Nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisaat nr. 16, 30. oktober 1998-imeersoq.
§ 1
Nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi, kingullermik Inatsisartut inatsisaatigut nr. 8, 21. oktober 1998-imeersukkut allanngortinneqartumi makku allannguutigitinneqarput:
1. § 3-p kingorna ilanngunneqassaaq:
"§ 3a. Nersussuit aamma puulukit nujuitsut neqaat ilivitsut aamma affat nioqqutissat allattorsimaffianni 0201.10.00-imi, 0202.10.00-imi, 0203.11.10-mi aamma 0203.21.10-mi allassimasut, suliffeqarfinnit neqinik agguinissamut akuerisaasunik atortorissaarutilinnit, neqit aggoreerpata tuniniaqqinnissaat siunertaralugu eqqussorneqartut akitsuuserneqartussaanngillat.
Imm. 2. Imm. 1 naapertorlugu aammattaaq akitsuusiiffigineqassanngillat ingerlatsiviit neqinik agguinissamut akuerisaasunik atortorissaarutillit, neqillu aggorneqartut ingerlatsivimmit taamaallaat atugassaappata.
Imm. 3. Imm. 1 aamma 2 naapertorlugit neqinik agguinissamut atortorissaarutit, inuussutissalerinermut inatsisit atuuttut naapertorlugit Avatangiisinut Pinngortitamullu Pisortaqarfimmit akuerineqartussaapput."
§ 2
Inatsisartut inatsisaat ulloq 1. januar 1999 atortuulissaaq.
Namminersornerullutik Oqartussat, ulloq 30. oktober 1998.
Jonathan Motzfeldt/
Daniel Skifte
Isumaliutissiissut (Aappassaaneerinninneq)