Namminersornerullutik Oqartussat kommunellu inissiaataannik attartortittakkanik attartortitsisarneq pillugu Namminersornerullutik Oqartussat Nalunaarutissaattut nr. 23, 22. december 2003-meersoq.
Inissianik attartortitsineq pillugu Inatsisartut peqqussutaanni nr. 5, 31. maj 2001-imeersumi Inatsisartut peqqussutaatigut nr. 18, 12. november 2001-imeersukkut, Inatsisartut peqqussutaatigut nr. 2, 21. maj 2002-meersukkut aamma Inatsisartut peqqussutaatigut nr. 3, 15. april 2003-meersukkut allanngortinneqartarsimasumi § 3, imm. 6, § 4, imm. 5, § 8, imm. 3, § 9, imm. 4, § 10, imm. 5, § 17, imm. 6, § 21, imm. 3, § 38, § 39, imm. 4, § 56, imm. 3, § 57, imm. 4 aamma § 60a, imm. 6, naapertorlugit aalajangersarneqarput:
Kapitali 1
Atuuffissaa§ 1. Nalunaarutip atuuffigissavai Namminersornerullutik Oqartussat kommunellu inissiaataat attartortittakkat, taakkununnga ilaallutik inissiarsuit, illut illullu marloqiusat, kiisalu ineeraqarfiit ineeqqallu ataatsimoortut taakkunaniittut. Inissiarsuartut naatsorsuunneqassapput quleriiaanik initallit, illut uiguleriiaat aamma illut ataqatigiiaat minnerpaamik pingasunik inissiartallit. Ineeraqarfinnik paasineqassapput inissiat ataasiinnarmik initallit nammineerlutik igaffeqanngitsut, kissaasarfeqarlutilli, uffarfeqarlutilli perusuersartarfeqartut, ineeqqallu ataatsimoortut paasineqassallutik inissiami ataatsimi ineeqqat ataasiakkaat igaffimmut uffarfimmullu ataatsimoorussamut periarfissaqartitaasut.
Imm. 2. Nalunaarutip atuuffigissanngilai atorfimmut atatillugu inigisassatut immikkoortitikkat, attartornerit imaluunniit inissiat inatsisinit immikkut inatsisiliaasunit malittarisassaqartitaasut.
Imm. 3. §§ 49-53-mut aamma §§ 55-60-mut aalajangersakkat inissianut ukununnga atussanngillat:
1) Inissiat attartortitsisumit siunertanut aalajangersimasunut inniminnikkat, soorlu inissiat aalajangersimasunut atugassanngortitat, Namminersornerullutik Oqartussat pisortanut inigititaat, nunaqarfinni ilinniartitsisut inaat, inuussutissarsiutinik ineriartortitsineq assigisaalluunniit.
2) Inissiat illorsuarmi sulisunut attartortitsisumit atorfeqartitaasunut inigitinneqartut.
3) Inissiat innarluutilinnut imaluunniit aalaniarnerluttunut immikkut sanaat imaluunniit aaqqissuunneqarsimasut.
Imm. 4. § 50, imm. 1-mi, aamma § 52-mi aalajangersakkat inissianut sulisut inissiaattut sullissivinnut ataatsimoorullugit sulisunut inissiaatigineqartuni Naalakkersuisunit aalajangersagaasuni inissianut normoqartitaasunut atugassanngortitaasimasunut atortinneqassanngillat.
Imm. 5. §§ 50-mi aamma 53-mi aalajangersakkat atortinneqassanngillat:
1) Iluarsaassinernut ingitserillunilu nutarterinernut atatillugu Namminersornerullutik Oqartussat kommunalbestyrelsilluunniit inissarsissusseqqinnissamik pisariaqartitsineri piviusunngortinniarlugit inissiaq inissiatut taartigititassatut innersuunneqassappat.
2) Ineqarnikkut inuuniarnermi ajornartorsiutit nukinginnartut aaqqiivigineqarnissaannut inissiaq kommunalbestyrelsimut atugassanngortinneqarpat.
Imm. 6. § 50, imm. 1-mi aamma 2-mi aalajangersakkat atortinneqassanngillat inimik qularnaveeqqusiisimaneq eqqortinniarlugu inissiaq innersuunneqarpat.
Kapitali 2
Ineqarfittut immikkoortortat immikkoortortaqarfiillu siulersuisui§ 2. Ineqarfittut immikkoortortamut ataatsimut taamaallaat atasuusinnaapput inissiat attartortitsisumut ataatsimut atasuusut, annerpaamillu atasuusinnaallutik inissiat 900-t.
Imm. 2. Attartortitsisoq tassaavoq ineqarfimmi ataatsimi inissiat katitigaanissaannik kiisalu agguataarneqarnissaannik imaluunniit ineqarfikkaartut katigunneqartarnissaannik aalajangiisartussaq.
Imm. 3. Inissiami attartortittakkami inissiat tamarmik ineqarfittut immikkoortortamut ataatsimut ilaatinneqassapput.§ 3. Ineqarfittut immikkoortortat marluk arlallilluunniit nutaamik ineqarfittut immikkoortortanngorlutik imminnut katigussinnaapput, tamanna attartortitsisumit aalajangiunneqarpat.
Imm. 2. Katigunneq taamaallaat pisinneqarsinnaavoq ineqarfittut immikkoortortanut aningaasarliunngitsunut imaluunniit ingerlatsinikkut amigartooruteqanngitsunut.
Imm. 3. Ineqarfittut immikkoortortap katigunneqarsimasup ingerlanneqarnissaa aalajangersaavigineqassaaq ineqarfittut immikkoortortat maannamut ingerlatsinerisimasaat isiginiarlugit annertussusaasimasut imminnut naleqqiunnerisa kisitsisitaat aallaavigalugit, imaalilluguli annertussutsit imminnut naleqqiunnerisa kisitsisitaat sivisunerpaamik ukiut 10-it ingerlaneranni naligiissinneqarsimasussanngorlugit.
Imm. 4. Imm. 2-mi aalajangersagaq atuutissanngilaq ineqarfittut immikkoortortaqarfiit taamaallaat illunik illunillu marloqiusanik imaluunniit ineqarfittut immikkoortortaqarfinnik 150-nit ikinnerusunit inissiartaqartunit ataffigineqartussat katinneqarnissaannut.§ 4. Ineqarfittut immikkoortortaqarfiit ataasiakkaarlutik nammineerlutik aningaasalersortuussapput.
Imm. 2. Ineqarfittut immikkoortortaq ineqarfittut immikkoortortat allat pisussaaffiinnut pisussaatinneqarsinnaanngilaq.§ 5. Pilersitsiniarluni immikkoortortap ataatsimiitinneqarnissaanik ineqarfittut immikkoortortaqarfimmi attartortut sulissutiginnittuusinnaapput, immaqa attartortitsisumut saaffiginnillutik qinnuvigalugu ataasimiigiaqqusinissamik isumaginneqqullugu.
Imm. 2. Pilersitsiniarluni immikkoortortaqarfiup ataatsimiitinneqarnissaanut immikkoortortaqarfimmi attartortut tamakkerlutik aggersarneqassapput. Aggersaaneq tamanut allagarsiinikkut, najukkami atuagassiakkut nalunaarutiginninnikkut imaluunniit attartortunut tamanut allagaqarnikkut sivikinnerpaamik ullunik 14-ninik siumut ilisimatitsilluni pitinneqassaaq. Peqatigitillugulu attartortoq allakkatigut aggersarneqassaaq.
Imm. 3. Pilersitsiniarluni immikkoortortap ataatsimiinnissaanut isersinnaatitaallutillu taasisinnaatitaasussat tassaapput immikkoortortaqarfimmi attartortut, aappaat aamma inuit sivikinnerpaamik ukiuni 2-ni attartortumik ataatsimoortumik inoquteqarsimasut. Aalajangiinerit pisassapput najuuttut amerlanerussuteqarfiginnittarnerisigut. Inoqutigiit qanorluunniit amerlatiginerat apeqqutaatinnagu attartorneq ataaseq taasinernik 2-nik naleqassaaq. Attartortoq sinnersigisassaminut piginnaatitsissuteqarluni ornigussinnaatitaavoq. Attartortitsisoq aammattaaq immikkoortortap ataatsimiinneranut aggersinnaatitaavoq taasisinnaatitaassananili.
Imm. 4. Immikkoortortaqarfiup ataatsimiinnermini ataatsimiinnermut aqutsisussani nammineerluni toqqassavaa.
Imm. 5. Attartortut nammineerlutik imm. 1 naapertorlugu pilersitsiniarlutik immikkoortortap ataatsimiitinneqarnissaanik suliniuteqalinngippata, attartortitsisoq pisussaavoq ineqarfittut immikkoortortaqarfiup pilersinneqarneraniit qaammatit 6-it qaangiutsinnagit ataatsimiigiaqqusissalluni.§ 6. Pilersitsiniarluni immikkoortortaqarfiup ataatsimiinnerani immikkoortortaqarfiup siulersuisussaanik pilersitsineqassanersoq aalajangiivigineqassaaq.
Imm. 2. Immikkoortortaqarfiup siulersuisussaanik pilersitsineqanngippat, tak. imm. 1, piaarnerpaamik qaamatit 6-it qaangiunneranni pilersitsiniarluni immikkoortortaqarfiup ataatsimiinnissaanut aggersaasoqarsinnaavoq, tak. § 5, imm. 1-4.§ 7. Immikkoortortaqarfinni 150-nit ikinnerusunik inoqutigeeqarfiusuni immikkoortortaqarfiup siulersuisui inuttaqartinneqassapput siulittaasumik aammalu ilaasortanik marlunnik immikkoortortaqarfiup ataatsimiinnerani qinerneqartussanik. Immikkoortortaqarfinni 150-nik amerlanerusunilluunniit inoqutigeeqarfiusuni immikkoortortaqarfiup ataatsimiinnerata aalajangiivigisinnaavaa ilaasortanik suli marlunnik qinersisoqaqqissanersoq. Aammattaaq siulittaasup ilaasortallu sinniisissaannik qinersineqartassaaq.
Imm. 2. Immikkoortortaqarfiup siulersuisuinut ilaasortassatut qinigaasinnaatitaasut tassaapput immikkoortortaqarfimmi attartortut, aappaat aamma inuit sivikinnerpaamik ukiuni 2-ni attartortumik ataatsimoortumik inoquteqarsimasut.
Imm. 3. Qinersinerup inernera attartortitsisumut nalunaarutigineqassaaq.
Imm. 4. Immikkoortortaqarfiup sulineranut atatillugu immikkoortortaqarfiup aningaasatigut siumut missingersuutai naapertorlugit akuersaarneqarsinnaasumik aningaasartuutaasartut immikkoortortaqarfiup akilertassavai. Immikkoortortaqarfimmi siulersuisut sulinerminnut akissarsiaqartinneqassanngillat.
Imm. 5. Ukioq allortarlugu siulittaasoq tunuartassaaq. Siulersuisunut ilaasortat allat affaat ukioq allortarlugu tunuartassapput. Piffissaq ataaseq qinigaasimasunut tunuarnissaq aalajangiivigineqartassaaq makitsinikkut, taavalu aamma qanga qinigaasimaneq malillugu. Qinigassanngorteqqittoqarsinnaavoq.§ 8. Immikkoortortaqarfimmi immikkoortortaqarfiup siulersuisussaanik qinersisoqarsimanngippat, imalunniit immikkoortortaqarfiup siulersuisuisa sulinertik unitsissimappassuk immikkoortortaqarfik siulersuisussaanik nutaanik qinersitinnagu suliassat immikkoortortaqarfimmi siulersuisunut isumagisassaatitaasut attartortitsisup isumagissavai.
§ 9. Naatsorsuutinik akuersissuteqarnermut atatillugu immikkoortortaqarfinni tamani naatsorsuutit ukiuata tulliuttup aallartinnissa sioqqullugu qaammatit pingasunngunnginneranni ukiut tamaasa pisarnertut immikkoortortaqarfimmi ataatsimiinneqartassaaq. Immikkoortortaqarfiup ataatsimiinnissaanut aggersaasoqartassaaq § 5, imm. 1-4-mi malittarisassat malillugit. Immikkoortortaqarfiup ataatsimiinnissaanut makkua oqaluuserisassaasassapput:
1) Ukiumut qaangiuttumut immikkoortortaqarfiup siulersuisuisa nalunaarutaannik saqqummiussineq.
2) Immikkoortortaqarfiup naatsorsuutaasa kingulliit kukkunersiorneqarsimasut akuerineqartussanngorlugit saqqummiunneqarnerat.
