§ 1

Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, ilaatigut Inatsisartut inatsisaatigut nr. 2, 26. april 2007-imeersukkut, Inatsisartut inatsisaartigut nr. 3, 30. november 2009-meersukkut, Inatsisartut inatsisaartigut nr. 10, 29. november 2013-imeersukkut, Inatsisartut inatsisaatigut nr. 7, 6. juni 2016-imeersukkut kiisalu kingullermik Inatsisartut inatsisaatigut nr. 22, 28. november 2018-imeersukkut allanngortinneqartumi uku allanngortinneqarput:

1. § 34, nr. 20-p kingorna nr. 21-tut ilanngunneqarpoq:
“21)  Aningaasat Politiets Efterretningstjenestemi immikkut kukkunersiorneqartussaatitaasut atorlugit akissarsiaritinneqartut.”

2. § 34-tut, nr. 22-tut, ivertinneqassaaq:
”22)  Avataani sulinermi tapit, utimut nuunnermut tapit aamma inissinnermi aningaasat pissarsiat, inunnit Namminersorlutik Oqartussanit naalagaaffiup avataani sulisussatut aallartinneqartunut tunniunneqartut, kiisalu aningaasarsiat allat, nunani allani sulinerup nassatarisaanik aningaasartuutaanerusunut matussutissatut tunniunneqartut.”

3. § 38-p kingorna ilanngunneqarpoq:

”Kapitali 3 a

Sulinermut ilanngaat”

4. § 38-p kingorna Kapitali 3 a-mi ilanngunneqarpoq:
”  § 38 a. Sulinermut ilanngaat qinnuteqaateqarnani inunnut imm. 2-mi pineqartunut akilerneqartarpoq. Sulinermut ilanngaat kapitalimi matumani malittarisassat naapertorlugit naatsorsorneqartarpoq akilerneqarlunilu.
  Imm. 2.  Inuit uku sulinermut ilanngaateqarsinnaatitaapput:
1)  § 1, imm. 1-2 naapertorlugit akileraartussaatitaasut, kiisalu marloqiusamik akileraartarneq pillugu isumaqatigiissummi aalajangersakkat malillugit naalagaaffimmi allami, Danmarkimi imaluunniit Savalimmiuni angerlarsimaffeqartutut isigineqanngitsut, aamma
2)  § 72 a, imm. 1 imaluunniit § 72 b, imm. 1 naapertorlugit ilanngaaseeqqaarani akileraartinneqanngitsut.

  § 38 b.  Sulinermut ilanngaat ukiumut akissarsiaqarfiusumut ataatsimut imatut annertussuseqarpoq:
1)  Sulinermut ilanngaat aningaasarsianut tunngaviup § 21, imm. 2 malillugu ilanngaat aalajangersimasoq ilanngullugu § 67 malillugu inummut ilanngaatit qaangernerani 7,0 procentimik annertussuseqarpoq. Kisiannili sulinermut ilanngaatip ukiumi aningaasarsiorfiusumi ataatsimi 9.800 kr. qaangersinnaanngilaa.
2)  Sulinermut ilanngaat aningaasarsianut tunngaviup ukiumut ataatsimut 386.000 kr.-nik qaangerneranni 4,5 procentimik annikillisinneqassaaq. Kisiannili sulinermut ilanngaatip ukiumi aningaasarsiorfiusumi ataatsimi 0 kr.-nik appasinnerusinnaanngilaq.
 Imm. 2.  Imm. 1-imi aningaasat annertussusaat aningaasarsianullu tunngaviup killingi ukiumut aningaasarsiorfiusumut 2020-mut atuupput. Aningaasat annertussusaat isertitanullu tunngaviup killingi ukiumut aningaasaqarfiusumut pineqartumut akit aaqqinnerannut procenti atorlugu 1. januar aaqqinneqartassapput, tak. Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat.

