Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 6 a aamma 12 a, 12 b kiisalu § 29, imm. 2 malillugit aalajangersarneqarpoq:

Atuuffii

  § 1.  Nalunaarut illoqarfimmut Nuummut atuuppoq, taamaattoq takuuk imm. 2 aamma 3.
  Imm. 2.  Nalunaarut Dronning Ingridip Napparsimavissuanut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaanermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  §§ 3 aamma 4 katersuunnernut politikkikkut allatulluunniit isummersornissamik sunniiniarnissamik siunertalinnut atuutinngillat.

  § 2.  Nalunaarut malillugu killilersuinerit, inerteqquteqartitsinerit, peqqusinerit il.il. 30. april 2020 tikillugu atuutissapput.

Katersuunnernut il.il. tunngatillugu killilersuinerit

  § 3.  Aaqqissuussanut, nalliuttorsiornernut, sammisaqartitsinernut assigisaanulluunniit inuit 10-t qaangerlugit peqataaffigineqartunut ingerlatsinissaq peqataanissarlu inerteqqutaavoq. Inerteqquteqartitsinermi ilaatinneqarput illup iluani, silami, pisortat inuillu katerittarnerat, aaqqissuussinerit pisussallu il.il.
  Imm. 2.  Peqataasut taamaallaat inoqutigiiuppata imm. 1 inissiamut atuutissanngilaq.

  § 4.   Inuit qulit sinnerlugit tamanit katersuuffigineqarsinnaasumiippata, § 3, imm. 1-imullu pisup ilanngunneqarsimannginnera aqqutigalugu inuit politiit naliliinerat malillugu nappaatinik ulorianartunik nalinginnaasunik immikkut tunillatsinnissamut ulorianartoqarfiusuni, politiit inuit piffimmiit qimatseqqullugit peqqusisinnaapput.
  Imm. 2. Politiit imm. 1 malillugu naliliinerat nappaatinit ulorianartunit nalinginnaasunit tunillatsissinnaanermut tunngatillugu Nakorsaaneqarfiup innersuussutai nalinginnaasut eqqarsaatigalugit pissaaq.

  § 5.  Politiit § 3-mi inerteqquteqartitsinerup eqqortinniarnissaanut nakkutiginninnissaq siunertaralugu ininut sumiiffinnullu allanut eqqartuussivik akuersiseqqaarnagu isersinnaapput.
  Imm. 2.  Inissiaq imm. 1-imi ilaatinneqanngilaq.

Pisortat suliffeqarfiutaannut isersinnaaneq killilersuinerillu

  § 6.  Suliffeqarfiit kulturimik, ilageeqarnermik sunngiffimmillu sammisallit pisortanit pigineqartut Nappaatinut tunillaassortunut inunnut iliuutsit pillugit Inatsisartut peqqussutaanni § 22, imm. 1-imut ilaanngitsut iniutitik tamanut mattuteqqassavaat.

Ininut assigiinngitsunut isersinnaaneq killilersuinerlu

  § 7.  Inuussutissarsiummik ingerlatallit ininik makkuninnga tamanut mattusseqqassapput:
1)  Unnukkut klubbit, qitigiartarfiit, imerniartarfiit, il.il.
2)  Neriniartarfiit, cafeet il.il., tuniniaaffiusumi nerisassanik sassaalliutigineqartunik nerisarfiusut, aamma imigassanik sassaalliutigineqartunik imertarfiusut, taamaattorli imm. 2 takuuk.
4) Sumiiffiit timersornermik ingerlatsiviit sunngiffimmilu sammisassaqartitsiviit, taakkununnga ilanngullugit timersoriartarfiit, nalunnguartarfiit, sungiusariartarfiit, isiginnaartitsisarfiit filmeriartarfiillu.
5) Kakiuisartut, iverusersuisartut, eqissisimaarluni uffariartarfiit, timigissartarfiit, pinnersaasarfiit tagiartuisarfiillu, nujalerisut inillu allanut kiffartuussiviusartut ilusimikkut timimik qanimut attuiffiusartut palersaartarfiillu. 
  Imm. 2. Neriniartarfiit sassaallertarfiillu imm. 1, nr. 2, apeqqutaatinnagit aamma nerisassanik imeruarsaatinillu tuniniaaffiusumi iioraaffiusussaanngitsut (take-away) tuniniaanissaq siunertaralugu tamanut ammatinneqarsinnaapput, taamaattoq takuuk § 9

