Avatangiisit innarlitsaaliorneqarnissaannik Inatsisartut inatsisaat nr. 9, 22. november 2011-meersumi § 10, imm. 1, nr. 3 aamma 20, § 56, imm. 1, § 66, imm. 3, Inatsisartut inatsisaatigut nr. 16-ikkut, 1. december 2021-meersukkut allannguuteqartinneqartumi, aamma Imaani avatangiisit illersorneqarnissaat pillugu Inatsisartut inatsisaat nr. 15, 8. juni 2017-imeersumi § 33, § 45, imm. 4, § 49, imm. 1, aamma § 63 aalajangerneqarput:

 

Kapitali 1

Aallarniutitut aalajangersakkat

 

Atuuffigisaa

 

  § 1.  Umiarsuarnut Kalaallit Nunaata imartaata killeqarfigisaaniittunut, Kalaallit Nunaanni umiarsualivinniittunut, aammalu imaani killeqarfigisami umiarsuarnut ikummatissatut uuliamik pilersuisunut nalunaarut manna atuuffeqarpoq.

 

Nassuiaatit

 

  § 2.  Nalunaarummi matumani makku imatut paasineqassapput:

1)  % m/m: Oqimaassuseq malillugu procenti (oqimaassutsimut procenti).

2)  Issittup imartai: Imartat allorniusat sanimukartunit 58°00'. 0 N-imit aamma allorniusat tukimukartunit 042°00'. 0 V-imit allorniusat sanimukartunut 64°37'. 0 N-imut, allorniusat tukimukartunut 035°27'. 0 V-mut tassanngaaniillu allorniusat sanimukartunut 67°03'. 9 N-imut, allorniusat tukimukartunut 026°33'. 4 V-imut pujorsiutip titarnera aqqutigalugu, tassanngaaniillu allorniusat tukimukartunut 70°49'. 56 N-imut aamma allorniusat tukimukartunut 008°59'. 61 V-imut (Sørkapp, Jan Mayen) pujorsiutip titarnera aqqutigalugu aammalu Jan Mayenip kujammut sineriaatigoortumik Bjørnøya eqqaani 73°31'. 6 N-imut aamma 019°01'. 0 Ø-imut, tassanngaaniillu titarneq angisuumik ningalik aqqutigalugu allorniusat sanimukartunut 68°38'. 29 N-imut aamma allorniusat tukimukartunut 043°23'08 Ø-imut (Cap Kanin Nos) tassanngaaniillu Asiap nunavittaata avannamut sineriaatigoortumik Beringstrædet tungaanut kangimuinnaq, tassanngaaniillu Beringstrædetimit kimmuinnaq allorniusat sanimukartunut 60° N-imut Il'pyrskiy angullugu aammalu allorniusat saminukartut avannamut 60-issaat sinerlugu kangimuinnaq Etolin-strædet angullugu ilanngullugulu, tassanngaaniillu amerikap avannarliup nunavittaata avannaani sineriakkoortumik allorniusat sanimukartunut 60° N-imut kujammuinnaq, tassanngaaniillu allorniusat sanimukartut 60° N sinerlugit kangimuinnaq allorniusat tukimukartunut 056°37'. 1 V-imut, tassanngaaniillu allorniusat sanimukartunut 58°00'. 0 N-imut, allorniusat tukimukartunut 042°00'. 0 V-imut titarnerup avannaani inissisimasut. Issittup imartai  MARPOL-imi nunani tamalaani isumaqatigiissummut Ilanngussaq 1-imi nassuiarneqartut.

3)  Ikummatissatut uulia: Umiarsuarmut pilersuutigineqartutut uuliat suulluunniit, aammalu umiarsuup ingerlannissaanut, imaluunniit umiarsuup pineqartup iluani ingerlatsinermut ikummatitut atorneqartut, ilanngullugit akuiarsimasat aamma sinneruttutut ikummatissat.

