Suliassaqarfimmut, 70 - 72 Ineqarnermut Attaveqaasersuutinullu Naalakkersuisoqarfik

”Nr. 4.

Pigisanik aalaakkaasunik pisisarneq

1. Inuit suliffeqarfiillu oqaasertaliussami matumani aalajangersakkat malikkunikkit, Kalaallit Nunaanni pigisanik aalaakaasunik pisisinnaapput nunaminertanillu atuisinnaatitaassallutik.

2. Inuit danskisut innuttaassuseqartut Kalaallit Nunaanni pigisanik aalaakkaasunik pisisinnaapput.

3. Inuit danskisut innuttaassuseqanngitsut Kalaallit Nunaanni pigisanik aalaakkaasunik pisisinnaapput, 1) inuk pineqartoq Kalaallit Nunaanni aalajangersimasumik najugaqarpat, aammalu ukiut marluk siuliini sivisunerusumiluunniit inuit allattorsimaffianni nalunaarsorsimappat, aamma 2) Kalaallit Nunaannut tamakkiisumik akileraartussaatitaappat, aammalu ukiut marluk siuliini sivisunerusumiluunniit Kalaallit Nunaannut tamakkiisumik akileraartussaasimappat.

4. Kreditinstitut-it aamma sillimmasiisarnermullu ingerlatseqatigiiffiit, ilanngullugit inuunermut sillimmasiisarnermut ingerlatseqatigiiffiit kiisalu soraarnerussutisiassanut aningaasaateqarfiit allallu Danmarkimi, Kalallit Nunaanni imaluunniit Savalimmiuni najugaqartut, aammalu Finanstilsynet-imit imaluunniit Tryggingareftirlitið-imit nakkutigineqartussaasut, Kalaallit Nunaanni pigisanik nalilinnik pisisinnaatitaapput.

5. Ingerlatseqatigiiffiit aningaasaliisartut, Kalaallit Nunaanni najugaqartut Kalaallit Nunaanni pigisanik aalaakkaasunik pisisinnaapput, ingerlatseqatigiiffiup aningaasaliisartup aningaasaataanik tamarmiusunik pigisaqarunik, aammalu taasisinnaatitaanerit tamarmik inunnit imm. 2-3-mi taaneqartunit toqqaannartumik taasisinnaatitaaffigineqarpata.

6. Inuit imaluunniit suliffeqarfiit, akuerineqarnerit, akuersissutit uppernarsaatilluunniit atuuttut, aalisarnermut Inatsisartut inatsisaat, aatsitassanut tunngasunik suliaqarneq pillugu Inatsisartut inatsisaat, najukkani aatsitassanut tunngasunik suliaqarneq pillugu Inatsisartut inatsisaat, aatsitassat pillugit ingerlatallu tamatumunnga pingaarutillit pillugit inatsisartut inatsisaat (aatsitassanut ikummatissanullu inatsit), takornariartitsinermut aamma inuussutissarsiutigalugu suliaqarnermi nunap aggornerinut il.il. Inatsisartut inatsisaat, imaluunniit sumiiffinni toqqarneqartuni takornariartitsisarnissamut akuersissutinut Inatsisartut inatsisaat naapertorlugit Naalakkersuisunit tunniunneqartut tunngavigalugit suliaminnik ingerlatsisut, Kalaallit Nunaanni pigisanik aalaakaasunik, suliffeqarfimminni atugassaminnik pisisinnaapput.

7. Kalaallit Nunaanni pigisanik aalaakkaasunik pisisinnaaneq aamma suliffeqarfiit, Kalaallit Nunaanni pigisanik aalaakkaasunik toqqaannartumik toqqaannanngitsumilluunniit pigisaqarsinnaasunut imaluunniit taasisinnaatitaasunut atuutsinneqartutut isigineqassaaq.

  Imm. 2. Inuit suliffeqarfinnulluunniit, imm. 2-6-imut toqqaannartumik ilaatinneqanngitsut pigisanik aalaakkaasunik pisissappata, imm. 8 naapertorlugu akuersissuteqartoqarnissaa pisariaqarpoq.

8. Inuit suliffeqarfiillu, imm. 2-6-imi piumasaqaatinik naammassinninngitsut taamaallaat Naalakkersuisut siumoortumik allakkatigut akuersissuteqarnerini Kalaallit Nunaanni pigisanik aalaakkaasunik pisisinnaapput. Taamatuttaaq imm. 1 Kalaallit Nunaanni pigisamik aalaakkaasumik, Kalaallit Nunaanni Eqqartuussisaaseq pillugu Inatsimmi kapitali 49 naapertorlugu qularnaveeqqutitut atorneqarsinnaasussatut tigusinermut atorneqarsinnaavoq.

  Imm. 2. Pigisamik aalaakkaasumik pisinissamut Naalakkersuisut akuersissutaat sukumiisunik atugassaqartitsiffiulluni piumasaqaateqartinneqarlunilu, aammalu piffissamut killilerneqarluni nalunaarutigineqarsinnaavoq.

