Piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersumi § 2, imm. 4, § 8, §§ 11-13, § 15, imm. 4, kiisalu § 17, imm. 2, kingullermik Piniarneq aallaaniarnerlu pillugit Inatsisartut inatsisaata allanngortinnera pillugu Inatsisartut inatsisaat nr. 1, 16. maj 2008-imeersukkut allanngortinneqartoq aamma Pinngortitamik illersuineq pillugu Inatsisartut inatsisaat nr. 29, 18. december 2003-meersumi § 5, § 6, imm. 2, § 35, § 36, imm. 2, kiisalu § 60, imm. 2 naapertorlugit aamma piniarneq pillugu siunnersuisoqatigiit tusarniaaffigereerlugit aalajangersarneqarput:

Atuuffii

  § 1.  Nalunaarut Kalaallit Nunaata nunataani aalisarnikkullu oqartussaaffigisaani atuuppoq.

Piniarnermut mannissarnermullu tunngaviusumik piumasaqaatit

  § 2.  Piniarnermut atuuttumik allagartaqartut imaluunniit akiliuteqarluni piniartitsinermik aaqqissuussisartumit akuerisaasumit angallanneqartut kisimik timmissanik piniaqqusaapput timmissallu manniinik katerseqqusaallutik.

  § 3.   Timmissat piffissamik piniarfiusussamik aalajangersimasumik aalajangersaaffigineqartut kisimik piniaqqusaapput taamaallaallu timmissat pineqartunut piffissap piniarfigeqqusaasutut aalajangersarneqartup iluani piniaqqusaallutik.
Imm. 2.  Mannissarneq taamaallaat timmissanit piffissamik mannissarfiusussamik aalajangersaaffigineqartunit pisassaaq, tak. § 10, imm. 1, aamma § 11, imm. 2-4 aamma imm. 6, taamaallaallu piffissap mannissarfigeqqusaasutut aalajangersarneqartup iluani pisassalluni.

Aqutsiveqarfiit

  § 4.  Aqutsiveqarfiit tassaapput, ilanngussat 2-6 takukkit:
1)  Immikkoortoq 1: Petermann Fjord-miit Hammer Ø-mut : N 81^o25’20.4” V64^o25’23.3” uunga N74^o49’11.5” V59^o40’43.0”.
2)  Immikkoortoq 2: Hammer Ø-miit Maligaanut: N74^o49’11.5” V59^o40’43.0” uunga N70^o17’4.66” V56^o57’26.7”.
3)   Immikkoortoq 3: Maligaaniit Kanajoorartuunut: N70^o17’4.66” V56^o57’26.7” uunga N60^o22’46.5” V44^o59’49.8”.
4)  Immikkoortoq 4: Kanajoorartuuniit Kap Biot-mut: N60^o22’46.5” V44^o59’49.8” uunga N71^o52’49.9 V22^o39’19.6”.

Nassuiaatit

  § 5.  Nalunaarummi matumani ulloq piniarfik paasineqassaaq, ulloq unnuarlu piniarfigineqartoq.
  Imm. 2. Nalunaarummi matumani ullormut pisassiissutit paasineqassaaq, pisassiissutit ullormi tassani taamaallaat pisarineqarsinnaasut. Pisassiissutit inummut namminermut atuupput, allamut tunniuteqqusaanngillat aqagumulluunniit sipaarneqaqqusaanatik.
  Imm. 3.  Nalunaarummi matumani nammineq atugassat paasineqassaaq, inoqutigiit iluanni namminermi atugassat.
  Imm. 4.  Nalunaarummi matumani ileqqutoqqat malillugit piaqqanik piniarneq paasineqassaaq, aallaat atornagu piniarneq piaqqat imaani timmissat ineqarfimmit qaninnerpaamik meterinik 1000-nik ungasissumiippata ungasinnerusumiippataluunniit.
  Imm. 5.  Nalunaarummi matumani timmissat ineqarfii paasineqassaaq, sumiiffik timmissat imarmiut aappariit ikinnerpaamik qulit piaqqiorfigisaat.
  Imm. 6.  Nalunaarummi matumani flu-flu qarsoq paasineqassaaq, qarsoq timmissanut timmisunut piseriutissatut naatsorsuussaq. Qarsoq taamaattoq tassaavoq qanittunut takujuminaatsunullu immikkut ilusilersugaq.
  Imm. 7.  Nalunaarummi matumani qarsup nuua blunt-iusoq paasineqassaq, qarsup nuua sissuineq ajortoq ammaloqisaamik patittaatilik aalajangersimasumik diameterilik.

