Kapitali 1

Nalinginnaasumik aalajangersakkat

 

Atuuffia

 

  § 1.  Inatsisartut inatsisaat peqqinnissaqarfimmi peqqinnissakkut ilinniarsimasutut sulineq pillugu, peqqinnissaqarfimmi sulisut peqqinnissakkut ilinniarsimasutut sulinerat pillugit naammagittaalliuuteqarnernut, peqqinnissaqarfimmi suliarinninnivik pillugu naammagittaalliuuteqarnernut (sullissineq pillugu naammagittaalliuutit), kiisalu napparsimasut ajoqusernerinut taarsiissuteqarnissaq pillugu sulianut atuuppoq.

  Imm. 2.  Pinnersaallutik passussisartut aamma kakiuisartut Inatsisartut inatsisaannut matumunnga ilaanngillat, taamaattorli tak. oqaaseqatigiit aappaat. Kakiuisartut, nakorsaanermik ingerlataqarnermut tunngasutigut kakiuisartut Inatsisartut inatsisaannut ilaapput.

  Imm. 3.  Tarnimikkut napparsimasunik nammineersinnaajunnaarsitsisarneq allatigullu pinngitsaaliinermik iliuuseqartarneq pillugit Inatsisartut inatsisaat malillugu naammagittaalliuutit Inatsisartut inatsisaannut matumunnga ilaanngillat.

  Imm. 4.  Nakorsaatinit ajoquserneqarnernut taarsiissuteqarnissaq pillugu suliat Inatsisartut inatsisaannut matumunnga ilaanngillat.

  Imm. 5.  Katsorsaasartut allat, peqqinnissamut tunngasutigut ilinniarsimasutut katsorsaasartutut akuersissuteqartutut akuersissuteqarsimanngitsut inatsimmut matumunnga ilaasinnaanerat pillugu Naalakkersuisut malittarisassanik aalajangersaasinnaapput.

 

Nassuiaatit

 

  § 2.  Uani Inatsisartut inatsisaanni tulliusut ima paasineqassapput:

1)  ”Peqqinnissaqarfik”: peqqinnissaqarfik tamarmiusoq, matumani napparsimmaviit, peqqissaaviit, nunaqarfinni napparsimmaveeqqat, nunaqarfinni nakorsiartarfiit il.il.

2)  ” Peqqinnissakkut ilinniarsimasutut sulineq”: Napparsimasut inatsisitigut inissisimanerat pillugu Inatsisartut peqqussutaanni nassuiarneqartutut katsorsaaneq. 

3)  ” Peqqinnissaqarfimmi sulisoq”:

a)  Danskit akuersissuteqarnerat tunngavigalugu inuit peqqinnissakkut ilinniarsimasutut sulinermik ingerlataqartut, matumani nakorsat, kigutit nakorsaat, kiropraktorit, ernisussiortut, pillorissaasut, bioanalytikerit (aammik, tigusanik misissuillutik, skannerillutillu il.il. misissuillutik nappaammik suussusiliisartut) nerisassat pissutigalugit nappaateqartunut kontaktlinsilerisut, isarualerisut kontaktlinsilerisullu, isikkanik ajoqutaajaasartut, isumaginninnermi peqqinnissamullu assistentit allallu.

b)  Peqqinnissaqarfiup iluani sulinermut atatillugu tarnip pissusiinik ilisimasallit, paarsisartut, peqqissaanermi ikiortit, utoqqaat illuini assistentit, nakorsaatilerisut, nakorsaatileriffinni atorfillit nakorsaasiortut, farmakonomit nakorsaatilerisunut ikiortit, nakorsaasiortutut ilinniartut nakorsaatileriffinni ilinniarnermik ingerlatsisimasut.

c)  Kigutit nakorsaasa namminersortut peqqinnissakkut ilinniarsimasutut sulinerat.

d)  Kalaallit Nunaanni ilinniagaqarsimaneq akuersissuteqarnerluunniit tunngavigalugu inuit peqqinnissakkut ilinniarsimasutut sulinermik ingerlataqartut, matumani nakorsat, peqqissaasut, kigutigissaasut, kigutit nakorsaasa ikiortaat, peqqinnissamut ikiortit, peqqinnissamut assistentit, peqqinnissalerisut, peqqissaanermi ikiortit portøritullu annaassiniartartut.

 

Kapitali 2

Naammagittaalliornissamut periarfissat

 

Peqqinnissakkut ilinniarsimasutut sulineq pillugu naammagittaalliornissamut periarfissaq

 

  § 3.  Peqqinnissaqarfimmi peqqinnissakkut ilinniarsimasutut sulineq pillugu napparsimasut naammagittaalliuutaat aamma Napparsimasut inatsisitigut inissisimanerat pillugu Inatsisartut peqqussutaanni kapitalini 2-5-ini ilaasut pissutsit pillugit naammagittaalliuutinik Danmarkimi Styrelsen for Patientklager suliarinnittarpoq. Oqaaseqatigiit siulliat malillugu Styrelsen for Patientklager peqqinnissakkut ilinniarsimasutut sulineq pillugu naammagittaalliuummik suliarinnissinnaanngilaq, suliaqarneq naammagittaalliuutigineqartoq tamakkiisumik ilaannakortumilluunniit § 4 malillugu naammagittaalliuummut ilaappat.

