Nunami inuussutissarsiutinut aningaasalersuinikkut tapersiisarneq pillugu Inatsisartut inatsisaat nr. 20, 30. oktober 1998-imeersooq.
Inatsisip siunertaa.
§ 1. Inatsisip siunertaraa
1) Kalaallit Nunaanni nunami inuussutissarsiornermi suliffeqarfinnik pilersitsinermi aningaasanik pissarsiniartarnerup ajornannginnerulernissaa,
2) suliffeqarfiit kinguaariinnut tullernut tunniunneqarneranni immikkut illuinnartunik aningaasanik pisariaqartitsinerit aaqqinneqarnissaannut peqataanissaq, kiisalu
3) inuussutissarsiutini taakkunani tunisassianik ineriartortitsinermut aningaasanik pissarsinissaq.
Piumasaqaatit nalinginnaasut.
§ 2. Suliffeqarfimmik pilersitsinermi aamma kinguaariinnut tullernut tunniussinermi ajornartorsiortunut isumannaatsumik taarsigassarsinermut qularnaveeqqusiisoqarsinnaavoq.
Imm. 2. Ukiut tamaasa Inatsisartut Aningaasanut inatsisaannut atatillugu ukiumi aningaasanut inatseqarfiusumi tullermi suliffeqarfimmik aallartitsinermut qularnaveeqqusiissutissat amerlanerpaaffissaat aalajangerneqartassapput. Aamma kinguaariinnut tullernut tunniussisoqarnerani ajornartorsiortunut qularnaveeqqusiissutissat amerlanerpaaffissaat aalajangerneqartassapput.
Imm. 3. Aningaaserivinnit, sparekarsinit, pigisanik aalaakkaasunik qularnaveeqqusiilluni taarsigassarsisitsisarfinnit akuerisaasunit imaluunniit Nunat Avannarliit Killiit Aningaasaateqarfiannit, taakkununngaluuniit arlalinnit taarsigassarsianut qularnaveeqqusiisoqarsinnaavoq.
Imm. 4. Amerlanerpaamik taarsigassarsiat 50%-ii qularnaveeqquserneqarsinnaapput. Niuernermi pissutsit tunngavigalugit taarsigassarsisoqassaaq.
Imm. 5. Landskarsip akiligassai tassaapput qaqugukkulluuniit akiitsut sinneri aningaasat taarsigassarsiaasut iluanni qularnaveeqqusikkatut amerlassusillit.§ 4. Inatsit manna naapertorlugu suliffeqarfinnut Aalisarnermut, piniarnermut nunalerinermullu tapersiisarneq pillugu Inatsisartut peqqussutaanni, imaluunniit Takornariartitsinermik inuussutissarsiuteqarnermut aningaasalersuinikkut tapersiisarneq pillugu Inatsisartut peqqussutaannit pineqartunut tapersiisoqarsinnaanngilaq.
§ 5. Taarsigassarsisut taarsigassarsiaat qularnaveeqquserneqartut, imaluunniit tunisassianik ineriartortitsinermut tapiiffigineqartut, inuit ataasiakkaajugunik ingerlatseqatigiiffiugunilluunniit, qularnaveeqqusiinerup imaluunniit tunisassiassamik ineriartortitsinermut tapiissuteqarnerup nalaani tamakkiisumik Kalaallit Nunaannut akileraartussaatitaassapput.
§ 6. Qinnuteqartoqarneratigut qularnaveeqqusiisoqartassaaq. Qinnuteqartup
1) ilimanarsisissavaa ingerlatsinermut aqutsinermullu piginnaasat pigineqareersut aamma
2) uppernarsassallugu aningaasalersuisarfinnit § 2, imm. 2-imi taaneqartunit taarsigassarsinissamik siumut neriorsorneqarsimalluni.
Suliffeqarfimmik aallartitsinermi qularnaveeqqusiineq.
§ 7. Nunami suliffeqarfimmik pilersitsinermi aningaasalersuisarfinnit § 2, imm. 3-imi taaneqartunit taarsigassarsinermut qularnaveeqqusiisoqarsinnaavoq.