3) Ukiumut matumunnga aningaasatigut siumut missingersuutinik saqqummiussineq piffissap ilaanut naatsorsuutinik ilisimatitsissutigineqartussanik ilallugit.
4) Ukiumut tullermut immikkoortortaqarfiup aningaasatigut siumut missingersuutaanik saqqummiussineq.
5) Siulittaasoq tunuartussaappat immikkoortortaqarfiup siulersuisuisa siulittaasussaannik taassumalu sinniisussaanik qinersineq, § 7, imm. 5, naapertorlugu.
6) Immikkoortortaqarfiup siulersuisuinut ilaasortassanik allanik taakkununngalu sinniisussanik qinersineq, § 7, imm. 5, naapertorlugu.
7) Siunnersuutitut takkussimasut.
8) Tamalaat.
Imm. 2. Immikkoortortaqarfik immikkut ittumik ataatsimiitinneqartassaaq, imaattoqartillugu
1) immikoortortaqarfiup siulersuisuisa tamanna pissutissaqartikkaangassuk,
2) immikkoortortaqarfimmi inoqutigiit ikinnerpaamik arfineq pingajorarterutaasa qulequttap aalajangersimasup oqaluuserineqarnissaa kissaatigigaangassuk,
3) taamaaliortoqarnissaa siusinnerusukkut aalajangiiffigineqareersimappat, imaluunniit
4) attartortitsisup tamanna kissaatigippagu.§ 10. Immikkoortortaqarfiup pineqartup ukiumoortumik naatsorsuutai aningaasatigullu siumut missingersuutai immikkoortortaqarfimmi inoqutigiinnut tamanut takusassiarineqarsimassapput immikkoortortaqarfiup pisarnertut ataatsimiinnissaa kingusinnerpaamik sapaatip akunneranik 1-mik sioqqullugu.
§ 11. Immikkoortortaqarfiit pisarnertut immikkullu ittumik ataatsimiittarnerinut peqataasinnaatitaallutillu taakkunani taasisinnaatitaasut tassaapput immikkoortortaqarfimmi attartortut, taakkua appaat inuillu sivikinnerpaamik ukiuni 2-ni attartortumik ataatsimoorussillutik inoqutiginnissimasut. Aalajangiinerit pisassapput najuuttut amerlanerussuteqarfiginnittarnerisigut. Inoqutigiit qanorluunniit amerlatiginerat apeqqutaatinnagu attartorneq ataaseq taasinernik 2-nik naleqassaaq. Attartortoq sinnersigisassaminut piginnaatitsissuteqarluni ornigussinnaatitaavoq. Attartortitsisoq aammattaaq immikkoortortap ataatsimiinneranut aggersinnaatitaavoq taasisinnaatitaassananili.
Imm. 2. Kinaluunniit immikkoortortaqarfiup ataatsimiinnissaanut imm. 1 naapertorlugu isersinnaatitaasoq quleqattamik ataatsimiinnissamut nalunaarutiginnissinnaatitaavoq. Siunnersuutit immikkoortortaqarfiup pisarnertut ataatsimiinnissaanut oqaluuseritikkumasat immikkoortortaqarfiup siulersuisuineereersimassapput kingusinnerpaamik ataatsimiinnissaq sapaatip akunneranik 1-mik sioqqullugu. Siunnersuutit § 9, imm. 2, nr. 2, naapertorlugu immikkoortortaqarfiup immikkut ittumik ataatsimiinnissaanut oqaluuseritikkumasat immikkoortortaqarfiup siulersuisuineereersimassapput kingusinnerpaamik ataatsimiinnissaq sapaatip akunneranik 1-mik sioqqullugu. Siunnersuutit immikkoortortaqarfiup najugaqartuinut tusarliunneqassapput kingusinnerpaamik ataatsimiinnissaq ullunik 3-nik sioqqullugu.§ 12. Immikkoortortaqarfimmi torersaartoqarnera immikkoortortaqarfiup siulersuisuisa alaatsinaatarissavaat. Assuarliissutaasinnaasut attartortitsisumut ingerlanneqartassapput.
Imm. 2. Immikkoortortaqarfiup siulersuisuisa suliamik ingerlatsinissartik siulersuisut sulinerminni najoqqutassaatigut erseqqinnerusumik aalajangersaavigissavaat. Suliassap ingerlanneqarnissaanut atatillugu attartortitsisoq immikkoortortaqarfiup siulersuisuinut pisariaqartutigut ikiuuttassaaq, soorlu ilaatigut siulersuisut sulinerminni tunngavissaasumik najoqqutassaliorneranni.
Imm. 3. Immikkoortortaqarfiup siulersuisuisa suliassaat allat immikkoortortaqarfiup siulersuisuisa attartortitsisullu akornanni isumaqatigiissutigineqarsinnaaput.§ 13. Immikkoortortaqarfimmi siulersuisut aalajangerpassuk akuersaarneqarsinnaasunik pitsanngorsaaneqarlunilu nutarterisoqarnissaa, aammalu immikkoortortaqarfiup siulersuisuisa peqatigitillugu attartornermut akiliutip tamatuma kingunerisaanik qaffaavigineqarnissaa akuersaarpassuk siunnersuutip naammassiniarneqarnissaa attartortitsisup isumaginiarsarissavaa.
Imm. 2. Imm. 1 naapertorlugu immikkoortortaqarfiup siulersuisuisa aalajangigaat immikkoortortaqarfiup ataatsimiinnerini akuersissutigineqartassapput. Ineqarnermut akiliutip qaffaatissaatut naatsorsuutigineqartup ukiumut ineqarnermut akiliutaasartup 5%-ia qaangersimappagu, aammalu tamatuminnga piumasaqaat immikkoortortaqarfiup ataatsimiinnerani najuuttut ikinnerpaamik arfineq pingajorarterutaasa saqqummiuppassuk akuerineqavinnissaa pissaaq ineqartut tamakkerlutik kingusinnerpaamik sapaatip akunnerata ataatsip qaangiutinnginnerani taasitinneqarnerisigut, taamaaliornermilu attartornerit tamarmik immikkut qanorluunniit attartorneq angissuseqaraluarpat taasinerat marlunnik naleqartussaalluni.
Imm. 3. Imm. 2 naapertorlugu ineqartut tamakkerlutik taasitinneqarnerminni immikkoortortaqarfimmi siulersuisut imm. 1 naapertorlugu aalajangersimanerat akuersissutigippassuk attartortitsisup ukiumut tulliuttumut aningaasatigut missingersuutit nutarterneqarsimasut nassiussuutissavai.
Imm. 4. Immikkoortortaqarfiup siulersuisuisa immikkoortortaqarfiup ataatsimiinneranit akuerineqarluni torersaarnissamut malittarisassat allannguuteqartinneqarnissaat siunnersuutigisinnaavaat, taakkulu minnerpaamik imarissallugit ilanngussaq 4-mi Torersaarnissamut malittarisassat aalajangersagartaattut naqinneqarsimasut. Torersaarnissamut malittarisassassatut siunnersuutit immikkoortortaqarfiup ataatsimiinnissaa sioqqullugu inoqutigiinnut tamanut agguaanneqarsimassapput.
Imm. 5. Imm. 4 naapertorlugu torersaarnissamut malittarisassat atuuttut allannguutissaannik immikkoortortaqarfiup siulersuisuisa siunnersuutaat atuussinnaasussatut isigineqalinnginnerminni attartortitsisumit akuerineqaqqaartussaapput.§ 14. Immikkoortortaqarfiup ataatsimiinnissaanut inatsisit eqqortillugit aggersaaneqarsimasumut immikkoortortaqarfiup siulersuisui kisimik takkuppata attartortitsisoq immikkoortortaqarfiup siulersuisuinut isumaqatigiinniareernikkut immikkoortortaqarfiup ataatsimiinnissaanut immikkut ittumut aggersaasinnaavoq, oqaluuserisassani kisiartaalluni oqaluuserisassaatillugu immikkoortortaqarfiup siulersuisuisa atorunnaarsinneqarnissaat.
Kapitali 3
Ineqarfittut immikkoortortat aqunneqarnissaat§ 15. Attartortitsisoq attartortitsisup ineqarfittut immikkoortortaanik aqutsinissamut akisussaasuuvoq.
Imm. 2. Attartortitsisup inissiaataanik aqutsinermik ingerlatsisussamik attartortitsisoq avataanit tigusisinnaavoq.
Imm. 3. Attartortitsisup nakkutigisassaraa avataanit tiguneqarluni aqutsisuutitap malittarisassat peqqussutillu atuuttut maleruarnerai.
Imm. 4. Attartortitsisoq nakkutiginninnerminut atatillugu naatsorsuutinut tunngassuteqartut tamaasa misissortarnissaannut periarfissaqartitaavoq, aammalu nakkutilliinissap ingerlannissaanut paasissutissanik pisariaqarsorisaminik tamanik pissarsinissamut pisinnaatitaalluni, tak. imm. 3.
Imm. 5. Isernissaminut naaggaarneqaruni, tak. imm. 4, ineqarfittut immikkoortortaqarfiup ingerlanneqarnerani aqunneqarneraniluunniit pissusissamisuunngitsunik uppernarsisaqaruni, imaluunniit ineqarfittut immikkoortortaqarfiup akiliisinnaassusia aamma aningaasatigut pisussaaffimminik maleruaanissaminut piginnaasaqarnera pillugu nalorninartunik uppernarsisaqaruni attartortitsisup Naalakkersuisut ingerlaannaq nalunaaruteqarfigisassavai.§ 16. Aqutsineq aningaasatigut illersorneqarsinnaasumik ingerlassaaq aammalu aaqqissugaasimassalluni aningaasatigut pisariitsumik periaatsit malillugit.
Imm. 2. Aqutsinermut akissarsiaritinneqartartussat agguataarneqassapput attartornermut ataatsimut aqutsinermut akiliissutissat assigiimmik angissuseqartussanngorlugit, attartortup aalajanginngippagu aqutsinermut akissarsiaritinneqartussat kvadratmiiterikkaarlugit agguataarneqarnissaat.
Imm. 3. Aqutsinermut akissarsiaritinneqartussat attartortitsisup akuersineratigut tunngaviusumik akiliissutitut agguataarneqarsinnaapput, attartornermut ataatsimut angeqqatigiimmik agguataarneqartunngorlugit, imaluunniit kvadratmiiterimut agguataarneqartunngorlugit, tak. imm. 2, aammalu ilassutitut akiliissutitut, taassuminngalu akiliisinneqartassallutik attartortut ilassutitut akiliissummit pineqartut.§ 17. Aqutsinermut akissarsiaritinneqartussat aalajangersaavigineqarneranni aqutsisup taamaallaat ilanngussinnaavai aningaasartuutit pineqartut.
Imm. 2. Ineqarfittut immikkoortortaqarfiit ataasiakkaat akissarsiaritinneqartussanik taamaallaat tigusiffiginiarneqarsinnaapput aqutsisoq attartortitsisumik imaluunniit ineqarfittut immikkoortortaqarfimmik ineqarfittut immikkoortortaqarfimmi pineqartumi suliassanik allanik ingerlatsinissamik isumaqatigiissutiginnissimappat.
Kapitali 4
Aningaasaatinik ingerlatsineq§ 18. Attartortitsisoq ineqarfittut immikkoortortaqarfiup aningaasaataanik ingerlatsissaaq aningaasanik isumannaatsuutitsinissaq sapinngisamik annertunerpaamik isiginiarlugu aammalu taakkua pitsaanerpaamik erniaqartinniarsaralugit. Attartortitsisoq immikkoortortaqarfiit aningaasaataannik ataatsimoortumik ingerlatsisinnaatitaavoq.
Imm. 2. Aningaasat tigoriaannaat qilersorsimanngitsut tassaasut qularnaveeqqusiissutit, immikkoortitat il.il. taamaallaat bankimi kontonut ikineqaqqusaapput, Qallunaat Naalagaaffiata obligationiinik pisissutigineqaqqusaallutik imaluunniit pappiaranik nalilinnik annaasaqarnissamut navianaatsukitsunik pisissutigineqaqqusaallutik.
Imm. 3. Attartortitsisoq immikkoortortaqarfiup aningaasataanik aningaasanillu tigoriaannarnik qilersorsimanngitsunik ataatsimoorussilluni ingerlatsiguni, tak. imm. 1 aamma 2, attartortitsisup akisussaaffigissavaa immikkoortortaqarfiit aningaasaataasa ineqarfittut immikkoortortat iluaqutissaannik ernialersorneqarnissaat ernianut angissuserititaq minnerpaamik procentitut angissuserititanut ukununnga marlunnut nallersuuttoq atorlugu, taamaattorli minnerpaamik 1,5%:
1) Kalaallit Nunaanni aningaaseriviit arlaanni aningaasanik kontot ikisiffigineqartartut sukkulluunniit tigusiffigineqarsinnaasarlutillu ikisiffigineqarsinnaasartut ernialersuiffigineqartarnerisa marloriaataa.
