Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi §§ 21 a aamma 21 b, aamma § 29, imm. 2 Inatsisartut inatsisaat nr. 1, 1. april 2020-meersumit allanngortinneqartoq aalajangersarneqarpoq:

Atuuffii

  § 1.  Nalunaarut taamaallaat atuutsinneqassaaq pisuni Covid-19-imik siaruartorneq tunillaassornerlu unitsinnissaannut pisariaqartoq nalilerneqarpat.

Inatsisitigut inuttaasut paasissutissiinermut pisussaaffiat

  § 2. Inatsisitigut inuttaasut Nunatsinni Nakorsaaneqarfimmit imaluunniit politiinit piumaffigineqarnermikkut paasissutissanik attuumassuteqartunik tunniussinissaminnut pisussaaffeqarput, matumani akiliummik piginnittup aqqa aamma najugaa, akiliuteqarsimanermi piffissaq aamma sumiiffik taassuma elektroniskimik attaveqaatinik imaluunniit kiffartuussinernik atuineranut atatillugu inaarutaasumik atuisumut aalajangersaasinnaasutut paasissutissat ilanngullugit. Tamatumunnga atatillugu inunnik paasissutissanik suliarinnittarneq pillugu inatsisip Kalaallit Nunaanni atuutilersimanera pillugu peqqussummi §§ 6-imi aamma 7-mi ilaatinneqartut inunnik paasissutissat suliarineqarsinnaapput.

Inuit paasissutissiinermut pisussaaffiat

  § 3. Inuit Nunatsinni Nakorsaaneqarfimmit imaluunniit politiinit piumaffigineqarnermikkut nunami imaluunniit nunani allani sumiissimanerminnut paasissutissiinissamut kiisalu sumiinnerminni kikkut attaveqarfigisimaneraat paasissutissiinissamut pisussaaffeqarput. Tamatumunnga atatillugu inunnik paasissutissanik suliarinnittarneq pillugu inatsisip Kalaallit Nunaanni atuutilersimanera pillugu peqqussummi §§ 6-imi aamma 7-mi ilaatinneqartut inunnik paasissutissat suliarineqarsinnaapput.

Oqartussaasut aamma peqqinnissaqarfimmi sulisut paasissutissanik tunniussinissamut pisussaaffiat

  § 4. Nappaatit tunillaassortut akiorniarlugit iliuutsit pillugit Inatsisartut peqqussutaanni kapitali 3 naapertorlugu, Naalakkersuisut aamma Tunillaassortunik Nappaalanersuaqarneranut Ataatsimiititaliarsuup peqqusinissaannut Nunatsinni Nakorsaaneqarfiup inassuteqarnissaanut atugassanik §§ 2 imaluunniit 3 naapertorlugit politiit Nunatsinni Nakorsaaneqarfimmut paasissutissanik pissarsiarineqarsimasunik ingerlatitseqqiissapput.
  Imm. 2.  Nappaatit tunillaassortut akiorniarlugit iliuutsit pillugit Inatsisartut peqqussutaanni kapitali 3 naapertorlugu Naalakkersuisut aamma Tunillaassortunik Nappaalanersuaqarneranut Ataatsimiititaliarsuup peqqusinissaannut Nunatsinni Nakorsaaneqarfiup inassuteqarnissaanut atugassatut tulluartutut nalilerneqarpata, peqqinnissaqarfimmi sulisut nakorsiartut pissusaat aarlerinartoqartoq paasigunikku peqqinnissaqarfimmi sulisut paasissutissanik, matumani peqqissutsimut tunngasunik paasissutissanik, Nunatsinni Nakorsaaneqarfimmut ingerlatitseqqiissapput.
  Imm. 3.  Peqqinnissaqarfimmi sulisut pineqartut ima paasineqassapput, peqqinnissamut tunngasunik suliaqartut inatsit immikkut ittoq naapertorlugu inuit akuerisaasut, aamma inuit taakku akisussaaffiitigut iliuuseqartut, tak. Napparsimasut inatsisitigut inissisimanerat pillugu Inatsisartut peqqussutaanni § 4.

Pineqaatissiissutit

  § 4. §§ 2 imaluunniit 3 naapertorlugit peqqussutaasut malinneqanngippata Kalaallit Nunaanni Pinerluttulerinermut inatsit malillugu pineqaatissiissuteqarnissamut aalajangersaasoqarsinnaavoq.
  Imm. 2. Kalaallit Nunaanni Pinerluttulerinermut inatsimmi kapitali 5-imi malittarisassat malillugit ingerlatseqatigiiffiit il. il. (inatsisitigut inuttaasut) pinerluuteqarsimasutut akisussaatinneqarsinnaapput.

Atuutilerfia

  § 5. Nalunaarut saqqummiussinerup aqaguani atortuulissaaq.

Kalaallit Nunaanni Namminersorlutik Oqartussat, ulloq 7. april 2020

Martha Abelsen

/

Tine Pars