9. oktober 1998

UKA 1998/22

 

Nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik

Inatsisartut inatsisassaattut siunnersuut

pillugu

Inatsisartut Akileraartarnermut ataatsimiititaanit

ISUMALIUTISSIISSUT

Siunnersuutip aappassaaneerlugu suliarineqarnissaanut tunniunneqartoq

Suliassamik suliarinninnermi Inatsisartut Akileraartarnermut ataatsimiititaanit peqataapput

inatsisartuni ilaasortaq Karl Lyberth (S), siulittaasoq
inatsisartuni ilaasortaq Laannguaq Lynge (S)
inatsisartuni ilaasortaq Siverth K. Heilmann (A)
inatsisartuni ilaasortaq Otto Storch (A), Knud Sørensenimut sinniisussatut
inatsisartuni ilaasortaq Manasse Berthelsen (IA)

Inatsisartut Akileraartarnermut ataatsimiititaat 25. september aamma 7. oktober 1998 ataatsimiimmat Nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisassaattut siunnersuut suliarineqarpoq. Suliarinninnerminut atugassatut paasissutissanik Aningaasaqarnermut Ineqarnermullu Naalakkersuisumit paasissutissanik ataatsimiititaq pissarsiniarsimavoq.

Aallaqqaasiutitut Akileraartarnermut ataatsimiititamit oqaatigineqassaaq ataatsimiititamit pingaartinneqartoq nioqqutissanik eqqussuinermi akitsuusiineq imatut pissasoq nunatsinni namminermi tunisassiarineqarsinnaasut sapinngisamik annertunerpaatinniarneqassallutik, taamaaliornikkut suliffissaqartitsineq nunattalu avammut nioqquteqarnera iluaqusiivigineqarsinnaaqqullugit.

Taamaammat nersutit ilivitsut affallu neqaasa, sullivinnit sullissivinnillu, neqit aggorneqarnissaannut atortunik akuerisaasunik peqartunit, eqqussorneqartut akitsuussivigineqartarnerisa peerneqarnissaa Akileraartarnermut ataatsimiititamit tamakkiisumik isumaqatigineqarpoq.

Nersutit ilivitsut affallu akitsuuserneqartarnerisa peerniarneqarnerata siunertaraa Kalaallit Nunaanni suliffissaqartitsiniarnerup siuarsaavigineqarnissaa, taamaaliornikkut neqinik Kalaallit Nunaanni agguisarnermik suliaqarneq kajungernarnerulersinniarlugu.

Taamaammat Akileraartarnermut ataatsimiititamit siunnersuutip suliffissaqartitsiniarnermut sunniutigisinnaasai misissuiffigineqarput, siunnersuummut tusarniaanermi akissutitut tiguneqartut naliliivigineqarnerisigut.

Tusarniaanermi akissutigineqartut tunuliaqutaralugit siunnersuutip suliffissaqartitsiniarnikkut sunniutissaviisa eqqoqqissaartumik isummerfiginissaat ajornakusoortuuvoq. Ataatsimulli isigalugu naliliisoqarpoq nersutit ilivitsut affallu neqaat eqqarsaatigalugit eqqussuineq annertusissasoq, tamatumalu malittaanik suliffissaqartitsineq annertusissasoq.

Akileraartarnermut ataatsimiititamittaaq misissuiffigineqarpoq suliffeqarfiit qassit, neqinik agguinissamut atortussaateqareersut, taamaaliornissamut akuerineqarsinnaanersut, aamma neqaarniat ilinniartitaanerannut ilinniarteqqinneqartarnerannullu periarfissat pillugit.

Naalakkersuisunut ilaasortamit ilisimatitsissutigineqarpoq, ilisimatinneqarsimalluni Kalaallit Nunaanni sulliviit 20 missaannik amerlassusillit nersutit ilivitsut affallu neqaannik agguisarnermik naammassinnissinnaassasut. Matumani pineqarput neqaarniarfiit, pisiniarfiit angisuut neqaarniarfittallit sullissiviillu.

Ilinniartitaanermut ilinniarteqqiisarnermullu periarfissat pillugit Naalakkersuisunut ilaasortaq ilisimatitsivoq neqinik agguisarneq INUILI-p inuussutissalerinermut ikiortinik ukiunik marlunnik sivisussusilimmik tunngaviusumik ilinniartitsisarneranut ilaasoq. Ukiuni marlunni tunngaviusumik ilinniartitaanermut nangissutitut neqaarniatut ilinniarneq Danmarkimi pisarpoq. Naalakkersuisunut ilaasortaq ilisimatinneqarsimavoq INUILI maannakkorpiaq allanngortiteriffigineqarlunilu annertusaavigineqartoq, neqaarniarfittullu inimik nutaamik 1999-imi aasaanerani atuilerumaartoq. Taamaalilluni ilinniarfik initigut sulisoqarnikkullu periarfissaqalersussaavoq ilinniartitaanermik ilinniarteqqiisarnermillu, nersutit neqaasa nunatsinnut eqqussorneqartut annertusineqarsinnaanerannut atasumik pisariaqarneratut ingerlatsinissamut, tamannalu siunniulluinnarneqartoq. Piffissami INUILI-p atuuffigisimasaani, tassalu 1990-ikkunni, neqaarniatut ilinniartut marluk ilinniagaqarnerminnik naammassinnissimapput, sulilu tallimat ilinniagaqarnermik ingerlataqarlutik.

Akileraartarnermut ataatsimiititamit naatsorsuutigineqarpoq nersutit nassullit neqaat ilivitsut affallu, aamma puulukit nujuitsut neqaat eqqussorneqartut, eqqussuinermut akitsuut atorunnaarsinneqarpat, amerlissasut. Tamatuma peqatigisaanik Akileraartarnermut ataatsimiititamit naatsorsuutigineqarpoq neqit naammassillugit suliarineqarsimasut, taakkununnga ilanngullugit neqit aggukkat, eqqussorneqarnerat annikillissasoq.

Akileraartarnermut ataatsimiititaq isumaqarpoq tamanna nunatta niuerneragut pitsaasumik sunniuteqassasoq, tunisassiammi naammassillugit suliarineqarsimasut kilomut akiat nersutit ilivitsut affallu neqaannit kilomut akiusumit anginerummata.

Akileraartarnermut ataatsimiititaq isumaqatigiittoq matumuuna Inatsisartunut inassuteqarpoq nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut akuereqqullugu.

 

	Karl Lyberth ataatsimiititami siulittaasoq
Laannguaq Lynge (S)		Siverth K. Heilmann (A)
Otto Storch (A)		Manasse Berthelsen (IA)