Kapitali 1

Atuuffia

 

  § 1.  Nappaatit § 2-mi taaneqartut nunami maani nungusarnerisigut imaluunniit pinaveersaartinnerisigut, siaruarnissaasa eqqunneqarnissaasaluunniit pinngitsoortinnerisigut, siaruatsaalinerisigut killilersimaarnerisigullu inuiaqatigiinnik inunnillu ataasiakkaanik illersuinissaq siunertaralugu iliuusissat Inatsisartut inatsisaanni taaneqartut aallartinneqarsinnaapput.

 

  § 2.  Inatsisartut inatsisaanni nappaatit tuniluuttartut, nappaatit inunnut nalinginnaasumik ulorianartut nappaatillu inuiaqatigiinnut aarlerinartorsiortitsisut pineqarput.
  Imm. 2.  Nappaat tuniluuttartoq tassaavoq nappaat imaluunniit peqqissutsikkut atugarisaq, tappiorannartunit nappaateqalersitsisartuniillu allanit, inunnit, inunnut imaluunniit inuit akornanni tunillaassuussinnaasumit pilersartoq.
Imm. 3.  Nappaat inunnut nalinginnaasumik ulorianartoq tassaavoq nappaat tuniluuttartoq, annertunerusumik tunillaassuussinnaasoq, annertuumik toqqutaasartoq, ulorianartumik ataavartumilluunniit ajoqusiisinnaasoq aammalu:
1)  katsorsaanermik, napparsimalluni takkutinngitsoornermik imaluunniit piffissami sivisunerusumi piginnaanngorsaanermik kinguneqarsinnaasoq,
2)  inuit peqqissusaannut annertuumik ulorianartorsiortitsisumik siaruarujussuarsinnaasoq, imaluunniit
3)  sunniuteqarluartumik pinaveersaartitsisoqannginnera katsorsaasoqannginneraluunniit pissutigalugu annertuumik kingunerlutsitsisinnaasoq.
  Imm. 4.  Nappaat inuiaqatigiinnut aarlerinartorsiortitsisoq tassaavoq nappaat inunnut nalinginnaasumik ulorianartoq, siaruarnermigut inuiaqatigiinni pingaaruteqarluinnartunut sakkortuumik ajoqusiisinnaasoq imaluunniit ajoquseeratarsinnaasoq.
  Imm. 5.  Naalakkersuisut Nunatta Nakorsaaneqarfianit inassuteqartoqareerneratigut imm. 2-mi aamma 3-mi nappaatit sorliit pineqarnersut pillugit malittarisassanik erseqqinnerusunik aalajangersaassapput. 
  Imm. 6.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunersiueqatigereerlugu, imm. 4-mi nappaatit sorliit pineqarnersut pillugit malittarisassanik erseqqinnerusunik aalajangersaassapput.
  Imm. 7.  Kinguaassiutitigut nappaatit Inatsisartut inatsisaanni ilaatinneqanngillat.
  Imm. 8.  Naalakkersuisut tunillaassortumik nappaalasoqalernerani atuarfiit paaqqinnittarfiillu atugaat pillugit malittarisassat aalajangersarneqarsinnaapput, atuarfinni suliffeqarfinnilu tunillaassuuttussatut immikkut aarlerinaatilinnut aamma atuutsinneqalersinnaallutik.

 

Kapitali 2

Nappaatit inuiaqatigiinnut aarlerinartorsiortitsisut siammarnissaannut pinaveersaartitsilluni suliniutinut iliuutsinullu akisussaaffik

 

Tunillaassortunik nappaalanersuaqarneranut ataatsimiititaliarsuaq

 

  § 3.  Naalakkersuisut Tunillaassortunik Nappaalanersuaqarneranut Ataatsimiititaliarsuarmik, nammineq ingerlatsinermigut imaluunniit Naalakkersuisunit qinnuigineqarnermigut nappaatip inunnut nalinginnaasumik ulorianartup, iliuuseqarfigineqannginnermigut nappaatitut inuiaqatigiinnut aarlerinartorsiortitsisutut ineriartorsinnaasutut ilimagineqartup iliuuseqarfigineqarnissaa aamma nappaatip inuiaqatigiinnut aarlerinartorsiortitsisup iliuuseqarfiginissaa pillugit ataqatigiissumik siunnersuisussamik pilersitsissapput. Tunillaassortunik Nappaalanersuaqarneranut Ataatsimiititaliarsuup matumani Naalakkersuisunut inatsisartut inatsisaat manna naapertorlugu malittarisassanik aalajangersaassasut imaluunniit malittarisassanik aalajangersarneqareernikunik allanngortitsissasut atuukkunnaarsitsissasulluunniit inassuteqarfigisinnaavai.
  Imm. 2.  Tunillaassortunik Nappaalanersuaqarneranut Ataatsimiititaliarsuaq pisariaqartitsineq naapertorlugu katersuuttassaaq. Tunillaassortunik Nappaalanersuaqarneranut Ataatsimiititaliarsuaq tamatuma saniatigut ukiumut ataasiarluni ataatsimiittarpoq. 
  Imm. 3.  Tunillaassortunik Nappaalanersuaqarneranut Ataatsimiititaliarsuarmi uku ilaapput: 
1)  Nunatta nakorsaanera, 
2)  Naalakkersuisut Siulittaasuata Naalakkersuisoqarfianit naalakkersuisoqarfimmi pisortaq, peqqissutsimut, inuussutissarsiornermut, attaveqaatersuutinut, ilinniartitaanermut ulluuneranilu paaqqinnittarfimmut kiisalu aningaasaqarnermut naalakkersuisoqarfinni pisortat, 
3)  Politiit pisortaat,
4)  peqqinnissaqarfimmi pisortaq, kiisalu  
5)  ilaasortaq ataaseq, kommuninit ataatsimut toqqarneqartoq. 
  Imm. 4.  Kommunit kina ilaasortassatut innersuussutigissanerlugu isumaqatigiissutigisinnaanngikkunikku kommunit tamarmik immikkut inummik 1-imik Tunillaassortunik Nappaalanersuaqarneranut Ataatsimiititaliarsuarmut innersuussisinnaapput. Naalakkersuisut tamatuma kingorna kommunit ilaasortassatut innersuussutigisaasa akornanni ataatsimik toqqaassapput. 
  Imm. 5.  Kommunit sinnerlugit ilaasortaasoq kommunalbestyrelsimut ilaasortaaqqusaanngilaq. 
  Imm. 6.  Tunillaassortunik Nappaalanersuaqarneranut Ataatsimiititaliarsuarmi ilaasortaq peqataasinnaanngikkuni ilaasortaq sinniisuminik peqataatitaqarsinnaavoq. 
  Imm. 7.  Tunillaassortunik Nappaalanersuaqarneranut Ataatsimiititaliarsuaq ataatsimiinnernut peqataasussanik allanik attuumassutilinnik qaaqqusisinnaavoq.
  Imm. 8.  Peqqissutsimut Naalakkersuisoqarfimmi naalakkersuisoqarfiup pisortaa Tunillaassortunik Nappaalanersuaqarneranut Ataatsimiititaliarsuarmi siulittaasuuvoq Tunillaassortunillu Nappaalanersuaqarneranut Ataatsimiititaliarsuarmut allattoqarfimmik pilersitsinissamik isumaginnittuussalluni.
  Imm. 9.  Nunatta Nakorsaaneqarfianit nappaatip siaruaannerata ineriartornera il.il. pillugit paasissutissat kiisalu peqqissutsikkut ilisimasat tunngavigalugit tamatumunnga nalilersuinerit Naalakkersuisunut siunnersuinermut inassuteqarnermullu tunngavinni takuneqarsinnaassapput.

