§ 1

Avatangiisit innarlitsaaliorneqarnissaannik Inatsisartut inatsisaanni nr. 9-mi, 22. november 2011-meersumi, Inatsisartut inatsisaatigut nr. 1-ikkut, 29. maj 2012-imeersukkut aamma Inatsisartut inatsisaatigut nr. 10-kkut, 27. november 2018-imeersukkut allannguuteqartinneqartumi uku allanngortinneqarput:

1.  § 4 ima oqaasertalerneqassaaq:
”  § 4. Inatsisartut inatsisaannut sulianut, kalaallit aatsitassarsiornermut inatsisaannut ilaatinneqartunut atatillugu avatangiisit innarlitsaaliorneqarneri ilaatinneqanngillat, taakkununngalu maleruagassiuineq, nakkutilliineq, upalungaarsimaneq akiuiniarnerlu ilanngullugit.”

2.  § 33-mi imatut oqaasertalerneqassaaq:
”  § 33.  Kapitali manna naapertorlugu suliani tamani Naalakkersuisut kommunalbestyrelsimut, Nakorsaaneqarfimmut aamma Kalaallit Nunaanni Nersutit Nakorsaqarnermi Inuussutissalerinermilu oqartussaasunut tusarniaareerlutik aalajangiisassapput.”

3.  § 38 imatut oqaasertalerneqarpoq:
”  § 38.  Kalaallit Nunaannut eqqagassanik eqqussinissaq inerteqqutaavoq, taamaattorli imm. 2 takuuk.
  Imm. 2 Eqqagassat pineqartut annertussusaannut suussusaannullu passussinissamut Kalaallit Nunaanni naammattunik periarfissaqartoq Naalakkersuisut naliliippata, Naalakkersuisut eqqakkanik eqqussinissamut akuersissuteqarsinnaapput. Inissiinissaq siunertaralugu eqqussinissamut akuersissummik tunniussisoqarsinnaanngilaq taamatullu eqqagassanik navianartunik eqqussinissamut akuersissummik tunniussisoqarsinnaanani. 
  Imm. 3.  Nunanut, nunat killeqarfii akimorlugit, eqqakkanik navianartunik assartuisarnermi taakkualu iginneqartarnerisa nakkutigineqarnerat pillugit Basel-imi isumaqatigiissummut ilaasunut eqqakkanik nunanut allanut taamaallaat aallarussisoqarsinnaavoq.
  Imm. 4. Nuna eqqussivissaq imaluunniit nunat akunniffissat eqqakkanik tiguserusunnginnissaat tunngavissalimmik ilimagineqarpat, Naalakkersuisut eqqakkanik avammut nassiussinissamut inerteqquteqarsinnaapput.
  Imm. 5. Naalakkersuisut eqqakkanik eqqussisarnermut avammullu nassiussisarnermut maleruagassanik aalajangersaasinnaapput.”

4.  Kapitali 7 kingorna  ikkunneqassaaq:

“Kapitali 7 a

Mingutsitsinerit allat

  § 40 a. Naalakkersuisut nukissiuutit, akuutissat atortussalluunniit sulianit pisut, Inatsisartut inatsisaanni aalajangersakkanut allanut ilaanngitsut atorlugit mingutsitsinissap pinaveersaartinnissaanut pinngitsoortinnissaanullu maleruagassanik aalajangersaasinnaapput, peqqussuteqarsinnaapput imaluunniit inerteqquteqarsinnaapput, kiisalu piumasaqaateqarsinnaallutik, suliat taakku inatsimmut allamut ilaanngippata.” 

5.  Kapitali 11-ip qulequtaa imatut oqaasertalerneqassaaq:

”Attaveqaqatigiinneq tamanullu ammasumik saqqummiussisarneq”

6.  § 48 imatut oqaasertalerneqassaaq:
”  § 48. Inatsisartut inatsisaat malillugu akuersissutit, akuersissutinik tunniussinissaq allanilluunniit aalajangiinissaq nalunaaruteqarnissarluunniit sioqqullugu Naalakkersuisut innuttaasunik attaveqaqateqartarnermut, tamanut ammasumik saqqummiussisarnermut tamanillu akuutitsisarnermut maleruagassanik sukumiinerusunik aalajangersaasinnaapput. Aamma Naalakkersuisut Inatsisartut inatsisaanni suliassaqarfinnut tunngatillugu pilersaarusiornermi tamanik akuutitsinissamut maleruagassanik aalajangersaasinnaapput.
  Imm. 2.  Naalakkersuisut imm. 1 naapertorlugu innuttaasunik attaveqaqateqarnermi kiisalu tamanut ammasumik saqqummiussinermi aammalu tamanik akuutitsinermi taamaallaat atortut digitaliusut atorneqarnissaannut maleruagassanik aalajangersaasinnaapput.”

7.  § 53, imm. 1-imi naggatip aappaattut ikkunneqassaaq:
” Nalunaaruteqartussaatitaaneq taanna Inatsisartut inatsisaat imaluunniit taanna tunngavigalugu maleruagassiat aalajangersarneqartut uniorlugit suliaq mingutsitsinermik kinguneqarpat imaluunniit tamatumunnga ulorianartorsiortitsippat atuutissaaq.”

