Ilanngussaq 4. Torersaarnissamut malittarisassat

 

Aallaqqaasiut

Ilaqutariinnut arlariinnut inissiani pingaartuuvoq sanilinut najugaqartunullu allanut mianersuussisumik pissuseqarnissaq. Najugaqartut akornanni imminut ajunngitsumik pissuseqarfigineq ineqarfiup pitsaasuulluni toqqissisimasuunissamut ingerlalluarnissaanullu sunniuteqaqataalluartarpoq.

Inissiat illuutillu paarilluarnerisigut ajoqusernerit amerlassusiat annikillisaavigeqataaffigineqartarpoq. Ajoqusernerit tamaasa nammineq allanilluunniit attartortup inissiamut isersinnaatitaannit aserorneqartut attartortup akiligassarai.

Attartortup aserugaasa iluarsaanneqarnissaannut qularnaveeqqusiissutinik attartortoq atuisinnaatitaavoq. Qularnaveeqqusiissut aammattaaq atorneqarsinnaavoq ineqarnermut akiliummut kiassarnermullu akiitsut matussutissiivigineqarnissaannut.

Attartorneq attartortitsisup atorunnaarsissinnaavaa attartortup inissiaq paarinerluppagu, aserorteriffigippagu, imaluunniit ineqarnermut akiliummik kiassarnermullu annertuutigut kinguaattooruteqarpat.

Eqqakkat

Illuummi eqqakkanut nakkartitsisarfeqarpat igitassat pappiaqqamut poortuulluarlugit imaluunniit puussiamut ikillugit nakkartitsisarfikkut nakkartinneqartassapput. Illuutini eqqakkanut nakkartitsisarfeqanngitsuni igitassat taakkununnga igitsivissianut iginneqartassapput. Igitassat majuartarfinnut igitassanulluunniit nakkartitsisarfiit naqqinut ilineqartassanngillat.

Silami torsuusaasarsuit majuartarfiillu ataasimoorussat

Silami torsuusaasarsuit majugartarfiillu salliarnartaat inigisami silataaniittut attartortup eqqiluisaartitseqataaffigissavai. Sikkilit, kaassuartakkat, qamutit pequtillu allat majuartarfinnut, majuartarfiit sangoriaannut imaluunniit silami torsuusaasarsuarnut inissinneqaqqusaanngillat.

Antennit

Attartortitsisoq allakkatigut akuersiteqqaartinnagu antennit silamiittut ikkuteqqusaanngillat. Akuersissummut piumasaqaataasinnaavoq attartortup qularnaveeqqusiissummik akiliuteqartinneqarnissaa. Antennip ikkunneqarnerani kingusinnerusukkulluunniit aserorneqarsimasinnaasut iluarsiivigineqarnissaannut aningaasat atorneqartarsinnaapput. Antennit pillugit aalajangersakkat inissianik attartorneq pillugu inatsisartut peqqussutaata nr. 5, 31. maj 2001-imeersup § 33-ani aalajangersarsimapput.

Uffarfiit, kuutsitsiviit, perusuersartarfiit, erngup qorlorfii il.il.

Annoraamernit, qiviuusat assigisaalluunniit perusuersartarfinnut kuutsittakkanut iginneqaqqusaanngillat. Erngup qorlorfii, perusuersartarfiit imiisivittaat aamma perusuersarfittaat ussiitsut, imaluunniit erngup aqqutaani allat ussiitsut pillugit attartortitsisoq ingerlaannaq nalunaarfigineqartassaaq.

Mingutsitsineq

Ataatsimoorlugit atortakkat, soorlu majuartarfeqarfiit, illoqannginnersat pinnguartarfiilluunniit mingutsinneqaqqusaanngillat. Illuutip qarmai imaluunniit qisuttai titartaavigineqaqqusaanngillat, kigartorneqaqqusaanatik imaluunniit qalipanneqaqqusaanngillat. Pisariaqartunik attartortitsisoq attartortup akiligassaannik eqqiaasitsisinnaavoq pitsanngorsaatitsisinnaallunilu.

