Aalisarneq pillugu Inatsisartut inatsisaanni nr. 29, 23. maj 2024-meersumi § 5, imm. 3, § 14, imm. 1, § 15, § 46 aamma § 68 imm. 2 aamma imm. 3 naapertorlugit imatut aalajangersaasoqarpoq:

  

Kapitali 1

Atuuffissaa nassuiaatillu

 

Atuuffii

 

  § 1.  Nalunaarut aalisariutinut Kalaallit Nunaanni nalunaarsorneqartunut inuussutissarsiutigalugu aalisartartunut atuuppoq.

  Imm. 2.  Allamik immikkut isumaqatigiissuteqartoqarsimatinnagu nalunaarut aammattaaq angallatit nunanit allameersut imaluunniit nunami allamiut angallataannik inuussutissarsiutigalugu aalisarnermi, imartani Kalaallit Nunaata aalisarnikkut oqartussaaffigisaani kiisalu nunami allamiut angallataannut Kalaallit Nunaata aalisarnikkut oqartussaaffigisaata avataani kalaallit pisassaannik aalisartunut atuuppoq.

 

Nassuiaatit il. il.

 

  § 2.  Nalunaarummi matumani uku ima paasineqassapput:

1)  "Aalisarneq pillugu inatsit": Aalisarneq pillugu Inatsisartut inatsisaat nr. 29, 23. maj 2024-meersoq.

2)  ”Tunngaviusumik titarneq”: Tunngaviusumik titarnerit Kunngip peqqussutai naapertorlugit Kalaallit Nunaata imartaata killeqarfianik qaqugukkulluunniit atuuttutut aalajangersarneqartut.

3)  "Kitaa": NAFO-p imartaata ilaa 1, Kalaallit Nunaata aalisarnikkut oqartussaaffianiittoq.

4)  "Tunu": ICES-ip imartaasa II-p, V-p, XII-p aamma XIV-p ilaat Kalaallit Nunaata aalisarnikkut oqartussaaffigisaaniittut.

5)  "Atortut immap naqqatigoortut": Nalinginnaasumik aalisarnermi atortut immap naqqanut tuttartut imaluunniit tussinnaasut.

6)  ”Aalisarnermi atortut uninngasut”: Aalisarnermut atortut suulluunniit, atorneqarneranni immakkut ingerlatittariaqanngitsut, matumani ilanngullugit qassutit takisuut puttaquteerallit (hildingsgarn), qassutit nigartakinnerit kivisittakkat (indfiltringsnet), qassutit nivinngartakkat (toggegarn), qassutit kivisittakkat, bundgarnit, ningittakkat, immap naqqaniittunut pullatit aamma pullatit.

7)  ”Aalisarnermi atortut kalinneqarsinnaasut”: Aalisarnermi atortut suulluunniit atorneqarneranni immakkut kalinneqartariaqartut, pingaartumik atortut kalinneqarsinnaasut, atortut sanianniittut, qalorsuit, qalorsuit kaajallakkiartortitat atortullu kalinneqarsinnaasut assigisaat.

8)  ”Disko-karsi: Aqutsiveqarfik avannarpasissuseq 68º00’N aamma avannarpasissuseq 70º45’N-p akornanniittoq, kippasissuseq 56º00’V-p aamma kangimut tunngaviusumik killeqarfimmit killeqartinneqartoq, tak. ilanngussaq 1.

9)  ”Sisimiut-karsi”: Aqutsiveqarfik avannarpasissuseq 66º00’N aamma avannarpasissuseq 67º00’N akornanniittoq, tunngaviusumik titarneq atuaqqissaarlugu kimmut 6 sømilinik ungasissuseqartumut tunngaviusumillu titarnerup kangianut killeqartinneqartoq, tak. ilanngussaq 1.

10)  ”PNNP-mik aaqqissuussaq”: aqutsiveqarfiusoq aalisarnermut inatsimmi kapitali 7-imi pineqartoq.

11)  ”Aqutsiveqarfik 47”: Imartaq Kalaallit Nunaata kitaani tunngaviusumik killeqarfiup tungaanut 3 sømilit iluaniittoq, kujammut avannarpasissuseq 68º30’ N-mi avannamullu avannarpasissuseq 75º00’ N-mi, taakkualu kangerluttaanni killeqartinneqartoq (Qeqertarsuup Tunua kiisalu Uummannap eqqaa aamma Upernaviup eqqaa).

12)  "A.t.t": angallatip tamakkiisumik takissusaa, angallatip siorpiaata nuaanit aqorpiaanut qeqqa atuarlugu, tukimut, uuttortarneqartoq (angallatip tamakkiisumik takissusaa).

13)  ”KANUAPNA”: Kalaallit Nunaanni Aalisarnermut Piniarnermullu Nakkutilliisoqarfik.

  Imm. 2.  Tamatuma saniatigut nalunaarummi nassuiaatinut oqariartaatsit atorneqartut atuupput, aalisarnermut inatsimmi atuarneqarsinnaasut.

  Imm. 3.  Aalisarnernut pingaaruteqarnerpaanut aqutsiveqarfiit attuumassutillit aalisarsinnaanermut akuersissutit pisassiissutillu pillugit nalunaarummi qaqugukkulluunniit atuuttumi takuneqarsinnaapput.

  Imm. 4. Nalunaarummi sumiiffiit taaneqartut WGS84 naapertorlugu nalunaarsorneqarput, imartat assinginut Kalaallit Nunaannut atuuttunut iluarsiissutinik iluarsisarlugit.

  Imm. 5. Nalunaarummi uani angallatip angissusaanik aalajangersakkat tassaapput angallatip uuttuutaanut uppernarsaammi uuttuut allassimasoq, uuttueriaatsit pillugit maleruagassat sorliit angissusaanut uuttuummik atulersitsinermut tunngaviliisuusimanersut apeqqutaatinnagit.

