Kapitali 1

Tunngaviit tamanut atuuttut aamma atuuffia il.il.

 

  § 1.  Inatsisartut inatsisaatigut siunertaasoq tassaavoq pisortat pisiniartarneranni periaatsit aalajangersaassallugit taamaaliornikkullu pisortat aningaasaataasa atorluarneqarnerpaanisssaat anguniarlugu unammilleqatigiinneq pitsaanerusoq anguniassallugu.

  Imm. 2.  Pisortat neqeroorutitsisarneri ima aaqqissuunneqartassanngillat Inatsisartut inatsisaata matuma atuuffii mattunneqartussanngorlugit imaluunniit unammilleqatigiinneq killerneqartussanngorlugu.

 

  § 2.  Inatsisartut inatsisaat una 500.000 kr-nik taakkuluunniit sinnerlugit nalilinnik pisortani oqartussanit imaluunniit suliffeqarfinnit allanit nioqqutissanik kiffartuussinernillu pisiniarnermut atuuppoq, § 3-p malitsigisaanik inatsimmi matumani pineqanngitsut ilanngunnagit, taamaattorli imm. 2 aamma 3 takuuk.

  Imm. 2.  Inatsisartut inatsisaat napparsimavimmi atortunut, atortunullu taakkununnga attuumassuteqartunut 2.500.000 kr-inik sinnerlugilluunniit nalilinnut atuuppoq.

  Imm. 3.  Illuliornermi sanaartornermilu suliani 2.500.000 kr.-nik imaluunniit sinnerlugit nalilinnik teknikkip tungaatigut ikiorsiinermut Inatsisartut inatsisaat atuuppoq.

  Imm. 4.  Inatsisartut inatsisaat aamma atuuppoq pisortat pisiniarnerini, neqerooruteqartup nalunaarutigippagu pisiniarneq neqeroorutigineqartoq § 12, imm. 1-imi arlaat 1-ini atorneqarsimappat neqeroorutaasuni taaneqartuni.

  Imm. 5.  Imermik, innaallagissamik, kiassarnermillu pisortat pilersuineranni, assartuinermi kiisalu allakkerinermi nalunaarasuartarnermilu inatsit naapertorlugu kisermaassinissamik pisinnaatitaaffeqarfiusuni suliassanut Inatsisartut inatsisaat atuutinngilaq.

 

  § 3.  Inatsisartut inatsisaanni malittarisassiani makku ilaanngillat:

1)  Illuliortiternernik sanaartornernillu suliassat.

2)  Inatsisilerinikkut aamma kukkunersiuisarnikkut siunnersorneqarneq ikiorneqarnerlu.

3)  Pisortani oqartussanit imaluunniit suliffeqarfinnit allanit pisiniarnerit.

4)  EU-mi inatsisilerinermi neqeroortitsinermut malittarisassiat najoqqutaralugit nunami EU-mi ilaasortaasumi pisortat peqatigalugit ataatsimoorullugit pisiniarnerit.

5)  Tapiissutitigut pisinnaatitaalluni suliassamik kiap isumaginnittuussaneranik aningaasanut inatsimmi aalajangersagaasutut suliassat.

6)  Isumaqatigiissutit nr. 1-imit 5-imut naapertorlugit ilaanngitsutut oqaatigineqanngitsut, inuiaqatigiit soqutigisaannik pingaartunik illersuinissaq sakkukinnerusumik akuliunnikkut isumannaarneqarsinnaanngikkaangata.

 

Kapitali 2

Nassuiaatit

 

  § 4.  Nassuiaatit tulliuttut Inatsisartut inatsisaanni atorneqarput.

  Imm. 2.  Inatsisartut inatsisaanni matumani ”pisiniarneq” nioqqutissanik imaluunniit kiffartuussinernik pisiniarnertut paasineqassaaq, ilanngullugu nioqqutissanik imaluunniit kiffartuussinernik pisiniarneq pillugu toqqammavissatut isumaqatigiissutinik atsiugaqarnertut aamma paasineqassalluni.

  Imm. 3.  Inatsisartut inatsisaanni matumani ”neqerooruteqartitsineq” nioqqutissanik kiffartuussinernilluunniit pisiniarnissaq siunertaralugu neqerooruteqartitsinermik ingerlatsisoqassanertut paasineqassaaq, ilanngullugu nioqqutissanik kiffartuussinernilluunniit pisiniarnissaq pillugu toqqammavissatut isumaqatigiissutinik atsiugaqarnertut.

  Imm. 4.  Inatsisartut inatsisaanni matumani ”neqerooruteqartitsinerup ingerlannissaa” neqerooruteqartitsinermik nalunaarummik tamanut saqqummiussinermit, tak. § 23, imm. 1, suliassanngortitsinermik aalajangiinerup neqerooruteqartunut nalunaarutigineqarneranut, tak. § 28, imm. 1, imaluunniit neqerooruteqartitsinerup atortussaajunnaarsinneqarneranut, tak. § 29, paasineqassaaq. Siumut nalunaarutigeqqaarnagu neqerooruteqartitsinermik isumaqatigiinniarnertalimmi neqerooruteqartitsinerup ingerlannissaa aallartinneqassaaq neqerooruteqartitsinermut atortussat neqerooruteqarnissamut piukkunnaatilinnut tunniunneqarpata, tak. § 16, imm. 5.

  Imm. 5.  Inatsisartut inatsisaanni matumani ”pisiniartoq” pisortani oqartussaasuni immikkoortortaqarfik imaluunniit suliffeqarfik neqerooruteqartitsisuuneratut paasineqassaaq.

  Imm. 6.  Inatsisartut inatsisaanni matumani ”neqeroorutit akuerineqarsinnaanngitsut” neqeroorutit imatut paasineqassapput:

1)  kingusinaartumik tiguneqarsimasut,

2)  neqerooruteqarnissamut atortussani piumasaqaatinik naammassinninngitsut,

3)  neqerooruteqartunit naleqquttuunissamik piumasaqaatinik naammassinninngitsunit tunniunneqarsimasut,

4)  nalinginnaanngitsumik appasissut, imaluunniit

5)  Akimikkut pisiniartup naatsorsuutigisaanit imaluunniit pisiniartup missingersuutissatut aalajangersagaanit qaffasinnerusut.

  Imm. 7.  Inatsisartut inatsisaanni matumani ”piukkunnartorsiuineq pillugu qinnuteqarnerit akuerineqarsinnaanngitsut" imatut paasineqassapput qinnuteqarnerit:

1)  kingusinaartumik tiguneqarsimasut,

2)  peqataasinnaatitaasussaannginnermut tunngavissat pillugit uppernarsaasinnaanermut piumasaqaatinik naammassinniffiunngitsut, imaluunniit

3)  atorneqarsinnaanermik uppernarsaasiinissamut piumasaqaatinik naammassinninngitsut.

 

Kapitali 3

Pisiniarnissap nalinganik naatsorsuineq

 

  § 5.  Pisiniarnissami § 2, imm. 1, § 15, imm. 4, nr. 5 aamma § 16, imm. 2, nr. 5-imi qanoq naleqarnissaanut killiliussat qaangerneqarsimanerannik naliliiniarnermi pisiniartup qaammatit tulliuttut 12-it ingerlaneranni sullissinissamik pineqartumik ataatsimut pisiassamisut naatsorsuutigisaasa nalingat tunngavigineqassaaq.

  Imm. 2.  Piffissaq isumaqatigiissuteqarfiusussatut kissaatigineqartoq, salliutinneqarnissat ilanngullugit, qaammatinit 12-init sivisuneruppat, piseqqaartussaanerit ilanngullugit sullissinissap pineqartup piffissami isumaqatigiissuteqarfiusumi tamarmi nalingi tamarmiusut tunngavigineqassapput.

