§ 1

Ilinniartitaanermut inuussutissarsiutinillu siunnersuisarneq pillugu Namminersorlutik Oqartussat inatsisaanni nr. 4, 29. november 2013-meersumi imaattunik allannguuteqartitsisoqassaaq:

1.  § 3 imatut oqaasertalerneqassaaq:

”  § 3.  Naalakkersuisut pisussaaffigaat isumagissallugu:

1)  nalilersuisarneq aamma ineriartortitsineq siunnersuisarnermik ingerlatsinermi,

2)  siunnersuisarnerit ataqatigiissaarnissaat,

3)  siunnersuisarnermut tunngatillugu paasissutissiisarneq,

4)  siunnersuisarnermit atortussanik suliaqartarneq siammartitserisarnerlu,

5)  ilitsersuisartunik ilinniartitsisarneq ilinniaqqittarnerlu,

6)  supervision-ertitsisarneq najukkani ilitsersuisarfinnut atatillugu,

7)  misilittakkanik aamma ilisimasanik avitseqatigiittarneq,

8)  attaveqaqatigiiffiliortarnernut tapersersuisarneq, aamma

9)  tarnikkut aamma isumaginninnikkut siunnersuisarneq, tamatumani aamma peqqissaasarneq ilinniagaqartunik., tak. § 18, imm. 2.”

2.  § 7, imm. 2 imatut oqaasertalerneqassaaq:

”  Imm. 2.  Siunnersuisoqatigiit 6-inik inuttaqarput, tamatumunnga inassuteqartoqarnera naapertorlugu, tak. imm. 3, Naalakkersuisunit inuttut piginnaanitik naapertorlugit toqqarneqartartunik piffissamut ukiunik 4-nik sivisussusilimmut. Ilaasortaq toqqaqqinneqarsinnaapput. Siunnersuisoqatigiit ataatsimut sinniisuuffigissavaat siunnersuisarneq, ilinniartitaanerni aamma inuussutissarsiutini paasisimasaqassuseq.”

3.  § 7, imm. 3, imatut oqaasertalerneqassaaq:

” Imm. 3.  Tulliuttut tamarmik siunnersuisoqatigiinnut ilaasortassamik ataatsimik inassuteqartassapput:

1)  Sulisitsisut kattuffii.

2)  Sulisut kattuffii.

3)  Ilinniagaqartut kattuffii.

4)  Kommunit ataatsimoorlutik.

5)  Ilinniarfiit.

6)  Nakorsaaneq peqqinnissamik nakkutilliisoq.”

4.  § 9 imatut oqaasertalerneqassaaq:

”  § 9. Kommunalbestyrelsip akisussaaffigaa Inatsisartut inatsisaat naapertorlugu ilitsersuisoqartarnissaa kommunimi innuttaasunut, tak. Taamaattoq § 3, nr. 9 aamma § 10.”

5.  § 11, imm. 2, imatut oqaasertalerneqassaaq:

”  Imm. 2.  Kommunalbestyrelsip qularnaassavaa kommunit qitiusumik ilitsersuisarfiisa ilitsersuisarnerminnik sulianik ingerlatsinerminni inatsit naapertorlugu kommunini suliffissarsiuussisarfinnik suleqateqarnissaat, tak. suliffissarsiuussisarneq il.il. pillugit Inatsisartut inatsisaat.”

6.  § 12, imm. 1, imatut oqaasertalerneqassaaq:

”  Kommunalbestyrelsip isumagissavaa kommunimi qitiusumik ilitsersuisarnermik ingerlatsiviup ilitsersuisarnikkut neqeroorutaasa piginnaaneqarluartunit ilitsersuisartunit ingerlanneqartarnissaa, tak. imm. 2, aamma inissat naleqquttut iluanni ingerlatsisoqartarnissaa”.

