Nalinginnaasumik piumasaqaatit

  § 1.  Qitiusumik allaffeqarfik sulinermut atatillugu biilinik inunnik angallassisussanik nalunaarsorsimasunik pisiaqassaguni, sulinermut atatillugu biilit ataasiakkaat pissarsiarineranni akigitinneqartut 375.000 kr.-usut nalingannut pisiaqarsinnaavoq.

Imm. 2.  Pissarsiarineqarneranni aki tassaatinneqarpoq pissarsiarineqarneranni aningaasartuutit tamarmiusut, matumani ilanngullugu biilip pisiarinerani aki, akitsuutit, assartornerani aningaasartuutit pisariaqartinneqarpallu tunniunneqarnerinut atatillugu aningaasartuutit allat.

  Imm. 3.  Atortut allat, matumani assakaasut ukiorsiutit, sulinermut atatillugu biilinik pisiaqarnermut atatillugu pissarsiarineqartut, imaluunniit sulinermut atatillugu biilit pigineqarnissaata sivisussusissaa aammattaaq pissarsiarineqarneranni akiusumut ilanngullugit naatsorsorneqassapput.

  Imm. 4.  Suliffimmut atatillugu biilerineqartumik allamik tunisaqarnermi isertitat aningaasaliissutissatut sinaakkusiussanut ilanngunneqarsinnaapput, taamaalilluni pisinermi akigitinneqartussat katillugit 475.000 kr.-usinnaallutik.

Aningaasat sinneruttut isertitatut nunatta karsiata naatsorsuutaanut isertitatut nalunaarsorneqassapput, tassunga atatillugu malittarisassat atuuttut naapertorlugit.

  Imm. 5.  Sulinermut atatillugu biilit nalinginnaasumik nutaatillugit pisiarineqassapput. Sulinermut atatillugu biilitut atorneqarsimasut ajoquteqanngippata aamma pisiarineqarsinnaapput. Biilimik atornikumik pisiniarnermi biililerivittut akuerisaasimasut marluk imminnut attuumassuteqanngitsut biilip pitsaassusaa pillugu tunineqarnissaanullu nalinganik naliliisinneqassapput. Naliliinernit minnerpaamik ataaseq aalajangersakkat malillugit biilit misissorneqarsimanerannik uppernarsaammik iilaqartinneqassaaq.

  Imm. 6.  Biilit siusinnerpaamik taarserneqarsinnaalissapput ullormit siullermik nalunaarsorneqarfiannit ukiunik tallimanik pisoqaatigilerpata, biilit pigineqartut Namminersorlutik Oqartussani immikkoortumut allamut tunniunneqarnerat pineqanngippat.

  § 2.  Qitiusumik allaffeqarfimmi nunanit allanit ministeriusunit qaffasinnerusumilluunniit inissisimaffeqartunik tikeraartoqartillugu, sulinermut atatillugu atugassanik inunnillu angallassisussatut nalunaarsorsimasunik biilitaartoqartillugu, § 1 atuutsinneqassanngilaq.

Naalakkersuisunut ilaasortat sulinermut atatillugu biileqartinneqartinneqarnerat

  § 3.  Naalakkersuisunut ilaasortat akeqanngitsumik sulinerminnut atatillugu biileqartinneqarsinnaapput.

  Imm. 2.  Naalakkersuisunut ilaasortat sulinerminnut atatillugu angalanerminni imaluunniit Nuup avataaniinnerminni sulinermut atatillugu biilerisartik sillimmasiinissamut piumasaqaatit atuuttut naapertorlugit Naalakkersuisoqarfimmut allanulluunniit atortissinnaavaat.

  Imm. 3.  Naalakkersuisunut ilaasortat Naalakkersuisunut ilaasortaajunnaarnerminni suliffimmut atatillugu biilit Naalakkersuisoqarfimmut suliffimmut atatillugu biilinik atugassiisumut erngerlugit utertillugit tunniutissavaat.

Sulinermut atatillugu biileritinneqartut siunertanut allanut atugassiat

  § 4.  Qitiusumik allaffeqarfik pisut § 3-mi taaneqartut saniatigut sulinermut atatillugu biilissanik pissarsisinnaavoq, sulinermut atatillugu pisariaqartinneqarpata.

  Imm. 2.  Sulinermut atatillugu pisariaqartitsinerit tassaasinnaapput sulisut suliaqarnerannut atatillugu imaluunniit suliffeqarfimmi sullinneqartut anallanneqartariaqarnerat, nioqqutissanik assartuisariaqarneq il. il.

  Imm. 3.  Imm. 2 malillugu sulinermut atatillugu naliliinermi, pisariaqartitsinerup annertussusaa immikkut tigussaasumillu nalilersorneqassaaq, tamatuma saniatigut pisariaqartitsinerup tamatuma akikinnerusumik ingerlanneqarsinnaaneranut periarfissat, soorlu sulinermut atatillugu biilinik allanik attartorsinnaaneq, taxanik ingerlanneqarsinnaaneq il. il. nalilersorneqassapput.

  Imm. 4.  Imm. 1-imi aalajangersakkat suliffimmut atatillugu biilinut inunnik angallassisussatut nalunaarsorsimasunit allaanerusumik nalunaarsorneqartunut, imaluunniit sulianut immikkut ittumik siunertaqartunut, assersuutigalugu qimminik sulinermi atorneqartunik assartuinermut atorneqartunut atuutinngillat. Sulinermut atatillugu biilerineqartussat taamaattut akikinnerpaaq atorlugu pissarsiariniarneqartassapput sulinermut atatillugu immikkut siunertarineqartut innimigalugit nalileereersimaneq naapertorlugu.

