Kapitali 1
Tamakkiisumik aalajangersakkat

 

Siunertaq

 

  § 1.  Inatsisartut inatsisaat manna tunngavigalugu meeqqanik atualerneqanngitsunik perorsaanermik suliaqarnerit tamarmik meeraq qitiutillugu meeqqamik angajoqqaatut oqartussaassuseqartut, pilersuisuiusut meeqqallu attaveqaatai suleqatigalugit ingerlanneqassapput.

 

  § 2.  Inatsisartut inatsisaanni matumani anguniagassat tullinnguuttut naammassineqarnissaat siunertarineqarpoq:
1)  Persorsaanermik sulinermi meeqqap atugarissaarnera, ilikkariartornera aamma inooqataanikkut nalinginnaasumillu piginnaasaasa ineriartornerat kiisalu meeqqap atualernissamut piareersimanerata qulakkeernissaa pillugit meeqqamut pitsaanerpaamik qulakkeerinninneq.
2)  Meeqqap takorluuisinnaaneranut, pinngorartitsisinnaaneranut, ineriartorneranut pinngortitamullu ataqqinninneranut uummarissaaqataasunik meeqqap misigisaqarnissaanut sammisaqarnissaanullu periarfissiineq.
3)  Meeqqap inoqatiminut ataqqinninnissamik paasinninnissaanik, kulturikkut kinaassutsimik paasinninnermik, kisiannili aamma meeqqap kulturianit allaanerusumik kulturimik paasinninneranik ineriartortitsinermik siuarsaaneq.
4)  Paasinninneq, eqqissineq, akaarinninneq, suiaassutsit akornanni naligiissitaaneq, inuiaassuseq upperisaqarnerlu anersaaralugit inuiaqatigiinni kiffaanngissuseqartumi akisussaassuseqartumik inuunissamut meeqqap piareersarneqarnera.

5) Meeqqamut aalajangeeqataasinnaanermik, akisussaaqataanermik oqartussaaqataanermillu paasinninnermik misigisaqarnermillu tunisineq.
6)  Neqeroorutit akornanni ikaarsaarnernut meeqqap sapinngisamik pitsaanerpaamik piareersarneqarnissaa taamaalillunilu meeqqap ukiuanut naleqquttumik ineriartornissaa siuarsarniarlugu ataqatigiissumik ataavartumillu pilersitsisoqarnissaanik isumaginninneq.

7)  Perorsaanermik neqeroorutit kommunimi meeqqanut nalinginnaasumik ataatsimut neqeroorutaatinnerisigut peqataatitsinermik isumaginninnikkullu ajornartorsiuteqarnissamut aarlerinaartorsiornissaq pinaveersaartitsinermik qulakkeerinninneq, taamaasilluni meeqqanut immikkut iliuuseqarnissamik pisariaqartitsisunut pinaveersaartitsinernut ikorfartuisumillu iliuuseqarneqarnissamik qulakkeerinninneq.

 

Atuuffia nassuiaatillu

 

  § 3.  Inatsisartut inatsisaat una meeqqanut atualerneqanngitsunut tamanut ulluunerani neqeroorutini atuuppoq.
  Imm. 2. Meeqqanut ulluunerani persorsaanikkut inerikkiartuutaasumik neqeroorutinut angerlarsimaffimmi paarsineq, angerlarsimaffimmi paarsisarfiit ataatsimoortitat, ulluunerani paaqqinnittarfiit kiisalu sammisassaqartitsinermik neqeroorutit meeqqanik sullissinermik sammisunik perorsaanermik ingerlatsiviusut ilaapput. Neqeroorut ulloq naallugu ullulluunniit ilaannaani neqeroorutaanersoq apeqqutaanngilaq.
  Imm. 3.  Meeqqat atualerneqanngitsut tassaapput 0-6-inik ukiullit, imaluunniit atuartinneqartussaanerup atuutilernissaata tungaanut.
  Imm. 4.  Inatsisartut inatsisaanni meeqqanut atualerneqanngitsunut, akimmiffiit assigiinngitsut sunniivigeqatigiinnerisigut meeqqat allat assigalugit inuiaqatigiinni tamakkiisumik sunniutilimmillu inooqataasinnaannginnerannik pissutaasinnaasumik inooqataanikkut ajornartorsiuteqarneq, ataavartumik timikkut, tarnikkut, paasinnissinnaanikkut malussarniutitigulluunniit pisinnaasat annikillisimanerat pissutigalugu immikkut ittumik iliuuseqarfigineqarnissamik pisariaqartitsisunut aamma tunngassuteqarpoq.

 

  § 4.  Angerlarsimaffimmi paarsisarfik tassaavoq perorsaanikkut kaammattuiffiusumik paarsinissamik neqeroorut ullup-unnuallu ilaa angerlarsimaffimmi meeqqap angerlarsimaffiginngisaani, imaluunniit tamanit katersuuttarfimmi ingerlanneqartoq.
  Imm. 2.  Kommunip angerlarsimaffimmi paarsisarfia tassaavoq angerlarsimaffimmi paarsineq kommunimit pilersinneqarlunilu ingerlanneqartoq, angerlarsimaffimmi paarsisoq kommunimit atorfinitsinneqarlunilu aningaasarsiaqartinneqartoq.
  Imm. 3.  Namminerisamik angerlarsimaffimmi paarsisarfik tassaavoq angerlarsimaffimmi paarsisarfik nammineq pilersitaallunilu akilerneqarluni ingerlanneqartoq. Namminerisamik angerlarsimaffimmi paarsisarfik kommunip angerlarsimaffimmi paarsisarfiutaani malittarisassat assigalugit ingerlassaaq.