Uumasuutit

Qimmermik qitsummilluunniit uumasuuteqartoqaqqusaanngilaq attartortitsisoq allakkatigut akuersiteqqaartinnagu. Pissutsit immikkut ittut pisariaqartinngippassuk ilaqutariinnut arlalinnut inissiani, tassa illuni uiguleriinni aamma inissiarsuarni akuersissuteqartoqarsinnaanngilaq.

Sakkut, nipilersorneq il.il.

Sakkut nipiliortut, soorlu putoorutit, sanilit eqqarsaatigalugit taamaallaat atorneqaqqusaapput nal. 8-p aamma 19-ip akornanni. Majuartarfinni, silami torsuusaasarsuarni imaluunnit naqqup atani nipiliorluni pinnguarnerit ajornartitaapput. Radio, tv, båndoptageri, oqaluttartoq imaluunniit CD imatut atorneqaqqusaanngillat sanilinut akornusersuisussanngorlugit. Nipiliorluni festernerit ajornartitaapput sanilit akuersisissimatinnagit. Nipilersortartut sungiusarnissaat imaluunniit nipilersornermik ilinniartitsinissaq siumungaaq attartortitsisumit akuerineqarsimasuussapput.

Tamalaasivik

Ikuallajasut tamalaasivimmiitinneqaqqusaanngillat, soorlu benziina, petroliu, terpentiina aamma lakki. Quit taamaattut attartortup paarnaarsimatitassarai – aamma atorneqanngikkaluarpataluunniit.

Radiaatorit

Radiaatorit kiassarnermiluunniit aqqutit allat ussiippata attartortitsisoq ingerlaannaq nalunaarfigineqassaaq.

Allagartalersuineq

Matumut allagarsiussat kisiisa pinnagit allagartalersuineq attartortitsisumit akuerineqarsimasussaavoq.

Atisanik errorsineq

Atuisut allat assigerluinnarlugit attartortoq errorsisarfinnik atuisinnaatitaavoq. Najoqqutassatut nivinngarneqarsimasut malillugit errorsisarfimmik atuineq pisassaaq, aammalu nammineq akisussaaffigalugu. Errorsisarfiup atortui pissusissamisuunngippata tamanna errorsisarfimmik nakkutilliisumut attartortitsisumulluunniit nalunaarutigineqassaaq. Annersuartarfinni atisanik panersiineq najugaqartunut allanut akornutaassanngilaq.

Inigisami allanngortiterineq

Iikkat avissaarutaasut attartortup ikkunnagilluunniit peertussaanngilai. Aamma inissiami allatigut allanngortitereqqusaanngilaq attartortitsisoq allakkatigut akuersiseqqaartinnagu. Allanngortiterinissat akuersissutigineqarnerat nalunaarutigineqarpat taamaaliornermut atatillugu aningaasartuutit tamaasa attartortup akilissavai. Attartornerup naanerani allannguutit pissusitoqaannut uterteqqinneqarnissaat piumasarineqarsinnaavoq. Iluarseeqinneq attartortumit suliarineqassaaq imaluunniit taassuminnga akilerneqarluni. Allannguutaasimasut attartortitsisumit allakkatigut akuerineqaratik suliarineqarsimasut paasineqarniariarunik pissusitoqqaminnut utertinneqarsinnaapput attartortup akiligaanik.

Torersaarnissamut malittarisassat maleruarneqassapput

Torersaarnissamut malittarisassat ukua imaluunniit torersaarnissamut malittarisassat attartornermut peqqussutip aalajangersagartaani aalajangersaavigineqarsimasut attartortup maleruanngippagit attartortitsisup attartorneq atorunnaarsissinnaavaa, tassa torersaarnissamut malittarisassat unioqqutinneqarsimanerat pineqarpat.

Torersaarnissamut malittarisassat allanut kisimik atuuttussaanngillat.