4)  Killeqarfik aningaasaqarnikkut akisussaaffeqarfiusoq: imaani sumiiffik, killeqarfiit aningaasaqarnikkut akisussaaffeqarfiusut pillugit inatsisip Kalaallit Nunaannut atuutsinneqalernissaa pillugu peqqussummi killissalersorneqarsimasoq, takuuk Nunanut allanut ministereqarfiup Kalaallit Nunaata eqqaani killeqarfik aningaasaqarnikkut akisussaaffeqarfiusoq pillugu nalunaarutaa naapertorlugu.

5)  Atorneqartumik misiligutissaq: Ikummatissatut uuliamik umiarsuarmi atorneqartumik misiligutissaq.

6)  IMO: Naalagaaffiit Peqatigiit Imarsiornermut suliniaqatigiiffiat.

7)  MARPOL-imi isumaqatigiissut: Umiarsuarnit Mingutsitsinerup Pinaveersaartinnissaa pillugu Nunat Tamalaani Isumaqatigiissut 1973-imeersoq (MARPOL), MARPOL-imut Ileqqulersuutissat Allattorsimaffianni 1978-imeersumi, aamma MARPOL-imut Ileqqulersuutissat Allattorsimaffianni 1997-imeersumi allanngortinneqartumi.

8)  MARPOL tunngavigalugu misiligutissaq: Ikummatissatut uuliamik, MARPOL-imi isumaqatigiissummi ilanngussaq VI-imi, maleruagassaq 18.8.1 naapertorlugu umiarsuarmut tunniunneqartumik misiligutissaq.

9)  Umiarsuarmiittumik misiligutissaq: Ikummatissatut uuliamik umiarsuarmi atugassatut naatsorsuussamit imaluunniit umiarsuarmi atorneqarnissaa siunertaralugu assartorneqartumik misiligutissatut tigusaq.

10)  Issittumi kode: Umiarsuarni Issittup Imartaani Suliaqartuusunut Nunat Tamalaani Kode 2015-imeersoq.

11)  SO_x: Svovloxidit.

12)  Umiarsuaq uuliamik assartuut: Umiarsuaq usisaat, usinik imerpalasunik ikuallassinnaasunik immikkoortitaarlugit poortorsimanngitsunik assartuinissamut sanaaq imaluunniit aaqqissuussaq.

13)  Ikummatissatut uulia oqimaatsoq: 900 kg/m3-inut naleqqiullugu annertunerusumi 15°C-imi uulianut akuiarneqanngitsunut naleqqiullugit uuliat allat, imaluunniit 180 mm2/s-imut naleqqiullugu annertunerusumi 50°C-imi kinematiskimik viskositeteqartut, nutsuisoqarfimmi imerpalasut kuunnissamut akiuussinnaassuseqartut.

14)  Aniatitsineq: Nalunaarut manna najoqqutaralugu nakkutigineqartunik umiarsuarnit silaannarmut imaluunniit imaanut akuutissanik sunilluunniit aniatitsinerit.

15)  Aniatitsinissamik annikillisaanermut periutsit: Umiarsuarmi inissinnissaanut pisataq, atortussaq, aalajangersagaq imaluunniit sakkuut sunaluunniit, imaluunniit ingerlassaq alla malillugu allatut qinigassatut ikummatissatut uulia, imaluunniit annikitsumik svovlitalittut umiarsuarnut ikummatissanut allatut qinigaasunut piumasaqaatit malittarinissaannut periuseq, nalunaarummi matumani piumasaqaatinik aalajangersakkanik nakkutigineqarsinnaasunik, annertussusilerneqarsinnaasunik aamma isumagineqarsinnaasunik malittarinnittut.

16)  VOC: Aalajaatsuunngitsunik uumassusilinnit attaveqarfiit (Volatile Organic Compounds).

 

Kapitali 2

SO_x-imik aniatitsinerit

 

Ikummatissami svovleqassuseq

 

  § 3.  Ikummatissatut uuliamik 0,5 % m/m qaangerlugu svovleqassusilimmik atuisoqassanngilaq.