Eqqissisimatitsineq           

  § 6.  Timmissat tamarmik eqqissisimatitaapput, taamaattoq tak. imm. 2.
  Imm. 2. Timmissat ilanngussaq 1-mi nalunaarneqarsimasut, imm. 1-imi aalajangersakkamit mininneqarnikuupput.
  Imm. 3.  Nunap immikkoortui tulliuttut qanorluunniit piniarfigineqarnissamut eqqissisimatitaapput aamma 500 meterisut qanitsigisumi qaninnerusumilu nunamut ikaarneq angallannerlu sunaluunniit inerteqqutaavoq, tak. ilanngussaq 7-imi allattorsimaffik aamma ilanngussaq 8-mi nunap assinga. 
1)  Kingittoq Upernavik Kujalliup eqqaaniittoq,
2)  Innaq Ilulissat eqqaaniittoq,
3)  Taateraarunnerit Paamiut eqqaaniittut,
4)  Kitsissut Avalliit Qaqortup eqqaaniittut,
5)  Kangikajik Ittoqqortoormiit eqqaaniittoq aamma
6)  Appalik Ittoqqortoormiit eqqaaniittoq piniagassanik tamanik piniarfigeqqusaanngillat.

Piniakkat pisassiissuteqarfiusut

  § 7.  Miteq siorartooq (Somateria mollissima) aamma miteq siorakitsoq (Somateria spectabillis) aqutsiveqarfimmi pineqartumi piffissami piniarfiusumi, imm. 2 takuuk, piniaqqusaapput, takuuk ilanngussat 2-6, taamaattoq takuuk § 6, imm. 3.
  Imm. 2.  Immikkoortuni (matuma kingorna Zone) tulliuttuni piffissat piniarfiusussat makku atuupput:
1)  Zone 1: 15.10. – 30.04. aamma 01.05. - 31.05. 
2)  Zone 2: 15.10. – 30.04.
3)  Zone 3: 15.10. – 31.03.
4)  Zone 4: 15.10. – 30.04.
  Imm. 3.  Inuussutissarsiutigalugu piniarnermut allagartallit Zone 1-mi, 2-mi aamma 4-mi piffissami piniarfiusumi 15.10.-miit 30.04.-mut, tak. § 7, imm. 2, nr. 1, 2 aamma 4, ullormut piniarfiusumut miternik siorartuunik aamma miternik siorakitsunik ataatsimut katillugit amerlanerpaamik 40-nik pisaqaqqusaapput, tak § 5, imm. 1. Inuussutissarsiutigalugu piniarnermut allagartallit Zone 3-mi piffissami piniarfiusumi 15.10.-miit 30.03.-mut, tak. § 7, imm. 2, nr. 3 ullormut piniarfiusumut miternik siorartuunik aamma miternik siorakitsunik ataatsimut katillugit amerlanerpaamik 40-nik pisaqaqqusaapput, tak § 5, imm. 1.
  Imm. 4.  Sunngiffimmi aallaaniarnermut allagartallit Zone 1-mi, 2-mi aamma 3-mi piffissami piniarfiusumi 15.10.-miit 30.04.-mut ullormut aallaaniarfiusumut miternik siorartuunik aamma miternik siorakitsunik ataatsimut katillugit amerlanerpaamik qulinik pisaqaqqusaapput, tak. § 5, imm. 1. Sunngiffimmi aallaaniarnermut allagartallit Zone 3-mi piffissami piniarfiusumi 15.10-miit 30.03-mut ullormut aallaaniarfiusumut miternik siorartuunik aamma miternik siorakitsunik ataatsimut katillugit amerlanerpaamik qulinik pisaqaqqusaapput, tak. § 5, imm. 1.
  Imm. 5.  Inuussutissarsiutigalugu piniarnermut allagartallit imaluunniit sunngiffimmi aallaaniarnermut allagartallit piffissami piniarfiusumi 01.05.–imiit 31.05.-mut, tak. § 7, imm. 2 nr. 1, ullormut piniarfiusumut miternik siorartuunik aamma miternik siorakitsunik ataatsimut katillugit amerlanerpaamik 20-nik pisaqaqqusaapput, tak. §5 imm. 1, taamaallaallu nammineq atugassatut.
  Imm. 6.  Ullormut pisassiissutit ullunut piniarfiusunut allanut nuunneqaqqusaanngillat.  Ullormut pisassiissutit inummut namminermut tunngasuupput allanullu tunniuteqqusaanatik.