  § 38 c.  Sulinermut ilanngaammut aningaasarsianut tunngaviit tassaapput isertitat A-t aamma B-t katillugit, aningaasat § 41, imm. 2 naapertorlugu aningaasarsianut akileraarutaasussanut ilanngunneqanngitsunut ilanngullugit.
  Imm. 2.  Aningaasarsianut tunngavinnut ilaapput aktiaatinit iluanaarutit Kalaallit Nunaanni ingerlatseqatigiiffinnit pissarsiat. Iluanaarutit pissarsiarineqartut iluanaarutinit akileraarutit sioqqullugit naatsorsorneqassapput.

  § 38 d.  Aningaasarsianut tunngaviit naatsorsornerini ilanngunneqassanngillat tapiissutit soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaanni § 4, imm. 1-2-mi taaneqartut, kisiannili ilanngunneqassapput aalajangersakkami imm. 1, nr. 1-3-mi taaneqartut.
  Imm. 2.  Aningaasarsianut tunngavimmik naatsorsuinermi aamma aningaasarsianit isertitat il.il. §§ 70 aamma 71-imi ilaasut ilanngunneqassanngillat.

Naatsorsuineq akiliinerlu

  § 38 e.  Akileraartarnermut ingerlatsiviup aningaasarsianut tunngavik, tak. § 38 c-38 d, aamma sulinermut ilanngaat 1. september nallertinnagu naatsorsortassavai. Aningaasarsianut tunngavik minusimiippat, sulinermut ilanngaat 0 kr.-ussaaq. Sulinermut ilanngaatip nalinga akileraaruserinermik ingerlatsineq pillugu inatsisartut Inatsisaanni § 25 naapertorlugu akileraarutit sippuutaat akilerneqartassapput suliarineqarlutillu. Kisiannili akileraaruserinermik ingerlatsineq pillugu Inatsisartut inatsisaanni § 25, imm. 2 malillugu taarsiisoqartassanngilaq.
  Imm. 2.  Akileraartarnermut ingerlatsiviup sulinermut ilanngaatip ukiumoortumik naatsorsornera nassiuttassavaa.

  § 38 f.  Akileraartarnermut ingerlatsiviup inunnut aningaaserivimmi nalunaarsorsimasumik kontoqartunut sulinermut ilanngaat siumoortumik qaammammut ataasiarluni tunniussinnaavaa. Tunniussineq pissaaq kingusinnerpaamik isertitat A-t, akileraarutinik B-nik aamma pissarsianit akileraarutinik §§ 38 c-38 d-imi isertitanut tunngavigisani pineqartunut ilaasunik akiliineq pillugit paasissutissat akileraartarnermut ingerlatsivimmit tiguneqareernerisa kingorna qaammatit marluk qaangiunneranni. Qaammammut ataatsimut tunniussinermi, ukiumi sulinermut ilanngaatip tamarmiusup akileraarutitigut nalingata 1/12-ia qaangerneqarsinnaanngilaq, takuuk § 38 b, imm. 1, nr. 1, uniffik kingulleq.  
  Imm. 2.  Inuup ukiumi isertitaqarfiusumi isertitassanut tunngavigisaanni tamarmiusuni, atugassat aningaasartaasa annertussusissai § 38 b, imm. 1-imi aalajangersagaasut qaangerneqassasut, akileraartarnermut ingerlatsiviup ilimagippagu, akileraartarnermut ingerlatsiviup siumoortumik sulinermut ilanngaat tunniutinngissinnaavaa imaluunniit tunniussassat ikilisissinnaallugit. 
  Imm. 3.  Naalakkersuisut siumoortumik tunniussinissamut piumasaqaatit pillugit, kiisalu naatsorsuisarneq aamma sulinermut ilanngaatip siumoortumik tunniunneqartarnera pillugit maleruagassanik erseqqinnerusunik aalajangersaasinnaapput.

