§ 1.  Sulinermi avatangiisinut suleqatigiinnermullu ataatsimiititaliaq pillugu kaajallaasitami Naalakkersuisut allaffeqarfiani atorfillit tamarmik pineqarput. 

  Imm. 2.  Qitiusumik Allaffeqarfimmi sulinermi avatangiisinut suleqatigiinnermullu suleqatigiissitaq aqutsisut sulisullu akornanni suleqatigiinnerup sapinngisamik pitsaasuunissaanik qulakkeerinninniassaaq. 

 Imm. 3.  Qitiusumik Allaffeqarfimmi sulinermi avatangiisinut suleqatigiinnermullu aqutsisut pingaarnertut akisussaasuupput. 

  § 2.  Sulinermi avatangiisinut suleqatigiinnermullu suleqatigiissitami suliffimmi sulisoqarnikkullu pissutsit aqutsisut pisinnaatitaaffianniittut suleqatigiissutigissavaat. 

  Imm. 2.  Pissutsit ataatsimoorussamik isumaqatigiissutitigut malittarisassaqartinneqartut, tassunga ilanngullugit akissarsiatigut atorfeqartitaanikkullu atugassarititat, sulinermi avatangiisinut suleqatigiinnermullu suliniaqatigiiffimmut attuumassuteqanngillat. 

  § 3.  Sammisat suliffimmi sulisoqarnikkullu pissutsinut attuumassutillit suliffeqarfimmut pingaarutillit Sulinermi avatangiisinut suleqatigiinnermullu aaqqissuussamit isumagineqassapput. Taakku assersuutigalugu tassaasinnaapput: 

a) Sulisoqarnermut politikkit aamma suliffimmi illutigut atortutigullu avatangiisit, 

b) Suleqatigiinneq nalerisimaarnerlu, tassunga ilanngullugu suliamut ilisimasatigut pitsaassutsimullu tunngaviit kiisalu sulinermi tarnikkut avatangiisit, aamma 

c) Suliffimmi naleqqussaaneq, tassunga ilanngullugu pisariillisaaniarluni suliniutit. 

  Imm. 2.  Sulinermi avatangiisinut suleqatigiinnermullu suleqatigiissitaq suliffeqarfiup anguniagai periusissaalu pillugit oqallinnernut peqataatinneqassaaq. 

 

 

  § 4.  Qitiusumik Allaffeqarfimmi sulinermi avatangiisinut suleqatigiinnermullu aaqqissuussamiipput: 

a) Sulinermi avatangiisinut suleqatigiinnermullu qitiusumik ataatsimiititaliaq (SASQA) aamma 

b) Sumiiffimmi sulinermi avatangiisinut suleqatigiinnermullu ataatsimiititaliat (SASSA) 

  Imm. 2.  Sulinermi avatangiisinut suleqatigiinnermullu aaqqissugaq Kalaallit Nunaanni sulinermi avatangiisit pillugit inatsimmik nalunaarut naapertorlugu aaqqissugaavoq. 

Sulinermi avatangiisinut suleqatigiinnermullu qitiusumik ataatsimiititaliaq (SASQA)

  § 5.  Sulinermi avatangiisinut suleqatigiinnermullu qitiusumik ataatsimiititaliamiipput (SASQA-mi) sulisunut sinniisut sisamaniit arfinillinnik aqutsisunullu sinniisut pingasuniit tallimanik amerlassusillit. 

  Imm. 2.  Aqutsisut sinniisaat sulisut sinniisaannit amerlaneroqqusaanngillat. 

  Imm. 3.  Naalakkersuisut Siulittaasuata Naalakkersuisoqarfiani pisortaq SASQA-mi siulittaasussatut inisseqqareerpoq. Aallartitaqartoqarsinnaanngilaq. 

  Imm. 4.  SASQA-mi sulisunut sinniisut SASQA-mi siulittaasup tullersortissaa akunnerminni toqqassavaat. 

  Imm. 5.  SASQA-mi ilaasortat allat kapitali 3 naapertorlugu toqqarneqassapput. 

  Imm. 6.  SASQA-mi siulittaasup aqutsisunut sinniisut akornanni marluk siuliani taaneqartut saniatigut Kalaallit Nunaanni sulinermi avatangiisit pillugit inatsimmik nalunaarut naapertorlugu suliffimmi avatangiisinut akisussaaffimmik piginnaatitaaffinnillu isumaginnittussat toqqassavai. 

  Imm. 7.  SASQA-mi sulisunut sinniisut marluk immikkoortuni ataasiakkaani sulinermi avatangiisinut sinniisunit Kalaallit Nunaanni sulinermi avatangiisit pillugit inatsimmik nalunaarut naapertorlugu toqqarneqassapput. 