 

  § 4.  Pisortani oqartussat Nunatta Nakorsaaneqarfia oqartussallu allat, Inatsisartut inatsisaat manna malillugu suliassanik tullinnguuttunik isumaginnittut ikiussallugit pisussaaffigaat:
1)  Pisussaatitaaffiit piginnaatitaaffiillu Nunatta Nakorsaaneqarfianut oqartussanullu allanut Inatsisartut inatsisaat manna malillugu tunniunneqarsimasut isumagissallugit,
2)  iliuusissat Nunatta Nakorsaaneqarfianut oqartussanullu allanut Inatsisartut inatsisaat manna malillugu tunniunneqarsimasut naammassissallugit.
  Imm. 2.  Suleqatigiiffiit namminersortut, ingerlatseqatigiiffiit inatsisitigullu pisinnaatitaasut pisussaatitaasullu allat pisuni immikkut ittuni Naalakkersuisut erseqqinnerusumik aalajangersagaat malillugu oqartussaasut suliassanik isumaginninnerannik ikiorsinnaavaat, Inatsisartullu inatsisaat manna naapertorlugu pisussaaffilerneqarsinnaallutik.

 

  § 5.  Kommunalbestyrelsit nappaatit inunnut nalinginnaasumik ulorianartut aamma inuiaqatigiinnut aarlerinartorsiortitsisut siaruarnissaannik pinaveersaartitsiniarlutik siaruannginnissaallu qulakkeerniarlugu iliuuseqassapput, tassunga ilanngullugu nappaatit taakku iliuuseqarfiginissaannut pilersaarusiussapput, aamma Nakorsaaneqarfiup oqartussallu allat iliuutsinik Inatsisartut inatsisaat naapertorlugu aalajangersarneqartunik aamma maleruagassat  matumani pineqartut naapertorlugit aalajangersarneqartunik suliaqarnerannik ikiussallugit.

 

  § 6.  Kommunalbestyrelsi malittarisassat imm. 2 naapertorlugu aalajangersarneqartut malillugit innuttaasunik, tunillatsissimasutut uppernarsarneqarsimasunik allallu peqqissusaat eqqarsaatigalugit inissiivimmi taama ittumi mattusimaneqarnissamut kajumissuseqartunut inissiivinnik atugassiissaaq.
  Imm. 2.  Naalakkersuisut kommunalbestyrelsip imm. 1 malillugu akisussaaffii pillugit, tassunga ilanngullugit mattusimavinnik atugassiinissaq aamma mattusimavinnut innersuussisarnermut piumasaqaatit pillugit malittarisassanik erseqqinnerusunik aalajangersaassapput.

 

Kapitali 3

Inunnut ataasiakkaanut aamma inunnut ataasiakkaanut eqimattakkaanut iliuutsit

 

Piumasaqaatit nalinginnaasut

 

  § 7.  Kapitali manna malillugu iliuuseqarnerit tamarmik pisariaqartuussapput, sapinngisamik sivikitsuussapput iliuutsimillu siunertamut tunngatillugu naleqquttuussallutik. Iliuuserineqartoq akuliuffiunnginnerpaaq qajassuussinerpaarlu atorneqassaaq, tamanna siunertarineqartup anguniarnissaanut naammassappat.
  Imm. 2.  Iliuutsip attanneqarnissaa pisariaqarunnaarpat iliuutsit atorunnaarsinneqassapput.

 

  § 8.  Nappaatit inunnut nalinginnaasumik ulorianartut imaluunniit inuiaqatigiinnut aarlerinartorsiortitsisut pinaveersaartinniarlugit, siaruatsaaliorniarlugit piuneerutsinniarlugilluunniit §§ 9 aamma 10, § 11, aamma § 13, imm 1 aamma 2 malillugit peqqussutit inunnut ataasiakkaanut atuutilersinneqarsinnaapput, taamaattorli imm. 5 takuuk.
  Imm. 2.  Nunatta Nakorsaaneqarfiata imm. 1-imi aalajangersakkat eqqaaneqartut malillugit peqqussuteqartoqannginnerani inuk iliuuseqarfigineqartussatut eqqarsaatigineqartoq iliuuseqarnerup naammassinissaanut suleqataanissaanik piumaffigissavaa. 
  Imm. 3.  Inuk iliuuseqarfigineqartussatut eqqarsaatigineqartoq paaqqinnittarfimmi, katsorsaavimmi assigisaaniluunniit najugaqarpat najugaqarallarpalluunniit, suleqataanissaanik kajumissaarneqarnerata nalunaarutiginissaanut tunngatillugu Nunatta Nakorsaaneqarfiata paaqqinnittarfik, katsorsaavik assigisaalluunniit qulakkeerinnissasoq piumaffigissavaa.
  Imm. 4.  Nunatta Nakorsaaneqarfiata imm. 1-imi aalajangersakkat eqqaaneqartut malillugit peqqussummik nalunaaruteqartoqarneranut atatillugu peqqussutip nalunaarutigineqartup naammassineqarnissaanik paaqqinnittarfik, katsorsaavik assigisaalluunniit qulakkeerinnissasoq piumaffigissavaa.
  Imm. 5.  Nappaatip inunnut nalinginnaasumik ulorianartup inuiaqatigiinnulluunniit aarlerinartorsiortitsisup pinaveersaartinneqarnissaa siaruatsaalineqarnissaalu pisariaqalerpat, Nunatta Nakorsaaneqarfianit inassuteqartoqarneratigut Naalakkersuisut inunnut ataasiakkaanut eqimattakkaanut, nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasunut imaluunniit nappaammik taama ittumik tunillatsissimasorisanut imm. 1 malillugu iliuutsinik aallartitsinissaq pillugu malittarisassanik aalajangersaasinnaapput.

 

Misissuineq

 

  § 9.  Nappaatit inunnut nalinginnaasumik ulorianartut inuiaqatigiinnulluunniit aarlerinartorsiortitsisut pinaveersaartinneqarnissaat, siaruatsaalineqarnissaat piuneerutsinneqarnissaalluunniit siunertaralugu Nunatta Nakorsaaneqarfiata inuit, nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasut imaluunniit nappaammik taama ittumik tunillatsissimasorisat peqqissaanermik suliaqartumit misissortinnissaannik piumaffigisinnaavai.

 

Napparsimavimmut uninneq

 

  § 10.  Nunatta Nakorsaaneqarfia piffissami aalajangersimasumi inuit nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasut imaluunniit nappaammik taama ittumik tunillatsissimasorisat napparsimavimmut inissiivimmulluunniit allamut naleqquttumut, matumani § 9 malillugu misissortinnissaannut imaluunniit § 13 malillugu eqqiarneqarnissaannut atatillugu pisariaqarpat unitsinneqarnissaannik peqqusinnaavai.
  Imm. 2.  Imm. 1 naapertorlugu peqqussut sapaatit akunnerini amerlanerpaamik 4-ni atuuttussanngortinneqarsinnaavoq. Peqqussut tamatuma kingorna sivisunerpaamik sapaatit akunnerinik 4-nik sivitsorneqarsinnaassaaq.

 

Allanut mattunneq

 

  § 11.  Nakorsaaneqarfiup kinaluunniit nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasoq imaluunniit nappaammik taama ittumik tunillatsissimasorisaq inissiivimmi naleqquttumi piffissami aalajangersimasumi mattusimanissaanik peqqusinnaavaa. 
  Imm. 2.  Peqqussut sapaatit akunnerini amerlanerpaamik 4-ni atuuttussanngortinneqarsinnaavoq. Peqqussut tamatuma kingorna sivisunerpaamik sapaatit akunnerinik 4-nik sivitsorneqarsinnaassaaq.

 

Suliarinninneq

 

  § 12.  Nakorsaaneqarfiup kinaluunniit nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasoq imaluunniit nappaammik taama ittumik tunillatsissimasorisaq, taassuma mattusimanera nappaatip siaruarnissaanut pinaveersaartitsinermut siaruatsaaliinermulluunniit naammanngippat piffissami aalajangersimasumi peqqissaanermik suliaqartumit misissortinnissaannik piumaffigisinnaavaa.
  Imm. 2.  Imm. 1 naapertorlugu peqqussut sapaatit akunnerini amerlanerpaamik 4-ni atuuttussanngortinneqarsinnaavoq. Peqqussut tamatuma kingorna sivisunerpaamik sapaatit akunnerinik 4-nik sivitsorneqarsinnaassaaq.