  Imm. 2.  Imm. 1 apeqqutaatinnagu umiarsuit iluini § 4-mi eqqartorneqartutut aniatitsinermik annikillisaanermik periutsinik taakkuninnga atuisunik ikummatissatut uuliamik 0,5 % m/m-imik svovlitalimmik atuisoqarsinnaavoq.

  Stk. 3.  Ikummatissatut uuliap aamma piumasaqaatit tullinnguuttut unioqqutissanngilai:

1)  Ikummatissatut uulia uuliamit akuiarneqanngitsumit akuiaanermit pisutut kulbrintit akulerussuunnerippagu naammassisaqarsinnaassusaata pitsanngortinnissaanik siunertaqarluni taamaallaat akuutissanik annikitsuaraannarnik akulerussuisoqaqqusaavoq.

2)  Ikummatissatut uulia syremik uumassusilinnit pisuunngitsumik ilaqassanngilaq.

3)  Ikummatissatut uulia akuutissanik, imaluunniit kemiimut tunngasutut eqqagassamik imaqaqqusaanngilaq, tamanna:

a)  umiarsuup isumannaatsuutitaaneranut aarlerinartorsiortitsissappat,

b)  maskiinaqarfiup naammassinnissinnaassusaanut killup tungaanut sunniuteqassappat,

c)  inuttaasunut ajoqusiisinnaassappat, imaluunniit

d)  ataatsimut isigalugu silaannarmik suli annermik mingutsitseqataassappat.

 

SO_x-imik aniatitsinernut annikillisaatitut periutsinik atuinerit

 

  § 4.  Kalaallit Nunaata imartaani umiarsuit ikummatissatut uuliap atornissaanut allatut qinikkatut aniatitsinermik annikillisaatitut periutsit, § 3, imm. 1-imi piumasaqaatinik naapertuutsitsisut atorsinnaavaat.

  Imm. 2.  Imm. 1 naapertorlugu umiarsuit aniatitsinermik annikillisaatitut periutsinik atuisut § 3-mi, imm. 1-imi  piumasaqaatinik naapertuutsitsisunik umiarsuarni ikummatissanik atuinikkut annikillisaatinut taakkununnga angusarineqarsinnaasimasunut minnerpaamik assingusunik SO_x-mik aniatitsinerni annikillisaatinik angusaqartuassapput.

  Imm. 3.  Aniatitsinernut annikillisaatitut periutsit piumasaqaatit ilanngussaq 1-imi nalunaarsugaasunik najoqqutarisassat malittarissavaat.

  Stk. 4.  Ilanngussaq 2-mut naapertuuttumik aniatitsinermi nalingit imminnut naligiissut aalajangerneqassapput.

 

Ikummatissatut uuliamut orsersuutissamik pilersuinermut allakkiaq

 

  § 5.  Ikummatissatut uuliamik pilersuisartut umiarsuarnut 400-t sinnerlugit bruttotonnagelinnut ikummatissatut uuliamik pilersuinerminni orsersuutissamik pilersuinermut allakkiamik makku paasissutissiissutigalugit tunniussaqassapput:

1)  Umiarsuup tigusisussap taaguutaa aamma IMO-nr.

2)  Umiarsualivik imaluunniit sumiiffik alla ikummatissamik uuliamik tunniussiviusussaq.

3)  Tunniussinerup aallartinneranut ulloq.

4)  Ikummatissatut uuliamik pilersuisup aqqa, najugaa aamma oqarasuaataata normua.

5)  Tunisassiap taaguutaa(-ai).

6)  Tonsinngorlugu annertussutsit (tonsit metriskiusut).

7)  15°C, kg/m3 angunerani oqimaassusia.

8)  Svovlimik akoqarnera (% m/m).