  Imm. 6.  Nalunaarummi uani nigartaqqortussuseq najoqqutarineqartoq tassaavoq nigartap tamakkerluni iluatungimigut nerutussusiata uuttuutaa, taamaattorli saattuanut pullatit nigartaasa angissusaat uuttorneqassapput nigartat affaannut uuttortartarlugit. Qalorsuit nigartaqqortussusii qalorsuit ilaannut tamanut atuupput.

  Imm. 7.  Nigartat angissusii nalunaarutip uuma ilanngussartaani 2-mi allassimasutut aalajangersarneqarput.

 

Kapitali 2

Nunap immikkoortuini killeqarfiit

 

Aalisarnerup sinerissamut killinga

 

  § 3.  Nalunaarummi matumani allamik allassimasoqanngippat Tunumi kitaanilu sineriak Kalaallit Nunaata kitaata sineriaani aamma Tunup sineriaani killeqartinneqarpoq.

 

Aqutsiveqarfik sineriaap aamma tunngaviusumik killeqarfimmit 3 sømilit akornanniippoq

 

  § 4.  Aqutsiveqarfimmi sinerissap tunngaviusumillu titarnerup 3 sømilit akornanni angallatinit 17 meterit a.t.t. imaluunniit 120 BT annerilluunniit aalisaqqusaanngillat, taamaattoq imm. 3 takuuk.

  Imm. 2.  Imm. 1-imi aqutsiveqarfinni inerteqquteqarneq aamma ungusiniutit qalorsuilluunniit atorlugit qaleralinniarnermi, saarullinniarnermi, suluppaagarniarnermi, nataarnarniarnermi qeerarniarnermilu angallatinut tamanut atuuppoq.

  Imm. 3.  Imm. 1-imi inerteqqummit ilaatinneqanngitsut tassaapput:

1)  Raajarniarneq, tak. § 5.

2)  Uiluinniarneq, tak. § 8, imm. 1.

3)  Saattuarniarneq, angallatinut, uuttuutinut allagartaat naapertorlugit 24 meterinik tamakkiisumik takissusilinnut imaluunniit 120 BT ataalluguluunniit usisinnaassusilinnut atuulluni.

 

Raajarniarneq immikkut pillugu

 

  § 5.  Tunngaviusumik titarnermit 3 sømilit iluanni, Sisimiut karsimi aamma Qeqertarsuup Tunuani karsimi aalisariutit 40 meterit sinnerlugit tamakkiisumik takissusillit imaluunniit 1.000 BT sinnerlugit usisinnaassusillit raajarniaqqusaanngillat, taamaattorli imm. 3 takuuk.

  Imm. 2.  Imm. 1-imi sumiissutsit taaneqartut iluini raajartat angallammi tunisassiareqqusaanngillat, nunamulli tunisassiorfimmi suliareqqitassanngorlugit tulaanneqassapput, taamaattorli tak. imm. 4.

  Imm. 3.  Ingerlataqartunut, nalunaarutip atuutilersinneqarnissaanut angallateqartunut imm. 1 naapertorlugu aalisarfiusinnaasutut taasanut aalisarsinnaanermut akuersissuteqarsimasut, taamaattorli taaneqartutut piumasaqaatinik naammassinninngitsut, angallammik taassuminnga atuillutik suli sumiiffimmi aalisarnissamut akuersissummik tunineqarnermikkut akuerineqassapput. Ingerlataqartup angallatini taarsissappagu imaluunniit piffissap ilaani akuersissutini angallammut attuumassuteqartinngippagu, akuersissut annaaneqassaaq. 

  Imm. 4.  Ingerlataqartunut, nalunaarutip atuutilernissaata tungaanut aalisariummi Qeqertarsuup Tunuani pisaminnik tunisassiorsinnaanermik akuersissuteqarsimasut, angallammik taassuminnga atuillutik suli sumiiffimmi aalisarnissamut akuersissummik tunineqarnermikkut akuerineqassapput. Ingerlataqartup angallatini taarsissappagu imaluunniit piffissap ilaani akuersissutini angallammut attuumassuteqartinngippagu, akuersissut annaaneqassaaq.

 

Qaleralinniarneq immikkut pillugu

 

  § 6.  Aqutsiveqarfimmi 47-mi angallatit 15 meterinit a.t.t.-imit anginerit qaleralinniaqqusaanngillat. Angallatilli 31,99 BT-mit minnerusut ukiup pisassiissuteqarfiusup siuliani aqutsiveqarfimmi aalisarsinnaanermut akuersissutaateqarsimasut aqutsiveqarfimmi 47-mi aalisarsinnaanermut akuersissutinik suli tunineqartassapput.

  Imm. 2.  Kitaani avannarpasissuseq 64°30'N-p aamma avannarpasissuseq 68°N-p akornanni qalorsuarnik qaleralinniarneq inerteqqutaavoq.

 

Saattuarniarneq immikkut pillugu

 

  § 7.  Kitaani avannarpasissuseq 66º00’N-p avannaani inuussutissarsiutigalugu saattuarniarneq januaarip aallaqqaataanit marsip 31-at ilanngullugu matoqqasarpoq.

 

Uiluinniarneq immikkut pillugu

 

  § 8.  Inuussutissarsiutigalugu uiluinniarneq angallatit angissusaat apeqqutaatinnagu, sinerissap titarnerullu imartami sinerissap tunngaviusumillu titarnerup aalisarnikkut oqartussaaffiup akornata killingata 3 sømilip avataani aamma aalisarnikkut oqartussaaffiup tunngaviusumik titarnermiit naatsorsorlugu 3 sømilip avataani aalisarfimmi aalisarsinnaapput.

  Imm 2.  Uillut il.il pillugit Kalaallit Nunaannut nalunaarut kingornalu allannguuteqartinneqartoq naapertorlugu uiluinnik misiligutinik tigusani nassiunneqartunilu uiluiit toqunartoqartut Inuussutissalerinermit Aqutsisoqarfimmit paasineqarpat Aalisarnermut Piniarnermullu Naalakkersuisoq sumiiffimmik uiluinniarfiusumik tamakkiisumik ilaannakortumilluunniit matusisinnaavoq.