  Imm. 3.  Pisiniartut arlallit ataatsimoorlutik pisiniarpata naliliineq imm. 1-imi taaneqartoq pisiniartuni peqataasuni tamani sullissinerit ataatsimut nalingat aallaavigalugu pissaaq.

  Imm. 4.  Kiffartuussinernik pisiniarnernut atatillugu nioqqutissanik pisinerit imaluunniit nioqqutissanut pisinernut atatillugu kiffartuussinernik pisiniarnerit imm. 1-imi naliliinernik taaneqartumi, nioqqutissat kiffartuussinerillu pisiniarnerit naatsorsuutigineqartut ataatsimoortillugit nalingi tunngavigalugit naliliisoqassaaq.

 

Kapitali 4

Ammasumik suleriaaseqarneq, assigiisitsineq aamma naleqqersuussineq

 

  § 6. Neqerooruteqartitsineq sapinngisamik ammanerpaamik pisussanngorlugu aammalu neqerooruteqarunnartut neqerooruteqartulluunniit assigiimmik pineqartussanngorlugit pisinissamik nalunaaruteqartup neqeroorutitsinerit aaqqissuutissavai.

 

  § 7.  Neqerooruteqartitsinermi piumasaqaatigineqartut toqqammavigineqartullu sullissinnernut neqerooruteqartitsinermi pineqartunut naapertuuttussanngorlugit neqerooruteqartitsinerit tamaasa pisiniartup aaqqissuutissavai.

 

  § 8.  Neqeroorutip atuutilersinnerata aallartereerneratigut neqeroortitsinermi piumasaqaatini aamma atortuni tunngaviusutut ilaasut allat pisinissamik nalunaaruteqartup

allanngortissinnaanngilai.

  Imm. 2.  Pisinissamik nalunaaruteqartoq tunngaviusutut ilaasunik allannguissappat pisinissamik nalunaaruteqartup neqeroorutit ingerlanneqartut atorunnaarsissavai, tak. § 29, aamma nutaamik neqerooruteqassalluni.

 

Isertuussineq

 

  § 9.  Neqerooruteqartitsinermi pisinissamik nalunaaruteqartup paasissutissiissutigisaasa isertuunneqarnissaat pisinissamik nalunaaruteqartup qinnuteqaateqartunut neqerooruteqartunulluunniit peqqussutigisinnaavaa.

  Imm. 2.  Inatsisartut inatsisaanni imaluunniit inatsisini allani allatut allassimasoqanngippat, neqeroortitsinermi paasissutissat isertuussat qinnuteqaateqartup neqerooruteqartulluunniit neqeroortitsinermik ingerlassamut atatillugu nassiussimasai pisinissamik nalunaaruteqartup tunniutissanngilai.

 

Kapitali 5

Niuernissaq pillugu siumoortumik oqaloqatigiittarneq, siunnersuisarneq il. il.

 

  § 10.  Pisinissamik nalunaaruteqartoq neqerooruteqartitsineq sioqqullugu niueqatissanik oqaloqatiginnissinnaatitaavoq, aamma neqerooruteqartitsinermi atortussat imarisaat pillugit.

  Imm. 2.  Pisinissamik nalunaaruteqartoq niuerneq pillugu siumoortumik oqaloqateqassappat aalajangersagaq malillugu oqaloqatigiinnissap imassaa pisinissamik nalunaaruteqartup uppernarsaasersinnaasariaqarpaa.

 

  § 11.  Niueqatissanik oqaloqateqarnermut atatillugu pisinissamik nalunaaruteqartoq suliffeqarfimmiit siunnersorneqarsimappat allatigulluunniit siunnersorneqarsimappat imaluunniit suliffeqarfimmit allatigut siunnersorneqarsimappat suliffeqarfiup taassuma neqeroorutitsinermi peqataaneratigut naligiinngitsumik unammilleqatigiittoqalernissaa pinaveersaarniarlugu pisinissamik nalunaaruteqartoq naleqquttunik iliuuseqassaaq.

  Imm. 2.  Pisinissamik nalunaaruteqartup minnerpaamik:

1)  qulakkiissavaa paasissutissat naleqquttut suliffeqarfik peqatigalugu eqqartorneqarsimasut neqerooruteqartitsinermi atortunut ilaatinneqassasut, aamma

2)  piffissaliussat eqqarsaatigalugit suliffeqarfiup allanut sanilliulluni annerusumik iluaqutigeratarsinnaasai nalimmassarneqartussanngorlugit neqerooruteqartitsinermi piffissaliussat aalajangersassavait.

  Imm. 3.  Imm. 1 aamma imm. 2 naapertorlugit pisinissamik nalunaaruteqartup iliuuserisai unammillernermik annertuumik eqquutitsisinnaanerata pinngitsoortinnissaanut naammanngippata suliffeqarfik pineqartoq neqeroortitsinermit pisinissamik nalunaaruteqartup peqataatissanngilaa.

  Imm. 4.  Suliffeqarfik imm. 3 naapertorlugu peqataasinnaajunnaarsinneqartinnani peqataanermigut unammilleqatigiinnermik equtitsinnginnerminik uppernarsaanissamut periarfissinneqassaaq.

 

Kapitali 6

Neqerooruteqartitsinerit ingerlanneri

 

Neqerooruteqartitseriaatsit

 

  § 12.  Pisiniarnerit Inatsisartut inatsisaanut matumunnga ilaasut neqerooruteqartitseriaatsit uku arlaat atorlugit neqeroorutigineqassapput:

1)  Tamanut ammasumik neqerooruteqartitsineq, tak. § 13.

2)  Killeqartumik neqerooruteqartitsineq, tak. § 14.

3)  Siumoortumik nalunaaruteqarluni isumaqatigiinniarnertalimmik neqerooruteqartitsineq pillugu nalunaarut, tak. § 15.

4)  Siumoortumik nalunaaruteqarnani isumaqatigiinniarnertalimmik neqerooruteqartitsineq pillugu nalunaarut, tak. § 16.

  Imm. 2.  Tamanut ammasumik neqerooruteqartitsineq imaluunniit killeqartumik neqerooruteqartitsineq tamatigut atorneqartassapput. Neqerooruteqartitsinerit isumaqatigiinniarnertallit taamaallaat atorneqarsinnaapput § 15, imm. 4-mi imaluunniit § 16, imm. 2-mi piumasaqaatit naammassineqarsimappata.

 

Tamanut ammasunik neqerooruteqartitsineq

 

  § 13.  Tamanut ammasumik neqerooruteqartitsinermi kinaluunniit neqerooruteqarnissamut periarfissaqarpoq.

  Imm. 2.  Neqerooruteqartitsinissamik nalunaarummi minnerpaamik makku saqqummiunneqassapput:

1)  Sullissinerup neqeroorutigineqartup naatsumik allaaserinera, piseqqaartussaatitaanerusinnaasut ilanngullugit.

2)  Neqerooruteqartitseriaatsit, tak. § 12, imm. 1.

3)  Pisisussatut nalunaaruteqartup attaviginissaanut paasissutissat.

4)  Tunniussinissamut najoqqutassaq, tak. § 17, imm. 1.

5)  Neqerooruteqartitsinissamut piffissaliussaq, tak. § 26.

6)  Neqerooruteqartitsinissamut piumasaqaatit neqerooruteqartitsinermilu atortut allat pillugit paasissutissat qanoq ilillugit pissarsiarineqassasut paasissutissiissutigineqassaaq.