  Imm. 2.  Ikummatissatut uuliamut orsersuutissamik pilersuinermut allakkiaq aamma uppernarsaammik imaqassaaq ikummatissatut uuliamik pilersuisup imaluunniit taassuma sinniisaata atsiugaanik, tassanilu uppernarsarneqassaaq ikummatissatut uuliap tunniunneqartup MARPOL-imi isumaqatigiissummi ilanngussaq VI-mi, maleruagassap 18.3-p eqquutsinneqarnera, aammalu ikummatissatut uuliap tunniunneqartup tullinnguuttuni killigititatut naleqassutsinik sorlernik eqquutitsinera allattorneqassalluni:

1)  MARPOL-imi isumaqatigiissummi ilanngussaq VI-mi, maleruagassami 14.1-imi killigititatut naleqassutsimik allattorneqartoq.

2)  MARPOL-imi isumaqatigiissummi ilanngussaq VI-mi, maleruagassami 14.4-mi killigititatut naleqassutsimik allattorneqartoq.

3)  Tigusisup killigititatut naleqassutsimut nassuiaatigisaa ikummatissatut uuliamik pilersuisup sinniisaanit immersorneqartoq aamma tigusisup ikummatissatut uuliap MARPOL-imi isumaqatigiissummi ilanngussaq VI, maleruagassaq 4 malillugu allamut akulerullugu atornissaanik nalunaarutigisaa tunngavigalugu, imaluunniit MARPOL-imi isumaqatigiissummi ilanngussaq VI, maleruagassaq 3.2 tunngavigalugu immikkut akuersissuteqarnermut ilaatinneqartoq.

  Imm. 3.  Ikummatissatut uuliamik pilersuisup qulakkiissavaa ikummatissatut uuliamut orsersuutissamik pilersuinermut allakkiap ikummatissatut uuliamut tunniunneqartumut takussutaasinnaasumik MARPOL tunngavigalugu misiligutissamik ilaqartinnissaa. Misiligutissaq naqissuserneqassaaq pilersuisumit imaluunniit taassuma sinniisuanit kiisalu umiarsuup naalagaanit, imaluunniit orsersuinermik suliap naammassinerani orsersuinermut akisussaasumit inummit atsiorneqassalluni.

  Imm. 4.  Orsersuutissamik pilersuinermut allakkiaq umiarsuup uuliamik tunniussiffiusup iluani toqqortarineqassaaq, sumiiffimmi qaqugukkulluunniit nakkutilliinermi imaaliallaannaq tiguneqarsinnaasumi. Taanna ikummatissatut uuliap pilersuutiginerata kingornatigut ukiuni pingasuni toqqortarineqassaaq.

  Imm. 5.  Ikummatissatut uuliamut takussutaasinnaasumik MARPOL tunngavigalugu misiligutissatut tigusaq ikummatissatut uuliap nungullugu atornerata tungaanut umiarsuarmi toqqortarineqassaaq, taamaattorli pilersuinerup kingornatigut minnerpaamik qaammatini aqqaneq-marlunni.

  Imm. 6.  Orsersuutissamik pilersuinermut allakkiap assinganik ikummatissatut uuliamik pilersuisoq minnerpaamik ukiuni pingasuni toqqortaqassaaq.

  Imm. 7.  Imm. 3-mi aamma 5-imi malittarisassiat umiarsuarnut, taamaallaat Kalaallit Nunaata imaani angalasunut atuutissanngillat.

 

Misiligutissanik tigusisarnermut piumasaqaatit

 

  § 6.  Umiarsuit 400-t sinnerlugit bruttotonnagellit misiligutissanik tigusisarfimmik ataatsimik arlalinnilluunniit aaqqissuussisimassapput imaluunniit toqqagaqarlutik, taamaaliornikkut atorneqartumik misiligutissanik takussutaasinnaasumik tigusoqarsinnaanngorlugu, IMO-llu umiarsuarni ikummatissatut uuliami svovleqassutsimik misiligutinut uppernarsaatissanut maleruaqqusai qaqugukkulluunniit atuuttut malinneqartassapput.