7.  § 12, imm. 2, oqaaseqatigiit aappaat,  imatut oqaasertalerneqassaaq:

” Naalakkersuisut tamatumunnga kommunalbestyrelsimiit qinnuteqartoqarneratigut periarfissaqartissinnaavaat ilitsersuisarnerup utaqqiisaasumik inummit ilitsersuisarnermi immikkut piginnaaneqanngitsumit ingerlanneqarallartarsinnaanera, ilitsersuisartup ilinniagaqalernerani imaluunniit ilinniagaqarnerani ilinniartitaanernut ilitsersuisarnermullu suliassanut Naalakkersuisunit akuerisaasumik.”

8. § 18, imm. 1, imatut oqaasertalerneqassaaq:

”  § 18.  Ilitsersuisarnermi suliassat Inatsisartut inatsisaat una naapertorlugu tassaapput:

1)  Kalaallit Nunaanni ilinniagaqarnissamut periarfissat pillugit ilitsersuisarneq,

2)  Kalaallit Nunaata avataani tamatumanilu aamma Danmark-imi ilinniagaqarnissamut periarfissat pillugit ilitsersuisarneq,

3)  Suliffissat aamma suliffinni qaffakkiartorsinnaanermut periarfissat pillugit ilitsersuisarneq,

4)  aningaasaqarnermut tunngasutigut, tamatumanilu aamma ilinniagaqarnersiuteqarnermut tunngasutigut siunnersuisarneq, aamma qinnuteqarnermut atatillugu immersugassanik immersuisarnernut tunngatillugu,

5)  ineqarnermut tunngasunik ilitsersuisarneq,

6)  inummut tunngasutigut aamma tarnikkut pissutsinut tunngasutigut ikiorserneqarnissamik ilitsersuisarneq,

7)  tarnikkut inuttullu atukkanut tunngasutigut siunnersuisarneq, tamatumani aamma peqqissaasarneq ilinniagaqartunik, tak. imm. 2, aamma

8)  ilinniagaqarnermik aallartitsinermut qinnuteqarnermullu atatillugu ilinniagaqarnersiutinillu qinnuteqartarnermi periutsit pillugit ilitsersuineq.”

9.  § 18-imi imm. 1-ip kingorna immikkoortutut nutaatut ikkunneqassaaq:

“ Imm. 2.  Imm. 1, nr. 7-imi ilinniagaqartutut paasineqassapput inuit ilinniakkamik ingerlatsisut aamma ilinniagaqartut, pikkorissaqqinnermik ingerlatsisut suliffissanut, ilitsersuisarnernut pikkorissaqqinnernullu qitiusumik ingerlatsivinni.”

Imm. 2 taamaasilluni imm. 3-ngussaaq.

10.  § 25 imatut oqaasertalerneqassaaq:

”  § 25.  Naalakkersuisut kommunalbestyrelsimut naammassisassanut isumaqatigiissuteqassapput, inatsit naapertorlugu ilitsersuisarnernik suliassanik suliaqartarneq pillugu.

  Imm. 2.  Naammassisassanut isumaqatigiissummi ilaassapput kommunimi ilitsersuisarnikkut suliani anguniagassat, tamatumunngalu aallaavittut tunngaviusussat. Taannalu aamma imaqassaaq ilitsersuisarnermi anguniagassanik tigussaasunik.

  Imm. 3.  Naalakkersuisut naammassisassatut anguniakkani naammassinnissimannginneq iliuuseqarfigisinnaavaat, kommuninut ataatsimoorussanik tapiissutini annikinnerulersitsinikkut.”.

11.  Inatsisartut inatsisaat imatut taaguuserneqassaaq: 

“Kalaallit Nunaanni ilinniartitaanermut inuussutissarsiutinillu siunnersuisarneq pillugu Namminersorlutik Oqartussat inatsisaat nr. 4, 29. november 2013-meersoq”

§ 2

Inatsisartut inatsisaat atortuulissaaq ulloq 1. januar 2019.

Namminersorlutik Oqartussat, ulloq 27. november 2018