Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaattut siunnersuut nr. 16, 3. december 2012-meersumi § 5, imm. 4 naapertorlugu aalajangersarneqarpoq:

Kapitali 1

Nakkutilliinerup atuuffii

  § 1.  Kommunalbestyrelsip meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaanni § 5, imm. 2 naapertorlugu nakkutilliinini meeqqeriviit kommuninit namminersortunillu pigineqartut ingerlatsinissamut kommunalbestyrelsimit isumaqatigiissuteqarfigineqarsimasut pitsaassusaannik imarisaannillu ineriartortitsisumik qulaajaasuussasoq qulakkiissavaa.
  Imm. 2.  Kommunalbestyrelsimit meeqqerivinni perorsaanikkut sulineq Inatsisartut inatsisaanni siunertanut aalajangersakkanik naammassinninnersoq nakkutigineqassaaq, tassunga ilanngullugu perorsaanikkut suleriaaseq piumasaqaatinik Inatsisartut inatsisaanni inatsisinilu allani atuarneqarsinnaasunik, kiisalu kommunalbestyrelsip meeqqeriviullu nammineq anguniagaanik killissarititaanillu naammassinninnersoq.
  Imm. 3.  Imm. 2-mi pissutsit eqqaaneqartut saniatigut pinngortarfimmi isumannaallisaaneq, ikuallattoornissamut tunngasut, eqqiluisaarneq peqqinnissarlu nakkutilliinermut ilaatinneqarput.

  § 2.  Kommunalbestyrelsimit kommunimi meeqqeriviit tamarmik nakkutiginninnissamut ersarissumik tunngaveqartumik assigiimmik nakkutilliivigineqartarnissaat qulakkeerneqassaaq.

Kapitali 2

Nakkutilliinermut killiliussat, tunngaviit akulikissutsit

  § 3.  Kommunalbestyrelsi nakkutilliinermut killiliussanik aalajangersaassaaq aamma nakkutilliinertik avammut saqqummiunneqassaaq kommunip nittartagaatigut.
  Imm. 2.  Kommunalbestyrelsip nakkutilliineranut killiliussani nalunaarsorneqarsimassaaq:
1)  Nakkutilliinerup siunertaa,
2)  suna nakkutilliivigineqarnersoq,
3)  nakkutilliinerup akulikissusia
4)  aamma nakkutilliineq qanoq aaqqissuunneqarsimanersoq, aamma
5)  nakkutilliinermut ilanngullugu atuisunik misissuineq ingerlanneqarnersoq.

  § 4.  Kommunalbestyrelsip nakkutilliinera oqaluuserisassanik aalajangersimasunik tunngaveqarluni ingerlanneqassaaq, taanna kommunimi meeqqerivinnut tamanut assigiimmik atorneqassaaq. Immikkut illuinnartumik pisoqartillugu oqaluuserisassat meeqqerivinnut ataasiakkaanut sammitinneqarsinnaapput, meeqqeriviup pineqartup ilusiata tamanna pisariaqartippagu.
  Imm. 2.  Nakkutilliinermut tunngavigineqartumi piumasaqaatinik allassimasunik, allaaserinninnernik pitsaasunik imaluunniit periutsimik immikkut ittunik sakkunilluunniit kommunalbestyrelsi atuissaaq, naliliiviginiarlugu:
1)  meeqqeriviup ilinniarfiusussatut avatangiisii,
2)  meeqqat atugarissaarnerat aamma
3)  meeqqeriviup kommunip anguniagaanik naammassinninnera.

  § 5.  Kommunalbestyrelsip meeqqerivinnik nakkutilliinera arlaleriarluni ingerlanneqartassaaq aamma killiliussani allassimasut malillugit akulikissuseq piffissamillu atuineq aalajangersimasoq atorneqartassaaq, tak. § 3, imm. 2-mi, nr. 3.
  Imm. 2.  Meeqqeriviit tamarmik § 1, imm. 1 naapertorlugu amerlaqatigiissunik nalunaarutigineqareersimasunik nakkutilliivigineqartassapput, immikkut soqutigineqartuugaluarpataluunniit nalunaaruteqaqqaaranilu nakkutilliivigineqaraluarpata.

