§ 1

Sanaartornermi neqerooruteqartitsisarneq pillugu Inatsisartut inatsisaanni nr. 11, 2. december 2009-meersumi, Inatsisartut inatsisaatigut nr. 4, 15. april 2011-meersukkut aamma Inatsisartut inatsisaatigut nr. 18, 22. november 2011-meersukkut allannguuteqartinneqartumi allannguutissat uku aalajangersarneqarput:

1.  § 1, imm. 2, nr. 1 imatut oqaasertalerneqassaaq:
”1)  Kalaallit Nunaanni Namminersorlutik Oqartussat, ingerlatseqatigiiffiit aalajangiisarnermi Kalaallit Nunaanni Namminersorlutik Oqartussat sunniuteqarfigisaat kiisalu kommunini oqartussaasut ingerlatseqatigiiffiillu, aalajangiisarnermi kommunit sunniuteqarfigisaat.”

2.  § 1, imm. 3, nr. 2 imatut oqaasertalerneqassaaq:
”2)  Namminerisamik inissialiortiternerit, inissianut aningaasalersuisarneq pillugu Inatsisartut inatsisaat naapertorlugu taarsigassarsinissamik neriorsuuteqarfiusut.”

3.  § 8, imm. 1 immikkoortuisa aappaanni ”300.000 koruunit” imatut allanngortinneqassaaq: ”500.000 koruunit”.

4.  § 13-imi imm. 2-tut ivertinneqassaaq:
”  Imm. 2.  Aammattaaq killilimmik suliariumannittussarsiuussinerit siumoortumik neqe­rooruteqartitsiviunngitsumik ingerlanneqarsinnaapput, nunap immikkoortuani pissutsit peqqutaallutik entreprenørit najugaqartut kisimik neqerooruteqarsinnaanissaat naatsorsuutigi­neqartillugu, aammalu killilimmik neqerooruteqartitsinissamut § 25 a, imm. 4 naapertorlugu aggersaasoqarsimatillugu.”

5.  § 20 imatut oqaasertalerneqassaaq:
”  § 20.  Neqerooruteqartut, § 1, imm. 2-mut ilaatinneqartut sanaartugassanut siumoortumik neqerooruteqartitsinermik pissarsiniarsinnaanngillat, matumani pineqanngippata:
1)  sanaartugassat katillugit 1.500.000 koruuninik taakkuluunniit inorlugit nalillit,
2)  sanaartugassat annertussutsimikkut, pitsaassutsimikkut piffissalluunniit ingerlanissaa eqqarsaatigalugu ajornakusoortorujussuarmik neqerooruteqartitsinissamut tunngavissat aqqutigalugit aalajangersarneqarsinnaasut, soorlu misiliilluni suliat, ilisimatusarnerit ineriartortitsinerillu ilaat imaluunniit iluarsartuussinerit, iluarsaassinerit allanngortitsinerillu, suliassalluunniit isumannaallisaaneq eqqarsaatigalugu kinguartinneqarsinnaanngilluinnartut,
3)  suliariumannittussarsiuussinermi neqeroorummik, tassungalu ilanngullugu aningaasa­qarnermut peqqussutilluunniit malillugit naleqquttumik tigusisoqarsimanngippat, imaluunniit aallaqqaammut neqerooruteqartitsinermi piumasaqaatit annertuumik allannguuteqarsima­tinnagit siumoortumik neqerooruteqartitsinissaq pillugu allagarsiinermi qinnuteqaatinik tigusaqartoqarsimanngippat,
4)  nunami pissutsit pissutsilluunniit allat peqqutaallutik suliffeqarfiit aalajangersimasut pingasut tikillugit kisimik sanaartugassanik suliaqarnissamut periarfissaqarpata, aammalu § 25 a, imm. 4 naapertorlugu isumaqatigiiffiusumik neqerooruteqartitsinissamut aggersaaso­qarsimappat, imaluunniit
5)  pissutsit aalajangiisuusussat immikkut ittut allat peqqutaallutik entreprenørimik aalajangersimasumik toqqaasoqartariaqarpat.”