  § 38 g.  Akileraartarnermut ingerlatsivik ukiumi akileraarusiiffiusumi ulloq 1. septembari tikitsinnagu isertitanut tunngaviusut naatsorsorlugit inaarutaasumik, takuuk § 38 c-38 d, sulinermut ilanngaat aammalu 38 f malillugu sulinermut ilanngaatit siumoortumik tunniunneqartut naatsorsorlugit suliarissavai. Sulinermut ilanngaat siumoortumik tunniunneqartoq, sulinermut ilanngaammit naatsorsorneqartumit annikinnerusimappat, sinneruttut tunniunneqassapput. Tunniussineq, akileraaruserinermik ingerlatsineq pillugu Inatsisartut inatsisaanni § 25-imi akileraarutit sippuutaannik tunniussisarneq pillugu maleruagassat malillugit, pissaaq. Taamaattoq akileraaruserinermik ingerlatsineq pillugu Inatsisartut inatsisaanni § 25, imm. 2 malillugu ajunngitsorsiassaqartitsisoqassanngilaq. Siumoortumik sulinermut ilanngaat annertunaaraluni tunniunneqarsimappat, aningaasartai akileraaruserinermik ingerlatsineq pillugu Inatsisartut inatsisaanni § 24-imi maleruagassat malillugit akileraarutissaat sinnerisut, akilersinneqassapput. 
  Imm. 2.  Akileraartarnermut ingerlatsiviup ukiumi sulinermut ilanngaammut aammalu sulinermut ilanngaatit siumoortumik tunniunneqartunut naatsorsukkat, ukiumoortumik nassiuttassavai.”

5. § 47 c ima oqaasertalerneqassaaq:
”  § 47 c.  Soraarnerussutisiaqarnissaq siunertaralugu ileqqaakkanik aningaaserivimmiittunik piginnittup aalajangersinnaavaa, aningaasat ileqqaakkat tamakkiisumik imaluunniit ilaannakortumik soraarnerussutisiaqalernissamut aningaasaateqarfinnut, aningaaserivimmit neqeroorutaasunut inissinneqassanersut. Soraarnerussutisiaqarnissamut ileqqaakkanik piginnittup kapitali manna malillugu ileqqaarnermi pigisani nalilinni, soraarnerussutisiaqalernissamut aningaasaateqarfimmut ilaanngitsuni aningaasaliisinnaanngilaq. 
  Imm. 2.  Aningaaserivik soraarnerussutisiaqalernissamut aningaasaateqarfinnik arlalinnik pilersitsisinnaavoq, soraarnerussutisiaqalernissamut ileqqaartunut neqeroorutigineqarsinnaasunik, taamaasillutik aningaasaataat soqutigisaat sapinngisamik pitsaanerpaamik aningaasaliissutigineqartassallutik. Taamaattumik aningaaseriviup aningaasaliinerit aarlerinaatai paasisinnaassavaat, aqussinnaassavaat, nakkutigisinnaassavaat, misissorsinnaassavaat nalunaarutigisinnaassallugillu kiisalu ingerlatseqatigiiffiup namminermi aarlerinaataani ataatsimut naliliinermi taakku eqqarsaatigisassallugit. Matuma saniatigut aningaaserivik pigisanut nalilinnut aningaasaliiffigineqartunut naleqquttumik paasisimasaqassaaq, soorlu qaqugukkulluunniit aningaasaliinernik aarlerinaatinut misissortuaannassasoq. Naggataatigut aningaaseriviup ukkatarissavaa ataatsimut pigisat nalillit qularnaatsuunerat, pitsaassusaat, akiliisinnaassusaat aamma imminut akilersinnaassusaat sullissat aningaasaataannik aningaasaliinermi.
  Imm. 3.  Aningaaserivik ileqqaarnermut aningaasaateqarfinnik pilersitsisinnaavoq, sullitamut neqeroorutigineqarsinnaasunik, tassani piumasaqaataavoq, aningaaserivik taannaassammat soraarnerussutisiaqalernissamut aningaasaatit sumut pigisanut nalilinnut inissinneqassanersut aalajangiisussaq. Aningaaseriviup taamaalilluni toqqissisimanartumik isumannaatsuuneq, aningaasat nalingat attatiinnarnissaat kiisalu sapinngisamik annertunerpaamik iluanaaruteqarnissaq anguniassavaa.
  Imm. 4.  Aningaaserivik ileqqaarnermut aningaasaateqarfinnik arlalinnik sullitanut neqerooruteqarsinnaavoq, tassani sullitat nammineq ileqqaakkatik pigisanut nalilinnut qanoq ittunut inissinneqassanersut aalajangiinissamut periarfissaqarlutik. Aningaasaateqarfiit taakku aningaasaateqarfimmit, aningaaseriviup aningaasaliinermit aalajangigaannit allaanerusumik aarlerinaateqarsinnaapput. Piumasaqaataavorli, aningaaserivik pigisanik nalilinnik imaluunniit pigisat nalillit suussusaanik arlalinnik, nioqqutissap suussusaa paasiniassallugu ajornakusoortuunngitsunik, imaluunniit nioqqutissanik aningaasanik aningaasaliissutaasunik tamakkiisumik imaluunniit ilaannakortumik annaasaqaataanissaanut aarlerinaateqartunik, nioqqutissalli suussusaanik paasiniassallugu ajornakusoortuunngitsunik toqqaassasoq. 
  Imm. 5.  Aningaaserivik ileqqaarnermut aningaasaateqarfinnik ilusilersuinermi, sullitat toqqaanissamut kiffaanngissuseqarfigisaanni, § 47 d, imm. 1 aamma 2 malissavaa, aningaasaateqarfiullu matuma saniatigut aarlerinaatinik siaruaaneq annertooq anguniassavaa.”