 

Meeqqat ataasiakkaat pillugit suleqatigiinneq

 

  § 5.  Kommunalbestyrelsimit meeqqat ataasiakkaat attaveqarfiisa akornanni ataqatigiissakkamik suleqatigiittoqarnissaa qulakkeerneqassaaq. Pisariaqartitsisoqartillugu ingerlatsiviit ataasiakkaat meeqqamik sulinermut toqqaannartumik attuumassuteqartut akornanni inuttalerneqartumik suleqatigiinnik kommunalbestyrelse pilersitsissaaq.
  Imm. 2.  Suleqatigiit suliassaqarfiit akornanni imm. 1 naapertorlugu suleqatigiinnermut atatillugu attaveqarfiit ataatsimiitinneqartassapput, tamatumani meeqqap angajoqqaatut oqartussaasui imaluunniit pilersuisuiusui, meeqqamut siusissukkut iliuuseqarnissaq siunertaralugu peqataatinneqassallutik.
  Imm. 3.  Naalakkersuisut suleqatigiinnik pilersitsinermut malittarisassanik aalajangersaassapput.

 

Kapitali 2
Inissanik innersuussineq

 

  § 6.  Nunami maani angajoqqaat inatsisitigut akuerineqarlutik najugaqartut Inatsisartut inatsisaat manna malillugu ulluunerani neqeroorummi inissamik pisinnaatitaaffeqarput.

 

  § 7.  Meeqqanut atualerneqanngitsunut tamanut ulluunerani neqeroorummik qulakkeerinissaq kommunalbestyrelsip suliassaraa.

 

  § 8.  Kommunalbestyrelse kommunip ulluunerani paaqqinnittarfiinut kommunillu angerlarsimaffimmi paarsisarfiinut piumasaqaatit kommunimit aalajangersarneqarsimasut malillugit meeqqanut utaqqisut allattorsimaffianniittunut inissamik innersuussisassaaq.

 

  § 9.  Meeqqat 0-2-nik ukiullit meeraaqqerivinnut kommunillu angerlarsimaffimmi paarsisarfiinut meeqqallu 3-6-inik ukiullit meeqqerivinnut kommunillu angerlarsimaffimmi paarsisarfiinut kommunalbestyrelsip innersuuttassavai.
  Imm. 2.  Kommunalbestyrelse marlunnik ukiulinnik meeqqamut pitsaanerpaamut ineriartorneranullu meeqqanik ataasiakkaanik aalajangersimasunik naliliineq tunngavigalugu meeqqerivimmut innersuussisinnaavoq.

 

  § 10.  Angajoqqaat inatsit una naapertorlugu meeqqamut ataatsimut inissamik ataasimik taamaallaat tunineqarsinnaapput.

 

Utaqqisunut allattorsimaffik

 

  § 11.  Qinnuteqartut tamarmik inissaqartinneqanngippata utaqqisunut allattorsimaffimmik kommunalbestyrelse pilersitsissaaq.

 

  § 12.  Utaqqisunut allattorsimaffimmi pingaarnersiuinissamut piumasaqaatinik kommunalbestyrelse aalajangersaassaaq.
  Imm. 2.  § 3, imm. 4 naapertorlugu meeqqat immikkut pisariaqartitsisut salliutinneqassapput.

 

  § 13.  Utaqqisunut allattorsimaffimmut piumasaqaatit kommunalbestyrelsip meeqqat inuusuttullu pillugit politikianni allassimassapput, taakku kikkunnit tamanit pissarsiarineqarsinnaassapput.

  Imm. 2. Naalakkersuisut pingaarnersiuinermut piumasaqaatinut malittarisassanik erseqqinnerusunik aalajangersaasinnaapput.

 

Kapitali 3
Ulluunerani paaqqinnittarfiit

 

  § 14.  Ulluunerani paaqqinnittarfiit paaqqinnittarfiupput meeqqanut eqimattanut sammisumik perorsaanermik ilinniarsimasunik sulisoqartut, illutaat meeqqanut sulisunullu naleqqussagaallutik attuumassutilimmillu oqartussaasunit akuerineqarsimallutik.
  Imm. 2.  Ulluunerani paaqqinnittarfiit kommunineersuusinnaapput imaluunniit 6-inik amerlanerusunilluunniit meerartalinnik paaqqinnittarfittut imminnut pigisutut pilersinneqartuusinnaapput, taakku kommunalbestyrelsimik ingerlatsinermik isumaqatigiissusiorsinnaapput.

 

  § 15.  Ulluunerani paaqqinnittarfiit 0-2-nik ukiulinnut meeraaqqerivittut, 3-6-inik ukiulinnut meeqqerivittut imaluunniit 0-6-inik ukiulinnut ukiui naapertorlugit avitanut paaqqinniffittut pilersinneqassapput.
  Imm. 2.  Ulluunerani paaqqinnittarfiit meeqqanut eqimattanut agguarneqassapput, meeqqanut eqimattat tamarmik amerlanerpaamik 20-nik meerartaqassallutik, meeraaqqerivinnilu eqimattat amerlanerpaamik aqqaneq marlunnik meerartaqassallutik.
  Imm. 3. Ulluunerani paaqqinniffik suleqatigalugu aalajangersimasumik naliliinera tunngavigalugu imm. 2 naapertorlugu meeqqanut amerlanerpaaffiliinernut immikkut akuersissuteqartoqarsinnaavoq.

  Imm. 4.  §§ 1 aamma 2 naammassisinnaajumallugu ulluunerani paaqqinnittarfinni inissat qanoq amerlatigisut meeqqanut immikkut pisariaqartitsisunut tunniunneqassanersut pillugit paaqqinnittarfiup innersuussuteqarneratigut kommunalbestyrelsip imaluunniit ulluunerani paaqqinnittarfimmi imminut pigisumi siulersuisut aalajangiinerat tunngavigalugu amerlassusilerneqassapput. Meeraq pillugu § 5 naapertorlugu suleqatigiinnik pilersitsisoqarsimappat aalajangiinermut atatillugu suleqatigiit peqataatinneqarsinnaapput.