  § 8.  Appat sigguttuut (Uria lomvia) aamma appat (Uria aalge) aqutsiveqarfimmi pineqartumi, tak. ilanngussat 2-6, taamaattorli tak. § 6, imm. 3, piffissami piniarfiusumi  piniaqqusaapput, tak. imm. 2.
  Imm. 2.  Zone-ni tulliuttuni piffissat piniarfiusussat makku atuupput:
1)  Zone 1: 15.10. - 29.02.
2)  Zone 2: 15.09. - 15.11.
3)  Zone 3: 01.11. - 15.12.
4)  Zone 4: 01.11. - 31.12.
  Imm. 3.  Inuussutissarsiutigalugu piniarnermut allagartallit piffissani imm. 2-mi taaneqartuni ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik 20-nik pisaqaqqusaapput, tak. § 5, imm. 1.
  Imm. 4.  Sunngiffimmi aallaaniarnermut allagartallit piffissani imm. 2-mi taaneqartuni ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik pingasunik pisaqaqqusaapput, tak. § 5, imm. 1.
  Imm. 5.  Zone 1-imi, § 8, imm. 2, nr. 1-imi, piffissaq piniarfiusup taaneqareersup saniatigut, appat sigguttuut aamma appat piffissami 01.03.-miit 15.06-imut aamma piniaqqusaapput. Piniarnermut allagartallit piffissami taaneqartumi ullormut aallaaniarfiusumut appanik sigguttuunik aamma appanik ataatsimut katillugit amerlanerpaamik 5-nik pisaqaqqusaapput taamaallaallu nammineq atugassanik, tamanna inuussutissarsiutigalugu piniartunullu aamma sunngiffimmi aallaarniartartunut atuuppoq.
  Imm 6.  Zone 2-mi § 8, imm. 2, nr. 2-mi piffissap piniarfiusup taaneqareersup saniatigut appat sigguttuut aamma appat piffissami 15.04.-miit 15.05.-mut aamma piniaqqusaapput. Piniarnermut allagartallit piffissami taaneqartumi ullormut aallaaniarfiusumut appanik sigguttuunik aamma appanik ataatsimut katillugit amerlanerpaamik pingasunik pisaqaqqusaapput taamaallaallu nammineq atugassanik, tamanna inuussutissarsiutigalugu piniartunullu aamma sunngiffimmi aallaarniartartunut atuuppoq.

  § 9.  Taateraat (Rissa tridactyla) piffissani piniarfiusussani aamma nunap immikkoortuini taaneqartuni piniaqqusaapput, tak. ilanngussat 2-6: 
1)  Zone 1: 01.09. - 31.10. aamma 01.03. - 31.03. 
2)  Zone 2: 01.09. - 31.10. aamma 01.03. - 31.03. 
3)  Zone 3: 01.09. - 31.03. 
4)  Zone 4: 01.09. - 31.03.
  Imm. 2.  Piniarnermut allagartallit piffissani imm. 1-mi taaneqartuni ullormut piniarfiusumut taateraanik amerlanerpaamik qulinik nammineq atugassanik pisaqaqqusaapput, tak. § 5, imm. 1, tamanna inuussutissarsiutigalugu piniartunullu aamma sunngiffimmi aallaaniartartunut atuuppoq.

Timmissanut pisassiiffigineqanngitsunut piffissat piniarfiusussat

  § 10.  Timmissat tulliuttut piffissani piniarfiusussatut taaneqartut iluini piniaqqusaapput:
1)  Appaliarsuk (Alle alle): 01.09. - 30.04.
2)  Qeerlutooq (Anas platyrhynchos): 01.09. - 28/29.02.
3)  Nerleq siggukitsoq (Anser brachyrhynchus): 01.09. - 30.04.
4)  Kangoq (Anser caerulescens): 01.09. - 15.10.
5)  Nerlernaarsuk (Branta Canadensis): 01.08. – 15.10.
6)  Nerlernarnaq (Branta leucopsis): 01.09. - 30.04.
7)  Serfaq (Cepphus grylle): 01.09. - 31.03.
8)  Alleq (Clangula hyemalis): 01.09. – 28./29.02.
9)  Tulugaq (Corvus corax): 01.09. – 28/29.02. , taamaattoq tak. imm. 6.
10)  Qaqulluk (Fulmarus glacialis): 01.09. - 31.10.
11)  Tuullik (Gavia immer): 01.09. - 15.10.
12)  Aqisseq (Lagopus mutus): 01.09. - 30.04.
13)  Naajaannaq (Larus glaucoides): 01.09. – 30.04.
14)  Naajarujussuaq (Larus hyperboreus): 01.09. – 30.04. , taamaattoq imm. 6 takuuk.
15)  Naajarluk (Larus marinus): 01.09. – 30.04., taamaattoq imm. 6 takuuk.
16)  Oqaatsoq (Phalacrocorax carbo): 01.09. - 31.03.
  Imm. 2.  Zone 2-mi, tak. ilanngussaq 4, ileqqutoqqat malillugit qaqulluit piaraat 15.08.-miit 31.10.-mut piniaqqusaapput.
  Imm. 3.  Zone 1-mi aamma 4-mi, tak. ilanngussaq 3 aamma 6, appaliarsuit piaraat ukioq kaajallallugu piniaqqusaapput katersorneqaqqusaallutillu.
  Imm. 4.  Zone 4-mi, tak. ilanngussaq 6, nerleq siggukitsoq aamma nerlernarnaq piffissami 01.09.-miit 31.05.-imut piniaqqusaapput.
  Imm. 5.  Zone 2-mi, tak. ilanngussaq 4, aqissit piffissami 01.09.-miit 31.05.-mut piniaqqusaapput.
  Imm. 6.  Nalunaarutip matuma atuutilerneraniit ukiuni tallimani misileraataasumik tulugaq (Corvus corax), naajarujussuaq (Larus hyperboreus) aamma naajarluk (Larus marinus) piffissami 01.01.-miit 31.12.-mut killeqanngitsumik piniaqqusaapput.