Kapitali 3

Arlaannaannulluunniit attuumassuteqannginneq

  § 6.  Kommunalbestyrelsip nakkutilliinera naliliinissamut toqqammavissat kinaassusersiunngitsumik paasineqarsinnaasut aallaavigalugit arlaannaannulluunniit attuumassuteqanngitsumik nakkutilliinermut tapersersuisumik ingerlanneqartassaaq.
  Imm. 2.  Arlaannaannulluunniit attuumassuteqanngitsumik nakkutilliinermut tapersersuineq pissaaq, kommunalbestyrelsip:
1)  perorsaanikkut suleriaatsimut piumasaqaatinik takussutissanillu meeqqat atugarissaarnerannut tapersersuutaasinnaasumik, ilinniarfiusussatut avatangiisinik pitsaasunik, kommunip anguniagaanik aamma suliniuteqarfiusussanik aalajangersaaneratigut,
2)  perorsaanikkut suleriaatsimik meeqqat atugarissaarnerannut tapersersuutaasinnaasumik, ilinniarfiusussatut avatangiisinik pitsaasunik, kommunip anguniagaanik aamma suliniuteqarfiusussanik allaaserinninnernik pitsaasumik oqaasertalersuineratigut, imaluunniit
3)  perorsaanikkut suleriaaseq taanna meeqqat atugarissaarnerannut tapersersuutaaneranik, ilinniarfiusussatut avatangiisit pitsaasuunerannik, kommunip anguniagaanik aamma suliniuteqarfiusussanik uuttuinissamut periutsimik sakkumilluunniit atuinermigut.

  § 7.  Pisortatigoortumik nakkutilliineq § 8, imm. 1-imi, nr. 1 naapertorlugu inummit suliassanik allanik meeqqerivimmut tunngassuteqartunik isumagisaqareersumit, tassunga ilanngullugu ilitsersuinermik imaluunniit aqutsinermik suliaqartumit isumagineqaqqusaanngilaq, suliassaqarfinnik assigiinngitsunik suliaqarnermut atatillugu akisussaaffiit ersarissumik immikkoortinneqarnissaat qulakkeerneqarsimappat.
  Imm. 2.  Kommunalbestyrelsimi ilaasortat nakkutilliinermi peqataaqqusaanngillat.

Kapitali 4

Nakkutilliinerup ilusaa aamma nakkutilliinerup annertussusia

  § 8.  Kommunalbestyrelse imatut nakkutilliissaaq:
1)  pisortatigoortumik nakkutilliinertut, tamanna nalunaaqqaarluni nalunaaqqaarnaniluunniit nakkutilliinertut ingerlanneqassaaq, aamma
2)  pisortatiguunngitsumik nakkutilliinertut, ingerlatsiveqarfiup meeqqeriviillu ataasiakkaat akornanni ingerlaavartumik attaveqatigiittarneq ilanngullugu.
  Imm. 2.  Pisortatigoortumik nakkutilliineq imm. 1-imi, nr. 1 naapertorlugu aaqqissuunneqassaaq, oqaasertalerneqarlunilu nakkutilliinermik ingerlatsisoqarneranik paatsoortoqannginnissaa siunertaralugu.

  § 9.  Pisortatigoortumik nakkutilliineq meeqqerivinni ataasiakkaani tamani ikinnerpaamik ukiumut ataasiarluni nalunaaruteqareerluni nakkutilliinertut aamma ikinnerpaamik ukiumut ataasiarluni  nalunaaruteqaqqaarnani nakkutilliinertut ingerlanneqartassaaq.