  Imm. 2.  Styrelsen for Patientklager peqqinnissakkut ilinniarsimasutut sulineq nalinginnaasumik suliatigut qaffasissutsimit akuerisaasumit appasinnerusumik qaffasissuseqarnersoq pillugu aalajangiisarpoq, imaluunniit napparsimasut inatsisitigut qanoq inissisimanerat pillugu malittarisassanut akerliusumik peqqinnissaqarfik iliuuseqarsimanersoq aalajangiisarluni.

  Imm. 3.  Imm. 2 malillugu aalajangiinerit aqutsinermi allaffissornikkut oqartussanut allanut ingerlateqqinneqarsinnaanngillat.

 

  § 4.  Peqqinnissakkut ilinniarsimasutut sulineq, Kalaallit Nunaanni peqqinnissaqarfimmi sulisunit ingerlanneqartoq pillugu napparsimasut naammagittaalliuutaat pillugit Danmarkimi Sundhedsvæsenets Disciplinærnævn suliassanngortitsinermik suliarinnittussanngortinneqartartussaavoq. Nunatsinni Nakorsaaneqarfik naammagittaalliuutinik Sundhedsvæsenets Disciplinærnævn suliarinnittussanngortissanerlugu aalajangiisarpoq, tak. imm. 2. Nunatsinni Nakorsaaneqarfik aamma nammineerluni suliassanngortitsisinnaavoq.

  Imm. 2.  Nunatsinni Nakorsaaneqarfik peqqinnissakkut ilinniarsimasutut sulinermi, Kalaallit Nunaanni peqqinnissaqarfimmi sulisunit ingerlanneqartoq pillugu naammagittaalliuutinik Sundhedsvæsenets Disciplinærnævnimut suliassanngortitsisoqassanersoq aalajangiisarpoq, Nunatsinni Nakorsaaneqarfik sakkortuunik pisoqarsimasoq isumaqarpat.

  Imm. 3.  Peqqinnissakkut ilinniarsimasutut sulineq pillugu naammagittaalliuut, § 3 malillugu naammagittaalliuummut ilaappat, taava Sundhedsvæsenets Disciplinærnævnip naammagittaalliuut suliarisinnaanngilaa.

  Imm. 4.  Sundhedsvæsenets Disciplinærnævn peqqinnissaqarfimmi sulisup peqqinnissakkut ilinniarsimasutut sulinera nalinginnaasumik akuerisaasumit appasinnerusimanersoq pillugu, imaluunniit napparsimasup inatsisitigut qanoq inissisimanera pillugu malittarisassanut akerliusumik peqqinnissaqarfimmi sulisoq iliuuseqarsimanersoq pillugu Sundhedsvæsenets Disciplinærnævn aalajangiisarpoq.

  Imm. 5.  Imm. 1-4 malillugit aalajangiinerit aqutsinermi allaffissornikkut oqartussanut allanut suliassanngortinneqarsinnaanngillat.

  Imm. 6.  Imm. 1 aamma 2 pillugit maleruagassanik erseqqinnerusunik Naalakkersuisut aalajangersaasinnaapput, matumani katsorsaaveqanngitsumi, taamaalillunilu aalajangiiffigineqarsinnaanngitsumi, peqqinnissakkut ilinniarsimasutut sulineq pillugu naammagittaalliornissamut periarfissaq pillugu.

 

  § 5.  Peqqinnissaqarfimmi peqqinnissakkut ilinniarsimasutut sulineq, peqqinnissaqarfimmi sulisut peqqinnissakkut ilinniarsimasutut sulinerat pillugit naammagittaalliuutit aamma Napparsimasut inatsisitigut inissisimanerat pillugu Inatsisartut peqqussutaanni kapitali 2-5-imi allassimasunut pissutsinut naammagittaalliuutit Nunatsinni Nakorsaaneqarfimmut tunniunneqartassapput.

 

Peqqinnissakkut ilinniarsimasutut sulineq pillugu naammagittaalliuutinik suliarinninneq

 

  § 6.  Nunatsinni Nakorsaaneqarfik § 5 malillugu naammagittaalliuummik tigusaqarpat, naammagittaalliuut Inatsisartut Inatsisaat manna malillugu suliarineqarsinnaanersoq Nunatsinni Nakorsaaneqarfiup nalilissavaa.

  Imm. 2.  Nunatsinni Nakorsaaneqarfik katsorsaavimmit peqqinnissaqarfimmiluunniit sulisumit naammagittaalliuutigineqartumit nalunaarsuiffimmut atortunik aamma oqaaseqaammik pissarsiniassaaq, aamma Kalaallit Nunaanni pissutsit atugassarititaasullu ilanngullugit, naammagittaalliuut pineqartoq pillugu suliap naliliiffigineqarnissaanut pingaaruteqartutut isigineqarpata, suliap ingerlasimanera pillugu allaaserinninnermik suliaqassalluni.

Suliap ingerlasimanera pillugu saqqummiussinermik kiisalu atortunik Styrelsen for Patientklager imaluunniit Sundhedsvæsenets Disciplinærnævn nassinneqassaaq, nassiunneqartut taamaalillutik taakku naammagittaalliuummik suliarinninneranni tunngavissatut ilaatinneqassammata.

  Imm. 3.  Nunatsinni Nakorsaaneqarfiup suliap piareersarneranut atatillugu pisoqalisoortoqarsimanersoq pillugu aalajangiisinnaavoq.

  Imm. 4.  Naammagittaalliuut erseqqissumik tunngavissaqanngippat taamaasillunilu Inatsisartut inatsisaannut ilaanngippat, taava Nunatsinni Nakorsaaneqarfiup naammagittaalliuutip suliarineqarnissaa itigartitsissutigisinnaavaa.

