Naalakkersuisut suleriaasiat pillugu Namminersorlutik Oqartussat nalunaarutaanni nr. 28, 13. juli 2022-meersumi § 1, imm. 4 naapertorlugu aalajangersarneqarpoq:

Naalakkersuisut naalakkersuinikkut sulinerannik ataqatigiissaarineq

  § 1.  Naalakkersuisut politikikkut sulinerannik ataqatigiissaarisussatut ataqatigiissaarinermut ataatsimiititaliaq ataaseq aamma ataqatigiissaarinermi suleqatigiit pingasut pilersinneqassapput.

  Imm. 2.  Ataqatigiissaarinermut ataatsimiititaliaq aamma ataqatigiissaarinermut suleqatigiit, naalakkersuinikkut akisussaaffinni assigiinngitsuni Naalakkersuisut naalakkersuinikkut anguniagaannik ataqatigiissaarineq suliassaraat.

  Imm. 3.  Suliat Naalakkersuisunut oqaluuserisassanngorlugit innersuunneqarnissaat sioqqullugu ataqatigiissaarinermut ataatsimiititaliap aamma ataqatigiissaarinermi suleqatigiit, naalakkersuinikkut suliani isumaqatigiittoqarneranik pilersitsiumalluni sukumiisunik aalajangersimasunik isumaliutersuuteqarnissaq, oqaloqatiginninnissaq naalakkersuinikkullu siumukarnissaq qulakkiissavaat.

  Imm. 4.  Naalakkersuisut Siulittaasuat naalakkersuinikkut suliat ataasiakkaat aalajangersimasut aaqqiiviginissaannut ataqatigiissaarinermi suleqatigiikkallartussanik

pilersitsisinnaavoq.

Ataqatigiissaarinermut ataatsimiititaliaq

  § 2.  Naalakkersuisut ataqatigiissaagaasumik suliniuteqarnissaat aamma naalakkersuisooqatigiinnissamut isumaqatigiissummi siunnerfiit anguneqarnissaasa qulakkeernissaat, ataqatigiissaarinermut ataatsimiititaliap suliassarai.

  Imm. 2.  Naalakkersuisut qitiusumik pingaartitaasa periusiukkamillu sammiveqarnerisa qulakkeernissaat, ataqatigiissaarinermut ataatsimiititaliap aamma suliassaraa.

  Imm. 3.  Suliat naalakkersuinikkut aningaasaqarnikkulluunniit pingaarutilimmik ilusillit, matumani inatsisiliornermi isumaqatiginninniutissat annertuut, isumaqatigiissutit siunnersuutillu ilanngullugit, ataqatigiissaarinermut ataatsimiititaliap suliarisarpai.

  Imm. 4.  Nalornisoqartillugu suliamik suliarinninnissaq ataqatigiissaarinermut ataatsimiititaliamut imaluunniit ataqatigiissaarinermut suleqatigiinnut ataatsimut innersuunneqassanersoq Naalakkersuisut Siulittaasuat aalajangiissaaq.

  § 3. Ataqatigiissaarinermut ataatsimiititaliap inuttarai:

1)  Naalakkersuisut Siulittaasuat, ataqatigiissaarinermut ataatsimiititaliamut siulittaasuusoq.

2)  Naalakkersuisut siulittaasuisa tullia aamma Aningaasaqarnermut Akileraartarnermullu Naalakkersuisoq.

3)  Inussutissarsiornermut, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq.

4)  Naalagaaffinngornissamut Nunanullu allanut Naalakkersuisoq.

Ataqatigiissaarinermut suleqatigiit

  § 4.  Ataqatigiissaarinermut suleqatigiit ataasiakkaat akisussaaffeqarfiinut tunngasuni naalakkersuisut siunnerfiinik ataqatigiissaarneqarnissaasa qulakkeernissaat, ataqatigiissaarinermut suleqatigiit suliassaraat.

  Imm. 2.  Ataqatigiissaarinermut suleqatigiit akisussaaffeqarfimminni naalakkersuinikkut suliassanik suliaqartarput, matumani naalakkersuinikkut suliani, taakku ataqatigiissaarinermut ataatsimiititaliamut imaluunniit Naalakkersuisunut suliassatut innersuunneqarnissaat sioqqullugu, naalakkersuinikkut siuariartornerit atuuttunngortitsiniarlunilu isummersuutit pillugit isumaliutersuuteqarnissaq oqaloqatigiinnissarlu siunertaralugit.

  Imm. 3.  Ataqatigiissaarinermut suleqatigiit siulittaasumit ataatsimit aqunneqarput. Siulittaasoq Naalakkersuisut Siulittaasuannit toqqarneqartarpoq. Ataqatigiissaarinermut suleqatigiinni siulittaasut ataqatigiissaarinermut ataatsimiititaliamut attaveqartassapput.

  Imm. 4.  Ataqatigiissaarinermut suleqatigiit suliat ataqatigiissaarinermut ataatsimiititaliamut ingerlateqqillugit nassiuttassavaat, matumani isumaqatigiittoqarsinnaanngippat imaluunniit suliani ataqatigiissaarinermut ataatsimiititaliap akisussaaffiinut tunngasuni, takuuk. § 2.

  § 5.  Aningaasaqarnermut inuussutissarsiornermullu ataqatigiissaarinermut suleqatigiit, Naalakkersuisut aningaasaqarnermut naalakkersuinikkut anguniagaat kiisalu Naalakkersuisut inuussutissarsiornermut sanaartornermullu suliassaqarfinni naalakkersuinikkut anguniagaat pillugit suliat suliarisarpai.