Mannissarneq

  § 11.  Mannissarneq inerteqqutaavoq, taamaattorli takuuk imm. 2, 3 aamma 6.
  Imm. 2.  Piniarnermut allagartallit nammineq atugassanik qaqulluit, tulukkat, naajarujussuit aamma naajarluit manniinik piffissami 01.01.-miit 15.06.-mut mannissaqqusaapput.
  Imm. 3.  Mittarfiit, eqqaaviit eqqaavissuillu eqqaanni tulukkat naajallu akornutaanerannut atatillugu Mittarfeqarfiit kommuniluunniit Aalisarnermut Piniarnermut Nunalerinermullu Naalakkersuisoq akuersiseqqaarnagu, tulukkat naajaallu manniinik katersisitseqqusaapput imaluunniit manniit uuliamik tukersinnaajunnaartussanngorlugit serpartaatitseqqusaapput.
  Imm. 4.  Naajat mannii imm. 3 naapertorlugu katersorneqartut, ullormi katersorneqarfianni pisortat suliffeqarfiutaannut tunniunneqarsinnaapput.
  Imm. 5.  Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.
  Imm. 6.  Zone 1-mi aamma 4-mi, takuuk ilanngussaq 3 aamma 6, appaliarsuup manniinik ukioq kaajallallugu mannissarniartoqaqqusaavoq.

Timmiaqarfiit

  § 12.  Timmissat ineqarfiisa eqqaanni aallaammik eqqarneq allatulluunniit ajoqusersuineq angallammillu knob-inik 3-nik sukkanerusumik angalaneq sunaluunniit piffissami 15.04.-miit – 15.09.-mut inerteqqutaavoq, timmissat ineqarfii ima ungasitsigalugit qaninnerullugilluunniit:
1)  1000 meter, timmissat ineqarfiat appanit, appanit sigguttuunit, apparlunnit, appaliarsunnit, taateraanit, qaqullunnit oqaatsunilluunniit najorneqarpat, aamma 
2)  200 meter, timmissat ineqarfiat qeqertaappat qeqertaasaappalluunniit miternit siorartuunit, miternit siorakitsunit, serfanit, qilannganit, imeqqutaallanit naajanilluunniit taateraajunngitsunit najorneqarpat. 
  Imm. 2.  Naak imm. 1-imi aalajangersagaqaraluartoq angallammik knob-inik 3-nik sukkaannerusumik angalasoqaqqusaavoq, tamanna pisariaqanngitsumik akornusersuinermik pilersitsinngippat.   
  Imm. 3.  Timmisartumik suluusalimmik qulimiguulimmilluunniit timmissat ineqarfiinut siumut sanimulluunniit 3000 meterinit qaninnerullugit timmisartorneq inerteqqutaavoq, taamaattorli tak. Kitsissunnguit eqqissisimatitaanerat pillugu nalunaarut.
  Imm. 4. Timmissat ineqarfii drone-t atorlugit timmissat ineqarfiinut siumut sanimulluunniit 100 meterinit qaninnerutillugit timmiffiginissaat inerteqqutaavoq.
  Imm. 5.  Naak imm. 1, nr. 2-mi aalajangersagaqaraluartoq, mannissarniartoqaqqusaavoq, tak. § 11.
  Imm. 6.  Naak imm. 1, nr. 1-mi aalajangersagaqaraluartoq, appaliarsuit manniinik mannissartoqaqqusaavoq piaraannillu katersisoqaqqusaalluni, tak. § 11, imm. 6.
  Imm. 7.  Naak imm. 1-mi aalajangersagaqaraluartoq, aqqutit nalunaaqutsikkat aqqutigalugit angallammik angalasoqaqqusaavoq.

Sumiiffiit timmissanik illersuiffiusut

  § 13.  Sumiiffinni ilanngussaq 7-mi allassimasuni aamma ilanngussaq 8-mi nunap assingami takutinneqartuni kiisalu taakkuninngaanniit 500 meterimik ungasitsigisumi qaninnerusumiluunniit, nunamut ikaarneq angallannerlu sunaluunniit piffissami 01.05.-miit 31.08.-mut inerteqqutaavoq.
  Imm. 2.  Naak imm. 1-imi aalajangersagaqaraluartoq, aqqutit nalunaaqutsikkat aqqutigalugit angallammik angalasoqaqqusaavoq.