Ulluunerani paaqqinnittarfiit illutaannut piumasaqaatit

 

  § 16.  Ulluunerani paaqqinnittarfiup atulerseqqaarnerani kommunalbestyrelse ulluuneranik paaqqinnittarfik akuersissaaq. Illup allanngortinneqarneranut inissallu qanoq amerlatiginissaannut aalajangiunneqarsimasut allanngortinneqarnerannut atatillugu ulluunerani paaqqinnittarfimmi kingorna allannguutinut kommunalbestyrelse akuersissaaq.
  Imm. 2.  Ulluunerani paaqqinnittarfiup inatsisit atuuttut naapertorlugit aaqqissorneqarsimanersoq kommunalbestyrelsimit nakkutigineqassaaq.
  Imm. 3.  Naalakkersuisut ulluunerani paaqqinnittarfinnik pilersitsinermut aaqqissuussinermullu malittarisassanik aalajangersaassapput.

 

Ulluunerani paaqqinnittarfiit akuerisaanerannut uppernarsaat

 

  § 17.  Ulluunerani paaqqinnittarfiit tamarmik kommunalbestyrelsimit tunniunneqarsimasumik akuerisaasimanermut takussutissaqassapput, ulluunerani paaqqinnittarfiup aqutsisuaniit ulluunerani paaqqinnittarfimmi takuneqarsinnaasumut inissinneqarsimasussamik.
  Imm. 2.  Akuerisaasimanermut uppernarsaat paasissutissanik ukuninnga imaqassaaq:
1)  Ulluunerani paaqqinnittarfiup aqqa, sumiiffia inissisimaneralu.
2)  Ulluunerani paaqqinnittarfiup anguniagai meeqqanillu isiginnittaasia.
3)  Ulluunerani paaqqinnittarfiup aqutsisua.
4)  Kommunimi ataatsimiititaliaq naapertuuttoq imaluunniit ulluunerani paaqqinnittarfiup imminut pigisup siulersuisui.
5)  Paaqqinnittarfimmi inissat amerlassusaat.
6)  Sulisut amerlassusaat.
7)  Ammasarfiit.
8)  Oqartussaasunit naapertuuttunit akuersissutit, tamatumani qatserisartoqarnermi oqartussat, sanaartornermut oqartussat aamma kommunalbestyrelse kiisalu ullulernera ilanngullugit.
9)  Ulluunerani paaqqinnittarfimmi persorsaanikkut ukiumoortumik pilersaarutip sumiinnera inatsisitigullu tunngaviit naapertuuttut pillugit paasissutissat.

 

Atorfinitsitsinerit

 

  § 18.  Kommunalbestyrelse innersuussisarnermut ataatsimiititaliamit ulluunerani paaqqinnittarfimmit pineqartumit, angajoqqaat siulersuisuinit ingerlatsivimmiillu sinniisulimmik, innersuussuteqartoqareerneratigut ulluunerani paaqqinnittarfimmi kommunip ingerlataani aqutsisumik atorfinitsitsissaaq. Innersuussisarnermut ataatsimiititaliaq kommunalbestyrelsimit pilersinneqassaaq.

  Imm. 2.  Kommunalbestyrelse ulluunerani paaqqinnittarfimmi sulisunik aqutsisunillu atorfinitsitsinerminut atatillugu, atorfik meeqqanik attaveqarnermik nassataqarpat, meeqqanik pinerliisimannginnermut pineqaatissinneqarsimannginnermillu uppernarsaatinik piniassaaq kiisalu pineqartup suliassai eqqarsaatigalugit uppernarsaatinik sukumiisumik nalilersuissalluni. Kommunalbestyrelse immikkut pisoqartillugu pineqaatissinneqarsimannginnermik aamma meeqqanik pinerliisimannginnermut uppernarsaatinik nutaanik piniarsinnaavoq.

  Imm. 3. Ulluunerani paaqqinnittarfimmi aqutsisumik sulisumilluunniit atorfinitsitsisoqarsinnaanngilaq:

1)  pineqaatissinneqarsimannginnermik uppernarsaammi takuneqarsinnaappat, qinnuteqartoq ukiut kingulliit 10-t iluanni kinguaassiutitigut pinerluuteqarsimasutut imaluunniit inunnut navianaatilimmik pinerluuteqarsimasutut eqqartuunneqarsimappat, imaluunniit

2)  meeqqanik pinerliisimannginnermut uppernarsaammi takuneqarsinnaappat, qinnuteqartoq kinguaassiutitigut pinerluuteqarsimasutut eqqartuunneqarsimappat.

 

Ulluunerani paaqqinnittarfimmi aqutsisoq

 

  § 19.  Ulluunerani paaqqinnittarfimmi aqutsisup ulluunerani paaqqinnittarfiup illersorneqarsinnaasumik malittarisassallu atuuttut naapertorlugit ingerlanneqarnissaa perorsaanikkut allaffissornikkullu akisussaaffigaa. Ulluunerani paaqqinnittarfimmi aqutsisup sulisoqarnikkut atugassarititaasut akisussaaffigai.
  Imm. 2.  Ulluunerani paaqqinnittarfimmi aqutsisup ulluunerani paaqqinnittarfimmi perorsaanikkut ukiumut pilersaarusiornissaq missingersuusiornissarlu akisussaaffigai.
  Imm. 3.  Kommunimi ulluunerani paaqqinnittarfiit aamma ulluunerani paaqqinnittarfiit imminnut pigisut, kommunalbestyrelsimik ingerlatsinissamik isumaqatigiissusiorsimasut, kommunalbestyrelsimit malitassiarineqarsimasut naapertorlugit missingersuusiussapput. Ulluunerani paaqqinnittarfinni imminnut pigisuni sinnerini siulersuisut najoqqutassiaat naapertorlugit missingersuusiussapput.