  Imm. 2.  Umiarsuarni 400-t sinnerlugit bruttotonnagelinni, apriilip aallaqqaataa 2022 sioqqullugu sananeqartuni, misiligutissatut tigusisarfiit imm. 1-imi taaneqartut kingusinnerpaamik umiarsuup nutarteriffiusumik nakkutilliiffigineqarnerani tulliuttumi aaqqissugaasimassapput imaluunniit toqqarneqarsimassallutik MARPOL-imi isumaqatigiissummi ilanngussaq VI-mi, maleruagassaq 5.1.2 naapertorlugu.

  Imm. 3. Imm. 1 aamma 2 ikummatissatut uuliamut ikummatissamut systeminut, inuit imaani isumannaatsuunissaat pillugu nunani tamalaani isumaqatigiissut, 1974 (SOLAS 74) naapertorlugu, akuerineqartumit appasinnerusumik ikikkartarfilinnut atuutissanngillat.

 

Najoqqutassanut tunngasuunngitsumik ikummatissatut uuliamut tunngatillugu nalunaaruteqarnissamut pisussaaffeqarneq

 

  § 7.  Umiarsuup angallaviata iluani najoqqutassanut tunngasumik ikummatissatut uuliamik pisiaqarnissap pisinnaasimanngiffiani tamatuminnga umiarsuarmut akisussaasoq Kalaallit Nunaanni oqartussaasunut nalunaarutiginnissaaq.

 

Kapitali 3

Issittup imartaanni ikummatissatut uuliamik oqimaatsumik atuillunilu assartuinermut inerteqqutit

 

  § 8.  Issittup imartaanni umiarsuarni ikummatissatut uuliamik oqimaatsumik atugaqarnissaq inerteqqutaavoq.

  Imm. 2.  Umiarsuarmi pineqartumi uuliamik issittup imartaanni ikummatissatut atugaqarnissaq siunertarineqassappat umiarsuarnut ikummatissatut uuliamik oqimaatsumik assartugaqarnissaq inerteqqutaavoq.

  Imm. 3.  Issittup imartaanni angalaneq sioqqullugu umiarsuit siusinnerusukkut ikummatissatut uuliamik oqimaatsumik atuisimasut imaluunniit assartugaqarsimasut tamakku kinnganerinik imaqarsinnaasunik tankinik aamma ruujorinik saliinissamut imaluunniit errortuinissamut pisussaaffeqartitaanngillat.

  Imm. 4.  Umiarsuit isumannaallisarnerisa qulakkeernerini, imaluunniit ujaasillunilu annaassiniarnerni, imaluunniit uuliakoornermik upalungaarsimanermut atugaasuni ilaasunut imm. 1-imi aamma 2-mi inerteqqutit atuutinngillat.

 

Kapitali 4

 

VOC-mik aqutsinissamut pilersaarutit

 

  § 9.  Umiarsuit uuliamik assartuutit, uuliamik akuiagaanngitsumik assartuisut tamarmik umiarsuup naalagaaffimmi nalunaarsugaaffiani eqqortumik oqartussaasumik akuerisaasumik VOC-mik aqutsinissamut pilersaarummik umiarsuarmiititaqassapput. Pilersaarutit IMO-mi aalajangersakkami MEPC. 185(59)3-mi piumasaqaatit naapertuutsissavaat.

  Imm. 2.  VOC-mik aqutsinissamut pilersaarut minnerpaamik:

1)  usilersornermi, angalanermi usingiarnermilu VOC-mik aniatitat killilersornissaannut tunngasunik allakkatigut ingerlatsinissanik imaqassaaq,

2)  tankimik saliinerup nalaani VOC-mik aniatitanik ilassutitut pinngortunik sianiginnissaaq,

3)  pilersaarutip piviusunngortinnissaanut akisussaasumik inummik toqqaassaaq, aamma

4)  umiarsuarni nunani tamalaani angalaartuni umiarsuup naalagaata aquttuatalu oqaatsitut atugaanni allassimassaaq, aammalu oqaatsitut atugaat tassaanngippata tuluttut, franskisut imaluunniit spaniamiutut, oqaatsit pingasut taakku arlaannut nutsigaasumik ilaqassaaq.

