Aalisarneq pillugu Inatsisartut inatsisaanni nr. 18, 31. oktober 1996-imeersumi § 10, § 10 a, § 10 b, § 13, imm. 2, § 23, imm. 1, § 33, imm. 2 aamma § 34, imm. 3 malillugit, kingullermillu aalisarneq pillugu Inatsisartut inatsisaatigut nr. 28, 28. november 2016-imeersukkut allanngortinneqartukkut aalajangersarneqarpoq:

Atuuffia

  § 1.  Imartani Kalaallit Nunaata aalisarnikkut oqartussaaffigisaani inuussutissarsiutigalugu uiluinniarnermut (Chlamys islandica) nalunaarut atuuppoq.

Pisassiissutit, akuersissutit, angallatillu

  § 2.  Aqutsiveqarfinni arfiniliusuni tamani tak. ilanngussaq 1, ukiut tamaasa pisassiissutissanik Naalakkersuisut aalajangersaasarput.

  § 3.  Inuussutissarsiornermut uiluiit pillugit akuersissummik qinnuteqaat Aalisarnermut Piniarnermullu Naalakkersuisoqarfimmut tunniunneqassaaq. Qinnuteqarnermut immersugassaq www.sullissivik.gl aqqutigalugu pissarsiarineqarsinnaasoq qinnuteqartunit atorneqassaaq.

  § 4.  Aalisarnermut Piniarnermullu Naalakkersuisoqarfik § 2-mi aalajangersarneqartuni aqutsiveqarfinni arfiniliusuni inuussutissarsiutigalugu uiluinniarnermut akuersissummik tunniussisinnaavoq. Akuersissut piffissami killilimmi atuutissaaq aamma akuerisaasumik amerlanerpaanik pisaqarsinnaanermik ilaqartinneqassaaq.

  § 5.  Pisassiissutit aallaqqaammut aalisariutaatilinnut ukiut siuliini taamatut pisassinneqartarsimasunut agguaanneqassapput.
  Imm. 2.  Agguaassereernermi pissassiissutit sinneqarsimappata, nr. 1 kingorna, pisassiissutit siullermik aalisariutaatilinnut piusunut allanut pisariaqartitsisinnaasunut agguaanneqassapput. Pisassiissutinik agguaassinermi, nr. 1 immikkoortup kingorna, pisassiissutit nalingi aallaavigineqassapput, aamma aallaqqaammut aalisariutaatillit aningaasarsiornikkut attassisinnaasut isiginiarneqassasut, kiisalu aalisariutaatileqatigiit piusut akornanni naleqartitanik naligiinnerusumik agguataarisoqassasoq.
  Imm. 3.  Aalisariutaatilinni nutaavinni uiluinniarnerup aningaasarsiornikkut attanneqarsinnaanera isumannaarneqarsinnaanngippat, taakkununnga pisassiissutinik tunniussisoqassanngilaq.

  § 6.  Angallatit uiluinniarnermut inuussutissarsiornermut akuersissutaatillit, angallatip angissusia apeqqutaatinnagu aalisarsinnaapput imartami sinerissamut qanittumi aamma avataani aalisarfimmi imartami tunngaviusumillu aalisarnikkut oqartussaaffiup killingata 3 sømilit avataani.

Sumiiffinnik matusineq

  § 7.  Aalisarnermut Piniarnermullu Naalakkersuisoq uiluinniarnermik aqutsiveqarfimmik matusisinnaavoq uiluinnik misiligutinik suliaqarnermi toqunartoqarnera danskit Fødevarestyrelsianit paasineqarpat, uillut il. il. pillugit Kalaallit Nunaannut nalunaarutip kingorna allanngortinneqartartup atuutilersinneqarnera pillugu kunngip peqqussutaa ulloq 13. februar 2008-meersoq taassumalu kingusinnerusukkut allannguutai naapertorlugit.
  Imm. 2.  Aalisarnermut Piniarnermullu Naalakkersuisoqarfik uiluinniarfimmik matoqqasumik tamakkiisumik ilaannakortumilluunniit ammaaqqissinnaavoq,  Fødevarestyrelse-p aqutsiveqarfik ammaqqippagu,uiluiit il.il. nalunaarut kunngip peqqussutaa ulloq 13. februar 2008-meersoq kingornalu allannguutit atuutilernerat pillugu malittarisassat naapertorlugit.

Pineqaatissiissutit

  § 8.  § 4-p unioqqutinneqarnera Kalaallit Nunaanni Pinerluttulerinermut inatsimmi maleruagassat naapertorlugit akiliisussanngortitsinermik arsaarinninnermillu kinguneqarsinnaavoq.
  Imm. 2.  Ingerlatseqatigiiffiit il.il. (inatsisitigut akisussaaffimmik tigummiartut) Pinerluttulerinermi inatsimmi kapitali 5-imi malittarisassat malillugit pinerluuteqarsimasutut akisussaatinneqarsinnaapput.
  Imm. 3.  Akiliisitsissutit Nunatta Karsianut tutsinneqassapput.

Atortuulersitsineq

  § 9.  Nalunaarut 10. februar 2023-mi atuutilissaaq.

Namminersorlutik Oqartussat, ulloq 2. februaari 2023

Karl Tobiassen
Aalisarnermut Piniarnermullu Naalakkersuisoq

/ Jørgen Isak Olsen