6. august 1998

UKA 1998/8

 

Inatsisissatut siunnersuummut oqaaseqaatit

 

Oqaaseqaatit naliginnaasut

Kalaallit Nunaata nunap immikkoortuinut kommuninullu aggorneqarnera pillugu Inatsisartut inatsisaata nr. 5-ip, 6. november 1997-imeersup, Inatsisartullu inatsisaannut nr. 5-imut, 8. juni 1985-imeersumut, 1997-imi kommunip aqqanik allaffeqarfikkoortumiik allanngortitsisinnaalerneq eqqaassanngikkaanni, annertuutigut naapertuuttup, sukumiisumik suliareqqissaarneqarnissaa arlalinnit kissaatigineqarsimavoq.

Matumani inatsisissamut siunnersuummut atatillugu kommunit tamarmik, KANUKOKA aammalu Nunat Aqqinik Aalajangiisartut tusarniaavigineqarsimapput.

Siunnersuut nunat aqqisa iluarsaanneqarnerannik, Nunat Aqqinik Aalajangiisartunit annerusumik isumagineqartumik, annerusumik imaqarpoq. Aalajangiisartut inatsisip kalaallisoortaa annermik sammisimavaat, ilutigaluguli danskisoortaani arlalinnik iluarsisaqarsimallutik. Inatsisissatut siunnersuutip aalajangersagartaanut ataasiakkaanut oqaaseqaatit eqqarsaatigalugit kalaallisoortaata danskisoortaatalu immikkoortinnissaat pisariaqarsimavoq, amerlanertigut iluarsiissutit assigiinngitsut pineqarmata.

Aammattaaq siunnersuut Illoqqortoormiut Ammassaliullu kommuneqarfiisa killilerneqarnerinik allanngortitsinissamut siunnersuummik imaqarpoq, kommunit taakku marluk oktobarip 20-iani 1997-imi isumaqatigiissutigimmassuk akunnerminni killeqarfiup allanngortinneqarnissaa kissaatigalugu, killeqarfik avannarparlugu. Taamatut kissaateqarnermut Ammassalimmi innuttaasut qangaaniilli nunamik pineqartumik atuisuunerat tunuliaqutigineqarpoq.

Aamma kommunit allat killeqarfiit allanngortinneqarnissaannik kissaateqartarsimapput, taamaallaalli Illoqqortoormiut Ammassaliullu kommuniisa akornanni killeqarfiit allanngortinnissaannut isumaqatigiittoqarsimavoq.

Taamatuttaaq Illoqqortoormiut Ammassaliullu kommuniisa nunap immikkoortuata aqqata "Tunu"-miit "Kangia"-nut allanngortinneqarnissaa kissaatigisimavaat. Nunat Aqqinik Aalajangiisartut tusarniaavigineqarnerminnut akissuteqaamminni oqaatigaat, aalajangiisartut upernaami 1998-imi nunap immikkoortuata aqqanik allanngortitsinissaq pillugu suliaq aallartissimallugu. Apeqqut suli suliarineqarpoq, ilaatigullu oqaasissaqartut attuumassuteqartut tusarniaavigineqartussaallutik. Nunat Aqqinik Aalajangiisartut ukiuni marlunni sioqqutsillutik allanngortitsinissamik ilimasaaruteqarniarput, tamatumalu kingorna inaarutaasumik isummertoqarsinnaassalluni.

Inatsisissatut siunnersuut aningaasatigut allaffissornikkullu kinguneqassanngilaq.

 

Siunnersuutiap aalajangersagartaanut ataasiakkaanut oqaaseqaatit

Kalaallisuuanut

§ 1-imut

Aalajangersagaq allannguutissatut siunnersuutinik imaqanngilaq. Nunat Aqqinik Aalajangiisartut nunap immikkoortuata aqqata "Tunu"-miit "Kangia"-nut allanngortinneqarsinnaanera suliaraa. Nalinginnaasumik oqaaseqaatit aamma takoqquneqarput.

§ 2-mut

Taaguut "kommuni" tamani "kommuneqarfik"-nngortinneqarpoq. Aqqit arlallit aamma iluarsineqarput naqinnermik angisuumik aallaqqaateqalersillugit.

Nr. 7-imi taaguut "Sandflugtdalen" "Akuliarusersuup Kuua"-nngortinneqarpoq.

Nr. 17-imi Ammassaliup Ittoqqortoormiullu kommuneqarfiisa killeqarfiat avannarpasinnerusumut nuunneqarpoq. Killeqarfiliussaq aamma erseqqissarneqarpoq.

Aalajangersakkami naqinnerliukkat ataasiakkaat aamma iluarsineqarput.

§§ 3-mut 4-mullu

Taaguut "kommuni" "kommuneqarfik"-nngorlugu iluarsineqarpoq.

§ 5-imut

Taaguut "Kangerlussuarmi sumiiffik" "Kangerlussuup eqqaa"-nngorlugu allanngortinneqarpoq, taaguullu "kommuni" "kommuneqarfik"-nngorlugu iluarsineqarluni.

§ 6-imut

Oqaaseq "Pisuni" "Suliassani"-nngorlugu allanngortinneqarpoq.

§ 7-imut

Aalajangersagaq tamarmi nutaamik allanneqarpoq.

 

Qallunaatuuanut

§ 1-imut

Imartat aqqi kalaallisuunngortinneqarput. Taamaasilluni "Davisstrædet" "Ikersuaq Davis"-inngortinneqarpoq, "Baffin Bugt" "Avannaata Imaa"-nngortinneqarluni, kiisalu "Smith Sund" "Puikkaasorsuaq"-nngortinneqarluni. Taaguut "Atlanterhavet" danskisoortaani pigiinnarneqarpoq.

Aalajangersakkap imm. 1-iani, nr. 1-imi ungaluutit "Lindenows Fjord"-itallit peerneqarput, taamaasilluni aalajangersakkap kalaallisut aqqa "Kangerlussuatsiaq" kisiat imarilerlugu.

§ 2-mut

Danskisut aqqit ungaluusikkat tamarmik peerneqarput, taamaasilluni aalajangersakkami kalaallisut aqqit kisimik atorneqalerlutik.

Aqqit arlallit iluarsineqarput angisuumik aallaqqaateqalersillugit, naqinnerliukkallu ataasiakkaat iluarsineqarlutik.

Nr. 4-imi "Arsuk Fjord" "Arsuup Kangerlua"-nngorlugu iluarsineqarpoq.

Nr. 7-imi "Sandflugtdalen" "Akuliarusiarsuup Kuua"-nngorlugu allanngortinneqarpoq.

Nr. 8-mi "Nordre Strømfjord" "Nassuttooq"-ngorlugu iluarsineqarpoq.

Nr. 12-imi "Vaigat" "Sullorsuaq"-nngorlugu allanngortinneqarpoq.

Nr. 14-imi "Ukkusissat Fjord" "Ukkusissat Kangerluat"-nngorlugu iluarsineqarpoq.

Nr. 17-imi Ammassaliup Ittoqqortoormiullu kommuneqarfiisa killeqarfiat avannarpasinninnerusumut nuunneqarpoq, killeqarfiliussarlu erseqqissarneqarluni.