Timmissat inaanik, manniinik piaqqanillu illersuineq

  § 14.  Timmissat ineqarfiinut aamma nunap immikkoortuani timmissat illersugaaffiinut immikkut ittumik eqqissisimatitsinermut aalajangersakkat §§-ni 12-13-miittut saniatigut, Kalaallit Nunaat tamakkerlugu timmissat inaat nutaat inigineqartulluunniit kiisalu timmissat nujuartat mannii piaraallu allatulluunniit ajoqusernissaat akornusersorneqarnissaalluunniit inerteqqutaavoq.
  Imm. 2.  Appaliarsuit qaqulluillu piaraannik katersineq, tak. § 11, imm. 2 aamma mannissarneq tak. § 10, imm. 6 aamma § 11, imm. 6, imm. 1-mi mininneqarput.

Timmiarniarneq

  § 15.  Angallammit ingerlasumiit timmissanik timmisunik malersuineq piniarnerlu inerteqqutaavoq.
  Imm. 2.  Qeerlutuunik nerlernillu isasunik ungoorineq piniarnerlu inerteqqutaavoq.
  Imm. 3.  Timmisartuniit, qamutinit motoorimik ingerlatilinniit qamuteralanniillu timmiarniarneq inerteqqutaavoq.

  § 16.  Timmissanik aallaaniarnermi piniarnermilu aallaasit, timmiarsiutit singissaartullit timmiarsiutillu marlulillit, saaqqutit nuffisit imaluunniit timmissanut qarsut, qalut aamma naperniutit ipullit kiisalu pisisseq qarsorlu atornissaat akuerisaavoq.
  Imm. 2.  Timmiarsiut sakkortunerpaamik kaliber 12-iussaaq, qoorortuuararlu sakkukinnerpaamik kaliber 0.17-iussalluni. Timmiarsiutit singissaartullit timmiarsiutillu marlullit taamaallaat atoqqusaapput, amerlanerpaamik marlunnik imassanik imaqarsinnaagunik.
  Imm. 3.  Qalut aamma naperniutit ipullit Zone 1-imi aamma Zone 4-mi kiisalu § 10, imm. 2, naapertorlugu ileqqutoqqat malillugit qaqulluit piaraannik piniarnermi atoqqusaapput.
  Imm. 4.  Pisisseq qarsorlu inunnit Kalaallit Nunaanni Danmarkimiluunniit pisissimik atuinermut misilitsinnermik imaluunniit nunani allani misilitsinnermik assingusumik angusaqarsimasunit atoqqusaapput. Pisissimik piniarnermut allagartaq pisissimik piniarnermi nassarneqartassaaq.
  Imm. 5.  Pisisseq qarsorlu atorlugit piniarnermi piumasaqaatit makku naammassineqarsimassapput:
1)  Pisisseq Compound-iussaaq aalajangersimasumillu inissinneqarsinnaasumik umerfeqassalluni. 
2)  Nerlernik siggukitsunik, kangunik, nerlernaarsunnik aamma nerlernanik piniarnermi eqquinermi nukissaq minnerpaamik 40 Joule-iussaaq, qarsorlu 40 gram-nik oqinnerpaaffeqassaaq, taamaattoq qarsumik mekanisk-iusumik naqqulimmik atuisoqartillugu eqquinermi nukissaq minnerpaammik 70 Joulee-iussaaq. Qarsup naqqua akertaqaqqusaanngilaq akuutissanillu qaartartortalinnik toqunartunilluunniit imaqaqqusaanani. Qarsoq saviminermik sanaajussaaq, savissaalu ikinnerpaamik pingasuussapput minnerpaamik 25 mm-nik ipittunik aatsaangaaffillit. Qarsut blunt-iusut atoqqusaanngillat. 
3)  Timmissat § 10-mi taaneqartut saniasigut timmissanik allanik piniarnermi eqquinermi nukissaq minnerpaamik 40 Joule-iussaaq, qarssullu oqimaassusia minnerpaamik 20 gram-iussaaq, taamaattoq blunt-mik atuinermi eqquinermi nukissaq minnerpaamik 70 Joule-iussaaq. Qarsup naqqua akertaqaqqusaanngilaq aamma qaartartunik toqunartunilluunniit imaqaqqusaanngilaq. Qarsup naqqua saviminermik sanaajussaaq marlunnillu ipittunik 20 mm-iusunik naqqoqassaaq imaluunniit blunt-mik minnerpaamik 16 mm-mik diameter-limmik  naqqoqassaaq. 
4)  Timmissanik timmisunik piniarnermi flu-flu qarsut atorneqassapput.