  § 10.  Nalunaaruteqareerluni nakkutilliinermi periuutsitut atorneqarsinnaavoq:
1)  meeqqerivimmi ulluunerani pisortamik naapeqateqarneq
2)  perorsaanikkut avatangiisini angalaarunneqarneq,
3)  sulisunik oqaloqateqarneq imaluunniit apeqqarissaarneq,
4)  meeqqeriviup pisortaanut allakkatigut saaffiginninnerit,
5)  meeqqanut meeqqerivimmut attuumassuteqartunut angajoqqaanik oqaloqateqarnerit
6)  kommunip meeqqeriviini atuisut ataatsimoorfiannik aamma meeqqerivinni namminersortuni siulersuisunik oqaloqateqarnerit
7)  allaganngorlugit paasissutissat, aamma
8)  meeqqerivimmi perorsaanikkut ataqatigiissitsinerit aaqqissuulluakkamik misissuiffigineqarnerat
  Imm. 2.  Nalunaaruteqaqqaarnani nakkutilliinermi imm. 1-imi, nr. 1-3-mi periutsit eqqaaneqartut atorneqarsinnaapput.
  Imm. 3.  Nakkutilliinernut ikinnerpaamik nakkutilliinermut ataatsimut § 8 naapertorlugu ilaatinneqassapput, meeqqeriviup nunaminertaqarfiani angalaarunneqarneq kiisalu meeqqeriviup pisortaanik sulisunillu aamma ajornanngippat meeqqerivimmi meeqqanut angajoqqaanik oqaloqateqarneq.

  § 11.  Nalunaaruteqareerluni nakkutilliisut meeqqeriviup aqutsisuinik oqaloqatigiinnissamut pitsaasumik toqqammavissaqarnissaq, aamma illuatungerisat attuumassutillit piareersarnissaminnut peqataanissaminnullu periarfissaqartillugit qulakkiissavaat.
  Imm. 2.  Nalunaaruteqaqqaarnani nakkutilliinerit ima pilersaarusiorneqassapput, taamaasilluni ulluunerani neqeroorut pineqartoq nakkutilliinissamut piareersarnissaminut angumersisinnaassanngilaq,  ajornartorsiutillu attuumassutillit nakkutilliisunit malugineqanngitsoortillugit.
  Imm. 3. Nalunaaruteqareerluni nakkutilliinerit, imm. 1 naapertorlugu, nakkutilliisoqartinnagu ikinnerpaanik sapaatip akunneri 2 sioqqullugit nalunaarutigineqassapput.

Nalinginnaasumik nakkutilliineq

  § 12.  Nalinginnaasumik nakkutilliinerit nalunaaruteqareerluni nalunaaruteqaqqaarnaniluunniit meeqqerivinni nakkutilliinertut ingerlanneqartassapput nakkutilleeriaaseq meeqqeriviup kommunalbestyrelsillu akornanni aaqqissuussamik atassuteqartarnermik oqaloqateqartarnermillu aallaaveqartoq atorlugu.
  Imm. 2.  Nalinginnaasumik nakkutilliinerup minnerpaamik erseqqissaavigissavaa:
1)  meeqqerivik kommunalbestyrelsimit akuerineqarsimanersoq aamma akuerineqarnermut uppernarsaammik meeqqerivimmi ersittumik inissinneqarsimasumik peqarnersoq,
2)  akuerineqarnermut uppernarsaat paasissutissanik inatsisitigut pisussaaffigineqartunik imaqarnersoq,
3)  meeqqerivimmi akisussaaffimmik, piginnaasanik suliassanillu agguarneqarnerannut ersarissunik ilitsersuuteqarnersoq, tassunga ilanngullugu ilitsersuutit allaganngorlugit igineqarnersut, naluneqarnatik tamanillu pissarsiariuminarnersut,
4)  meeqqat pissutsini toqqissisimanartuniitinneqarnersut, aamma ulluinnarni sammisassaqartitsinerit isumannaatsunik killissaqartinneqarlutik ingerlanneqartarnersut, tassunga ilanngullugu pinnguartarfiup aaqqissuussaanera aamma pinnguartarfimmi atortut isumannaatsuunersut,
5)  eqqiluisaarnissamut pissutsit ajunnginnersut,
6)  meeqqanik angallassineq sunaluunniit tassunga ilanngullugu imaatigut angallassineq pissutsit toqqissisimanartut atorlugit pisarnersoq,
7)  tupa avatangiisillu pujortarfiunnginnissaasa qulakkeerneqarnissaa pillugu inatsisit eqqortinneqarnersut,
8)  pissutsit sillimmasiinermut tunngasut eqqortinneqarnersut,
9)  sulisunik nutaanik ilinniartitsineq naammaginartumik ingerlanneqartarnersoq, tassunga ilanngullugu paarlattaasartut taartaasartullu,
10)  napparsimalluni sulinngitsoortarnerit amerlassusiat
11)  sulisut sulinngitsoortarnerannik suliaqartarnermut ingerlatseriaatsimik peqartoqarnersoq, tassunga ilanngullugu taartaasartunik aggersaanermut il.il. ingerlatseriaatsit, aamma
12)  meeqqeriviup aqutsisui siusinnerusukkut nakkutilliisoqarneranut atatillugu uparuaasoqarsimappat malitseqartitsisimanersut.