  Imm. 3.  Aalisarnermut Piniarnermullu Naalakkersuisup sumiiffik uiluinniarfiusoq tamakkiisumik ilaannakortumilluunniit ammaqqissinnaavaa Inuussutissalerinermit Aqutsisoqarfiup sumiiffik ammaqippagu, uillut il.il pillugit Kalaallit Nunaannut nalunaarut kingorna allanngortinneqartoq takuuk.

 

Kapitali 3

Piffissanik killilersuineq

 

Nipisanniarneq immikkut pillugu

 

  § 9.  Aalisarnermut Piniarnermullu Naalakkersuisoq ukiut tamaasa nipisannik arnarlunniarnermut piffissamik aalisarfiusussamik, qaammatit ullui malillugit sivisunerpaamik ullunik 60-inik sivisussuseqarsinnaasumik aalajangersaasassaaq. Piffissaq aalisarfiusoq aqutsiveqarfikkaartumik aalajangersarneqartarpoq kiisalu najukkani tunisassiorfiit aalisarnermullu peqatigiiffiit sinniisuutitaannik isumasiorneqareertarlutik.  Aalajangersimasumik piffissaliussap avataatigut nipisanniarneq inerteqqutaavoq.

  Imm. 2.  Imm. 1 naapertorlugu aalisarneq taamaallaat apriilip aallaqqaataaniit juulip 16-iat ilanngullugu pisinnaavoq.

  Imm. 3.  Imm. 1 naapertorlugu piffissaliunneqartumi aalajangersimasumik piffissaliilluni nipisannik angusallunniarneq taamaallaat akuerisaavoq piffissami arnarlunniarfiusup nalaani, kiisalu januaarip 31-annit marsip 31-annut.

  Imm. 4.  Aalisarnermut Piniarnermullu Naalakkersuisoq suliaqartunut ataasiakkaanut piffissaliussanit siusinnerusumik nipisanniarnissamut immikkut akuersissuteqarnermik nalunaaruteqarsinnaavoq aalisarnerup ammaannissaanut tunngaviit misissorniarlugit.

 

Kapisilinniarneq immikkut pillugu

 

  § 10. Naalakkersuisut najukkami aalisartut peqatigiiffii isumasioreerlugit inuussutissarsiutigalugu kapisilinniarluni aalisarnerup aallartinnissaata ullua aalajangertassavaat. Ulloq aallartiffissaq aamma pisassiissutinik aalajangersaaneq kiisalu piumasaqaatit www.naalakkersuisut.gl-imi saqqummiunneqassapput pisortatigoortumillu nalunaarutigineqassallutik.

  Imm. 2.  Imm. 1-imi ulloq taaneqartoq sioqqullugu kapisilinniarluni aalisarneq aallartinneqaqqussaanngilaq.

  Imm. 3.  Kapisilittassiissutit aalajangikkat tamakkerlugit pisarineqarnissaat qanillippat, Aalisarnermut Piniarnermullu Naalakkersuisup pisortatigoortumik inuussutissarsiutigalugu kapisilinniarneq kiisalu taamatut aalisarnermit pisanik pisineq aamma tunisineq qaqugu unissanersoq nalunaarutigissavai. Aalisarunnaarnissaq sioqqullugu atortut qaqinneqassapput.

  Imm. 4.  Imm. 3-mi ullup taaneqartup kingorna kapisilinniarluni aalisarneq inerteqqutaavoq.

 

Kapitali 4

Atortunik killilersuineq

 

Aalajangersakkat nalinginnaasut

 

  § 11.  Aalisaatit ningissimanerini sila apeqqutaatillugu pisat ajoqusertinniarnagit akulikitsumik napitaajarneqartassapput.

  Imm. 2.  Aalisaatit ima ninginneqassapput, kangillersimanernut, kangerliumanernut, ikerasannut kuuilli sioraannut il.il. assersuissanatik, kiisalu aalisaatit allunaasalluunniit imaluunniit atortulersuutit allat, aalisaatinut atasut, isumannaatsumik imaatigut sumiissusersiorluni avaqqunnissaannut pisinnaassallutik.

 

Imartat uumasoqassutsimikkut navianartorsiorsinnaasut

 

  § 12.  Naalakkersuisut imaani sumiiffiit uumasoqatigiinnik mianernartunik uumaffiusutut isigineqartut immap naqqatigut kilisaffigineqarnissaannut imaluunniit immap naqqanut attuuttartunik allanik atortoqarluni aalisarfigineqarnissaannut matussallugit aalajangersinnaavaat.

  Imm. 2.  Naalakkersuisut sumiiffiit matuneqartut pillugit imm. 1 naapertorlugu pisortatigoortumik tamanut nalunaaruteqassapput. Angallatinut nunani EU-mi ilaasortaasuni nalunaarsorneqarsimasunut nalunaarut EU-kommissionimut, kalaallillu angallatiginngisaannut allanut nunat ataasiakkaat aalisarnermik oqartussaasuinut nassiunneqassaaq.

 

  § 13.  Aalisarnermut atortunik immap naqqatigoortittakkanik aalisarneq sumiiffinni ukunani inerteqqutaavoq:

1)  Kalaallit Nunaata kitaani sinerissamit avannarpasissuseq 64°10'N aamma avannarpasissuseq 65°15'N aamma sinerissamit tunngaviusumik titarnermiit 3 sømilimik avasinnerusup akornanni.

2)  Kalaallit Nunaata kitaani avannarpasissuseq 62º13,8’N aamma kippasissuseq 50º29,0’V aamma tunngaviusumik titarnerup kangiata tungaanut avannarpasissuseq 62º44,0’N aamma kippasissuseq 50º38,7’V, ilanngussaq 3 takuuk.

3)  Kalaallit Nunaata kitaani avannarpasissuseq 60º22,9’N aamma kippasissuseq 48º25,5’V, avannaarpasissuseq 60º22,1’N aamma kippasissuseq 48º24,9’V, avannarpasissuseq 60º21,3’N aamma kippasissuseq 48º25,9’V kiisalu avannarpasissuseq 60º22,1N aamma kippasissuseq 48º29,6V.

