Peqqinnissaqarfiup aqunneqarnera, aaqqissuussaanera kiisalu peqqinnissamut tunngasutigut sullissisut aamma tarnip pissusaanik ilisimasallit pillugit Inatsisartut Inatsisaat nr. 27, novembarip 18-ani 2010-meersoq § 11a Inatsisartut Inatsisaanni nr. 2-mi maajip 29-ni 2012-imeersumi allannguuteqartinneqartoq naapertorlugu, aalajangersarneqarpoq:

Atuuffissaa

§ 1.  Kalaallit Nunaanni ilinniarsimassuseq tunuliaqutaralugu peqqinnissakkut sullissisut pillugit napparsimasut maalaarutaat Qallunaat Nunaanni Napparsimasut Maalaarutaannik Aalajangiisartunut saqqummiunneqassapput.
Stk. 2.  Nunatsinni Nakorsaanerup Kalaallit Nunaanni ilinniagaqassuseq tunuliaqutaralugu peqqinnissakkut sullissisut sulinerat pillugu isornartorsiuinissaq, allatulluunniit kinguneqartitsinissaq tunngavissaqarsorinarpat, suliat Napparsimasut Maalaarutaannik Aalajangiisartunut saqqummiussinnaavaa.

§ 2.  Kalaallit Nunaanni peqqinnissakkut sullissisut Napparsimasut Maalaarutaannik Aalajangiisartut suliassaqarfiinut ilaasut tassaapput:
1) Peqqinnissakkut sullissisut ilinniagaqassuseq tunuliaqutaralugu qallunaat sulisinnaatitaanermut akuersissutaannik pigisallit taakkununnga ilaallutik nakorsat, kigutit nakorsaat, kiropraktorit, ernisussiortut, pillorissaasut, timimik sungiusaasut, aaviaasartut. nappaatillit nerisaqarnerannut siunnersortit, qinnguartaasartut, timikkut innarluutilinnut iluaqusersuusiortut, kigutaasiortut, kigutigissaasut, isarualerisut, isarussanut taarsiullugit atortakkanik igalaasartaasalerisut isarualerisutullu ilinniartitaaneq nutaaq naapertorlugu ilinniarsimasut, isigalerisut kiisalu isumaginninnermi peqqissaanermilu assistentit.
2) Tarnip pissusaanik immikkut ilisimasallit peqqinnissaqarfimmi suliffeqartut, tarnikkut nappaatilinnik sullissisut (plejer), napparsimasunik paaqqinnittut, illuni paaqqinniffinni assisentit, nakorsaatilerisut, nakorsaasiornermik immikkut ilisimasallit nakorsaataasivimmi suliffillit, nakorsaataasivimmi siunnersortit nakorsaasiornermillu immikkut ilisimasalittut ilinniartut ilinniarnerminnut atatillugu nakorsaataasivimmiissimasut.
3) Kigutit nakorsaasa namminersortut peqqinnissakkut sullissinerat.
4) Peqqissaasut, kigutigissaasut, klinikassistentit, peqqinnissamik siammarsaasut, sundhedsassistentit, inunnik isumaginninnermi peqqissaanermilu ikiortit, nunaqarfinni peqqinnissakkut sullissisut, peqqissaanermi ikiortit, portøritullu annaassiniartartut Kalaallit Nunaanni ilinniarsimaneq sulisinnaatitaanerluunniit tunngavigalugu peqqinnissakkut sullissisut.

§ 3. Peqqinnissakkut sullissineq maalaarutaasoq Kalaallit Nunaanni peqqinnissaqarfimmit nakorsartinnissamik pisariaqartitsisunik misissuinerunngippat nakorsartinnissamullu innersuussinerunngippat, Pituffiup sakkutooqarfiani peqqinnissakkut sullissisunut, Nalunaarut atuutinngilaq.

Maalaarutinik piareersaasarneq

§ 4.  Napparsimasut Maalaarutaannik Aalajangiisartunut maalaarut, Nunatsinni Nakorsaanermut tunniunneqassaaq. Nunatsinni Nakorsaanerup maalaarut suliassanngortissavaa Napparsimasullu Maalaarutaannik Aalajangiisartunut ingerlateqqillugu.
Imm. 2.  Tamatuma kingorna peqqinnissakkut sullissisumit, maalaaruteqartumit maalaarutigineqartumillu, allattugaatinik oqaaseqaatinillu Nunatsinni Nakorsaaneq pissarsiniassaaq. Nunatsinni Nakorsaaneq Kalaallit Nunaanni pissutsinik atugassarititaasunillu, maalaarummut pineqartumut naliliinissami pingaarutilittut isigisariaqakkanik nassuiaatitalimmik, suliamut tunngatillugu saqqummiussissaaq.
Imm. 3.  Nunatsinni Nakorsaanerup suliamut tunngatillugu saqqummiussaa, naliliinera maalaarutillu aalajangiiviginissaanut innersuussutaa, Napparsimasut Maalaarutaannik Aalajangiisartut suliamik nangitsinerminni atugassaattut nassiunneqassaaq.

§ 5.  Napparsimasut Maalaarutaannik Aalajangiisartut maalaarummut aalajangiinnginneranni, Peqqissutsimut Naalakkersuisoqarfik, Nunatsinni Nakorsaaneq, maalaaruteqartoq peqqinnissakkullu sullissisut maalaarutigineqartut, aalajangiinissamut siunnersuut immikkullu ilisimasallit naliliinerat aalajangiinermut tunngaviusoq ilanngullugu, tusarniaavigineqassapput. 

§ 6.  Nunatsinni Nakorsaaneq maalaarutit qallunaatut kalaallisullu nutserneqarnissaannut Napparsimasut Maalaarutaannik Aalajangiisartunut ikiuutissaaq aningaasartuutitaalu akilissallugit. 

Maalaarutinik tamanut saqqummiussineq

§ 7.  Napparsimasut Maalaarutaannik Aalajangiisartut aalajangigaat Nunatsinni Nakorsaanerup ukiumoortumik nalunaarusiaani naalisarlugit issuaavigineqartarput. Peqqinnissakkut sullissisoq maalaaruteqartoq pillugu paasissutissat ilisarnarunnaarsarneqartarput.

Maalaaruteqarsinnaanermut piffissatut killiliussat

§ 8.  § 1 imm. 1 naapertorlugu maalaarut, pisimasup maalaarutiginiakkap ilisimalerneraniit imaluunniit ilisimalersimasariaqarfianiit ukiut marluk qaangiutsinnagit Napparsimasut Maalaarutaannik Aalajangiisartunut imal. Nunatsinni Nakorsaanermut tunniunneqassaaq. Pisimasulli maalaarutiginiakkap kingorna kingusinnerpaamik ukiut tallimat qaangiunneranni maalaarut tunniunneqassaaq.

Atuutilerfia

§ 9.  Nalunaarut oktobarip aallaqqaataani atuutilissaaq
Imm. 2.  Peqqinnissakkut sullinneqarneq pillugu maalaarutit Napparsimasut Maalaarutaannik Aalajangiisartunit naammassineqassapput.

Namminersorlutik Oqartussat ulloq:  24. september 2012

Agathe Fontain

/

Ann Birkekær Kjeldsen