  Imm. 3.  Neqerooruteqartitsinermi piumasaqaatini minnerpaamik, neqerooruteqartitsinermik nalunaarummit takuneqarsinnaanngippata, makku ilaatinneqassapput:

1)  Tunniussinissamut piumasaqaatit pingaannginnerusinnaasut aamma taakkuninnga neqerooruteqartut akunnerminni oqimaaqatigiissaarnerat, tak. § 17, imm. 4-6.

2)  Peqataatitsinnginnermut pissutaasut, tak. §§ 18-19.

3)  Naleqquttuunermut piumasaqaatit minnerpaaffii, tak. § 20, tassunga ilanngullugit uppernarsaanissamut piumasaqaatit.

4)  Immikkuualuttortalersuinissamut piumasaqaatit periaatsitigut immikkuualuttortalersuutaasinnaasut ilanngullugit, tak. § 22.

5)  Isumaqatigiissutini atugassarititaasut pingaarutillit tamarmik.

6)  Neqeroorutip suliarineranut piffissaliussatut pilersaarut, minnerpaamik neqerooruteqartitsinerup ingerlannerata nalaani neqerooruteqartumut aamma neqerooruteqartitsisumut piffissaliussanik tamanik imaqartussaq.

7)  Neqeroortitsinermi atortunut apeqquteqarnissamut malittarisassat, tak. § 24.

8)  Neqeroorutip tunniunnissaa pillugu piumasaqaatit, tassunga ilanngullugit aalajangiusimanninnissamut piffissaliussaq sivikinnerpaamik ulluni 30-ni.

9)  Neqeroorutit tunniunnissaat pillugu ilusissatut piumasaqaataasinnaasut.

 

Killeqartumik neqerooruteqartitsineq

 

  § 14.  Killeqartumik neqerooruteqartitsinermi pisinissamik nalunaaruteqartoq piareersaataasumik piukkunnartussarsiuussinermik ingerlatsissaaq, tak. § 21.

  Imm. 2.  Neqerooruteqarnissamut piukkunnassusiliinissami peqataatinneqarnissamut kinaluunniit qinnuteqaateqarsinnaavoq, kisiannili suliffeqarfiit neqerooruteqarsinnaasutut piukkunnassusilerneqarsimasut kisimik neqerooruteqarsinnaatitaapput.

  Imm 3.  Paasissutissiinissaq siunertaralugu neqerooruteqartitsineq pillugu nalunaarummut peqatigitillugu neqeroortitsinermi atortussat tamarmiusut ilaannaaluunniit tamanut ammasumik nalunaarutigineqassanersut pisinissamik nalunaaruteqartup toqqarsinnaavaa.  Taamaattorli neqeroortitsinermi atortussat tamarmiusut pisisussap piareersaataasumik piukkunnartussarsiuussinermi suliffeqarfinnut tunniutissallugit pisinissamik nalunaaruteqartoq taamaallaat pisussaaffeqarpoq.

  Imm. 4.  Neqerooruteqartitsinissamut nalunaarummit minnerpaamik makku takuneqarsinnaassapput:

1)  Sullissinerup neqeroorutigineqartup naatsumik allaaserinera, salliutinneqarsinnaasut ilanngullugit.

2)  Neqerooruteqartitseriaatsit, tak. § 12, imm. 1.

3)  Pisisussatut nalunaaruteqartup attaviginissaanut paasissutissat.

4)  Tunniussinissamut najoqqutassat, tak. § 17, imm. 1.

5)  Neqerooruteqartitsinissamut piareersaataasumik piukkunnartussarsiuussinissat naatsorsuutigineqartut neqerooruteqartussat amerlassusiat, tak. § 21, imm. 1.

6)  Neqerooruteqartitsinissamut piareersaataasumik piukkunnartussarsiuussinissamik  toqqaanermut piumasaqaatit pillugit qanoq ililluni paasisaqarsinnaaneq.

7)  Neqerooruteqartitsinissamut piareersaataasumik piukkunnartussarsiuussinissamik  toqqaanissami piffissaliussaq, tak. § 25.

  Imm. 5.  Neqerooruteqartitsinissamut piareersaataasumik piukkunnartussarsiuussinermik  toqqaanermut piumasaqaatit minnerpaamik, tamanna neqerooruteqartitsinermi nalunaarummit takuneqarsinnaanngippat, makku ilaassapput:

1)  Peqataatitaannginnermut pissutaasut, tak. §§ 18-19.

2)  Naleqquttuunermut minnerpaamik piumasaqaatit, tak. § 20, tassunga ilanngullugit uppernarsaanissamut piumasaqaatit.

3)  Toqqaanissamut najoqqutassat, tak. § 21, imm. 3.

  Imm. 6.  Suliffeqarfiit pisinnaasut neqerooruteqartitsinissamut piumasaqaatinut aamma neqerooruteqartitsinermut atortunut ataatsikkut periarfissinneqassapput.

 Imm. 7.  Neqerooruteqartitsinermi piumasaqaatini minnerpaamik, neqerooruteqartitsinermik nalunaarummit takuneqarsinnaanngippata, makku ilaassapput:

1)  Tunniussinissamut piumasaqaatit pingaannginnerusinnaasut aamma taakkuninnga neqerooruteqartut akunnerminni oqimaaqatigiissaarnerat, tak. § 17, imm. 4-6.

2)  Neqerooruteqartitsinissamut piffissaliussaq, tak. § 26.

3)  Immikkuualuttortalersuinissamut piumasaqaatit periaatsitigut immikkuualuttortalersuutaasinnaasut ilanngullugit, tak. § 22.

4)  Isumaqatigiissutini atugassarititaasut pingaarutillit tamarmik.

5)  Neqeroorutip suliarineranut piffissaliussatut pilersaarut, minnerpaamik neqerooruteqartitsinerup ingerlannerata nalaani neqerooruteqartumut aamma neqerooruteqartitsisumut piffissaliussanik tamanik imaqartussaq.

6)  Neqeroortitsinermi atortunut apeqquteqarnissamut malittarisassat, tak. § 24.

7)  Neqeroorutip tunniunnissaa pillugu piumasaqaatit, tassunga ilanngullugit aalajangiusimanninnissamut piffissaliussaq sivikinnerpaamik ulluni 30-ini.

8)  Neqeroorutip tunniunnissaa pillugu ilusissatut piumasaqaataasinnaasut.

 

Siumoortumik nalunaaruteqarluni isumaqatigiinniarfiusumik neqerooruteqartitsineq

 

  § 15.  Siumoortumik nalunaaruteqarluni isumaqatigiinniarfiusumik neqerooruteqartitsinermi pisinissamik nalunaaruteqartoq piareersaataasumik piukkunnartussarsiuussinertalimmik  neqerooruteqartitsissaaq, tak. § 21.

  Imm. 2.  Paasissutissiinissaq siunertaralugu neqeroortitsisarnermut nalunaarummut peqatigitillugu neqerooruteqarnermi atortussat tamaasa ilaannaaluunniit tamanut ammasumik nalunaaruteqarnissaq pisinissamik nalunaaruteqartup toqqarsinnaavaa. Taamaattorli pisinissamik nalunaaruteqartoq neqeroortitsinermi atortussat tamarmiusut suliffeqarfinnut pisisussap piareersaataasumik piukkunnartussarsiuussinermi tunniutissallugit taamaallaat pisussaaffeqarpoq.