 

Eqqiaaneq tunillaannartuiaanerlu

 

  § 13.  Nunatta Nakorsaaneqarfia tunillatsissimasunik imaluunniit tunillaassortumik timimiulinnik taakkununngaluunniit attaveqarsimasunik, tunillannartunik mingutsinneqarsimasunik mingutsinneqarsimasorineqartunilluunniit eqqiaanermik aallartitsisoqarnissaanik peqqusisinnaavoq.
  Imm. 2.  Nakorsaaneqarfiup taamatuttaaq tunillannartut siaruarnissaat pinaveersaartinniarlugu inuit tunillannartumik mingutsinneqarsimasorineqartut tunillannartumut misissortinnissaannik, illersuutinik assigisaannilluunniit atuinissaannik peqqusinnaavai.
  Imm. 3.  Naalakkersuisut Nunatta Nakorsaaneqarfia siunnersueqatigereerlugu inunnik eqqiaanissamut aamma  misissortinnissamut, illersuutinut assigisaannulluunniit malittarisassanik erseqqinnerusunik aalajangersaasinnaapput.

 

  §  14.  Nunatta Nakorsaaneqarfia angallassissutinik allanillu aalaakkaasuunngitsunik kiisalu aalaakkaasunik il.il. tunillannartuiaanissamik peqqusisinnaavoq. 
  Imm. 2.  Naalakkersuisut Nunatta Nakorsaaneqarfia siunnersueqatigereerlugu tunillannartuiaanermut malittarisassanik erseqqinnerusunik aalajangersaasinnaapput.

 

Tamanut angallassissutit

 

  § 15.  Nunatta Nakorsaaneqarfia inuit nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimasut imaluunniit nappaammik taama ittumik tunillatsissimasorisat tamanut angallassissutinik piffissami erseqqinnerusumik aalajangersarneqartumi atuinissaannik inerteqquteqarsinnaavoq.
  Imm. 2.  Imm. 1 malillugu inerteqqut ullut arfineq-marluk tungaannut atuuttussatut nalunaarutigineqassaaq. Inerteqquteqarsinnaanermut piumasaqaatit suli eqqortinneqarpata piffissaq sivitsorneqarsinnaavoq.

 

Iliuutsit naammassinissaat siunertaralugu pissaanermik atuineq

 

  § 16.  Nunatta Nakorsaaneqarfia paaqqinnittarfimmit, katsorsaavimmit assigisaanniilluunniit Nakorsaaneqarfiup § 8, imm. 4 malillugu §§ 9, 10, 11 aamma 13, imm 1 aamma 2 malillugit iliuuseqaqqusimasaannit qinnuiginnittoqarneratigut iliuuserineqartup taama ittup naammassinissaa attannissaalu siunertaralugit inummut iliuuseqarfigineqartussamut pissaanermik tullinnguuttutut ittumik atuisoqarsinnaasoq aalajangersinnaavoq: 
1)  Pineqartumik timikkut aalaakkiineq, uninngatitsineq utertitsinerlu. 
2)  Pineqartup sumiiffigisaani ininik parnaarsuineq. 
  Imm. 2.  Ininik pineqartup sumiiffigisaanik parnaarsinermi pineqartup iniminngaanniit ikioqqusinnaanissaa qulakkeerneqassaaq. Tamatuma saniatigut pineqartoq akuttunngitsumik, sivikinnerpaamik akunnermut ataasiarluni sulisunit takusarneqartassaaq. 
  Imm. 3.  Imm. 1, nr. 1 aamma 2 malillugit pissaanermik atuineq aamma imm. 2-mi oqaaseqatigiit aappaat naapertorlugit nakkutilliinermik nalunaarsuineq paaqqinnittarfimmut, katsorsaavimmut assigisaannulluunniit nalunaarsuiffimmut nalinginnaasumik atorneqartartumut ingerlaannartumik nalunaarsorneqassapput.  
  Imm. 4.  Imm. 1 naapertorlugu aalajangiinerit inatsimmik allamik saneqqutsisinnaapput.

 

Politiit suleqataanerat

 

  § 17.  Kapitali manna malillugu inerteqquteqarneq peqqussuteqarnerlu pillugit malittarisassat maleruarneqarnissaat qulakkeerniarlugu malittarisassat atuuttut naapertorlugit politiit pissaanermik pisarialimmik atuisinnaapput.

 

Kapitali 4

Inuiaqatigiinnut iliuutsit

 

Piumasaqaatit nalinginnaasut

 

  § 18.  Kapitali manna malillugu iliuuseqarnerit tamarmik pisariaqartuussapput, sapinngisamik sivikitsuussapput iliuutsimillu siunertamut tunngatillugu naleqquttuussallutik. Iliuuserineqartoq akuliuffiunnginnerpaaq qajassuussinerpaarlu atorneqassaaq, tamanna siunertarineqartup anguniarnissaanut naammassappat.
  Imm. 2.  Iliuutsip attanneqarnissaa pisariaqarunnaarpat iliuutsit atorunnaarsinneqassapput.

 

  § 19.  Kapitali manna malillugu iliuutsit, nappaatip inuiaqatigiinnut aarlerinartorsiortitsisup siaruarnissaa pinaveersaartinniarlugu siaruatsaaliniarluguluunniit aallartinneqarsinnaapput, taamaattorli imm. 2 takuuk.
  Imm. 2.  Nappaat inunnut nalinginnaasumik ulorianartoq, iliuuseqarfigineqanngikkuni inuiaqatigiinnut aarlerinartumik ineriartorsinnaasutut ilimagineqartoq pinaveersaartinniarlugu siaruatsaaliniarluguluunniit §§ 23, 24, 25 aamma 26 malillugit iliuutsit aamma aallartinneqarsinnaapput.

 

Inuit sumiiffimmi ataatsimi arlaliunissaannik inerteqquteqarneq

 

  § 20.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu inuit sumiiffimmi ataatsimi, tassunga ilanngullugu annerusumik minnerusumilluunniit katersuunnermut, aaqqissuussinernut, pisussanut il.il. atatillugu arlaliunissaannik inerteqquteqarnermut nuna tamakkerlugu nunalluunniit ilaanut malittarisassanik aalajangersaasinnaapput. 
  Imm. 2.  Malittarisassat imm. 1 naapertorlugu aalajangersarneqartut illup iluani, silami, pisortat inuillu katerittarnerannut, aaqqissuussinernut pisussanut il.il. tunngasinnaapput. 
  Imm. 3.  Malittarisassat imm. 1 naapertorlugu aalajangersarneqartut inatsimmik allamik saneqqutsisinnaapput. 
  Imm. 4.  Imm. 1 aamma 2 eqqartuussivinnut Inatsisartunullu kiisalu katersuunnernut naalakkersuinikkut allatulluunniit isummersornissamik siunertalinnut atuutinngillat.
  Imm. 5.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu malittarisassanik imm. 1 naapertorlugu aalajangersarneqartunik unioqqutitsisoqannginnissaanut nakkutilliinissaq siunertaralugu eqqartuussiviit aalaalajangiiseqqaarnagit ininut piffinnullu allanut isersinnaanermut malittarisassanik aalajangersaasinnaapput.

 

Sumiiffinni aalajangersimasuniinnissamut inerteqquteqarneq

 

  § 21.  Inuit sumiiffimmi ataatsimi ataatsimoornissaannut inerteqquteqarneq pillugu malittarisassanik § 20, imm 1 naapertorlugu aalajangersaasoqarsimappat, Naalakkersuisut malittarisassani taakkunani sumiiffiit nalinginnaasumik iserfigineqarsinnaasuni aalajangersimasumiinnissamut inerteqquteqarsinnaavoq, matumani sumiiffimmi tassani nappaammik inuiaqatigiinnut aarlerinartorsiortitsisumik tuniluuttoqaratarnissaata pinaveersaartinnissaanut tamanna pisariaqartutut Nunatta Nakorsaaneqarfianit nalilerneqarpat. Oqaaseqatigiit siulliit malillugit inerteqquteqarnermi sumiiffimmi pineqartumi angallanneq nalinginnaasoq pineqanngilaq.
  Imm. 2.  Imm. 1 malillugu inerteqqut ullut arfineq-marluk tungaannut atuuttussatut nalunaarutigineqassaaq. Inerteqquteqarsinnaanermut piumasaqaatit suli eqqortinneqarpata piffissaq sivitsorneqarsinnaavoq.

