Ilinniartut ineqarfii pillugit Inatsisartut inatsisaanni nr. 42, 12. december 2019-imeersumi § 7 aamma § 8, imm. 5 naapertorlugit aalajangersarneqarput:

Qinnuteqarneq

  § 1.  Ilinniartut ineqarfianni inissamik qinnuteqaatit tiguneqartut tunngavigalugit ilinniartunut avataaneersunut ilinniartut inaanik innersuussisoqassaaq. 

  Imm. 2.  Ilinniartut ineqarfianni inissamik qinnuteqarnermi qinnuteqartup makku ilanngutissavai:

1)  Piffissap ingerlanerani najugarisimasanut uppernarsaat

2)  Ilinniarfimmit akuerisaasimanermut piumasaqaatilimmilluunniit akuerisaasimanermut imaluunniit ilinniartup sulisitsisullu akornanni isumaqatigiissummut uppernarsaat.

  Imm. 3.  Ilinniartup inoqutiminik nassataqarusuttup qinnuteqaammi inoqutit amerlassusaat kiisalu inoqutit tamarmik aqqi aamma inuttut normui allassavai.

Utaqqisut allattorsimaffiat

  § 2.  Ilinniartut ineqarfiisa allaffeqarfiat aqutamini ilinniartunut ineqarfinnut utaqqisut allattorsimaffiannik pilersitsissaaq ingerlallugulu.

  Imm. 2.  Utaqqisut allattorsimaffiat ilinniartut ineqarfiisa annertussusaat malillugit agguarneqassaaq.

  Imm. 3.  Ilinniartut § 6, imm. 1 naapertorlugu inoqutiminnik nassataqarsinnaatitaasut ilinniartup inaanik naammattumik peqanngippat ilinniartumut utaqqiisaasumik ilinniartut inaannik innersuussisoqarsinnaavoq. Taamatuttaaq ilinniartoq ilinniartut inaannut naammattumik angissusilimmut utaqqisut allattorsimaffiannut allanneqassaaq.

  § 3.  Ilinniartoq ilinniartut ineqarfiini inissamik § 6 naapertorlugu naammattumik toqqaannartumik innersuunneqarsinnaanngitsoq paasineqarpat ilinniartoq § 2 naapertorlugu utaqqisut allattorsimaffiannut allatsissaaq.

  Imm. 2. Utaqqisut allattorsimaffiannut allatsinnermi § 4-mi aalajangersagaq malillugu aamma piffissaq allatsiffiusoq eqqarsaatigalugu tulleriiaarisussaaneq naapertorlugu ilinniartoq utaqqisut allattorsimaffiannut inissinneqassaaq, tassa ilinniartoq siullertut allatsissimasoq ilinniartunut kingusinnerusukkut allatsissimasunut sanilliullugu sallinngortinneqassaaq.

  Imm. 3.  Utaqqisut allattorsimaffiannut allatsinneq ilinniartumut namminermuinnaq tunngavoq allamullu, tassunga ilanngullugu aapparisamut inooqatigisamulluunniit tunniunneqarsinnaanani. 

Pingaarnersiuineq

  § 4.  Ilinniartut ineqarfiini init inoqanngitsut ilinniartunut avataaneersunut tulleriiaagassat uku malillugit tunniunneqartassapput, taamaattorli imm. 2 takuuk:

1)  Ilinniagaqartut ilinniarnertuunngorniarfimmi ilinniagaqarnissamut akuerineqarsimasut.

2)  Ilinniagaqartut ilinniakkaminnik ingerlatsisut aamma atuarnermik suliffimmillu misiliinermik paarlakaallugit ingerlatsisut.

3)  Ilinniagaqartut ilinniarfimmi ilinniartut ineqarfiinik inissamik neqeroorutilimmi ilinniagaqarnissamut akuerineqarsimasut.

4)  Ilinniagaqartut danskit ilinniagaqarnersiutigititaannik pisartagaqartoq, Kalaallit Nunaanni suliffimmik misiliiffissamik pissarsisimasut.

5)  Ilinniagaqartut nr. 1-imi, 2-mi, 3-mi, 4-mi 6-imiluunniit pineqanngitsut.

6)  Ilinniagaqartut Kalaallit Nunaanni ilinniarfeqarfimmi tikeraartitut ilinniagaqartut, tassani Kalaallit Nunaanniinneq qaammatit 12-it sinnerlugit sivisutiginngippat.

  Imm. 2.  Tulleriiaarisarneq imm. 1-imi taaneqartoq malillugu ilinniartut ineqarfii inoqanngitsut § 6, imm. 1 naapertorlugu ilinniagaqartunut ilaqutariittut inissisimanerat tunngavigalugu imatut tulleriiaarlugit innersuunneqassapput:

1)  Kisermaat angerlarsimaffimmi najugaqartunik meerallit.

2)  Aappariit angerlarsimaffimmi najugaqartunik meerallit.

3)  Kisermaat meeraqanngitsut. 

4)  Aappariit meeraqanngitsut.

Innersuussineq

  § 5.  Ilinniartut ineqarfiini inissanik inoqanngitsunik innersuussinerit § 4 naapertorlugu tulleriiaarineq malillugu ingerlaavartumik pissapput.

  Imm. 2.  Ilinniartut ineqarfiini inissamik qinnuteqaatit 1. april-imiit 20. junip akornanni tunniunneqarsimasut 20. junip kingorna 1. juli-lu nallertinnagu ataatsimut suliarineqassapput pingaarnerutinneqarlutillu.

  § 6.  Ilinniartut ineqarfianni inimik inoqanngitsumik innersuussinermi ilinniartut ineqarfianni najugaqartussat inoqutigiit amerlassusaat sapinngisamik innimigineqassapput, ilinniagaqartup meerai angerlarsimaffimmi najugaqartut 18-it inorlugit ukiullit, aappaa inooqataaluunniit ilinniagaqarnersiutini tamanna pillugu malittarisassat naapertorlugit akiliunneqarlutik angalasinnaatitaappata.

  Imm. 2. Ilinniagaqartoq inoqutiminik nassataqanngitsoq ilinniartut ineqarfianik ilinniagaqartumik ataatsimik arlalinnilluunniit najugaqateqarfissaminik innersuunneqarsinnaavoq.

  Imm. 3.  Ilinniartut ineqarfianik ilinniartut arlallit najugaqatigiiffigisaannik atugassiinermi sapinngisamik ilinniartut suiaaqatigiinnissaat qulakkeerneqassaaq.

Inissianik pisariaqartitsinermi allannguutit

  § 7.  Ilinniartut ineqarfiannik innersuussinerup kingorna inoqutigiit amerlassusaanni allanngortoqarpat ilinniartoq ilinniartut ineqarfianut anginerusumut mikinerusumulluunniit innersuunneqarsinnaavoq. Pisuni taakkunani ilinniartut ineqarfiisa allaffeqarfiata ilinniartoq ilinniartut ineqarfiini inissamut naammattumut utaqqisut allattorsimaffiannut allassavaa.

Atortuulersitsinermi aamma ikaarsaariarnermi aalajangersakkat

  § 8.  Nalunaarut 1. januar 2025-mi atuutilissaaq.

  Imm. 2.  Nalunaarut nalunaarutip atuutilersinnerata kingorna ilinniartut ineqarfiini inissamik qinnuteqaatinut tunniunneqartunut atuuppoq.

Namminersorlutik Oqartussat, ulloq 17. december 2024

Aqqaluaq B. Egede (atsior.)

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Nuka Kleemann