  Imm. 8.   Siulittaasoq SASQA-mut allatsissamik allaffissornermut tunngasunik, soorlu ataatsimiinnermut qaaqqusinermik imaqarniliornermik il.il. suliaqartussamik toqqaassaaq. 

  Imm. 9. Aningaasartuutit SASQA-mi sulinermut attuumassutillit Naalakkersuisut Siulittaasuata Naalakkersuisoqarfianit taassumaluunniit aalajangigaa malillugu akilerneqassapput. 

  § 6.  SASQA-p pissutsit, kapitali 1 takuuk, Qitiusumik Allaffeqarfimmi sulinermi sulisoqarnikkullu pissutsinut nalinginnaasunut pingaaruteqarpata isumagissavai. 

  Imm. 2.  SASQA ukununnga tunngasuni peqataatinneqassaaq: 

a) Sulisoqarnermut politikkinik najoqqutassanillu Qitiusumik Allaffeqarfimmut tamarmut atuuttussanik suliaqarnermi, 

b) Naleqqussaanermik suliniutit, aamma 

c) Qitiusumik Allaffeqarfimmi suliffeqarfinnik nalilersuinerit (APV). 

  Imm. 3.  SASQA Qitiusumik Allaffeqarfimmut tamarmut atuuttussamik suliffeqarfimmi sulisoqarnikkullu tunngasunik suliaqartussamik piffissami killiligaasumi ataatsimiititaliamik pilersitsinissamik aalajangersinnaavoq. 

  Imm. 4.   Sulisoqarnermut politikkit najoqqutassallu Qitiusumik Allaffeqarfimmut tamarmut atuuttut SASQA-p peqataatinneratigut naalakkersuisoqarfinni pisortaqatigiinnit aalajangerneqassapput, §6, imm. 2 takuuk.

  § 7. SASQA ukiumut minnerpaamik sisamariarluni ataatsimiittassaaq. Ullut ataatsimiiffiusussat qaammatisiutit aallartinnginneranni sapinngisamik ukiut ataasiakkaarlugit aalajangersarneqassapput imaqarnilianullu allallugit. Imaqarniliat ataatsimiinnerit ingerlanneqarnerannut atatillugu Nanuaqqamut toqqorneqartassapput. 

  Imm. 2.  Siulittaasoq siulittaasullu tullersortaa SASQA-mi ulluinnarni aqutsinermut ataatsimiititaliatut atuutissapput suliallu kinguartinneqarsinnaanngitsut aalajangiiffigisassallugit. Siulittaasup siulittaasullu tullersortaata tamanna immikkut pisariaqartinneqarpat sivikinnerusumik piffissaliilluni SASQA ataatsimiigiaqqusinnaavaat. 

  Imm. 3.  Ataatsimiinnerit sulinerup nalaani ingerlanneqartassapput. 

  Imm. 4.  Oqaluuserisassat siulittaasumit siulittaasullu tullersortaanit ataatsimut suliarineqassapput, kingusinnerpaamillu sapaatit akunnerinik marlunnik ataatsimiinneq sioqqullugu nassiunneqassallutik. 

  Imm. 5.  Oqaluuserisassatut siunnersuut ataatsimiinnissaq kingusinnerpaamik sapaatit akunnerinik sisamanik sioqqullugu siulittaasumut, siulittaasup tullersortaanut allatsimulluunniit nassiunneqassapput. Oqaluuserisassatut siunnersuutit, oqallisissatut aalajangiiffigisassatulluunniit allaaserineqarneri ilanngunneqassapput. Oqaluuserisassatut siunnersuutit piumasaqaatinik taakkunannga eqquutsitsinngitsut siulittaasumit siulittaasullu tullersortaanit itigartinneqarsinnaapput. 

  Imm. 6.  SASQA immikkut ilaasortaatitanik ataatsimiinnernut ataasiakkaanut qaaqqusisinnaavoq, oqaluuserisassamut ataatsimut arlalinnulluunniit tunngatillugu tamanna pisariaqartinneqarpat. 

  Imm. 7.  Allatsi ataatsimiinnerup kingorna (kingusinnerpaamik ullut suliffiusut tallimat iluanni) SASQA-mi ilaasortanut tamanut nassiussassamik imaqarniliamut missingiusiussaaq, kingorna ilaasortat imaqarniliamut akerliliissuteqarnissamik ulluni tallimani periarfissaqartassallutik. Akerliliissutini taakkunani pisariallit imaqarniliamut ilanngunneqassapput, kingornalu imaqarniliaq inaarutaasoq akuerineqassalluni. 

