniffigineqarsimasut illuminnik iluarsaanissamut, allilerinissamut nutarsaanissamulluunniit tapiiffigineqarnissaminnik qinnuteqarsinnaanerat. Tapiissutit amerlanerpaamik 50.000 kr.-inik amerlassuseqarsinnaapput. Naatsorsuutigineqarpoq inuit amerlanerpaamik 972 tapiiffigineqarnissaminnik qinnuteqarsinnaasut, tak. ataaniittut.
AIS 2003-mi kontumi pingaarnermi 87.72.23-mi, Boligstøtte, iluarsaassinermut tapiissutit, 5.000.000 kr.-inik aningaasaliiffigineqarluni missingersuusiorfigineqarpoq, taakku naapertuupput tapiissutigineqarsinnaasut amerlanerpaaffissaannut 50.000 kr.-iusunut 100-nut.
Tabel 4: Boligstøttikkoortumik taarsigassarsisimasut kommunikkuutaartumik nunallu immikkoortukkuutaartumik agguataarsimanerat
Kommune Disko
Qeqqa
Avanna
Tunu
Kujataa
Kisit. ping.
Ammassalik 397
397
Ilulissat 269
269
Ittoqortoormiit 79
79
Ivittuut 1
1
Kangaatsiaq 261
261
Maniitsoq 191
191
Nanortalik 1
326
327
Narsaq 197
197
Nuuk 158
158
Paamiut 100
100
Qaqortoq 145
145
Qasigiannguit 156
156
Qeqertarsuaq 162
162
Qaanaaq 112
1
113
Sisimiut 1
242
1
244
Upernavik 1
482
483
Uummannaq 1
533
534
Aasiaat 242
242
(Inoqanng.) 3
3
1
3
1
11
Katillugit 1.096
695
1.129
480
670
4.070
Tabel 4-mi takuneqarsinnaavoq inuit katillugit 4.070 boligstøttikkoortumik taarsigassarsiaqartut suli akilersorneqartunik. Taakku agguataarsimapput Qeqertarsuup eqqaani 1.096-inut, Qeqqani 695-inut, Avannaanni 1.129-nut, Tunumi 480-inut Kujataanilu 670-inut.
Tabel 5: Taarsigassarsisimasut isertitaat malillugit kommuninut agguataarnerisa amerlassusaat
Kommune Ataallu 128.000 128.000-
139.999140.000-
149.999150.000-
159.999160.000-
169.999170.000-
179.999180.000-
189.999190.000-
199.999Total Ammassalik 138 13 11 17 13 8 7 8 215 Ilulissat 45 6 7 7 6 1 6 7 85 Ittoqqortoormitt 22 3 1 6 2 4 4 - 42 Ivittuut - - - - - - - - 0 Kangaatsiaq 89 11 7 12 11 13 10 4 157 Maniitsoq 48 7 9 5 4 7 4 3 87 Nanortalik 109 12 12 10 7 10 9 14 183 Narsaq 53 10 3 6 3 4 2 8 89 Nuuk 29 2 2 2 3 3 2 5 48 Paamiut 20 5 3 2 3 5 2 4 44 Qaqortoq 35 3 3 7 2 4 3 3 60 Qasigiannguit 24 2 4 5 4 2 3 5 49 Qeqertarsuaq 23 - 2 2 2 3 1 6 39 Qaanaaq 31 7 3 2 8 2 4 7 64 Sisimiut 46 5 7 5 8 7 8 7 93 Upernavik 94 15 19 7 18 16 15 17 201 Uummannaq 100 17 18 13 15 17 14 9 203 Aasiaat 59 5 4 8 11 7 4 5 103 (Inoqanng.) 7 - - 1 - - 1 - 9 Pingrnerit 972 123 115 117 120 113 99 112 1771 Tabel 5-imi takuneqarsinnaavoq taarsigassarsisimasut 972 akileraarutaasussanik 128.000 kr.-it ataallugit inoqutigiittut isertitaqartartut. Taarsigassarsisimasut ilaat 386 akiligassaminnik akiligassanngorsimasunik taarsigassarsiamillu sinnerinik isumakkeerfigineqarnissamut piumasaqarsinnaapput. Ilanngaatissat ilanngaatigereerlugit taarsigassarsisimasut inatsisit atuuttut malillugit akiligassaminnik akiligassanngorsimasunik taarsigassarsiamillu sinnerinik isumak-keerfigineqarnissamut qinnuteqarsinnaasut 586-iupput. Taarsigassarsisimasut 972 taakku akiligassaminnik akiligassanngorsimasunik taarsigassarsiamillu sinnerinik isumakkeerfigineqarunik illumik iluarsaannissaanut, allilernissaanut pitsanngorsaanissaanulluunniit tapiiffigineqarnissaminnik qinnuteqarsinnaapput. Taarsigassarsisimasut 1.771-it 4.070-illu akornanniittut tassaapput 199.999 kr.-it sinnerlugit isertitaqartartut.
