§ 1

Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi, Inatsisartut peqqussutaanni nr. 14, 20. november 2006-imeersumi, Inatsisartut peqqussutaanni nr. 9, 5. december 2008-imeersumi aamma Inatsisartut inatsisaanni nr. 17, 8. juni 2017-imeersumi, makkua allanngortinneqassapput:

1. § 37, imm. 5-imi, ”§ 50, imm. 5” allanngortinneqarpoq imatut: ”§ 50, imm. 7”.

2. § 50, imm. 3-5, atorunnaarsinneqarput, tamatumunngalu taarsiullugu imm. 3-7-iut ilanngunneqassapput:
”  Imm. 3.  Namminersorlutik Oqartussat aamma kommunit inissiaataanni attartortittakkani uumasuuteqarnissaq akuerisaavoq, taamaattoq takukkit imm. 4-7.
  Imm. 4.  Imm. 3 apeqqutaatinnagu, taamaattoq najugaqatigiiffimmi pineqartumi uumasuuteqarneq akuerisaassanngitsoq, najugaqatigiiffimmi siulersuisut aalajangersinnaapput.
  Imm. 5.  Ilanngussaq 4 naapertorlugu uumasuuteqarneq pillugu torersaarnissamut maleruagassani piumasaqaatit sukkulluunniit naammassineqarsimassapput. 
  Imm. 6.  Uumasuuteqalernermi attartortoq qaammatini pingasuni ineqarnermut akiliutip annertoqqataanik immikkut qularnaveeqqusiissaaq. Attartortup uumasuuteqalernermi qularnaveeqqusiussassaq attartortitsisumut aningaasanngorlugu akilissavaa. Uumasuutigineqartoq toquppat imaluunniit attartortoq allatut uumasuuteqarunnaarpat, attartortitsisoq illuutip attartorneqartup misissoreernerani aalajangersinnaavoq, attartortup qularnaveeqqusiussaasa uninngatinnissaannut piumasaqaatit atuukkunnaassasut aammalu aningaasat tamakkiisumik ilaannaasumilluunniit utertillugit tunniullugit. 
  Imm. 7.  Imm. 6-imi qularnaveeqqusiussatut akiliutigineqartut, ajoqusiinernut uumasuuteqarnermit pilersinneqartunut matussutissatut, attartortitsisup atorsinnaavai.”

3. § 60 imatut oqaasertalerneqarpoq:
”  § 60.  Attartortup toqunerani aappaasoq, aappaasutut nalunaarsorsimasoq imaluunniit inooqataasoq, maannamut atugassarititaasut naapertorlugit attartortunngornissamut pisinnaatitaaffeqarpoq. Inuk, attartortup aappariinnermut assingusumik inooqatigisaa inooqataasutut isigineqarpoq. Taamatuttaaq inuk, attartornermut isumaqatigiissummut atsioqataanngitsoq, kisiannili sivikinnerpaamik qaammatini arfinilinni attartortumut inoqutaasutut najugaqateqartoq inuillu allattorsimaffianni nalunaarsorsimasoq pisinnaatitaaffeqarpoq, taamaattorli tak. § 63, imm. 3.
  Imm. 2.  Taamatuttaaq imm. 1 attartortup qitornaanut 18-it sinnerlugit ukiulinnut atuutissaaq. Qitornaq illoqarfimmi allami ilinniakkaminik naammassinnereerluni imaluunniit unitsitsereerluni attartukkami najugaqartutut inuit allattorsimaffiannut nalunaarsorneqarpat, piffissaq ilinniarfiusoq imm. 1 naapertorlugu naatsorsuinermut ilanngunneqassaaq. Qitornat angerlarsimaffimmi najugaqartut arlallit attartortunngornissamik kissaateqarpata, qitornaq, attartortup toqunissaa sioqqullugu sivisunerpaamik attartortumut inoqutaasutut najugaqateqarsimasoq inuillu allattorsimaffianni nalunaarsorsimasoq salliutinneqassaaq.
  Imm. 3.  Sulisunut inissiaq, attartortup pisortani sulisitsisuni atorfeqarnera aqqutigalugu innersuunneqarsimasoq tassani pineqarpat, attartortumut aappaasoq, aappaasutut nalunaarsorsimasoq, inooqataasoq inuillu allat imm. 1-imi taaneqartut attartornermut atugassarititaasut nalinginnaasut naapertorlugit inissiamut innersuunneqarnissamut pisinnaatitaapput, taamaattorli tak. § 63, imm. 2-3. Attartortumut aappaasup, aappaatut nalunaarsorsimasup, inooqataasup, inuillu allat, imm. 1-imi taaneqartut namminneerlutik pisortani sulisitsisumi atorfeqarnertik aqqutigalugu sulisunut inissiamut innersuunneqarnissamut pisinnaatitaaffeqannginnissaat piumasarineqarpoq.
  Imm. 4.  Attartortoq ukioqqortussutsini imaluunniit napparsimanini pissutigalugu utoqqaat illuannut assigisaanulluunniit nuuppat, imm. 1-3-imi aalajangersakkat taamaaqataanik atuutissapput.”

4. § 63, imm. 2-imi ”§ 60, imm. 2” allanngortinneqarpoq uunga: ”§ 60, imm. 4”.

5. § 63, imm. 3-imi ”§ 60, imm. 1” allanngortinneqarpoq uunga: ”§ 60, imm. 1-4”.

6. Ilanngussaq 4-imi, qulequttap ”Uumasuutit” ataani immikkoortoq imatut oqaasertalerneqarpoq:
”Aallaaviatigut qimmiuteqarnissaq imaluunniit qitsuuteqarnissaq, kiisalu aalisagaasivimmiittunik aalisagaateqarnissaq, ineqartinneqartunik timmiaateqarnissaq, kikkaasunik ineqartinneqartunik aamma saanilunnik assigisaannilluunniit uumasuuteqarnissaq akuerisaavoq.

Taamaattoq najugaqatigiiffimmi siulersuisut aalajangersinnaapput qimmiuteqarneq qitsuuteqarnerlu taamaakkaluartoq najugaqatigiiffimmi akuerisaassanngitsoq. Qimmiutinut qitsuutinullu immikkut qularnaveeqqusiinissaq attartortitsisup piumasarissavaa. Attartortup kommunimi qimmiuteqarnermut qitsuuteqarnermullu malittarisassiani maleruagassat  sukkulluunniit naammassisimassavai. Maleruagassat taakkua naammassineqanngippata, ileqqorissaarnissamut maleruagassat unioqqutinneqarsimasutut isigineqassaaq. Ileqqorissaarnissamut maleruagassat unioqqutinneqarnerannut naammagittaalliuutigineqartut attartortitsisumut ingerlatinneqassapput.”

§ 2

Inatsisartut inatsisaat ulloq 1. januar 2020 atuutilerpoq.

Namminersorlutik Oqartussat, ulloq 28. november 2019

Kim Kielsen