  Imm. 8.  Ataatsimiinnermit imaqarniliaq akuerisaq tamanut saqqummiunneqassaaq ataatsimiinnerullu kingorna kingusinnerpaamik sapaatit akunneri suliffiusut pingasut iluanni Sumiiffimmi sulinermi avatangiisinut suleqatigiinnermullu ataatsimiititalianut (SASSA-nut) tamanut nassiunneqassalluni. 

Sulinermi avatangiisinut suleqatigiinnermullu sumiiffimmi ataatsimiititaliat (SASSA)

  § 8.  Naalakkersuisoqarfinni aqutsisoqarfinnilu 35 sinnerlugit sulisulinni ataatsimik arlalinnilluunniit sulinermi avatangiisinut suleqatigiinnermullu sumiiffimmi ataatsimiititalialiortoqassaaq (SASSA-liortoqassaaq). 

  Imm. 2.  Naalakkersuisoqarfinni aqutsisoqarfinnilu illorsuarni assigiinngitsuni siaruarsimasuni ataatsimik arlalinnilluunniit SASSA-liortoqassaaq. 

  Imm. 3.  Aqutsisoqarfimmi sulisut suliffimmi avatangiisinut suleqatigiinnermullu namminneq ataatsimiititaliaqarnissamut ikinnerpaaffissaliussat angumanngippatikkit aqutsisoqarfimmi pisortap SASSA naalakkersuisoqarfiup oqartussaasup SASSA-anut ilanngutissasoq aalajangersinnaavaa. Tamanna naalakkersuisoqarfimmi pisortaq pineqartoq siunersioqatigalugu pissaaq. 

  § 9.  SASSA-mi minnerpaamik sulisunut sinniisut pingasuussapput minnerpaamillu aqutsisunut sinniisut marluussallutik. 

  Imm. 2.  Aqutsisut sinniisaat sulisut sinniisaannit amerlaneroqqusaanngillat. 

  Imm. 3.  Naalakkersuisoqarfiup aqutsisoqarfiulluunniit pisortaa SASSA-mut siulittaasuussaaq. Akisussaaffik allanut tunniunneqarsinnaanngilaq. 

  Imm. 4.  Naalakkersuisoqarfiup aqutsisoqarfiulluunniit pisortaata sulisunut sinniisut amerlassusissaat aalajangissavai. 

  Imm. 5.   SASSA-mi ilaasortat allat kapitali 3 naapertorlugu toqqarneqassapput. 

  Imm. 6. SASSA-mi sulisunut sinniisut SASSA-mi siulersuisup tullersortissaa akunnerminni toqqassavaat. 

  Imm. 7.  Kalaallit Nunaanni sulinermi avatangiisit pillugit inatsimmik nalunaarut naapertorlugu sulinermi avatangiisinut sinniisoq immikkoortortami sulisunit tamanit toqqarneqartoq SASSA-mi ilaasortaasussatut inisseqqareerpoq. 

  Imm. 8.  Siulittaasoq aqutsisunut sinniisut akornanni Kalaallit Nunaanni sulinermi avatangiisit pillugit inatsimmik nalunaarut naapertorlugu sulinermi avatangiisinut aamma akisussaasussamik ataatsimik toqqaassaaq. 

  Imm. 9. Siulittaasoq SASSA-mut allatsissamik allaffissornermut tunngasunik, soorlu ataatsimiinnermut qaaqqusinermik imaqarniliornermik il.il. suliaqartussamik toqqaassaaq. 

  § 10.  SASSA-p §§ 1-3 naapertorlugit pissutsit, naalakkersuisoqarfimmi aqutsisoqarfimmiluunniit suliffimmi sulisoqarnermullu pissutsinut tunngasut isumagissavai. 

  Imm. 2.  SASSA tamatuma saniatigut naalakkersuisoqarfimmut, aqutsisoqarfimmut imaluunniit Qitiusumik Allaffeqarfimmut tamarmut atuuttunik pingaarnertut najoqqutassanik aalajangersaanermi peqataatinneqassaaq, tassunga ilanngullugit: 

a) Sulisoqarnermut politikkinik suliaqarnermi atuutilersinniarnerinilu, 

b) Naleqqussaanermik suliniutit, 

c) Suliffeqarfinnik nalilersuinerit (APV), aamma 

d) Suliffeqarfiup pisatsersornera, tassunga ilanngullugu suliffinnik naleqquttunik timimullu eqqortunik pisatsersuineq. 

e) Atortunik, maskiinanik atortorissaarutinillu naapertuuttumik atuineq, 

  Imm. 3.  SASSA-p pissutsit sulinermi avatangiisit pillugit inatsimmi piumasaqaatinut naapertuunnissaat qulakkiissavai. Imm. 4. SASSA-mi ilaasortat SASSA-mi sulinerminnut atatillugu suliaminnik naammassinninnissaminnut piffissaq pisariaqartitaat tunniunneqassaaq. 