  Imm. 3.  Tamanut ammasumik nalunaaruteqarnerup kingorna, tak. imm. 2. sullissinissatut kissaatigineqartut tunniunneqarnissaat pillugu pisinissamik nalunaaruteqartup suliffeqarfiit pineqartut isumaqatiginninniarfiginissaat aallartissavaa. Neqerooruteqarnissamut piareersaataasumik piukkunnartussarsiuussinermut kikkulluunniit qinnuteqaateqarsinnaapput, kisiannili pisinissamik nalunaaruteqartoq suliffeqarfinnit piareersaataasumik piukkunnartussarsiuussisimasunik taamaallaat isumaqatiginninniarsinnaavoq.

  Imm. 4.  Siumoortumik nalunaaruteqarluni isumaqatigiinniarfiusumik neqerooruteqartitsineq pisuni ukunani taamaallaat atorneqarsinnaavoq:

1)  pisinissamik nalunaaruteqartup pisariaqartitai aaqqiinernik pissarsiassaareersunik tulluarsarneqarnatik akuersaarneqarsinnaanngippata,

2)  isumaqatigiissummut ilaappat ilusitigut imaluunniit nutaaliornikkut aaqqiinerit,

3)  sullissinissaq pillugu periaatsitigut immikkuualuttortalersuutit imaluunniit piumasaqaatit atugassarititaasullu neqeroortitsinermi pappiarartat naammaginartumik eqqoqqissaartuunersut aalajangiunneqarsinnaanngippata,

4)  tamanut ammasumik imaluunniit killeqartumik neqerooruteqartitsinermut atatillugu neqeroorutit akuerineqarsinnaanngitsut kisimik saqqummiunneqarpata, tak. § 4, imm. 6, imaluunniit neqerooruteqartitsinissamut piareersaataasumik piukkunnartussarsiuussinermut  toqqaaneq pillugu noqqaaneq akuerineqarsinnaanngippat, tak. § 4, imm. 7, imaluunniit

5)  pisiassap eqqarsaatigineqartup 1 mio. koruunit nalinganit annikinneruppat, taamaattorli nakorsaqarfimmi atortussat taakkununngalu atasutut atortussat pisiarineranut 5.000.000 kr.-t inussallugit.

  Imm. 5. Neqerooruteqartitsisarneq pillugu nalunaarutip tamanut ammasumik saqqummiunneqannginnerani imm. 4-mi piumasaqaat taaneqartoq 1 arlallilluunniit naammassineqarsimanerat pillugu uppernarsaatitut pisinissamik nalunaaruteqartoq tunngavilersukkamik nassuiaateqassaaq.

  Imm. 6.  Neqerooruteqartitsinissamut nalunaarummit minnerpaamik makku allanneqarsimassapput:

1)  Sullissinerup neqeroorutigineqartup naatsumik allaaserinera, siulliulluni neqeroorfigineqarnissamut periarfissat ilanngullugit.

2)  Neqerooruteqartitseriaatsit, tak. § 12, imm. 1.

3)  Isumaqatigiinniarnerni peqataaneq pillugu neqerooruteqartunut akissarsiaqartitsisoqarnersoq.

4)  Pisinissamik nalunaaruteqartup attaviginissaa pillugu paasissutissat. 

5)  Tunniussinissamut najoqqutassaq, tak. § 17, imm. 1.

6)  Neqerooruteqartitsinissamut piareersaataasumik piukkunnartussarsiuussinissat naatsorsuutigineqartut neqerooruteqartussat amerlassusiat, tak. § 21, imm. 1.

7)  Piareersaataasumik piukkunnartussarsiuussinermi piumasaqaatit qanoq pissarsiarineqarsinnaanerinik paasissutissat.

8)  Piareersaataasumik piukkunnartussarsiuussinermik toqqaanissami noqqaanissamut piffissaliussaq, tak. § 25.

  Imm. 7.  Piareersaataasumik piukkunnartussarsiuussinermi toqqaanermut piumasaqaatit minnerpaamik, tamanna neqerooruteqartitsinermi nalunaarummit takuneqarsinnaanngippat, makku ilaassapput:

1)  Peqataatitaannginnermut pissutaasut, tak. §§ 18-19.

2)  Naleqquttuunermut piumasaqaatit minnerpaaffii, tak. § 20, tassunga ilanngullugit uppernarsaanissamut piumasaqaatit.

3)  Toqqaanissamut najoqqutassat, tak. § 21, imm. 3.

  Imm. 8.  Piareersaataasumik piukkunnartussarsiuussinermi suliffeqarfiit  neqerooruteqartitsinissamut piumasaqaatinut aamma neqerooruteqartitsinermut atortunut isernissamut ataatsikkut periarfissinneqassapput.

  Imm. 9.  Neqerooruteqartitsinermi piumasaqaatini minnerpaamik, neqerooruteqartitsinermik nalunaarummit takuneqarsinnaanngippata, uku ilaassapput:

1)  Tunniussinissamut piumasaqaatit pingaannginnerusinnaasut aamma taakkuninnga neqerooruteqartut akunnerminni oqimaaqatigiissaarnerat, tak. § 17, imm. 3-5.

2)  Immikkuualuttortalersuinissamut piumasaqaatit periaatsitigut immikkuualuttortalersuutaasinnaasut ilanngullugit, tak. § 22.

3)  Isumaqatigiissutini atugassarititaasut pingaarutillit tamarmik.

4)  Neqeroorutip suliarineranut piffissaliussatut pilersaarut, minnerpaamik neqerooruteqartitsinerup ingerlannerata nalaani neqerooruteqartumut aamma neqerooruteqartitsisumut piffissaliussanik tamanik imaqartussaq.

5)  Neqeroortitsinermi atortunut apeqquteqarnissamut malittarisassat, tak. § 24.

6)  Neqeroorutip tunniunnissaa pillugu piumasaqaatit, tassunga ilanngullugit aalajangiusimanninnissamut piffissaliussaq sivikinnerpaamik ulluni 30-ni.

7)  Neqeroorutip tunniunnissaa pillugu ilusissatut piumasaqaataasinnaasut.

8)  Isumaqatigiinniarnerup ingerlanerata allaaserinera, tassunga ilanngullugit:

a)  Inaarutaasumik neqeroorutit tunniutinnginneranni isumaqatigiinniarnerit qassit ingerlanneqassanersut.

b)  Peqataasut amerlassusiat neqeroorutip ingerlanerani ikilisinneqassanersut.

c)  Neqerooruteqartitsinerup kingusinnerpaamik tunniunneqarnissaa pillugu inaarutaasumik piffissaliussaq.

d)  Isumaqatiginniarnerup ingerlanerani aallarnersaataasumik neqeroorutip tunniunneqarnissaa piumasaqaataappat tamannalu tunngavigalugu isumaqatigiissutip tunniunnissaanut pisinissamik nalunaaruteqartoq pisinnaatitaanerminik isumaqarpat.

 

Siumoortumik nalunaarutigineqanngitsumik isumaqatigiinniarfiusumik neqerooruteqartitsineq

 

  § 16.  Siumoortumik nalunaarutigineqanngitsumik isumaqatigiinniarfiusumik neqerooruteqartitsinermi sullissinerup kissaatigineqartup tunniunneqarnissaa pillugu isumaqatigiinniarnerit aallartinneqarnissaat siunertaralugu pisinissamik nalunaaruteqartoq suliffeqarfimmut 1-imut arlalinnulluunniit toqqaannartumik saaffiginnissaaq.

