Aalajangiinissat ilaannut Naalakkersuisut aalajangiisinnaanerannut piginnaatitsissutit

1. Inatsisartunut immikkut ittumik qinersineq pillugu Inatsisartut inatsisaat nr. 1, 18. februar 2021-meersumi piffissami nutaamik qinersisoqarnissaanit, Inatsisartuniillu Naalakkersuisut nutaat toqqarneqarnissaasa tungaanut aalajangiinissat ilaannut Naalakkersuisut aalajangiinissaminnut piginnaatinneqarput.

2. Najoqqutassat matumani pineqartut piginnaatitsissutit tamakku atorneqaraangata malinneqartassapput.

Naalakkersuisuni sulinissaq

3. Naalakkersuisut tamanna pillugu malittarisassatik malillugit Naalakkersuisut suliat suliarisassavaat, takuuk Naalakkersuisut suleriaasiat pillugu Namminersorlutik Oqartussat nalunaarutaat, aamma ataani imm. 8.

4. Naalakkersuisoqarfik oqartussaasoq Naalakkersuisut isummernissaannut tunngavissiamik suliaqassaaq, taannalu Naalakkersuisup akisussaasup naalakkersuisoqarfimmi pisortaq peqatigalugu atsiussavaat.

5. Naalakkersuisut siulittaasuat siulittaasup aalajangiineranik suliaqassaaq, taannalu Naalakkersuisoqarfimmut oqartussaaffittut akisussaasumut utertillugu tunniunneqassaaq.

6. Naalakkersuisoqarfik oqartussaaffittut akisussaasoq allakkamik nassiussamik suliaqassaaq, taannalu Naalakkersuisut Siulittaasuata Naalakkersuisoqarfianut tunniunneqassaaq.

7. Naalakkersuisut siulittaasuata aalajangiineq akuerineqartoq allagaq nassiussaq ilanngullugu Inatsisartut Siulittaasuanut nassiutissavai.

8. Imatut pisoqartillugu, aalajangiinissamut piginnaatitaaneq Naalakkersuisumiit Naalakkersuisumut suliassiissutigineqartillugu, aalajangiineq Naalakkersuisup aamma ingerlatseqqinnermut allagaq Inatsisartut siulittaasuanut ingerlateqqissavaa.  Tamanna pillugu Naalakkersuisut Siulittaasuata Naalakkersuisoqarfia ilisimatinneqartassaaq.

Inatsisartuni sulinissaq

9. Tamanna pillugu Inatsisartut namminneq malittarisassatik malillugit Inatsisartut aalajangiineq suliarissavaat. Naalakkersuisut sulinermut tassunga peqataatinneqanngillat.

10. Aalajangiineq akuerineqartussanngorlugu itigartinneqartussanngorluguluunniit partiit eqimmattani siulittaasunut kiisalu Aningaasaqarnermut Akileraartarnermullu Ataatsimiititaliamut Inatsisartut saqqummiutissavaat.

11. Inatsisartuni suliarinnittoqareerpat Inatsisartut aalajangiinerat Inatsisartuni siulittaasup Naalakkersuisut Siulittaasuannut ingerlateqqissavaa, taamaattorli takuuk imm. 12.

12. Ingerlatseqqinneq Naalakkersuisumeerpat, tak. imm. 8, Inatsisartut aalajangernerat Naalakkersuisumut pineqartumut ingerlateqqinneqassaaq. 

Naalakkersuisuni suleriaqqinnissaq

13. Aalajangiineq Inatsisartunit akuerineqarsimappat tamatuma kinguninngua Naalakkersuisut aalajangiissapput.

14. Aalajangiinerup suliarineranut peqatigitillugu tamanna pillugu naalakkersuisoqarfik oqartussaasoq tusagassiorfinnut nalunaarummik nassiussissaaq, tassanilu ilaatigut suna pillugu aalajangiisoqarsimanersoq kinalu aalajangiinermut akuerinnissimanersoq nassuiaaffigineqassapput.

15. Inatsisartunut immikkut ittumik qinersisoqarnissaa pillugu Inatsisartut inatsisaanni piginnaatitsissummik atuisoqarnissaa pillugu najoqqutassat 5. marts 2021-imeersut najoqqutassat ukua taarserpaat.

Naalakkersuisut Siulittaasuata Naalakkersuisoqarfia, 12. marts 2021

Hans-Peder Barlach Christensen (atsior.)