Aalisarneq pillugu Inatsisartut inatsisaat nr. 29 23. maj 2024-meersumi § 6, imm. 3, § 7. imm. 1, § 18, imm. 2, § 46, imm. 1, § 51, imm. 4 aamma § 68, imm. 2 aamma 3 naapertorlugit  aalajangersarneqarpoq:

Kapitali 1

Atuuffia nassuiaatillu

Atuuffii

  § 1.  Inuussutissarsiutiginagu kapisilinniarnermi aamma kapisilinniarluni inuussutissarsiutigalugu aalisarnermi nalunaaruteqartarnermut nalunaarut atorneqassaaq.

  Imm. 2.  Kalaallit Nunaata aalisarnermut oqartussaaffiani aamma Kapisillit kuuanni nalunaarut atorneqassaaq.

  § 2. Nalunaarummi matumani inuussutissarsiutigalugu aalisarneq ima paasineqassaaq, pisat tamaasa ilaannaasaluunniit tuniniarnissaat siunertaralugu aalisarneq.

  Imm. 2.  Nalunaarummi matumani inuussutissarsiutiginagu aalisarneq ima paasineqassaaq, imm. 1-imut ilaanngitsut aalisarnerit.

Kapitali 2

Inuussutissarsiutiginagu aalisarneq

§ 3. Kapisilinniarluni inuussutissarsiutiginagu aalisarneq, kapisilinnik aalisarnissamut akuersissummik, Naalakkersuisunut qinnuteqarnerup kingorna tunniunneqartumik, atuuttumik pigisaqartumit taamaallaat ingerlanneqassaaq.

  Imm. 2.  Qinnuteqartunut, siorna aalisarfiup ingerlanerani kapisilinniarluni aalisarnermut akuersissummik peqarsimasunut, siornaammat §-it 7 aamma 8 naapertorlugit nalunaaruteqartussaatitaanerminnik naammassinnissimanissaat akuersissummik pissarsiniarnerannut tunngavissaatitaavoq.

  § 4. Kapisilinniarluni inuussutissarsiutiginagu aalisarnermut nuna tamakkerlugu pisassiissutit, nunanut tamalaanut isumaqatigiissutit mianeralugit, Naalakkersuisut ukiut tamaasa aalajangersartarpaat.

  Imm. 2.  Sumiiffinni aalisarnermut peqatigiiffiit isumasioqatigeriarlugit, kapisilinniarluni aalisarnerup ulloq aallartiffissaa Naalakkersuisut aalajangersassavaat. Aqutsiveqarfinnut tamanut immikkut aalisarnerup aallartiffissaa pisassiissutinillu aalajangersaanerit kiisalu aalisarnissamut piumasaqaatit nalunaarutigineri, tamanut saqqummiunneqartarput uani www.naalakkersuisut.gl.

  Imm. 3.  Kapisilinniarluni aalisarneq, ukiumi ullorsiuteqarfiusumi aalisarnerup aallartinnissaata ullua sioqqullugu aallartinneqassanngilaq, imm. 2 malillugu nalunaaruteqarnissaq naapertorlugu.

  § 5. Pisassiissutitut aalajangikkat tamakkerlugit pisarineqarnissaat qanillippat, inuussutissarsiutiginagu kapisilinniarluni aalisarneq qaqugu unissanersoq Naalakkersuisut nalunaaruteqassapput. Nalunaaruteqarneq tamanut nalunaaruteqarnertut pissaaq. Aalisarunnaarnissaq sioqqullugu atortut qaqinneqassapput.

  § 6.  Inuussutissarsiutiginagu kapisilinnik aalisarneq taamaallaat makku atorlugit pisinnaavoq:

1)  qarsorsat, imaluunniit

2)  qassutit 2.000-inik nigartallit, nigartaat minnerpaamik 140 mm.-isut uuttuuteqassapput takinerpaagunillu 30 meteriussallutik.

  Imm. 2.  Qassutit uiguleriaat nivinngarneqaqqusaanngillat. Qassutit nivinngarneqartut tininnerpaagaangat kuup akuanit 500 meterimit qaninnerussanngillat, takujulli § 12, imm. 4 aamma imm. 5.

  § 7.  Inuk inuussutissarsiutiginagu kapisilinnik aalisartoq, imm. 2 naapertorlugu, pisaminik tamanik Kalaallit Nunaanni Aalisarnermut Piniarnermullu Nakkutilliisoqarfimmut nalunaaruteqartussaavoq.

  Imm. 2.  Pisat pillugit nalunaarutiginninneq, ilanngussamik 1-imik atuinikkut imaluunniit Sullissivik.gl aqqutigalugu pisassaaq. Pujoorereernerup imaluunniit aalisarnerup naammassineqarnerata kingorna angerlamut tikinnermi, erngersumik nalunaaruteqarneq pissaaq.

  § 8.  Kinaluunniit, inuussutissarsiutiginagu kapisilinniarluni aalisarnissamut  akuersissummik peqartoq, aalisarsimanngikkaluarlunilu kapisilinnik pisaqarsimanngitsoq, kapisilinnik aalisarnerup naanerata kingorna kingusinnerpaamik ullut 14-issaanni, Kalaallit Nunaanni Aalisarnermut Piniarnermullu Nakkutilliisoqarfimmut tamanna pillugu nalunaaruteqassaaq, ilanngussamik 1-imik atuinikkut imaluunniit Sullissivik.gl aqqutigalugu.

  § 9.  Inuussutissarsiutiginagu kapisilinnik aalisarneq, imartami sinerissap aamma tunngaviusumik killeqarfiup 3 sømilip akornanni, taamaallaat pisinnaavoq.

