Kapitali 1
Qitiusumik Suliffeqarfinnik Nalunaarsuiffimmi nalunaarsuisarneq

  § 1.  Kalaallit Nunaanni inatsisit naapertorlugit ingerlatsiviit nioqqutissiorfiillu Inatsisartut inatsisaat una malillugu maleruagassallu inatsit taanna malillugu aalajangersarneqartut malillugit Qitiusumik Suliffeqarfinnik Nalunaarsuisarfimmi (CVR-mi nalunaarsuiffik) nalunaarsorneqassapput.
  Imm. 2.  Allanik suliaqartut § 1-imi taaneqanngitsut nalunaarsorneqarnissaat pillugu Naalakkersuisut malittarisassanik erseqqinnerusunik aalajangersaasinnaapput.
  Imm. 3.  Naalakkersuisut malittarisassanik erseqqinnerusunik aalajangersaaffigisinnaavaat:
1)  Kalaallit Nunaanni oqartussat CVR-mi nalunaarsuiffimmiittunik paasissutissanik nutarterisinnaanerat.
2)  Kinaassutsimut uppernarsaatit normuinik pisortat ingerlatsiviini atuisarnissaq.
3)  Ussassaarutinut illersugaasinnaaneq.

Kapitali 2
Nassuiaatit

  § 2.  Inatsisit naapertorlugit ingerlatsivittut inatsimmi matumani paasineqassapput:
1)  Inuk nammineq sulisitsisuusoq imaluunniit namminersortutut inuussutissarsiummik ingerlataqartoq.
2)  Inuk inatsisit naapertorlugit ingerlatsiviusoq imaluunniit inuk nunani allani ingerlatsiviup immikkoortortaa.
3)  Namminersorlutik Oqartussat.
4)  Kommune.
5)  Kommunit suleqatigiiffiat.

  § 3.  Nioqqutissiornermik ingerlatsivittut ataatsimoortutut inatsimmi matumani paasineqassapput:
1)  Ingerlataq pingaarneq, inatsisit naapertorlugit ingerlatsivimmit ingerlanneqartoq, ingerlatamik pingaarnermik ataasiinnarmik ingerlatsisuusoq, ingerlatallu tamarmik sumiiffimmi najukkamit ataatsimit inatsit naapertorlugit ingerlatsivimmit ingerlanneqartut.
2)  Ingerlataq pingaarneq ataaseq, inatsisit naapertorlugit ingerlatsivik pingaarnertut arlalinnik ingerlataqarpat, taakkualu sumiiffimmi najukkamit ataatsimit ingerlanneqarpata.
3)  Ingerlataq inatsisit naapertorlugit ingerlatsivik sumiiffinni najukkanit arlaqartunit ingerlatsisoqarpat.

Kapitali 3
Atuisunut akiliisitsisarneq

  § 4.  CVR-mi nalunaarsuiffimmit nalunaarsukkanik tunisaqarnermi aamma nalunaarsuisarnernut akiliuteqarnissamut tunngatillugu malittarisassanik ersarinnerusunik Naalakkersuisut aalajangersaasinnaapput.

Kapitali 4
Pineqaatissiissutaasinnaasut

 § 5.  Pineqaatissiilluni akiliisitsissutissamik akiligassinneqarsinnaavoq § 1, imm. 1 aamma 2 naapertorlugit nalunaarsuinissamik naammassinninngitsoq, imaluunniit piaaraluni mianersuaalliorujussuarluniluunniit eqqunngitsunik paasissutissiisoq.
  Imm. 2.  Aalajangersakkanik unioqqutitsisoqartillugu Kalaallit Nunaanni pinerluttulerinermi inatsit malillugu akiliisitsinikkut pineqaatissiisoqarsinnaanera Inatsisartut inatsisaat una naapertorlugu aalajangersakkani aalajangersarneqartuni aalajangerneqarsinnaavoq.
  Imm. 3.  Inatsisit naapertorlugit inuk pineqaatissiilluni akiliisitsissutissamik akiligassinneqarsinnaavoq Inatsisartut inatsisaannik malittarisassanillu Inatsisartut inatsisaat naapertorlugu aalajangersarneqarsimasunik unioqqutitsisimappat, takukkit Kalaallit Nunaanni pinerluttulerinermut inatsimmi malittarisassat kapitali 5-imiittut.
  Imm. 4.  Akiliisitsissutit Inatsisartut inatsisaat manna imaluunniit aalajangersakkat Inatsisartut inatsisaat naapertorlugu aalajangersarneqartut malillugit akilerneqartut Nunatta Karsianut isertinneqartassapput.

  § 6.  Inatsisartut inatsisaat ulloq 1. januar 2018 atuutilerpoq.
  Imm. 2.  Tamatumunnga peqatigitillugu Inuussutissarsiummik Ingerlataqartunik Nalunaarsuiffik pillugu Inatsisartut inatsisaat nr. 10, 29. oktober 1999-imeersoq atorunnaarsinneqarpoq.
  Imm. 3.  Inatsisartut inatsisaata atuutilernerani Inuussutissarsiummik Ingerlataqartunik Nalunaarsuiffimmi nalunaarsorneqarnermi normut atuuttut CVR-imi nalunaarsuiffimmi kinaanermut uppernarsaatit normuinik taarserneqassapput.

Namminersorlutik Oqartussat, ulloq 28. november 2016

Kim Kielsen