  Imm. 2.  Aningaasaqarnermut inuussutissarsiornermullu ataqatigiissaarinermut suleqatigiit makkuupput:

1)  Naalakkersuisut siulittaasuisa tullia aamma Aningaasaqarnermut Akileraartarnermullu Naalakkersuisoq, ataqatigiissaarinermut suleqatigiinni siulittaasuuvoq.

2)  Inussutissarsiornermut, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq.

3)  Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq.

4)  Ineqarnermut Attaveqaasersuutinullu Naalakkersuisoq.

  § 6.  Inunnut ataqatigiissaarinermut suleqatigiit, atugarissaarnermut suliassaqarfimmi Naalakkersuisut naalakkersuinikkut anguniagaat pillugit suliat suliarisarpai.

  Imm. 2.  Inunnut ataqatigiissaarinermut suleqatigiit makkuupput:

1)  Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, ataqatigiissaarinermut suleqatigiinni siulittaasuuvoq..

2)  Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq.

3)  Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq.

4)  Peqqissutsimut Naalakkersuisoq.

  § 7.  Pissuussutinut uumassusilinnut avatangiisinullu ataqatigiissaarinermut suleqatigiit, Naalakkersuisut pinngortitamut, avatangiisinut, silap pissusaanut aamma inuussutissanut suliassaqarfimmi naalakkersuinikkut anguniagaat pillugit suliat suliarisarpai.

  Imm. 2.  Pisuussutinut uumassusilinnut avatangiisinullu ataqatigiissaarinermut suleqatigiit makkuupput:

1)  Naalagaaffinngornissamut Nunanullu Allanut Naalakkersuisoq, ataqatigiissaarinermut suleqatigiinni siulittaasuuvoq.

2)  Aalisarnermut Piniarnermullu Naalakkersuisoq.

3)  Nunalerinermut, Imminut Pilersornermut, Nukissiutinut Avatangiisinullu Naalakkersuisoq.

Ataatsimiittarnerit

  § 8.  Ataqatigiissaarinermut ataatsimiititaliaq aamma ataqatigiissaarinermut suleqatigiit qaammammut ikinnerpaamik ataasiarlutik ataatsimiittarput, ilaasortanit pineqartunit peqataaffigineqartumik.

  Imm. 2.  Naalakkersuisunut ilaasortat, ataqatigiissaarinermut ataatsimiititaliap aamma ataqatigiissaarinermut suleqatigiit allat, ilaasortaaffiginngisamik ataatsimiinnerini pisariaqartitsineq malillugu peqataasinnaapput.

  Imm. 3.  Ataqatigiissaarinermut ataatsimiititaliami aamma ataqatigiissaarinermut suleqatigiinni ilaasortat ataasiakkaat aalajangissavaat, Naalakkersuisoq pineqartoq ikiorserumallugu naalakkersuisoqarfimmut pisortaq ataatsimiinnermi peqataassanersoq.

  Imm. 4.  Pisariaqartitsineq malillugu ataqatigiissaarinermut ataatsimiititaliami aamma ataqatigiissaarinermut suleqatigiinni immikkut ittumik ataatsimiinnissamut, ataqatigiissaarinermut ataatsimiititaliamut aamma ataqatigiissaarinermut suleqatigiinni ataasiakkaani siulittaasoq aggersaasinnaavoq.

  § 9.  Ataqatigiissaarinermut ataatsimiititaliamut aamma ataqatigiissaarinermut suleqatigiinnut allattoqarfik Siulittaasup naalakkersuisoqarfianit isumagineqartarpoq.

  Imm. 2.  Ullormut oqaluuserisassanut immikkoortut, naalakkersuinikkut suliamik qulequtsikkat, ilanngunneqartut ataatsimiinnissap aalajangersarneqarsimasup aallartinnginnerani kingusinnerpaamik ullorsiutitigut ullut arfineq-marluk qaangiunneranni Siulittaasup naalakkersuisoqarfianut ingerlateqqillugit nassiunneqassapput, matumani ataqatigiissaarinermut ataatsimiititaliami imaluunniit ataqatigiissaarinermut suleqatigiinni ataatsimi siulittaasumut allatut aalajangersimasumik isumaqatigiittoqarsimanngippat.

  Imm. 3.  Ullormut oqaluuserisassat ataqatigiissaarinermut ataatsimiititaliap imaluunniit ataqatigiissaarinermut suleqatigiinni ataasiakkaani siulittaasumit, Siulittaasup naalakkersuisoqarfia suleqatigalugu aalajangersarneqartarput.

  Imm. 4.  Siulittaasup naalakkersuisoqarfiata ataatsimiinnissap aallartinnginnerani ullorsiutitigut ullunik tallimanik sioqqutsisumik, ataqatigiissaarinermut ataatsimiititaliami aamma ataqatigiissaarinermut suleqatigiinni ataasiakkaani ilaasortanut ullormut oqaluuserisassat nassiutissavai.

  Imm. 5.  Ataqatigiissaarinermut ataatsimiititaliami aamma ataqatigiissaarinermut suleqatigiinni ataatsimiinnerit aalajangiinerit pillugit imaqarniliaq suliarineqassaaq.

Atuutilersitsinermut atorunnaarsitsinermullu aalajangersakkat

  § 10.  Kaajallaasitaq ulloq 1. oktobari 2024-mi atuutilissaaq.

  Imm. 2.  Peqatigisaanik ataqatigiissaarinermut ataatsimiititaliaq aamma ataqatigiissaarinermut suleqatigiinni pillugit kaajallaasitaq nr. 5, 2. septembari 2022-meersoq atorunnaarsinneqarpoq.

Siulittaasup Naalakkersuisoqarfia, ulloq 2. septembari 2024

Múte Bourup Egede (atsior.)

Naalakkersuisut Siulittaasuat

/ Hans-Peder Barlach Christensen (atsior.)