6.  Kapitali 6-ip kingorna ivertinneqassaaq:

”Kapitali 6 a

Siumoortumik nalunaaruteqartarnerit

  § 25 a.  Neqerooruteqartitsisup siumoortumik nalunaaruteqarnermigut, suliassat imaluunniit suliassat taakku ilaannit ilaasa suut neqerooruteqartitsisup neqerooruteqartitsiviginiarnerai saqqummiussinnaavai. Siumoortumik nalunaarut tusagassiorfitsigut imaluunniit tusagassiorfiit elektroniskiusut aqqutigalugit allagarsiinikkut tamanut ammasumik saqqummiunneqassaaq.
  Imm. 2.  Suliassanut ataasiakkaanut siumoortumik nalunaarut suliassaq suliaritinniagaq pillugu allaaserisamik naatsumik, kiisalu suliassap suliarineqartussap sumiinneranut aamma­lu piffissamut suliassap aallartiffissaatut naatsorsuutigineqartumut allagarsiinerusinnaasunullu paasissutissanik imaqassaaq.
  Imm. 3.  Siumoortumik nalunaarut taamaallaat suliassanut, ullormit siumoortumik nalunaa­rutip tamanut ammasumik saqqummiunneqarfianit naatsorsorlugu neqerooruteqartitsisup sivisunerpaamik qaammatit 12-it iluanni neqerooruteqartitsivigitissallugu pilersaarutigisaanut atuutissaaq.
  Imm. 4.  Neqerooruteqartitsisup siumoortumik neqerooruteqartitsinani aamma isumaqati­giiffiusumik neqerooruteqartitsinani suliariumannittussarsiuussisarnissami, neqeroorute­qarnissamut soqutiginnittunik aggersaanikkut siumoortumik nalunaaruteqartarneq atorsinnaa­vaa. Siumoortumik nalunaarut neqerooruteqartitsisup suliassamut aalajangersimasumut neqerooruteqartitsinermik aallarniinissaa kingusinnerpaamik sapaatit akunnerinik arfineq pingasunik sioqqullugu tamanut ammasumik saqqummiunneqassaaq, taannalu suliassat suut ilaatinneqarnersut, sumiiiffik aammalu isumaqatigiissutip naammassinissaanut piffissaq, kiisalu soqutiginnittut saaffiginninnissaannut piffissaq killiliussaq pillugu paasissutissanik imaqassalluni.
  Imm. 5.  Neqerooruteqartussat, imm. 4 naapertorlugu siumoortumik nalunaaruteqarnissamut piffissaliussap naannginnerani soqutiginninnerminnik saqqummiussisut neqerooruteqarnissa­mut qinnutigineqarsinnaapput, tamatumali saniatigut tamatumunnga inatsisitigut piumasaqaa­teqarsinnaanatik.
  Imm. 6.  Imm. 4 naapertorlugu siumoortumik nalunaaruteqarneq pillugu maalaaruteqarnissa­mut, ullormit siumoortumik nalunaarutip saqqummiunneqarfianit piffissaq maalaaruteqarfiu­sussaq sapaatit akunnerinut sisamanut killilerneqarpoq, Pisortani Pisiniartarnernut Neqerooru­teqartitsisarnermut Maalaaruteqartarfik pillugu Inatsisartut inatsisaanni § 5, imm. 1 malillugu.”

7.  § 26 imatut oqaasertalerneqassaaq:
”  § 26.  Inatsisartut inatsisaat manna, imaluunniit maleruagassat, Inatsisartut inatsisaat manna naapertorlugu aalajangersarneqartut naapertorlugit aalajangiinerit Pisortani Pisiniartarnernut Neqerooruteqartitsisarnermut Maalaaruteqartarfik pillugu Inatsisartut inatsisaanni malerua­gassat naapertorlugit maalaarutigineqarsinnaapput.”

8.  §§ 27-34 atorunnaarsinneqassapput.

§ 2

Inatsisartut inatsisaat manna 1. januar 2021-mi atuutilissaaq.

Namminersorlutik Oqartussat, ulloq 26. november 2020

Kim Kielsen