Siunnersuutip aamma nassatarissavaa sanaartugassatut suliassap suliarinnittussarsiuunneqarnerata inernera tunngavigalugu sanaartornermi aningaasartuutit tamarmiusut 60 %-iisa kommunimit tapiissutisiarineqartarunnaarnissaat. Taamaattumik kommuni sanatitsisutut sanaartornermi aningaasartuutit sapinngisamik appasinnerpaaffissaminniitinniarnissaannut piumassuseqarnerulissaaq aningaasartuutinit tamarmiusunit Namminersornerullutik Oqartussat tapiissutaat aalajangersimasut amerlanerpaatinniarlugit, tak. tabelit 1-3.
Naatsorsuutigineqarpoq kommunit attartortittakkanik inissialiornerinut tapersiissutissanut Nunatta Karsiata aningaasaliissutigisartagai allannguuteqassanngitsut. Siunnersuutip nassatarissavaa Inatsisartut aningaasanut inatsisaatigut aningaasaliissutit pilersaarummut aggulutatut sanaartornermut aningaasaliissutaajunnaarlutik tapiissutitut aningaasaliissutinut allanngornerat.
Maleruagassat atuuttut malillugit kommunit attartortittakkanik inissialiornerinut sanaartornermi aningaasartuutit 60 %-ii Nunatta Karsianit tapiissutigineqarsinnaapput. Maannakkumut attartortittakkanik 60/40 atorlugu inissialiornissamut kommunit kissaatitik Naalakkersuisunut nassiuttarpaat, taakkulu kissaatit tiguneqarsimasut Inatsisartut aningaasanut inatsisissaannut siunnersuummi tulleriinnilersortarpaat sanaartugassatut immikkuutaartutut tamarmik ataasiakkaarlutik suliassatut pilersaarutitut normulersorlugit. Aningaasanut inatsisip akuersissutigineqarneratigut pilersaarutit Sanaartugassanut Iluarsagassanullu Aningaasaateqarfimmut nuunneqartarput. Periuseq aalajangersimasoq taanna peqqussutissatut siunnersuutikkut allanngortinneqanngilaq, tak. ataaniittut.
Sanaartukkanut kommunit ataasiakkaat sanatitsisutut Nunatta Karsiatalu taamaallaat tapersiissuteqartutut inissisimanissaasa aalajangiusimaneqarnissaa pingaarpoq. Taamaattumik naleqqunnerpaasorineqarpoq sanatitsisut ataasiakkaat kinguaattoornernut, akisuallaarutinut il.il. akisussaasuussasut. Maannakkumut periusiusimasup nassataraa naleqqutinngitsumik suliakkersuivallaarneq. Sanaartugassanut Iluarsagassanullu Aningaasaateqarfiup pilersinneqarneratigut allaffissornikkut missingersuusiornikkullu oqilisaassinissat naatsorsuutigineqartut suliassani taamaattuni pinngitsoorsimapput.
Tamatumunnga pissutaavoq pilersaarutit ataasiakkaat pillugit paasissutissat naammattutut pisariaqartullu amerlanerpaatigut kommuninit nassiunneqartannginnerat, tamatumunnga ilaatigut pissutaasinnaavoq qinnuteqaatip nassiunneqarnerata nalaani pilersaarutip missingiutaannaagallarnera. Tamatuma nassatarisarpaa pilersaarutip aningaasaliissutinut inatsimmi ilanngunneqareerneratigut pilersaarummut aningaasalersuinissamut tunngavissat pilersaarutillu allaaserineqarnerata allannguuteqartarnerat.