  Imm. 5.  Nunatsinni Nakorsaaneqarfiup, tamanna naleqquppat pisariaqarpallu, suliami  atortussat danskisut kalaallisulluunniit nutserneqarnissaat qulakkiissavaa.

  Imm. 6.  Paragrafimut tassunga ilaasunut aaqqiissutaasunut malittarisassanik erseqqinnerusunik Naalakkersuisut aalajangersaasinnaapput, matumani naammagittaalliorfissamut periarfissaq pillugu.

 

  § 7. Nunatsinni Nakorsaaneqarfik piffissaq eqqorlugu peqqinnissakkut ilinniarsimasutut sulineq pillugu naammagittaalliuummik § 8 malillugu tigusaqarpat, napparsimasup katsorsaavimmik oqaloqateqarnissaa Nunatsinni Nakorsaaneqarfiup neqeroorutigissavaa. Napparsimasup neqeroorut akuerippagu, naammagittaalliuut katsorsaavimmut nassiunneqassaaq, katsorsaavillu naammagittaalliummik tigusaqarnermi kingorna sapaatip akunneri sisamat qaangiutsinnagit napparsimasumik oqaloqateqassaaq.

  Imm. 2.  Oqaloqatigiinnerup kingorna napparsimasup naammagittaalliuutini tunuartikkusuppagu, katsorsaaviup napparsimasup akuersineratigut tamanna Nunatsinni Nakorsaaneqarfimmut nalunaarutigissavaa, tamatumalu kingorna naammagittaalliuut naammassineqartutut isigineqassaaq. Oqaloqatigiinnerup kingorna napparsimasup naammagittaalliuutigisami suliarineqarnissaa suli kissaatigippagu, suliami paasissutissat attuumassuteqartut tamaasa suliap suliarineqaqqinnissaanut atugassanngorlugit katsorsaaviup Nunatta Nakorsaaneqarfianut nassiutissavai.

  Imm. 3.  Imm. 1 malillugu napparsimasoq oqaloqatigiinnermi illersuisoqarnissaminut pisinnaatitaaffeqarpoq.

  Imm. 4.  Imm. 1 pillugu malittarisassanik erseqqinnerusunik Naalakkersuisut aalajangersaasinnaapput, matumani katsorsaaviit sorliit aalajangersakkami ilaatinneqarnersut aamma sapaatip akunneri sisamat qaangiutsinnagit piffissaliussamik saneqqutitsisoqarsinnaaneq pillugit.

 

Pisoqalisoortarneq pillugu aalajangersakkat

 

  § 8.  § 5 malillugu naammagittaalliuutit, naammagittaalliortup pisimasumik naammagittaalliuutigineqartumik ilisimasaqalerneranit imaluunniit ilisimasaqalerfigisimasariaqarneranit ukiut marluk qaangiutsinnagit Nunatsinni Nakorsaaneqarfimmut tunniunneqarsimassapput.

  Imm. 2.  Taamaattorli § 5 malillugu pisimasup naammagittaalliuutigineqartup ullormit pineranit ukiut tallimat qaangiutsinnagit naammagittaalliuutit tunniunneqassapput.

  Imm. 3.  Naammagittaalliornissamut piffissaliussat imm. 1 aamma 2-mi taaneqartut immikkut akuersissutigineqarsinnaanngillat.

 

Pisortat peqqinnissaqarfianni suliarinninnivik pillugu naammagittaalliuut (sullissineq pillugu naammagittaalliuutit)

 

  § 9. Sullissineq pillugu naammagittaalliuutit Nunatsinni Nakorsaaneqarfimmut tunniunneqassapput.

  Imm. 2.  Nunatsinni Nakorsaaneqarfiup peqqinnissaqarfimmi pisortamut qullerpaamut naammagittaalliuut ingerlatseqqillugu nassiutissavaa, taassumalu naammagittaalliuut suliarissavaa.

  Imm. 3. Sullissineq pillugu allakkatigut naammagittaalliuutit katsorsaavimmut imaluunniit peqqinnissaqarfimmi pisortamut qullerpaamut toqqarlugit naammagittaalliortumit nassiunneqarpata, taava sullissineq pillugu naammagittaalliuut taanna Nunatsinni Nakorsaaneqarfimmut ingerlatseqqillugu nassiunneqassaaq.

  Imm. 4.  Naammagittaalliuut tiguneqarnerminiit, tak. imm. 2, qaammatit pingasunngortinnagit suliarineqassaaq.

 

Kapitali 3

Napparsimasunut taarsiissuteqarnissamut suliat

 

Napparsimasut ajoquserneqarsimanerannut taarsiinerit

 

  § 10. Kapitalimi uani malittarisassat malillugit napparsimasunut imaluunniit napparsimasunit qimagaasunut, Kalaallit Nunaanni misissortinnermut, katsorsartinnermut assigisaannilluunnit iliuuseqarnermut atatillugu peqqinnissaqarfimmi, pisortat oqartussaaffiini allani imaluunniit namminersortuni peqqinnissaqarfimmi sulisumit imaluunniit sulisunit allanit ajoquserneqartunut taarsiisoqartarpoq.

  Imm. 2.  Napparsimasunut sanilliunneqarput inuit, peqqissutsimut ilisimatusarnerni misileraanermut peqataasut, napparsimasup nappaataata suussusilerneranut imaluunniit katsorsarneqarneranut atassuteqanngitsumik. Tamanna aamma timip ipiutaasartaanik imaluunniit timip atortuinik piikkanik tunniussisunut atuuppoq.