9. Kalaallit Nunaanni pigisamik aalaakkaasumik kingornussinikkut, kingornussassanik suliaqarfiunngitsumik tigusinikkut imaluunniit ataatsimut pigisanik agguaanikkut tigusisoqassappat, imm. 8 malillugu Naalakkersuisut akuersissuteqarnissaat pisariaqanngilaq. Tamannattaaq Kalaallit Nunaanni pigisamik aalaakkaasumik ilaqutariinni siulinut kinguaanullu tunissutigineqartumik pissarsinermut atuuppoq.

Atortussaatitsinnginneq il.il.

10. Kalaallit Nunaanni pigisamik aalaakkaasumik, oqaasertaliussami matumani aalajangersakkat uniorlugit pissarsineq atuutsinneqartussaanngilaq.

11. Kalaallit Nunaanni pigisamik aalaakkaasumik pissarsiamik Kalaallit Nunaanni Eqqartuussivimmut nalunaarsugassamik nalunaaruteqarnermi, imaluunniit nunaminertamik atuisinnaatitaanermik qinnuteqarnermi, pisisup qinnuteqartulluunniit imm. 2-6-imi imaluunniit imm. 9-mi piumasaqaatit naammassisimanngippagit Naalakkersuisuniit akuersissut takutinneqassaaq.

  Imm. 2. Kalaallit Nunaanni Eqqartuussiviup Kalaallit Nunaanni pigisamik aalaakkaasumik pissarsiaq, oqaasertaliussami matumani aalajangersakkanut uniuuttoq nalunaarsugassanngorlugu nalunaarutigineqarpat piumasaqaat itigartissavaa.

  Imm. 3. Nunaminertanik atugassiisarnermut oqartussaasut Kalaallit Nunaanni pigisamut aalaakkaasumut pissarsiamut, oqaasertaliussami matumani aalajangersakkanut uniuuttumut nunaminertamik atugassinneqarnissamik qinnuteqartoqarnerani itigartitsitsissapput, tak. nr. 13.

Avaqqussineq

12. Kalaallit Nunaanni pigisanik aalaakkaasunik inatsisillu tunngavigalugit niuerutiginninnernik allanik piffissami sivisuumi atuinissamut attartornissamullu isumaqatigiissutit, oqaasertaliussami matumani maleruagassanik saneqqutsiniarnermik siunertaqarluni isumaqatigiissutigineqartut ilimagineqartariaqartut atuutissanngillat.

Nunaminertanik atuisinnaanermik pissarsisarnerit

13. Oqaasertaliussami matumani aalajangersakkat taamaaqataanik pilersaarusiorneq aamma nunaminertat atorneqartarnerat pillugit Inatsisartut inatsisaannik nalunaarut nr. 4, 25. januaari 2024-meersoq naapertorlugu nunaminertamik atuisinnaatitaanissamik qinnuteqaatinut atuutsinneqarput, taamaattorli tak. imm. 2.

  Imm. 2. Imm. 1 pilersaarusiorneq aamma nunaminertat atorneqartarnerat pillugit Inatsisartut inatsisaannik nalunaarummi nr. 4-mi, 25. januaari 2024-meersumi § 2, imm. 1 naapertorlugu nunaminertamik atuisinnaatitaanissamut qinnuteqaatinut atuutissanngilaq.

Atuuffii

14. Oqaasertaliussamut Namminersorlutik Oqartussat, naalagaaffiup imaluunniit Kalaallit Nunaanni kommunit Kalaallit Nunaanni pigisanik aalaakkaasunik pisisarneri imaluunniit Kalaallit Nunaanni nunaminertanik atuisinnaatitaalertarneri ilaatinneqanngillat.

  Imm. 2.  Oqaasertaliussamut sumiiffinni teknikkimullu atortulersuutini, Kalaallit Nunaanni Illersornissamut isumaqatigiissummi siunertanut atorneqartuni pigisanik aalaakkaasunik pissarsisarnerit nunaminertanillu atuisinnaatitaalertarnerit ilaatinneqanngillat.

  Imm. 3.  Oqaasertaliussamut Pituffimmi Illersornissaqarfik ilaatinneqanngilaq

Atuutsitsilerneq

15. Oqaasertaliussaq atortut elektroniskiusut atorlugit nittartagaq www.nalunaarutit.gl aqqutigalugu nalunaaruteqarnikkut atuutilersinneqassaaq. Oqaasertaliussaq pigisanik aalaakkaasunik pisinissamut isumaqatigiissutinut, oqaasertaliussap atuutilereernerata kingorna atsiorneqartunut aamma nunaminertanik atuisinnaatitaanissamut qinnuteqaatinut, oqaasertaliussap atuutilereernerata kingorna tunniunneqartunut atuutissaaq.”