24. august 1998 UKA 1998/22
Oqaaseqaatit nalinginnaasut
Siunnersuutikkut anguniarneqarpoq nersutit neqaasa ilivitsut affallu, suliffeqarfinnit ingerlatsivinnillu neqinik agguinissamut akuerisaasunik atortorissaarutilinnit eqqussorneqartut eqqussuinermi akitsuummik akitsuuteqartinneqannginnissaat, taamaaliornikkut suliffissanik pilersitsinissaq anguniarlugu.
Siunnersuutip kingunerisaanik naatsorsuutigineqarpoq nioqqutissanik eqqussuinermi akitsuutitigut landskarsi isertitassaraluarmigut annikitsunik annaasaqassasoq, taasa ukiumut 500.000 koruunit missinginik, kiisalu aningaasarsianit akileraarutitigut isertitassat annikitsumik annertuseriassangatinneqarlutik. Isertitassatigut annaaneqartussat amerleriaatissallu annikingaarmata, nioqqutissanik eqqussuinermi akitsuutinut aammalu aningaasarsianit akileraarutinut missingersuutaareersunut ilaareersutut isigisariaqarput.
Naatsorsuutigineqanngilaq siunnersuutip allaffissornermut sunniuteqangaarnissaa.
Aalajangersakkanut ataasiakkaanut oqaaseqaatit
§ 1-imutSiunnersuutigineqarpoq suliffeqarfiit neqinik agguinissamut akuerisaasunik atortorissaarutillit nersussuit aammalu puulukit nujuitsut neqaannik ilivitsunik affanillu akitsuuteqanngitsumik eqqussuisinnaanissaat, tassani piumasaqaataalluni suliffeqarfiup neqit aggoreerpata tuniniaqqitassarissagai. Nersutit neqaat aggoriikkat tassaapput neqit nersutip kuartianit mikinerusut.
Aammattaaq siunnersuutaavoq ingerlatsiviit neqinik agguinissamut akuerisaasunik atortorissaarutillit taamatuttaaq akitsuusiiffigineqannginnissaat, tassani piumasaqaataalluni neqit taamaallaat ingerlatsivimmit namminermit atorneqarnissaat.
Naggasiullugu siunnersuutaavoq suliffeqarfiup atortorissaarutaasa neqinik agguinissamut naleqquttuunerisa Avatangiisinut Pinngortitamullu Pisortaqarfimmit, inuussutissalerinermut inatsisit atuuttut naapertorlugit akuerisaanissaat pisassasoq.
§ 2-mutSiunnersuutigineqarpoq Inatsisartut inatsisaata ulloq 1. januar 1999-imi atortuulernissaa.