  Imm. 2.  Siumoortumik nalunaaruteqanngitsumik isumaqatigiinniarfiusumik neqerooruteqartitsineq taamaallaat pisuni tulliuttumi allanneqartuni atorneqarsinnaavoq:

1)  siusinnerusukkut tamanut ammasumik imaluunniit killeqartumik neqerooruteqartitsinermut atatillugu neqeroorutit akuerineqarsinnaanngitsut kisimik saqqummiunneqarsimappata, tak. § 4, imm. 6, imaluunniit piareersaataasumik piukkunnartussarsiuussinermi piumasaqaatit akuerineqarsinnaanngippata, tak. § 4, imm. 7. Tamatumani naatsorsuutigineqarpoq suliffeqarfiit piukkunnartussarsiornermut peqataajumasimasut, imaluunniit neqerooruteqarsimasut, § 18 peqataatinneqannginnissamik pissutaasunut attuumassuteqanngitsut, tamakkerlutik isumaqatigiinniarnernut peqataaqquneqassasut, aammalu neqerooruteqartitsinermi atortussat aallaqqaammulli atorneqartut tunngaviusumik imarisaat allanngortinneqassanngitsut,

2)  pilersuisup taarsernera annertuumik akisuallaartumik aningaasartuuteqarnermik, teknikkikkut ataqatigiinnginnermik imaluunniit ingerlatsinermi aserfallatsaaliinermilu teknikkikkut annertuallaanik ajornartorsiutinik kinguneqassappat siusinnerusukkut pilersuisutut atorsimasamiit pilersuinerit ilassuteqarneri tamatumani pineqarput, taamaattorli takuuk imm. 7,

3)  pilersuisup ataasiinnaap kiffartuussineq kissaatigineqartoq tunniussinnaappagu, taamaattorli takuuk imm. 7,

4)  pisut neqerooruteqartitsisup naatsorsuutigereersimasinnaanngisai pissutigalugit tamanut ammasumik neqerooruteqartitsinermi, killilimmik neqerooruteqartitsinermi imaluunniit siumoortumik nalunaaruteqarnikkut isumaqatiginninniarnikkut neqerooruteqartitsinermi piffissaliussat malinnissaat ajornarpat, aammalu taamaattoqarpat allatut ajornavinnera naapertorlugu, imaluuniit

5)  pisiariniakkap nalinga 1 million kr.-nit annikinneruppat, taamaattorli nakorsaqarfimmi atortussat taakkununngalu atasutut atortussat pisiarineranut 5.000.000 kr.-t inussallugit.

  Imm. 3.  Piumasaqaat imm. 2-mi taaneqartoq 1 arlallilluunniit naammassineqarsimanerat pillugu uppernarsaatitut pisinissamik nalunaaruteqartoq suliffeqarfimmut saaffiginninnginnermini tunngavilersukkamik nassuiaasiussaaq.

  Imm. 4.  Imm. 2, nr. 4 aamma nr. 5-imi pisuni taaneqartuni pisinissamik nalunaaruteqartup isumaqatigiinniarnermi peqataanissamut suliffeqarfiit ikinnerpaamik marluk aggersassavai.

  Imm. 5.  Suliffeqarfiit peqataaqquneqarsimasut neqerooruteqartitsinissamut piumasaqaatinut aamma neqerooruteqartitsinermut atortunut ataatsikkut periarfissinneqassapput.

  Imm. 6.  Neqerooruteqartitsinermi piumasaqaatini makku minnerpaamik ilanngunneqarsimassapput:

1)  Tunniussinissamut najoqqutassat aamma najoqqutassat allat kiisalu taakku akunnerminni oqimaalutarsimanissaat, tak. § 17.

2)  Immikkuualuttortalersuinissamut piumasaqaatit periaatsitigut immikkuualuttortalersuutaasinnaasut ilanngullugit, tak. § 22.

3)  Isumaqatigiissutini atugassarititaasut pingaarutillit tamarmik.

4)  Neqeroorutip suliarineranut piffissaliussatut pilersaarut, minnerpaamik neqerooruteqartitsinerup ingerlannerata nalaani neqerooruteqartumut aamma neqerooruteqartitsisumut piffissaliussanik tamanik imaqartussaq.

5)  Neqeroortitsinermi atortunut apeqquteqarnissamut malittarisassat, tak. § 24.

6)  Neqeroorutip tunniunnissaa pillugu piumasaqaatit, tassunga ilanngullugit aalajangiusimanninnissamut piffissaliussaq sivikinnerpaamik ulluni 30-ni.

7)  Neqeroorutip tunniunnissaa pillugu ilusissatut piumasaqaataasinnaasut.

8)  Isumaqatigiinniarnerup ingerlannerata allaaserinera, tassunga ilanngullugit:

a)  Inaarutaasumik neqeroorutip tunniunnissaanut isumaqatigiinniarnerit qassit inger-lanneqassanersut.

b)  Neqerooruteqartitsinerup nalaani peqataasut ikilisinneqassanersut.

c)  Neqeroorutip tunniunnissaanut inaarutaasumik piffissaliussaq.

d)  Isumaqatigiinniarnerit ingerlannerat aallarniutaasumik neqeroorummik tunniussisoqarnissaanik kinguneqassappat tamanna tunngavigalugu pisinissamut nalunaaruteqartoq isumaqatigiissummik tunineqarnissamut nangaassuteqassanersoq.

  Imm. 7.  Imm. 6 pisuni imm. 2, nr. 2 aamma nr. 3-mi taaneqartuni atorneqassanngillat.

 

Tunniussinissamut najoqqutassat

 

  § 17.  Akilersinnaanerpaamik neqerooruteqartoq pisinissamik nalunaaruteqartup isumaqatigiissusiorfigissavaa. Neqeroorutit akilersinnaanerpaat tunngavissat tulliuttut arlaat ataaseq tunngavigalugu naliliivigineqassapput:

1)  Appasinnerpaamik akilik, tak. imm. 2.

2)  Appasinnerpaamik aningaasartuutilik, tak. imm. 3.

3)  Akit pitsaassutsillu akornanni pitsaanerpaamik naleqqiussineq, tak. imm. 4.

  Imm. 2.  Tunniussinissamut piumasaqaammi ”appasinnerpaamik akillip” atorneqarnerani pisiarinninnermi akia tamarmiusoq taamaallaat pingaartinneqassaaq.

  Imm. 3.  Tunniussinissamut najoqqutassap ”aningaasartuutit appasinnerpaat” atorneqarnerani pisiarinerani akigititap saniatigut aningaasartuuteqariaatsit tamaasa pisisussap ilannguttariaqarpai, assersuutigalugit aserfallatsaaliinermut aningaasartuutit.

  Imm. 4.  Tunniussinissamut piumasaqaammi ”akit pitsaassutsillu akornanni pitsaanerpaamik naleqqiussinerup” atorneqarnerani assersuutigalugit aningaasartuutit saniatigut pitsaassutsikkut najoqqutassat tullinnguuttut pingaartinneqarsinnaapput:

1)  Pitsaassuseq, tassunga ilanngullugu atornera, kusanassusia, ilusaa aamma tassunga atasut sullissinerit.

2)  Sulinerup aaqqissugaanera, tassunga ilanngullugit sulisuni suliamik ingerlataqartussani piukkunnaatit misilittakkallu.

3)  Tunniussinissamut piumasaqaatit, tassunga ilanngullugu tunniussinissamut piffissaliussaq.

4)  Inuiaqatigiinni akisussaaffeqarneq, tassunga ilanngullugit najukkamiiginnarnissaq, ilinniartussanik, ilinniarfissanik imaluunniit suliatigut misiliiffissanik pilersitsineq, katataasimasunik sulititsineq, peqqinnissakkut siuarsaaneq, avatangiisini pissutsit aamma piujuartitsisinnaaneq.

