Kalaallit Nunaata nunap immikkoortuinut kommuneqarfinnullu aggorneqarnera
pillugu inatsisartut inatsisissaannut nr. 11, 30. oktober 1998-imeersussamut siunnersuut
Nunap immikkoortui
§ 1. Kalaallit Nunaat nunap immikkoortuinut Kitaanut, Avannaarsuanut Tunumullu aggorneqarpoq, taakkulu killingi ima aalajangersarneqarput:
1) Kitaa. Kujammut kimmullu killigai Atlantikoq, Ikersuaq Davis Avannaatalu Imaa. Avannamut killigaa titarneq allorniusat sanimukartut avannamut 78°-iata allorniusat ammukartut kimmut 44°-iata naapiffiannit allorniusat sanimukartut 75°-iata Kalaallit Nunaata kimmut sineriaanut attuunneranut, tassanngaanniillu titarneq narlusuumik nangiinnarlugu immap killilernerani titarnermut aallaaviusumut (basisliniamut). Kangimut killigaa allorniusat ammukartut 44°-iata 78°-mik naapiffianniit kujammorluinnaq allorniusat sanimukartut avannamut 61°-iata kujammullu 60°40´-p allorniusat ammukartut 44°20´-ata naapiffiannut, tassangaanniillu Kangerlussuatsiap qeqqa atuarlugu Atlantikumut.
2) Avannaarsua. Kimmut avannamullu killigai Avannaata Imaa, Puikkaasorsuaq, Kane Basin, Kennedy Kanal, Hall Basin, Robeson Kanal aamma Sikuiuitsoq Avannarleq. Kujammut killigai Kitaanut Tunumullu killeqarfigitinneqartut.
3) Tunu. Kangimut killigaa Atlantikoq. Avannamut Nordostrundingimiit titarneq Romersø-enip avannaani kuuit tunussutigiillutik kuuttut aariaannut Kronprins Christian Land aqqusaarlugu sermersuup sinaanut, tassanngaanniillu narlusuumik ingerlaqqilluni allorniusat sanimukartut 78°-iat allorniusallu ammukartut kimmut 44°-iata naapiffiannut. Kimmut kujammullu killigaa Kitaata kangimut killiga.
Imm. 2. Killeqarfiliineq pillugu nunap assinga ilanngunneqartoq allatigut innersuussutigineqarpoq.
Kommuneqarfiit
§ 2. Kalaallit Nunaat kommuneqarfinnut ukununnga aggorneqarpoq:
1) Nanortalik. Tassunga atavoq nuna Nunap Isuata avannaatungaaniittoq, avannamut-kimmut imaatigut qeqertap Tukingasup kangiatigut, qeqertat Uummannartuut Avannarliit kitaatigut, qeqertat Qussassat aamma Qeqertarsuaq akunneqqullugit Qaarsup Kangia aqqusaarlugu qeqertat Sannerut aamma Manertuut kujataatigut kangeqqullugit kangerluup Torsukattaap qinnguanut killeqarluni. Tassanngaanniit killeqarfigai qaqqatigut Quassugaarsukkut aamma Ukkusikkut ermit tunussutigiillutik kuuttut avissaarutaat atuarlugu Qorlortorsuup Tasiata Avannarlequtaa kiisalu Vig sø atuarlugit, taavalu nunakkut avannamut kangimut sermersuarmut, tassanngaanniillu kangimorluinnaq Tunup Kitaatalu killeqarfiat. Aamma killigaa Tunup Kitaatalu killeqarfiat.
2) Qaqortoq. Kommuneqarfik marlunnik immikkoortoqarpoq.
a) Immikkoortoq kangilleq: Kujammut killigaa Nanortaliup avannamut killeqarfia. Avannamut killingata atuarpaa immamiit avannamut-kangimut qeqertat Serfartusut Uiguleriillu akunneqqullugit Narlunaq atuarlugu sangullunilu kangimut Akornga ikaarlugu Illorsuit Qaqqaasa itissaavinut. Tassangaanniit killeqarfigai Tartup Qaqqaatigut paarlaguttumik kuulernikut, Iviangiusaq Kangilleq Killavaallu qallunaatsiaqarfikumut Sissarluttumut, tassangaanniillu kangerluk ikaarlugu narluinnartumik Russip Kuuanut Saqqaata Tasiata Skyggesøllu akornanniittumut, avannamut-kangimut Jespersens Dal, Jespersens Bræ sermersuarlu atuarlugit, tassanngaanniit kangimorluinnaq Tunup Kitaatalu killeqarfiat. Kommuneqarfiup kangimut killigaa Tunup Kitaatalu killeqarfiat.