4)  Kalaallit Nunaata kitaani ilanngussami 4-mi immikkoortut aappaluttumik ilisarnaatillit.

  Imm. 2.  Kalittakkanik ningittakkanillu immap naqqanut attuuttartunik kitaani Toqqusap ikkannerata kitaatungaani ilanngussaq 5 naapertorlugu aalisarneq inerteqqutaavoq.

 

Qassutit aamma nigartoqqussutsit

 

  § 14.  Nigartat saneraat sisamat tamarmik takeqqatigiilluinnartut assigiimmik atortoqarluni qilernernik sisamanik aalajangikkat taamaallaat atorneqaqqusaapput. Uanili pineqanngilaq ammassanniarnermi nigartat (arfinilinnik nalinginnaasumik takeqqatigiinnik) teqeqqullit, arfinilinnik aalajangersimasumik katiguffilerlugit qilertallit nigartaliornermi atortut assinginik atortoqarluni nigartaliarineqartartut atorneqarsinnaapput.

 

  § 15.  Aalisakkanik imm. 2-miit 8-mut taaneqanngitsunik aalisarnermi nigartaqqortussutsimut 140 mm-it minnerpaaffissatut atuupput.

  Imm. 2.  Qalorsuarsorluni aalisarnermi qassutini nigartat minnerpaaffissaattut uku atuupput:

1)  raajat: 40 mm.

2)  eqalukkat, putooruttoq, ammassat aamma qaleruaqanngitsut: 16 mm.

3)  ammassassuaq aamma avaleraasartooq: 32 mm

4)  saarullernaq: 35 mm.

  Imm. 3.  Qalorsuarsorluni qaleralinniarnermi qassutit isaruisa ataanni nigartat minnerpaaffissaattut 100 mm. atuupput. Qalorsuit sinnerini tamani nigartat minnerpaaffissaat qassutini 140 mm.-iussallutik

  Imm. 4.  Qalorsuarsorluni ikerinnarsiutinik suluppaagarniarnermi qassutit isaruisa ataanni nigartat minnerpaaffissaattut 100 mm. atuupput.

  Imm. 5.  Qassutit atorlugit aalisarnermi qassutini nigartat minnerpaaffissaattut uku atuupput:

1)  nipisa: 260 mm.

2)  eqaluk: 100 mm.

3)  qaleralik: 190 mm.

4)  saarullik: 160 mm.

  Imm. 6.  Saattuarniarnermi pullatit taamaallaat atorneqartassapput. Pullatini affarmik nigartanut nigartat minnerpaaffissaat tassaavoq 70 mm.

  Imm. 7.  Uiluinnik aalisarnermi/katersinermi nigartat atorneqartut qitermikkut sanimut napillugit minnerpaamik 80 mm.-erinik takissuseqassapput.

  Imm. 8. Atortut imm. 1-miit 8-imut naapertorlugit atorneqartunit nigartakinnerusut angallammiitinneqassanngillat, qajannaarlugit aalajangerneqarsimanngikkunik imatullu ittujaarneqarsimanngikkunik, ajornanngitsumik tigullugit imaaliinnarlugit atorneqarsinnaassanatik.

  Imm. 9.  Imm. 1-imit imm. 8-imut taaneqartunik atortunik allanik, nigartat angissusiinik allaanernik aalisaatinik atuineq inerteqqutaavoq.

 

Sumiiffiit nutaat

 

  § 16.  Aalisarnerit tamarmik kitaani imartami 74°N-p avannaani 66°V-illu kitaani Tunullu imartaani 71°N-p Avannaani immap naqqatigut aalisarnermut atortut atorlugit aalisarnerit tamarmik sumiiffinni nutaani aalisarnertut isigineqassapput.

  Imm. 2.  Imm. 1 naapertorlugu sumiiffinni nutaani aalisarnermi Aalisarnermut Piniarnermullu Naalakkersuisoq ingerlatsisumut immikkut piumasaqaatinik, tassunga ilanngullugu immikkut nalunaaruteqarnissamut aamma nakkutilliisumik ilaasoqarnissamut assigisaanilluunniit piumasaqaatinik pisussaaffiliisinnaavoq.

 

Atortut qassutinut aalajangikkat

 

  § 17.  Raajarniarnermi immikkoortiterissutit atorneqassapput annerpaamillu paakkarutai 22 mm-inik akuttussuseqassallutik. Immikkoortiterissutit aalajangersimasumik iluseqassapput sananeqaataallu allanngujaatsuussalluni aamma ima ikkunneqassallutik aalisakkanik saniatigut pisanik sapinngisamik pitsaanerpaamik immikkoortiterisoqarsinnaanngorlugit. Immikkoortiterissutini paakkarutit akuttussusissaat nalunaarummut matumunnga ilanngussami 2-imi taaneqartutut uuttortarneqassapput.

  Imm. 2.  Nigartaqqortussutsit pillugit § 15-imi aalajangersakkat apeqqutaatinnagit atortulersuutit imm. 5-imiit 7-imut taaneqartut qalorsuit qulaatungaannut taamatuttaaq ataatungaannut ikkunneqarsinnaapput nungullarsaaneq annikillilerniarlugu imaluunniit qalorsuit ninngunerulersinniarlugit.

  Imm. 3.  Raajanut qalorsuit assakaasorsuinik nikittartunik minnerpaamik 72 cm-inik kalunnernik nivingatalinnik ikkussiffigineqarsimassapput. Assakaasorsuit aalajangikkat inerteqqutaapput.