 

Inunnut amerlasuunut uppernarsarneqarsimasumik tunillaassorfiusimasumiissimasunut iliuutsit

 

  § 22.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu inuit sumiiffimmi aalajangersimasumiissimasut, katersuunnerni, aaqqissuussinerni, pisuni assigisaanniluunniit peqataasimasut, sumiiffigisimasaanni peqataaffigisimasaannilu nappaammik inuiaqatigiinnut aarlerinartorsiortitsisumik uppernarsarneqarsimasumik tunillaasoqarsimappat, peqqissaanermik suliaqartumit misissortinnissaat imaluunniit pisariaqarpat inissiivimmut naleqquttumut mattunnissaat pillugit malittarisassanik aalajangersaasinnaapput.

 

Sumiiffimmik matusineq

 

  § 23.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu sumiiffinnik, nappaatip inuiaqatigiinnut aarlerinartorsiortitsisup atuuffianik, imaluunniit nappaatip taama ittup atuuffiulernissaanik eqqunneqarnissaanilluunniit aarlerinartorsiorfiulluinnartumik piffissami aalajangersimasumi matusisoqarnissaanik peqqusisinnaapput, taamaalilluni inoqatinik atassuteqartarnerit pisariaqarfiisigut pinngitsoortinniarneqassallutik, taamaattorli § 19, imm. 2 takuuk.
  Imm. 2.  Imm. 1 malillugu matusinissamik peqqussut ullut arfineq-marluk tungaannut atuuttussatut nalunaarutigineqassaaq. Peqqussuteqarnissamut piumasaqaatit suli eqqortinneqarpata peqqussutip atuunnera sivitsorneqarsinnaavoq.
  Imm. 3.  Naalakkersuisut imm. 1 malillugu peqqussutinik nalunaaruteqarsinnaanermut pisinnaatitaaneq pillugu malittarisassanik erseqqinnerusunik, matumani sumiiffiup killilersoqqissaarneranik aalajangersaasinnaapput. Naalakkersuisut inunnut, sumiiffimmi najugalinnut sumiiffimmiittunulluunniit, inerteqquteqarnerit pillugit malittarisassanik aalajangersaasinnaapput.

 

Napparsimavinnut, paaqqutarisariaqartut angerlarsimaffiinut, najugaqarfinnut paaqqinniffiusartunut, il.il. pulaartut isersinnaanerannut killilersuinerit inerteqquteqarnerilluunniit.

 

  § 24.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu, pulaartut napparsimavinnut katsorsaavinnullu, paaqqutarisariaqartut angerlarsimaffiinut, inissianut paaqqinnittarfinnut, oqilisaaffinnut, inissiivinnut, najugaqarfissatut neqeroorutinut assigisaannullu pisortat namminersortullu pigisaannut isersinnaanerannik killilersuinermut, inerteqquteqarnermut, taakkununngalu immikkut ilaatinneqartussaanngitsut pillugit nuna tamakkerlugu nunalluunniit ilaanut malittarisassanik aalajangersaasinnaapput. Imm. 1 malillugu killilersuinerit inerteqquteqarnerillu nappaatinut inunnut nalinginnaasumik ulorianartunut aamma aalajangersarneqarsinnaapput, § 19, imm. 2 takuuk.
  Imm. 2.  Malittarisassat imm. 1 naapertorlugu aalajangersarneqartut malittarisassanik inatsisimmi allami aalajangersarneqartunik imaluunniit inatsit alla naapertorlugu aalajangersarneqartunik sanioqqutsisinnaapput.

 

Pisortat ingerlatsiviinik, inissiiviinik assigisaannillu atuisinnaanermut taakkununngaluunniit isersinnaanermut killilersuinerit inerteqquteqarnerluunniit

 

  § 25.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu pisortat ingerlatsiviinut, inissiiviinut assigisaannullu isersinnaanermik inerteqquteqarnermut killilersuinermulluunniit, nuna tamakkerlugu nunalluunniit ilaanut piffissami aalajangersimasumi malittarisassanik aalajangersaasinnaapput. Imm. 1 malillugu killilersuinerit inerteqquteqarnerillu nappaatinut inunnut nalinginnaasumik ulorianartunut aamma aalajangersarneqarsinnaapput, § 19, imm. 2 takuuk.
  Imm. 2.  Malittarisassat imm. 1 naapertorlugu aalajangersarneqartut malittarisassanik inatsisimmi allami aalajangersarneqartunik imaluunniit inatsit alla naapertorlugu aalajangersarneqartunik sanioqqutsisinnaapput.

 

Ulluunerani paaqqinnittarfinnik, atuarfinnik ilinniarfeqarfinnillu allanik atuisinnaanermik taakkununngaluunniit isersinnaanermut killilersuinerit inerteqquteqarnerluunniit

 

  § 26.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu pisortat namminersortullu ulloq unnuarlu paaqqinnittarfiinik, atuarfinnik ilinniarfeqarfinnillu allanik atuinermut taakkununngaluunniit isersinnaanermut killilersuinermut inerteqquteqarnermulluunniit, nuna tamakkerlugu nunalluunniit ilaanut piffissami aalajangersimasumi malittarisassanik aalajangersaasinnaapput. Imm. 1 malillugu killilersuinerit inerteqquteqarnerillu nappaatinut inunnut nalinginnaasumik ulorianartunut aamma aalajangersarneqarsinnaapput, § 19, imm. 2 takuuk.
  Imm. 2.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu ilinniarfeqarfimmik aalajangersimasumik, imm. 1-imi ilaatinneqanngitsumik atuisinnaanermut tassungaluunniit isersinnaanermut killilersuinermik inerteqquteqarnermilluunniit, piffissami aalajangersimasumi malittarisassanik aalajangersaasinnaapput.
  Imm. 3.  Naalakkersuisut pisuni imm. 1-imi aamma 2-mi pineqartuni immikkut ittumik iliuuseqarnissamut malittarisassanik aalajangersaasinnaapput, tassunga ilanngullugit pisariaqavissumik paarsisoqarnissaq, pisariaqavissumik atuartitsinissaq, uppernarsaatit, misilitsinnerit, soraarummeernerit, ilitsersuisarnerit tigusisarnerillu, ikiorsiissutit, akiliuteqartarnerit, tapiissutit il.il. pillugit malittarisassat. 
  Imm. 4.  Malittarisassat imm. 1 - 3 tunngavigalugit aalajangersarneqartut inatsimmik allamik saneqqutsisinnaapput.

 

Tamanik angallassissutinut isersinnaanermut killilersuinerit inerteqquteqarnerillu

 

  § 27.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu angallassissutinut isersinnaanermik killilersuinermut inerteqquteqarnermulluunniit malittarisassanik, tassunga ilanngullugu ilaasut amerlanerpaaffissaat pillugit, nuna tamakkerlugu nunalluunniit ilaanut piffissami aalajangersimasumi malittarisassanik aalajangersaasinnaapput.  
  Imm. 2.  Malittarisassat imm. 1 naapertorlugu aalajangersarneqartut inatsimmik allamik saneqqutsisinnaapput.

 

Ininik piffinnillu allanik, inuit inatsisitigullu pisinnaatitaasut pisussaatitaasullu allat oqartussaaffigisaannik aamma tamanit iserfigineqarsinnaasunik atuisinnaanermik taakkunanngaluunniit isersinnaanermik killilersuinerit inerteqquteqarnerluunniit

 

  § 28.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu, napparsimmavinnut, katsorsaavinnut, angerlarsimaffinnut paaqqutarinniffiusunut, inissianut paaqqinnittarfiusunut, oqilisaaffinnut, inissiivinnut, najugaqarfissatut neqeroorutinut assigisaannullu pisortat namminersortullu pigisaannut pulaartut isersinnaanerannik killilersuinermut, inerteqquteqarnermut, taakkununngalu immikkut ilaatinneqartussaanngitsut pillugit nuna tamakkerlugu nunalluunniit ilaanut malittarisassanik aalajangersaasinnaapput.
  Imm. 2.  Malittarisassat imm. 1 naapertorlugu aalajangersarneqartut inatsimmik allamik saneqqutsisinnaapput.

 

Inini tamanit iserfigineqarsinnaasuni nammineq atortunik illersuutinillu tunillaassuunnaveersaatinik atuineq

 

  § 29.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu nammineq atortunik tunillaassuunnaveersaatinik atuinissamut malittarisassanik, tassunga ilanngullugu inini tamanit iserfigineqarsinnaasuni nammineq atortunut tunillaassuunnaveersaatinut piumasaqaatit pillugit malittarisassanik, nuna tamakkerlugu nunalluunniit ilaanut, piffissami aalajangersimasumi malittarisassanik aalajangersaasinnaapput.

