Aalisarneq pillugu Inatsisartut inatsisaat nr. 18, 31. oktober 1996-imeersumi § 23, imm. 2 aamma § 33, imm. 2, kingusinnerpaamik Inatsisartut inatsisaat nr. 28, 28. november 2016-imeersumi allanngortinneqartoq, aamma Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 11, 28. august 2014-imeersumi § 10, imm. 2 malillugit aalajangiunneqarput:

Atuuffia

§ 1. Qeqertarsuup Tunuani aqutsiveqarfimmi, 68° 52,5’N-ip avannaani, aamma 70° 30’N-ip kujataani sineriammit sumiiffiusumi, aamma aalisartoqarfimmut tunngavigisatut killingisat avataanni sømilit pingasut tikillugit nassuiarneqartutut inuussutissarsiutigalugu aalisarnermut ileqqoreqqusaq atuuppoq.

Inuussutissarsiutigalugu qaleralinnut qassusersorluni aalisarneq

  § 2. Qaammatini januaarimi, februaarimi, marsimi, apriilimi aamma maajimi ilanngussani sumiiffiit nalunaarsukkat avataanni inuussutissarsiutigisatut qassusersorluni qaleralinniartoqaqqusaavoq.

Qassusersorluni saarullinniarneq

  § 3. Ilanngussaq 1-imi sumiiffiit nalunaarsukkat avataanni taamaallaat qassusersorluni saarullinniartoqaqqusaavoq.

Ataatsimoorussatut aalajangersakkat

  § 4. Ukiuunerani sikoqarnerata qassusersorluni aalisarneq ajornartorsiortissappagu najugarisami peqatigiiffinni tusarniaareernermigut qassusersorluni aalisarneq kommunalbestyrelsip matusiffigisinnaavaa.

Pineqaatissiissutit

§ 5.  § 2 aamma § 3-mik unioqqutitsinerit akiligassinneqarnermik arsaarinnissuteqarnermillu nassataqartitsisinnaapput.
  Imm. 2.  Imm. 1 malillugu akiligassiissutit Kalaallit Nunaanni pinerluttulerinermut inatsimmi malittarisassat malillugit inatsisitigut inuttut naatsorsuussanut akileqqusaasinnaapput.

Atuutilernera

§ 6.  Ileqqoreqqusaq una nalunaarutigineqareernerata kingorna ingerlaannaq atuutilerpoq.
  Imm. 2. Taamaalinerani Qeqertarsuup Tunuani aqutsiveqarfimmut atuuttoq Qassusersorluni qaleralinniarneq pillugu Qaasuitsup Kommunianut ileqqoreqqusaq 6. september 2011-meersoq atorunnaarsinneqarpoq.

Taamatut ulloq 4. december 2020-mi Avannaata Kommuniani Kommunalbestyrelsimit akuersissutigineqarpoq.

________________________________

Palle Jerimiassen

Borgmesteri

Aqutsiveqarfimmi Qeqertarsuup Tunuani inuussutissarsiutigalugu qassuserluni aalisarneq pillugu Avannaata Kommuniata ileqqoreqqusaa aalajangersarneqarpoq.

Namminersorlutik Oqartussat, ulloq 21. januar 2021

_________________________________

Jens Immanuelsen

Aalisarnermut, Piniarnermut Nunalerinermullu Naalakkersuisoq