  Imm. 3.  Kapitali manna aammattaaq napparsimasunut Kalaallit Nunaata avataani napparsimavinni, klinikkini il.il. katsorsarneqarnissamut innersuunneqartunut imaluunniit tapiiffigineqartunut atuuppoq, katsorsaaviusumi inatsisit malillugit taarsiinissamut periarfissaqartoqanngippat.

  Imm. 4.  Suliassaqarfiit sorliit aalajangersakkamut ilaanersut pillugu malittarisassanik erseqqinnerusunik Naalakkersuisut aalajangersaasinnaapput.

 

Ajoqusernerit taarsiivigineqarsinnaatitaasut

 

  § 11.  Iliuuseqarnerit tulliusut ilaannit ajoqusiisoqarsimasoq ilimanavippat taarsiisoqassaaq:

1)  Suliassaqarfimmi pineqartumi immikkut ilisimasalittut misilittagalik Kalaallit Nunaanni pissutsini atuuttuni misissuinermi, katsorsaanermi assigisaanilluunniit iliuuseqarnermi allatut iliuuseqarsimasinnaagaluartoq ilimagineqarsinnaappat, taamaalilluni ajoquserneq pinngitsoortinneqarsinnaasimagaluarluni.

2)  Ajoquserneq misissuinermi, katsorsaanermi assigisaanilluunniit iliuuseqarnermi teknikkikkut sakkuutissani, atortuni sakkuniluunniit kukkunermik imaluunniit ajutoornermik pissuteqarpat.

3)  Kingornatigut naliliineq aallaavigalugu katsorsaavimmi katsorsaariaatsimut teknikkimik pigineqartumik allamik imaluunniit katsorsaanermut periaatsimik pigineqartumik allamik atorluni ajoquserneq pinngitsoortinneqarsimasinnaagaluarpat, nakorsaanikkut isiginnittariaaseq malillugu napparsimasup nappaataanik katsorsaanermi taamaaqataatut sunniuteqarluartumik atorneqarsinnaagaluartunik.

4)  Misissuinerup malitsigisaatut, matumani nappaammik suussusiliiniarluni pilattaanerup, imaluunniit katsorsaanerup kinguneratut aseruuttoornikkut imaluunniit nappaatip allatut annertunerusumik napparsimasup sapinngisaa qaangerlugu pissuseqalernera pissutigalugu ajoqusertoqarpat. Tamatumani ilaatigut ajoqusernerup ilungersunartuunera, ilaatigut napparsimasup nappaataa tamatumalu saniatigut peqqissutsimigut qanoq ittuunera kiisalu ajoqusernerup qaqutigoortuunera taassumalu pinngornissaanut navianaateqarneq ilanngullugit eqqarsaatigineqassapput.

 

  § 12.  Napparsimasup nappaataata eqqortumik suussusilerneqarsimannginnerata malitsigisaanik ajoquserneq pisimappat, taamaallaat § 11, imm. 1 aamma 2-mi taaneqartut taarsiiffigineqassapput.

  Imm. 2. Ajutoornermi, § 11 nr. 2-mut ilaanngitsumi, taamaallaat taarsiisoqassaaq ajoqusertoq katsorsaavimmi katsorsarneqarpat il.il., aamma ajutoorneq sumiiffiup taassuma iluani pisunilu imaattuni pisimappat katsorsaavik nalinginnaasumik taarsiissuteqarnissamut inatsisitigut malittarisassat malillugit tamatumunnga taarsiinissamut  akisussaaffeqalersimasutut isigineqartariaqalersimalluni.

 

  § 13.  § 10, imm. 2-mi ilaasut inuit misileraaffigineqartut timillu pisataanik tunisisut, misileraanermit imaluunniit timip ipiutaasartaanik il.il. tigusineq pissutigalugu ajoquserneqartut ajoqusernernut sunulluunniit taarsiiffigineqassapput, taamaattorli ajoqusernerup allamik peqquteqarnera ilimanaateqarluarpat imaluunniit ajoquserneq annikitsuinnaappat taarsiiffigineqassanngillat.

 

  § 14. Peqqinnissaqarfimmi sulisoq akuerisaq kinaluunniit sulinermini kapitali manna malillugu taarsiiffigitinneqarsinnaasutut naatsorsuutigisariaqartunik ajoqusernernik ilisimasaqalersoq, tamanna pillugu ajoquserneqartumut ilisimatitsisussaatitaavoq kiisalu pisariaqartitsineq malillugu Nunatsinni Nakorsaaneqarfimmut nalunaarutiginninnissamik ikiuuttussaatitaalluni.

  Imm. 2.  Paasissutissiisussaatitaaneq pillugu malittarisassanik erseqqinnerusunik Naalakkersuisut aalajangersaasinnaapput.

 

Taarsiissutissamik annertussusiliineq il.il.

 

  § 15.  Taarsiissutit ajunngitsorsiassallu, taarsiissuteqarnissamut akisussaaneq pillugu inatsimmi malittarisassat malillugit aalajangersarneqartarput, taamaattorli imm. 2-7 aamma §§ 16-18 takukkit.

  Imm. 2.  Imm. 1 malillugu taarsiissutit aamma ajunngitsorsiassat, taarsiissutinit imaluunniit ajunngitsorsiassanit nammineq akiliutit ilanngaatigineqareerpata tunniunneqassapput, tak. imm. 7.