  Imm. 4.  Raajanik kilisannermi qalorsuit eqqarsaatigalugit bobbins-inik atuineq inerteqqutigineqarpoq. Taamaattoq ajornartitaanngilaq qalorsuit ammanerisa saneraanni assakaasorsuarnik nikerarsinnaasunik sisannillu ujarattalinnik (stålbobbin) atuinermik aallarniinissaq naggasiinissarlu, soorlu aamma ajornartitaanngitsoq assakaasorsuit akorngini takissutsini tamani ujarattamik sisammik (stålbobbin) ataatsimik ikkussisarnissaq. Ujarattat sisaat ikkutat qitermikkut sanimut napillugit silissutsimikkut uuttuutaat assakaasorsuit ikkutat qeqqatigut tukimut uuttuutai assigissavaat. Affarmik ulamertat gummimik sanaat siakkilinut svirvilinullu illersuutit atorneqarsinnaapput.

  Imm. 5.  Atortup affaani kingullermi qalussianik qajannaallisaatinik (yderpose) ataasiinnavinnik ikkussinissaq akuerisaavoq. Qalussiat qajannaallisaatit nigartaat minnerpaamik (aqajaruani ilorliup) nigartaannit marloriaammik angissuseqassapput. Qalussiat qajannaallisaatit kaajallallugit nigartussusiat aqajaruata ilorliup kaajallallugu nigartussusianit annerussaaq.

  Imm. 6.  Marlunnik arlalinnilluunniit qalunik qaloortartunik atuilluni aalisarnermi akorni sullekluppiussaaq immap naqqani ingerlasartumik.

  Imm. 7.  Atortut suugaluartulluunniit tingerlaatissiaq, allungiartorfissiat, qalussiat qalorsuit ataannut affaannut kingullermut ikkunneqarsinnaapput qalorsuit ataanni nungullarnaveeqqutitut akuerisaapput. Nungullarnaveeqqutit sukkulluunniit qalorsuit kaajallallugit 50 procentiat sinnerlugu qallersimassanngilaat.

  Imm. 8.  Qalorsuit immikkoortiterisinnaassusiat pitsaanerulersinniarlugu kittorartoornissarlu pinaveersaartinniarlugu qalorsuarnut kipparissunik (sisamanik teqeqqulinnik) illersuutinik ikkussisinnaaneq akuerisaavoq aalisarnermut pineqartumut nigartakinnerpaatut atuuttup assinganik nigartaqqortussuserlugit, tak. § 15. Qalorsuarnut illersuutit imatut ikkunneqassapput qalorsuit sinnerini allani immikkoortitserisinnaassuseq annikillisinneqassanani.

 

  § 18.  Qalorsuarnik saarullinniarnermi aalisakkanilluunniit assigisaannik kilisannermi saniatigullu pisaqannginnissaq anguniarlugu aalisakkallu mikivallaat immikkoortiterniarlugit nigartat T90-it, ilanngussaq 2 takuuk, imaluunniit aalisarnermi pineqartumi minnerpaamik nigartaqqortussusiisa assinginik nigartallit, § 15 takuuk, atorneqarsinnaapput. T90-ini qassutit ikkussat ima ikkunneqassapput qalorsuit sinnerini saniatigut pisaqarsinnaanerat millisinnagu.

  Imm. 2.  Qalorsuarnik ikerinnarsiutinik aalisarnermi rundstroppit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 40 procentiannit naannerunngitsut atorneqarsinnaapput (nigartat amerlassusaasa nigartussutsimik amerlisarlugu uuttuutigineqassaaq). Rundstroppit taamaattut akornanni akuttussuseq minnerpaamik 1 meteriussaaq. Rundstroppit taamatullu qalussiat qajannaallisaatit (aqajarua qalleq) ataatsikkut atorneqarpata rundstroppit aqajaruanut ilorlermut taamaallaat ikkuteqqasarsinnaapput. Rundstroppit qajannaallisaatitut qalorsuit ilaannut atorneqartut qalorsuit kaajallallugit 60 procentiannit naannerit atorneqartillugit nigartaqqortussutsimut 140 mm-inik minnerpaaffeqarnissaat piumasaqaataavoq.

 

  § 19.  Atortussiat atortullu §§ 17-imi aamma 18-imi taaneqanngitsut kilisannermi atorneqaqqusaanngillat.

 

Katersiviit angallatillu uumatitsiviit atorneri immikkut pillugit

 

  § 20.  Aalisakkanut katersivinnik atuineq uumasunut illersorneqarsinnaasumik atorneqassapput. Taamaalilluni aalisartup:

1)  aalisaatit qajassuussisut taamaallaat atussavai,

2)  uumatitsiviit aalisakkap qasuersersinnaanissaa ajornaquteqanngitsumillu aalasinnaanissaat qulakkeerlugu angissusilissavai ilusilerlugillu,

3)  uumatitsiviit mingutsitsinngitsumut inississavai, taamaalilluni atugarliortitsineq pitsaaliorneqarluni,

4)  aalisakkat uumatitsivimmiitinneri sivisoorsuunnginnissaat kiisalu pisariaqanngitsumik amerlasoorujussuanngortinnginnissaat qulakkiissavai, taamaalillutik pisariaqanngitsumik sanigorserneri ajoqusiinerillu pitsaaliorlugit

5)  bundgarninit uumatitsivinnut aalisakkat nuunneri ima sukkassuseqassasut, aalisakkat naqitsinermut nalimmassarnissaminnut periarfissinneqartassallutik,

6)  atugarliortoqartillugu tisanissaat, nerisinnissaat imaluunniit uumatitsivimmit anisinnissaat qulakkiissavai aamma

7)  aalisakkanik uumatitsivimmi 30.000 kg-nit oqimaannerit ullormut takusartarlugit.

  Imm. 2. Uumatitsiviit kuuffissuit kuuffiannut, akuutissanik mingutsitsiviusunut, silaannartaqarpianngitsunut uuliamilluunniit mingutsitsiffiusumut inissinneqassanngillat.

  Imm. 3.  Angallatinik uumatitsivinnik atuineq uumasut illersorniarlugit inissinneqassapput aamma pumpit ima iluseqartinneqassallutik aalisakkanik nuussinerit ajoqusiinani pisinnaassallutik.

