Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat nr. 33, 28. november 2016-imeersumi § 1, imm. 2, § 1, imm. 3, nr. 1 aamma 3, § 4 aamma § 5, imm. 2-p nassatarisaannik aalajangersarneqarput:

Kapitali 1
Nalunaarsuiffiup imarisai

§ 1.  Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat nr. 33, 28. november 2016-imeersumi § 2-mi aamma § 3-mi nassuiarneqartutut inatsisit naapertorlugit ingerlatsiviit taakkununngalu atasutut nioqqutissiorfiit pillugit tunngaviusumik paasissutissat Qitiusumik Suliffeqarfinnik Nalunaarsuiffimmi ilanngunneqassapput.

  § 2.  Inatsisit naapertorlugit ingerlatsivinni Qitiusumik Suliffeqarfinnik Nalunaarsuiffimmi tunngaviusutut paasissutissat makku ilanngunneqassapput, taamaattorli takuuk imm. 2:
1)  Ingerlatsiviup QSN-normua.
2)  Suliffeqarfiup qanoq ittuussusia.
3)  Pilersinneqarfia.
4)  Ajornanngippat atorunnaarsinneqarfia.
5)  Suliffeqarfiup aqqa.
6)  Suliffeqarfiup najugaqarfia.
7)  Inatsisit naapertorlugit paasissutissat taakku taama annertussusilittut nalunaarsorneqarnerini tamakkiisumik akisussaaffeqartutut peqataasunut, aallartitsisunut, piginnittunut aamma siulersuisuusuni ilaasortanut aqqit, najukkat aamma KIA- imaluunniit QSN-normut.
8)  Qitiusumik Suliffeqarfinnik Nalunaarsuiffimmi nr. 7-imi inunni taaneqartuni Inuussutissarsiornermut Aqutsisoqarfiup nalunaarutigisimasaanik najukkamik illersuisussutaasinnaasup nalunaarnera.
9)  Inuussutissarsiummik ingerlataqarfik, saniatigullu ingerlataqarfiusinnaasut allat.
10)  Telefonnormu.
11)  Telefaxnormu.
12)  E-mailip suussusia.
13)  Ingerlataqarfik atorfeqartitaqassappat sulisorisat amerlassusii.
14)  Nioqqutissiorfittut ingerlatsivinnut attuumassuteqartunut P-normut.
15)  Akiliisinnaajunnaartoqarsinnaaneq pillugu paasissutissiissut.
16)  Ussassaarutinik saaffiginninnernut pinngitsuuisitsisinnaanerup nalunaarnera.
  Imm. 2.  Imm. 1, nr. 11-mi paasissutissat taaneqartut pinngitsoorneqarsinnaapput.

  § 3. Nioqqutissiorfittut ingerlatsivinnut Qitiusumik Suliffeqarfinnik Nalunaarsuiffimmi tunngaviusutut paasissutissat makku ilanngunneqassapput, taamaattorli takuuk imm. 2:
1)  Ingerlatsiviup P-normua.
2)  Inatsisit naapertorlugit ingerlatsivimmut, nioqqutissiorfittut ingerlatsiviup ingerlanneqarfianut QSN-normu.
3)  Pilersinneqarfia.
4)  Ajornanngippat atorunnaarsinneqarfia.
5)  Aqqa.
6)  Najugaq.
7)  Telefonnormu.
8)  Telefaxnormu.
9)  E-mailip suussusia.
10)  Inuussutissarsiummik ingerlataqarfik, saniatigullu ingerlataqarfiusinnaasut allat.
11)  Nioqqutissiorfittut ingerlatsivik atorfeqartitaqassappat sulisorisat amerlassusii.
12)  Ussassaarutinik saaffiginninnernut pinngitsuuisitsisinnaanerup nalunaarnera.
  Imm. 2.  Imm. 1, nr. 8 paasissutissat taaneqartut pinngitsoorneqarsinnaapput.