2) Danmarkimi Nationalbankip diskontoa 2 procent-pointinik ilanngarlugu.
Imm. 4. Ukiumut tullermut aningaasatigut siumut missingersuuteqarfissamut aningaasatigut siumut missingersuusiornermi imm. 3-mi taaneqartumik ernialersuutaasoq ukiut tamaasa attartortitsisumit nalilersorneqartassaaq.
Imm. 5. Ernialersuinerup ilaa imm. 3-mi ernialersuutissatut toqqarneqarsimasumik qaangiissutigineqarsimasoq ineqarfittut immikkoortortaqarfiup aningaasaataanik aningaasaataanillu tigoriaannarnik qilersorsimanngitsunik ingerlatsinermik aqutsisuutitamut pisassanngortinneqartassapput.§ 19. Ineqarfittut immikkoortortaqarfiup aningaasaatai attartortitsisumut imaluunniit attartortitsisup ineqarfittut immikkoortortaqarfiutaanut allanut taarsigassarsisitsissutigineqartassanngillat.
§ 20. Ineqarfittut immikkoortortaqarfiup aningaasat toqqortersimasai, qularnaveeqqusiissutitut pigisai, illuartitigai il.il. ineqarfittut immikkoortortaqarfimmut pisassanngortinneqartassapput, taamaattorli tak. § 18, imm. 5.
Imm. 2. Imm. 1 naapertorlugu ernialersuineq isertitatut allanneqartassaaq aammalu erniatut pissarsiat siunissami aserfallatsaaliinissamut toqqorterneqassallutik.
Kapitali 5
Toqqorterineq aserfallatsaaliinerlu§ 21. Ineqarfittut immikkoortortaqarfinni attartortitsisoq ukiumut ataasiarluni ineqarfittut immikkoortortaqarfiup illuutaasa aserfallatsaalineqarnikkut qanoq issusiinik misissuisassaaq. Tamanna tunngavigalugu illuutip qanoq innera pillugu nalunaarusiortoqartassaaq, illuutit pineqartut aserfallatsaalineqarnissaannut nutarteriffigineqarnissaannullu nutartikkamik pilersaarusiortoqarnissaanut atugassamik.
Imm. 2. Aserfallatsaaliinissamut nutarterinissamullu pilersaarut minnerpaamik ukiunut tulliuttunut 10-nut atorneqarsinnaasunngortitaassaaq. Aserfallatsaaliinissamut pilersaarummut illuutip ilaata imaluunniit ikkussukkat pineqartut pissarsiarineqaqqinnissaannut akiulersimasut sukkulluunniit aallaavigitinneqartassapput.
Imm. 3. Aserfallatsaaliinissamut pilersaarummut ilassutitut aningaasanik tigoriaannaateqarnissamut ukiukkaartumik agguataakkamik missingersuusiortoqartassaaq, taamaaliornermi malinneqartassalluni aningaasanut toqqortikkanut aningaasat nikittoorsinnaanerinut ilusiliussaq.
Imm. 4. Attartukkat tamarmik immikkut ukiut pingasukkaarlugit misissorneqartassapput attartukkat aserfallatsaalineqarnikkut qanoq issusiat nalunaarsuiffiginiarlugu aammalu aserfallatsaaliinissamut pilersaarusiornissaq taamatullu aamma illup iluata aserfallatsaalineqarnissaanut toqqortereqataassutissat annertussusiliivigineqarnissaat eqqarsaatigalugit.§ 22. Ineqarfittut immikkoortortaqarfik ukiumoortumik aningaasanik naleqquttumik annertussuseqartunik tigusiniartarlunilu toqqorsisassaaq ukununnga atugassanik:
1) Aserfallatsaaliinissamut nutarterinissamullu pilersaarut naapertorlugu teknikkikkut ikkussuussat nutarteriffigineqartarnissaannut, illup iluani silataanilu aserfallatsaaliinissanut pilersaarutineqartunut aammalu piffissap ilaani ingerlanneqartartussanut, kiisalu inissianik qimatsisoqartillugu ataqatigiissaarlugu aaqqissukkamik iluarsaassisoqartarnissaanut.
2) Attartornermut akiliutinik annaasaqarnernut aamma ininik qimatsinermi annaasaqarnernut.
Imm. 2. Nalinginnaasumik iluarsaassisarnernut aningaasartuutinik ineqarfittut immikkoortortaqarfiup tigusiartuaarnerata naaperiaavigineqarnissaanut ineqarfittut immikkoortortaqarfiup aningaasat pisariaqartut akiliisitsissutigisarlugillu toqqortertassavai.
Imm. 3. Aningaasat toqqortikkat toqqorneqarnerminni siunertarineqartunit siunertanut allaanerusunut atorneqarsinnaanngillat, siunertarineqaraluartoq taamaatinneqarsimanngippat.
Kapitali 6
Attartornermut akiliutinik annaasaqarneq aamma ininik qimatsinermi annaasaqarneq§ 23. Inissiamik ataavartumik inigineqanngitsoqarnerani ineqarfittut immikkoortortap ingerlanneqarnera imaalillugu naleqquttunngorsarneqartassaaq attartornermut akiliutissaagaluit amigaatigineqartut isiginiaavigineqarlutik.
§ 24. Inissiaq immikkut ittumik siunertanut, soorlu inissianut aalajangersimasumik atugassianut, pisortat inigisaannut, inigitinneqarallagassanut assigisaannulluunniit atorneqassamaarluni inigineqanngippat sullissivik inissiamik inniminniisimasoq ineqarnermut akiliutissamik tamakkiisumik akiliisinneqartassaaq aammalu inoqanngitsitsinermut atatillugu immikkut ittumik aningaasartuutaasinnaasunik akiliisinneqartassalluni.
§ 25. Ukiut tamaasa aningaasanik naleqquttumik angissuseqartunik § 23, imm. 1, naapertorlugu inissiap atorneqanngittuarneranik peqquteqartumik § 22, imm. 1, nr. 2, naapertorlugu attartornermut akiliutinut annaasaqaatinut matusissutaasartussanik toqqorsineqartassaaq.
§ 26. Ukiut tamaasa aningaasanik naleqquttumik angissuseqartunik attartortup inimik qimatsinerani annaasat matussutissiivigineqarnissaannut toqqorsineqartassaaq, tak. § 22, imm. 1, nr. 2.
Kapitali 7
Missingersuusiortarnissaq, attartornermut akiliutit angissusissaliivigineqarnissaat aamma inigisap angissusianik naatsorsuisarnissat§ 27. Ineqafittut immikkoortortaqarfiup missingersuutaasa imarissavaat ingerlatsinermut missingersuutit oqimaaqatigiissitsissullu missingersuusiugaq, aammalu imarissallugit ineqarfittut immikkoortortaqarfiup ingerlanneqarneranut aningaasartuutissat pisariaqartut, kiisalu isertitassat aningaasartuutinik missingersuusiukkanik matussutissiisussat.
Imm. 2. Ingerlatsinermut aningaasartuutissat pisariaqartut tassaassapput ineqarfittut immikkoortortaqarfimmi ataatsimoorussamik ingerlatsinermut aningaasartuutissat tamarmiusut, matuma ataani illuutini sulisunut, avataanit ikiortigineqartartussanut, kukkunersiuisunut, pisinernut, ingerlatsinermi atortussanut, iluarsaassisarnissanut, aserfallatsaaliisarnissanut, aqutsinermi akissarsiaritinneqartussanut il.il. aningaasartuutissat, kiisalu toqqorterinissanut ilangaaqqusiissutissatut piumasarineqartut, tak. § 22, aamma attartortitsisup aningaasaliissutiminit pissarsissutigisartagassai.
Imm. 3. Attartortitsisup attartortullu akornanni isumaqatigiissutigineqarsinnaavoq ingerlatsinermut immikkut aningaasartuutit ineqarnermut akiliummut ilanngullugit naatsorsuunneqassanersut, imaluunniit tassunga aningaasartuutit attartortunit ataasiakkaanit toqqartumik akilerneqartassanersut. Ingerlatsinermut aningaasartuutit immikkut ittut tassaapput aningaasartuutit ineqarfittut immikkoortortaqarfimmut kiisalu illunut illunullu marloqiusanut atasut annikinnerusut, matuma ataani anartarfinnik imaarsisarnermut, anartarfinnut imermullu kuutsitsiviusartup imaarneqartarneranut, paaviaasarnermut, qerunnaveeqqusiissutit innaallagialersorneqarnerannut kiisalu illu imermik pajuttagaappat imermik pajunneqartarnermut aningaasartuutaasartut.§ 28. Ineqarfittut immikkoortortaqarfiup ukiumut tullermut aningaasatigut siumut missingersuutissai imaalillugit suliarineqartassapput ineqarnermut akiliutinut iluarsiissutissaasinnaasut atortussanngortinneqannginnerminni immikkoortortaqarfiup ataatsimiinneranut saqqummiunneqartussanngorlugit.
Imm. 2. Ukiup naatsorsuuteqarfiup aallartinnerani ukiumut missingersuusiortoqarsimanngippat, ukiup siuliani missingersuutit ingerlateqqiinnarneqartassapput nutaamik missingersuutissat naammassineqarnissaat tikillugu.
Imm. 3. Missingersuutit suliarineqassapput ukiumoortumik naatsorsuutit kontoplaniat atorlugu, aammalu missingersuutinut tunngavissaatinneqartut missingersuutini erseqqissarneqarsimallutillu paasissutissiissutigineqarsimassapput.
Imm. 4. Sinneqartooruteqartussanngortitsilluni imaluunniit amigartooruteqartussanngortitsilluni missingersuusiortoqaqqusaanngilaq. Taammaattorli ineqarnermut akiliutip akulikippallaamik iluarsiivigineqartarnissaa pinaveersaarniarlugu missingersuusiorneqartassaaq aningaasat ineqarfittut immikkoortortaqarfiup qaammatikkaartumik tamakkiisumik ineqarnermut akiliutitigut isertittagaasa angeqqataat missingersuutit nikingassutaannut siumut naatsorsuutigineqareersimanngitsunut atugassat missingersuutigalugit.§ 29. Missingersuutinut kingullermik akuerineqarsimasunut naleqqiullugu ukiumut tullermut missingersuutissat annerpaamik qaffariarsinnaatitaapput procentit angissuserititat uku atorlugit siunertanut makkununnga:
1) Immikkoortortaqarfiup innaallagissamik imermillu ataatsimoortumik atuineranut, 5%.
2) Aqutsinermut akissarsiarititanut, 3%.
3) Illuutini suleqataasunut, 3%.
4) Eqqaasarnermut eqqiluisaartitsinermullu, 3%.
5) Toqqortereqataassutissanut, 4%.
6) Nalinginnaasumik aserfallatsaaliinermut, 4%.
Imm. 2. Imm. 1 naapertorlugu qaffaanerit annerpaaffissaannik saneqqutsinissat pisinnaapput attartortitsisup aatsaat akuersissuteqarneratigut, tassa saneqqutsinissat ataavartumik aningaasartuuteqarnerulernerit avatangiisinut piumasaqaatit allannguuteqarnerinit, akit, akissarsiat, akitsuutit imaluunniit akileraarutit qaffannerinit pissuteqartut malitsiginngippatigik.§ 30. Ineqarfittut immikkoortortaqarfimmut aningaasatigut siumut missingersuutit ilanngussaq 2-mi Missingersuutitut inissitsiterneqarsimassapput.
Imm. 2. Aningaasartuutinut akileeqataassutissaq nalinginnaasoq, tak. ilanngussaq 2 Aningaasartuutinut akileeqataassutissaq nalinginnaasoq, tassaavoq ineqarfittut immikkoortortaqarfiup ingerlatsilluarnerpaaffiani ingerlatsinerup nalinginnaasup agguaqatigiissinnera. Ineqarfittut immikkoortortaqarfinni aalajangersimasuni akileeqataassutissarpiaasussamut aalajangiisuusartussaapput inissiat ineqarfittut immikkoortortaqarfimmut atasut sorpiaaneri.
Imm. 3. Imm. 1 naapertorlugu missingersuusiornermi aningaasartuutinut akileeqataassutissamut nalinginnaasumut naleqqiullugit nikingassutit nassuiaasiami naatsumi nassuiarneqarsimassapput. Aningaasartuutinut akileeqataassutissaq nalinginnaasoq akinut iluarsiissutaasartoq ukiup aallartinnerani tamanut saqqummiunneqartartoq malillugu qaffattussanngortitaasimasassaaq.
