Aalisarneq pillugu Inatsisartut inatsisaat nr. 18, 31. oktober 1996-imeersumi § 23, imm. 2 aamma § 33, imm. 2, kingusinnerpaamik Inatsisartut inatsisaat nr. 28, 28. november 2016-imeersumi allanngortinneqartoq, aamma Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 11, 28. august 2014-imeersumi § 10, imm. 2 malillugit aalajangiunneqarput:

Atuuffia

  § 1. Uummannaq aqutsiveqarfimmi, 70° 30’N -ip avannaani, aamma 71° 30’N-ip kujataani sineriammit sumiiffiusumi, aamma aalisartoqarfimmut tunngavigisatut killigisat avataanni sømilit pingasut tikillugit nassuiarneqartutut inuussutissarsiutigalugu aalisarnermut ileqqoreqqusaq atuuppoq.

Inuussutissarsiutigalugu qaleralinnut qassusersorluni aalisarneq

  § 2. Qaammatini januarimi, februarimi, marsimi, apriilimi, novemberimi aamma decemberimi ilanngussaq 1-imi sumiiffiit nalunaarsukkat avataanni inuussutissarsiutigisatut qassusersorluni qaleralinniartoqaqqusaavoq.

Ataatsimoorussatut aalajangersakkat

  § 3. Ukiuunerani sikoqarnerata qassusersorluni aalisarneq ajornartorsiortissappagu najugarisami peqatigiiffinni tusarniaareernermigut qassusersorluni aalisarneq kommunalbestyrelsip matusiffigisinnaavaa

Pineqaatissiissutit

  § 4.  § 2 aamma § 3-mik unioqqutitsinerit akiligassinneqarnermik arsaarinnissuteqarnermillu nassataqartitsisinnaapput.

  Imm. 2.  Imm. 1 malillugu akiligassiissutit Kalaallit Nunaanni pinerluttulerinermut inatsimmi malittarisassat malillugit inatsisitigut inuttut naatsorsuussanut akileqqusaasinnaapput.

Atuutilernera

  § 5.  Ileqqoreqqusaq una nalunaarutigineqareernerata kingorna ingerlaannaq atuutilerpoq.
  Imm. 2. Taamaalinerani Uummannap aqutsiveqarfiani inuutissarsiutigalugu qassusersorluni aalisarneq pillugu Avannaata Kommuniani ileqqoreqqusaq 5. januar 2022-mersooq atorunnaarsinneqarpoq.

Taamatut ulloq 24. juni 2022-mi Avannaata Kommuniani Kommunalbestyrelsimit akuersissutigineqarpoq.

________________________________

Palle Jerimiassen
Borgmesteri

Aqutsiveqarfimmi Uummannaq inuussutissarsiutigisatut qassuserlunilu aalisarneq pillugu Avannaata Kommuniata ileqqoreqqusaa aalajangersarneqarpoq.

Namminersorlutik Oqartussat, ulloq

_________________________________

Karl Tobiassen
Aalisarnermut Piniarnermullu Naalakkersuisoq