Akiliuteqarluni piniarnermut piumasaqaatit

  § 17.  Timmissanik assigiinngitsunik nalunaarummi matuma pineqartunik akiliuteqarluni aallaaniartarnermut piumasaqaatit, sunngiffimmi piniarnermut allagartamut piumasaqaatit assigivaat, tak. § 7, imm. 4, § 8, imm. 4 aamma § 9, imm. 2. Timmissat akiliuteqarluni aallaaniarnermi pisarineqartut taamaallaat nammineq atugassaapput.
  Imm. 2.  Akiliuteqarluni piniartitsinermik aaqqissuisut pisarineqartut pissatarineqartut ilanngullugit Aalisarnermut Piniarnermut Nunalerinermullu Naalakkersuisoqarfimmut nalunaarutigisassavaat.
  Imm. 3.  Akiliuteqarluni piniartitsinermik aaqqissuisut imm. 2-mi taaneqartutut nalunaarusiornissaasa saniatigut akiliuteqarluni piniarnermi timmissat pisarineqartut pillugit ukiumoortumik Aalisarnermut, Piniarnermut Nunalerinermullu Naalakkersuisoqarfimmut nalunaaruteqartassapput. Nalunaaruteqarneq nammineerluni www.sullissivik.gl aqqutigalugu imaluunniit piniarnermut nalunaarsuiffik Piniarneq aqqutigalugu saqqummersitap immersorneratigut nassiunneratigullu pisinnaavoq.

Timmissanik manninnillu tuniniaaneq

  § 18.  Inuussutissarsiutigalugu piniarnermut allagartallit kisimik timmissanik pisarineqartunik tuniniaaqqusaapput taamaallaallu nammineq aqutsiveqarfittut angerlarsimaffigisaminni, tak. ilanngussaq 2, suliarineqanngitsunik, erisakkanik saleriikkanilluunniit atuisumut tuniniaaqqusaallutik.
  Imm. 2.  Timmissat qassusersornermi ningittagarsornermilu pisarisuukkat tuniniaqqusaanngillat.
  Imm. 3.  Timmissanik appanik, appanik sigguttuunik, miternik siorartuunik miternillu siorakitsunik tuniniaaneq aqutsiveqarfimmi pineqartumi piniarnissamut piffissap aalajangersarneqartup § 7, imm. 2-mi aamma § 8, imm. 2-mi, taaneqartup iluani taamaallaat pisassaaqtaamaallaallu tuniniaavinni uumasut nakorsaqarfiannit akuerineqartuni pisassalluni, matumani Kalaalimineerniarfiit ilanngullugit. Timmissat killilersugaanngitsut allat eqqarsaatigalugit aqutsiveqarfimmi pineqartumi timmissat pineqartut piffissami piniagaaffianni tamani tuniniaaqqusaapput, tak. § 10.
  Imm. 4.  Inuussutissarsiutigalugu piniarnermut allagartallit kisimik aqutsiveqarfimmi najugaqarfigisami ooqanngitsunik suliarineqanngitsunillu naajat manniinik atuisunut tuniniaaqqusaapput.
  Imm. 5.  Timmissat pisarineqartut Aalisarnermut, Piniarnermut Nunalerinermullu Naalakkersuismit akuersissummik pissarsisimanngikkaanni, inuussutissarsiornermik siunertalimmik tunisassiarineqaqqusaanngillat, suliarineqaqqusaanatik qeritinneqaqqusaanatilluunniit. 
  Imm. 6.  Najukkami timmiaqatigiit illersorniarlugit imm. 5 malillugu akuersissummi piffissamut aamma sumiiffimmut tunisinermilu pisassiissutinut piumasaqaatinik aalajangersaasoqarsinnaavoq. Akuersissummi aammattaaq tunisinermi piumasaqaatinik aalajangersaasoqarsinnaavoq, tamanna najukkami timmiaqatigiit illersorneqarnissaannut sunniuteqaqataasinnaappat.

Nalunaaqutsersuutit, nalunaaquttat nassitsissutillu timmissani nassaarineqartut

  § 19.  Nalunaaqutsersuutit, nalunaaquttat, radiukkut aamma qaammataasakkoortumik nassitsissutit sumi qangalu timmissap pisarineqarsimaneranut nassaarineqarsimaneranulluunniit paasissutissartallit uunga nassiunneqartassapput: Pinngortitaleriffik, Postbox 570, 3900 Nuuk.