 

  § 30.  Kapitali manna malillugu inerteqquteqarneq peqqussuteqarnerlu pillugit malittarisassat maleruarneqarnissaat qulakkeerniarlugu malittarisassat atuuttut naapertorlugit politiit pissaanermik pisarialimmik atuisinnaapput.

 

Kapitali 5

Nappaatit tunillaassortut nunamut maanga eqqunneqarneranni iliuusissat

 

  § 31.  Umiarsuarmi inunnik, nappaammik inunnut nalinginnaasumik uloriarnartumik imaluunniit inuiaqatigiinnut aarlerinartorsiortitsisumik napparsimasunik imaluunniit nappaammik taama ittumik tunillatsissimasorisanik ilaasoqarpat imaluunniit umiarsuarmi pissutsit allat tunillaassuunnerup siaruarnissaanut aarlerinartorsiortitsippata, umiarsuup Kalaallit Nunaannut tikinnerani aquttup umiarsuarmilu nakorsaqarpat nakorsap umiarsualivimmi oqartussat aqqutigalugit Nunatta Nakorsaaneqarfia nalunaarfigissavaat. 
  Imm. 2.  Nunatta Nakorsaaneqarfiata umiarsuarmik ingerlatsisoq aamma umiarsuarmi nakorsaqarpat paasissutissanik tunillaassuunnerup siaruarnissaanut aarlerinartorsiortitsinissamut pingaarutilinnik piumaffigisinnaavaa tunniusseqqullugu. 
  Imm. 3.  Naalakkersuisut Nunatta Nakorsaaneqarfia siunnersueqatigereerlugu paasissutissat sorliit imm. 1 naapertorlugu nalunaarutigineqassanersut qanorlu nalunaarutigineqassanersut pillugit malittarisassanik erseqqinnerusunik aalajangersaasinnaapput.
  Imm. 4.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu umiarsuit, nunanit aalajangersimasunit tikittut imaluunniit aalajangersimasumik ingerlaarfillit kiisalu ilisimasortat angallataat, angallatit aalisariutit angallatillu mikinerusut imm. 1 malillugu nalunaartussaatitaanermik saneqqussisinnaanerat pillugu malittarisassanik aalajangersaasinnaapput.

 

  § 32.  Timmisartumi inunnik, nappaammik inunnut nalinginnaasumik uloriarnartumik imaluunniit inuiaqatigiinnut aarlerinartorsiortitsisumik napparsimasunik imaluunniit nappaammik taama ittumik tunillatsissimasorisanik ilaasoqarpat imaluunniit timmisartumi pissutsit allat tunillaassuunnerup siaruarnissaanut aarlerinartorsiortitsippata, timmisartup Kalaallit Nunaannut tikinnissaa sioqqullugu aquttup imaluunniit taassuma piginnaatitaata Nunatta Nakorsaaneqarfia nalunaarfigissavaat.
  Imm. 2.  Nunatta Nakorsaaneqarfiata timmisartumik ingerlatsisoq taassumaluunniit piginnaatitaa imm. 1 malillugu paasissutissanik nalunaarutiginninnermut pingaarutilinnik piumaffigisinnaavaa tunniusseqqullugu. 
  Imm. 3.  Naalakkersuisut Nunatta Nakorsaaneqarfia siunnersueqatigereerlugu paasissutissat sorliit imm. 1 naapertorlugu nalunaarutigineqassanersut qanorlu nalunaarutigineqassanersut pillugit malittarisassanik erseqqinnerusunik aalajangersaasinnaapput.
  Imm. 4.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu timmisartut, nunanit aalajangersimasunit tikittut imaluunniit aalajangersimasumik ingerlaarfillit imm. 1 malillugu nalunaartussaatitaanermik saneqqussisinnaanerat pillugu malittarisassanik aalajangersaasinnaapput.

 

  § 33.  Umiarsuarmi timmisartumiluunniit inunnik, nappaammik inunnut nalinginnaasumik uloriarnartumik imaluunniit inuiaqatigiinnut aarlerinartorsiortitsisumik napparsimasunik imaluunniit nappaammik taama ittumik tunillatsissimasorisanik ilaasoqarpat imaluunniit timmisartumi pissutsit allat tunillaassuunnerup siaruarnissaanut aarlerinartorsiortitsippata, Nunatta Nakorsaaneqarfia naapeqateqarsinnaanerup akuerineqarneranik nalunaartinnagu nunami inunnik naapeqateqartoqaqqusaanngilaq, taamaattorli takuuk § 37, imm. 1.
  Imm. 2.  Nakorsaaneqarfiup imm. 1 malillugu nunami imaluunniit timmisartoqarfiup avataani imaluunniit angallassissutip tikittarfiani, ikiartortarfiup aallartarfiullu avataani inunnik killeqanngitsumik naapeqateqarsinnaanerup akuerineqarneranik nalunaarnissamut piumasaqaatitut ukua aalajangersarsinnaavai:
1)  ilaasut angallammilu inuttat misissortissasut,
2)  ilaasut angallammilu inuttat misissortinnermit inernerup takkunnissaata tungaanut mattusimassasut, imaluunniit 
3)  pisariaqarpat pineqartoq napparsimmavimmut imminut unitsilluni misissugaritissasoq.
  Imm. 3.  Killeqanngitsumik naapeqateqarsinnaanerup akuerineqarneranik nalunaartoqarnissaa sioqqullugu inuit piginnaatitaanatik umiarsuarmut timmisartumulluunniit ikisut, taamaaliornermi kingunerisaanik aningaasartuutit akilissavaat.
  Imm. 4.  Maleruagassat atuuttut naapertorlugit politiit imm. 1-ip aamma 2-p malinneqarnissaat qulakkeerniarlugu piumaffigineqarnermikkut ikiuutissapput.
  Imm. 5.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu umiarsuarmi timmisartumiluunniit nunami allami umiarsualivimmit imaluunniit Danmarkimi Savalimmiuniluunniit umiarsualivimmit tikittuni ilaasut, nunami inunnik imaluunniit timmisartoqarfiup avataani imaluunniit angallassissutip tikittarfiani, ikiartortarfiup aallartarfiullu avataani naapeqateqaqqusaannginnerannut malittarisassanik aalajangersaasinnaapput.

 

  § 34.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu malittarisassanik aalajangersaasinnaapput, inuit nunanit sumiiffinniilluunniit aalajangersimasunit tikittut aamma nappaammik inuiaqatigiinnut aarlerinartorsiortitsisumik tunillatsissimasorisat, nunamut angalannginnermi imaluunniit nunamut tikinnermut atatillugu:
1)  nappaammik erseqqinnerusumik aalajangersarneqartumik, inuiaqatigiinnut aarlerinartorsiortitsisumik nappaateqannginnermut uppernarsaammik nassiussissasut takutitsissasulluunniit, 
2)  nappaammik inuiaqatigiinnut aarlerinartorsiortitsisumik napparsimanerlutik misissortissasut, 
3)  misissortinnermit inernerup takkunnissaata tungaanut mattusimassasut, imaluunniit 
4)  pisariaqarpat pineqartoq napparsimmavimmut imminut unitsilluni misissugaritissasoq.

 

  § 35.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik eqqussisoqarnissaa siaruaattoqarnissaalu pinaveersaartinniarlugit usinut, nassatanut allakkanullu iliuutsit sorliit aallartinneqassanersut pillugit malittarisassanik aalajangersaasinnaapput.

 

  § 36.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu teriarsuit, kikkaasut imaluunniit tunillannartullit allat nappaammik inuiaqatigiinnut aarlerinartorsiortitsisumik nunamut nunamiilluunniit tunillaanissaat pinngitsoortinniarlugu iliuutsit suut aallartinneqassanersut pillugit malittarisassanik aalajangersaasinnaapput. Naalakkersuisut tamatumani umiarsualivinni aamma timmisartoqarfinni oqartussat uumasupiluiaasartunik assigisaannilluunniit erseqqinnerusumik aalajangersarneqartunik iliuuseqartitsisinnaanerannik aalajangersaasinnaapput. 
  Imm. 2.  Naalakkersuisut teriarsuarnik imaluunniit kikkaasunik tunillannartulinnillu allanik nungusaanermut misissuinermullu aningaasartuutit umiarsuarmik timmisartulluunniit atuisuutitaasunit akilerneqarnissaat pillugit malittarisassanik aalajangersaasinnaapput.