Kapitali 2
Nalunaarsuiffimmut paasissutissanik tunniussinerit

 § 4.  Qitiusumik Suliffeqarfinnik Nalunaarsuiffimmi inatsisinit aalajangikkatut nalunaarsugaanissamut pisussaaffimmi ilaasutut inatsisit naapertorlugit ingerlatsiviit allallu nalunaarsuiffimmi inatsisit naapertorlugit ingerlatsivik pillugu tunngaviusutut paasissutissat nalunaarsornissaannut akisussaaffeqarput.
  Imm. 2.  Tunngaviusutut paasissutissani nalunaarsukkani allannguuteqartoqassappat nalunaarsuiffimmi allannguutit inatsisit naapertorlugit ingerlatsiviup nalunaarsussavai.
  Imm. 3.  Tunngaviusutut paasissutissani allannguutit sapinngisamik piaarnerpaamik isumagineqassapput, aammalu allannguutaasup paasineqarnerata kingornatigut kingusinnerpaamik ullut 14-it kingorna. Allannguut suliarineqanngippat tamanna nalunaarsuinngitsoornertut isigineqassaaq.

  § 5.  Inatsisit naapertorlugit ingerlatsiviit sumiiffinni arlalinni najugaqarfinnit suliaqartuusut najugaqarfinni taakkunani nioqqutissiorfittut ingerlatsiviit nalunaarsorsinnaavaat.
  Imm. 2.  Nioqqutissiorfittut ingerlatsiviit inuussutissarsiutinut ilisarnaatinik assigiinngitsunik nioqqutissiorfittut ingerlatsiviit nalunaarsorneqarsimassappata sumiiffimmi najukkami ataatsimi nioqqutissiorfittut ingerlatsiviit arlallit inatsisit naapertorlugit ingerlatsiviup taamaallaat nalunaarsorsinnaavai.
  Imm. 3.  Inatsisit naapertorlugit ingerlatsiviup najugaqarfianut naleqqiullugu najugaqarfinni allani inissisimaffeqartutut nioqqutissiorfittut ingerlatsiviit pilersinneri, allanngortinneri imaluunniit atorunnaarsinneri pillugit paasissutissanik inatsisit naapertorlugit ingerlatsivik nalunaarsuissaaq. Pissutsini nalunaarsugaasuni allannguuteqartoqassappat nalunaarsuiffimmi allannguutit nalunaarsorneqassapput.

  § 6.  Inatsisit naapertorlugit ingerlatsiviit aamma nioqqutissiorfittut ingerlatsiviit ussassaarutinik saaffiginninnermut illersugaanissaq kissaatiginerlugu nalunaarsuisinnaapput. Ingerlatsivik usassaarutinik saaffiginninnermut illersugaanerata nalunaarsuiffimmi tamanut saqqummiunneqarnera nalunaarneqassaaq.
  Imm. 2.  Ingerlatsiviit ussassaarutinik saaffiginninnermik pinngitsuuisitsinissamut nalunaarsugaasimasut pillugit tunngaviusutut paasissutissat ussassaarutinik saaffiginninnernut atorneqaqqusaanngillat, aamma ingerlateqqinneqaqqusaanngillat. Taamaattorli ingerlatitseqqittoqarsinnaavoq tigusinnittup allaganngorlugu nalunaarutigippagit:
1)  ussassaarutinik saaffiginninnermut illersugaanissaq pillugu kissaatigisaq ataqqeqquneqassaasoq,
2)  isumaqatigiissutaasut avataanniittumut ingerlatsiviit illersugaasut pillugit paasissutissanik ingerlatitseqqinnerni tigusinnittoq tassunga ingerlatsiviup illersugaaneranik erseqqissumik nalunaaruteqassasoq, aamma
3)  isumaqatigiissutaasut avataaniittumut ingerlatsiviit illersugaasut pillugit paasissutissanik ingerlatitseqqinnermi tigusinnittoq pineqartumi tassani taassuma piumasaqaatinik naapertuutsitsinnissani pillugu isumaqatigiissutaasut avataaniittumit allaganngukkamik nalunaarummik pissarsiniassasoq.
  Imm. 3.  Ussassaarutinik saaffiginninnermut illersugaanissaq pillugu nalunaarutilinnik tunngaviusutut paasissutissat tiguneqartut imm. 2 malillugu nalunaarummut nalunaarutaasumut akerliusumik atorneqaqqusaanngillat imaluunniit ingerlateqqeqqusaanngillat.