Najukkami aqutsineq

  § 20.  Piniarneq pillugu Siunnersuisoqatigiinnik kattuffinnillu allanik suliamut attuumassutilinnik tusarniaareernerup kingornatigut Aalisarnermut Piniarnermut Nunalerinermullu Naalakkersuisoq nunap ilaani sumiiffinni killilikkami tamarmiusumik imaluunniit ilaannakuusumik, sumiiffinnut ingerlatsiviusunut, uumasorsiuut pingaarnertut siunnersuinerannut piumasaqaatinullu aalajangersakkanut malinnittunut, ingerlatsinermik tunniussisinnaavoq.
  Imm. 2.  Tamatumani piumasaqaatit Aalisarnermut Piniarnermut Nunalerinermullu Naalakkersuisup aamma najukkami kommunit oqartussaasuisa akornanni allaganngorlugit kommunimi ileqqoreqqusaq aqqutigalugu isumaqatigiissutigineqartassapput.
  Imm. 3.  Kommunini ileqqoreqqusaq Aalisarnermut, Piniarnermut Nunalerinermullu Naalakkersuisoqarfimmit akuersissutigineqassaaq.

Aallaaniarneq, piniarneq mannissartarnerlu pillugit nalunaaruteqartarneq

  § 21.  Timmissat pisarineqartut, taakkununnga timmissat aalisarnermi pisarisuukkatut pisat ilanngullugit, ukiumoortumik Aalisarnermut, Piniarnermut Nunalerinermullu Naalakkersuisoqarfimmut nalunaarutigineqartassapput. Nalunaaruteqarneq nammineerluni www.sullissivik.gl aqqutigalugu imaluunniit piniakkanut nalunaarsuisarfik Piniarneq aqqutigalugu immersugassaq immersorlugu nassiunneratigut pisinnaavoq.
  Imm. 2.  Manniit katersukkat pillugit nalunaaruteqarneq Aalisarnermut, Piniarnermut Nunalerinermullu Naalakkersuisoqarfimmut ukiumoortumik pisassaaq, nammineerluni www.sullissivik.gl aqqutigalugu imaluunniit piniakkanut nalunaarsuisarfik Piniarneq aqqutigalugu immersugassap immersorlugu nassiunneratigut pisinnaavoq.

Timmissanik taakkunanngalu nioqqutissianik il.il. nioqquteqarneq annissinerlu

  § 22.  Timmissanik eqqissisimatitaalluinnartunik uumasunik toqungasunilluunniit kiisalu timmissanik immikkanik taakkualu ilaannik taakkunanngalu nioqqutissianik tamanut saqqummiussilluni tuniniaanissaq, tunisinissaq pisinissarlu inerteqqutaavoq.

  § 23.  Timmissat eqqissisimatitat uumaannartut toqungasulluunniit, taakkununngalu ilanngullugit timmissat immikkat, taakkualu ilamerngi taakkunanngaluunniit nioqqutissiat Kalaallit Nunaanniit anniseqqusaanngillat imaluunniit Kalaallit Nunaannut eqquteqqusaanngillat.
  Imm. 2.  Timmissanik eqqissisimatitaasunik taakkualu ilaannik nioqqutissianillu nuunnermi pequtinik nassiussinermi annissisoqassappat Aalisarnermut Piniarnermut Nunalerinermullu Naalakkersuisoqarfiup akuersissuteqaqqaarsimanissaa piumasaqaataavoq.
  Imm. 3.  Timmissanik nujuartanik uumaannartunik toqungasunillu taakkualu ilaannik, taakkuninngalu nioqqutissianik ilisimatusarnermi imaluunniit ilinniartitsinermi siunertanut atorneqartussanik annissisoqassappat Aalisarnermut, Piniarnermut Nunalerinermullu Naalakkersuisoqarfiup akuersissuteqaqqaarsimanissaa piumasaqaataavoq.
  Imm. 4.  Timmissat eqqissisimatitaasut toqungasut nassaat taakkualu ilaat, pinngortitamut maangaannaq qimanneqanngippata, ingerlaannartumik Pinngortitaleriffimmut imaluunniit piniarnermik aalisarnermillu nakkutilliisunut tunniunneqartassapput.

Timmiaateqarneq, timmissanik iperaaneq nalunaaqutsersuinerlu

  § 24.  Timmissanik assigiinngitsunik nujuartanik uumasuuteqarnissaq Kalaallit Nunaanni inerteqqutaavoq.
  Imm. 2.  Timmissat eqqissisimatitat ikillit Aalisarnermut Piniarnermut Nunalerinermullu Naalakkersuisoqarfimmut nalunaarutigineqartassapput.

  § 25.  Timmissanik Kalaallit Nunaannut eqqunneqartunik taakkulu piaraannik pinngortitamut iperaaneq inerteqqutaavoq.

  § 26.  Timmissanik nujuartanik nalunaaqutsersuisoqassappat, ilisimatusaatigalugu timmissanik nujuartanik pisaqartoqassappat imaluunniit timmissanit nujuartanit misissugassanik taakkualu manniinik katersisoqassappat Aalisarnermut, Piniarnermut Nunalerinermullu Naalakkersuisoqarfiup akuersissuteqaqqaarsimanissaa piumasaqaataavoq.
  Imm. 2.  Allakkatigut qinnuteqartoqarnerani siunertaq, sumiiffik, piffissaq atorneqartussaq, angallatigineqartoq periuserineqartussarlu erseqqissaatigineqartassapput, taakkununngalu angallatip normua imaluunniit GR-normu atorneqartoq ilanngunneqartassapput.
  Imm. 3.  Misissuiartornerup kingorna angusarineqartut pillugit Aalisarnermut, Piniarnermut Nunalerinermullu Naalakkersuisoqarfimmut apnn@nanoq.gl-imut allakkatigut nalunaarusiamik tunniussisoqartassaaq.