  Imm. 3.  Imm. 1 aamma 2 taamatuttaaq umiarsuarnut uuliamik assartuutinut gassimik assartugaqartunut atuutissaaq, usilersornermut toqqorterinermullu aaqqiissutit atorneqartut taakku umiarsuarmi metanitaqanngitsumik VOC-mik isumannaallisaanermut tunngatillugu toqqortaqarsinnaatitsissappata, imaluunniit tamatuminnga nunamut uterteqqitsisinnaassappata.

 

Kapitali 5

Allaffissornikkut aalajangersakkat

 

Nakkutilliineq

 

  § 10.  Nalunaarummi matumani aalajangersakkat malittarinerinik nakkutilliineq, ilanngullugit misiligutissanik tigusaqarneq aamma misissuiartorneq naalagaaffigisap imaata killeqarfianut tunngatillugu imaani avatangiisit illersorneqarnissaat pillugu Inatsisartut inatsisaanni nakkutilliinissamut malittarisassiat, aammalu nunami naalagaaffigisap killeqarfianut tunngatillugu avatangiisit innarlitsaaliorneqarnissaannik Inatsisartut inatsisaanni nakkutilliinissamut malittarisassiat malillugit suliarineqassapput.

  Imm. 2.  Ikummatissatut uuliamit misiligutissatut tigusisarnerit naammaginartumik akuttussusilimmik, annertussutsinik naammaginartunik aammalu misiligutissatut tigusat ikummatissamut uuliamut misissorneqartumut aamma ikummatissatut uuliamut umiarsuarnit imartani umiarsualivinnilu attuumassuteqartuni atorneqartumut takussutaalluassapput.

  Imm. 3.  Misiligutissanik tigusinermi, misissueqqissaarnermi nakkutilliinermilu periutsit makku atorneqassapput:

1)  MARPOL tunngavigalugu misiligutissanik tigusineq kingornatigullu ikummatissatut uuliap svovleqassusianik misissueqqissaarneq. Misiligutissanik tigusinerit MARPOL-imi isumaqatigiissummut ilanngussami VI-mi, maleruagassaq 18.8.1-imi malittarisassat naapertorlugit ingerlanneqassapput.

2)  Ikummatissatut uuliap svovleqassusianik misissueqqissaarnissamut atorneqartumit misiligutissamik tigusineq. Misiligutissanik tigusinerit IMO-p kaajallaasitaani MEPC.1/Circ.864/Rev.1-imi maajip 21-ani 2019-imeersumi malittarisassiat naapertorlugit ingerlanneqassapput.

3)  Ikummatissatut uuliap svovleqassusianik misissueqqissaarnissamut atugassanik umiarsuarmiittunik misiligutissatut tigusanik misiligutissanik tigusineq. Misiligutissatut tigusat IMO-p kaajallaasitaani MEPC.1/Circ.889-imi decembarip 7-iani 2020-meersumi malittarisassiat naapertorlugit ingerlanneqassapput.

4)  Umiarsuup ingerlarnanik nalunaarsuiffimmik allaffeqarfimmit aamma ikummatissatut uuliamut orsersuutissamik pilersuinermut allakkianit aalajangersarneqartumit nakkutilliineq.

  Imm. 4.  Avatangiisinut Aqutsisoqarfiup imm. 3-mi periutsit taaneqartut saniatigut misiligutissanik tigusinermi, misissueqqissaarnermi nakkutilliinermilu periutsit allat tapertatut atorsinnaavai.