6. § 47 e, imm. 1, ima oqaasertalerneqassaaq:
”Soraarnerussutisiaqarnissaq siunertaralugu ileqqaakkanik piginnittoq pigisanik nalilinnik toqqorsivinniittunik, ileqqaarnermut kontumut atassuteqartunik pisisinnaallunilu tunisaqarsinnaavoq, kisiannili aningaasanik pigisanik nalilinnik tunisinikkut pissarsianik ileqqaarnermut kontumeersunik tigusisinnaanani. Aningaasat taakku aningaasaatitut uninngaannassapput imaluunniit toqqorsivimmi atasumi aningaasaliissutaaqqillutik, tak. § 41, imm. 3, aamma § 46 aningaasanik ileqqaakkanik akileraarutaasussanik tigusineq, piginnittoq 60-inik ukioqalersinnagu.”

7.  § 72 a, imm. 2, ima oqaasertalerneqassaaq:
”  Imm. 2.  Isertitat atorfeqartitaanermi isertinneqartut, tak. imm. 1, A-tut B-tullu isertitanut ilaapput, taamaattorli sulisitsisut soraarnerussutisianut katersivinnut inuunermilu sillimmasiinernut aaqqissuussanut akiliutai, § 39-mi, § 40-mi, § 43-mi imaluunniit kapitali 4 a-mi aalajangersakkanut ilaasut ilanngunneqassanngillat.”

8. § 88, imm. 2, oqaaseqatigiit siulliit imatut oqaasertalerneqassaaq:
”Iluanaarutinik tunniussinissamik pisassanngortitsinermilluunniit aalajangiinerup, nalunaaqqusinermiluunniit nalunaarnissamut piffissaliunneqartup naanerata ulluata qaammataata tulliani kingusinnerpaamik ullut qulinganni, ingerlatseqatigiiffik Naalakkersuisut aalajangigaannik iluseq atorlugu aalajangiineq pillugu pissarsisullu pillugit paasissutissanik nalunaaruteqassaaq.”