8.  § 53, imm. 1-ip kingorna immikkoortoq nutaaq una ikkunneqassaaq:
”  Imm. 2. Nunaminertami mingutsitsisoqartoq paasineqarpat, nunaminertamik atugassinneqarsimasoq imaluunniit atuisinnaatitaasoq erngerluni nakkutilliinermut oqartussaasunut nalunaaruteqassaaq.”

Tamatuma kingorna imm. 2 imm. 3-nngorpoq.

9. § 54-ip kingorna ikkunneqassaaq:
”  § 54 a. Inuk imaluunniit suliffeqarfik nakkutilliinermut oqartussaasunut ilisimatitsinissamik kissaateqanngippat, suliap Kalaallit Nunaannut eqqartuussisarneq pillugu inatsit naapertorlugu misissuinerup ingerlaqqinnissaanut atugassatut Kalaallit Nunaanni Politiinut tunniunneqannginnerani pineqartup akiligaanik nakkutilliinermut oqartussaasut pisariaqartinneqartunik misissuisinnaapput, Inatsisartut inatsisaat imaluunniit taanna tunngavigalugu maleruagassiarineqartut unioqqutinneqarsimanersut misissuiffigalugu.

  § 54 b. Inatsisartut inatsisaanni matumani maleruagassat naapertorlugit nakkutilliinermi akulerunnermiluunniit nakkutilliinermut oqartussaasut uppernarsaatissanik assiliisinnaapput, assileeqqissinnaapput tigusisinnaallutilluunniit imaluunniit pigisanik allanik tigusisinnaallutik. Allagaatit pigisallu tiguneqarsimanerinut atsiorneq tunniunneqassaaq. Allagaatit pigisallu misissueqqissaarnermut atorneqartussaanngitsut misissuinermiit kingusinnerpaamik ulluinnaat 14-it qaangiutsinnagit suliffeqarfimmut utertinneqassapput.”

10. Kapitali 13 kingorna ikkunneqassaaq:

“Kapitali 13 a

Aalajangersakkat allat

  § 59 a.  Avatangiisit eqqarsaatigineqarnerini imaluunniit nunani tamalaani isumaqatigiissutit malinniarneqarnerini pisariaqartinneqarpat, Inatsisartut inatsisaat manna imaluunniit avatangiisinik innarlitsaaliuinermut maleruagassaasimasut naapertorlugit akuersissutitut tunniunneqartut, akuersissutit aamma immikkut ittumik akuersissutit allanngortinneqarsinnaapput utertinneqarsinnaallutilluunniit. Allannguineq utertitsinerluunniit sapinngisamik tamatumunnga piffissaliussamik naammaginartumik malitseqartinneqartassaaq.
  Imm. 2.  Imm. 1 akuersissutinut, kapitali 5-imut ilaatinneqartunut atuutinngilaq.”

11. § 66 imatut oqaasertalerneqarpoq:
”  § 66.  Akiliisitsinermik pineqaatissinneqarsinnaavoq:
1)  § 35, imm. 3, § 52, aamma § 54, imm. 1 aamma 2 malillugit peqquneqarnerminik malinninngitsoq.
2)  § 53, imm. 1 aamma 2 naapertorlugit nalunaaruteqanngitsoortoq. 
3)  § 19, imm. 1 aamma 3, § 31, imm. 2, § 32, imm. 1 aamma 2, aamma § 38, imm. 2. naapertorlugit akuersissummik pissarsinianngitsoortoq.
4)  § 16, § 17, imm. 1-3, §§ 20-23, § 25, § 30, § 36, imm. 4, § 38, imm. 4, § 40 a, § 49, imm. 5, § 50, aamma § 54, imm. 3 naapertorlugit peqqussuteqarnermik, inerteqquteqarnermik piumasaqaateqarnermilluunniit unioqqutitsisoq.
5)  § 15, imm. 1 aamma 2, § 28, imm. 2, § 37, § 38, imm. 1 aamma imm. 3, § 41, imm. 1, § 53, imm. 3, aamma § 64, imm. 1-inik unioqqutitsisoq.
  Imm. 2.  § 35, imm. 1-imik unioqqutitsisoq akiliisitsinermik pineqaatissinneqarsinnaavoq, eqqagassaqalersitsilluni, eqqagassanik uninngatitsilluni, assartuilluni, suliaqarluni imaluunniit eqqakkanik eqqaalluni:
1)  allat peqqissusaannik navianartorsiortitsisoq, imaluunniit 
2)  silaannarmi, imermi, sermimi, qaqqami imaluunniit nunami mingutsitsisoq.
  Imm. 3.  § 10, § 18, § 19, imm. 4, § 27, § 34, § 36, imm. 3, § 38, imm. 5, § 40, § 40 a imaluunniit § 42 naapertorlugit akiliisitsinermi akisussaasuusoq pillugu maleruagassanik aalajangersaasoqarsinnaavoq.”

§ 2

Inatsisartut inatsisaat manna atuutilerpoq ulloq 2. december 2021.

Namminersorlutik Oqartussat, ulloq 1. december 2021

Múte Bourup Egede
Naalakkersuisut Siulittaasuat