 

  § 37.  Umiarsuarmik timmisartumilluunniit atuisuutitaasut Nunatta Nakorsaaneqarfiata naliliinera malillugu napparsimasunik timinilluunniit toqungasunik niusiartuinnarlutik tulaassisut imaluunniit mittarfimmut mitsiartumik piginnittup Inatsisartut inatsisaat tunngavigalugu iliuutsinut aningaasartuutaasinnaasut akilissavaat, nakorsap misissuineranut inuullu misissorneqartup peqqissusiata qanoq issusianik pisariaqartumik misissuinernut tapertaasunut allanut aningaasartuutit taamaallaat pinnagit. Aalajangersagaq nappaatinut inunnut nalinginnaasumik ulorianartunut inuaqatigiinnullu aarlerinartorsiortitsisunut atuuppoq.
  Imm. 2.  Imm. 1-imi taaneqartunik pisoqartillugu napparsimasut katsorsarneqarnerinut paaqqutarineqarnerinullu kiisalu toqusut ilineqarnerinut, toqusut timaannik ikuallaanermut imaluunniit ilisiffissamut assartuinermut aningaasartuutit umiarsuarmik timmisartumilluunniit atuisuutitaasup akilissavai. Inuilli Kalaallit Nunaanni najugalittut nalunaarsorneqarsimasut inunnut Kalaallit Nunaanni aalajangersimasumik najugalittut malittarisassanut atuuttunut ilaapput.
  Imm. 3.  Aqqutissaaruttoornermi iliuutsinut Inatsisartut inatsisaat naapertorlugu aallartinneqartunut aningaasartuutit sapinngisamik usit ingerlaqqinngitsoortut nalinginit matussuserneqartassapput.
  Imm. 4.  Inuit akuersissuteqanngitsut imaluunniit atorfimminnut atatillugu kiffartuussinngitsut, naapeqateqarnissamut akuersissut nalunaarutigineqartinnagu umiarsuarmut timmisartumulluunniit, imm. 1-imi taaneqartunut ikisut taamaaliornermi kingunerisaanik aningaasartuutit akilissavaat.

 

Kapitali 6

Tunillaassuunnerup iliuuseqarfiginissaa, timimik toqungasumik pilattaalluni misissuinissaq il.il. siunertaralugit iliuusissat

 

  § 38.  Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu tunillannartumik nappaammit tunillaassortuminngaanneersumik, Inatsisartut inatsisaanni matumani pineqartumik eqqussineq, niueruteqarneq, suliarinninneq, toqqorsineq annissinerlu pillugit malittarisassanik aalajangersaasinnaapput.

 

  § 39.  Naalakkersuisut Nunatta Nakorsaaneqarfia siunnersueqatigereerlugu siunertat § 1-imi taaneqartut isumagineqarnissaannut tunngatillugu timinik toqungasunik nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik tunillatsissimasumik eqqussineq annissinerlu kiisalu taakku nunami maani suliarineqarnerat assartornerilu pillugit malittarisassanik erseqqinnerusunik aalajangersaasinnaapput.

 

  § 40.  Nappaat inunnut nalinginnaasumik ulorianartoq inuiaqatigiinnulluunniit aarlerinartorsiortitsisoq toqqutaasimasoq ilimagineqarpat paasineqarpalluunniit, nappaatip inunnut nalinginnaasumik ulorianartup inuiaqatigiinnulluunniit aarlerinartorsiortitsisup toqqutaasimanerata qularnaatsumik aalajangiunnissaanut tamanna pisariaqartutut nalilerneqarpat, Nunatta Nakorsaaneqarfia timimik toqungasumik pilattaanikkut misissuisoqarnissaanik aalajangersinnaavoq.
  Imm. 2.  Nunatta Nakorsaaneqarfia sapinngisamik piaarnerpaamik timimillu toqungasumik pilattaalluni misissuisoqartinnagu, toqusup qaniginerpaasaanut toqungasup timaanik pilattaalluni misissuisoqartussaanera pillugu ilisimatitsissaaq.

 

  § 41.  Nunatta Nakorsaaneqarfia tuniluuttup suussusia, pilerfia siammaassimassusialu qularnaatsumik paasiniarlugu iliuuserisassatut pisariaqartutut nappaammik tunillaassortitsisumik uumasuaqqanik tappiorannartoqarneranik taakkuluunniit assigisaannik misissuinernik aallartitsisinnaavoq.

 

  § 42.  Suliffeqarfiup inuussutissanik nioqqutissiorneratigut nioqqutissiaminillu siammarterineratigut nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik tunillaassuunnerup siammaanneqarnissaa aarlerinaateqarpat, tunillaassuunnerup unitsinnissaa siunertaralugu pisariaqarpat, Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu, suliffeqarfik pineqartoq tamakkiisumik ilaannakortumilluunniit matuneqarnissaanik peqqussuteqarniarlutik imaluunniit inuup tunillannartumik timimiullip suliffeqarfimmut isernissaanik inerteqquteqarniarlutik aalajangersinnaapput.

 

Kapitali 7

Paasissutissiisussaatitaanerit aamma nappaatit tunillaassortut il.il. siaruaannerannik paasiniaanermut nakkutilliinermullu atatillugu inuit pillugit paasissutissanik suliarineqartarneq

 

Inunnut inunnullu inatsisitigut pisussaaffilinnut paasissutissiisarnissamut pisussaaffeqarneq

 

  § 43.  Inuit Nunatta Nakorsaaneqarfianit qinnuigineqarnermikkut inuit pillugit paasissutissanik attuumassutilinnik, tassunga ilanngullugit nunami nunaniluunniit allani najugaqarfigisimasatik pillugit paasissutissanik kiisalu inuit qanimut naapissimasami attaveqarfissatut paasissutissaannik kiisalu atiinik tunniussinissamik pisussaaffeqarput. Nunatta Nakorsaaneqarfia nappaatip inunnut nalinginnaasumik ulorianartup inuiaqatigiinnulluunniit aarlerinartorsiortitsisup siaruatsaaliniarneranut tunillaassornissaatalu pinaveersaartinnissaanut aatsaat pisariaqarpat, oqaaseqatigiit siulliit malillugit paasissutissanik qinnuiginnissinnaapput.
  Imm. 2.  Peqqissaanermik suliaqartut napparsimasumik Nunatta Nakorsaaneqarfiata Inatsisartut inatsisaanni kapitali 3 naapertorlugu iliuuseqartoqarnissaanik aalajangernissaanut attuumassuteqarsinnaasutut nalilersoqqissaarneqartumik immikkut ittumik aarlerinartumik pissusilersortumik ilisimannilerunik, inuit pillugit paasissutissanik attuumassutilinnik Nunatta Nakorsaaneqarfianut ingerlatitseqqissallutik pisussaatitaapput, tassunga ilanngullugit peqqissuseq pillugu paasissutissat aamma pissusilersorneq pillugu paasissutissat. 
  Imm. 3.  Nunatta Nakorsaaneqarfiata Inatsisartut inatsisaanni kapitali 3 naapertorlugu iliuutsinik aalajangiinissaanut napparsimasut pillugit nalunaarsuiffinnit il.il. aamma isumassuineq pillugu nalunaarsuiffinnit paasissutissat pisariaqarpata, oqartussat, paaqqinnittarfiit peqqissaanermillu suliaqartut Nunatta Nakorsaaneqarfianit qinnuigineqarnermikkut paasissutissanik taakkunannga ingerlatitseqqinnissamik aamma pisussaatitaapput.
  Imm. 4.  Inatsisitigut pisinnaatitaasut pisussaatitaasullu Nunatta Nakorsaaneqarfianit qinnuigineqarnermikkut sulisut, ilaasortat, pulaartut il.il. attaveqarfissatut paasissutissaannik kiisalu ingerlaarfii pillugit paasissutissanik attuumassutilinnik tunniussissallutik pisussaatitaapput. Nunatta Nakorsaaneqarfia nappaatip inunnut nalinginnaasumik ulorianartup inuiaqatigiinnulluunniit aarlerinartorsiortitsisup siaruarnissaata tunillaassuunnissaatalu pinaveersaartinnissaannut pisariaqarpat imm. 1 malillugu paasissutissanik kisimi qinnuiginnissinnaavoq. Nunatta Nakorsaaneqarfia taamaallaat inuit pillugit paasissutissat taama ittut pigineqarpata taakkunannga qinnuiginnissinnaavoq.