  Imm. 4.  Angallatinik uumatitsivinnik atuisut qaqugukkulluunniit nakkutilliisunut ilisimatitsissutigisassavaat sumi inissinneqarsimaneri katersivinnullu uumatitsiviit piginnittui imaarsinissamik isumaqatigiissuteqarsimasut pillugit.

 

  § 21.  Qaartartut, aallaasit kaattallu naqitsinermik kaattaalluni atorneqartartut allallu anaartaatit kiisalu akuutissat toqunartullit, ilisimajunnaarsitsisartut arrortitsisartullu aalisarnermi atoqqusaanngillat. 

  Imm. 2.  Qupinnguallatsitsissummik atortulerluni aalisarneq immikkut ittumik Naalakkersuisunit akuerineqarsimatinnani atoqqusaanngillat.

  Imm. 3.  Qassutit tissukartittakkat atorneqarnissaat inerteqqutaavoq.

 

Atortut aalajangersimasut atorneqaqqusaanngitsut

 

  § 22.  Atortut pisanik angallammiit toqqaannartumik eqqaanermut atorneqarsinnaasut inerteqqutaapput.

  Imm. 2.  Qalorsuarsorluni raajarniarnermi aalisakkanik niuernermi soqutiginaateqarsinnaasunik igitsinissamut immikkut akuersissuteqartoqarsimatillugu, saniatigut pisat suuneri amerlassusiilu nalunaarsorneqassapput iginneqartinnagillu umiarsuup allattaaviinut allanneqassallutik.

  Imm. 3.  Aalisagaajaavittut tankiniit kuuffiit svejserlugit aalajangikkanik immikkoortiteriveqassapput annerpaamik 10 mm-tut akuttussusilinnik paakkarutitalinnik annerpaamilluunniit 15 mm-tut kaajallallugu angitigisunik putulinnik.

  Imm. 4.  Angallammi imermik immikkoortiterummi ungalut akuttussusiat annerpaamik 10 mm-iussaaq. Ungalut aalajangerlugit svejserneqassapput. Imermik immikkoortiterummi putut atorneqarpata, qeqqaniit sanimut uuttuutaa annerpaamik 10 mm-erioqqusaapput. Imermik immikkoortiterutini sliskini putut annerpaamik qeqqaniit sanimut 15 mm-ioqqusaapput.

  Imm. 5.  Angallammi pisat angissusaannut immikkoortiterivimmik atortoqarneq inerteqqutaavoq.

 

  § 23.  Angallatit pisaqareernermi kinguninnguatigut pisaminnik qerititsisartut § 22, imm. 5-imi inerteqqummit ilaatinneqanngillat. Pisat angissutsinut immikkoortereernerisa kinguninnguatigut erniinnaq qeritinneqassapput.

  Imm. 2.  Aserorterummik pisanik agguisinnaasumik sequtsereqqissaarsinnaasumilluunniit atuineq inerteqqutaavoq. Angallatit aalisakkanit qajuusaasianik tunisassiorsinnaasut, tankip uninngatitsiviup aalisakkanillu qajuusaasiorfiup akornanni ikkutamik aserorterummik atuisinnaapput.

  Imm. 3.  Aalisakkanit qajuusiat pisanit suliareqqiinermi peerneqartunit imaluunniit pisatut akornutilittut angallammi tunisassiarineqanngitsut suliarineqanngitsutulluunniit atorlugit taamaallaat tunisassiarineqarsinnaapput.

 

Aalisarnermut atortunik nalunaaqutsersuineq

 

  § 24.  Aalisarnermi atortut uumatitsiviillu piginnittup aqqanik najugaanik oqarasuaataatalu normuanik imaluunniit angallatip aqqanik ilisarnaataanillu nalunaaqutsersimassapput.  Nalunaaquttat imaassapput:

1)  atortut masammit arrortinneqarsinnaassanngillat,

2)  qassutini kivisittakkani nalunaaqutsiussat qimiaanut aalajangerneqassapput,

3)  ningittakkanut nalunaaqutsiussat ningittakkanut namminernut aalajangerneqassapput,

4)  qalorsuit pingaarnertut allunaasamut aalajangerneqassapput, aamma

5)  immap naqqanut tutsittakkat aamma pullatit nalunaaqutaat atortup sinaakkutaanut qullermut aalajangerneqassapput.

  Imm. 2.  Atortut imm. 1 naapertorlugu nalunaaqutsersorneqarsimanngitsut, angallammi uninngatinneqaratillu imaluunniit assartorneqaqqusaanngillat.

  Imm. 3.  Atortut uninngatittakkat tamarmik atorneqarnerminni imm. 1-mi paasissutissat allassimasut naapertorlugit puttaqutimikkut nalunaaqutsersorneqartassapput.

  Imm. 4.  Puttaqutit immikkut imm. 1-mi allassimasut naapertorlugit nalunaaqutsersorneqassapput.

  Imm. 5.  Kalaallit Nunaata aalisarnikkut oqartussaaffigisaani tunngaviusumik titarnermiit 3 sømilip iluani aalisarnermi, aalisarnermi atortut uninngasut ilanngussami 6-mi aalajangersarneqartutut nalunaaqutserneqarsimassapput.

  Imm. 6.  Kalaallit Nunaata aalisarnikkut oqartussaaffigisaani tunngaviusumik titarnermiit 3 sømilip avataani aalisarnermi, aalisarnermi atortut uninngasut ilanngussami 7-mi aalajangersarneqartutut nalunaaqutserneqarsimassapput.

 

Nipimik kalerrisaarutit (pingerit)

 

  § 25.  Bundgarninik saarullinniarnermi bundgarnit nipimik kalerrisaarusersorneqarsimassapput (pingerilersorneqarsimassapput).

 

Aalisarnermik atortut annaasat qimaannakkallu

 

  § 26.  Aalisarneq unitsinneqarpat aalisartup atortuni tamaasa qanoq ikkaluarpataluunniit erngerluni qaqissavai.

