§ 1

Aatsitassat pillugit ingerlatallu tamatumunnga pingaarutillit pillugit inatsisartut inatsisaanni nr. 7, 7. december 2009-meersumi (aatsitassanut ikummatissanullu inatsit), takuuk Namminersorlutik Oqartussat inatsimmut nalunaarutaat nr. 8, 27. februar 2020-meersoq, Inatsisartut inatsisaanni nr. 27, 13. juni 2023-meersumi aamma Inatsisartut inatsisaanni nr. 35, 4. juni 2024-meersumi allanngortinneqartoq, makkua allanngortinneqarput:

1. § 3 imatut oqaasertalerneqarpoq:

“  § 3.  Naalakkersuisut aatsitassanut suliassaqarfimmi allaffissornikkut oqartussaapput, ilanngullugit pissutsit aatsitassanut, aatsitassarsiorluni ingerlatassanut, nunap iluata toqqorsivittut imaluunniit aatsitassarsiorluni ingerlatassat pillugit siunertanut atorneqarneranut, nukissiuuteqarnermi ingerlataqarnernut taakkununnga atasunut, ruujorilersuilluni ingerlataqarnernut taakkununnga atasunut aamma ingerlatassanut allanut taakkununnga atasunut tunngassutillit tamarmik.

  Imm. 2. Pissutsit aatsitassanut, aatsitassarsiorluni ingerlatassanut, nunap iluata toqqorsivittut imaluunniit aatsitassarsiorluni ingerlatassat pillugit siunertanut atorneqarneranut, nukissiuuteqarnermi ingerlataqarnernut taakkununnga atasunut, ruujorilersuilluni ingerlataqarnernut taakkununnga atasunut aamma ingerlatassanut allanut taakkununnga atasunut tunngassutillit tamarmik ataatsimoortumik oqartussani suliarinninnermi akuliusimatinneqartutut isumagineqarnissaat, Naalakkersuisut isumagissavaat.

  Imm. 3. Oqartussamik, pisinnaatitsissummik pigisaqartunut allanullu suleqatigisartakkanut Inatsisartut inatsisaanni matumani pineqartunut ilaasunut tunngatillugu aatsitassanut suliassaqarfik pillugu allaffissornikkut attaveqaqatigiinnermik isumaginnittussamik, Naalakkersuisut toqqaassapput.

  Imm. 4. Imm. 2 malillugu oqartussat suliarinninneranni ilaatinneqarput, ingerlatassanut pissutsinullu Inatsisartut inatsisaanni pineqartunut ilaasunut tunngatillugu, inatsisit maleruagassallu allat. Taamaattoq inatsisit imaluunniit maleruagassat allat malillugit oqartussat allat oqartussatut suliarinnittussaasimappata, tamanna atuutissanngilaq.”

2. § 3 a imatut oqaasertalerneqarpoq:

“  § 3 a.  Pinngortitamut avatangiisinullu tunngasut pillugit suliassanik suliarinninnerup, Inatsisartut inatsisaat malillugu akuersissutit akuersissuteqarnerillu pillugit suliassanik suliarinninnermut allamut attuumassuteqanngitsumik, ingerlanneqarnissaa Naalakkersuisut isumagissavaat.

  Imm. 2. Pinngortitamut avatangiisinullu tunngasut pillugit nalilersuinerit aalajangiinerillu, ilisimatuussutsikkut sullissivimmit arlaannaannulluunniit attuumassuteqanngitsumut ataatsimit arlalinnilluunniit aalajangiinissanut nalilersuinernik missingiutinillu, aallaaveqartinneqassapput. ”

3. § 3 b imatut oqaasertalerneqarpoq:

“  § 3 b. Pinngortitamut avatangiisinullu tunngasut pillugit aalajangiinerit naammagittaalliuutigineqarsinnaanerat pillugu aalajangersakkanik Naalakkersuisut aalajangersaassapput.”

4. § 3 c atorunnaarsinneqarpoq.

§ 2

Inatsisartut inatsisaat manna ulloq 1. juli 2026 atuutilerpoq.

Namminersorlutik Oqartussat, ulloq 29. maaji 2026

Jens-Frederik Nielsen

Naalakkersuisut Siulittaasuat