Ilanngullugu innersuussutigineqassaaq 2002-mut Missingersuusiornermi malittarisassaq, atuinissamut maleruagassat, tassani ilaatigut atuarneqarsinnaavoq pilersaarut Sanaartugassanut Iluarsagassanullu Aningaasaateqarfimmut nuunneqareeraangami nalinginnaasumik ingerlaannartumik akuersissutigineqartoq pilersaarullu aningaasaliisartutut oqartussanit imaluunniit Naalakkersuisunit akuersissutigeqqinneqanngikkaluarluni ingerlanneqarsinnaasoq. Tamatumanili tunngavissaatitaavoq aningaasartuutissat tamarmiusut akuersissutigineqartut, pilersaarummut aningaasaliissutit, eqquutitinneqarsinnaanissaat, aammalu pilersaarut aningaasaliinermi tunngavissaatitaasut naapertorlugit ingerlanneqassasoq.
Pisunili arlalinni pilersaarutinut aningaasartuutaanerusut 2002-mut Missingersuusiornermi malittarisassap immikkoortuani 8.5.5.1 killiliussat iluiniitinneqarnissaat ajornartarsimavoq. Tamatuma nassatarisarpaa pisuni arlalinni aningaasalersuinissamut tunngavissat nutaat aamma pilersaarutip allaaserinerata nutaamik suliarineqarnissaat, taakkulu aningaasaliisartutut oqartussanit akuerisassangnorlugit saqqummiunneqartussaapput. Taamaattumik Sanaartugassanut Iluarsagassanullu Aningaasaateqarfiup pilersinneqarneratigut allaffissornikkut missingersuusiornikkullu oqilisaassinissat naatsorsuutigineqartut suliassani taakkunani pinngitsoorsimapput.
Taamaattumik kommunit ataasiakkaat pilersaarutitut siunnersuutaat/qinnuteqaataat uppernarsaasersorluakkat pissutissalersorluakkallu tunuliaqutaralugit aningaasaliissutit killilikkat Aningaasanut inatsisip ukiuani piviusungortinneqartussatut ilanngunneqassasut siunnersuutigineqarpoq. Pilersaarutitut siunnersuutit tiguneqartut tunuliaqutaralugit aningaasaliissutit killilikkat ukiumi aningaasaliiffiusumi Naalakkersuisut atuiffigissavaat aammalu atuineq pilersaarutinut agguataagaq Inatsisartut Aningaasaqarnermut Ataatsimiititaliaannut nalunaarutigissallugu, tamakkua kingornatigut pilersaarutit ataasiakkaat sanaartugassamut tapiissutinik aalajangersimasumik aningaasaliissutitalerlugit Sanaartugassanut Iluarsagassanullu Aningaasaateqarfimmut nuunneqartassapput. Pilersaarutini akisuallaarutaasinnaasut Namminersornerullutik Oqartussanit pisussaaffiussanngillat.
Aalajangersakkanut ataasiakkaanut nassuiaatit
§ 1-imi nr. 1-imut
Aalajangersakkap nassatarissavaa kommunit attartortittakkanik inissialiornerisa, matumanissaaq ilaqutariinnut ataatsinut illulianut, kapitali 3 malillugu taamaallaat tapiissuteqartoqartalernissaa. Siusinnerusukkut kommunit inissiaataasa attartortitakkat allilerneqarnerannut pitsaanerulersinneqarnissaannulluunniit kommunit tapiiffigineqarsinnaasarsimapput. Periarfissap taassuma atorunnaarsinneqarneranut tunuliaqutaavoq kommunit inissiaataat attartortittakkat amerlanerit 1982-ip kingornatigut sananeqarsimanerat, ukioq taanna Namminersornerullutik Oqartussat Danskillu naalagaaffiata akornanni iluarsaassinissaq pillugu isumaqatigiissutaanni killiliussaavoq. Tamatuma saniatigut allilerineq pitsaanerulersitsinerlu iluarsaassinissaq pillugu isumaqatigiissummi pineqartut avataanniipput.
Tamatuma peqatigisaanik sanaartornermi aningaasartuutinit aningaasaliissutinit iluanaarutit, aamma Namminersornerullutik Oqartussat pisassarisaat, kommunit pissarsiarisarpaat. Namminersornerullutik Oqartussat sanaartornermi aningaasartuutit tamarmiusut 60 %-iinik tapiissuteqarsimapput, inissiallumi ilaannut aamma 80 %-inik, sanaartornermilu aningaasartuutinit tamarmiusunit aningaasaliissutinit iluanaarutit kommunit ataasiakkaat pissarsiarisarlugit, tassa aamma Namminersornerullutik Oqartussat aningaasalersueqataaffigisimasaat.