Imm. 4. Pilersaarusiukkamik piffissalersukkamillu aserfallatsaaliinermi pineqarput suliat illuutip ilai tamaasa pitsaasuutiinnarniarlugit atorsinnaasuutiinnarniarlugillu suliarineqartartussat, apeqqutaatinnagu aserfallatsaaliinissat illup silataani iluaniluunniit suliassaanersut. Toqqorterinerit ingerlanneqassapput aserfallatsaaliinissamut pilersaarutit ineqarfittut immikkoortortaqarfiup illuutaanut pilersaarusiarineqarsimasut tunngavigalugit, tak. § 21.
Imm. 5. Illuutini suleqataasut sullissinerannik ineqarfittut immikkoortortaqarfiup pisisarnissaa pisassaaq sullissinissap annertussusissaa akissaalu pillugit isumaqatigiissut tunngavigalugu. Isumaqatigiissummi allaaserineqarsimassapput suliarineqartartussat, akulikissusissaat aammalu piffissamik atuissangatitsinerit.§ 31. Attartortitsisup ingerlaavartumik missingersuutit misissuiffigisassavai ukiullu sisamararterutikkaartumik aningaasanut nalunaarusiortassalluni.
Imm. 2. Missingersuutit misissuiffigineqarneranni uppernarsineqarpat ingerlatsinermut amigartooruteqartoq missingersuutit akuerisaasumik iluarsiivigineqarnissaasigut matuneqarsinnaanngitsumik, tak. § 28, imm. 4, ukiumut tullermut missingersuusiornissami ineqarnermut akiliutit qaffanneqarnissaat ilimasaarutigineqassaaq.
Imm. 3. Missingersuutit misissuiffigineqarneranni uppernarsineqarpat aningaasat tigoriaannaat annaasassat matussutissiivigineqarnissaannut immikkoortinneqareersimasunit matussusiivigineqarsinnaanngitsunik amigartooruteqarfigineqartut, tak. § 22, imm. 1, nr. 2, aningaasanik tigoriaannarnik amigartooruteqarneq qaangiutilertortussatut isumaqarfigineqanngippat ineqarnermut akiliutip ukiup tullianut qaffaavigineqarnissaa ilimasaarutigineqassaaq.§ 32. § 31, imm. 2 aamma 3, naapertorlugu ineqarnermut akiliutinut qaffaatit siunertanut aalajangersimasunut akileeqataassutissatut akilersortinneqassapput.
Imm. 2. Siunertanut aalajangersimasunut akileeqataassutissat akilersortinneqassapput ukiut malittuinnaat marluk ingerlaneranni.§ 33. Missingersuutinik misissuataarinermi uppernarsineqarpat ingerlatsineq annaaraluni missingersuusiorsimanermik, akit apparsimanerannik, pisariillisaasoqarsimaneranik, aningaasartuutaasartut aalajangersimasut peersimanerannik assigisaannilluunniit peqquteqartumik ataavartumik sinneqartoorfigineqartartoq, aammalu missingersuutit iluarsiivigineqartarsinnaanerat sipporlugu ingerlatsinermut sinneqartoorutaasartut ingerlajuartut, tak. § 28, imm. 4, ineqarnermut akiliut iluarsiivigineqassaaq ingerlatsinermilu sinneqartoorut toqqorneqassalluni, tak. imm. 2.
Imm. 2. Ingerlatsinermut sinneqartoorutit ineqarfittut immikkoortortaqarfiup tamakkiisumik qaammammut ineqarnermut akiliutitigut isertittagaasa annertoqataat sipporsimappagu, tak. imm. 1, immikkoortortaqarfiup ataatsimiinnermini aalajangissavaa sinneqartoorutit siunertanut sunut atorneqassanersut, matuma ataani toqqorneqassanersut imaluunniit utertinneqassanersut. Ingerlatsinermut sinneqartoorutit ineqarfittut immikkoortortaqarfiup tamakkiisumik qaammammut ineqarnermut akiliutitigut isertittagaasa annertoqataat sipporsimanngippagit aningaasat toqqorneqassapput missingersuusiorfimmullu tullermut ilanngunneqassallutik.§ 34. Ineqarfittut immikkoortortaqarfiup inissiaataanik attartornermut akiliut imaalillugu annertussusiliivigineqarsimassaaq inuussutissarsiutigalugu attartukkanut akiliutaasartut peqatigalugit ineqarfittut immikkoortortaqarfiup ingerlatsinissamut aningaasartuutissatut naatsorsuutigisaanik missingersuusiorfigisimasaanillu, matuma ataani akileeqataassutissatut peqqussutigineqartunut kiisalu aserfallatsaaliinissamut pilersaarut naapertorlugu toqqortigassatut piumasaqaatinut matussutissiinissamut naammassalluni.
Imm. 2. Aningaasaatinit isertitaasimasinnaasut, aningaasaatit, toqqortat, qularnaveeqqusiissutit il.il. erniarisimasinnaasaat ineqarfittut immikkoortortaqarfimmut pisassanngortinneqassapput toqqorneqassallutillu, tak. § 20.
Imm. 3. Ineqarfittut nutaamik immikkoortortaqarfinngortumi attartortitsinissami siullermi ineqarnermut akiliutissaq annertussusiliivigineqarallarsimassaaq, taamaalilluni attartortitsinermi ineqarnermut akiliut kingusinnerusukkut iluarsiivigineqarsinnaasutut aalajangiivigineqarallartillugu, tassa sananermut aningaasartuutit aaqqiivigineqavinnissaasa tungaannut.§ 35. Ineqarnermut akiliut ineqarfittut immikkoortortaqarfiup inissiaataanut inigisat angissusiat naapertorlugu agguataarneqarsimassaaq, tak. § 36.
Imm. 2. Imm. 1-mi aalajangersagaq akileeqataassutissanut ineqarfinnut tamanut immikkut assigiimmik angissusilerlugit agguataakkanut akilersinneqartartussanullu atuutissanngilaq, tak. § 16, imm. 2, imaluunniit akileeqataassutissanut agguataariikkanut, tak. § 16, imm. 3, atuutissanani.
Imm. 3. Imm. 1-mi aalajangersagaq aammattaaq ineqarfittut immikkoortortaqarfinnut katigunneqarsimasunut amerlassutsit malillugit akileeqataassutissanik akilersuisinneqartunut, tak. § 3, imm. 3, atuutissanngilaq.
Imm. 4. Attartukkami ineqarnermut akiliummik qaffaavigineqarluni attartortoq pitsanngorsaavigineqassappat attartukkami tassanerpiaq attartornermut akiliummut aammattaaq ilaatinneqassaaq aalajangersimasumik akileeqataassutissaq, tak. § 84, imm. 2, tassaasussaq pitsanngorsaanermut aningaasartuutip sinneranut akilersuutigitinneqartussaq, aammalu nungukkiartuaarluni nungunnerani unitsinneqartussaq.§ 36. Namminersornerullutik Oqartussat kommuunillu inissiaataanni attartortittakkani inissiatut attartortinneqartuni inigineqartussap angissusia naatsorsorneqartassaaq, taannalu tunngavigalugu ineqarnermut akiliutissaq qaffanneqarumaarnissaalu inissianut ataasiakkaanut agguataarneqartassalluni. Inigisap angissusissaa naatsorsorneqartassaaq §§ 37 aamma 38 naapertorlugit.
§ 37. Ilaqutariinnut arlalinnut inissiani inigisap angissusiani pineqarput inigisami init tamarmik. Toqqorsiviit imaluunniit quit inigisamit avissaarsimallutik inissisimasut ilanngullugit naatsorsuunneqassanngillat.
Imm. 2. Ilaqutariinnut arlalinnut inissiani inigisap angissusianik naatsorsuineq ingerlanneqartassaaq inissiat ataasiakkaat iigaasa avalliit silaataaniit imaluunniit qaliata silataaniit aamma inissiat sanileriit avissaarutaata qeqqanniit uuttuiffiginerisigut, tak. § 38, imm. 3. Ilaqutariinnut arlalinnut inissiat isui inissiat sanileriit avissaarutaasa qeqqattut naatsorsuunneqartassapput.
Imm. 3. Inissiami majuartarfiit quleriiaani inissisimaffigisaminni tamani ilanngullugit naatsorsuunneqartassapput.§ 38. Illuni aamma illuni marloqiusani init angissusiat imm. 2-5 naapertorlugit naatsorsorneqartassapput.
Imm. 2. Etagemi ataatsimi inigisap angissusia naatsorsorneqassaaq illu silataani qalliutaaniit uuttorlugu takissusia silissusianik amerlisaavigalugu. Qisuit qaleriissaarlugit qalliutigineqarsimatillugit qisuup qalliup silataaniit uuttuisoqartassaaq. Aniinganiliat inigisap angissusianut ilanngunneqartassanngillat.
Imm. 3. Qaliap inigineqarsinnaasortaata angissusia naatsorsorneqassaaq takissusia silissusianik amerlisaavigalugu. Takissusia uuttorneqassaaq etagetut nalinginnaasutut, silissusiali uuttorneqassalluni qaliata naqqanit 1,5 miiterinik qutsissusillip nalaani qaliata silataaniit. Alliliissutit, soorlu aniingarnit, uuttorneqartassapput iikkat inimut killiliisut silataannut. Qaliatali iluanut taamaallaat naatsorsuunneqartassapput initut aaqqissugaasimasut.
Imm. 4. Naqqup ataani inigineqartup annertussusia naatsorsorneqartassaaq naqqup ataata iigaanit silarlermit silataaniit takissusiata silissusianut amerlisarneratigut. Illup naqqa tamakkerluni naqqup ataajunngippat inigisap angissusia naatsorsorneqartassaaq iluani iikkat inimut naatsorsuussamut killeqartitsisut qeqqanniit. Init tamakkiisumik cementimit beton-imilluunniit nateqartitaanngitsut ilanngullugit naatsorsuunneqassanngillat. Inigisap angissusiata naatsorsorneqarneranut naqqup ataata quillu ¼-liisa angissusiat naatsorsuinermut ilanngunneqartassapput. Quip angissusia naatsorsorneqartassaaq etagemi ataatsimi inigisap angissusiata naatsorsorneqarnissaattullu, tak. imm. 2.
Imm. 5. Inissiami majuartarfiit quleriiaani inissisimaffigisaminni tamani ilanngullugit naatsorsuunneqartassapput.
Kapitali 8
Naatsorsuutinik saqqummiussisarnissaq kukkunersiuisarnissarlu§ 39. Ineqarfittut immikkoortortaqarfiup ukiumoortumik naatsorsuutai qaammatinut 12-nut tunngasuussapput imarissallugillu angusaasut naatsorsorneqarsimanerat oqimaaqatigiissitsisimanerlu. Ukiumoortumik naatsorsuutit ilanngussaq 5 Angusaasunik naatsorsuisarnissaq aamma ilanngussaq 6 Oqimaaqatigiissitsisarnissat allattukkanik nassuiaasianillu ilallit naapertorlugit inissitsiterneqarsimassapput.
Imm. 2. Angusaasut naatsorsorneqarneranni angusaasut koruuninut ilivitsunut allattorneqarsimassapput, ukiumullu missingersuutit kiisalu ukiumi kingullermi angusaasimasut 1.000 kr.-ninut ilivitsunngortiterlugit allattorneqarsimassapput.
Imm. 3. Oqimaaqatigiissitsissummi naatsorsuutinut kukkunersiorneqarsimasunut kingullernut aningaasartuutit tamarmik immikkut 1.000 kr.-ninut ilivitsungortittarlugit allattorneqarsimassapput.§ 40. Ineqarfittut immikkoortortaqarfiup naatsorsuutaasa tikkuussissutigisimassavaat ineqarfittut immikkoortortap pigisai akiligassaalu, aningaasatigut inissisimanera angusaasullu.
Imm. 2. Pisassarisat akiligassallu imaluunniit aningaasartuutit isertitallu imminnut ikilisaaffigisannginnissaannik tunngavissarititaasut ineqarfittut immikkoortortaqarfiit naatsorsuutinik saqqummiussisarnissaannut atortinneqartussaavoq.