Perorsaanermut tunngasunik nakkutilliineq

  § 13.  Perorsaanikkut nakkutilliinerup minnerpaamik erseqqissaavigissavaa:
1)  sulisut piginnaasaat tamatumunnga inatsisitigut piumasaqaataasunik naammassinnissimanersut,
2)  sulisut amerlassusissaannik kommunalbestyrelsip aalajangersaasimanera eqqortinneqarnersoq,
3)  upalungaarsimanissamut pilersaarut suliarineqarsimanersoq, meeqqanut suli atualersimanngitsunut perorsaanikkut ineriartuutaasumik neqeroorutit pillugit Inatsisartut inatsisaanni § 20, imm. 2-mi minnerpaaffissatut piumasaqaatit piviusunngortinneqarsimanngippata,
4)  meeqqanut ataasiakkaanut tunngatillugu attaveqaatit akornanni ataqatigiissakkamik suleqatigiinnissap qulakkeerneqarnissaanut pisariaqartitsineq naapertorlugu suleqatigiissitanik pilersitsisoqarsimanersoq,
5)  suleqatigiissitat taakku suleqatigiinnerminnut atatillugu attaveqaatigiittut naapeqatigiittassapput, tamatumanilu meeqqap angajoqqaatut oqartussaasui imaluunniit pilersuisuiusut peqataatillugit, meeqqanut ataasiakkaanut siusissukkut iliuuseqarnissaq siunertaralugu,
6)  meeqqeriviup pisortaa ikinnerpaanik ukiumut pingasoriarluni atuisut ataatsimoorfiinik aggersaasimanersoq atuisut ataatsimoorfiisa inatsisitigut suliassaqarfigisaannik isumaginninnissaq siunertaralugu,
7)  meeqqerivik suliassanik kommunalbestyrelsip anguniagassat killissarititatullu aalajangersagaanik isumaginnittarnersoq,
8)  meeqqerivinnut ataasiakkaanut perorsaanikkut ukiumut pilersaarummik aalajangersaasoqarsimanersoq, taanna malinneqarnersoq, aamma taanna nalilersuiffigineqartarnersoq,
9)  perorsaanikkut anguniagalimmik sulisoqartarnersoq,
10)  meeqqat ataasiakkaat inerikkiartornerat pillugu ataatsimoortumik naliliinikkut naliliinerit uppernarsaasersuinerillu ingerlaavartumik isumagineqartarnersut, meeqqallu inerikkiartornera minnerpaamik ukiumut marloriarluni allaaserineqartarnersoq,
11)  ikinnerpaanik ukiumut marloriarluni meeqqap pilersuisuinik oqaloqateqartarnersoq meeqqap inerikkiartoqqinnerani suleqatigiinnissaq siunertaralugu,
12)  meeqqat meeqqerivimmut allatseqqasut nalunaarsorneqartarnersut, meeqqat aqqi, inuttut normui, angajoqqaatut oqartussaasut aamma meeqqamik pilersuisuiusut aqqi, meeqqallu aninerani tamatumunnga pissutaasoq ilanngullugit,
13)  takkunnerit nalunaarsorneqartarnersut, aamma taanna perorsaanikkut ukiumut pilersaarut ilanngullugu tamatumunnga kommunalbestyrelsip piffissaliussaata iluani kommunalbestyrelsimut nassiunneqartarnersoq,
14)  meeqqerivik meeqqat mappiinik pilersitsinersoq nutarterisarnersorlu taakkulu atuarfimmut meeqqap atuarfigiligassaanut nassiussimanerai tamatumalu ilutigisaanik meeqqerivimmi meeqqat mappii suujunnaartinneqarnersut,
15)  meeqqap meeqqerivimmiit meeqqerivimmut allamut nuunnerani meeqqerivimmi meeqqap qimataani sulisut aamma meeqqerivimmi nuuffigineqartumi sulisut akornanni suleqatigiittoqartarnersoq aamma meeqqap pisariaqartitaanik isumaginninnissamut atorneqartussanngorlugit meeraq pillugu paasissutissat attuumassutillit ingerlateqqinneqartarnersut,
16)  meeqqat meeqqerivimmiinnertik iluarisimaarneraat,
17)  meeqqat perorsaanikkut tarnillu pissusaatigut siunnersorneqartarnersut,
18)  meeqqerivimmit nalunaarutiginnittussaatitaaneq pillugu maleruagassat eqqortinneqarnersut,
19)  meeqqeriviup aqutsisui siusinnerusukkut nakkutilliisoqarneranut atatillugu uparuaasoqarsimappat malitseqartitsisimanersut.
20)  meeqqanik pinerliisimannginnermik uppernarsaammik pissarsinissamut pisussaaffik pillugu Inatsisartut inatsisaat naapertorlugu meeqqeriviup sulisuinut meeqqanik pinerliisimannginnermut uppernersaatit piniarneqarsimanersut.