Kapitali 3

Inuussutissarsiutigalugu kapisilinniarluni aalisarnermut atatillugu nalunaaruteqarneq

§ 10. Aalisartut inuussutissarsiutigalugu kapisilinnik aalisarnissamut akuersissummik peqartut, umiarsualivimmut tikinnerup kingorna ernersumik kapisilinnik pisat Kalaallit Nunaanni Aalisarnermut Piniarnermullu Nakkutilliisoqarfimmut nalunaarutigissavaat. Kapisillit pisarineqartut tamakkerlutik nalunaarummut ilaatinneqassapput. Nalunaarutiginninneq ilanngussamik 1-imik atuinikkut imaluunniit Sullissivik.gl. aqqutigalugit pissaaq. Nalunaartussaatitaaneq inuussutissarsiutigalugu aalisarnernut allanut atatillugu kapisilinnut saniatigut pisarisanut aamma atuuppoq.

  § 11.  Kinaluunniit, inuussutissarsiutigalugu kapisilinniarluni aalisarnissamut akuersissummik peqartoq, aalisarsimanngikkaluarlunilu kapisilinnik pisaqarsimanngitsoq, kapisilinnik aalisarnerup naanerata kingorna kingusinnerpaamik ullut 14-issaanni, Kalaallit Nunaanni Aalisarnermut Piniarnermullu Nakkutilliisoqarfimmut tamanna pillugu nalunaaruteqassaaq, ilanngussamik 1-imik atuinikkut imaluunniit Sullissivik.gl aqqutigalugu.

Kapitali 4

Kapisillit kuuanni pingaartumik aalisarnermut tunngatillugu

  § 12.  Kapisillit kuuanni kapisilinniarluni aalisarnermut pisassiissutissat aalisarnermullu aallartinnissap ullua Naalakkersuisut ukiut tamaasa aalajangersartarpaat.

  Imm. 2.  Kapisillit kuuanni nammineq atugassanik kapisilinnik taamaallaat aalisartoqarsinnaavoq. Aalisarnermut tassunga akuersissut piumasaqaataavoq, taanna Naalakkersuisoqarfimmit qinnuteqarnerup kingorna tunniunneqartarpoq, matumani aalisarnermut oqartussaaffik tassaniimmat.

  Imm. 3.  Imm. 2 malillugu akuersissut qinnuteqartunut tunniunneqartarpoq, piumasaqaatinik tulliuttunik naammassinnissimasunut:

1)  Qinnuteqartoq Kalaallit Nunaanni najugaqartutut inuit allattorsimaffianniittumut imaluunniit inuussutissarsiutiginagu aalisarnermik ingerlatsinissamut akuersissummik pissarsisimasumut.

2)  Qinnuteqartumut, siorna ukiumi ullorsiuteqarfiusumi akuersissummik aamma peqarsimasumut, § 7 naapertorlugu nalunaaruteqartussaanerminik eqquutsitsisimasumut.

  Imm. 4. Kapisillit kuuata paavanit 1.000 meterinit qaninnerusumi qassutinik suugaluartunilluunniit aalisarneq inerteqqutaavoq.

Imm. 5. Kapisillit kuuata akuanit 50 meterinit qaninnerunngitsumit, aalisaatit suulluunniit atorlugit aalisarneq inerteqqutaavoq, qissartaatit qarsorsallu ataasiakkaat minillugit.

  Imm. 6.  Kapisillit kuuanni tasernilu taamaalilluni qissartaatit ataatsimik qarsorsallit taamaallaat atorlugit aalisartoqarsinnaavoq.

  Imm. 7.  Kapisillit kuuanni aalisarnerup qanoq unitsinneqarnissaa pillugu tamanut nalunaaruteqarnikkut Naalakkersuisut ilisimatitsissapput. Aalisarneq sunaluunniit pisanik avalatsitseqqiisarnertut, aalisakkat pisarisat avalatseqqitatallu pillugit nalunaaruteqarnissamik piumasaqaateqarfiusoq, ingerlanneqassasoq Naalakkersuisut aalajangersinnaavaat.

Imm. 8. Aallartiffissaq sioqqullugu aalisalernissaq inerteqqutaavoq, imm. 1 naapertorlugu. Aalisarnerup unitsinnerata kingorna aalisarneq inerteqqutaavoq, imm. 7 naapertorlugu.

Kapitali 5

Pineqaatissiissutit

  § 13. Aalajangersakkanik ukuninnga § 4, imm. 3, § 5, imm. 1, imm. 3, §§-it 6 - 11 aamma § 12, imm. 2, imm. 4-6 kiisalu imm. 8, unioqqutitsineq Kalaallit Nunaanni Pinerluttulerinermik Inatsit naapertorlugu akiliisitsinermik arsaarinninnermillu kinguneqarsinnaapput, tak. Aalisarneq pillugu Inatsisartut inatsisaat kapitali 15. 

  Imm. 2.  § 12, imm. 7 naapertorlugu Naalakkersuisut aalajangersagaannik piumasaqaatinik unioqqutitsinerit, akiliisitsinermik arsaarinninnermillu pineqaatitsissutigineqarsinnaapput.

Kapitali 6

Atuuttuulerfia

  § 14. Nalunaarut 1. august 2025-miit atuutilissaaq.

Namminersorlutik Oqartussat, ulloq 31. juli 2025

Jens-Frederik Nielsen (atsior.)

Naalakkersuisut Siulittaasuat

/ Emanuel Rosing (atsior.)