23. oktober 1998

UKA 1998/48

 

Nunami inuutissarsiutinut aningaasalersuinikkut tapersiisarneq

pillugu

Inatsisartut Niueqatigiinnermut ataatsimiititaanit

ISUMALIUTISSIISSUT

Siunnersuutip aappassaaneerlugu suliarineqarnissaanut tunniunneqartoq

Suliassamik suliarinninnermi Inatsisartut Niueqatigiinnermut ataatsimiititaanit peqataapput

inatsisartuni ilaasortaq Jakob Sivertsen (A), siulittaasoq
inatsisartuni ilaasortaq Karl Lyberth (S)
inatsisartuni ilaasortaq Ruth Heilmann (S)
inatsisartuni ilaasortaq Finn Karlsen (A)
inatsisartuni ilaasortaq Manasse Berthelsen (IA)

Inatsisartut Niueqatigiinnermut ataatsimiititaata nunami inuutissarsiutinut aningaasalersuinikkut tapersiisarneq pillugu Inatsisartut inatsisissaannut siunnersuut suliaraa.

Ataatsimiititap siunnersuut Naalakkersuisunit saqqummiunneqartoq isumaqatigaa, ilutigitilluguli tassunga tunngasunik ima oqaaseqaateqarumavoq.

§ 7, imm. 2 naapertorlugu piumasaqaatigineqarpoq qularnaveeqqusiinermi suliniut suliamik ilisimasalimmit aningaasaqarnikkut isumatuumik naammassineqarsinnaasutut naliliiffigineqarsimassasoq. Tassunga tunngatillugu ataatsimiititap oqaatigissavaa qularnaveeqqusiinermi pingaartinneqartariaqartoq suliniutip aningaasaqarnikkut sinneqartoorutaasinnaanerata ilimagineqarnissaa.

Qularnaveeqqusiussat qaqugukkut akilerneqartarnissaannut apeqqut ataatsimiititap tullertut naliliiffigaa, tak. siunnersuummi § 9. Naalakkersuisuni ilaasortamik isumasioqateqareernermi ataatsimiititap maluginiarpaa aalajangersakkamik taama ittumik ilanngussinermi eqqarsaatigineqartoq qulanaveeqqusiinermut atasumik taarsigassarsianik akilersuinermi uniuisoqarneratigut taarsigassarsisitsisup taarsigassarsisitsinerminik taamaatitsisinnaanera.

Tassunga atatillugu ataatsimiititaq isumaqarpoq suliniut pineqartoq ingerlaqqissinnaajunnaavissorinaraangat aatsaat qularnaveeqqusiissutip akilerneqartarnissaa sapinngisamik anguniarneqartariaqartoq. Naalakkersuisut kaammattorneqarput inatsisartut inatsisaannik aqutsinerminni tamatumunnga peqataassasut.

Naggasiullugu oqaatigineqassaaq ataatsimiititap siunnersuummik suliaqarnermini mississorsimagaa kommunit inuussutissarsiutinut tapersiissuteqarnissaminnut qanoq periarfissaqarnersut. Tassunga atatillugu ataatsimiititap maluginiaqquaa Kommunit inuussutissarsiutini aningaasaleeqataasinnaanissaat pillugu Inatsisartut inatsisaat naapertorlugu tamanna periarfissaqartinneqartoq.

Taama oqaaseqarluni Inatsisartut Niueqatigiinnermut ataatsimiititaata nunami inuussutissarsiutinut aningaasalersuinikkut tapersiisarneq pillugu Inatsisartut inatsisissaannut siunersuut Inatsisartunit aappassaaneerlugu suliarineqarnissaanut tunniuppaa.

 

	Jakob Sivertsen (Atassut)
Karl Lyberth (Siumut)		Ruth Heilmann (Siumut)
Finn Karlsen (Atassut)		Manasse Berthelsen (Inuit Ataqatigiit)