Nuuk Centerimut isersinnaaneq killilersuinerlu

  § 8.  §§ 7-p 9-llu saniatigut Nuuk Centerimut makku atuupput:
1)  Nuuk Centerimi ammaannartuniinnissaq inerteqqutaavoq. Niuertarfinnut, suliffinnut allanullu iserniartilluni ammaannartut aqqusaarneqarsinnaapput.
2)  Niuertarfiit allallu Nuuk Centerip isaariaata eqqaaniittut pisisartunik orninneqarsinnaasut periarfissamik matuminnga atuisinnaasut matutik ilorliit matoqqatissavaat.
3)  Niuertarfiit allallu Nuuk Centerip isaariaata eqqaatigut pisisartunik orninneqarsinnaanngitsut immikkut maleruaqqusanik Nakorsaanerup aalajangersagaanik malinnissapput.

Ininut kikkunnilluunniit iserfigineqarsinnaasunut piumasaqaatit

  § 9.  Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput:
1) Natermut kikkunnit tamanit iserfigineqarsinnaasumut 4 m2-iusumut amerlanerpaamik inuup ataasiinnaap isersimanissaa akuerineqarsinnaavoq. Nateq 4 m2-imik mikineruppat oqaaseqatigiit siulliit apeqqutaatinnagit inuup ataatsip isersimanissaa akuerineqarpoq. Nateq oqaaseqatigiinni siullerni pineqartoq qanoq pequteqartiginera apeqqutaatinnagu iikkamiit iikkamut naatsorsorneqassaaq.
2) Init ajornanngippat imatut pequsersorsimassapput tuniluunnissaq minnerpaaffianiitinneqassalluni, tassunga ilaalluni pisisut pulaartullu imminnut qanillinnginnissaat periarfissaqartillugu.
3) Inimi ininiluunniit tamanit iserfigineqarsinnaasuni eqqiliusaarnissaq ileqqorissaarnissarlu pillugit paasissutissanik nivinngaasoqassaaq. Paasissutissat oqaaseqatigiinni siullerni taaneqartut Nakorsaaneqarfimmiit tamanut saqqummiunneqassapput.
4) Sulisut tamarmik Nakorsaaneqarfiup eqqiluisaaqqissaarnissamik ileqqorissaarnissamillu innersuussutaanik malinninnissaat qulakkeerneqassaaq. Innersuussutit oqaaseqatigiinni siullerni taaneqartut Nakorsaaneqarfimmiit tamanut saqqummiunneqassapput.
5) Pisisunut pulaartunullu ajornanngippat imermik qaqorsaammillu imaluunniit assammut spritimik peqassaaq.
6) Nerisassanik poortorneqarsimanngitsunik tuniniaanermi sulisut aaqqateqassapput.

  § 10.  Inuussutissarsiummik ingerlatalik politiit naliliinerat malillugu § 9-mik unioqqutitsisimappat, inuussutissarsiummillu ingerlatalik § 9-mik malinninnissaa ilimagineqanngippat, inimik piffissami aalajangersimasumi tamanut matoqqatitsinissaannik politiit peqqusisinnaapput.

Angallanneq

  § 11.  Bussit bussimi issiaffiusinnaasut qaangerlugit ilaasoqaqqusaanngillat.
  Imm. 2.  Angallatit allallu kikkunnut tamanut angallassinissamik neqeroorutillit §§ 3 aamma 4 malillugit ilaasoqarsinnaapput.

Pineqaatissiissutit

  § 12.  Inuit § 3, imm. 1-imik imaluunniit §§ 7-9-mik aamma 11-mik unioqqutitsisut imaluunniit § 4, imm. 1 imaluunniit § 10 malillugit peqqusinermik unioqqutitsisut Kalaallit Nunaannut Pinerluttulerinermik Inatsit malillugu pineqaatissinneqarsinnaapput.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq nalunaarummilu allami allanngortitsineq

  § 13. Nalunaarut ulloq 15. april 2020-mi atuutilissaaq,

Namminersorlutik Oqartussat, ulloq 14. april 2020

Martha Abelsen

/

Tine Pars