  Imm. 5.  Piumasaqaatit allat pisinissamik nalunaaruteqartup aalajangersagai, sullissinermut neqeroorutigineqartumut attuumassuteqassapput. Najoqqutassat allat aalajangersarneqassapput naleqquttuutitsinissamullu periaatsinut naapertuuttumik oqimaalutarneqassallutik, tak. § 7, tunniussinissamut najoqqutassatut toqqarneqartumut sanilliullugu neqeroorummut ajugaasumut naapertuutissapput piukkunnartuussallutillu.

 Imm. 6.  Najoqqutassat immikkoortuisa ilaat najoqqutassanut allanut atorneqassappata, najoqqutassat immikkoortuisa ilaasa akornanni oqimaalutaassutaasinnaasut taaneqassapput.

  Imm. 7.  Pisinissamik nalunaaruteqartoq neqeroorutinik naliliinermini pingaarnersiuineq tunniunneqarsimasoq naapertorlugu piumasaqaatit tamaasa ilanngutissallugit pisussaatitaavoq. Neqeroortitsisarnermut nalunaarummi imaluunniit neqeroortitsisarnermut piumasaqaatini pisisussap aalajangersarsimasaaninngarnit najoqqutassat pingaannginnerit allat pisisussap pingaarnerutissanngilai.

 

Peqataanissamut mattunneqarneq

 

  § 18.  Pisinissamik nalunaaruteqartup, suliffeqarfik imaluunniit tassani siulersuisuni ilaasortat imaluunniit pisortaaneqarfik ukiut kingulliit 4 ingerlaneranni makkununnga eqqartuunneqarsimappata suliffeqarfik neqerooruteqartitsinermut peqataatissanngilaa:

1)  Akiliilluni pinerluuteqarneq, peqquserlunneq imaluunniit niuernikkut unammilleqatigiinnermik annikillisitsisumik ingerlataqarneq.

2)  Aaqqissuussaasumik pinerlunniaqatigiinnut peqataaneq.

3)  Peqqarniisaarnernut imaluunniit peqqarniisaarnermut atatillugu pineqaatissiissutigineqarsinnaasumik, iliuuseqarsimanerit.

4)  Aningaasanik peqquserlunnikkut pissarsiarisimasanik malunnarunnaarsaaneq imaluunniit peqqarniissaarniartarnernut aningaassaliissuteqartarneq.

5)  Meeqqanik sulisitsineq imaluunniit inunnik niueruteqarneq.

 

  § 19.  Pisinissamik nalunaaruteqartup suliffeqarfik neqeroortitsinermi peqataatinngitsoorsinnaavaa, suliffeqarfik:

1)  akiliisinnaajunnaarsinnaasutut suliarineqarpat, akiliisinnaassuseqanngitsutut imaluunniit atorunnaartussatut suliarineqarpat taamaaqataanilluunniit inissisimappat,

2)  inuussutissarsiutigisami aallunnerata nalaani ukiut kingulliit pingasut ingerlaneranni annertuunik sumiginnaasarsimappat, tassunga ilanngullugit pisinissamik nalunaaruteqartumut imaluunniit pisortatut oqartussaasunut isumaqatigiissummik pisisussatut nalunaaruteqartup malitassaanik taassumaluunniit ilaanik eqqortitsisimanngippat ima annertussusilimmik, allaat isumaqatigiissutip pineqartup atorunnaarsinneqarneranik kinguneqartumik,

3)  pisinissamik nalunaaruteqartup imaluunniit pisortatut oqartussaasup neqeroorutaanut pisisussap malitassaanut malitassaasaluunniit ilaannut atatillugu ukiut kingulliit pingasut ingerlaneranni paasissutissanik eqqortuunngitsunik piaaraluni tunniussaqartarsimappat, imaluunniit

4)  Kalaallit Nunaanni nunamiluunniit suliffeqarfiup pilersinneqarfigisimasaani akileraarutinik akitsuutinillu akiitsunik akileqquneqartunik 100.000. kr.-t sinnerlugit nalilinnik akiliisimanngippat.

  Imm. 2.  Suliffeqarfiup imm. 1, nr. 4-mi pineqartup peqataatinneqannginnissaa aalajangiunneqarpat pisinissamik nalunaaruteqartup oqaatigisinnaavaa suliffeqarfik taamatut pineqartoq mattunneqassanngitsoq, ima pisoqarpat:

1)  neqeroortitsinermi peqataasut tamarmik imm. 1, nr. 4-mi nassuiarneqartutut pisortanut akiitsoqarpata,

2)  suliffeqarfik 100.000 kr.-t sinnerlugit akiitsut ilaannut qularnaveeqqusiisimappat, imaluunniit

3)  suliffeqarfik akiitsut akilerneqarnissaat pillugu isumaqatigiissuteqarpat isumaqatigiissummillu taassuminnga eqquutitsippat.

 

Piukkunnassusermut piumasaqaatit minnerpaaffissaat

 

  § 20.  Suliffeqarfiit neqerooruteqarusuttut qulakkeerneqarnissaat siunertaralugu piukkunnassusissamut piumasaqaatissat minnerpaaffissaannik pisinissamik nalunaaruteqartoq aalajangersaasinnaavoq:

1)  inuussutissarsiutip neqeroorutigineqartup ingerlannissaanut piukkunnassuseqarpata, aamma

2)  neqeroorutitut isumaqatigiissutip piviusunngortinnissaanut aningaasaqarnikkut kiisalu periaatsitigut suliatigullu paasisimasaqarnissamut pisinnaassuseqarpat.

  Imm. 2.  Tassunga atatillugu, tak. imm. 1, piukkunnassusissamut piumasaqaatit minnerpaaffissaasa naammassineqarsimanerat suliffeqarfiit qanoq iliorlutik uppernarsaasissaneraat pisinissamik nalunaaruteqartup aalajangersassavaa.

  Imm. 3.  Piukkunnassusissamut piumasaqaat minnerpaaffissaat § 7 naapertorlugu aalajangersarneqassaaq.

  Imm. 4.  Inuussutissarsiutip neqeroorutigineqartup ingerlannissaanut piukkunnassuseqarnermut tunngatillugu minnerpaaffissatut piumasaqaatit tassaasinnaapput:

1)  Niuerneq imaluunniit inuussutissarsiorneq pillugu nalunaarsuiffinni attuumassuteqartuni ilanngunneqarneq.

2)  Akuersissutit attuumassuteqartut.

3)  Inatsisit malillugit sillimmasiinerit pisussaaffiusut.

  Imm. 5. Aningaasaqarnikkut pisinnaasassat pillugit minnerpaaffissatut piumasaqaatit annerpaamik tassaasinnaapput ukiuni pingasuni kingullerni naatsorsuutitigut angusimasat. Piumasaqaatit makkununnga tunngasuusinnaapput:

1)  Kaaviiaartitat.

2)  Aningaasaqarnikkut patajaassuseq.

3)  Sinneqartoorsinnaassuseqarneq

4)  Nammineq aningaasaatit ajunngitsumik inernillit.

  Imm. 6.  Teknikkikkut suliatigullu piginnaasanut minnerpaamik piumasaqaatit makkununnga tunngasuusinnaapput:

1)  Neqeroorutigineqartut assinginik pilersuinissamik misilittagaqarneq.

2)  Sulisut amerlassusiat.

3)  Sulisut pingaarutillit piginnaasaqarfigisaat.

4)  Atortut, sakkut, teknikkikkut atortut, assigisaallu.

5)  Pitsaassutsinik avatangiisitigullu aqutsineq.

6)  Nioqqutissanut misiligutit.