  Imm. 3.  Imm. 2 malillugu nammineq akiliutit, ajoqusernernut § 10, imm. 2-mi ilaasunut akiliutigineqartassanngillat.

  Imm. 4.  Alla sinnerlugu akilersimasat matussusernissaannut piumasaqaatinut taarsiisoqarneq ajorpoq.

  Imm. 5.  Taarsiissutit imaluunniit ajunngitsorsiassat imm. 2 malillugu nammineq akiliummit ilanngaavigineqarpata, Patienterstatningenip § 25, imm. 4 malillugu aalajangiinerani aningaasanik aaqqiissutaasimasoq piffissami atuuttoq atorneqassaaq.

  Imm. 6.  Ajoqusernerup kinguneratut piffissami aalajangersimasumi, taamaattorli saniatigut sivisunerpaamik qaammatinik pingasunik sivisussuseqarsinnaasumik, sulisinnaajunnaarnermit napparsimalernermilluunniit sulinikkut isertitanik annaasaqarnernut taarsiissuteqartoqarsinnaasoq aamma ajoquserneqarnikkut anniaateqarnermut ajunngitsorsiassanik tunniussisoqarsinnaaneq pillugit malittarisassanik Naalakkersuisut aalajangersaasinnaapput.

  Imm. 7.  Nammineq akiliummut tunngasunik malittarisassanik erseqqinnerusunik Naalakkersuisut aalajangersaassapput.

 

  § 16.  Inatsisartut inatsisaanni kapitali 3-mut ilaasumik ajoqusernerup malitsigisaanik suli 18-inik ukioqalertinnani toqusumut meeqqamut angajoqqaatut oqartussaassuseqartoq imaluunniit oqartussaassuseqartut, ajunngitsorsiaqartinneqarnissamut pisinnaatitaaffeqarput, imm. 4 malillugu.

  Imm. 2.  Meeraq imm. 1-imi ilaasoq imatut paasineqassaaq, meeraq uumalluni inunngortoq, kiisalu naartuneq sivikinnerpaamik sapaatit akunneri 22-t tamakkersimallugit ingerlareersoq meeraq toqungalluni erniusoq.

  Imm. 3.  Imm. 1 malillugu ajunngitsorsiassat ataasiaannarlugit tunniunneqarsinnaapput. Angajoqqaatut oqartussaassuseqartut ataatsimoorlutik angajoqqaatut oqartussaaffeqarpata, tamarmik immikkut ajunngitsorsiassat affaannik imm. 1 malillugu tunineqassapput.

  Imm. 4.  Naalakkersuisut imm.1-imi ajunngitsorsiassat eqqaaneqartut pillugit malittarisassanik aalajangersaassapput, matumani ajunngitsorsiassat annertussusaat pillugu.

 

  § 17.  Taarsiissuteqarnissamut akisussaaneq pillugu inatsimmi § 3, § 4, imm. 1, § 6, imm. 2, § 8, § 13, imm. 1, oqaaseqatigiit aappaat aamma § 14 a malillugit aningaasat taarsiissutaasussat ajunngitsorsiassallu, kapitali 3-mi malittarisassat malillugit tunniunneqartussat, taarsiissuteqarnissamut akisussaaneq pillugu inatsimmi § 15, imm. 1-mi malittarisassat malillugit aaqqiivigineqassapput, piffissamilu aalajangiiffiusumi aningaasanut aaqqiissutaasussaq atuuttoq tunngavigalugu aalajangerneqarlutik.

  Imm. 2.  Taarsiissuteqarnissamut akisussaaneq pillugu inatsimmi § 7 malillugu ukiumut akissarsiat aamma taarsiissuteqarnissamut akisussaaneq pillugu inatsimmi § 14 malillugu taarsiissutaasussat, kapitali 3-mi malittarisassat malillugit tunniunneqartussat, taarsiissuteqarnissamut akisussaaneq pillugu inatsimmi § 15, imm. 1-imi malittarisassat malillugit piffissami ajoqusernerup pinerata aalajangiinerullu akornanni atuuttut malillugit aaqqiivigineqassapput.

  Imm. 3.  Taarsiissuteqarnissamut akisussaaneq pillugu inatsimmi §§ 1, 2 aamma 12 malillugit aningaasat taarsiissutaasussat ajunngitsorsiassallu, kapitali 3-mi malittarisassat malillugit tunniunneqartussat, taarsiissuteqarnissamut akisussaaneq pillugu inatsimmi § 15, imm. 1-imi malittarisassat malillugit aaqqiivigineqassapput, piffissamilu aalajangiiffiusumi aningaasanut aaqqiissutaasussaq atuuttoq tunngavigalugu aalajangerneqarlutik. Aningaasat aaqqiivigineqarsimasut koruunit aningaasartaannut 5-imik agguarneqarsinnaasumut qaninnerpaamut akunnaallisinneqassapput.

  Imm. 4. § 16 malillugu ajunngitsorsiassat piffissami aalajangiiffiusumi § 16, imm. 4 malillugu aningaasat atuuttut malillugit aalajangersarneqassapput.

 

  § 18.  Taarsiissutissat ajunngitsorsiassallu, taarsiissuteqartoqassasoq ajunngitsorsiaqartitsisoqassasorlu pillugit aalajangiinerup ulluata kingorna sapaatip akunneri tallimat qaangiutereersut akilerneqarpata, piffissami aalajangiinermit, akiliinissap tungaanut kingusinaartumik il.il. akiliinermi erniat pillugit inatsit pillugu Kalaallit Nunaannut nalunaarut malillugu ernianut naapertuuttumik ukiumut ernialiisoqassaaq.