 

  § 20.  Ulluunerani paaqqinnittarfimmi aqutsisup akisussaaffigaa meeraq pillugu mappimik pappiaqqanik digitalimilluunniit pilersitsillunilu nutarterinissaq, kiisalu meeqqat meeqqerivimmiittut aqqinik inuullu normuinik, angajoqqaatut oqartussaasut pilersuisuiusuisalu aqqinik, meeqqerivimmiikkunnaarpatalu sooq aninerannut pissutaasut pillugit paasissutissanik allattuiffeqarnissaq. Takkuttarnermut nalunaarsuisarneq ingerlanneqassaaq.
  Imm. 2.  Kommunimi ulluunerani paaqqinnittarfiit aamma ulluunerani paaqqinnittarfiit imminnut pigisut, kommunalbestyrelsimit ingerlatsinermik isumaqatigiissuteqarfigineqarsimasut, takkuttarnermut nalunaarsuut persorsaanikkullu ukiumut pilersaarutit kommunalbestyrelsimut nassiutissavaat ullup kommunalbestyrelsimit killiliunneqarsimasup qaanginnginnerani.

 

  § 21.  Atorfinitsitsinermik oqartussaasup ulluunerani paaqqinniffiup aqutsisuata allaffissornikkut §§ 18 aamma 19 naapertorlugit suliassaanik isumaginninnginnissaa aalajangersinnaavaa, tamanna ulluunerani paaqqinnittarfiup aaqqissuussaanerani pilersaarusiorneranilu suliassat agguataarneqarsimaneranni illersorneqarsinnaappat, aamma atorfinitsitsinermik oqartussaasup uppernarsarsinnaappagu perorsaanikkut, allaffissornikkut aqutsinikkullu suliassat naammaginartumik naammassineqartut. Kisianni atorfinitsitsinermik oqartussaasoq ulluunerani paaqqinnittarfimmi aqutsisup allaffissornikkut suliassaanik isumaginninnginnissaanik aalajangersinnaanngilaq, atorfinitsitsinermik oqartussaasoq § 22, imm. 1 naapertorlugu perorsaanermik ilinniaqarnissamik piumasaqaammit immikkut akuersissuteqarsimappat.
  Imm. 2. Ulluunerani paaqqinnittarfimmi aqutsisoq allaffissornikkut suliassanik isumaginninngippat inini sulisut amerlassusissaannut ilaatinneqassaaq.

 

  § 22.  Ulluunerani paaqqinnittarfimmi aqutsisoq perorsaasutut ilinniarsimassaaq. Atorfilli perorsaasutut ilinniarsimasumit inuttalerneqarsinnaanngippat atorfinitsitsinermut oqartussaasoq perorsaasutut ilinniarsimanissamik piumasaqaammik atortitsinnginnissamik immikkut akuersissuteqarsinnaavoq, atorfimmut qinnuteqartoq ilinniakkamik allamik naleqquttumik inuussutissarsiornermiluunniit naleqquttumik misilittakkamik tunuliaqutaqarluni atorfimmut piukkunnaateqarpat.
  Imm. 2.  Ulluunerani paaqqinnittarfimmi aqutsisoq inini sulisut amerlassusilerneqarnerisa avataanniippoq.
  Imm. 3.  Ulluunerani paaqqinnittarfinni kommuninit ingerlanneqartuni innersuussuteqarnerata kingorna kommunalbestyrelse aqutsisumik atorfinitsitsissaaq, takuuk § 18, imm. 2.

Kommunit ulluunerani paaqqinnittarfiini sulisut amerlassusilerneqarnerat

 

  § 23.  Meeqqat eqimattat tamarmik immikkut sulisoqarnikkut amerlassusilerneqarsimassapput ikinnerpaamik perorsaasumik ataatsimik, perorsaasutut ilinniagalimmik ataatsimik ikiortimillu ataatsimik. Ilinniartut tapersersuisullu sulisut amerlassusilerneqarnerannut ilaatinneqanngillat.
  Imm. 2.  Kommunalbestyrelse ulluunerani paaqqinnittarfik suleqatigalugu aalajangersimasumik nalileereernermi sulisut amerlassusilerneqarnerannit utaqqiisaasumik immikkut akuersissuteqarsinnaavoq. Utaqqiisaasumik immikkut akuersissut qaammatit pingasut tikillugit sivisussuseqarsinnaavoq, kingornalu immikkut akuersissummik nalileeqqittoqassalluni.
  Imm. 3.  Ulluunerani paaqqinnittarfiup ammasarfiini meeqqani eqimattani tamani sulisut ikinnerpaamik marluussapput, pinerillu tamaasa ulluunerani paaqqinnittarfimmi perorsaasoq ikinnerpaamik ataaseq sulissalluni.
  Imm. 4.  Ulluunerani paaqqinnittarfimmi sulisut amerlassusilerneqarnerisa saniatigut igaffimmi eqqiaanermillu sulisoqassaaq.
  Imm. 5.  Kommunalbestyrelse imm. 1-4 aallaavigalugit ulluunerani paaqqinnittarfinni ataasiakkaani sulisut amerlassusissaannik aalajangersaassaaq aqutsisullu saniatigut sulisunik atorfinitsitsisarnernut najoqqutassiorluni.

Angajoqqaat siulersuisui

 

  § 24.  Kommunalbestyrelse persorsaanikkut sulisut, meeqqap angajoqqaatut oqartussaasui pilersuisuiusuisalu akornanni suleqatigiinneq siuarsarniarlugu ulluunerani paaqqinnittarfimmi angajoqqaat siulersuisuinik pilersitsissaaq.
  Imm. 2.  Ulluunerani paaqqinnittarfinni kommuninit ingerlanneqartuni tamani ulluunerani paaqqinnittarfiup aqutsisua ukiumut ikinnerpaamik pingasoriarluni angajoqqaat siulersuisuinik ataatsimiigiaqqusissaaq.
  Imm. 3.  Angajoqqaat siulersuisuisa suliassaraat:
1)  ulluunerani paaqqinnittarfimmi sammisassanik suliniutinilluunniit siunnersuuteqarlunilu aaqqissuussineq,
2)  perorsaanikkut ukiumut pilersaarusioqataaneq,
3)  perorsaanikkut ukiumut pilersaarutinik ukiumut marloriarlutik malitseqartitsineq kiisalu ulluunerani neqeroorummi meeqqat pisariaqartitaannut naleqqussaaneq, aamma
4)  illumi aaqqissuussinermik allannguinermillu siunnersuuteqarneq.
  Imm. 4.  Angajoqqaat siulersuisui ataatsimiinnerni tamani imaqarniliortassapput, ataatsimiinnerup kingorna kommunalbestyrelsimut imaluunniit paaqqinnittarfimmi imminut pigisumi siulersuisunut tunniunneqartussamik.

