UKA 1998 / 48

 

Nunami inuussutissarsiutinut aningaasalersuinikkut tapersiisarneq pillugu Inatsisartut inatsisissaannut siunnersuummut nassuiaatit.

 

1. Nassuiaatit nalinginnaasut.

1998-imi Inatsisartut ukiakkut ataatsimiinneranni oqallinneq tunngavigalugu Inuussutissarsiornermut Naalakkersuisoq suleqatigiissitaliorpoq Namminersornerullutik Oqartussat allaffeqarfiannit, nunatsinni sulisitsisut peqatigiiffiinit, KANUKOKA-mit, SULISA-imit aamma Grønlandsbankimit aallartitanik inuttaqartumik, suleqatigiissitap ilaatigut nunami inuussutissarsiutinik taaneqartartut tapiiffigineqartarnerat pillugu aaqqissuussinerit misissussavai, ilaatigullu aaqqissuussinissat nutaat pillugit siunnersuuteqassalluni.

Suleqatigiissitap taaneqareersup nunami inuussutissarsiutit pillugit 1998-imi ukiakkut Inatsisartut ataatsimiinneranni isumaliutissiissummini siunnersuutai kaammattuutaalu tunngavigalugit inatsit suliarineqarpoq.

Suleqatigiissitap pingaartumik kaammattuutigai

• suliffeqarfiit aallartisartut niuernermi nalinginnaasumik atugassarititaasut atorlugit ajornannginnerusumik taarsigassarsiniartalerneranni qularnaveeqqusiisarnermik aaqqissuussisoqassasoq

• Namminersornerullutik Oqartussat pisussaaffii amerlanerpaamik taarsigassarsiat 50%-erissagaat

• kinguaariinnut tullernut tunniussinissaq ingerlanneqartillugu, avataanilli pissuteqartumik tunniussineq unitsinneqartillugu taarsigassarsinermi qularnaveeqqusiisoqarsinnaanissaannut aqqutissiuussisoqassasoq

• aallarnisaasut siunnersuisoqartarnissaannik aaqqissuussisoqassasoq

• tunisassiassanik ineriartortitsinermut tapersiisoqarnissaanik aaqqissuussisoqassasoq

• aaqqissuussinerit taaneqareersut allaffissornikkut ingerlanneqarnerat ingerlatseqatigiiffimmut allaffissornikkut aqutsinermik suliaqartumut tunniunneqassasut.

Inatsisissatut siunnersuut suleqatigiissitap kaammattuutaanik piviusunngortitsineruvoq.

Siunnersuutip saqqummiunneqarneranut atatillugu aningaasanut inatsimmi makku inatsisisissatut siunnersuutip kingunerisassaasa ilanngunneqarnissaat siunnersuutigineqarpoq.

Qularnaveeqqusiinermi annaasassat mianersortumik 50%-imut taggillugit, aningaasaliissutit 4.500.000 kr.-it aallarnisaasunut qularnaveeqqutit akilerneqarnissaannut qinnutigineqarput, 1.500.000 kr-illu kinguaariinnut tullernut tunniussinermut qularnaveeqqutitut.

Kiisalu tunisassianik ineriartortitsinermut 1999-imi 1.000.000 aningaasaliissutigineqartussatut qinnutigineqarput.

Aaqqissuussinerit ingerlanneqarnerannut 500.000 kr.-it aningaasartuutigineqartussatut naatsorsuutigineqarput, allaffissorneq suliallu ingerlateqqitat taakkunuuna matussuserneqassapput.

Siunnersuutigineqarpoq Naalakkersuisut Inatsisileriffiani inissinneqassasoq oqartussaqarfimmi inatsisip atuuffianut tunngatillugu isoriffissaqanngitsumi.

Naammagittaalliuutit suliarineqarnerini aningaasartuutit Inuussutissarsiutinik Ineriartortitsinermut Tapiisarffik pillugu Naammagittaalliuteqartarfiup allaffissornikkut ingerlanneqarneranut aningaasartuutaasartutut amerlatigissangatinneqarput.

Inuussutissarsiutinut Tapersiisarnermi Naammagittaalliuteqartarfiup Naalakkersuisut Inatsisileriffianni allaffeqarfeqalereersup naammagittaalliortarfittullu atuutereersup pilersinneqarnerani sulisunik aningaasanillu nuussisoqanngilaq, taamaammat naammagittaalliuteqartarfiup Naalakkersuisut Inatsisileriffiannut inissinniarneqarnera aningaasanik sulisunilluuniit nuutsiviusussatut naatsorsuutigineqanngilaq.

II. Aalajangersakkanut ataasiakkaanut nassuiaatit.

§ 2, imm. 1.

Kinguaariinnut tullernut tunniussineq nalinginnaasumik ingerlagaluartoq avataanit pissuteqartumik naammassineqarsinnaanngikkaanngat qularnaaveeqqusiinissamut periarfissaqartoqaqqullugu taama ittumik aaqqissuussisoqarpoq.

Kinguaariinnut tullernut tunniussinerit pitsaanerpaamik ingerlassagunik ukiut arlariit ingerlanerini pisarput, assersuutigalugulu tunniussineq suli naammasserianngitsoq taarserneqartussaq toqoriataassagaluarpat kingornussisuusinnaasut suliffeqarfimmit ima aningaasanik amerlatigisunik piumasaqarsinnaapput kinguaariinnut tullernut tunniussineq naammassineqarsinnaannani immaqalu suliffeqarfik unittoorluni.

Taama pisoqarsinnaanera eqqarsaatigalugu Namminersornerullutik Oqartussat inuussutissarsiutigalugu aningaasassarsiuisartut peqatigalugit kinguaariinnut tullernut tunniussinissap naammassineqarnissaannut ikiuunnissaminnut periarfissaqassapput. Suliamik ilisimasaqartut naliliinerisigut kinguaariinnut tullernut tunniussineq aningaasaqarnermit isigalugu naammassineqarsinnaasutut isigineqartariaqarpoq.