Nakkutilliinermit nalunaarusiaq

  § 14.  Kommunalbestyrelsi nakkutilliinerit ataasiakkaat kingorna § 10 naapertorlugu nakkutilliinermut nalunaarusiortassaaq, taanna malitseqartitsinermut paasissutissiisumik naammaginartumillu tunngavissaqarnissamik qulakkeerinnittuussaaq.
  Imm. 2.  Nakkutilliinermut nalunaarusiaq Ilinniartitaanermut Naalakkersuisoqarfiup ileqquusutut nakkutilliinermi nalunaarusiassatut suliarineqarsimasoq atorlugu minnerpaamik § 13-imi pissutsit eqqaaneqartut misissuiffigineqarnerannik aamma isummerfigineqarnerannik imaqassaaq, tassunga ilanngullugu pissutsit suut pitsanngorsaavigineqassanersut aamma iliuuseqarfigineqassanersut. Aammattaaq nakkutilliinermut nalunaarusiaq paasissutissanik makkuninnga imaqassaaq:
1)  Ulloq nakkutilliiffiusoq.
2)  Kina, nakkutilliinermik ingerlatsisimanersoq aamma kina, nakkutilliinermi meeqqerivimmut sinniisuusimanersoq.
3)   Nakkutilliiartornissaq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.

  § 15.  Nakkutilliinermit nalunaarusiaq kingusinnerpaamik ullormi nakkutilliiffiusimasumit qaammatit 2-t qaangiunneranni naammassillugu suliarineqareersimassaaq kommunillu nittartagaatigut tamanut saqqummiunneqarluni. Tamanut saqqummiussineq pissaaq paasissutissat inunnut ataasiakkaanut tunngassuteqartut takuneqatsaalillugit.

Kapitali 5

Malitseqartitsineq

  § 16.  Kommunalbestyrelsi meeqqeriviit assigiinngitsut apeqqutaatinnagit nakkutilliinernik aaqqissugaasumik allaganngorlugit katersisassaaq.

  § 17.  Kommunalbestyrelsi nakkutilliinermut malitseqartitsisassaaq, meeqqerivimmi pissutsinik uparuartariaqartunik paasinnittoqarsimappat.
  Imm. 2. Malitseqartitsineq ingerlatseriaaseq aalajangersimasoq tunngavigalugu pisassaaq, taanna kommunalbestyrelsimit aalajangersarneqassaaq.
  Imm. 3.  Kommunalbestyrelsi nakkutilliinermut malitseqartitsinertut meeqqerivinni pissutsinik uparuartariaqartunik paasinnittoqarfiusimasuni tamani suliamik ingerlatseqqinnissamut iliuusissatut imaluunniit ineriartortitsinissamut aalajangersimasunik pilersaarusiussaaq.