  Imm. 5.  Naalakkersuisut angajoqqaat siulersuisui pillugit malittarisassanik erseqqinnerusunik aalajangersaasinnaapput.

 

Ulluunerani paaqqinnittarfiit imminnut pigisut aqunneqarnerat

 

  § 25.  Ulluunerani paaqqinnittarfinni imminnut pigisuni pingaarnertut aqutsisussanik siulersuisunik pilersitsisoqassaaq.
  Imm. 2.  Ulluunerani paaqqinnittarfinni imminnut pigisuni ulluunerani paaqqinnittarfimmi aqutsisoq ulluunerani paaqqinnittarfiup siulersuisuanit atorfinitsinneqassaaq. Siulersuisut sulisut sinnerinik atorfinitsitsinermut najoqqutassiussapput.

 

Kapitali 4

Angerlarsimaffimmi paarsineq

Angerlarsimaffimmi paarsisartunik angerlarsimaffimmilu paarsisarfinnik akuersineq

 

  § 26.  Kommunalbestyrelse angerlarsimaffimmi paarsisartut angerlarsimaffimmilu paarsisarfiup qinnuteqaateqareernerisa kingorna allakkatigut akuersissuteqareerpat, aatsaat angerlarsimaffimmi paarsisartut imaluunniit angerlarsimaffimmi paarsisarfik meeqqanik tigusaqarsinnaapput.
  Imm. 2.  Angerlarsimaffimmi paarsisartup timikkut tarnikkullu pisinnaassuseqarnissaa perorsaanikkullu uummarissaataasunik sammisassaqartitsinernik neqerooruteqarnissamut piginnaasaqarnissaa imm. 1 naapertorlugu akuersinissamut piumasaqaatigineqarpoq. Angerlarsimaffimmi paarsisartoq pineqartullu illoqatigisinnaasai tamarmik peqqissutsimut nalunaarummik qaammatinit pingasunit pisoqaanerunngitsumik takutitsisinnaassapput.
  Imm. 3.  Angerlarsimaffimmi paarsisarfik akuerineqarsinnaanngilaq:

1)  angerlarsimaffimmi paarsisartup taassumaluunniit inoqutaasa ilaasa, meeqqanik paarsinermi ikiuuttussat, pineqaatissinneqarsimannginnermik uppernarsaataanni takuneqarsinnaappat, pineqartoq ukiut kingulliit 10-t iluanni ilaqutariissutsip iluani pinerluuteqarsimasutut, kinguaassiutitigut pinerluuteqarsimasutut imaluunniit inummut navianaatilimmik pinerluuteqarsimasutut eqqartuunneqarsimappat,

2) angerlarsimaffimmi paarsisartup taassumaluunniit inoqutaasa ilaasa meeqqanik pinerliisimannginnermut uppernarsaataanni takuneqarsinnaappat, pineqartoq ilaqutariissutsip iluani pinerluuteqarsimasutut imaluunniit kinguaassiutitigut pinerluuteqarsimasutut eqqartuunneqarsimappat.

3)  angerlarsimaffimmi paarsisarfimmi tuniluuttartumik nappaateqartoqarpat.
  Imm. 4.  Angerlarsimaffimmi paarsineq tamanit katersuuttarfimmi ingerlanneqarpat aalajangersakkani imm. 2, oqaaseqatigiit aappaat aamma imm. 3 angerlarsimaffimmi paarsisartumut taamaallaat atuutissaaq.
  Imm. 5.  Angerlarsimaffimmi paarsisarfiup meeqqamik tigusisinnaanissaanut namminerisamik angerlarsimaffiup tamanilluunniit katersuuttarfiup akuerineqannginnerani illumi atukkat kommunalbestyrelsimit nalilersorneqaqqaassapput.
  Imm. 6.  Kommunalbestyrelse naliliippat, angerlarsimaffimmi paarsisartumut angerlarsimaffinnullu paarsisarfiusunut akuersissummut piumasaqaatit naammassineqarsinnaajunnaarsimasut, akuersissut utaqqiisaagallartumik atorunnaarsinneqassaaq imaluunniit pisariaqanngitsumik utaqqissussinatik atorunnaarsinneqassaaq.

Angerlarsimaffimmi paarsinermik ingerlatsineq

 

  § 27.  Kommunalbestyrelse angerlarsimaffimmi paarsisarnissamik qinnuteqartumut meeqqanik suli atualerneqanngitsunik katillugit sisamanik paarsisarnissaanut akuersissuteqarsinnaavoq. Angerlarsimaffimmi paarsisarfimmi nammineq meerarisat arfinillit inorlugit ukiullit meeqqallu angerlarsimaffimmi paarisartakkat tallimanit amerlanerussanngillat.
  Imm. 2.  Angerlarsimaffimmi paarsisartoq ullunik 14-inik killilerlugu amerlanerusunik paarsaqarsinnaavoq imaluunniit angerlarsimaffimmi paarsisartumut allamut taartaalluni.

  Imm. 3.  Angerlarsimaffimmi paarsisartoq qaammatit pingasut iluanni amerlanerpaamik marloriarluni amerlavallaanik paarsaqarsinnaavoq imaluunniit angerlarsimaffimmi paarsisartumut allamut taartaalluni.