§ 2, imm. 2

Landskarsip akiitsutigut pisussaaffii naammaginartumik nakkutigisinnaajumallugit ukiut tamaasa qularnaveeqqutsiunneqartussat amerlanerpaaffilerneqassapput. Qularnaveeqqutit akilerneqarneranni aatsaat landskarsi nammakkerneqartartussaagaluartoq inatsimmi siunertarineqartumut ukiumoortumik aningaasaliissutinut oqaasertatut qularnaveeqqutit amerlanerpaaffissaat aningaasanut inatsimmut ilanngunneqartassapput.

§ 2, imm. 3.

Suliffeqarfimmik nutaamik aallartitsisoqarnerani kinguaariinnullu tullernut tunniussisoqarnerani taarsigassarsiat 50%-ii tikillugit qularnaveequsiisoqarsinnaavoq, aningaaserivimmit, sparekarsimit, taarsigassarsisitsisarfimmit akuerisamit imaluuniit Nunat Avannarliit Killliit Aningaasaateqarfiannit niuernermik tunngaveqarluni taarsigassarsisoqassaaq. Aningaasalersuisarfiit taagorneqartut allanik ilaneqarsinnaanngillat.

Aningaasalersuisarfiit taaneqartut Kalaallit Nunaanni suliaminnik ingerlatsisuupput. NORA (Nunat Avannarliit Atlantikumut Sineriallit Suleqatigiiffiat), SULISA, kiisalu kommunini inuussutissarsiornermut tapersiisarnermik suliassaqartitsiniarnermullu aaqqissuussinerit aqqutigalugit aningaasalersuinerit ilanngunneqanngillat aaqqissuussinikkummi siunertarineqarmat niuernikkut atugassarititaasut tunngavigalugit taarsigassarsianut qularnaveeqqusiisoqassasoq. Taama aaqqissuussinissaq toqqarneqarpoq Kalaallit Nunaanni aningaasalersuisarnermi unammilleqatigiinnikkut equtitsisoqarnissaa killilersimaarniarlugu.

Qularnaveeqqutit amerlanerpaamik taarsigassarsiat 50%-erissavaat. Taamaattoqarneratigut pisortat aningaasaliisarfiillu namminersortut annaasaqariataarnissaminnik ataatsimut akisussaaffeqassapput, aningaasaliisussallu avataaneersut annaasassamik minnerpaaffianiitsinnissaannut kajumissuseqassapput - taamalu aamma pisortat annaasassaat minnerpaaffiiniitinneqassallutik.

Pisortat annaasinnaasaasa amerlanerpaaffilernerisigut inuussutissarsiutigalugu avataanit ani- ngaasaliisussat aatsaat aningaasaliisinnaapput suliamik ilisimasaqarnertik naapertorlugu isumaqarunik tamanna silatuuliornerusoq.

§ 3

Tunisassianut tapiinermut tunngatillugu malugeqquneqassaaq tunisassiaq nunami inuussutissarsiornerinnarmut atugassatut killilerneqanngimmat. Assersuutigalugu aalisarnermut atortunik assigisaanillu ineriartortitsinermut aaqqissuussineq malillugu tapiisoqarsinnaavoq.

§ 4

Aalisarnermut, piniarnermut, nunalerinermut takornariaqarnermullu tunngasut ilanngunneqan-ngillat tamakkunani suliffeqarfiit tapersersorneqarnissaannut immikkut periarfissaqareermat.

§ 6

Aningaasalersuisarfinnit neriorsorneqarsimanermut tunngatillugu allanngortinneqarsinnaanngitsumik piumasaqaatigineqarpoq qularnaveeqqusiinnginnermi aningaasalersuisarfimmit aningaasalersorneqarnissaanik neriorsuisoqarsimassasoq.

§ 9, imm. 2

Avataaniit aningaasalersuisartut akiitsulimmut piumasaqaataat Namminersornerullutik Oqartussat akilissavaat akiligassamik amerlassusaat naapertorlugit.

§ 10

Tunisassianik ineriartortitsineq matumani assigiinngitsut arlalinngorlugu paasineqassaaq, tassami tamatumani pineqarput isumassarsianik ineriartortitsineq ineriartortitseqqinnerlu, tunisassiamik sananeq misileraanerlu, nioqqutissianik sullissinernillu pioreersunik ineriartortitseqqinneq il.il..

§ 12, imm. 2

Sullissinissamik isumaqatigiissutit atuuffissaat aningaasanut inatsimmi aningaasaliissutigineqartartunut piffissaritaasut malippaat ukiullu aningaasanut inatsiseqarfiusup naanerani atorunnaartarlutik. Tamatuma kingunerisaanik ukiut tamaasa sullissinissamik isumaqatigiissutit isumaqatigiinniutigineqartassapput atsiorneqarlutillu.

Ukiumi aningaasanut inatsiseqarfiusumi tulliuttumi inatsit manna naapertorlugu aaqqissuussinerit allaffissornikkut aqunneqarnerisa ingerlatseqatigiiffimmik allaffissornikkut aqutsinermik suliaqartumit isumagineqarnerannut aningaasartuutit ima siusitsigisumik isumaqatigiissutigineqartariaqarput - Naalakkersuisoqarfiit Aningaasanut Inatsimmut ilanngussassaannut killiliussat naapertorlugit - ukiumi tulliuttumi aningaasanut inatsimmut ilanngunneqarsinnaanngorlutik.

§ 13, imm. 6

Suliaq ataasiaannarluni naammagittaalliutigineqarsinnaavoq.