Imm. 2. Qularnaveeqqusiisoqassappat piumasarineqarpoq suliniut suliamik ilisimasalimmit aningaasaqarnikkut naammassineqarsinnaasutut naliliiffigineqarsimanissaa.
Kinguaariinnut tullernut tunniussinermi qularnaveeqqusiineq.
§ 8. Nunami suliffeqarfimmik kinguaariinnut tullernut tunniussisoqarnerani aningaasalersuisarfinnit § 2, imm. 3-imi taaneqartunit taarsigassarsinermut qularnaveeqqusiisoqarsinnaavoq.
Imm. 2. Qularnaveeqqusiinermi piumasaqaatigineqarpoq
1) avataanit pissuteqartumik aningaasaliiffigineqarnissamik tassanngaannartumik pisariaqartitsoqalersimanissaa,
2) aningaasalersuinissamik tassanngaannartumik pisariaqartitsilernerup nalaani suliffeqarfiup kinguaariinnut tullernut tunniunneqarnerata aallartereerneqarsimanissaa aamma
3) kinguaariinnut tullernut tunniussinerup ingerlanissaa pillugu suliarilluakkamik pilersaarusiortoqarsimanissaa.
4) suliniut suliamik ilisimasalimmit aningaasaqarnikkut naammassineqarsinnaasutut naliliiffigineqarsimanissaa.
Qularnaveeqqutit akilerneqarneri
§ 9. Akilersuinermik uniuisoqarnerani qularnaveeqqusiussat aningaasalersuisarfiup piumasaqarneratigut akilerneqartassapput.
Imm. 2. Namminersornerullutik Oqartussat akilersuinermik uniuisoqarnerani taarsigassaqartup akiliisinniarneqarnerani akiitsut sinneruttut iluanni qularnaveeqqusiunneqartut akilissavaat.
Tunisassianik ineriartortitsinermut tapiissutit.
§ 10. Inatsit manna naapertorlugu tunisassianik sullissinernillu ineriartortitsinermut tapiisoqarsinnaavoq.
§ 11. Tunisassiornerup sullissinerulluuniit Kalaallit Nunaanni pinissaa piumasaqaatigineqarpoq. Tapiissutit ukiumoortumik tunniunneqartarsinnaapput. Tapiissutit tunniunneqareersut tapiiffigineqarnissamik qinnuteqarnissamut aporfiussanngillat.
Imm. 2. Tapiissutit qinnuteqartoqarnera malillugu suliniutilluunniit ataasiakkaat naliliiffigineqarnerat malillugu tunniunneqartassapput. Ukiuni aningaasanut inatsiseqarfinni tamani tapiissutit amerlanerpaaffissaat aningaasanut inatsimmi nalunaarneqarsimassapput.
Imm. 3. Tapiissutigineqartut tunniunneqartarnerat unitsinneqassaaq
1) suliniut naammassineqarsinnaanngitsutut nalilerneqarpat,
2) tapiiffigineqartoq paasissutissanik eqqunngitsumik paatsuunganartunilluunniit tunniussaqarpat imaluunniit
3) tapiiffigineqartoq paasissutissanik nipangiussaqarpat tapiissutinik tunniussinermut pingaaruteqartunik.
Aaqqissuussinerit allaffissornikkut aqunneqarneri.
§ 12. Naalakkersuisut aaqqissuussinerit inatsimmi uani taaneqartut allaffissornikkut aqunneqarnissaat pillugit ingerlatseqatigiiffimmut allaffissornikkut aqutsinermik suliaqartumut sullissinissamik isumaqatigiissuteqarsinnaapput.
Imm. 2. Sullissinissamik isumaqatigiissutit ukiut aningaasanut inatsiseqarfiusut ataasiakkaarlugit atuuttassapput ukiullu aningaasanut inatsiseqarfiusup naanerani ilisimatitseqqaarnani atorunnaartassallutik.
Imm. 3. Naalakkersuisut
1) inatsisip allaffissornikkut aqunnera nakkutigissavaat,
2) immikkut naatsorsuusiortoqarnissaa nakkutigissavaat aamma
3) ukiut tamaasa aningaasanut inatsimmut ilanngussassanik missingersuusiortoqartarnissaa isumagissallugu.