b) Immikkoortoq killeq: Tamatumani pineqarpoq Qassimiut eqqaat, tassa Narsap kommuneqarfiata avannamut-kimmut killinganiit kujammut Qalerallit Sermiat aqqusaarlugu Qalerallit Imaannut Nuuata Nunaa ikerasaqqullugu kujammut-kimmut Ikersuaq atuarlugu avammut imaanut. Avannamut killigaa Narsap kommuneqarfiata avanna-mut-kimmut isua, kimmut aamma kujammut-kimmut Qipisaqqup Sermia avannarleq aqqusaarlugu kangerlummut, qeqertaq Sannerut kangeqqullugu kujaqqullugulu avammut imaanut.
3) Narsaq: Kujammut kimmullu killingisa Qaqortup kommuneqarfiata killingi atuarpaat. Avannamut killingata sermersuup killinga atuarpaa, tassanngaanniillu kangimut Tunup Kitaatalu killeqarfiannut. Kangimut kommuneqarfik killeqarpoq Tunup Kitaatalu killeqarfiannut.
4) Ivittuut. Kommuneqarfimmut atasut killigaat Arsuup Kangerluagut Arsuk Bræmut, tassanngaanniit Nordre Qoornoq Bræ Qoornullu Kangerlua atuarlugit, Nuuk Kangaarsullu kujaqqullugit, qeqertat Quiartorfik Kiinalillu kitaallugit Ikerasaarsuup Kujataanut Arsuullu Kangerluanut.
5) Paamiut. Kujammut Qaqortup Narsallu kommuneqarfiinut killeqarpoq. Avannamut killingata atuarpaa immamiit Tulugartalik Siorarlu napillugit. Tassanngaanniillu kangimut Tunup Kitaatalu killeqarfiannut. Allatigut kommuneqarfik Ivittuut kommuneqarfiannut killeqarpoq.
6) Nuuk. Kujammut Paamiut kommuneqarfiannut killeqarpoq. Avannamut killeqarfigaa immamiit Upernivik avannaqqullugu, kangimut avannamut-kangimullu Oqummiap Tasersuatigut Naqinnersuakkullu qaqqaq Quassuk atuarlugu Quassuttarsuarmut, tassangaanniillu kangimut avannamut-kangimullu Tasersuakkut Saqqap Sermersuatigut kangimullu Tunup Kitaatalu killeqarfiannut. Kangimut kommuneqarfiup Tunup Kitaatalu killeqarfiat killigaa.
7) Maniitsoq. Kujammut Nuup kommuneqarfianut killeqarpoq. Avannamut killigaa immamiit kangerluk Kangerluarsussuaq qiteraarlugu taassumalu qinnguaniit Naqerloq Kangilleq atuarlugu Kangerlussuarmut taassumalu qinnguanut, tassangaanniit kuukkut Akuliarusiarsuup Kuua atuarlugu sermersuarmut, tassanngaanniillu kangimut Tunup Kitaatalu killeqarfiannut. Kangimut kommuneqarfiup Tunup Kitaatalu killeqarfiat killigaa, taamaattoq tak. § 4.
8) Sisimiut. Kujammut Maniitsup kommuneqarfianut killeqarpoq. Avannamut killigaa immamiit Nassuttooq atuarlugu Kuup Akuanut Kuullu atuarlugu Inuppaat Kuuannut, tassangaanniillu kangimut Tunup Kitaatalu killeqarfiannut. Kangimut kommuneqarfiup killigaa Tunup Kitaatalu killeqarfiat, taamaattoq tak. § 4.
9) Kangaatsiaq. Kujammut Sisimiut kommuneqarfiannut killeqarpoq. Avannamut killigaa immamiit qeqertat Innalinnguaq, Qaassuk Tulukkallu avannaqqullugit, qeqertat Saattorsuaq Aamallu akunneqqullugit Saqqarliup qeqertai kujaqqullugit Itinneqqap tungaanut, tassangaanniit kujammut, qeqertaq Umiivik kujaqqullugu Naanngisanut, tassangaanniit qeqertaq Naajat avannamut-kangeqqullugu tassuunalu Itinneralinnguamut. Tassangaanniit Killernganut Tasiusarsuakkut Tasiusarsuullu Qinnguatigut Ilulialimmi Qinngorsuata avataanut tassanngaanniit kangimorluinnaq Tunup Kitaatalu killeqarfiannut. Kangimut kommuneqarfik killeqarpoq Tunup Kitaatalu killeqarfiannut.