 

Piukkunnartorsiuineq

 

  § 21.  Killeqartumik neqerooruteqartitsinermi tak. § 14, aamma nalunaaruteqareernikkut isumaqatiginninniarnertalimmik neqerooruteqarnermi, tak. § 15, suliffeqarfiit qassit pisinissamik nalunaaruteqartup piukkunnartorsiuinermi ilaatinniagai qassiussanersut pisinissamik nalunaaruteqartup aalajangersassavai. Taakku amerlassusissaat akunnequtitut allanneqarsinnaavoq, tamatigulli ikinnerpaamik 3.

  Imm. 2.  Pisinissamik nalunaaruteqartoq pisussaaffeqarpoq §§ 18-20 naapertorlugit piumasaqaatinik naammassinnissimasut taamaallaat qinnuteqartut piukkunnartorsiussallugit, aamma taaneqartunit taakku ikinnerugaluarpataluunniit. Taaneqartunit amerlanerusut pisinissamik nalunaaruteqartup piareersaataasumik piukkunnartussarsiuussinermi peqataatissinnaanngilai.

  Imm. 3.  Piukkunnartorsiuinermi suliffeqarfiit amerlanerusut §§ 18-20 naapertorlugit piumasaqaatinik naammassinnissimappata najoqqutassat sorliit malillugit suliffeqarfiit toqqartorneqarnissaat pillugu piukkunnartorsiuinermi piumasaqaatit pisinissamik nalunaaruteqartup aalajangersassavai.

  Imm. 4.  Neqerooruteqartitsinermi piukkunnartorsiuinermi qinnuteqaateqartoq qinnuteqaateqarsimasutut itigartinneqarsimasoq pisinissamik nalunaaruteqartup nutaamik ilanngutitissinnaavaa, suliffeqarfik neqerooruteqarnissamut piukkunnartorsiuinermi peqataajunnaartutut nalunaaruteqarsimappat. Tassanili piumasaqaatigineqarpoq qinnuteqartutut tunuartitaasup §§ 18-20 naapertorlugit piumasaqaatit naammassisimassagai.

 

Teknikikkut nalunaarsuinerit

 

  § 22.  Piumasaqaatit nalunaarsornerini teknikikkut nalunaarsuinerit naalagaaffimmi imaluunniit nunani tamalaani assigiiaarinissat sulinissap ilusissaanut piumasaqaatit innersuussutilluunniit atuuttut malillugit sapinngisamik annertunerpaamik aalajangersarneqassapput.

  Imm. 2.  Nioqqutissat sumi aalajangersimasumik aallaaveqarnersut immikkuulluunniit ilisarnaateqarnersut imaluunniit sumi sanaajunersut pillugit piumasaqaateqartoqassanngilaq.

  Imm. 3.  Periaatsini imm. 1-imi taaneqartuni naammaginartumik eqqortuussusilimmik sullissinissaq nassuiaaserneqarsinnaanngikkaangat, malittarisassat avaqqullugit immikkuualuttortalersuutit imm. 2-mi pineqartut innersuussutigineqarsinnaapput, tassanili piumasaqaataavoq innersuussut pineqartoq ”taamaaqataannilluunniit” pillugu oqaasertalersuutigineqartartumik malitseqartitsineq.

  Imm. 4.  Imm. 1-3-mi aalajangersakkat ajornartinngilaat, sullissinissap pineqartup nioqqutissanut imaluunniit aaqqiissutissanut pioreersunut ataqatigiississinnaanissaat pisiassamik nalunaaruteqartup piumasaqaateqarfigissappagit, tassani ilanngullugu IT-mi hardware imaluunniit software pisiarinerini.

 

Neqeroorutip tamanut saqqummiunneqarnera

 

  § 23.  Neqerooruteqartitsinerit tamarmik, taamaattorli siumoortumik nalunaarutigineqanngitsumik isumaqatigiinniarfiusumik neqerooruteqartitsinerit ilanngunnagit, neqerooruteqartitsinerit nalunaarutigineri tamanut ammasumut nalunaarutigalugit tusagassiarineqartarput pisortat neqerooruteqartitsinernik nittartagaanni. Aammattaaq Kalaallit Nunaanni nunaniluunniit allani tusagassiorfiit allat aqqutigalugit neqeroorut ataatsikkut imaluunniit kingorna piseqqusaarutigineqassanersoq pisinissamik nalunaaruteqartup toqqarsinnaavaa.

  Imm. 2.  Siumoortumik nalunaarummi pisortat neqerooruteqartitsisarnermik nittartagaani tamanut ammasumik nalunaarutigineqartussami neqeroorutip imm. 1-imi pineqartup ingerlanneqarnissaanik siunertaqarnini pisinissamik neqerooruteqartup sapinngisamik oqaatigissavaa neqerooruteqarnissamik nalunaarutip tamanut tusarliunneqarnissaa sivikinnerpaamik sapaatit akunnerinik 4-nik sioqqullugu.

 

Neqerooruteqartitsinerup nalaani apeqqutit saqqummiunneqartut

 

  § 24.  Neqerooruteqartitsineq pillugu atortusanut apeqqutissat pisinissamik nalunaaruteqartumut apeqqutigineqassapput neqerooruteqartitsineq pillugu atortuni naammaginartumik piffissalerlugu – neqeroortitsinermi killigititatut aalajangigaq sioqqullugu.

  Imm. 2.  Neqerooruteqartitsinermi atortut pillugit apeqqutit tamarmik allaganngorlugit saqqummiunneqarnissaat pillugu neqerooruteqartitsinermik piumasaqaatini pisinissamik nalunaaruteqartup qinnutigissavaa.

  Imm. 3.  Apeqqutit piffissarititaasoq eqqorlugu tiguneqartut, tak. imm. 1, neqerooruteqartitsineq pillugu atortuni naammaginartumik piffissalerlugu neqeroortitsinermi killigititatut aalajangigaq sioqqullugu pisinissamik nalunaaruteqartup akereersimassavai. Taamaakkaluartoq apeqqutigineqartoq aatsaat siullermeerutaasumik iluseqartillugu saqqummiunneqartoq piffissaatillugu saqqummiunneqarsimanngitsoq neqeroortitsinerup kingusinnerpaamik piffissaliussap naannginnerata tungaanut pisinissamik nalunaaruteqartup akissuteqarfigisinnaavaa.

  Imm. 4.  Tak. imm. 3, pisinissamik nalunaaruteqartup apeqqutinik akissuteqarnissaa pissaaq allakkatigut aamma kinaassutsimik isertuussinikkut apeqqutip akissutaa ilanngullugu pisortat neqerooruteqartitsisarnermik nittartagaani allaganngorlugit pissarsiarineqarsinnaatinneratigut imaluunniit suliffeqarfinnut neqeroortitsinermi peqataatinneqartunut tamanut ataatsikkut e-mail aqqutigalugu saqqummiussinikkut.

 

Piffissaliussat

 

  § 25.  Killeqartumik neqerooruteqartitsinermi aamma siumoortumik nalunaaruteqarluni isumaqatigiinniarfiusumik neqerooruteqartitsinermi piareersaataasumik piukkunnartussarsiuussinermi piffissaliussaq uppernarsaanissamut piumasaqaatinut aalajangersarneqartunut naammaginartumik naapertuutissapput, minnerpaamillu tamatigut nalunaarutip tamanut saqqummiunneqarneranit ullorsiutini ullut 14-it kingorna.

  Imm. 2.  Neqeroortitsinermi atortuni neqerooruteqartitsisoq annertuunik allannguuteqartitsissappat qinnuteqaatit tigunissaannut piffissaliussap sivitsornissaanut neqeroortitsisoq pisussaaffeqarpoq.

