Ilanngussaq 7. Kukkunersiuinissamut ilitsersuusiaq

 

Kukkunersiuisup kukkunersiuinermini immikkut isiginiassavai:

 

1. Nalunaarutip malittarisassai naapertorlugit ukiumoortumik naatsorsuutit inissititerneqarsimanersut.
2. Ineqarfittut immikkoortortaqarfiup pigisaanik akiligassaanillu, aningaasatigut inissisimaneranit angusaasunillu ukiumoortumik naatsorsuutit eqqortumik assiliartaliinersut.
3. Pigisat sumiiffissaminniinnerat sumullu atanerat kukkunersiuinermi pisariaqartutigut qularnarunnaarsinneqarnersoq.
4. Nalilinnik nalileeriaatsit ukiumit naatsorsuuteqarfimmit tullianut allanngortinneqaqqusaanngillat.
5. Nalilinnik naliliineq tamatigut pisassaaq mianersuussilluinnaqqissaarluni aammalu pingaartumik imaaliorluni:
1. piffissami oqimaaqatigiissitsivimmi iluanaarutitut uppernarsineqartoq kisimi ilanngunneqassasoq,
2. nangiarnarsinnaasutut annaasaqarfiusinnaasutullu siumut takuneqarsinnaasut ukiup naatsorsuuteqarfiup ingerlanerani, imaluunniit ukiup naatsorsuuteqarfiup siuliani pilersimasut isiginiarneqassasut, naak nangiarnarsinnaasut imaluunniit annaasat piffissami oqimaaqatigiissitsivimmi aammalu piffissami ukiumoortumik naatsorsuutit suliarineqarfigisaanni aatsaat ilisimaneqalersimagaluarpataluunniit, aamma
3. nalillit nalikilleriarneri suulluunniit isiginiarneqassasut, ukiumoortumik naatsorsuutit annaasaqarnermik imaluunniit iluanaaruteqarnermik takutitsigaluarpataluunniit.
6. Ukiumi naatsorsuutit pineqarfianni, piffissaq akiliiffissaq apeqqutaatinnagu, isertitat aningaasartuutillu ukiumut tassunga tunngassuteqartut isiginiarneqassapput.
7. Pigisat akiligassallu allattorsimaffiisa immikkoortortaat tamarmik immikkut nalilersuiffigineqarsimassasut.
8. Ammasumik oqimaaqatigiissitsissut ukiut tamaasa ukiup siuliani oqimaaqatigiissitsissummut naapertuuttassaaq.
9. Pisussaaffigisat eqqortumik naatsorsuutini oqaatigineqarsimassapput.
10. Aqutsinermut akissarsiarititassat tamatumunnga malittarisassatut aalajangersagaasut naapertorlugit aalajangersarneqarsimassasut