Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaanni nr. 5, 19. november 2020-meersumi § 11, imm. 2 malillugu imatut aalajangersaasoqarpoq:

Meeqqamik paarisassamik inissiinermut atatillugu sulinngiffeqartarneq

  § 1.  Kommunalbestyrelsip paarsinissamut akuersissuteqarnerminut atatillugu, piffissami ikaarsaariarfiusumi angerlarsimaffimmi meeraq paarineqarnissamik pisariaqartitsisutut nalilerpagu, kommunalbestyrelse angajoqqaarsiaasup aappaata sulinngiffeqarnissaanik akuersissuteqarsinnaavoq. 
  Imm. 2. Meeqqap tigunnginnerani sulinngiffeqarnissamik kommunalbestyrelsi aamma akuersisinnaavoq meeqqamik tigusinissaq angajoqqaarsiat illoqarfigisaasa avataanniissimappat.

  § 2.  Angajoqqaarsiat, marluullutik angerlarsimaffiup avataani suliffeqartut, sorliup sulinngiffeqarnissaa namminneerlutik aalajangissavaat. Aalajangersimasumik suliffeqarneq, ilinniartuuneq assigisaalluunniit angerlarsimaffiup avataani suliffeqarnermut ilaapput.

Sulinngiffeqarnerup sivisussusissaa

  § 3. Meeqqamik ataaseq inorlugu ukiulimmik ilaqutariinnut paarsisartunut inissiinermi meeqqamut iliuusissatut pilersaarut piviusoq tunngavigalugu missiliuinikkut sulinngiffeqarnissaq sivisussusilerneqassaaq, taamaattoq takuuk imm. 2-4.
  Imm. 2. Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaanni § 3, imm. 2 aamma § 12, imm. 1 malillugit, meeqqamik ataaseq inorlugu ukiulimmik ilaqutariinnut paarsisartunut inissiisoqartillugu, sulinngiffeqarnermi angajoqqaatullu sulinngiffeqarnermi sapaatit akunnerinik 36-inik akuleriissillugit sivisussuseqartuni, inissiinermi meeqqap angajoqqaavisa sulinngiffeqarfigisimanngisaasa sinneruttut minnerpaamik amerlaqataannik, sulinngiffeqarnissamik akuersissuteqartoqassaaq.
  Imm. 3. Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaanni § 3, imm. 3 aamma § 12, imm. 2 malillugit, meeqqanik ataaseq inorlugu ukiulinnik marlunnik amerlanernilluunniit ataatsikkut inunngorsimasunik ilaqutariinnut paarsisartunut inissiisoqartillugu, sulinngiffeqarnermi angajoqqaatullu sulinngiffeqarnermi sapaatit akunnerinik 44-inik akuleriissillugit sivisussuseqartuni, inissiinermi meeqqap angajoqqaavisa sulinngiffeqarfigisimanngisaasa sinneruttut minnerpaamik amerlaqataannik, sulinngiffeqarnissamik akuersissuteqartoqassaaq.
  Imm. 4.  Sulinngiffeqarneq, naak meeqqap angajoqqaavisa akuleriissillugit sulinngiffeqarneranni angajoqqaatullu sulinngiffeqarneranni piffissaq sinneruttoq sivikinnerugaluartoq, imm. 2 aamma 3 malillugit meeqqamik 1-mik inissiisoqartillugu sulinngiffeqarnissaq akuersissutigineqarsimasoq minnerpaamik sapaatit akunnerinik 15-inik sivisussuseqassaaq meeqqanillu marlunnik amerlanerusunilluunniit inissiisoqartillugu sapaatit akunnerinik 19-inik sivisussuseqassalluni.

  § 4. Meeqqamik ataatsip pingasullu akornannik ukioqartumik ilaqutariinnut paarsisartunut inissiisoqartillugu, meeqqamut iliuusissatut pilersaarut piviusoq tunngavigalugu, missiliuinikkut sivisussusilikkamik sulinngiffeqarnermik akuersissuteqartoqassaaq.

  § 5.  Meeqqamik pingasut aqqaneq-marlullu akornannik ukioqartumik ilaqutariinnut paarsisartunut inissiisoqartillugu, ilaqutariinnilu siornatigut meeqqamik attaveqarsimanngitsumut meeraq inissinneqartillugu, sapaatit akunneri marluk tikillugit sulinngiffeqarnissaq akuersissutigineqassaaq, taamaattoq takuuk imm. 2.
  Imm. 2. Meeqqamut iliuusissatut pilersaarummi pissutsinik immikkuullarissoqarpat aalajangersimasumik missiliuinikkut sulinngiffeqarnissap sapaatit akunnerinit marlunnit sivisunerunissaa kommunalbestyrelsimit akuersissutigineqarsinnaavoq.

  § 6. §§ 3 aamma 4 malillugit sulinngiffeqarnissap saniatigut meeqqamik tigusinissaq angajoqqaarsiaasut najugaqarfiisa avataaniissimappat meeqqap tigunnginnerani sapaatit akunneri marluk tikillugit sulinngiffeqarnissaq kommunalbestyrelsemit akuersissutigineqarsinnaavoq.

Sulisitsisumut ilisimatitsineq

  § 7.  § 1 malillugu sulinermik inuussutissarsiortut sulinngiffeqartut, sulinngiffeqarnissaq kingusinnerpaamik sapaatit akunnerinik arfineq-pingasunik sioqqullugu, meeqqamik piffissaq tigusiffissartik sulinngiffeqarnerullu sivisussusissaa pillugit sulisitsisuminnut ilisimatitsissapput. Pinasuartumik pisoqartillugu sulinngiffeqarnerup aallartinngitsiarnerani ilisimatitsisoqarsinnaavoq.

Atuutilerfissaa

  § 8.  Nalunaarut manna ulloq 1. februar 2021 atuutilissaaq.

Namminersorlutik Oqartussat, ulloq 29. januar 2021

Martha Abelsen

/

Julie Præst Wilche