  § 7.  §§ 4, 5 aamma 6 malillugit nalunaarsuineq taamaallaat www.virk.dk-mi Inuussutissarsiornermut Aqutsisoqarfiup (Erhvervsstyrelsip) qarasaasiakkut nammineq nalunaarsuisarnermut ingerlatsiviatigut pisinnaavoq. Nalunarsuinermi atuisartup qarasaasiakkut ilisarnaataa atorneqassaaq. Aammattaaq nalunaarsuineq nammineq nalunaarsuisarnermut ingerlatsivimmi takuneqarsinnaasut naapertorlugit pissaaq.
  Imm. 2.  Nalunaarsugaanissamut pisussaasuni, internetsimut attaveqanngitsuni Akileraartarnermut Aqutsisoqarfik 31. december 2020 tikillugu ilanngullugulu ikaarsaariarfittut piffissami tunngaviusutut paasissutissat nalunaarsugaanernik ikiuissaaq. Akileraartarnermut Aqutsisoqarfik internetsimut attaveqannginnermut uppernarsaatissanik piumasaqaateqarsinnaavoq.

  § 8.  Nalunaarummi matumani malittarisassiat malillugit Inuussutissarsiornermut Aqutsisoqarfiup www.virk.dk-mi qarasaasiakkut nammineq nalunaarsuinermut ingerlatsiviatigut atuilluni ingerlatsivimmik namminermit paasissutissat nalunaarsugaannginneranni Inuussutissarsiornermut Aqutsisoqarfimmit, Akileraartarnermut Aqutsisoqarfimmit aamma Naatsorsueqqissaartarfimmit Qitiusumik Suliffeqarfinnik Nalunaarsuiffimmit paasissutissat nalunaarsuiffimmut nuunneqassapput, taamaattorli takukkit imm. 2-4.

  Imm. 2.  Qitiusumik Suliffeqarfinnik Nalunaarsuiffimmit pineqartut KIA-normuiniittut assingi inuup nammineq ingerlatsisuusup aqqa, najugaa, ajornanngippallu atermik najukkamillu illersuinermik nalunaarutaasoq nuunneqassapput.
  Imm. 3.  Sulisorisat amerlassusii Naatsorsueqqissaartarfimmit naatsorsorneqassapput. Qinnutiginninnikkut sulisorisat amerlassusii pillugit paasissutissat allanngortinneqarsinnaanngillat.
  Imm. 4.  Statstidendemit Qitiusumik Suliffeqarfinnik Nalunaarsuiffimmut akiliisinnaajunnaarneq pillugu paasissutissaq nuunneqassaaq.

Kapitali 3
Nalunaarsuiffimmit paasissutissanik attaveqarlunilu atuisinnaaneq

  § 9.  Statstidendemit Qitiusumik Suliffeqarfinnik Nalunaarsuiffimmi §§ 2 aamma 3-mi pineqartutut paasissutissanut tamanut pisortani oqartussaaffiit sullissiviillu attaveqarsinnaapput.
  Imm. 2.  Statstidendemit Qitiusumik Suliffeqarfinnik Nalunaarsuiffimmit tunngaviusumik paasissutissanut pisortani oqartussaaffiit sullissiviillu attaveqalersimasut §§ 10 aamma 12-imi nalunaarsugaasunut naleqqiullugit annertunerusumik namminersortunut paasissutissat ingerlateqqitaqarsinnaanngillat.