 

  § 19.  Napparsimasoq piaaraluni mianersuaalliorujussuarluniluunniit ajoqusernermut peqataasimappat, napparsimasumut qimataanulluunniit taarsiissutissat ikilisinneqarsinnaapput pissutsilluunniit apeqqutaallutik unitsivinneqarsinnaallutik.

 

  § 20.  Napparsimasoq taassumaluunniit qimatai kapitalimi matumani malittarisassat malillugit taarsiivigineqarsimappata taarsiivigineqarsinnaatitaappataluunniit ajoqusernermut taarsiinissamut akisussaalersimasumut taarsiinissamut piumasaqaateqartoqarsinnaanngilaq, taamaattorli tak. § 22.

 

  § 21. Kinaluunniit taarsissuteqarnissamut piumasaqaatit nalinginnaasut

malillugit napparsimasumut imaluunniit taassuminnga qimagaasumut taarsiissuteqarnissamut akisussaaffeqalersimasoq, § 10-mut ilaappat, taava taamaallaat §§ 15-16 malillugit akiliutit alla sinnerlugu akilersimasat matussusernissaannut piumasaqaatinut tunngaviusinnaapput, ajoquserneq piaaraluni pisimappat, taamaattoq tak. § 22.

 

  § 22.  Tunisassianut akisussaaneq pillugu malittarisassat malillugit taarsiissuteqarnissamut akisussaaffeqartoqartillugu, §§ 20-mi 21-milu malittarisassat atuutissanngillat.

 

Taarsiissuteqarnissamut pisussaaffik aamma sillimmasiisussaanermut pisussaaffik

 

  § 23.  Kapitali manna malillugu tullinnguuttut taarsiissuteqarnissamut pisussaaffeqarput:

1)  Naalakkersuisut pisortani peqqinnissaqarfiup iluani katsorsaanerup kingorna ajoqusernernut, matumani napparsimmaviit, peqqissaaviit, nunaqarfinni napparsimmaveeqqat, nunaqarfinni nakorsiartarfiit il.il. aamma namminersorlutik oqartussani allani katsorsaanerup kingorna ajoqusernernut.

2)  Napparsimasup kommuni najugaqarfigisaa, kommunimi suliffeqarfiit iluanni katsorsaanerup kingorna ajoqusernernut.

3)  Namminersortutut katsorsaaviit, pisortani peqqinnissaqarfiup avataani katsorsaanerup kingorna ajoqusernernut.

 

  § 24.  Kapitali manna malillugu taarsiissuteqarnissaq pillugu piumasaqaat sillimmasiisarfimmi sillimmasiinermit matussusersimanissaa pillugu piumasaqaat pillugu malittarisassanik Naalakkersuisut aalajangersaasinnaapput.

 

Taarsiissuteqarnissamut suliat suliarineqarnerat

 

  § 25. Kapitali manna malillugu taarsiinissamut suliat tamarmik Nunatsinni Nakorsaaneqarfimmut tunniunneqartassapput. 

  Imm. 2.  Nunatsinni Nakorsaaneqarfik nalunaarsuiffimmi atortunik nalunaarsukkanik, katsorsaavimmit attuumassutilimmit oqaaseqaammik pissarsiniassaaq, aamma taarsiissuteqarnissaq pillugu suliap pineqartup naliliiffiginissaanut pingaaruteqartutut isigineqartumik, Kalaallit Nunaanni pissutsit atugassarititaasullu ilanngullugit allaaserinnittumik suliap saqqummiunneqarnissaanut atugassamik suliarinnissaaq. Suliamik saqqummiussineq kiisalu atortut uunga Patienterstatningen i Danmarkimut nassiunneqassapput taakku Patienterstatningenip taarsiissuteqarnissaq pillugu suliamik suliarinninneranut tunngavissatut ilaatinneqassallutik.

  Imm. 3.  Nunatsinni Nakorsaaneqarfik suliap piareersarneranut atatillugu pisoqalisoortoqarsimanersoq pillugu, aamma naammagittaalliuut Inatsisartut inatsisaata atuuffiata iluaniinnersoq pillugu aalajangiisinnaavoq. Aalajangiineq taanna naammagittaalliortup aalajangiinermik tigusaqarneranit sapaatit akunneri sisamat iluanni naammagittaalliuutigineqarsinnaavoq. Nunatsinni Nakorsaaneqarfiup aalajangiinera naammagittaalliuutigineqarpat, suliarineqarnissaa siunertaralugu Danmarkimiittoq Patienterstatningen naammagittaalliuummik nassinneqassaaq.

  Imm. 4.  Inatsisartut inatsisaat manna malillugu taarsiissuteqarnissaq pillugu suliat pillugit Patienterstatningen i Danmark aalajangiisarpoq. Patienterstatningenip aalajangiineq Nunatsinni Nakorsaaneqarfimmut nassiutissavaa taassumalu nutsertereerlugu suliami illua’tungiliuttunut nassiutissava. Imm. 6-imi allassimasoq malillugu, oqartussat taarsiissuteqarnissamut pisussaaffeqartut naammagittaalliornissamut piffissaliussap naanerata kingorna taarsiissutissat ajunngitsorsiassallu aningaasartaat aalajangersarneqarsimasut akilissavaat, aalajangiineq naammagittaalliuutigineqanngippat.