 

  § 11.  Nalunaarummi matumani aalajangersarneqartutut ikummatissatut uuliamut piumasaqaatinik umiarsuaq malittarinnissanngippat Naalakkersuisup Avatangiisinut suliassaqarfimmut akisussaasup umiarsuarmut akisussaasumut makku saqqummiunneqarnissaannik piumasaqaateqarfigisinnaavaa:

1)  piumasaqaatinik malittarinninniarnissamut suliarisanut aalajangiussanut tamakkununnga ataatsimut isiginniffissaq saqqummiutissagaa, aamma

2)  umiarsuup angalanissaanut pilersaarut malillugu nalunaarummi matumani piumasaqaatinik piviusunngortitsisutut ikummatissatut uuliamik taassuma pisiariniarsarisimaneranut  uppernarsaammik saqqummiussissasoq, aammalu tamatuma pilersaarutigisatut pissarsiarineqarsinnaanngiffiani ikummatissatut uuliamut taama ittumut allatut qinigassanik najoqqutassaqarfigisanik nassaarniarnermik misiliisoqarsimanera, aammalu nalunaarummi matumani piumasaqaatinik piviusunngortitsisunik ikummatissatut uuliap nassaariniarneranut annertuumik iliuuseqartoqaraluartoq taamatut ittumik ikummatissatut uuliamik pisiaqarnissamut periarfissaqarsimanera.

  Imm. 2.  Imm. 1-imi taaneqartutut ilisimatitsissutaasukkut najoqqutassat malillugit ikummatissatut uuliamik pisiaqarnissamik periarfissaqarsimannginnermik naammaginartumik uppernarsaasoqarneranik Naalakkersuisoq Avatangiisinut suliassaqarfimmut akisussaasuusoq isumaqassappat § 3, imm. 1-imi piumasaqaataasoq atuutissanngilaq.

 

Umiarsuit unitsitaaneri

 

  § 12. Pissutsit nalunaarummi matumani piumasaqaatinik naapertuutsinneqalernissaasa tungaannut § 3-mi akuerineqartumut naleqqiullugu umiarsuarnik ikummatissatut uuliamik annertunerusumik svovlitannik atuisunik nunat tamalaani inatsisaasut malitsigisaannik killiliissutit tamakku ilaliullugit Naalakkersuisoq Avatangiisinut suliassaqarfimmut akisussaasuusoq unitsitsisinnaavoq.

  Imm. 2.  Umiarsuit, § 3-mi akuerineqartunut naleqqiullugit orsersuutissamik pilersuinermik allakkiaq malillugu ikummatissatut uulianik annertunerusumik svovlitalinnik atugaqartut nunani tamalaani inatsisaasut malitsigisaannik killiliissutit tamakku ilaliullugit malittarisassianut tamakkununnga malittarinnittumik pissutsit iluarsineqarnissaasa tungaannut unitsinneqarsinnaapput.

  Imm. 3.  Imm. 2 malillugu umiarsuup unitsitaasinnaanera pillugu nalilersuinermi ilaatigut pissutsit tullinnguuttut ilaatinneqarsinnaapput:

1)  Nalunaarummi matumani piumasaqaatinut suliarisat isumagineqartut naapertuussinnaanerinik umiarsuarmut akisussaasoq uppernarsaateqarsinnaanersoq.

2)  Umiarsuup aqqutaata iluani najoqqutassat malillugit ikummatissatut uuliap pisiariniarsimaneranik, tamatumalu pisinnaasimannginneranik umiarsuarmut akisussaasoq uppernarsaateqarsinnaanersoq, ilanngullugu umiarsuup aqqutaata iluani tamanna pissarsiarineqarsinnaanngimmat najoqqutassat malillugit ikummatissatut uuliamik pisiaqarnissap periarfissaasimannginnera pillugu umiarsuarmut akisussaasoq oqartussaasunut nalunaaruteqarsimanersoq.