Kommunit angerlarsimaffinni paarsisartuinut angajoqqaat siulersuisui

 

  § 28.  Angerlarsimaffinni paarsisartuni tamani angerlarsimaffimmi paarsisartoq angajoqqaat siulersuisuinik ukiumut ikinnerpaamik pingasoriarluni aggersaasassaaq. Angajoqqaat siulersuisui meeqqap angajoqqaatut oqartussaasuinik, pilersuisuiusuinik aamma angerlarsimaffimmi paarsisartumik inuttaqarput. Najugaqarfimmi ataatsimi angerlarsimaffimmi paarsisartut arlaqarpata angerlarsimaffimmi paarsisartunut tamanut ataatsimoorussamik angajoqqaat siulersuisuinik pilersitsisoqarsinnaavoq.
  Imm. 2.  Angajoqqaat siulersuisuisa suliassaraat:
1)  meeqqanut, soorlu aamma angajoqqaatut oqartussaasunut imaluunniit pilersuisuiusunut tunngatillugu anguniagalimmik sulinermut atatillugu angerlarsimaffimmi paarsisarfimmi sammisassanik iliuusissanillu siunnersuuteqarneq aaqqissuussinerlu, aamma tassunga ilanngullugu
2)  pissutsit meeqqat angerlarsimaffimmi paarsisarfiusumi ulluinnarisaannut ersarissumik pingaaruteqartut pillugit aalajangiinerit.
  Imm. 3.  Angajoqqaat siulersuisui ataatsimiinnerni tamani imaqarniliortassapput, ataatsimiinnerup kingorna kommunalbestyrelsimut tunniunneqartussamik.

 

Kapitali 5
Immikkut ittumik sammisassaqartitsinissamut neqeroorutit

 

  § 29.  Kommunalbestyrelse meeqqanut suli atualinngitsunut, ulluunerani paaqqinnittarfimmiinneq ajortunut imaluunniit angerlarsimaffimmi paarineqarneq ajortunut sammisassaqartitsinernik neqerooruteqassaaq. Sammisaqartitsinissanut neqeroorutinut taakkununnga peqataanermut akiliuteqarnissamik piumasaqartoqassanngilaq.
  Imm. 2.  Sammisaqartitsinissamik neqeroorutit tassaapput piffissap ilaa neqeroorutit, meeqqanut suli atualinngitsunut inersimasumik ilaqarluni, meeqqap inerikkiartorfissaasa ataatsip arlallilluunniit iluanni anguniagaqartumik sammisaqartitsinermik imaqartut, ukiuanut naleqquttut.
  Imm. 3.  Sammisassaqartitsinermik neqeroorutinik pilersitsinermut aallartitsinermullu ataqatigiissaarisumik toqqaanissamut kommunalbestyrelse pisussaaffeqarpoq. Ataqatigiissaarisoq najukkami peqatigiiffinnik, inunnik isumalluutinik allanillu naapertuuttunik suliamik ilisimasalinnik suleqateqassaaq.

 

Kapitali 6
Ataatsimut aalajangersakkat

 

Meeqqap inerikkiartornera atugarissaarneralu

 

  § 30.  Ulluunerani neqeroorut meeqqat ataasiakkaat ineriartornerannik atugarissaarnerannillu tamakkiisumik naliliineq aallaavigalugu ataavartumik nalilersuillunilu uppernarsaasiortassaaq ukiumullu ikinnerpaamik marloriarluni ineriartornermik nassuiaasiortassaaq.
  Imm. 2.  Ineriartornermik nassuiaatit angajoqqaatut oqartussaasut, pilersuisuiusut naapertuuttumillu suliamik ilisimasallit suleqatigalugit malitseqartinneqartassapput.
  Imm. 3.  Ulluunerani neqeroorut meeqqap ineriartornerata ingerlaqqinnissaa pillugu suleqatigiinnissaq siunertaralugu angajoqqaatut oqartussaassusilinnik aamma imaluunniit pilersuisuiusunik ukiumut ikinnerpaamik marloriarluni oqaloqateqartarnissamik pisussaaffeqarpoq.

 

  § 31.  Meeqqap ulluunerani neqeroorummit ulluunerani neqeroorummut allamut nuunnerani meeqqap isumassorneqarneranik pisariaqartitaanillu isumaginninnissamut atorneqartussanik ulluunerani neqeroorummi qimalikkami sulisut ulluunerani neqeroorummi nuuffissami sulisunik suleqateqassapput meerarlu pillugu paasissutissanik naapertuuttunik ingerlatitseqqillutik.
  Imm. 2.  Naalakkersuisut paasissutissanik naapertuuttunik ingerlatitseqqinnermi malittarisassanik aalajangersaassapput.

 

Misissuineq siusissukkullu iliuuseqarneq

 

  § 32.  Kommunalbestyrelse meeraq pingasunik ukioqalerpat peqqissusaanik ineriartorneranillu pinngitsoorani misissuissaaq. Misissuineq Naalakkersuisunit ineriartortinneqartut takussutissat, nakkutilliinermut nalilersuinermullu atortut tunngavigalugit ingerlanneqassaaq.

  Imm. 2. Misissuineq ilaatigut tullinnguuttunik imaqassaaq:

1)  Timimik aqutsisinnaaneq.

2)  Inooqataanermi ilisarsisinnaaneq.

3)  Peqqissutsikkut atukkat.

4)  Pissusilersorneq tapersersorneqarnissamik neqerooruteqarnermut pissutissaqartitsisinnaasoq.

5)  Ilaqutariit aamma attaveqarfiit.

  Imm. 3. Naalakkersuisut meeraq pingasunik ukioqalerpat misissuinissamut siusissukkullu iliuuseqarnissamut malittarisassanik erseqqinnerusunik aalajangersaasinnaapput. 

 

§ 33.  Kommunalbestyrelse meeraq tallimanik ukioqalerpat atualernissamut piareersimaneranik pinngitsoorani misissuissaaq. Misissuineq Naalakkersuisunit ineriartortinneqartut takussutissat, nakkutilliinermut nalilersuinermullu atortut tunngavigalugit ingerlanneqassaaq.