  § 10.  Nalunaarsuiffimmi paasissutissat pigineqartillugit Qitiusumik Suliffeqarfinnik Nalunaarsuiffimmi inatsisit naapertorlugit ingerlatsiviit pillugit paasissutissanut makkununnga kikkut tamarmik attaveqarsinnaapput:
1)  Ingerlatsiviup QSN-normua.
2)  Suliffeqarfiup qanoq ittuussusia.
3)  Pilersinneqarfia.
4)  Ajornanngippat atorunnaarsinneqarfia.
5)  Suliffeqarfiup aqqa.
6)  Suliffeqarfiup najugaqarfia.
7)  Peqataasunut, aallartitsisunut, piginnittunut aamma siulersuisuusuni ilaasortanut aqqit, najukkat, atorfiit aamma KIA- imaluunniit QSN-normut, Qitiusumik Suliffeqarfinnik Nalunaarsuiffimmi najukkamik illersuinissamik Inuussutissarsiornermut Aqutsisoqarfik nalunaaruteqarsimassanngippat, takuuk § 2, imm. 1, nr. 8. Taamaattorli inuit namminneq AKI-normunut attaveqartitaasinnaanngillat.
8)  Inuussutissarsiummik ingerlataqarfik, saniatigullu ingerlataqarfiusinnaasut allat.
9)  Telefonnormu.
10)  Telefaxnormu.
11)  E-mailip suussusia.
12)  Ingerlataqarfik atorfeqartitaqassappat sulisorisat amerlassusii intervalinut nalunaarsugaasut.
13)  Nioqqutissiorfittut ingerlatsivinnut attuumassuteqartunut P-normut.
14)  Akiliisinnaajunnaartoqarsinnaaneq pillugu paasissutissiissut.
15)  Ussassaarutinik saaffiginninnernut pinngitsuuisitsisinnaanerup nalunaarnera.
  Imm. 2.  Inunnut namminneq ingerlatsisuusunut tamakkiisumik akisussaaffeqartutut peqataasuni inuit atorfii, aqqi najugaallu pillugit paasissutissat qaqugumulluunniit QSN-imi takuneqarsinnaassapput, Inuussutissarsiornermut Aqutsisoqarfik allamik aalajangiisimassanngippat. Tamanna suliffeqarfinni ingerlanneqartuni aamma ingerlajunnaartuni atuuppoq.
  Imm. 3.  Imm. 2-mi inunnut paasissutissanik nutarterisarnerit suliffeqarfinni QSN-imi nalunaarsugaasimasuni inuup pineqartup suliaqarunnaarnerata kingornatigut ukiut qulit qaangiunnerini atuukkunnaassaaq.
  Imm. 4.  Qitiusumik Suliffeqarfinnik Nalunaarsuiffimmi tunngaviusutut paasissutissat pissarsiarineqarsinnaaffianni nioqqutissiorfittut ingerlatsivinnut paasissutissanik makkuninnga kikkulluunniit attaveqarsinnaapput:
1)  Ingerlatsiviup P-normua.
2)  Inatsisit naapertorlugit ingerlatsivimmut, nioqqutissiorfittut ingerlatsiviup ingerlanneqarfianut QSN-normu.
3)  Pilersinneqarfia.
4)  Ajornanngippat atorunnaarsinneqarfia.
5)  Aqqa.
6)  Najugaq.
7)  Telefonnormu.
8)  Telefaxnormu.
9)  E-mailip suussusia.
10)  Inuussutissarsiummik ingerlataqarfik, saniatigullu ingerlataqarfiusinnaasut allat.
11)  Nioqqutissiorfittut ingerlatsivik atorfeqartitaqassappat sulisorisat amerlassusii aalajangersimasumik agguataarlugit nalunaarsukkat.
12)  Ussassaarutinik saaffiginninnernut pinngitsuuisitsisinnaanerup nalunaarnera.