  § 11.  SASSA minnerpaamik qaammatit pingasukkaarlugit ataatsimiittassaaq imaluunniit ataatsimiigiaqqusinissaq siulittaasumit siulittaasulluunniit tullersortaanit pisariaqarsorineqarpat. 

  Imm. 2.  Ataatsimiinnerit sulinerup nalaani ingerlanneqartassapput. 

  Imm. 3.  Oqaluuserisassat siulittaasumit siulittaasullu tullersortaanit ataatsimut suliarineqassapput ataatsimiinnissarlu kingusinnerpaamik sapaatip akunneranik sioqqullugu nassiunneqassallutik. 

  Imm. 4.  Oqaluuserisassani sammisassatut siunnersuutit siulittaasumut, siulittaasup tullersortaanut allatsimulluunniit ataatsimiinnissaq kingusinnerpaamik sapaatit akunnerinik marlunnik sioqqullugu nassiunneqassapput. 

  Imm. 5.  Siulittaasup tullersortaa oqaluuserisassatut immikkoortunut sulisunit ilassutissanik pissarsiniarluni ataatsimiinnissaq sioqqullugu piareersarluni naapinnissamut sulisunik tamanik qaaqqusisinnaavoq. 

  Imm. 6.  Allatsi imaqarniliortorluunniit ataatsimiinnerup kingorna (kingusinnerpaamik ullut suliffiusut tallimat iluanni) ataatsimiititaliami ilaasortanut tamanut nassiussassamik imaqarniliamut missingiusiussaaq, kingorna ilaasortat imaqarniliamut akerliliissuteqarnissamik ulluni tallimani periarfissaqartassallutik. Akerliliissutini taakkunani pisariallit imaqarniliamut ilanngunneqassapput, kingornalu imaqarniliaq inaarutaasoq ataatsimiinnerup tulliani akuerineqassalluni. 

  Imm. 7.  Ataatsimiinnermit imaqarniliaq akuerisaq SASSA-mi isumaqatigiissutigineqartumi tamanut saqqummiunneqassaaq. 

 

 

  § 12.  SASQA-mi ilaasortat 1. aprilimiit 31. martsip tungaanut ukiunut marlunnut qinerneqartassapput. 

  Imm. 2.  Aqutsisunut sinniisut naalakkersuisoqarfinni pisortanit tamanit inassuteqartoqarneratigut naalakkersuisoqarfinni pisortaqatigiinnit toqqarneqassapput. 

  Imm. 3.  Sulisunut sinniisut SASSA-ni sulisunut sinniisut akornanni sulisunullu sinniisunit toqqarneqassapput. Peqatigiiffinnut sulisut sinniisaat sulisunut sinniisitut toqqarneqarsinnaapput. Sulisunut sinniisut sulisunut tamanut sinniisuunissamut pisussaatitaapput suliamut ilisimasaqaqatigiit sorliit pineqarnersut allatulluunniit suliamut attuumassuteqarnerat apeqqutaatinnagit. 

  Imm. 4.  Piffissami qinigaaffiusumi sulisunut sinniisoq atorfimmit soraarpat qinigaaffik atorunnaassaaq imaluunniit sulisunut sinniisoq allamik pissuteqarluni tunuarpat. 

  Imm. 5.  Taamatuttaaq ukiut ataasiakkaarlugit sulisunut sinniisip sinniisissaanik siullermik aappaanillu toqqaasoqassaaq. Sinniisup sulisunut sinniisoq tunuarpat paarlassavaa. 

  Imm. 6.  Sulisunut sinniisimik toqqaaneq SASQA-mi siulittaasup tullersortaanit sulinermi avatangiisit suleqatigiinnerlu pillugit ataatsimeersuarnermi siullermi isumagineqassaaq, § 14 takuuk. 

  Imm. 7.  SASSA-ni sulisunut sinniisut tamarmik sulisunut sinniisinik toqqaanermi taasisinnaatitaapput. 

  Imm. 8.  SASQA-mi sulisunut sinniisut peqatigiiffinnut sulisut sinniisaattut illersorneqassapput.
 

  § 13.  SASSA-ni ilaasortat 1. martsimiit 28. februarimut ukiunut marlunnut toqqarneqartassapput. 