Kapitali 6

Ajornartorsiutinik aaqqiisarneq aamma ineriartorneq

  § 18.  Nakkutilliineq meeqqerivinni ataasiakkaani ajornartorsiuteqartoqarsimatillugu aaqqiissutissanik innersuusseqataasinnaavoq ujartueqataasinnaallunilu.
  Imm. 2.  Sulisut akornanni imaluunniit angajoqqaat sulisullu akornanni aporaaffeqartoqarsimatillugu, tamanna aamma nakkutilliinermi pisussaaffigisanut ilaavoq aporaaffiit taakku aaqqiivigineqarnissaanut illuatungeriit suleqatigalugit misissuinissaq ikiuunnissarlu.
  Imm. 3.  Nakkutilliineq meeqqerivimmik imminut ikiornertut ikiuunnermut iluaqutaassaaq, taamaalilluni meeqqerivimmi siunissami suliassanik unammillernartunillu nutaanik namminneq nassaartoqarsinnaalluni.

  § 19.  Assigiinngitsunik suliallit ilisimasaat kommunalbestyrelsip nakkutilliinera tunngavigalugit piorsarneqarsimasut kommunalbestyrelsip kommunimi meeqqerivinni suliassaqarfimmik nalinginnaasumik pitsaassutsinik ineriartortitsineranut aamma meeqqerivinni ataasiakkaani pitsaassutsit eqqarsaatigalugit qulakkeerinninnissaminnut pisussaaffimminik malinninneranut tunngavissiisussaapput.
  Imm. 2.  Kommunalbestyrelsip imm. 1-imi ilisimasat taakkartorneqartut ineriartortitsinissanik pilersaarusiornerni aamma suliniuteqarfigisanik pilersaarusiornermini atussavai aammalu kommunimi sullissinerup qaffasissusianik aalajangersaanermini ilanngutissallugit.
  Imm. 3.  Kommunalbestyrelsip ilisimasat imm. 1-imi taaneqartut meeqqerivimmi aqutsisut sulisullu meeqqerivinnut suliassaqarfimmi pitsanngorsaanissanut ineriartortitsinissanullu periarfissat pillugit kommunimi perorsaanikkut periutsinik ineriartortitsinermut nutarteriffigalugit atorneqarnissaat qulakkiissavaa.

Kapiteli 7

Pingaarnertut nakkutilliineq

  § 20.  Ilinniartitaanermut Naalakkersuisoqarfimmit kommunalbestyrelse paasissutissanik tunniusseqquneqarsinnaavoq, tassunga ilanngullugit allakkianik, kommunalbestyrelsip nalunaarut taanna naapertorlugu nakkutilliisuutitaanerminik isumaginninnersoq paasiniarlugu pisariaqartinneqartut isigineqartunik tunniusseqquneqarsinnaavoq.
  Imm. 2.  Imm. 1-imi suliassatut taaneqartut Ilinniartitaanermut Naalakkersuisoqarfimmi isumagineqarnissaat siunertaralugit kommunalbestyrelse imatut iliussaaq:
1)  § 14-imi taaneqartut nakkutilliinermit nalunaarusiat Ilinniartitaanermut Naalakkersuisoqarfimmut ingerlateqqissavai aamma
2)  meeqqerivinni meeqqat amerlassusilerneqarnerat, atorfiit amerlassusilerneqarnerat aamma atorfiit qanoq inuttaqartinneqarnersut pillugit paasissutissanik nalunaarutiginnissalluni, tassunga ilanngullugit ilinniagarisimasanik tunuliaqutigisat.
  Imm. 3.  Kommunalbestyrelsip imm. 1 aamma 2-mi paasissutissat taaneqartut piffissaliussat malillugit Ilinniartitaanermut Naalakkersuisoqarfimmut nassiutissavai.
  Imm. 4.  Kommunalbestyrelsip imm. 2-mi taaneqartut nalunaarutiginninnerit Ilinniartitaanermut Naalakkersuisoqarfimmit elektroniskiusumik nalunaarutiginniffissatut oqaatigisaanut nassiutissavai.

Kapiteli 8

Atuutilerfia

  § 21.  Nalunaarut manna atuutilissaaq ulloq 1. oktober 2020-mi.

Namminersorlutik Oqartussat, ulloq 24. september 2020

Karl Frederik Danielsen

/

                            Karsten Peter Jensen