60/40 atorlugu sanaartukkami sanaartornermut aningaasartuutit kvadratmeterimut 15.000 kr.-iuppata, taava imaappoq kommunip sanaartornermi aningaasartuutiminit 6.000 kr.-iusunit (15.000 kr.-it 40 %-ii) aningaasaliissutiminit iluanaarutimi 6.000 kr.-it 1,5 %-iisa 90 kr.-inut naapertuuttut pissarsiarinerisa saniatigut aamma Namminersornerullutik Oqartussat sanaartornermi aningaasartuutaannit 9.000 kr.-iusunit aningaasaliissutiminnit iluanaarutissaat 1,5 %-it 135 kr.-inut naapertuuttut pissarsiarisarpaat. Taamaattumik kvadratmeterimut ataatsimut ani-ngaasaliissutinit iluanaarutit 225 kr.-it kommunit pissarsiarisarpaat, tassalu imaappoq kommunit aningaasat aningaasalersuissutimi 3,75 %-ii aningaasaliissutinit iluanaarutigisarpai.
§ 1-imi nr. 2-mut
Aalajangersakkap nassataraa inissialiornissamut, inissiat ataasiakkaat inissatut initussusiat minnerpaamik 45 kvadratmeterinik angissuseqarpat, tapiiffigineqarnissaminik kommunip qinnuteqarsinnaanera. Inissiap ineqarfissatut initussusia tapiissuteqarfigineqarsinnaasoq annerpaamik 130 kvadratmeteriuvoq, tassa inissiaq anginerugaluarpalluunniit.
Tapiissutit kvadratmeterimut ataatsimut aalajangersimasumik aningaasartaqarput tapiissutillu inissiap angissusia malillugu angissusilerneqassapput. Inissiami ineqarfissatut initussuseq 60 kvadratmeterit tikillugit tapiissutit 9.700 kr.-iupput. Inissiat inissatut initussusii 60-iniit 85 kvadratmeterinut angissusillit kvadratmeterimut 8.500 kr.-inik tapiiffigineqassapput, inissiat ineqarfissatut initussusii 85-iniit 110 kvadratmeterinut angissusillit kvadratmeterimut 8.000 kr.-inik tapiiffigineqassasut kiisalu inissiat ineqarfissatut initussusiat 110-niit 130 kvadratmeterinut angissusillit kvadratmeterimut 7.500 kr.-inik tapiiffigineqassallutik.
Assersuutigalugu inissiaq 91 kvadratmeterinik angissusilik 842.500 kr.-inik tapersiissutigineqassaaq. Aningaasat ukunannga katitigaapput: (60 m2 * 9.700 kr.) + (25 m2 * 8.500 m2) + (6 m2 * 8.000 kr.) = 842.500 kr.
Inissiat angissusilerneqarnissaat inatsisiliornikkut aalajangersagaanngilaq maleruagassarli allanneqarsimanngitsoq atorneqarsimavoq. Nalinginnaavoq inissiap marlunnik initallip 45 kvadratmeterit missaannik inoqutigiinnullu inissiat anginerpaat arfineq-marlunnik initallit 120 kvadratmeterit missannik angissuseqartarnerat. Kisianni inoqutigiit inissamik pisariaqartitsinerat taamaaginnartuunngilaq, inoqutigiillu sisamanik inuttallit tamarmik inissamik assigiimmik pisariaqartitsisuunngillat. Nunani sanilerisatsinni, t.i. Canadami Islandimilu, inissiap angissusissaanut piumasaqaatit ukiut 20 kingulliit ingerlaneranni aamma annertusiartorsimapput. Inuit ullumikkut anginerusunik amerlanerusunillu pequteqartarput ukiut 20 matuma siornamut naleqqiullugu. Maannamut assersuutigalugu inoqutigiinnut marlussunnik meeralinnut inissiaq 80 kvadratmeteriusoq naleqqussimavoq.
Kommunit ataasiakkaat sanatitsisutut inissiaatimik qanoq iluseqarnissaat, matumanissaaq teknikikkut pitsaassusissaat, atortulersorneqarnerat angissusilerneqarnerallu, aalajangertarpaat.
Naalakkersuisut siunnersuutigaat inissiaq marlunnik initalik 60 kvadratmeterinit, inissiaq pingasunik initalik 85 kvadratmeterinit inissiarlu sisamanik initalik 110 kvadratmeterinit anginerussanngitsoq aammalu inissiaq sisamanit amerlanerusunik initalik minnerpaamik 110 kvadratmeterinik angissuseqassasoq.