Imm. 3. Ukiumoortumik naatsorsuutini aningaasartuutit nalilersuiffigineqartassapput ilanngussaq 7-mi Kukkunersuisarnissamut ilitsersuummi tunngavissarititaasut naapertorlugit.§ 41. Ukiumoortumik naatsorsuutit ukiup naatsorsuuteqarfiup naanerata kingornagut kingusinnerpaamik qaammatit arfinilinngorneranni kukkunersiuisunit uppernarsaasiivigineqarsimallutik attartortitsisumit atsiorneqassapput. Malitsigitillugu ukiumoortumik naatsorsuutit ineqarfittut immikkoortortaqarfimmut akuerineqartussanngorlugit atsiorneqartussanngorlugillu ingerlatinneqassapput.
Imm. 2. § 9-mi taaneqartutut immikkoortortaqarfiup ataatsimeereernerata kingornagut piaarnerpaamik ukiumoortumik naatsorsuutit attartortitsisumut, tassalu Namminersornerullutik Oqartussanut imaluunniit kommunalbestyrelsimut nassiunneqartassapput.
Imm. 3. Attartortitsisup naatsorsuutit atsioreerpagit naatsorsuutit tamanut ammaanneqassapput, tak. imm. 1.§ 42. Ineqarfittut immikkoortortaqarfiup ukiumoortumik naatsorsuutai attartortitsisup kukkunersiuisuanit avataaneersumit kukkunersiorneqartassapput. Malittarisassat uku isiginiarlugit kukkunersiuisarnissamut ileqqussaatitaq pitsaasoq naapertorlugu kukkunersiuineq ingerlanneqartassaaq, matumalu ataani naatsorsuutinut tunngassuteqartut tukummaarissunik iseqarluni kukkunersiuisup misissuataartassavai.
Imm. 2. Kukkunersiuinissap ingerlannissaanut paasissutissanik ikiorneqarnissamillu pisariaqartitaminik tamanik kukkunersiuisoq piumasaqaateqarsinnaatitaavoq.
Imm. 3. Ineqarfittut immikkoortortaqarfiup ingerlanneqarnerani aqunneqarneraniluunniit pissusissaanngitsunik uppernarsisaqaruni, imaluunniit ineqarfittut immikkoortortap akiliisinnaassusiata aningaasatigullu pisussaaffimminik maleruaasinnaassusiata nalorninartoqarnera uppernarsigunigit kukkunersiuisup ingerlannaq inigisanik piginnittoq Naalakkersuisullu nalunaarfigissavai.§ 43. Kukkunersiuisup kukkunersiuinermini ilanngussaq 7-mi kukkunersiuisarnissamut peqqussut maleruassavaa.
Imm. 2. Kukkunersiuisup naatsorsuutit uppernarsaasiivigissavai aammalu kukkunersiuisup allagarsualiaanik allalluni, tassanilu kukkunersiuisup ukiumoortumik naatsorsuutinik kukkunersiuinermut atatillugu paasissutissiissutigissallugu ilanngussaq 7-mi immikkoortunut tamanut immikkut oqaasissaqartoqarnersoq. Kukkunersiuisup aammattaaq eqikkaassut pillugu paasissutissanut ilassutissaasinnaasut allattussavai, taamatullu aamma nangaassutaasinnaasunut pissutaasut itisileriffigalugillu nassuiaavigissallugit. Kukkunersiuisup attuumassuteqarpallaartuunnginnini uppernarsaasavaa, aammalu nalunaarutigissallugu paasissutissatut piumasarisimasani tamaasa kukkunersiuinermini tigusimanerlugit.
Kapitali 9
Kiassarnermut naatsorsuutit§ 44. Kiassarnermut imermullu kissartumut aningaasartuutiminut matussutissanik attartortitsisoq akiligassiigallartarsinnaavoq. Akiligassiissutaagallartut ineqarnermut akiliutinik akiliisitsisarnermut atatillugu angeqqatigiimmik agguataakkamik angissusilerlugit tiguniarneqartassapput.
Imm. 2. Kiassarnermut naatsorsuutit imatut ilusiliivigineqarsimassapput taakkunannga takuneqarsinnaasunngortinneqarsimassallutik ineqartut ataasiakkaat aningaasartuutaasa tamarmiusut ilaat qanoq amerlatigisut kiassarnermut imermullu kissartumut tunngassuteqartuusarnersut.
Imm. 3. Ineqartut ataasiakkaat kiassarnermut naatsorsuutaannit erseqqissumik takuneqarsinnaasassaaq akiliutaagallartut akilerneqavissussanit anginerusimanersut mikinerusimanersulluunniit.
Imm. 4. Akiliutaagallartunut annaarutaasimasut utertinneqarnissaat kingusinnerpaamik pisassaaq utertitsinissaq pillugu attartortumut allakkatigut nalunaarutip nassiunneqarneranut peqatigitillugu.
Imm. 5. Akiliutaagallartussat aalajangersaavigineqarneranni kiassanermik imermillu kissartumik atuinissamik naatsorsuusiornermit anginerusumik atuisimanermut akiliinissaq pisassaaq akileeqqinnissamik attartortitsisumut allakkatigut nalunaarummik nassiussinerup kingornagut kingusinnerpaamik ullut 14-nit qaangiunneranni.§ 45. Aningaasartuutitaannut tunngasut immikkoortitaariffigineqarsimassapput. Erseqqissumik allassimassapput aningaasartuutit tamarmiusut ilaat qanoq annertutigisut uuliasinermut, uuliamik assartuinermut, innaallagissamik kiassarnermut kiisalu kiassaateqarfimmit kiassaanermut atorneqarsimanersut.
Imm. 2. Aningaasartuutit allat kialiornermut imaluunniit imermik kissartuliornermut tunngasut aammattaaq ilanngunneqarsinnaapput, assersuutigalugu innaallagissamut, imermut, aserfallatsaaliinernut, nalikilliliinernut, toqqortikkanut, nakkutilliinernut il.il. ingerlatsinermut aningaasartuutit.§ 46. Attartortitsisup aalajangiinera naapertorlugu kiassaateqarfinnut allequtaannulluunniit tamanut immikkut naleqqiussisarluni aningaasartuutit attartortunut agguataarneqartassapput makku tunngavigalugit
1) inigisat ataasiakkaat inigisatut angissusiat,
2) kiassaatit,
3) kiaap agguataarneqarnissaanut uuttuutit, aalarnermut uuttuutit aamma elektroniskiusumik agguataarinermut uuttuutit,
4) kiammut nukinnut uuttuutit, imaluunniit
5) nr. 1-4-mut periaatsit akuleriissinnerat.§ 47. Attartortitsisup aalajangiukkuniuk agguataarisarnermut tunngavissarititaasumit allamut allanngortitsinissaq, tamatumunnga tunngavigineqartoq pillugu paasissutissiissusiussaaq, aammalu paasissutissiissusiorfigalugit agguataarisarnermut tunngavissarititaasumik allanngortitsinermut suut iluaqutaassangatinneqarnersut ajoqutaalersinnaasutullu ilimagineqarsinnaanersut. Attartortut allannguinermit kalluarneqartussat tamarmik paasissutissiissutinik agguaavigineqassapput.
§ 48. Kiammik agguataarisarnissamut uuttuutinik piorsaanermut ikkussuinermullu aningaasartuutit, tassalu aalamut elektroniskiusumillu uuttuutinik, kiaap nukinganik uuttuutinik imaluunniit uuttuutinik allanik piorsaanernut ikkussuinernullu aningaasartuutit kiassaateqarfiup imaluunniit allequtaata piginnittuanit akilerneqartassapput, aammalu atortup ikkussuussallu pissarsiarineqarsimasup teknikkikkut piunissaa naallugu narlusuumik nalikilliartortinneqartassallutik.
Imm. 2. Imm. 1-mi taaneqartunik piorsaassutinik ikkussuussanillu nalikilliliineq aningaasartuutitut ilanngunneqarsinnaavoq, tak. § 45, imm. 2.
Kapitali 10
Utaqqisut, innersuussisarneq qularnaveeqqusiissutillu§ 49. Kinaluunniit 15-nileereersimasoq initaartinneqarnissamut utaqqisunut ilanngunneqarsinnaavoq.
Imm. 2. Attartortitsisup kommuunikkaartumik utaqqisut allattorsimaffiat ingerlatarissavaa. Namminersornerullutik Oqartussat kommuunillu inissiaataannut kommuunimiittunut utaqqisunut ataatsimoortumik allattuiffiliortoqarsinnaavoq. Inissarsiortup kommuunimi utaqqisut allattorsimaffianni inissisimanera kommuunimi allami utaqqisut allattorsimaffiannut nuunneqarsinnaanngilaq.
Imm. 3. Utaqqisut allattorsimaffiannut allatsittoqartillugu attartortitsisoq 100 kr.-nimik akiliuteqartitsisassaaq. Ukiumut ataasiarluni utaqqisuni allatsissimanerup nutaanngortinneqaqqinnerani allaffissornermut akiliut 100 kr. akilersinneqartassaaq. Akiliutissamik akiliinngitsoornerup kingunerisassavaa utaqqisuni allatsissimanermit peerneqarneq. Taamaattorli utaqqisunit peerneqarnissaq pitinnagu attartortitsisup allakkatigut pineqartoq naleqquttumik piffissalerlugu aaqqeeriarnissaanut periarfissittassavaa.§ 50. Inissiat inoqanngitsut inissiarsiortunut sivisunerpaamik utaqqisuniissimasunut tunniunneqartassapput. Inissarsiortut utaqqisuniittut kissaateqarnerisigut allattuiffimmi inissisimanerannik ilisimatinneqartassapput.
Imm. 2. Attartortut allamik initaarusuttut, tassa nammineq kissaatigalugu nuukkusuttut imaluunniit inigisamik taartigiikkusuttut, nuunnissaminnik kissaateqartut allattorsimaffiannut ilanngunneqartassapput.
Imm. 3. Attartortut inissamik qularnaveeqqusiivigineqaqqullutik, tak. § 60, inigisaminnik attartorunnaarnissaminnik nalunaaruteqartut qularnaveeqqusiivigineqarnissamut allattuiffimmut ilanngunneqartassapput.
Imm. 4. Inissarsissussinermi init amerlassusiat initaartussap ilaqutaasalu amerlassusiannut naapertuuttumik amerlassuseqartinneqartassapput.
Imm. 5. Piffissami inissarsissussivimmi periarfissaqarfigineqarpat inissarsiortunut nalinginnaasunut utaqqisut, nammineq nuunnissamik kissaateqartut aamma qularnaveeqqusiivigineqarsimasut allattuiffianniittunut inoqutigiit amerlassusiannut naleqqiullugu inimik ataatsimik amerlanerusumik tunniussisoqartarsinnaavoq.
Imm. 6. Najukkami inissiat attartortikkuminaannerat takussutissaqarpat inoqutigiit amerlassusiannut naleqqiullugu inimik ataatsimik amerlanerusumiit amerlanerusunik akuttugaluartumik tunniussisoqartarsinnaavoq.§ 51. Sulisunut inissaqartitaasussanut inissarsissunneqarnissamut piffissaq utaqqiffissatut naatsorsuutigineqartoq marsip aallaqqaataani aamma septembarip aallaqqaataani tamatigut naatsorsorneqarlunilu paasissutissiissutigineqartassaaq, qaammatinilu tulliuttuni arfinilinni innersuussinissamut atuuttassalluni.
Imm. 2. Sulisut sulisunut inissiani najugaqartut allamilli initaarnissaminnik kissaateqartut, tassalu imaappoq nammineq kissaatigalugu nuukkusuttut imaluunniit taartigiikkusuttut, attartortut sulisunut inissiani najugaqartut nuunnissaminnik kissaateqarlutik allattorsimaffiannut ilanngunneqartassapput.
Imm. 3. Inissarsiortunut imm. 2-mi taaneqartutut nammineq kissaatigalugu nuukkusuttunut tunniunneqarsinnaapput inoqutigiit amerlassusiannut naleqqiullugit init ataatsimik amerlanerusut, amerlanerpaamilli inissiaq arfinilinnik initalik.
Imm. 4. Inissarsiortut ataatsimik initaarusullutik inissianik marlunnik tunniussaqartut imm. 2-mi nammineq kissaatigalugu nuukkusuttut allattorsimaffianni inissarsiortunit allanit sallinngortitaasassapput.
Imm. 5. Sulisunut inissiat inigineeruttut tallimassaat inissarsiortunut nammineq kissaatigalugu nuukkusuttut immikkut allattorsimaffianniittunut tunniunneqartassaaq.
Imm. 6. Sulisut inissaanik ataatsimoortumik immikkoortitanit initaarnissap tungaanut najugarigallagassamik imaluunniit sulisunut inissiamik sulisitsisut innersuussisinnaatitaasut innersuussassamik atorneqanngitsunik pillit kisimik piniarsinnaapput.§ 52. Inissarsiortoq imaluunniit attartortoq toquppat utaqqisut, nammineq nuunnissamik kissaateqartut aamma qularnaveeqqusiivigineqarsimasut allattuiffianni inissisimanera toqusup qimataralugu aapparisaanut nuunneqartassaaq.