  Imm. 2. Misissuineq ilaatigut tullinnguuttunik imaqassaaq:

1)  Timimik aqutsisinnaaneq.

2)  Inooqataanermi ilisarsisinnaaneq.

3)  Peqqissutsikkut atukkat.

4)  Pissusilersorneq tapersersorneqarnissamik neqerooruteqarnermut pissutissaqartitsisinnaasoq.

5)  Oqaatsit.

6)  Imminut ikiorsinnaaneq.

  Imm. 3. Naalakkersuisut meeraq tallimanik ukioqalerpat misissuinissamut siusissukkullu iliuuseqarnissamut malittarisassanik erseqqinnerusunik aalajangersaasinnaapput. 

 

Perorsaanikkut tarnikkullu atukkatigut siunnersuineq

 

  § 34.  Kommunalbestyrelse meeqqamut pitsaanerpaaq qulakkeerniarlugu ulluunerani neqeroorutinut, angajoqqaatut oqartussaasunut pilersuisuiusuinullu perorsaanikkut tarnikkullu atukkatigut siunnersuinermik isumaginnissaaq.

 

  § 35. Naalakkersuisut meeqqat suli atualinngitsut pillugit suliassaqarfimmi perorsaanikkut tarnikkullu atukkatigut ilisimatusarnermik isumaginnissapput.

 

Ineriartorneq misileraallunilu aaqqiissutit

 

  § 36.  Naalakkersuisut meeqqanut ulluunerani neqeroorutinik nutaanik ilusilinnik ineriartortitsissapput, tamatumunnga ilanngullugu meeqqanut ulluunerani neqeroorutit allaanerusut najugaqarfimmi atukkanut naleqqussarneqarsimasut.
  Imm. 2.  Naalakkersuisut ulluunerani neqeroorutini perorsaanikkut sulineq pillugu najoqqutassanik ineriartortitsissapput.

 

  § 37.  Naalakkersuisut kommunalbestyrelsip innersuussinera malillugu kommunimi meeqqanut suli atualerneqanngitsunut ulluunerani neqeroorutit pillugit misiliilluni aaqqiissuteqarnissamik akuersissuteqarsinnaapput.
  Imm. 2.  Kommunimi misiliilluni aaqqiissut sivisunerpaamik ukiuni pingasuni atuussinnaavoq.
  Imm. 3.  Imm. 1 naapertorlugu kommunimi misiliilluni aaqqiissuteqarnermut atatillugu kommunalbestyrelse ukiut tamaasa nassuiaasiortassaaq Naalakkersuisunut tunniunneqartussamik.

 

  § 38. Naalakkersuisut kommunalbestyrelse suleqatigalugu perorsaariaatsit allaffissornikkullu suleriaatsit atuuttut pitsanngorsarnissaat siunertaralu ataqatigiissumik aaqqissuussinernik sakkunillu misiliilluni aaqqiissutinik pilersitsisinnaavoq.
  Imm. 2.  Misiliilluni aaqqiissut sivisunerpaamik ukiuni pingasuni atuussinnaavoq. Misiliilluni aaqqiissut pineqartoq sivisunerpaamik ukiunik marlunnik sivitsorneqarsinnaavoq.
  Imm. 3.  Imm. 1 naapertorlugu kommunimi misiliilluni aaqqiissuteqarnermut atatillugu ukiut tamaasa nalunaarusiortoqartassaaq Naalakkersuisunut tunniunneqartussamik.

 

Kisitsisitigut paasissutissat

 

  § 39.  Kisitsisitigut paasissutissanik suliaqarnissamut atatillugu Naalakkersuisut noqqaassutaannik kommunalbestyrelse paasissutissanik nassiussinissamut pisussaaffeqarpoq.
  Imm. 2.  Kisitsisitigut paasissutissat assigisaallu qanoq annertutiginissaannut Naalakkersuisut malittarisassanik aalajangersaasinnaapput, imm. 1 naapertorlugu nassiunneqartussanik, aamma qanoq nutarterneqartarnersut nassiunneqartarnersullu pillugu.

 

Tamakkiisumik akisussaaffik

 

  § 40.  Kommunalbestyrelse kommunimi meeqqat inuusuttullu pillugit politikiliussaaq.
  Imm. 2.  Kommunalbestyrelse inoqarfinni anginerni minnernilu meeqqanut ulluunerani neqeroorutit akornanni perorsaanikkut isumassarsiornissaq siunertaralugu aalajangersimasumik attaveqarfissamut ilisimasanik ingerlatitseqqittassaaq.
  Imm. 3.  Kommunalbestyrelsip ulluunerani neqeroorutinut ataasiakkaanut perorsaanikkut ukiumut pilersaarutinik suliaqarnissaq tamatumunngalu nalilersuinissaq pingaarnertut akisussaaffigaa.
  Imm. 4. Assersuutigalugu meeqqap ilinniarniarneranut, ineriartorneranut imaluunniit inuttut ajornartorsiutaanut tunngatillugu immikkut suliniuteqarnissap pisariaqartinneqaratarsinnaanera eqqarsaatigalugu iliuuseqapallannissap tunngavilerneqarnissaanut meeqqallu malinnaaviginissaanut atatillugu kommunalbestyrelsip ulluunerani paaqqinnittarfiup aqutsisuata meeqqanut ataasiakkaanut tamanut digitalimik imaluunniit tigussaasumik mappinik pilersitsinissaa nutarterinissaalu qulakkiissavaa. Tamatuma kingorna meeqqap mappia atuarnerup aallartinneranut atatillugu atuartup atuarfianut nuunneqassaaq.

 

Nakkutilliineq

 

  § 41.  Naalakkersuisut meeqqanut suli atualerneqanngitsunut perorsaanikkut inerikkiartuutaasunik ulluunerani neqeroorutinik pingaarnertut nakkutilliissapput.