10) Aasiaat. Kujammut Kangaatsiap kommuneqarfiannut killeqarpoq. Kommuneqarfimmut tassunga atapput qeqertat Qeqertarsuup Tunuata kujammut sineriaaniittut Kitsissuarsuillu. Kangimut killeqarfeqarpoq Kannala kangeqqullugu Nivaap Sulluatigut qeqertarlu Ujarattarfik kangeqqullugu. Kommuneqarfimmut tassunga atapputtaaq qeqertat Kitsissunnguit qeqertaq Agissat ilanngunnagu.
11) Qasigiannguit. Kimmut kujammullu Aasiaat Kangaatsiallu kommuneqarfiinut killeqarpoq. Kommuneqarfimmut tassunga atavortaaq qeqertaq Agissat Kitsissunnguaniittoq. Kommuneqarfik avannamut killeqarfeqarpoq Kitsissunnguit avannaanniit Tasiusarsuit Kujalliit toraarpiarlugit. Tassanngaanniit kuuk atuarlugu Naajannguit kujaqqullugit Eqaluit Kangerluata qinnguanut, tassanngaanniit Qangattalik toraarpiarlugu kujammut-kangimut Saqqarleq qiteraarlugu Saqqarliup Sermia atuarlugu tassanngaanniillu kangimorluinnaq Tunup Kitaatalu killeqarfiannut. Kangimut kommuneqarfik killeqarpoq Tunup Kitaatalu killeqarfiannut.
12) Ilulissat. Kujammut Qasigiannguit kommuneqarfiannut killeqarpoq. Avannamut killeqarfiata atuarpaa Tunup Kitaatalu killeqarfianniit kimmut Sermeq Avannarlermut, tassangaanniit Isup Qaqqaatigut Akuliarutsillu Qaqqaatigut ermit tunussutigiillutik kuuttut avissaarutaat atuarlugu Isortumut. Tatsip taassuma avannamut sinaata qeqqaniit ermit tunussutigiillutik kuuttut avissaarutaat atuarlugu avannamut, Majoriarsuatsiaap Qaqqaa aqqusaarlugu Uigorlermut, tassanngaanniit taseq taanna Tasinngortarlu qeqqatigoorlugit, Uigorliup Kuua tatsimit tassangaaneersoq atuarlugu Saqqap Tasersuanut, taavalu taseq taanna, Kuussuaq, Tasinngortarsua Aaffarsuarlu atuarlugit Niortut avannarpiaanni inissisimaffimmut aalajangersimasut. Tassangaanniit kujammorluinnaq Niortukkoorluni Sullorsuarmut. Kimmut avannamut-kimmullu kommuneqarfik Qeqertarsuup Tunuanut Sullorsuarmullu killeqarpoq, kangimullu killeqarluni Tunup Kitaatalu killeqarfiannut.
13) Qeqertarsuaq. Kommuneqarfimmut tassunga atapput Qeqertarsuaq aamma qeqertat Imerissut.
14) Uummannaq. Kujammut killigaa Ilulissat Qeqertarsuullu kommuneqarfiisa avannamut killingat. Avannamut killeqarfeqarpoq Sigguup timaatigut kujataa-kitaanit Qinnivikkut Aputituut Qaqqaatigut ermit tunussutigiillutik kuuttut avissaarutaat atuarlugu, Taseraarsuartigut, Siuteqqutigut qutsissutsip 1661-ip (72°01´4´´N., 50°02´2´´V.), tassanngaanniillu kangimut qutsissuseq 1720-p (72°01´2´´N., 53°36´5´´V.) Naajat Inaata avannaa-kitaaniittup tungaanut. Tassangaanniit Ukkusissat Kangerluat narluinnartumik ikaarlugu Qoororsuaq atuarlugu sermersuarmut tassanngaanniillu kangimut Tunup Kitaatalu killeqarfiannut. Kangimut kommuneqarfik killeqarpoq Tunup Kitaatalu killeqarfiannut.
15) Upernavik. Kujammut kommuneqarfik killeqarpoq Uummannap kommuneqarfianut. Avannamut kangimullu killingisa nunap immikkoortuata killingi killigaat.