Imm. 2. Inissarsiortoq imaluunniit attartortoq paaqqutarineqartariaqartut angerlarsimaffiannut utoqqalinini imaluunniit napparsimanini pissutigalugu nuuppat utaqqisut, nammineq nuunnissamik kissaateqartut aamma qularnaveeqqusiivigineqarsimasut allattuiffianni inissisimanera inissarsiortup attartortulluunniit aapparisaanut nuunneqassaaq.
Imm. 3. Imm. 1-mi aamma 2-mi oqaatigineqartut assinginik piginnaatitaaffeqarpoq inuk inissarsiortumik imaluunniit attartortumik minnerpaamik ukiuni marlunni inooqateqarsimasoq.§ 53. Inoqutigiit isertitarisartagaat ineqarnermut akiliummik, kiassarnermik innaallagissamillu matusissutaasinnaasutut naammanngippata, imaluunniit nalilerneqarpat inissarsiortoq qularnaveeqqusiissummik akiliisinnaanavianngitsoq attartortitsisup attartortitsinissaq itigartitsissutigisinnaavaa.
Imm. 2. Inissarsiortoq ineqarnermut akiliummik imaluunniit kiassarnermut akiliummik attartortitsisumut akiitsoqarpat attartortitsinissaq attartortitsisup itigartitsissutigisinnaavaa, takuulli imm. 5.
Imm. 3. Inissarsiortunut attartortitsinissaq attartortitsisup itigartitsissutigisinnaavaa inissiaq inimut ataatsimut inunnit marlunnit amerlanerusunik najugaqarfigineqartussaatillugu.
Imm. 4. Attartortitsinissaq attartortitsisup itigartitsissutigisinnaavaa inissarsiortoq inersimasunngorsimanngippat/nammineersinnaatitaasuunngippat aammalu qilersorfigalugit isumaqatigiissutinik isumaqatigiissutiginnissinnaatitaanngippat.
Imm. 5. Imm. 2 malillugu attartortitsisup attartortitsinissamik itigartitsisinnaatitaanera atuutinngilaq attartortup atorfeqartitaanerata periarfissaritippagu sulisutut ineqartitaanissaa.§ 54. Isertinnginnermini attartortoq qularnaveeqqusiissummik akiliissaaq, taannalu qaammatini 3-ni ineqarnermut akiliutitut annertutigissaaq aammalu attartornermut isumaqatigiissut naapertorlugu qimatsinermi attartortitsisup attartortumut piumasaqaatigisinnaasaanut qularnaveeqqutaassaaq.
Imm. 2. Qularnaveeqqusiissut naatsorsorneqassaaq piffissami iserterfimmi attartukkap tamakkerluni angissusia tunngavigalugu, kisianni kiassarnermut akiliut aamma immaqa isumaginninnikkut tapiissutit imaluunniit sillimmasiissutigineqartut ilanngunneqassanatik. Attartornissamut isumaqatigiissummi allassimassaaq qularnaveeqqusiissut qanoq ililluni akilerneqassanersoq.
Imm. 3. Inissianik attartorneq pillugu Inatsisartut peqqussutaat naapertorlugu akilersuinissamut aaqqissuussisimasinnaaneq maleruarneqanngippat tamanna attartornissamik isumaqatigiissummik atornerluinerussaaq, taamaattumillu attartorneq atorunnaarsinneqarsinnaalluni.§ 55. Attartornerup atorunnaarsinneqarnerani attartortitsisup qularnaveeqqusiissut attartortumut piumasaqaatissami matusissutiginissaanut atorsinnaavaa.
Imm. 2. Imm. 1 naapertorlugu attartortup qularnaveeqqusiissutaanit attartortitsisoq qanoq annertutigisumik ilanngaassanersoq naatsorsorneqareerpat attartortitsisup attartornerup atorunaarneraniit piaarnerpaamik attartortumut allallugu naatsorsuusiaq nassiutissavaa, tassanilu ersissaaq attartortoq qanoq annertutigisumik utertitassaqarnersoq imaluunniit attartornissamik isumaqatigiissut naapertorlugu attartortup pisussaaffiisa matussutissiivigineqarnissaannut attartortitsisumut qanoq annertutigisumik akiliuteqassanersoq.
Kapitali 11
Attartortitseqqiineq aamma inissamik qularnaarunneqarneq§ 56. Namminersornerullutik Oqartussat kommuunillu inissiaataannik attartortittakkanik attartortut taamaallaat attartukkaminnik atugassanngortitsisinnaatitaapput, tassa imaappoq attartortitseqqiisinnaatitaapput, attartortitsisup akuersaarneratigut aammalu atugassarititaasut attartortitsisumit akuerineqarsimasut malillugit.
Imm. 2. Sulisunut inissiat atorfeqartitaanermut atatillugu inigitinneqartut taamaallaat attartorteqqinneqarsinnaapput inigisamit aallarsimanissaq ilinniariartornermit assigisaanilluunniit peqquteqarpat, aammalu
1) sulisitsisoq ilinniariartornissamut tapersiummik nalunaaruteqarpat,
2) inissiap normua sulisitsisup sulisumut peqannginnerani tigummiinnagassanngortiinnarsimappagu, aamma
3) sulisoq aningaaserivimmik isumaqateqarpat peqannginnermini ineqarnermut akiliutip akilerneqartarnissaa pillugu.§ 57. Attartortitseqqiinissap akuerineqarnissaanut piumasaqaataavoq attartortitseqqiinermut akiliutissap annerpaamik attartortup makkununnga katillugit aningaasartuutigisassaanut uuttuuttuunissaat ineqarnermut akiliummut, kiassarnermut, innaallagissamut, imermut kiisalu pequtinut imaluunniit sullissinernut immikkut ittunut il.il. akuersaarneqarsinnaasumik annertussusilimmik akiliutigisartagassaanut. Peqqutinut aamma sullissinernut immikkut ittunut il.il. akuersaarneqarsinnaasumik annertussusilimmik akiliutigisartagassat ineqarnermut akiliutit tamarmiusut annerpaamik 10%-erissavaat.
Imm. 2. Attartortoq pisinnaatitaavoq attartortitseqqiiffigisaminit qularnaveeqqusiissummik akiliisitsinissaminut attartortitseqqiiffigisap attartortup tungaanut pisussaaffiinut qularnaveeqqutissamik. Qularnaveeqqusiissut ineqarnermullu akiliutissaq siumoorlugu akiligassaq katillutik qaammatini arfinilinni attartornermut akiliutissatut annerpaamik angissuseqassapput.§ 58. Ineqarnermut akiliutip kiassarnermullu akiliutaagallartup piffissaa eqqorlugu akilertarnissaannut attartortoq attartortitseqqiinerup nalaani akisussaasuuvoq. Aammattaaq attartukkanut ikkussuussimasunullu attartortitseqqinnermi attartortumit, taassuma inoqutaanit inunnillu allanit attartortitseqqinnermi attartortumit attartukkanut isersinnaatitaasunit mianersuaalliornikkut aserorneqarsimasunut attartortoq akisussaasuuvoq.
Imm. 2. Attartortoq attartortitsisup tungaanut akisussaasuuvoq inuit imm. 1-mi taaneqartut torersaarnissamut malittarisassanik atuuttuunik maleruaanissaannut, tak. ilanngussaq 4 Torersaarnissamut malittarisassat.§ 59. Attartortitseqqiinissamut qinnuteqaat allakkatigut attartortitsisumut tunniunneqassaaq kingusinnerpaamik attartortitseqqiinissamik kissaateqarnerup aallartinnissaa qaammammik ataatsimik sioqqullugu, qinnuteqaammilu makku taagorneqarsimassallutik
1) attartortitseqqiinermi attartortussaq taassumalu inoqutai pillugit paasissutissiissutit,
2) attartortitseqqiinerup piffissaata sivisussusissaa,
3) attartortitseqqiinermi akiliutissap annertussusissaa, matuma ataani ineqarnermut akiliutinut, kiassarnermut, innaallagissamut, imermut, pequtinut imaluunniit sullissinernut immikkut ittunut il.il. akuersaarneqarsinnaasumik annertussusilimmik akiliutigisartagassanut aningaasartuutissat,
4) qularnaveeqqusiissummik akiliuteqarsimasinnaanermut paasissutissat, aamma
5) attartortitseqqiinerup nalaani attartortitsisup najugassaa pillugu paasissutissat.
Imm. 2. Attartortitseqqiineq pissaaq attartortup attartortitseqqiinermilu attartortussap akornanni toqqartumik allallugulu isumaqatigiissusiorsimanikkut, isumaqatigiissutigineqarsimassallunilu attartortitseqqiinissamut isumaqatigiissusiami Naalakkersuisunit atortussanngortitaasimasumi.§ 60. Attartortoq inissiamik attartortitseqqiisinnaanermut inissianik attartortitsineq pillugu Inatsisartut peqqussutaat naapertorlugu piumasaqaatinik eqqortitsisimasoq inissiamik attartortitseqqiinissamut taarsiullugu toqqarsinnaavaa uteruni illoqarfimmi tassani allamik initaartinneqarnissaminik qularnaveeqqusiivigineqarnissi. Aammattaaq inissamik qularnaarunneqarsimanissamut piumasaqaataavoq attartortup attartukkaminik atorunnaarsitsiniarsimanissaa.
Imm. 2. Inissamik qularnaarunneqarnissamik qinnuteqaat qimatsinissaq kingusinnerpaamik qaammammik ataatsimik sioqqullugu allakkatigut attartortitsisumut nassiunneqassaaq.
Imm. 3. Inissamik qularnaarunneqarsimaneq atorunnaassaaq piffissaq inissamik qularnaarussiviusimasoq naappat, tak. imm. 1. Inissamik qularnaarunneqarsimaneq sivitsorneqarsinnaanngilaq.
Imm. 4. Attartortup inissiamik qularnaarunneqarsimasumik atuinissi kissaatigiguniuk inissiamut iserterfissatut kissaatigisani minnerpaamik qaammatinik pingasunik sioqqullugu initaartinneqarnissaminik kissaatigisani allaganngorlugu attartortitsisumut nassiutissavaa. § 50-mi tunngavissarititaasut malillugit inimik inissarsissussineqassaaq, aammalu siunnerfiusimassalluni inigisimasaagaluatut pitsaassusilimmik pissarsisitsiniartoqarnissaa.
Kapitali 12
Nammineq kissaatigalugu nuunnerit aamma ininik taartigiittarnerit§ 61. Attartortut nammineq kissaatigalugu nuukkusuttut allattorsimaffianni imalunniit ininik taartigiinnissamik kissaateqartutut allatsissimasut taamaallaat kommuunip ataatsip iluani inissiamik ataatsimik innersuunneqarsinnaatitaapput.
§ 62. Attartortut nammineq kissaatigalugu nuukkusuttut allattorsimaffianniittut inissiat marluk qimallugit ataatsimoorlutik ataatsimik initaartinneqarnissamik kissaateqartut nammineq kissaatigalugu nuuffissamik tunineqarnissamut nammineq kissaatigalugu nuukkusuttut allattorsimaffianni qinnuteqaateqarsimasunit allanit salliullutik tunineqartussaatitaapput.
Imm. 2. Attartortut imm. 1 malillugu nammineq kissaatigalugu nuuffissarsissunneqarsimasut inooqatigiinnerminnit avissaarnialerunik nammineq kissaatigalugu nuukkusuttut allattorsimaffianni inissisimaffimminnut uteqqissinnaapput ulloq allatsissimaffigeqqaagarisimasartik allatseqqinnerminni aallartiffigalugu. Nammineq kissaatigalugu nuukkusuttut allattorsimaffiannut ikkuteqqinneqarnissaq pillugu nalunaarnissaq attartortitsisumut nalunaarutigineqassaaq nammineq kissaatigalugu ullup nuuffigisap kingornagut ukioq ataaseq qaangiutsinnagu.
Kapitali 13
Attartornerup uninnera aamma attartukkat atorunnaarsinneqartut§ 63. Attartorneq atorsinnaasumik atorunnaarsinniarneqarsimappat, atorunnaarsinneqarsimappat imaluunniit unissimappat, attartortorlu attartukkaminit anisimanngippat attartortitsisup ingerlaannaq attartortoq pinngitsaalillugu attartukkamit anisinniarsarissavaa, Kalaallit Nunaanni eqqartuussisarneq pillugu inatsisip kapitali 7-at naapertorlugu.