  § 5.  Sulinermut atatillugu biilerineqartut pissarsiarinissaat taarsertarnissaallu § 4 naapertorlugu taamaallaat pisinnaavoq

naalakkersuisoqarfimmi immikkoortortaqarfiup pissarsinissamut pilersaartup imaluunniit biilinik taarsiilersaartup pisortaata annerusumik akisussaaffeqartup akuersineratigut.

  § 6.  Sulinermut atatillugu biilit § 4 naapertorlugu pissarsiarineqarsimasut naalakkersuisoqarfimmi pisortap malittarisassai naapertorlugit sulisunit angerlarsimaffimmiit najugarisamut assartuutitut allatigullu killilimmik privatimik ingerlatigineqarsinnaapput, tamanna sulinermi atuinermut allatigut akornutaanngippat. Taamatut namminerisamik atugassaqartitsineq assersuutigalugu sulisup pigaartuuneranik allatulluunniit nikerartumik sulisarneranik tunngaveqarsinnaavoq.

  Imm. 2.  Sulisup § 4 naapertorlugu sulinermut atatillugu biileqarnissamut periarfissaa, suliffimmiit inigisamut, allatigulluunniit privatimik killilimmik ingerlatsinissamut periarfissaa unissaaq sulisoq suliunnaarpat, tassunga ilanngullugu piffissap soraarsitaanissamut kalerriutigineqartup ingelanerani soraarsitaanermut atatillugu imaluunniit suliartoqquneqaratarsinnaanerup nalaani pigaartuunermi piffissami aalajangersimasumi akissarsiai unitsinneqassapput.

  § 7.  Kaajallaasitaq manna naapertorlugu naalakkersuisoqarfiit pisussaaffigaat, suliffeqarfiit namminersortitat sulinermut atatillugu biilinik pisiaqartarnerannut atuisarnerannullu malittarissasanik aalajangersaasarnissaannik qulakkeerinninnissaq.

Akileraartarnermi oqartussaasunut nalunaaruteqartarneq

  § 8.  Qitiusumik allaffeqarfimmi oqartussaasoq sulinermut atatillugu biilinik pissarsisimasoq, akeqanngitsumik sulinerminnut atatillugu biileqarnerup sulinermulluunniit atatillugu biileqarsinnaanerup akileraaruteqartussaanerannik nalunaaruteqarnissaq qulakkeerniarlugu paasissutissanik pisariaqartinneqartunik Aningaasaqarnermut Sulisoqarnermullu Aqutsisoqarfimmut nassiussissaaq.

  Imm. 2.  Naalakkersuisunut ilaasortat sinnerlugit naalakkersuisoqarfiit sulinermut atatillugu akeqanngitsumik biileqarnermut paasissutissat Naalakkersuisut Siulittaasuata Naalakkersuisoqarfianut nassiutissavaat, paasissutissanik Aningaasaqarnermut Sulisoqarnermullu Aqutsisoqarfimmut ingerlatitseqqittussanut.

  § 9.  § 8 naapertorlugu paasissutissat akissarsialerissummut aalajangersimasumik akissarsiat suunerisut Naalakkersuisunut ilaasortanit ikkunneqassapput. Tamanna pisassaaq sulinermut atatillugu biilinik atugassanngortitsinermiit sulinermut atatillugu biilit atugassaajunnaarsinneqarnissaasa tungaanut.

  Imm. 2.  Naalakkersuisunut ilaasortanut ilanngaatissat taamaallaat pisinnaapput ullut sulinermut atatillugu biileqarfiit iluanni biilerisaq, soorlu sulinermut atatillugu angalanerup feeriarnerulluunniit nalaani naalakkersuisoqarfimmi sulisumut atugassanngortinneqarsimappat, pineqartorlu sulinermut atatillugu biileqarsimaguni ullut biileqarfii nalunaarutigineqassapput, Naalakkersuisunut ilaasortap nalunaarutigineqarnerata iluani allassimasut naapertorlugit.

  Imm. 3.  Naalakkersuisut Siulittaasuata Naalakkersuisoqarfianit Naalakkersuisunut ilaasortat akeqanngitsumik sulinermut atatillugu biileqarnerat pillugu paasissutissat eqqortuunersut akissarsiat allagartaasigut misissorneqartassapput.

Ikaarsaariarnermi atuutilersitsinermilu aalajangersakkat il.il.

  § 10.  Naalakkersuisoqarfiit kaajallaasitap matuma iluani aalajangersakkat naapertorlugit ulluinnarni sulinermut atatillugu biileqarnerup aqunnissaannut, suliffiup avataatigut biilit atorneqartarnerisa nalunaarsorneqartarnerannut aamma sulinermut atatillugu biilinik atuinerup akileraaruteqartussaaneranik nalunaaruteqartarnissamut ilassutitut malittarisassaliorsinnaapput. 

  § 11.  Kaajallaasitaq ulloq 6. maj 2024 atuutilerpoq.

  Imm. 2.  Tassunga atatillugu suliffimmut atatillugu biilinik pisisarneq pillugu kaajallaasitaq 12. august 2016-imeersoq atorunnaarsinneqarpoq.

Naalakkersuisut Siulittaasuata Naalakkersuisoqarfia, ulloq 30. apriili 2023

Múte B. Egede (atsior.)

Naalakkersuisut Siulittaasuat

/ Hans-Peder B. Christensen (atsior.)