 

  § 27.  Angallatit aalisarnermi atortunik annaasanik qaqitsinermut atorneqarsinnaasunik qaqugukkulluunniit nassartassapput.

  Imm. 2. Angallatip aquttuata aalisarnermik atortumik aalisarnermiluunniit atortut ilaannik annaasaqartup sapinngisamik piaarnerpaamik atortut qaqinnissaat misilissavaa.

  Imm. 3.  Atortut ilassimasut nammineq sakkut kipinerisigut avissaartinneqassapput.

 

  § 28.  Aquttup atortut annaasat pillugit nalunaaquttap akunneri 24-t iluanni KANUAPNA ukuninnga nalunaarfigissavaa: 

1)  Angallatip aqqa radiukkullu attaveqartilluni ilisarnaataa.

2)  Aalisarnermi atortut annaaneqartut suussusaat.

3)  Aalisarnermi atortut annaaneqartut amerlassusaat imaluunniit annertussusaat.

4)  Annaasaqarneq ulloq aamma nalunaaqutaq qassinut pisimanersoq.

5)  Sumiiffik atortunik annaasaqarfiusoq.

6)  Iliuutsit atortunik qaqitsiniarnermi iliuuserineqarsimasut.

  Imm. 2.  Kingorna aalisarnermut atortut taakkuluunniit ilaat qaqinneqarpata, aalisartulluunniit allap aalisarnermut atortut nalunaaqutserneqanngitsut qimaannakkat qaqippagit, qaqinnerannit nalunaaquttap akunnerisa 24-t iluanni tullinnguuttut KANUAPNA-mut nalunaarutigineqassapput:

1)  Angallatip atortumik qaqitsisup aqqa radiukkullu attaveqartilluni ilisarnaataa.

2)  Angallatip atortunik annaasaqartup aqqa radiukkullu ilisarnaataa.

3)  Atortut qaqinneqartut suuneri.

4)  Atortut qaqinneqartut amerlassusaat annertussusaalluunniit.

5)  Atortunik qaqinneqarnerini ulloq aamma nalunaaqutaq.

6)  Sumiiffik atortunik qaqitsiviusoq.

  Imm. 3.  Atortunik annaasaqarnermi aalisarnermik nakkutilliisut, naalagaaffik sinerialik attuumassuteqartoq imaluunniit Nunap Immikkoortortaani Aqutsiveqarfik nalunaarfigisinnaavaat.

  Imm. 4.  Tunngaviusumik titarnermiit 3 sømilit iluanni atortut annaasat, annaasaqarfimmi tunitsiviusoq aqqutigalugu KANUAPNA-mut nalunaarutigineqassapput.

 

  § 29.  Aalisarnermut atortut aalisarnerup unitsinneqarnerata kingorna piaartumik qaqinneqanngitsut oqartussanit qaqinneqarsinnaapput. Piginnittup akiligaanik qaqitsisoqassaaq.

  Imm. 2.  Qassutit aalisarnerup unitsinneqarnerata kingorna qaammatip ulluisa ullut arfineq-marluk kingorna qaqinneqarnikuunngitsut qassutinik uninngatitsiinnartoq kinaassusersineqarsinnaanngippat inunnit namminerisamik qaqinneqarsinnaapput tigummiinnarneqarlutillu.

 

Qaleralinniarneq immikkut pillugu

 

  § 30.  Sinerissap qanittuani qassutinik qalorsuarnilluunniit qaleralinniarneq inerteqqutaavoq.

  Imm. 2.  Kommunalbestyrelsit piginnaatinneqarput imm. 1-imi inerteqqut apeqqutaatinnagu qaleralinniarluni qassutinik qalunillu aalisarnissamut kommunimi ileqqoreqqusaliornissaminnut. Taamatut akuersissuteqarneq piffissamik nunallu immikkoortuanik killeqartinneqassaaq.

  Imm. 3.  Aalisarnermut Piniarnermullu Naalakkersuisoq qassusersorluni aalisarneq imm. 2 naapertorlugu inerteqqutaanngitsoq pillugu killilersuinermik aalajangersaaffigisinnaavaa, matumanilu piffissami aalisarnerup unitsinnera. Taamatut aalajangiinermi pisassiissutit piffissami tassani atuuttut immikkut isiginiarneqassapput kiisalu pisat pitsaassusiisa qulakkeernissaat isiginiarneqassalluni.

 

  § 31.  Qaleralinniarnermi atortoq atortunut allanut minnerpaamik 50 meterinik ungasissusilerlugu inissinneqassaaq.

 

Saattuarniarneq immikkut pillugu

 

  § 32.  Ilanngussaq 8 naapertorlugu pullatit tamarmik allunaasaaqqamik arrortinneqarsinnaasumik qimaaffissiartalersorneqassapput.

 

  § 33.  Pullatit aalisarnermi atorneqartinnatik immamiisinneqaqqussaanngillat.

 

  § 34.  Pullatini kalunnermi ataatsimi ataatsikkut amerlanerpaamik pullatit 100-sinnaapput.

 

Kapisilinniarneq immikkut pillugu

 

  § 35.  Taamaallaat akkersamik qassutinilluunniit kapisilinniartoqaqqusaavoq.

  Imm. 2.  Kapisilinniarnermi qassutit imaassapput:

1)  qassutit kalunnerinut ataatsimut qilerneqarsimasuni amerlanerpaamik qassutit tallimat atorneqaqqusaapput,

2)  nigartat angissusaat minnerpaamik 140 mm-iussapput,

3)  qassutit kalunnerisa akuttussusaat minnerpaamik 30 meteriussapput, aamma

4)  qassutit kuullu akua tininnerpaaffiani minnerpaamik 500 meterimik ungasitsigisumiissapput.

 

  § 36.  Naalakkersuisut Kapisillit kuuannit ukiut tamaasa kapisilittassiissutinik ullormillu aalisalerneqarfissaannik aalajangersaasarput.