 

  § 26.  Tamanut neqerooruteqartitsinermi aamma killeqartumik neqerooruteqartitsinermi neqerooruteqartitsinissamut piffissaliussaq kiffartuussinermut neqeroorutigineqartunut naleqqiullugu naammaginartuussaaq:

1)  Tamanut ammasutut neqeroortitsinerni neqerooruteqartitsinermut nalunaarutip tamanut saqqummiunneranit ullorsiutini ullut 14-it.

2)  Killilimmik neqeroortitsinerni neqerooruteqartitsinermut atortussat tamanut saqqummiunnerannit ullorsiutini ullut 14-it.

  Imm. 2.  Neqeroortitsinermi atortuni neqerooruteqartitsisoq annertuunik allannguuteqartitsissappat qinnuteqaatit tigunissaannut piffissaliussap sivitsornissaanut neqeroortitsisoq pisussaaffeqarpoq.

 

Kapitali 7

Qinnuteqartunut neqerooruteqartunullu il.il. nalunaarutit

 

Piukkunnartorsiuineq tunniussinerlu pillugit nalunaarutit

 

  § 27.  Killeqartumik neqerooruteqartitsinermi imaluunniit siumoortumik nalunaarutigineqartumik isumaqatigiinniarfiusumik neqerooruteqartitsinermi piukkunnartorsiuinerup inernera pillugu pisinissamik nalunaaruteqartoq allakkatigut qinnuteqaateqartunut tamanut ataatsikkut nalunaaruteqassaaq.

  Imm. 2.  Qinnuteqartut itigartinneqartut eqqarsaatigalugit nalunaarut itigartitsinermut tunngavilersuummik imaqassaaq.

 

  § 28.  Tunniussinissamik aalajangerneq pillugu pisinissamik nalunaaruteqartup neqerooruteqartunut ataatsikkut allakkatigut nalunaaruteqarnissaa pillugu aalajangersagaq neqerooruteqartitseriaatsinut tamanut atuuppoq, taamaattorli tak. imm. 3.

  Imm. 2.  Neqerooruteqartunut itigartitaasunut tunngatillugu itigartitsineq pillugu tunngavilersuummik nalunaarut imaqassaaq.

  Imm. 3.  §§ 18-20 naapertorlugit piumasaqaatinik naammassinnissimanermik uppernarsaasiisimannginnerup kingunerisaanik tamanut ammasumik neqerooruteqartitsinermi itigartitaasut mattunneqartulluunniit, neqerooruteqartunut allanut sanilliullugit itigartitaaneq mattunneqarnerluunniit pillugit siusinnerusukkut nalunaarfigineqarsinnaapput.

  Imm. 4.  Imm. 1 najoqqutaralugu tunniussinermik aalajangiussinerup kingornatigut pisortat neqerooruteqartitsinermik nittartagaanni neqerooruteqartitsisoq tamanut saqqummiussaqassaaq.

 

Neqeroorummik atorunnaarsitsineq

 

  § 29.  Suliatigut paasisimasaqassuseq tunngavigalugu pisinissamik nalunaaruteqartoq neqeroorutigineqartumik atorunnaarsitsisinnaavoq, tassunga ilanngullugu ima pisoqarpat:

1)  neqerooruteqartitsinermi atortussani imaluunniit neqeroortitsinerup ingerlanneqarnerani annertuunik kukkusoqarsimappat,

2)  aningaasaliinermut pissutsit pissutigalugit pisinissamik nalunaaruteqartoq isumaqatigiissuteqarsinnaanngippat,

3)  aaqqiissutissap neqeroorutigineqartup pissusissamisuunnginnera pisinissamik nalunaaruteqartup ilisimalerpagu, imaluunniit

4)  neqeroorutit akuerineqarsinnaanngitsut pisinissamut nalunaaruteqartup kisiisa tigusimappagit, tak. § 4, imm. 6 imaluunniit piukkunnartorsiuinermi qinnuteqaatit akuerineqarsinnaanngitsut kisiisa tigusimappagit, tak. § 4, imm. 7.

  Imm. 2.  Atorunnaarsitsineq tamatumunngalu tunngavilersuutit pillugit piukkunnartorsiuinermi qinnuteqaateqarsimasut imaluunniit neqeroorummik tunniussaqarsimasut tamaasa atorunnaarsitsinissamik aalajangeereernermiit kingusinnerpaamik ullut nalinginnaasut 3-t qaangiunneranni piaarnerpaamillu pisinissamik nalunaaruteqartoq ilisimatitsissaaq.

  Imm. 3.  Atorunnaarsitsineq pisinissamik nalunaaruteqartup nutaamik neqeroortitsinissaanut aporfiussanngilaq. Nutaamik neqeroortitsinermi neqeroortitsinissamut piumasaqaatinit allatulluunniit siusinnerusukkut neqeroortitsinernit pisinissamik nalunaaruteqartoq pinngitsoorani malinnittussaatitaanngilaq uani ilanngunnagit pisut § 16, imm. 2, nr. 1-imi taaneqartut.

 

Kapitali 8

Isumaqatigiissutinik agguataarisarnerit

 

  § 30.  Neqeroortitsisoq ataatsimoorussamik isumaqatigiissutip neqeroorutigineranut taarsiullugu immikkoortukkuutaanik isumaqatigiissutit ilaannik neqerooruteqarsinnaavoq.

  Imm. 2.  Neqeroortitsisoq immikkoortukkuutaanik isumaqatigiissutit ilaannik neqeroortitsinngippat tamanna pillugu neqeroortitsinermut atortussani neqeroortitsisoq ilisimatitsissaaq.

  Imm. 3.  Neqeroortitsisoq neqeroortitsinermut nalunaarummi makkuninnga nalunaarissaaq:

1)  neqerooruteqartoq isumaqatigiissutip ilaanik 1-imik, amerlanernik, imaluunniit tamanik neqerooruteqarsinnaanersoq,

2)  neqerooruteqartoq isumaqatigiissutip ilaanik 1-imik, amerlanernik imaluunniit tamanik tunineqarsinnaanersoq, taamatullu pisoqassappat isumaqatigiissutit ilaat, imaluunniit isumaqatigiissutit ilaat katersat qanoq ilillutik ataqatigiississisinnaaneri, aamma

3)  najoqqutassiat imaluunniit malittarisassat kinaassusersiunngitsut aamma assigiinngisitsisuunngitsut isumaqatigiissutit ilaannik tunniussinermut aalajangiisuunersut, neqerooruteqartup amerlanerpaatut pissarsiarisinnaasaanut naleqqiullugit najoqqutassiat imaluunniit malittarisassiat neqerooruteqartup isumaqatigiissutit ilaannik amerlanernik pissarsinissaanik kinguneqassagaluarpata isumaqatigiissutit ilaat qanoq tuniunneqartarnerat ilanngullugu.

 

Kapitali 9

Naammagittaalliuuteqarsinnaatitaaneq aamma atuutilernera

 

  § 31.  Inatsisartut inatsisaanni matumani aalajangersakkanik unioqqutitsineq pillugu naammagittaalliuutit Pisortat Pisiortartarneranni Neqerooruteqartitsinermi Maalaaruteqartarfiannut suliakkiissutigineqarsinnaapput Pisortat Pisiortartarneranni Neqerooruteqartitsinermi Maalaaruteqartarfiat pillugu Inatsisartut inatsisaanni aalajangersakkat tamanna pillugu aalajangersarneqarsimasut naapertorlugit.

 

  § 32. Inatsisartut inatsisaat ulloq 1. juli 2019 atuutilerpoq.

  Imm. 2  Inatsisartut inatsisaat inatsisip atuutilernerata kingornatigut neqeroortitsinernut atuutissaaq.

 

 

 

Namminersorlutik Oqartussat, ulloq 12. juni 2019

 

 

 

Kim Kielsen