Imm. 2. Pinngitsaaliilluni anisitsinissamik kutsiuut, tak. imm. 1, nassiunneqassaaq politiinut inigisap eqqartuussiveqarfianiittunut. Kutsiuummut ilanngunneqassapput attartortoq pinngitsaalillugu anisikkusutaq pillugu paasissutissat, kiisalu pinngitsaaliilluni anisitsinissamut tunngaviusunut uppernarsaatissat.
Imm. 3. Pinngitsaaliilluni anisitsinermut immaqalu aamma pisattat peerneqarnerinut atatillugu aningaasartuutit attartortitsisumit akilerneqassapput, taassumalu aningaasat attartortumut nuuttumut akilersinniarsinnaavai.§ 64. Aatsaat pissutsit attartortup nammagassiissutai annertuujuppata attartornissamik isumaqatigiissut attartortitsisup atorunnaarsissinnaavaa.
Imm. 2. Attartorneq annertuumik atornerlunneqarsimassaaq ineqarnermut akiliutissaq, kiassarnermut akiliutissaq qularnaveeqqusiissutissarlu attartornissamik isumaqatigiissusiami piffissaa eqqorlugu ullup akiliiffissarititaasup kingulliup kingornagut kingusinnerpaamik qaammatip ataatsip qaangiunnerani akilerneqarsimanngippata.§ 65. Attartorneq atorunnaarsinneqartinnagu attartortoq allakkatigut peqquneqaqqarallassaaq pissutsit iluarsiivigeqqullugit, tak. §§ 66 aamma 67.
§ 66. Allakkatigut peqquneqarneq imaalillugu nalunaarutigineqassaaq attartortoq pissutsit attartortup nammattitai pillugit aaqqiiniarnissaminut piffissamik killiliivigalugu.
Imm. 2. Allallugit peqqusissutip imarisaavai paasissutissat
1) pissutsinut peqqusissummut tunngaviusunut paasissutissaasut,
2) inissianik attartorneq pillugu Inatsisartut peqqussutaanni aalajangersagaq attartornermik isumaqatigiissummik atorunnaarsitsinissamut tunngavissarititaasoq pillugu paasissutissaasut,
3) attartornermut isumaqatigiissut atorunnaarsinneqarsinnaasoq peqqussummi piffissaliussaq naatinnagu peqqussut malinneqanngippat, aamma
4) attartugaq attartornerup atorunnaarsinneqarnerani ingerlaannaq qimanneqassasoq.§ 67. Allallugu peqqusissut allakkatigut tammatsaalisatigut nassiunneqassaaq imaluunniit allakkisartumut tunniukkiartortinneqassalluni. Allakkanik tammatsaalisanik tigusinerminut attartortup atsiornera, imaluunniit attartortumut allakkat tunniunneqarsimanerinik allakkisartup allallugu nalunaarutaa attartortitsisumut uppernarsaatissaapput allallugu peqqusissutip anngunneqarsimaneranut.
§ 68. Piffissap killiliussap iluani allallugu peqqusissut malinneqanngippat, tak. § 66, attartortitsisup utaqqeqqaarani attartornissamik isumaqatigiissut atorunnaarsissinnaavaa.
Imm. 2. Attartortitsisup attartornissamik isumaqatigiissut atorunnaartussanngortikkuniuk, tamanna attartortumut allallugu nalunaarutigissavaa. Allallugu nalunaarutip imarissavai paasissutissat
1) attartornissamik isumaqatigiissutip atorunnaarsinneqarnissaanut tunngavilersuutinut tunngassuteqartut,
2) inissianik attartorneq pillugu Inatsisartut peqqussutaanni aalajangersagaq attartornermik isumaqatigiissummik atorunnaarsitsinissamut tunngavissarititaasoq pillugu paasissutissaasunut tunngassuteqartut,
3) inissiap qaqugu qimanneqarnissaanut pequtinillu imaarneqarnissaanut paasissutissanut tunngassuteqartut,
4) attartukkamut matuersaatit attartortitsisumut qaqugu tunniunneqassanersut,
5) inigisap alakkarterneqarnissaa qaqugu pissanersoq,
6) piffissaq suna tikillugu ineqarnermut akiliut, kiassarnermut akiliut il.il. akilerneqartassanersut, aamma
7) attartortup aningaasartuutit allat suut attartortitsisumut taarsiissutigissanerai, soorlu atornerluinerup malitsigisaanik annaasaqaatinut, attartukkamit anisitsinermi aningaasartuutit assigisaallu.
Kapitali 14
Attartortup nalinginnaasumik iluarsaassisinnaatitaanera§ 69. Inissiamik qimatsinermini attartortoq atornerluineq pissutigalugu attartorneq atorunnaarsitaanngippat imaluunniit inissiamik qimatsinnginnermini nalinginnaasumik iluarsaassinissamut iluarsaassititsinissamulluunniit aporfissinneqarsimanngikkuni nammineerluni inissiamik nalinginnaasumik iluarsaassisinnaatitaavoq imaluunniit iluarsaassisitsisinnaatitaalluni.
§ 70. Nalinginnaasumik iluarsaassineq attartortumit suliaritinneqarsimasoq imaluunnit nammineerluni suliarineqarsimasoq kukkuneqarpat amigaateqarpalluunniit, assersuutigalugu assarsornikkut illersorneqarsinnaasumik pitsaassuseqanngippat imaluunniit qalipaatit akuerisaasut atorlugit suliarineqarsimanngippat, tak. § 73, attartortoq attartortitsisup tungaanut taarsiissuteqarnissamut akisussaatitaasussaavoq, tak. imm. 2. Attartortup assassornermillu suliaqartut akornanni akiligassaasinnaasut suulluunniit attartortitsisup susassarinngilai.
Imm. 2. Attartortup nalinginnaasumik iluarsaassisitsinera imaluunniit iluarsaanera kukkuneqartiterpat amigaateqartiterpalluunniit, tak. imm. 1, attartortitsisoq pisinnaatitaavoq attartortup akiligassaanik tamakkiisumik ilaannakortumilluunniit nalinginnaasumik iluarsaassititseqqinnissaminut.
Imm. 3. Aammattaaq attartortup pisussaaffigissavaa, tak. imm. 1 aamma 2, piffissami nalinginnaasumik iluarsaassiffimmi ineqarnermut akiliutissap il.il. akilernissaat, tak. imm. 2, tassa nalinginnaasumik iluarsaassinissaq attartornerup unitsinniarlugu nalunaarutigineqarfiata iluani naammassiniarneqarsinnaanngippat.
Imm. 4. Qimatsisup pisuussutai pissutigalugit inissiamut piffissaq eqqorlugu attartortussap nutaap isertersinnaannginnera pissutigalugu inissisimatinneqarneranut, pequtaasa paarineqarnerinut il.il. aningaasartuutinut attartortitsisup attartortoq inimik qimatsisoq akisussaatissinnaavaa, tak. imm. 1.§ 71. Attartortup inimik qimatsissamaartup attartortitsisoq inissiamik siumoortumik misissuitissinnaavaa uppernarsiiviginiarlugu attartortup qimatsinissaanut atatillugu attartortitsisup nalinginnaasumik iluarsaassinissaq qanoq annertutigisoq piumasariumaneraa. Siumoortumik misissuinermut aningaasartuutit attartortup akilissavai.
§ 72. Inissiamik siumoortumik misissuinissamik kissaateqarnermut atatillugu attartortitsisup paasissutissiissutigissavai
1) nalinginnaasumik iluarsaassinissap annertussusissaa, matuma ataani tapiitilersornissaa, iigaasa qilaavatalu qalipanneqarnissaat, naqqisa lakkerneqarnissaat, inissiap il.il. eqqiarneqarnissaat, tassa inissiami suliarineqartussatut naatsorsuutigineqartut,
2) nalinginnaasumik iluarsaassinissap akissaattut naatsorsuutigineqartut, tassa attartortitsisoq iluarsaassisitsisuussappat, aamma
3) nalinginnaasumik iluarsaassinerup procentia qanoq angitigisoq attartortup akilissaneraa.
Imm. 2. Peqatigitillugu attartortup ilisimatitsissutigissavaa nalinginnaasumik iluarsaassinissaq nammineerluni suliarerusunnerlugu imaluunniit nammineerluni suliaritikkusunnerlugu.§ 73. Inissiamik nalinginnaasumik iluarsaassinissaq suliarineqassaaq atortussat qaamasunik qalipaatillit akuerisaasut piukkunnarluartullu attartortitsisumit akuerineqarsimasut atorlugit.
Imm. 2. Imm. 1 naapertorlugu atortussanut aningaasartuutit attartortumit akilerneqassapput, tak. § 74.§ 74. Attartortup nalinginnaasumik iluarsaassititsineranut iluarsaassineranulluunniit aningaasartuutit uppernarsaasikkat, tak. §§ 69, 70 aamma 73, attartortitsisumit pissarsisitsissutaassapput, tak. imm. 2.
Imm. 2. Taarsiinissaq naatsorsorneqassaaq aningaasartuutit uppernarsaasikkat tunngavigalugit, aamma
1) annertussuserissallugu aningaasartuutit uppernarsaasikkat ilaat inissiap nalinginnaasumik iluarsaanneqartarneranut aningaasartuutinik attartortitsisup tigusiartuaarnissaa pillugu malittarisassat naapertorlugit attartortitsisup akiligassaagalui, aamma
2) annerpaaffigisinnaallugit aningaasat toqqorneqarsimasut, tak. § 22, imm. 2.
Imm. 3. Imm. 1 naapertorlugu attartortup taarsiivigineqarnissamik pisinnaatitaaffia piissaaq nalinginnaasumik iluarsaassisimaneq piumasaqaatinut attartortumut ilisimatitsissutigineqarsimasunut naapertuutinngippat, imaluunniit nalinginnaasumik iluarsaassisimaneq kukkuneqarpat imaluunniit amigaateqarpat, tak. § 70.
Imm. 4. Qimatsinermi inissiamik nalinginnaasumik iluarsaassinerminut atatillugu nammineerluni suliami nalingat attartortup akissarsissutigisinnaanngilaa.
Kapitali 15
Pitsanngorsaanerit pissarsiassallu§ 75. Attartukkami silataanilu pitsanngorsagassatut §§ 76-78-mi aalajangersagaasimasut nammineq akilikkaminik suliarinissaannut akuerineqaqqulluni attartortoq attartortitsisumut qinnuteqarsinnaavoq, takuulli §§ 81-84.
Imm. 2. Pitsanngorsaanissamut tunngavissarititaasussaavoq attartukkat atorneqarnerminni naleqassusiannik massakkut attartortumut attartulerumaartussanullu suliat naleqarnerulersitsinissaat.§ 76. Attartukkami pitsanngorsaassutigalugit suliarineqarsinnaasut tassaapput:
1) Termostatilersuinerit.
2) Illup iluani oqorsaaqqinnerit.
3) Perusuersartarfinnik taarsiinerit aamma igaffimmi, igalermi uffarfimmilu imermut kissartumut nillertumullu qipisaatinik taarsersuinerit.
4) Igaffimmi, igalermi uffarfimmilu asaffinnik, atortunik nerriviusanillu taarsersuinerit.
5) Qaammaqqutinut atortunik assigiinngitsunik kiisalu ikkuffinnik ikkussuussinerit.
6) Aalap milluaasuanik qingalimmik ikkussineq.
7) Radiatorimik aalajangerlugu ikkussamik ikkussineq.
8) Atisaasivimmik igalaallu saavinik ikkussuinerit.§ 77. Attartukkap silataani pitsanngorsaassutigalugit suliarineqarsinnaasut tassaapput:
1) Aneersuartarfimmik matusineq, assiaqutsersuineq imaluunniit aneersuartarfimmik qilaanngusersuineq,
2) Inip silarlianik pilersitsineq.
3) Fransk altan-imik inip alliup nalaaniittumik peersilluni aneersuartarfinngortitsineq.§ 78. Aammattaaq attartotup attartortitsisoq qinnuvigisinnaavaa attartukkap iluani silataanilu suliassat makku suliariumallugit, takuulli §§ 79 aamma 81:
1) Igalaanik ilorlernik ikkussuineq.
2) Kissarsuummik innaallagiatortumik nukimmik ileqqaarnartumik taarsiineq.
3) Qaammaqqutinut atortunik assigiinngitsunik amerlanerusunik ikkussineq.
4) Innaallagissamut panel-inik radiatorinillu ikkussinerit.
5) Uffarfimmik peersineq.