  Imm. 5.  Aalajangiinerit, tak. imm. 4, suliami illuatungiusunit Ankenævnet for Patienterstatningenimut suliassanngortinneqarsinnaapput, taannalu aqutsinermi allaffissornikkut inaarutaasumik aalajangiissaaq. Ankenævnet for Patienterstatningenip matuma kingorna aalajangiineq atuuttussanngortissinnaavaa, atorunnaarsillugu imaluunniit allanngortillugu.

  Imm. 6.  Ankenævnet for Patienterstatningenimut naammagittaalliuut Nunatsinni Nakorsaaneqarfimmut tunniunneqassaaq, naammagittaalliortup aalajangiineq pillugu nalunaarummik tigusaqarneranit qaammat 1 qaangiutsinnagu. Naammagittaalliuut aalajangiinerup atulinngikkallarnissaanik sunniuteqartarpoq.

  Imm. 7.  Tamatumunnga immikkut pissutissaqartillugu naammagittaalliornissamut piffissaliussap, tak. imm. 6, qaangerneqarnera Nunatsinni Nakorsaaneqarfiup isiginngitsuusaarsinnaavaa.

 

  § 26.  Ankenævnet for Patienterstatningenip aalajangiineri eqqartuussivimmut suliassanngortinneqarsinnaapput, tassani aalajangiineq atuuttussanngortinneqarsinnaavoq, atorunnaarsinneqarluni imaluunniit allanngortinneqarluni.

  Imm. 2.  Aalajangiineq eqqartuussivimmut suliassanngortinneqassaaq aalajangiinerup naammagittaalliuuteqartumut nalunaarutigineqarneranit qaammatit arfinillit qaangiutinnginnerini.

 

  § 27.  Taarsiissuteqarneq ajunngitsorsiassallu § 25, imm. 4 malillugu akilerneqarsimasut, utertillugit akileqquneqarsinnaanngillat imaluunniit taarsiissuteqarnissamut ajunngitsorsiassanulluunnit piumasaqaatinut allanut ilanngaatigineqarsinnaanatik, taamaattoq tak. imm. 2.

  Imm. 2.  Napparsimasoq imaluunniit napparsimasumit qimagaasut ilisimannikkaluarlutik paasissutissanik tunniussisimanngippata imaluunniit paasissutissanik eqqunngitsunik tunniussisimappata, aamma paasissutissat pigineqanngitsut imaluunniit paasissutissat eqqunngitsut, Patienterstatningenip imaluunniit Ankenævnet for Patienterstatningenip, paasissutissat pigineqarsimagaluarpata, imaluunniit eqqunngitsunik paasissutissiisoqarsimanngikkaluarpat, taamaalillunilu taakku allaanerusumik aalajangiinissaraluannik pinngitsoortitsinermik nassataqarsimappata, taava Patienterstatningen imaluunniit Ankenævnet for Patienterstatningen nutaamik aalajangiissaaq.

  Imm. 3.  Taarsiisussaatitaasup, tak. imm. 2, Patienterstatningenip imaluunniit Ankenævnet for Patienterstatningenip nutaamik aalajangiinera tunuliaqutaralugu § 25, imm. 4 malillugu taarsiissutissat aamma ajunngitsorsiassat akilerneqarsimasut utertinneqarnissaat piumasarisinnaavaa. Utertillugit akilerneqarnissaannik piumasaqaat taamaallaat atuutissaaq aalajangiinernut paasissutissat pineqartut aalajangiinerup inerneranut pingaaruteqarsimappata.

 

Inuttut paasissutissat pillugit pissarsisinnaaneq aamma suliarinninneq

 

  § 28.  Nunatsinni Nakorsaaneqarfik peqqinnissaqarfimmit, katsorsaavinnit namminersortunit ingerlanneqartunit, peqqinnissaqarfimmi sulisunit, pisortani oqartussanit, suliffeqarfinnit il.il. allanillu attuumassuteqartunit, kiisalu ajoqusersimasumit paasissutissanik sunilluunniit, akeqanngitsumik nalunaaruteqaqqusisinnaavoq, matumani nappaatit pillugit allattuiffinnik, nalunaarsuiffinni allattuiffinnik, politiit nalunaarutaannik, toqungasumik pilattaalluni misissuinermit nalunaarusianik, sillimmasiisarfinnit soraarnerussutisiaqarnermullu ingerlatseqatigiiffinnit paasissutissanik il.il., kapitali manna malillugu suliap suliarineranut pingaaruteqartutut Nunatsinni Nakorsaaneqarfimmit naliliiffigineqarpata.

  Imm. 2.  Imm. 1 malillugu paasissutissat noqqaassutip tiguneraniit qaammatisiutit malillugit ullut 30-t qaangiutsinnagit Nunatsinni Nakorsaaneqarfimmut nassiunneqassapput. Piffissaliussaq eqquutsinneqarsinnaanngippat piffissaliussap naannginnerani piffissaliussap qaangerneqarnissaanut tunngavilersuut pillugu, aamma noqqaassutip qaqugu naammassillugu suliarineqarsinnaanera pillugu Nunatsinni Nakorsaaneqarfik nalunaarfigineqassaaq. Paasissutissat elektroniskisut iluseqartillugit aaneqarsinnaapput.

