§ 1

Aatsitassat pillugit ingerlatallu tamatumunnga pingaarutillit pillugit Inatsisartut inatsisaat nr. 7, 7. december 2009-imeersumi (aatsitassanut ikummatissanullu inatsit, takuuk Inatsisartut inatsisaannut nalunaarut nr. 8, 26. februar 2020-meersoq, makkua allanngortinneqarput:

1.  § 14-ip kingorna kapitali 43-mi ilanngunneqarput:

”Pissutsit Aatsitassanut tunngasunik suliaqarneq pillugu Inatsisartut inatsisaanni pineqartunut ilaasut

  § 14 a.  Inatsisartut inatsisaat pissutsinut, ilanngullugit ingerlatassat akuersissutillu, aatsitassanut tunngasunik suliaqarneq pillugu Inatsisartut inatsisaanni pineqartunut ilaasunut, atuutinngilaq. ”

2. § 16, imm. 5, imatut oqaasertalerneqarpoq:

”  Imm. 5.  Piiaanissamut akuersissut piffissani kapitali 6-imi taaneqartuni atuuppoq. Piffissaq katillugu ukiunit 50-init sivisunerusinnaanngilaq.”

3. Kapitali 7 atorunnaarsinneqarpoq.

4. § 36 a imatut oqaasertalerneqarpoq:

”  § 36 a.  Annikitsumik aatsitassarsiornissamut akuersissut malillugu ingerlatassat pilersaarutigineqartut suliarineqartullu annikitsumik aatsitassarsiorluni ingerlatassaasut imaluunniit aatsitassarsiorluni ingerlatassaasut nalinginnaasut aatsitassanut tunngasunik suliaqarneq pillugu Inatsisartut inatsisaat malillugu akuersissut malillugu taamaallaat ingerlanneqaqqusaasut, Naalakkersuisut nakkutigissavaat aalajangissallugulu.

  Imm. 2.  Annikitsumik aatsitassarsiornissamut akuersissut malillugu aatsitassarsiorluni ingerlatassat pilersaarutigineqartut annikitsumik aatsitassarsiorluni ingerlatassaasimanngippata, Naalakkersuisut annikitsumik aatsitassarsiornissamut akuersissummik tunineqarnissamik qinnuteqaat itigartissavaat aammalu qinnuteqartoq aatsitassanut tunngasunik suliaqarneq pillugu Inatsisartut inatsisaat malillugu akuersissummik tunineqarnissamik qinnuteqarnissaanik innersuutissallugu.

  Imm. 3.  Aatsitassarsiorluni ingerlatassat pilersaarutigineqartut imaluunniit suliarineqartut annikitsumik aatsitassarsiornissamut akuersissut malillugu akuerineqartut annikitsumik aatsitassarsiorluni ingerlatassaanngippata, Naalakkersuisut annikitsumik aatsitassarsiornissamut akuersissut uterteqqusinnaavaat aammalu qinnuteqartoq aatsitassanut tunngasunik suliaqarneq pillugu Inatsisartut inatsisaat malillugu akuersissummik tunineqarnissamik qinnuteqarnissaanik innersuussinnaallugu. Annikitsumik aatsitassarsiornissamut akuersissut malillugu pisinnaatitsissummik pigisaqartoq annikitsumik aatsitassarsiornissamut akuersissutip uterteqquneqarnera imaluunniit tamatuma malitsigisaanik annaasaqarnini tunngavigalugu Naalakkersuisunut taarsiivigineqarnissamik piumasaqaateqarsinnaanngilaq imaluunniit allanik piumasaqaateqarsinnaanani.

  Imm. 4.  Pissutsit imm. 1-3-mi taaneqartut pillugit aalajangersakkanik erseqqinnerusunik, atugassarititaasunik Naalakkersuisut aalajangersaasinnaapput aalajangiisinnaallutillu, ilanngullugit pissutsit erseqqinnerusut tunngavissarititaasullu imm. 1 malillugu aalajangiinermut pingaaruteqartut pillugit, pissutsit imm. 3 malillugu annikitsumik aatsitassarsiornissamut akuersissutip uterteqquneqarneranut tunngasut pillugit aammalu pisinnaatitsissummik pigisaqartup piumasaqaatinik tamaginnik tamatumunngalu atugassarititaasunik naammassinninnerani, aatsitassanut tunngasunik suliaqarneq pillugu Inatsisartut inatsisaat malillugu akuersissummik tunineqarnissamut pisinnaatitaaffeqarsinnaanera.“

5. § 85, imm. 3 atorunnaarsinneqarpoq.

6. § 95 a atorunnaarsinneqarpoq.

§ 2

Inatsisartut inatsisaat manna ulloq 1. januar 2024 atuutilerpoq.

Namminersorlutik Oqartussat, ulloq 13. juuni 2023

Múte Bourup Egede (atsior.)

Naalakkersuisut Siulittaasuat