Immikkut akuersissuteqarneq

  § 27.  Nalunaarummi matumani aalajangersakkanit Aalisarnermut, Piniarnermut Nunalerinermullu Naalakkersuisoqarfik uumasunut nakorsaqarnermut tunngasunik, ilisimatusarnermik atuartitsinermillu siunertanut, imaluunniit Kalaallit Nunaata piniagassatigut pisuussutaasa nalunaarsorneqarnerannut atatillugu kiisalu attaveqaqatigiinnermut pissutsinut aamma timmisartukkut angallannerup isumannaatsuunissaata qulakkeernissaanut immikkut akuersissuteqarsinnaavoq.

Nakkutilliineq

  § 28.  Kinaluunniit politiit imaluunniit piniarnermik aalisarnermillu nakkutilliisut piumasaqarnerisigut piniarnermut allagartaq atuuttoq aqqutigalugu piniaqqusaatitaanerminut uppernarsaammik, immikkut akuersissummik Aalisarnermut, Piniarnermut Nunalerinermullu Naalakkersuisoqarfimmeersumik imaluunniit immikkut akuersissummik naalakkersuisoqarfimmiit allameersumik takutitsissaaq.

Kommunimi ileqqoreqqusat

  § 29.  Timmissat illersorneqarnissaannut tunngatillugu kommunip ileqqoreqqusaa aqqutigalugu kommunalbestyrelsi killilersuinissamik aalajangersaasinnaavoq.
  Imm. 2.  Kommunini ileqqoreqqusat, tak. imm. 1, Aalisarnermut, Piniarnermut Nunalerinermullu Naalakkersuisumit akuersissutigineqartassapput, www.naalakkersuisut.gl-ilu aqqutigalugu nalunaarutigineqartassallutik.

Pineqaatissiisutit

  § 30.  Nalunaarummi matumani §§ 2-3-mik, §§ 6-12-mik, § 13, imm. 1-mik, § 14, imm. 1-mik, §§ 15-19-mik, §§ 22-23-mik, § 24, imm. 1-mik aamma 2-mik, aamma §§ 25-26-mik unioqqutsitsisoqarpat Kalaallit Nunaannut Pinerluttulerinermik Inatsit malillugu akiliisitsisoqarsinnaavoq arsaarinnittoqarsinnaallunilu.
  Imm. 2.  Nalunaarut manna malillugu kommunit ileqqoreqqusaannik unioqqutsitsisoqarsimappat Kalaallit Nunaannut Pinerluttulerinermik Inatsit malillugu akiliisitsisoqarsinnaavoq pisarineqartunillu arsaarinnittoqarsinnaalluni.
  Imm. 3.  Nalunaarut manna malillugu nalunaarutinut allatulluunniit malitassanut aalajangersarneqartut akileeqqusissummik aalajangersaanissamik tunngavissaqartitsippata, akileeqqusissut Kalaallit Nunaannut Pinerluttulerinermik inatsimmi malittarisassat malillugit inatsisitigut inuttut pisinnaatitaaffeqartoq akileeqqusissummik pisussaaffilerneqarsinnaavoq.
  Imm. 4.  Pisarineqartut ilaannik arsaarinnissutigineqartut atornissaat Aalisarnermut, Piniarnermut Nunalerinermullu Naalakkersuisumit aalajangerneqartassaaq.
  Imm. 5.  Akiliisitsinernit isertitarineqartut nunatta karsiata pissarai.

Atuutilersitsinermut aamma ikaarsaariartitsinermut aalajangersakkat

  § 31.  Nalunaarut manna atuutilerpoq ulloq 1. november 2019.
  Imm. 2.  Peqatigitillugu Timmissanik illersuineq piniarnerlu pillugit Namminersorlutik Oqartussat nalunaarutaat nr. 1, 5. januar 2017-imeersoq atorunnaarpoq.  
  Imm. 3.  Timmissanik illersuineq piniarnerlu pillugit Namminersorlutik Oqartussat nalunaarutaat nr. 1, 5. januar 2017-imeersoq malillugu kommunimi ileqqoreqqusat kommunimi ileqqoreqqusat allat atuutilernissaasa tungaannut atuutissapput.

Namminersorlutik Oqartussat, ulloq 28. oktober 2019

Jens Immanuelsen

/

Jørgen Isak Olsen