  Imm. 3.  Nunatsinni Nakorsaaneqarfiup Patienterstatningen kiisalu Ankenævnet for Patienterstatningen paasissutissanik naammagittaalliuuteqartarfiup suliamik suliarinninnissaanut pisariaqartitaanik nassissavai, tak. § 25, imm. 4 aamma 5.

 

Pisoqalisoortarneq pillugu aalajangersakkat

 

  § 29.  Kapitali manna malillugu taarsiissuteqarnissamut piumasaqaat,

naammagittaalliortup pisimasumik naammagittaalliuutigineqartumik ilisimasaqalerneranit imaluunniit ilisimasaqalerfigisimasariaqarneranit kingusinnerpaamik ukiut pingasut qaangiutsinnagit Nunatsinni Nakorsaaneqarfimmut nalunaarutigineqarsimassaaq, taamaattorli tak. imm. 2.

  Imm. 2.  Taamaattorli taarsiissuteqarnissamut piumasaqaat, ullup ajoquserneqarfiup pineranit kingusinnerpaamik ukiut qulit qaangiunneranni pisoqalisoorsinnaavoq.

  Imm. 3.  Piffissaliussat imm. 1-mi 2-milu taaneqartut sanioqqunneqarnissaannik immikkut akuersissuteqartoqarsinnaanngilaq.

 

Pineqaatissiinerit pillugit aalajangersakkat

 

  § 30.  Peqqussummik naammassinninnginneq, tak. § 28, Kalaallit Nunaanni pinerluttulerinermi inatsimmi malittarisassat malillugit akiliisitsinikkut pineqaatissiinermik kinguneqarsinnaavoq.

  Imm. 2.  Akiliisitsissutit imm. 1 malillugu aalajangersarneqartut Nunatta Karsianut pisassanngortinneqartarput.

 

  § 31.  Inatsisartut inatsisaat malillugu maleruagassat atulersinneqarsimasut malillugit Kalaallit Nunaanni pinerluttulerinermi inatsit malillugu malittarisassat malillugit akiliisitsinermik pineqaatissiissutinik aalajangersaasoqarsinnaavoq.

  Imm. 2.  Inatsisartut inatsisaat imaluunniit Inatsisartut inatsisaat malillugu maleruagassat atulersinneqartut akiliisitsissummik aalajangersaanissamut tunngavissaqartitsippata, pinerluttulerinermi inatsimmi malittarisassat malillugit ataatsimoortutut inatsiseqartitsinikkut nammineertoq akiliisitsissummik akiliisussanngortinneqarsinnaavoq.

  Imm. 3. Imm. 1-2 malillugit suliat siullertut Kalaallit Nunaanni Eqqartuussivimmut suliassanngortillugit suliakkiutigineqassapput.

  Imm. 4.  Akiliisitsissutit imm. 1-2 malillugit aalajangersarneqartut Nunatta Karsianut pisassanngortinneqartarput.

 

Kapitali 4

Atuutilersitsinermut aalajangersakkat, atorunnaarsitsinermut aalajangersakkat aamma Inatsisartut inatsisaanni allami malitsitut allannguinerit

 

  § 32.  Inatsisartut inatsisaat nalunaarutigineqarnermini atuutilissaaq.

  Imm. 2.  Inatsisartut inatsisaanni kapitali 2, peqqinnissakkut ilinniarsimasutut sulineq pillugu naammagittaalliuutinut tunngasoq, Inatsisartut inatsisaata atuutilersinneqareernerata kingorna katsorsaanernut atuuppoq.

  Imm. 3.  Inatsisartut inatsisaanni kapitali 3, napparsimasut ajoqusernerinut taarsiissuteqarnissamut tunngasoq, Inatsisartut inatsisaata atuutilersinneqareernerata kingorna

ajoqusersimanernut atuuppoq.

 

  § 33.  Inatsisartut inatsisaata matuma atuutilersinnerata peqatigisaanik tulliusuni allannguisoqarpoq:

1) Peqqinnissaqarfiup aqunneqarnera, aaqqissuussaanera kiisalu peqqinnissamut tunngasutigut sullissisut aamma tarnip pissusaanik ilisimasallit pillugit Inatsisartut inatsisaat:

a)  § 9, imm. 4, § 10, imm. 2, § 11 a aamma § 11 b atorunnaarput.

b)  § 10, imm. 3 tamatuma kingorna § 10, imm. 2-nngorpoq.

c)  § 12, imm. 1-3-mi "§§ 3, 4 aamma 11 a" imatut allanngortinneqarpoq: "§§ 3 aamma 4".

2)  Napparsimasut inatsisitigut qanoq inissisimanerat pillugu Inatsisartut peqqussutaat:

a)  § 33 atorunnaarpoq.

  Imm. 2.  Napparsimasut Maalaarutaannik Aalajangiisartunut maalaaruteqartarneq pillugu Namminersorlutik Oqartussat nalunaarutaat nr. 14, 24. september 2012-imeersoq atorunnaarpoq.

  Imm. 3.  Nunatsinni Nakorsaaneqarfiup sulinera pillugu Namminersorlutik Oqartussat nalunaarutaat nr. 7, 15. juni 2017-imeersoq, Inatsisartut inatsisaat manna malillugu atorunnaarsinneqarnissami tungaanut imaluunniit maleruaqqusanik taarserneqarnissami tungaanut atuutiinnassaaq.

 

 

Namminersorlutik Oqartussat, ulloq 25. novembari 2024

 

 

Múte Bourup Egede (atsior.)

Naalakkersuisut Siulittaasuat