  Imm. 2.  Aqutsisunut sinniisut naalakkersuisoqarfiup pisortaanit aqutsisoqarfiulluunniit pisortaanit toqqarneqassapput. 

  Imm. 3.  Sulisunut sinniisut naalakkersuisoqarfimmi aqutsisoqarfimmilu sulisut akornanni sulisuniillu toqqarneqassapput. Peqatigiiffinnut sulisut sinniisaat sulisunut sinniisitut toqqarneqarsinnaapput. Sulisunut sinniisut sulisunut tamanut sinniisuunissamut pisussaatitaapput suliamut ilisimasaqaqatigiit sorliit pineqarnersut allatulluunniit suliamut attuumassuteqarnerat apeqqutaatinnagit. 

  Imm. 4.  Piffissami qinigaaffiusumi sulisunut sinniisoq atorfimmit soraarpat imaluunniit allamik pissuteqarluni tunuarpat qinigaaffik atorunnaassaaq. 

  Imm. 5.  Taamatuttaaq ukiut ataasiakkaarlugit sulisunut sinniisunut sinniisumik ataatsimik marlunnilluunniit toqqaasoqartassaaq. Sinniisup sulisunut sinniisoq tunuarpat paarlassavaa. 

  Imm. 6.  Sulisunut sinniisimik toqqaaneq SASSA-ni siulittaasup tullersortaanit suliffimmi avatangiisit suleqatigiinnerlu pillugit ataatsimeersuarnermi siullermi isumagineqassaaq, § 18 takuuk. 

  Imm. 7.  SASSA-ni sulisunut sinniisut peqatigiiffinnut sulisut sinniisaattut illersorneqassapput. 

  Imm. 8.  Sulisunut sinniisumik toqqaanermi aqutsisut suliffeqarfimmut toqqaaneq pillugu akerliusinnaatitaapput, tamanna suliffeqarfimmit nalunaarutip tigunerata kingorna sapaatit akunnerit pingasut iluanni pippat. 

 

 

  § 14.  SASSA-ni ilaasortanut ukiumut marloriarluni sulinermi avatangiisit suleqatigiinnerlu pillugit ataatsimeersuarnerit ingerlanneqartassapput. Sulinermi avatangiisit suleqatigiinnerlu pillugit ataatsimeersuarnerit qitiusumik allaffeqarfimmi maannakkut siunissamilu sulisoqarnikkut suliffeqarnikkullu pissutsinik, tassunga ilanngullugu sulinermi avatangiisinik ataatsimut oqalliffiupput. 

  Imm. 2.  SASQA ataatsimeersuarnerit taakkua ingerlannissaannut aamma ullunik oqaluuserisassanillu aalajangersaanissamut akisussaasuuvoq. 

  Imm. 3.  Sulinermi avatangiisit suleqatigiinnerlu pillugit ataatsimeersuarnerit februarimi decemberimilu aamma sapinngisamik sulinerup nalaani ingerlanneqartassapput. 

  Imm. 4.  Sulinermi avatangiisit suleqatigiinnerlu pillugit ataatsimeersuarnermi martsimi oqaluuserisassat minnerpaamik SASQA-mut sulisunut sinniisumik toqqaanissamut immikkoortumik imaqassapput. 

  Imm. 5.  SASSA-mi ilaasortat tamarmik sulinermi avatangiisit suleqatigiinnerlu pillugit ataatsimeersuarnernut qaaqquneqassapput. SASSA-mut ataatsimut minnerpaamik aqutsisunut sinniisoq sulisunullu sinniisoq ataaseq peqataasussaatitaavoq. 

  Imm. 6.  Sivikinnerpaamik siumut qaammammik ataatsimik sioqqutsilluni qaaqqusisoqassaaq, oqaluuserisassat ataatsimeersuarnissaq kingusinnerpaamik sapaatip akunneranik sioqqullugu peqataasussanut nassiunneqartassalluni. 

  Imm. 7.  Ataatsimeersuarnermut atatillugu aningaasartuutit Naalakkersuisut Siulittaasuata Naalakkersuisoqarfianit taassumaluunniit aalajangigaa malillugu akilerneqassapput. 

  Imm. 8.  SASQA immikkut ittumik ataatsimeersuartoqarnissaanut qaaqqusisinnaavoq. 

 

 

  § 15.  Kaajallaasitaq una 25. 06 2025-mi atuutilissaaq. Peqatigisaanik Isumannaallisaanermut suleqatigiinnermullu ataatsimiititaliaq pillugu kaajallaasitaq 5. februar 2021-meersoq atorunnaarsinneqassaaq. 

 

 

 

 

 

Naalakkersuisoqarfimmi pisortaq

 

 

/ Simigaq Broberg