Inatsisartut aningaasanut inatsimmii sanaartugassanik pingaarnersiuinissaat qulakkeerniarlugu aalajangersagaq ilanngunneqarpoq, tassaasoq kommunip sanaartorneq aallartissappagu imaluunniit allanngortinneqarsinnaanngitsumik isumaqatigiissusiorpat tapiissutitut aningaasaliussat atugassanngortinneqarnissaat sioqqullugu sanaartorneq aallartissimappagu, Nunatta Karsiata sanaartornermut tapiissutai atorunnaassapput.
§ 1-imi nr. 3-mut
Tamatumani taamaallaat pineqarpoq aalajangersakkap oqaasertaasa iluarsaannerat.
§ 1-imi nr. 4-mut
Utertitsinikkut illup nalingata naatsorsornerani isumaqatigiinngissutit Eqqartuussisuuneqarfimmut suliassanngortinneqarsinnaanera pillugu siusinnerusukkut aalajangersaq atorunnaarpoq. Taamaalilluni isumaqatigiinngissutaasinnaasut Eqqartuussivimmi, tassa eqqartuussivimmi suliakkerneqartussami, suliassanngortinneqassapput.
§ 1-imi nr. 5-imut
Aalajangersakkap nassataraa inuit inoqutigiittut ukiuni marlunni isertitatik akileraarutaasussat 128.000 kr.-inik appasissuseqarnerat pissutigalugu akiliutissanik aamma akiitsut sinnerinik isumakkeerinniffigineqarsimasut inigisaminnik iluarsaassinissamut, allilerinissamut pitsanngorsaanissamulluunniit tapiiffigineqarnissaminnik qinnuteqarsinnaanerat. Matumani pineqarput qinnuteqartut inoqutigiittut ukiumut isertitaat akileraaruteqaataasussat 128.000 kr.-inik appasinnerusut, taakku qummut iluarsiivigineqartassallutik meeqqamut angerlarsimaffimmi najugaqartumut 18 ataallugit ukioqartumut ataatsimut 4.000 kr.-inik.
Qinnuteqaatip naliliivigineqarnerani iluarsaassinissap, allilerinissap nutarsaanissalluunniit annertussusii qinnuteqartup aningaasaateqassusianut suliassallu suliarineqarnissaanut nammineq pisinnaassuseqassangatinneqarneranut kiisalu illup pisoqaassusianut niuerutigineqarneranilu nalinganut tunngassutillit eqqarsaatigineqassapput.
Tamatuma nassataraa illut najugarineqarsinnaasutut nalillit pillugit qinnuteqaatit kisimik suliarineqartarnissaat. Illu isatertariaannaappat imaluunniit ima pitsaanngitsigippat iluarsaannissaa imminut akilersinnaanani taava qinnuteqaat itigartinneqassaaq.
Kiisalu suliassamik annerpaamik isumaginnissinnaasunit inunnit qinnuteqaatit salliutinneqassapput. Illu taarsigassarsisitseriaatsinik allanik atuiffiusinnaasumiippat, soorlu 10/40/50 atorlugu taarsigassarsiffiusinnaasumi, aningaaserivimmit imaluunniit aningaasalersuisarfimmit taarsigassarsiffiusinnaasumi tapersiiffigineqarsinnaassanngilaq.
§ 1-imi nr. 6-imut
Aalajangersakkap nassataraa nammineq illuliorniartup sanaassamut atugassat tiguneriniit nammineq illualiap sananeqarnissaanut piffissalerneqarnerminik nalunaarfigineqarsinnaanera. Piffissarititaq qaangerneqarpat nammineq illuliorniartup sanaassamut atugassanik atuisinnaatitaanini annaassavaa taarsigassarsisitsinerlu atorunnaassalluni. Piffissaliussaq Naalakkersuisut immikkut akuersissuteqarfigisinnaavaat.
Piffissaliussap sivisussusissaa sumiiffimmi pissutsinut naleqqussarneqassaaq, taamaattumik ilaatigut sikuusarnera, sikorsuaqartarnera, nunap qerinera, immakkut angallannermut tunngasut il.il. mianerineqassapput. Piffissaliussaq assersuutigalugu ukiut marluk imaluunniit pingasuusinnaapput.
§ 2-mut
Aalajangersakkap nassataraa peqqussutissatut siunnersuutip 1. juni 2003-mi atuutilernissaa.