 

  § 44.  Inuk ilaasoq nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik napparsimappat imaluunniit nappaammik taama ittumik tunillatsissimasorineqarpat, Nunatta Nakorsaaneqarfianit qinnuiginnittoqarneratigut ilaasut allattorsimaffiannik paasissutissat inuttallu pillugit paasissutissat pigineqarpata, paasissutissat taakkua timmisartumut umiarsuarmulluunniit akisussaasuusup imaluunniit taassuma piginnaatitaata tunniutissavai.
  Imm. 2.  Naalakkersuisut imm. 1 naapertorlugu paasissutissat suut taakkulu qanoq tunniunneqarnissaat pillugit malittarisassanik erseqqinnerusunik aalajangersaasinnaapput.

 

Nappaatinut tunillaassortunut tunngatillugu nalunaaruteqartarnermik aaqqissuussaq

 

  § 45.  Naalakkersuisut peqqissaanermik suliaqartut akuerisat inuillu imaluunniit suliffeqarfiit, laboratioriami misissueqqissaarnermik ingerlatsisut inuit pillugit paasissutissanik, nappaatinut tunillaassortunut, Inatsisartut inatsisaanni § 2-mi pineqartunut tunngassutilinnik Nunatta Nakorsaaneqarfianut ingerlatitseqqinnissamik akisussaaffeqarnerat pillugu malittarisassanik aalajangersaasinnaapput.
  Imm. 2.  Naalakkersuisut peqqissaanermik suliaqartut akuerisat inuillu imaluunniit suliffeqarfiit, sumiiffimmi allami laboratoriami misissueqqissaarnermik ingerlatsisut, misissuinermi atortunik, imaluunniit virusit geniinik misissueqqissaarnermit (helgenomsekventering) imaluunniit misissuinermit atortunik misissueqqissaarnernit assingusunit inernernik, inuup nappaammik Inatsisartut inatsisaanni § 2-mi pineqartumik napparsimaneranik takutitsisunik Nunatta Nakorsaaneqarfianut ingerlatitseqqinnissaannut malittarisassanik aalajangersaasinnaapput.

 

Oqartussat akornanni inuit pillugit paasissutissanik paarlaasseqatigiinneq

 

  § 46.  Nunatta Nakorsaaneqarfia tuniluunnerup paasiniarneqartarnera pillugu Statens Serum Institutimik oqartussanillu allanik attuumassuteqarsinnaasunik isumaqatigiissusiorsinnaavoq. Nunatta Nakorsaaneqarfia inuit nappaammik § 2-mi pineqartumik tunillatsissimasut tunillatsinnerisa paasiniarnissaanut atatillugu inuit pillugit paasissutissanik suliaqassaaq tigusisarlunilu imaluunniit ingerlatseqqillugit, inuit pillugit paasissutissat tullinnguuttumi allassimasut:
1)  Inuup normua imaluunniit paasissutissat allat kinaassutsimut tunngasut.
2)  Tunillaassuunnerup pilerfiatut ilimagineqartoq.
3)  Tunillatsissimasup nunami allamiiffigisaa.
4)  Tunillatsissimasup timmisartumik angalaneri.
5)  Tunillatsissimasup ilisimatitsissutigisaatut qanimut attaveqarfigisimasat amerlassusaat.
  Imm. 2.  Nunatta Nakorsaaneqarfiata imm. 1 malillugu paasissutissat, Statens Serum Institutip nappaatinik tunillaassortunik, Inatsisartut inatsisaanni § 2-mi pineqartunik pinaveersaartitsinermut akiuiniarnermullu sulianik isumaginninneranut pisariaqarpata taamaallaat tunniutissavai. 

 

  § 47.  Nunatta Nakorsaaneqarfiata inuit pillugit paasissutissat pisariallit, tassunga ilanngullugit peqqissuseq pillugu paasissutissat, Nunatta Nakorsaaneqarfiata kommunimi pineqartumi innuttaasut kapitali 3 malillugu iliuutsinut kajumissutsiminnik suleqataanissaannik kajumissaarineranik kommunalbestyrelsip ikiuunnissaa siunertaralugu pisariaqarpat sumiiffimmi kommunalbestyrelsimut taamaallaat ingerlateqqissinnaavai.
  Imm. 2.  Sumiiffimmi kommunalbestyrelsip inuit pillugit paasissutissat, tassunga ilanngullugit peqqissuseq pillugu paasissutissat Nunatta Nakorsaaneqarfianit qinnuiginnittoqarneratigut ingerlateqqissavai. Nunatta Nakorsaaneqarfia oqaaseqatigiit siulliit malillugit paasissutissanik taamaallaat qinnuiginnissinnaavoq, Nunatta Nakorsaaneqarfia tuniluunnerup paasiniarneranik suliaqarneranut atugassatut imaluunniit Nunatta Nakorsaaneqarfiata Inatsisartut inatsisaanni kapitali 3 malillugu iliuusissanik aalajangernissaanut atugassatut pisariaqarpata.

 

  § 48.  Nunatta Nakorsaaneqarfiata ateq paasissutissallu inuup nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik tunillatsissimaneranut tunngasut, pisortat namminersortulluunniit suliffeqarfiannut, tunillatsissimasup najugarisaanut orniguffigisartagaanulluunniit, suliffeqarfimmi tassani tunillatsissimasumik paasisaqartoqarpat, suliffeqarfiullu nappaammik inunnut nalinginnaasumik ulorianartumik inuiaqatigiinnulluunniit aarlerinartorsiortitsisumik siaruatsaaliuinissamut tunillatsittoqarnissaanillu pinaveersaartitsinissamut iliuusissanik pisarialinnik aalajangiinissaanut pisariaqarpata ingerlateqqissinnaavai.

 

Inuit pillugit paasissutissanik suliaqarnermut tunngatillugu piginnaatitsinissamut aalajangersagaq

 

  § 49.  Naalakkersuisut nappaatip inunnut nalinginnaasumik ulorianartup erseqqinnerusumik aalajangersarneqartup inuiaqatigiinnulluunniit aarlerinartorsiortitsisup, Inatsisartut inatsisaanni § 2-mi pineqartut siaruarnissaasa pinaveersaartinnissaannut inuit pillugit paasissutissat suliarinissaat pisariaqarpat, suliarineqarsinnaanerannut malittarisassanik aalajangersaasinnaapput. 
  Imm. 2.  Malittarisassat imm. 1 naapertorlugu aalajangersarneqartut inuit pillugit paasissutissanik suliarinninnermut malittarisassanik inatsimmi allami aalajangersarneqartunik inatsilluunniit alla naapertorlugu aalajangersarneqartunik saneqqutsisinnaapput.

 

Kapitali 8

Pisortat pisussaaffimminnik saneqqutsinerat aamma inatsisit allat naapertorlugit inuit pisinnaatitaaffii kiisalu pilersuinermik qulakkeerinninneq

 

  § 50.  Naalakkersuisut nappaatip inuiaqatigiinnut aarlerinartorsiortitsisup kingunerisaanik inunnik tassanngaannartumik katsorsartariaqartunik imaluunniit katsorsarneqarnissamik pisariaqartitsivissortunik katsorsaanissamut paaqqinninnissamullu isumalluutit naammannissaannik qulakkeerinninnissamut pisariaqarpat, pisortat tamanut pisussaaffiinik aamma innuttaasut pisinnaatitaaffiinik, inatsimmi allami, inatsit alla naapertorlugu imaluunniit inatsit alla naapertorlugu pisortanit aalajangiinerit naapertorlugit aalajangersarneqartunik saneqqussisinnaanermut nuna tamakkerlugu nunalluunniit ilaanut piffissami aalajangersimasumi malittarisassanik aalajangersaasinnaapput. 
  Imm. 2.  Naalakkersuisut piumasaqaatinik inatsimmi allami imaluunniit inatsit alla naapertorlugu aalajangersarneqartunik saneqqussinissaq napparsimasut inuttaasullu katsorsarnissaasa, paaqqutarinissaasa inatsimmilu imaluunniit inatsit naapertorlugu pisinnaatitaaffiisa allat il.il. qulakkeernissaannut pisariaqarpat, piumasaqaatillu malittarisassat imm. 1 naapertorlugu aalajangersarneqartut kingunerisaannik naammassineqarsinnaanngippata, saneqqussisinnaanermik nuna tamakkerlugu nunalluunniit ilaanut, piffissami aalajangersimasumi malittarisassanik aalajangersaasinnaapput. 
  Imm. 3.  Pisinnaatitaaffiit pisussaatitaaffiillu pineqartut saneqqunneqarnissaannut tunngavissaaruppat, malittarisassat imm. 1 aamma 2 naapertorlugit atuutilersinneqartut atorunnaarsinneqassapput.

