Aningaasarsianit akileraarutit pillugit Inatsisartut inatsisaat nr. 12, 2. november 2016-imeersumi, Inatsisartut inatsisaatigut nr. 22, 28. november 2018-ikkut allanngortinneqartumi § 36 b, imm. 12 naapertorlugu aalajangersarneqarpoq:

Nunamit nunamut nalunaaruteqarnissamut pisussaaffik pillugu ilisimatitsissut

  § 1.  Ilisimatitsissut, aningaasarsianit akileraarutit pillugit Inatsisartut inatsisaanni § 36 b, imm. 10 naapertorlugu ilisimatitsissutigineqartussaq, paasissutissanik tulliuttunik imaqassaaq:
1)  Ingerlatseqatigiiffiup qullersaqarfippiaa Kalaallit Nunaanni angerlarsimaffeqarpat: Suliffeqarfissuaq, nunamit nunamut nalunaarummik tunniussisoq pillugu paasissutissat, kinaassutsimut paasissutissat nalunaarutiginerisigut.
2)  Ingerlatseqatigiiffiup qullersaqarfippiaa Kalaallit Nunaanni angerlarsimaffeqanngippat: Suliffeqarfissuaq sorleq, nunamit nunamut nalunaarummik tunniussinissamut pisussaatitaanersoq pillugu paasissutissat, kinaassutsimut paasissutissat nalunaarutiginerisigut, kiisalu ingerlatseqatigiiffiup sumi akileraartussaanera nalunaarutigineratigut.
  Imm. 2.  Imm. 1 naapertorlugu kinaassutsimut paasissutissanut ilaassapput ateq tamakkiisoq, najugaq, nuna akileraartarfik, suliffeqarfiup normua (cvr-nr.) imaluunniit inuussutissarsiummik ingerlatsisutut stamnormu (SE-nr.). Suliffeqarfissuaq nunami allameersoq pineqarpat, nunami akileraartarfimmi akileraartarnermut uppernarsaatip normua (TIN-nr.) ilaatigut paasissutissiissutigineqassaaq.
  Imm. 3.  Aningaasarsianit akileraarutit pillugit Inatsisartut inatsisaanni § 36 b, imm. 10 naapertorlugu ilisimatitsissut kalaallisut, qallunaatut imaluunniit tuluttut pisinnaavoq.

  § 2.  §§ 1 aamma 3 naapertorlugit ilisimatitsissut Akileraartarnermut ingerlatsiviup innersuussineratigut digitalikkut pissaaq. Ilisimatitsissut ukiup aningaasarsiaqarfiusup, nunamit nunamut nalunaarutip tunniunneqarfiata naanerani kingusinnerpaamik tunniunneqassaaq.

  § 3.  Akileraartarnermut ingerlatsivimmut ilisimatitsisoqassaaq, pisunik nunamit nunamut nalunaarutiginninnermik tunniussinissamut pisussaaffiup atorunnaarneranut sunniuteqartunik pisoqarpat.

Nunamit nunamut nalunaarummik nalunaarutiginninneq

  § 4.  Nunamit nunamut nalunaarummik nalunaarutiginninneq paasissutissanik tabel 1-imiittunik, tak. ilanngussaq 1, imaluunniit tuluttoortaanit OECD's Guidance on Transfer Pricing Documentation and Country-by-Country Reporting-imi annex III-mit kapitali V-mut Akileraartarnermut ingerlatsivimmut tunniussinikkut pissaaq.
  Imm. 2.  Tabel 2 suliffeqarfissuup nunani arlalinni immikkoortortallip immikkoortortai tamaasa pillugit, niuernermi sammisanik pingaarnernik, kiisalu akileraartarnikkut sumi angerlarsimaffeqarneranik paasissutissanik imaqassaaq. Aalajangersimasumik ingerlatsiffiit nunap akileraarfiusup, inissisimaffiusut ataani inissinneqassapput kiisalu ingerlatseqatigiiffiup ilaaffiata taaguutaa allassimassaaq.
  Imm. 3.  Tabel 3 tabel 1-imik aamma 2-mik paasinninnissamut paasissutissanik allanik pisariaqartunik imaluunniit siuarsaasunik imaqassaaq.
  Imm. 4.  Suliffeqarfissuarmi immikkoortortap, aningaasarsianit akileraarutit pillugit Inatsisartut inatsisaanni § 36 b, imm. 7 naapertorlugu nunamit nunamut nalunaarummik suliaqarnissamut pisussaatitaasup piginneqatigiiffimmut pingaarnerusumut paasissutissanik, pisussaaffiup naammassinissaanut pisariaqartunik tamanik tunniussinissamut qinnutigissavaa. Ingerlatseqatigiiffiup pingaarnerup paasissutissat pisariaqartut suliffeqarfissuup immikkoortortaanut atugassanngortinnissaanut itigartitsissutigippagu, suliffeqarfissuup immikkoortortaata nunamit nunamut nalunaarummik tunniussisup, paasissutissat pigisani, tigusani imaluunniit pissarsiarisani ilanngutissavai, Akileraartarnermullu ingerlatsivimmut nalunaarutigalugu, ingerlatseqatigiiffiup pingaarnerup paasissutissat pisariaqartut atorneqarnissaat itigartitsissutigisimagaa.
  Imm. 5.  Nunamit nunamut nalunaarummik tunniussineq akileraartarnermut ingerlatsiviup innersuussinera malillugu digitalikkut pissaaq.

Atuutilernera

  § 5.  Nalunaarut 1. maj 2020-mi atuutilerpoq.

Namminersorlutik Oqartussat ulloq 30. april 2020

Vittus Qujaukitsoq

/

Nikolai S. Christensen