 

§ 42.  Kommunalbestyrelse oqartussaasut naapertuuttut suleqatigalugit meeqqanut ulluunerani neqeroorutinik tamanik nalinginnaasumik persorsaanikkullu nakkutilliissaaq.

  Imm. 2.  Ulluunerani neqeroorutinik tamanik nakkutilliineq ukiumut ikinnerpaamik pingasoriarluni ingerlanneqartassaaq, taakkunannga ukiumut ikinnerpaamik ataaseq nalunaaqqaarani nakkutilliinerussalluni.

  Imm. 3.  Kommunalbestyrelse annertusisamik nakkutilliissaaq, ulluunerani neqeroorummi perorsaanikkut ilikkartitsinissamut avatangiisit pitsaassusaat pissutsilluunniit allat ernumassutissaqalersitsisutut nalilerneqarpata.

  Imm. 4.  Kommunalbestyrelse annertusisamik nakkutilliissaaq iliuusissatullu pilersaarusiorluni ulluunerani neqeroorummi perorsaanikkut ilikkartitsinissamut avatangiisit pitsaassusaat pissutsilluunniit allat ernumanartorujussuartut nalilerneqarpata. Annertusisamik nakkutilliineq iliuusissatullu pilersaarusiorneq pissutsit ernumanartorujussuit paasineqarpata ingerlaannaq ingerlanneqassapput.

  Imm. 5.  Iliuusissatut pilersaarut ulluunerani neqeroorummi aqutsisoq oqaloqatigalugu suliarineqassaaq ulluuneranilu neqeroorummi perorsaanikkut ilikkartitsinissamut avatangiisit pitsaassusaat pissutsilluunniit allat pitsanngorsarnissaannut qanoq sulisoqassaneranik qanorlu malitseqartitsisoqassaneranik nassuiaassalluni. Angajoqqaat siulersuisui iliuusissatut pilersaarut pillugu ilisimatinneqassapput oqaaseqaateqarnissamullu periarfissaqassallutik. Angajoqqaat siulersuisuinik ilisimatitsineq sukkanerpaaq atorlugu isumagineqassaaq angajoqqaallu siulersuisuisa oqaaseqaatigisinnaasaat sukkanerpaaq atorlugu tunniunneqassapput.

  Imm. 6.  Naalakkersuisut kommunalbestyrelsip kommunimi ulluunerani neqeroorutinik tamanik nalinginnaasumik perorsaanikkullu nakkutilliinera pillugu malittarisassanik erseqqinnerusunik aalajangersaasinnaapput.

 

Aningaasalersuineq

 

  § 43.  Ulluunerani paaqqinnittarfinnut, angerlarsimaffinni paarsisarfinnut immikkullu sammisaqartitsinissamik neqeroorutinut aningaasartuutit Inatsisartut inatsisaat manna naapertorlugu kommuninit akilerneqassapput, taamaattoq takuuk § 44.

Imm. 2.  Namminersorlutik Oqartussat ulluunerani paaqqinnittarfiit pilersinnerinut tapiissuteqarsinnaapput.

 

  § 44.  Kommunalbestyrelse kommunimi meeqqat suli atualinngitsut ulluunerani neqeroorutiniinnerinut akileeqqusisinnaavoq. Akiliutissaq aalajangerneqassaaq, kommunimi meeqqanut suli atualinngitsunut ulluunerani neqeroorutinut kommunip aningaasartuutai akiliisussaatitaasullu aningaasaqarnikkut atugarisai imaluunniit atugarisaat tunngavigalugit.

  Imm. 2.  Meeqqanut suli atualinngitsunut kommunimi ulluunerani neqeroorutinik atuinermut akiliisussaatitaaneq meeqqap pilersuisuiusuaniippoq imaluunniit pilersuisuiusuiniipput. 

  Imm. 3.  Naalakkersuisut imm. 1 aamma 2 naapertorlugit meeqqat meeqqanut suli atualinngitsunut kommunip ulluunerani neqeroorutaaniinnerinut akiliutissat pillugit malittarisassanik aalajangersaasinnaapput, tamatumunnga ilanngullugit isertitanut naleqqussaanerit, akiliutissanik kinguaattoortoqartillugu meeqqamik anisitsisinnaaneq, aamma kommunimi meeqqanut ulluunerani neqeroorutinik atorunnaarsitsineq nalunaaruteqartarnerlu pillugit aalajangersakkat.

Naammagittaalliorsinnaaneq

 

  § 45.  Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit kommunalbestyrelsip aalajangiineri pillugit § 8 aamma § 26 naapertorlugit Isumaginninnermi Naammagittaalliuuteqartarfimmut naammagittaalliuutigineqarsinnaapput.

  Imm. 2.  Inatsisartut inatsisaanni matumani aalajangersakkat allat malillugit kommunalbestyrelsip aalajangiineri allaffissornikkut oqartussaasumut allamut naammagittaalliuutigineqarsinnaanngillat.

  Imm. 3.  Malittarisassat Inatsisartut inatsisaannit matumannga tunngavilimmik suliaasut malillugit kommunalbestyrelsip aalajangiineri allaffissornikkut oqartussaasumut allamut naammagittaalliuutigineqarsinnaanngillat.

Atuutilernera

 

  § 46.  Inatsiartut inatsisaat una ulloq 1. januaari 2024 atuutilissaaq.
  Imm. 2.  Ilutigitillugu Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaattut siunnersuut nr. 16, 3. december 2012-meersoq atorunnaassaaq.
  Imm. 3.  Imm. 2-mi taaneqartoq Inatsisartut inatsisaat naapertorlugu aalajangersakkat atuutilersinneqarsimasut imaluunniit attanneqartut inatsit una imaluunniit Inatsisartut inatsisaat alla naapertorlugu tunngavilerneqartunik taarserneqarnissaasa atorunnaarsinneqarnissaasaluunniit tungaannut atuutissapput.

Namminersorlutik Oqartussat, ulloq 20. novembari 2023

 

 

Múte Bourup Egede (atsior.)

Naalakkersuisut Siulittaasuat