Imm. 4. Sullissinissamik isumaqatigiissut ingerlatseqatigiiffimmut allaffissornikkut aqutsinermik suliaqartumut isumaqatigiissutigineqarsimanngippat aaqqissuussinerit inatsimmi matumani pineqartut allaffissornikkut aqunneqarnerat naalakkersuisut isumagissavaat.
Suliat naammagittaalliuutillu suliarineqartarnerat pillugit malittarisassat.
§ 13. Pisortat ingerlatsineranni suliat suliarineqartarnerat pillugu Inatsisartut inatsisaat aamma atuutissaaq ingerlatseqatigiiffimmut allaffissornikkut aqutsinermik isumaginnittumut inatsit manna naapertorlugu ingerlatseqatigiiffiup suliassamik suliaqarnera aalajangiisarnerataluunniit annertussusaat naapertorlugit.
§ 14. Inatsit manna naapertorlugu aalajangikkat pillugit naammagittaalliutit suliarineqarnissaannut naammagittaalliuuteqartarfimmik Nunami inuussutissarsiutinut tapersiisarnermi Naammagittaalliuuteqartarfimmik taasamik pilersitsisoqassaaq.
Imm. 2. Naammagittaalliuuteqartarfik pingasunik Inatsisartut qinigaaffiannut atuuttussanik Naalakkersuisut toqqartagaannik ilaasortaqassaaq. Aamma Inatsisartut qinigaaffiannut ilaasortanut ataasiakkaanut sinniisussanik toqqaasoqassaaq. Naammagittaalliuteqartarfiup ilaasortai taakkununngaluunniit sinniisussat Naalakkersuisunut ilaasortaassanngillat, inatsisartunut ilaasortaassanatik, Namminersornerullutik Oqartussat ingerlatseqatigiiffiutaanni siulersuisunut ilaasortaassanatik imaluunniit SULISA A/S-ip siulersuisuinut toqqagaassanngillat.
Imm. 3. Naalakkersuisut inassuteqaateqartoqarneratigut Naammagittaalliuteqartarfiup suleriaasissaa akuersissutigissavaat aammalu Naammagittaalliuteqartarfiup allattoqarfeqarnikkut sullinneqarnera isumagissallugu.
Imm. 4. Aalajangikkat qinnuteqartumit Naammagittaalliuuteqartarfimmut tunniunneqarsinnaapput aalajangiinermik nalunaarutip tiguneqarneraniit sapaatit akunneri sisamat qaangiutsinnagit.
Imm. 5. Naammagittaalliuuteqartarfiup suliaq ingerlateqqitaq tamakkiisumik ilaannakortumilluuniit tunngavissaqarsoriguniuk suliassanngorteqqissinnaavaa, qinnuteqaatilli akuerineqarnissaanik Naammagittaalliuuteqartarfik aalajangiisinnaanngilaq.
Imm. 6. Suliaq ingerlateqqitaq Naammagittaalliuuteqartarfimmit suliassanngorteqqinneqartoq Naammagittaalliuuteqartarfiup suliamik isumaginnissimaneranik nalunaaruteqarnermiit sapaatit akunneri sisamat qaangiutsinnagit suliarineqassaaq. Suliaq Naammagittaalliuuteqartarfiup utertitsineratigut suliareqqinneqartoq Naammagittaalliuuteqartarfimmut ingerlateqqinneqarsinnaanngilaq.
Imm. 7. Naalakkersuisoqarfimmi inatsisip allaffissornikkut aqunneqarneranik suliaqartumi atorfillit naammagittaalliuteqartarfimmi ilaasortaasinnaanngillat sinniisussaasinnaanatilluuniit, kiisalu tassunga allattoqarfeqarnikkut sullissisuusinnaanatik.
Aalajangersakkat nalinginnaasut
§ 15. Naalakkersuisut § 8 malillugu tapiissuteqarnermut erseqqinnerusunik piumasaqaasiorsinnaapput.
§ 16. Inatsit januarip aallaqqaataa 1999 atuutilerpoq.
Namminersornerullutik Oqartussat, ulloq 30. oktober 1998
Jonathan Motzfeldt/
Pāviāraq Heilmann
Isumaliutissiissut (Aappassaaneerinninneq)