 

Kapitali 6

 

Pineqaatissiissutit pillugit aalajangersakkat

 

  § 13.  Akileeqqusissummik pineqaatissiisoqarsinnaavoq, tassunga:

1)  § 3, imm. 1-imi imaluunniit 3-mi piumasaqaatinut akerliusumik ikummatissatut uuliamik atuisumut,

2)  orsersuutissamik pilersuinermut allakkiamik tunniussaqanngitsumut, imaluunniit allakkiami paasissutissanik eqqortuunngitsunik tunisisumut, tak. § 5, imm. 1 aamma 2,

3)  orsersuutissamik pilersuinermut allakkiap MARPOL tunngavigalugu misiligutissamik takussutaasinnaasumik naqissusikkamik atsiukkamillu ilaqartinnissaanik qulakkeerinninngitsumut, tak. § 5, imm. 3,

4)  § 5, imm. 4-6 malillugit orsersuutissamik pilersuinermut allakkiamik, taassuma assilineranik, imaluunniit takussutissatut misiligummik toqqortaqanngitsumut,

5)  § 7 malillugu nalunaarummik tunniussaqanngitsumut,

6)  § 8, imm. 1-imut imaluunniit 2-mut akerliusunik ikummatissatut uulianik oqimaatsunik atuilluniluunniit assartuisumut,

7)  § 14, imm. 4 malillugu immikkut akuersissummi piumasaqaatinik unioqqutitsisumut, imaluunniit

8)  § 9-mi piumasaqaatigineqartutut VOC-mut aqutsinissamut pilersaarummik akuerisamik pigisaqanngitsumut.

 

Kapitali 7

Atuutilersitsinermut ikaarsaarnermullu aalajangersakkat

 

  § 14.  Nalunaarut ulloq 1. maj 2025 atuutilerpoq, takukkilli imm. 2 aamma 3.

  Imm. 2.  Nalunaarummi §§ 3-7 aamma § 9 1. juuli 2025-mi atuutilissapput.

  Imm. 3.  Umiarsuarnut MARPOL-imi isumaqatigiimmi ilanngussaq I-imi, maleruagassaq 12A-mi, imaluunniit Issittumi kodep immikkoortuani II-A-mi, kapitali 1, maleruagassaq 1.2.1-imi ikummatissanut tankit illersugaanissaannut piumasaqaatinik naammassinnittunut, nalunaarummi § 8 aatsaat atuutilissaaq 1. juuli 2029-mit.

  Imm. 4.  Naalakkersuisoq Avatangiisinut suliassaqarfimmut akisussaasuusoq § 8, imm. 1-imi aamma 2-mi inerteqquteqarnernut piffissami killiligaasumi immikkut akuersinermik nalunaaruteqarsinnaavoq. Immikkut akuersissutit taamaallaat piffissami 30. juuni 2029-p tungaanut nalunaarutigineqarsinnaapput, umiarsuarnut Kalaallit Nunaanni, Savalimmiuni imaluunniit Danmarkimi angerlarsimaffeqartunut taamaallaat nalunaarutigineqarsinnaapput, IMO-llu taamatut immikkut akuersissutinik suliaqartarnermut malittarisassiai malinneqassapput. Qinnuteqartup umiarsuup ingerlaarfigisassaanut killeqarfiup aningaasaqarnikkut akisussaaffeqarfiusup iluani issittup imartai ilaappata, Danmarkimi oqartussaasunut suliassaqarfimmut akisussaasunut tusarniaasoqassaaq, immikkut akuersissummik nalunaaruteqartoqannginnerani.

 

  Imm. 5.  Imm. 4 malillugu immikkut akuersissummik nalunaaruteqartoqassappat Danmarkimi oqartussaasut suliassaqarfimmut akisussaasut tamanna pillugu ilisimatinneqassapput IMO-mut nalunaarutigineqarnissaa siunertaralugu.

 

 

Namminersorlutik Oqartussat, ulloq 28. April 2025

 

Bentiaraq Ottosen (atsior.)

Isumaginninnermut, Suliffeqarnermut, Nunamullu Namminermut Avatangiisinullu Naalakkersuisoq

 

 

 

/ Natuk Lund Meire (atsior.)