 

  § 51.  Naalakkersuisut nappaatinut inuiaqatigiinnut aarlerinartorsiortitsisunut iliuutsit Inatsisartut inatsisaat manna naapertorlugu aalajangerneqartut kingunerisaannik pisussaaffinnik pisinnaatitaaffinnillu, inatsimmi allami, inatsit alla naapertorlugu imaluunniit inatsit alla naapertorlugu pisortanit aalajangiinerit naapertorlugit aalajangersarneqartunik eqqortitsinissaq ajornarsippat imaluunniit ajornakusuulerpat, pisortat namminersortullu pisussaaffiinut pisinnaatitaaffiinullu pisussaaffinnik saneqqussisinnaanermik nuna tamakkerlugu nunalluunniit ilaanut, piffissami aalajangersimasumi malittarisassanik aalajangersaasinnaapput. 
  Imm. 2.  Pisinnaatitaaffiit pisussaaffiillu pineqartut saneqqunneqarnissaannut tunngavissaaruppat, malittarisassat imm. 1 naapertorlugu atuutilersinneqartut atorunnaarsinneqassapput.

 

  § 52.  Naalakkersuisut nunami nappaammik inuiaqatigiinnut aarlerinartorsiortitsisumik siaruaattoqarnerani siaruartoqarnissaanillu uloriarnartorsiortoqarnerani, nioqqutissanik pilersuineq qulakkeerniarlugu iliuutsinik immikkut ittunik nuna tamakkerlugu nunalluunniit ilaanut, piffissami aalajangersimasumi malittarisassanik aalajangersaasinnaapput.
  Imm. 2.  Malittarisassat imm. 1 naapertorlugu aalajangersarneqartut inatsimmik allamik saneqqutsisinnaapput.

 

Kapitali 9

Pinngitsaaliissummik taarsiissutitalimmik pigisanik piginnikkunnaarsitsineq

 

  § 53.  Naalakkersuisut Inatsisartut inatsisaat manna malillugu iliuutsit imaluunniit malittarisassat manna naapertorlugu aalajangersarneqartut naammassineqarnissaannut atugassatut pinngitsaaliissummik taarsiissutitalimmik pigisanik arsaarinninnissaq aallartissinnaavaat.

 

Kapitali 10

Naammagittaalliorneq aamma eqqartuussivinnut suliassanngortitsineq

 

  § 54.  Inatsisartut inatsisaat naapertorlugu iliuuseqartoqartillugu, iliuutsillu kiffaanngissusiiaanermik ilaqarpata aamma iliuutsinik taama ittunik taamaatitsinissamik qinnuiginnittoqarneranik itigartitsinermi, oqartussat pineqartumut taassumaluunniit sinniisianut Eqqartuussisarneq pillugu inatsimmi malittarisassat malillugit eqqartuussivimmi misiliinissamut ilitsersuummik tunniussissapput.
  Imm. 2.  Eqqartuussivinni suliassanngortitsinissaq pillugu qinnuiginninnermik saqqummiisoqarsimappat oqartussaasut kiffaanngissusiiagaanissamik imaluunniit taassuminnga atorunnaarsitsinissamik aalajangiisut piaartumik, qinnuiginninnerullu saqqummiunneqarneraniit sapinngisamik ullut arfineq-marluk qaangiutsinnagit, suliamik Kalaallit Nunaanni Eqqartuussivimmut saqqummiissapput.
  Imm. 3.  §§ 10 - 12 malillugit peqqusinerit, nalunaarutigineqarnerisa kingorna ullut arfineq-marluk qaangiutsinnagit, Nunatta Nakorsaaneqarfianit Kalaallit Nunaanni Eqqartuussivimmut suliassanngortinneqassapput.

 

Kapitali 11

Uppernarsaatissanik ujaasineq aamma pineqaatissiissutaasinnaasut pillugit aalajangersakkat

 

Uppernarsaatinik ujaasineq

 

  § 55.  Inatsisartut inatsisaanni matumani aalajangersakkanik unioqqutitsineq pillugu suliani uppernarsaatissanik ujaasineq Eqqartuussisarneq pillugu inatsimmi malittarisassat naapertorlugit pisinnaavoq.

 

Pineqaatissiissutit pillugit aalajangersakkat

 

  § 56.  Pinerluttulerinermut inatsimmi pineqaatissiissutaasinnaasut malillugit uku pineqaatissinneqarsinnaapput:
1)  peqqussutinik § 9, § 10, imm. 1, § 11, imm. 1, § 12, § 13, imm. 1 aamma 2, kiisalu § 14, imm. 1 malillugit nalunaarutigineqartunik malinninngitsoq. 
2)  inerteqqummik § 20, imm. 1, § 21, § 23, imm. 1, naapertorlugit aalajangersarneqartumik aamma killilersuinernik inerteqqutinillu §§ 24-26 naapertorlugit aalajangersarneqartunik kiisalu killilersuinernik inerteqqutinillu §§ 27 aamma 28, aamma § 42 naapertorlugit aalajangersarneqartunik unioqqutitsisoq,
3)  malittarisassanik § 29, naapertorlugu aalajangersarneqartunik unioqqutitsisoq, 
4)  § 31, imm. 1 aamma 2 aamma § 32, imm. 1 aamma 2 malillugit pisussaaffinnik eqquutsitsinngitsoq,
5)  § 33, imm. 1-2, imaluunniit § 33, imm. 5 malillugit malittarisassanik aalajangersarneqartunik unioqqutitsisoq, 
6)  § 34, aamma § 35 malillugit malittarisassanik aalajangersarneqartunik unioqqutitsisoq, 
7)  §§ 43, imm. 1-4 aamma § 44, imm. 1 malillugit piumasarineqartunik eqquutsitsinngitsoq, 
8)  peqqussummik § 45 malillugu aalajangersarneqartunik eqquutsitsinngitsoq, 
9)  malittarisassanik § 52 naapertorlugu aalajangersarneqartunik unioqqutitsisoq.
  Imm. 2.  Najoqqutassanut Inatsisartut inatsisaat naapertorlugu suliarineqartunut Pinerluttulerinermik Inatsit malillugu pineqaatissiinerit aalajangersarneqarsinnaapput. 
  Imm. 3.  Ingerlatseqatigiiffiit il.il. (inatsisitigullu pisinnaatitaasut pisussaatitaasullu) Pinerluttulerinermi inatsimmi kapitali 5-imi malittarisassat malillugit pinerluuteqarsimasutut akisussaatinneqarsinnaapput.
  Imm. 4.  Akiliisitsinerit Inatsisartut inatsisaat una taannaluunniit naapertorlugu malittarisassat aalajangersarneqartut naapertorlugit aalajangerneqartut Nunatta Karsiata pisassarissavai.

 

Kapitali 12

Atuutilersitsinermut atuukkunnaarsitsinermullu aalajangersakkat

 

  § 57.  Inatsisartut inatsisaat ulloq 1. juli 2022 atuutilissaaq.
  Imm. 2.  Inatsisartut inatsisaat ulloq 1. juli 2023 atuukkunnaarsinneqassaaq.

 

 

 

Namminersorlutik Oqartussat, ulloq 20. juuni 2022

 

 

Múte Bourup Egede
Naalakkersuisut Siulittaasuat