  § 11.  Qitiusumik Suliffeqarfinnik Nalunaarsuiffimmi ilanngunneqartunik ingerlatsiviit ataasiakkaat, ingerlatsiviit eqimattut, aamma ingerlatsiviit tamaasa pillugit paasissutissanut kikkut tamarmik attaveqarsinnaapput, Inuussutissarsiornermut Aqutsisoqarfimmi IT-mik ingerlatsiviup atornerata malitsigisaanik killiliissutaasut ilanngullugit. Inuussutissarsiornermut Aqutsisoqarfiup nittartagaani, www.datacvr.virk.dk/data/-mi allassimavoq paasissutissat qanoq pissarsiarineqarsinnaanersut, aamma nioqqutissat sorliit atugassiarineqarnersut.
  Imm. 2.  Nalunaarsuiffimmit paasissutissat qarasaasiakkoortillugit pilersuutigineqarput.

  § 12.  Qitiusumik Suliffeqarfinnik Nalunaarsuiffimmi paasissutissanik kikkut tamarmik attaveqalersimasut nalunaarummi matumani § 6-imi malitsigisaasumik pinngitsuugassat aamma piumasaqaatit atorlugit paasissutissanik atuillutillu ingerlatitseqqissinnaapput.

  § 13.  Akeqanngitsumik ataasiakkaanik saqqummiussinissamut www. datacvr.virk.dk/data/-mi attaveqartoqarpoq. Ingerlatsivinnut ataasiakkaaginnarnut saqqummiussinerit taamaallaat pisinnaapput. Inerteqqutaavoq www.datacvr.virk.dk/data/-mik crawliinissaq, imaluunniit imminik pisutut immersuisitsinissamut aamma saqqummiussinissamik periutsinik allanik atugaqaqqusaasoqanngilaq.

 § 14.  Qitiusumik Suliffeqarfinnik Nalunaarsuiffimmit paasissutissanik tigusinernut ataasiakkaanut tamanut, Akileraartarnermut Aqutsisoqarfiup imaluunniit Kalaallit Nunaanni Naatsorsueqqissaartarfiup pilersuutigisaannut allaffissornermut akiliut 650 kr.-usoq akilerneqartassaaq.
  Imm. 2.  Allaffissornermut akiliutaasup saniatigut ingerlatsivinnut ataasiakkaanut tamanut kr. 1,25 akiliutigineqartassaaq, taamaattorli tigusanut ataasiakkaanut tamanut annertunerpaamik 15.000 kr.-nik.
  Imm. 3.  Paasissutissanik tigusat pisiarisat tuneqqinnissaat siunertaralugu pissappat pisisoq aamma tuneqqitatut pisat ataasiakkaat tunisaaneranni akiannit 5 pct.-inik akiliisassaaq.
  Imm. 4.  Imm. 1-3-mi aalajangersakkat allaffissornermi siunertanut paasissutissanik atuisunut pisortat oqartussaaffiinut atuutinngillat.

  § 15.  Suliassani § 11-mi nalunaarsukkatut tigusat qaangerlugit katitigaassuseqartuni allaganngorlugu qinnuteqarnermi pissarsiniartumut Akileraartarnermut Aqutsisoqarfik imaluunniit Kalaallit Nunaanni Naatsorsueqqissaartarfik akigititassamut neqeroorummik suliaqarsinnaavoq.

Kapitali 4
Pineqaatissiissutaasinnaasut

§ 16.  § 6, imm. 3-mik piaaraluni imaluunniit mianersuaalliorujussuarluni unioqqutitsisoq akiliisitsissummik pineqaatissinneqassaaq.
  Imm. 2.  Inatsisit naapertorlugit inummit unioqqutitsisoqarsimappat Kalaallit Nunaanni pinerluttulerinermi inatsimmi malittarisassiat malillugit pinerluttulerinermik eqqartuussivimmi akisussaaffiliisoqarsinnaavoq.
  Imm. 3.  Nalunaarusiaq manna malillugu pineqaatissiissutitut akiligassanngortitat Nunatta Karsianut tussapput.
 

Kapitali 5
Atuutilerfia

  § 17.  Nalunaarusiaq 1. januar 2018-imi atuutilerpoq.

Namminersorlutik Oqartussat, ulloq 22. december 2017

Hans Enoksen

/

Jørn Skov Nielsen