§ 1

Aatsitassanut tunngasunik suliaqarneq pillugu Inatsisartut inatsisaanni nr. 26, 13. juni 2023-meersumi makkua allanngortinneqarput:

1. § 23 imatut oqaasertalerneqarpoq:

“  § 23.  Naalakkersuisut aatsitassanut suliassaqarfimmi Inatsisartut inatsisaanni pineqartunut ilaasumi, allaffissornikkut oqartussaapput.

  Imm. 2.  Aatsitassat, aatsitassarsiorluni ingerlataqarnerit, nunap iluata toqqorsivittut imaluunniit aatsitassarsiorluni ingerlatanut tunngatillugu siunertanut allanut atorneqarnera, nukissiuuteqarnermi ingerlataqarnerit tassunga atasut aammalu ingerlataqarnerit allat tassunga atasut tamaasa pillugit pissutsit Inatsisartut inatsisaanni pineqartunut ilaasut tamarmik, ataatsimoortumik akuutitsiviusumillu oqartussamit suliarinninnertut isumagineqassapput.

  Imm. 3.  Aatsitassanut suliassaqarfik, Inatsisartut inatsisaanni pineqartunut ilaasoq, pillugu oqartussat suliarinnittarnerat, pisinnaatitsissummik pigisaqartut allallu Inatsisartut inatsisaanni pineqartunut ilaasut, oqartussamut ataasiinnarmut attaveqaqateqartussaanerat aammalu nalunaarutinik, allakkianik aalajangiinernillu ilaalu ilanngullugit oqartussamit tassannga tigusaqartartussaanerat, pillugu tunngaviusoq malillugu aaqqissuunneqarput.

  Imm. 4.  Oqartussamik, pisinnaatitsissummik pigisaqartunut allanullu suleqatigisartakkanut Inatsisartut inatsisaanni matumani pineqartunut ilaasunut tunngatillugu aatsitassanut suliassaqarfik pillugu allaffissornikkut attaveqaqatigiinnermik isumaginnittussamik, Naalakkersuisut toqqaassapput.

  Imm. 5.  Imm. 2 malillugu oqartussat suliarinninneranni ilaatinneqarput, ingerlatassanut pissutsinullu Inatsisartut inatsisaanni pineqartunut ilaasunut tunngatillugu, inatsisit maleruagassallu allat. Taamaattoq inatsisit imaluunniit maleruagassat allat malillugit oqartussat allat oqartussatut suliarinnittussaasimappata, tamanna atuutissanngilaq.”

2. § 24 imatut oqaasertalerneqarpoq:

“  § 24.  Pinngortitamut avatangiisinullu tunngasut pillugit suliassanik suliarinninnerup, Inatsisartut inatsisaat malillugu akuersissutit akuersissuteqarnerillu pillugit suliassanik suliarinninnermut allamut attuumassuteqanngitsumik, ingerlanneqarnissaa Naalakkersuisut isumagissavaat.

  Imm. 2.  Pinngortitamut avatangiisinullu tunngasut pillugit nalilersuinerit aalajangiinerillu, ilisimatuussutsikkut sullissivimmit arlaannaannulluunniit attuumassuteqanngitsumut ataatsimit arlalinnilluunniit aalajangiinissanut nalilersuinernik missingiutinillu, aallaaveqartinneqassapput.

  Imm. 3.  Pinngortitamut avatangiisinullu tunngasut pillugit aalajangiinerit naammagittaalliuutigineqarsinnaanerat pillugu aalajangersakkanik Naalakkersuisut aalajangersaassapput.”

3. § 53 imatut oqaasertalerneqarpoq:

“  § 53.  Pisinnaatitsissummik pigisaqartoq qanoq annertutigisumik Kalaallit Nunaanni aatsitassanik suliareqqiissanersoq, § 43 naapertorlugu akuersissummi aalajangersarneqarsinnaavoq. Taamaattoq Kalaallit Nunaanni suliareqqiineq annertuumik annertunerusunik aningaasartuuteqartussaanermik imaluunniit ajoqutissartaqartussaanermik malitseqartussaappat, suliareqqiineq Kalaallit Nunaata avataani pisinnaavoq.”

§ 2

Inatsisartut inatsisaat manna ulloq 1. juli 2026 atuutilerpoq.

Namminersorlutik Oqartussat, ulloq 29. maaji 2026

Jens-Frederik Nielsen (atsior.)

Naalakkersuisut Siulittaasuat