9. § 102, ima oqaasertalerneqassaaq:
”  § 102.  Kinaluunniit pisortanut akileraaruteqanngitsoorumalluni piaaraluneerluni mianersuaalliorujussuarluniluunniit eqqunngitsumik paasinerluutaasinnaasumilluunniit inuup akileraartussaatitaaneranut apeqqutip aalajangiiffiginiarneranut atugassanik, imaluunniit akileraarusiinissap aalajangiiffigineqarneranut imaluunniit akileraarutit naatsorsornissaannut atugassanik paasissutissiisoq Kalaallit Nunaanni pinerluttulerinermik inatsit naapertorlugu pillaammi pineqaatissinneqassaaq.”

10. § 107, ima oqaasertalerneqassaaq:
”  § 107.  Inuup kialuunniit § 102 unioqqutissimaguniuk, pineqaatissiisinnaanerlu Kalaallit Nunaanni pinerluttulerinermik inatsimmi maleruagassat naapertorlugit pisoqalisimappat, unioqqutitsinerlu tassaannaasimanngippat inuup allap akileraaruteqanngitsoorniarneranut ikiuussimaneq, tapiliussatut akileraarutit aningaasarsianut ilanngutinngitsuukkat akileraarutitaasa angeqatai akiligassarai. § 108, imm. 5-imit 7-imut taamatuttaaq atuutissapput.”

§ 2

Inatsisartut inatsisaat ulloq 1. januar 2020 atuutilerpoq, taamaattoq takukkit imm. 5-6.
  Imm. 2.  § 1, nr. 2, nr. 9 aamma nr. 10, tamanut saqqummiussinerup aqaguani atuutilissapput.
  Imm. 3.  § 1, nr. 7, ulloq 1. januar 2020 atuutilissaaq, ukiorlu isertitaqarfik 2020 aallarnerfigalugu atulissalluni.
  Imm. 4.  Sulinermut ilanngaat ukiumit aningaasarsiorfiusumit 2020-mit § 1, nr. 3-4-mi aalajangersakkat malillugit siullermeerluni naatsorsorneqassaaq.
    Imm. 5.  Naalakkersuisut § 1, nr. 1-ip ulloq atuutilerfissaanik nalunaarusiornikkut aalajangiinissamik piginnaatinneqarput.
  Imm. 6.  § 1, nr. 4-ip, § 38 f-ip aamma 38 g-ip piffissaq atuutilerfissaat nalunaarummi aalajangersarnissaanut Naalakkersuisut piginnaatinneqarput. § 38 f aamma 38 g atuutilerneranni, § 38 e atorunnaarsinneqassaaq.
  Imm. 7.  Soraarnerussutisiaqalernissaq siunertaralugu ileqqaakkanik piginnittoq, Aningaasarsianik akileraarutit pillugit Inatsisartut inatsisaata nr. 12, 2. november 2006-imeersup allanngortinneqarnera pillugu Inatsisartut inatsisaani nr. 29, 28. november 2016-imeersumi § 47 c naapertorlugu pigisanik nalilinnik aningaasaliisimasoq, piffissaq qaammatit 24-t iluanni pigisat nalillit soraarnerussutisiaqarnermut aningaasaateqarfimmut, aningaaserivimmit neqeroorutigineqartumut nuussavai, pigisat nalillit aalajangersakkat soraarnerussutisiaqarnermut aningaasaateqarfimmut atuuttut naammassippagit.
  Imm. 8.  Pigisat nalillit, soraarnerussutisiaqarnissaq siunertaralugu ileqqaakkanik piginnittumit toqqorsivimmut ilineqartut, soraarnerussutisiaqarnermut aningaasaateqarfimmut, aningaaserivimmit neqeroorutigineqartumut piumasaqaatinik naammassinninngitsut, uuma Inatsisartut inatsisaata atuutilerneranit piffissaq qaammatit 24-t qaangiutsinnagit, tunineqassapput kiisalu tunisinermi pissarsiat soraarnerussutisiaqarnermut aningaasaateqarfimmut, aningaaserivimmit neqeroorutigineqartumut inissinneqassallutik.

Namminersorlutik Oqartussat, ulloq 2. december 2019

Kim Kielsen