  Imm. 2.  Kapisillit kuuanni taamaallaat nammineq atugassanik aalisartoqartassaaq. Aalisarnermi aalisarsinnaanermut akuersissut qinnuteqartoqarnera naapertorlugu Aalisarnermut Piniarnermullu Naalakkersuisoqarfimmit tunniunneqartartoq piumasaqaataavoq.

  Imm. 3.  Imm. 2 naapertorlugu aalisarsinnaanermut akuersissut qinnuteqartunut piumasaqaatinik makkuninnga naammassinnittunut tunniunneqarsinnaavoq:

1)  Aalisarneq pillugu inatsimmi inuussutissarsiutiginagu aalisarsinnaanermut piumasaqaat.

2)  Aalisartup ukiumut akuersissuteqarfiusumut nalunaartussaatitaanini naammassisimassavaa ukiup tullianut akuersissummik qinnuteqarnini tunniutsinnagu. Taama pisoqarsimanngippat akuersissut itigartitsissutigineqarsinnaavoq.

Imm. 4.  Naalakkersuisut pisortatigoortumik aalisarnerup qaqugu unitsinnissaa pillugu nalunaaruteqassapput. Tamatuma kingorna Naalakkersuisut aalisarneq tamarmi aalisarnertut pissasoq aalajangersinnaapput, tassani aalisagaq pisarineqarnermi kingorna avalatseqqinneqartassasoq (catch-and-release) aalisakkat avalatseqqinneqartut pillugit nalunaaruteqartussaatitaanertalerlugu.

  Imm. 5.  Aalisarnerup aallartinnginneranit siusinnerusumi aalisarneq inerteqqutaavoq, tak. imm. 1. Aalisarnerup unitsinnerata kingorna aalisarneq inerteqqutaavoq, tak. imm. 4.

 

  § 37.  Kapisillit kuuata akuanit 1000 meterinit qaninnerusumut qassuserneq inerteqqutaavoq.

  Imm. 2.  Kapisillit kuuata akuanit 50 meterinit qaninnerusumi aalisaatit suulluunniit atorlugit aalisarneq inerteqqutaavoq, qissattaat kisiat atorlugu aalisartoqaqqusaalluni.

  Imm. 3.  Kuummi aamma tatsini tassunga atasuni taamaallaat qissattaammik oqummersartalimmik aalisartoqaqqusaavoq.

 

Kapitali 6

Nalunaarutit

 

  § 38. Pissutsit nalunaarummut uunga tunngasut pillugit nalunaarutit Aalisarnermut Piniarnermullu Naalakkersuisoqarfimmit pisortatigoortumik aamma Naalakkersuisut nittartagaatigut nalunaarutigineqassapput.

  Imm. 2.  Nipisanniarneq pillugu piffissaliineq pillugu nalunaaruteqartoqassaaq aqutsiveqarfimmi pineqartumi nipisanniarnerup aallartinnginnerani kingusinnerpaamik sapaatip akunnera ataaseq sioqqullugu.

 

Kapitali 7

Pineqaatissiissutit

 

  § 39.  Aalajangersakkanik ukuninnga § 4 imm. 1-2, § 5, imm. 1-2, §§ 6 – 7, § 9, imm. 1 aamma imm. 3, § 10, imm. 2 aamma imm. 4, § 11, §§ 13 - 15, §§ 17 - 27, § 28, imm. 1-2 aamma imm. 4, § 30, imm. 1, §§ 31 - 35, § 36, imm. 2 aamma imm. 5 aamma § 37 unioqqutitsineq Kalaallit Nunaanni pinerluttulerinermi inatsimmi malittarisassat naapertorlugit akiliisitsinermik kinguneqarsinnaapput.

  Imm. 2.  Malitassanut, peqqussutinut, immikkut akuersissuteqarnernut il.il. § 8, imm. 2, § 9, imm. 4, § 12, imm. 1, § 16, imm. 2 kiisalu § 30, imm. 2 aamma imm. 3 naapertorlugit atuutilersinneqartunut Kalaallit Nunaanni Pinerluttulerinermut inatsimmi malittarisassat naapertorlugit akiliisitsissutinik pineqaatissiissuteqarnissaq aalajangersarneqarsinnaavoq.

  Imm. 3.  Aalisarneq pillugu inatsit imaluunniit matumani peqqussutit naapertorlugu aalajangersarneqartut akileeqqusissummik aalajangersaanissamik tunngavissaqartitsippata, akileeqqusissut Kalaallit Nunaanni Pinerluttulerinermut inatsimmi malittarisassat naapertorlugit inatsisitigut pisussaatitaasoq akileeqqusissummik pisussaaffilerneqarsinnaavoq.

  Imm. 4.  Imm. 1-3 naapertorlugit suliat siullertut qullersamut Kalaallit Nunaanni Eqqartuussivimmut suliassanngortinneqassapput. 

  Imm. 5.  Akiliisitsissutit imm. 1-3 naapertorlugit aalajangersarneqartut Nunatta Karsianut pisassanngortinneqassapput.

 

Kapitali 8

Atuutilersitsinermut atorunnaarsitsinermullu aalajangersakkat

 

  § 40.  Nalunaarut apriilip aallaqqaataa 2025-mi atuutilissaaq.

  Imm. 2.  §25-mi taaneqartutut nipimik kalerrisaarusersuinissamut atuinissamut pisussaaffiliineq taamaattoq aatsaat januaarip aallaqqaataani 2026-miit atuuttussanngortinneqarput.

  Imm. 3.  Peqatigisaanik atorunnaarsinneqarpoq:

1)  Piujuartitsineq siunertaralugu aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaat nr. 4, 30. marts 2017-imeersoq,

2)  Imartani Kalaallit Nunaata aalisarnikkut oqartussaaffigisaani raajarniarneq pillugu Namminersornerullutik Oqartussat nalunaarutaat nr. 23, 29. august 2002-meersoq

 

 

Namminersorlutik Oqartussat, ulloq 6. februaari 2025

 

 

Kim Kielsen

Aalisarnermut Piniarnermullu Naalakkersuisoq

 

 

/ Emanuel Rosing