6) Matumik matusineq matuliinerluunniit.§ 79. Attartortup §§ 76-78 naapertorlugit suliaqarnissaanut piumasaqaataavoq attartortup suliarinnilinnginnermini inissiap iluani silataanilu kissaatigisaminik suliaqarnissaminut allallugu piginnaatitsissummik piniaqqaarsimanissaa.
Imm. 2. Inissiami pitsaanngorsaatinik imaluunniit allannguinernik suliaqarnissamut piginnaatitsissummik piniarnissamut atatillugu attartortup nassiutissavai suliassanut allaaserinnissut, teknikkikkut aningaasatigullu suliassap allaaserisimaneranik imaqartoq, kiisalu aamma imarissallugit atortussat, pitsaassusissat, qalipaatissatut toqqakkat aammalu suliassat suliarineqarnissaannut piffissap qanoq sivisutiginissaa.
Imm. 3. Attartortitsisup alakkartissavaa attartortoq kissaatigisanik suliaqarnissamut piginnaatitaanersoq.
Imm. 4. Suliassat sananissaannut akuersissuteqarfigineqartussaappata imaluunniit allatigut akuersissuteqarfigineqartussaappata attartortitsisoq akuersissummik piniassaaq. Aatsaat akuersissut pissarsiarineqareerpat suliassat aallartinneqarsinnaapput.§ 80. Attartortup attartortitsisumut suliat inaarneqarnerat nalunaarutigissavaa, aammalu attartortitsisup takuniaanermigut suliarineqarsimasut akuerissavai alakkarterlugulu assarsornikkut illersorneqarsinnaasumik suliarineqarsimanersut. Taakkununnga aningaasartuutit attartortup akilissavai.
Imm. 2. Suliarineqartut atorneqalernissamut akuersissuteqarfigineqartussaatitaappata akuersissut taamaattoq attartortitsisup piniassavaa.
Imm. 3. Suliarineqarsimasut immikkut ingerlatsinermut aserfallatsaaliinermullu attartortitsisumut aningaasartuuteqartitsilersussaappata taakkua nalingannik attartornermut akiliut qaffaavigineqassaaq.
Imm. 4. Attartortitsisup pitsanngorsaasimanermik misissuineraniit akuersineraniillu qaammatit tulleriiaaginnaat 100-it iluanni attartukkamut ataatsimut pitsanngorsaanissamut akuersissutissaq ataasiinnaq taamaallaat tunniunneqarsinnaatitaassaaq, tak. § 75.§ 81. Pitsanngorsaanermi pitsanngorsaassutit nalingattut naatsorsuunneqartassapput piffissami attartortup akuerineqaqqulluni kutsiuuteqarnerata nalaani attartortitsisumit suliarineqartussatut akuerineqarsimasunut aningaasartuutigineqavissimasut, tak. § 79, imm. 2. Pitsanngorsaatit minnerpaamik 2.000 kr.-ninik annerpaamillu 50.000 kr.-ninik naleqartassapput.
Imm. 2. Pitsanngorsaassutissat tamakkivillutik naammassineqarsinnaanngippata pitsanngorsaassutigineqartut naliliivigineqassapput, tak. imm. 1, suliarineqavissimasut nalingat naliliunneqarluni.§ 82. Suliarineqartut nassatarisimappassuk illuutip ilaata ikkuussuussalluunniit pioreersup taarserneqarnera imaluunniit peerneqarnera taassuma nalingata sinnera pissarsissutigitinneqartussanut ilanngaatigineqartassaaq.
Imm. 2. Suliat imaluunnit taakkua ilaat immikkut ittumik kusanarsaaginnarlugit imaluunniit nukissamik atuiffiunerusussatut ikkussuussaappata tamanna pitsanngorsaanerup naliliivigineqarnerani ilanngaatigineqassaaq.§ 83. Pitsanngorsaanerup naatsorsornera attartortitsisumit attartortumillu atsiorneqassaaq attartornissamillu isumaqatigiissummut nipputinneqassalluni.
Imm. 2. Pitsanngorsaanerup nalinga piffissami attartortitsisup suliniummik takuniaaneraniit akuersineraniillu qaammatit 100-it ingerlaneranni qaammammut 1%-imik appartikkiartuaarneqassaaq, tak. § 80, imm. 1.§ 84. Attartortup attartukkaminik qimatsinerani pitsanngorsaanerup nalinga apparsaataasimasinnaasunik ilanngaavigalugu attartortumut akilerneqassaaq, tak. § 83, imm. 2.
Imm. 2. Pitsanngorsaanerup nalingata sinnera attartukkamik attartortussamut nutaamut akiliutigitinneqartartussap naatsorsorneranut ilanngunneqassaaq.
Kapitali 16
Atuutilerfissaa aamma ikaarsaariarnissamut aalajangersakkat§ 85. Attartortunut piffissami 1. januar 1990-imit 1. januar 1995-imut qularnaveeqqusiissummik nammineq toqqarlugu Kalaallit Nunaanni aningaasariviit arlaanni kontomut matoqqasumut ikineqartunik akiliisimasunut makkua atuutissapput:
1) Qularnaveeqqusiissummik attartortumut tunniussinissaq attartornerup atorunnaarnerani aammalu attartortitsisup akuersineratigut, attartortukkat paarinerlunneqarsimanngippata aammalu attartortoq ineqarnermut akiliutissaminik akiitsoqanngippat aatsaat pisinnaavoq.
2) Piffissami attartorfiup nalaani qularnaveeqqusiissummut kontomit attartortitsisoq tigusisinnaavoq aserukkanut iluasaassinernullu aserorterisimanerup, paarsinerlussimanerup assigisaasaluunniit malitsigisaannik attartortumut nammagassiissutigineqarsinnaasunut matussutissanik.
3) Qularnaveeqqusiissummut konto taarsigassarsianut sallunaveeqqusiunneqarsinnaananilu eqqartuussisutigut malersorneqarnermut sallunaveeqqusiunneqarsinnaanngilaq.
Imm. 2. Attartortitsisup attartortup qularnaveeqqusiussaanit qanoq annertutigisumik ilanngaassisinnaanera naatsorsorneqareerpat attartornerup naanerata kingornagut piaarnerpaamik attartortitsisoq attartortumut allallugu naatsorsuusiamik nassiussissaaq, tassanilu allassimassapput attartortup qularnaveeqqusiussamit qanoq annertutigisumik utertitsivigineqarnissaa, imaluunniit attartornissamut isumaqatigiissut naapertorlugu attartortup pisussaaffiinut matusissutissanik attartortoq qanoq amerlatigisunik akiliisussaanersoq.§ 86. Nalunaarut atuutilissaaq ulloq 31. december 2003.
Imm. 2. Peqatigitillugu atorunnaarsinneqassapput:
1) Attartortup aserfallatsaaliinissamut periarfissai pillugit Namminersornerullutik Oqartussat Nalunaarutaat nr. 34, 21. december 1989-meersoq.
2) Inigisap angissusiata naatsorsorneqarnissaa pillugu Namminersornerullutik Oqartussat Nalunaarutaat nr. 35, 21. december 1989-meersoq.
3) Qularnaveeqqusiissut pillugu Namminersornerullutik Oqartussat Nalunaarutaat nr. 38, 21. december 1989-meersoq.
4) Innisimasunut ineeqqanik attartortitseqqiineq pillugu Namminersornerullutik Oqartussat Nalunaarutaat nr. 39, 18. december 1992-meersoq.
5) Namminersornerullutik Oqartussat kommuunillu inissiaataanni attartortittakkani qularnaveeqqusiissuteqarneq pillugu Namminersornerullutik Oqartussat Nalunaarutaat nr. 53, 29. december 1994-meersoq.
6) Namminersornerullutik Oqartussat kommuunillu inissiaataanni attartortittakkani immikkoortortaqarfiit siulersuisussaannik qinersineq pillugu Namminersornerullutik Oqartussat Nalunaarutaat nr. 54, 29. december 1994-meersoq.
7) Inigisap angissusiata naatsorsorneqarnissaa pillugu Namminersornerullutik Oqartussat Nalunaarutaat nr. 57, 29. december 1994-meersoq.
8) Namminersornerullutik Oqartussat kommuunillu inissiaataannut innersuussisarneq, attartortitsineq, attartortitseqqiineq il.il. pillugit Namminersornerullutik Oqartussat Nalunaarutaat nr. 24, 10. oktober 2000-meersoq.
9) Namminersornerullutik Oqartussat kommuunillu inissiaataanni attartortittakkani attartornerup atorunnaarsinneqarnissaa pillugu Namminersornerullutik Oqartussat Nalunaarutaat nr. 8, 2. april 2002-meersoq.
10) Namminersornerullutik Oqartussat kommuunillu inissiaataanni attartortittakkani aqutsineq, ingerlatsineq attartornermullu akiliutinik aalajangersaasarneq pillugit Namminersornerullutik Oqartussat Nalunaarutaat nr. 26, 27. september 2002-meersoq.
11) Kiassarnermut naatsorsuutit pillugit Namminersornerullutik Oqartussat Nalunaarutaat nr. 6, 18. marts 2003-meersoq.
Imm. 3. Peqatigitillugu kaajallaasitat makkua Namminersornerullutik Oqartussanit atulersinneqarsimasut atorunnaarsinneqassapput:
1) Ineqarfigissaaneq pillugu Kaajallaasitaq 7-16, 20. november 1989-meersoq.
2) Kiassarnermut naatsorsuutit pillugit Kaajallaasitaq 7-23, 20. november 1989-meersoq.
3) Attartortitsinermi qularnaveeqqusiineq pillugu Kaajallaasitaq 7-25, 20. november 1989-meersoq.
4) Inissianik attartukkanik taartigiissinnaaneq pillugu Kaajallaasitaq 7-27, 20. november 1989-meersoq.
5) Iluarsaassineq pillugu Kaajallaasitaq 7-29, 1. december 1990-meersoq.
6) Namminersornerullutik Oqartussat inissiaataanni attartortittakkani ajoqusernerit pillugu Kaajallaasitaq 7-35, 15. juni 1991-meersoq.
7) Najugaqartut sinniisaannut tapiissutit pillugit Kaajallaasitaq 7-41, 14. maj 1993-meersoq.
Imm. 4. §§ 2 aamma 18-mi aalajangersakkat atuutilissapput 2003-mi aningaasatigut siumut missingersuut aallarnerfigalugu ilanngullugulu. Kapitali 8-mi aalajangersakkat ukiumut naatsorsuuteqarfimmut 2003-mut naatsorsuutinik saqqummiussinermi kukkunersiuinermilu atorneqassapput, taamaallaat missingersuutit malittarisassat makkua malillugit ukiunut taakkununnga suliarineqarsimanngitsut malitsigisaannik minitassatut pisariaqartut kisiisa pinnagit.
Imm. 5. Ineqarfittut immikkoortortaqarfiup aningaasatigut inissianik piginnittumut isumannaajagassarisai taarsigassarsisitsissutaalu imaalillugit ikilisikkiartuaarneqassapput ineqarfittut immikkoortortaqarfiup aningaasaqarnikkut pissuserisai, matuma ataani toqqortikkat qularnaveeqqusiissutillu §§ 18 aamma 19-mi aalajangersakkanik kingusinnerpaamik 31. december 2005-mimi eqqortitsisimassallutik.
Imm. 6. Ineqarfittut immikkoortortaqarfiup ingerlatsinermut amigartoorutigisimasinnaasai, ingerlatsinermut amigartoorutitut katersorsimasinnaasai kiisalu 31. december 2002-mi tigoriaannartut amigaatigisimasinnaasai imatut aaqqinniarneqassapput, amigartoorut,
1) 500.000 kr.-ninik anneruppat 1. januar 2012 nallertinnagu akilerneqasimassalluni,
2) 200.000 kr.-ninik anneruppat, kisiannili 500.000 kr.-ninit mikinerulluni 1. januar 2010 nallertinnagu akilerneqarsimassalluni, imaluunniit
3) 200.000 kr.-ninit appasinneruppat 1. januar 2008 nallertinnagu akilerneqarsimalluni.
Namminersornerullutik Oqartussat, ulloq 22. december 2003
Hans Enoksen/
Dorthe Johannsen
Ilanngussaq 1 Imaasa allattorsimaffiat
Ilanngussaq 2 Missingersuutit (pdf-format)
Ilanngussaq 3 Aningaasartuutinut akileeqqataassutissap tunngaviusumik angissusissaa (pdf-format)
Ilanngussaq 4 Torersaarnissamut malittarisassat
Ilanngussaq 5 Angusaasut naatsorsornerat (pdf-format)
Ilanngussaq 6 Oqimaaqatigiissitsissut (pdf-format)