16) Qaanaaq. Kujammut killigaa Upernaviup kommuneqarfiata avannamut killeqarfia. Avannamut kimmullu kommuneqarfik killeqarpoq Avannaata Imaanut, Kane Basinimut Kennedy Kanalimullu, taamaattoq tak. § 3. Kommuneqarfik kangimut killeqarpoq allorniusat sanimukartut avannamut 78°-iata ammukartullu kimmut 44°-iata naapiffianniit narluinnartumik sermersuakkut Petermanns Gletscherimut, taamaattoq tak. § 4.
17) Ammassalik. Avannamut killigaa allorniusap ammukartup kimmut 44 -iata allorniusallu sanimukartup 69 -iata naapiffiat, allorniusap ammukartup 33 -iata allorniusallu sanimukartup 69 -iata naapiffianniit Nordfjords Gletcherikkut Kangerlussuup qinnguanut tassanngaanniillu kangerluk taanna qiteraarlugu Watkins Fjordip qiteraarnissaata tungaanut Watkins Fjordillu J.C. Jakobsens Fjordimut aqqutaa atuarlugu. Matuma kingornagut killiga J.C. Jakobsens Fjord qiteraarlugu Danmarks Strædetimut atuassavaa. Allatigut kommuneqarfiup Tunup Kitaatalu killeqarfiat killigaa.
18) Illoqqortoormiut. Kujammut killigaa Ammassaliup kommuneqarfiata avannamut killiga. Kommuneqarfik avannamut killeqarpoq Kap Biotimiit (Fleming Fjordip avannaatungaaniittoq nuuk allorniusat sanimukartut avannamut 72°-ianiit 10 km. miss. kujasinnerusoq) kimmut qaqqap qaava atuarlugu, tassanngaanniillu Staunings Alperit kangiatungaat atuarlugu tatsit Holger Danskes Briller avannamut sinaat tikillugit atuarlugillu, kimmut Stormpyntimut Nordvestfjordip avannamut sineriaani, Nordvestfjordip avannamut sineriaa atuarlugu qeqertaq Mågetuen tikillugu, kangerluk ikaarlugu Tuttut Nunaat napillugu Rypefjordip avannaani sermimut, tassanngaanniillu Nunatat kujaqqullugit Tunup Kitaatalu killi-ngannut allorniusat sanimukartut avannamut 71°-iannut. Kimmut kommuneqarfiup killigaa Tunup Kitaatalu killingat.§ 3. Kommuneqarfiit avammut killeqarput immap killilernerani titarnernut aallaaviusunut. Taamaattoq kommunalbestyrelsip Naalakkersuisut akuersinerisigut immap killilernerani titarnerit aallaaviusut avataannut atuuttunik najukkami ileqqoreqqusaliorsinnaapput.
Aalajangersakkat immikkut ittut
§ 4. Kommuneqarfinnut aggornilersuinermut atatinneqanngillat Kalaallit Nunaata illersorneqarnissaa pillugu isumaqatigiissut aprilip 27-iani 1951-imeersoq naapertorlugu danskit-amerikamiut sakkutooqarfii pilersinneqarsimasut.
§ 5. Kangerlussuup eqqaa oktobarip aallaqqaataa 1992 tikillugu Kalaallit Nunaata illersorneqarnissaa pillugu isumaqatigiissummi aprilip 27-iani 1951-imeersumi ilaatinneqartoq suli kommuneqarfinnut aggornilersuinerup avataaniitinneqassaaq.
§ 6. Suliassani ataasiakkaani killeqarfilersuinermut naalakkersuisut erseqqinnerusunik najoqqutassaliorsinnaapput.
§ 7. Kommuneqarfiup aqqa allanngortinneqarsinnaavoq taamaallaat Nunat Aqqinik Aalaja-ngiisartut inassuteqareernerisigut Naalakkersuisullu siumoortumik akuersinerisigut.
Atulersitaanera
§ 8. Inatsisartut inatsisaat atulerpoq januaarip aallaqqaataani 1999. Tamatumunnga peqatigitillugu Kalaallit Nunaata nunap immikkoortuinut kommuninullu aggorneqarnera pillugu inatsisartut inatsisaat nr. 5, 6. november 1997-imeersoq atorunnaarsinneqarpoq.
Namminersornerullutik Oqartussat, ulloq 30. oktober 1998.
Jonathan Motzfeldt/
Kaj Kleist
Isumaliutissiissut (Aappassaaneerinninneq)