Quppernerup imai iserfigikkit
Oqaatsit toqqakkit
Ujaasinermut uterit
Allaffissornikkut najoqqutassiat
Nr. 9
19. juuli 2017
Atuuttut

Ilinniagaqarnersiutit pillugit Namminersorlutik Oqartussat nalunaarutaat

Ilinniagaqarnersiutit pillugit Inatsisartut inatsisaat nr. 12, 22. november 2011-meersumi § 2, imm. 5, § 5, § 14, imm. 4, § 28, imm. 2, § 34, imm. 5 aamma § 35, imm. 2 aamma kalaallit ilinniagaqartut kattuffiinut tusarniaareernikkut aalajangerneqarpoq:

 

Kapitali 1
Nassuiaatit

 

  § 1.  Ilinniagaqarnissamut piareersarluni ilinniarnerit tassaapput:
1)  Ilinniagaqarnissamut piareersarluni ilinniarnerit meeqqat atuarfianni inaarutaasumik misilitsinnermit qaffasinnerusumik inissisimasut.
2)  Ilinniarnertuunngorniarnerit, ilinniarnertuunngorniarfinni ilassutitut ilinniarnerit aamma piareersarluni pikkorissarnerit.

 

  § 2.  Inuutissarsiutinut ilinniartitaanertut paasineqassaaq ilinniartitsineq ilinniarfimmi pineqartumi, ilinniartitsinermut pilersaarut naapertorlugu ilinniagaq inuutissarsiorsinnaanermut suliamik ilinniagaqarsimasutut pisinnaatitaaffiliisoq, nalinginnaasumillu ukiut marluk sinnerlugit sivisussuseqartoq.
  Imm. 2.  Inuutissarsiutinik ilinniartitsinertut sivikitsutut paasineqassaaq inuutissarsiutinik ilinniartitsineq nalinginnaasumik ukiunik marlunnik imaluunniit taakkunannga sivikinnerusumik sivisussuseqartoq, aammalu ilinniakkamut pineqartumut ilinniartitsinermut pilersaarutaasoq naapertorlugu, suliamik ilinniagaqarsimasutut ilinniagaqarnerup naleqqatiginngisaa.

 

  § 3.  Ingerlaqqiffiusumik ilinniarneq tassaavoq ilinniarneq ilinniarnertuunngorniarfimmi ilinniarnermi angusisimanissamik piumasaqaateqarfiusoq, tassunga ilanngullugit ilinniarnertuunngorniarfinni ilinniarnerit immikkut aaqqissuunneqartut, imaluunniit inuutissarsiummik ilinniagaq.

 

  § 4.  Timersornermut immikkut piginnaanillit timersortartutullu piukkunnassuseqartut tassaapput ilinniagaqartut Elite Sport Greenlandimit aammalu timersuutinut kattuffinnit innersuussutaareerlutik Ilinniagaqarnersiuteqarnermut Naalakkersuisoqarfimmit timersornermut immikkut piginnaanilittut timersortartutullu piukkunnassuseqartutut ilinniagaqartussatut akuerineqartut. Kalaallit Nunaanni Timersoqatigiit Kattuffiata timersuutit namminneq timersuutiminnut kattuffeqanngitsut sinniisuuffigisinnaavai.

 

  § 5.  Ilitsersuisoq tassaavoq ilinniarfimmi ilinniagaqarnermut tunngatillugu ilitsersuisartoq, ilinniarfimmi ilinniartitsisoq imaluunniit ilinniarfimmi ilitsersuinermik suliaqartut allat, imaluunniit Danmarkimi Kalaallit Illuutaasa ilaanni ilinniagaqarnermut ilitsersuisartoq. Aammattaaq Ilinniagaqarnersiuteqarnermut Naalakkersuisoqarfik aqqutissiuisinnaavoq.

 

  § 6.  Katissimanermut assingusumik aalajangersimasumik inooqatigiinneq sivikinnerpaamik ukiumik ataatsimik sivisussuseqartoq, najugaqarnermut uppernarsaatikkut uppernarsarneqartoq katissimanermut naligiissinneqassaaq.

 

  § 7.  Ilaqutariit qaniginerpaasat tassaapput nammineq qitornarisat, katissimallugu aapparisaq, angajoqqaat, qatanngutit aamma aataakkut aanaakkulluunniit, imaluunniit inuit ilinniagaqartumut ilaqutariittut qanittutut inissisimanermikkut taakkununnga nallersuunneqarsinnaasut.


Kapitali 2
Ataatsimut aalajangersakkat

 

Nalinginnaasumik piumasaqaatit

 

  § 8.  Ilinniagaqarnersiuteqarnermut Naalakkersuisoqarfik tamanna pillugu qinnuteqartoqareerneratigut danskisut innuttaassuseqarnissamik piumasaqaammik sanioqqutsinissaq pillugu immikkut akuersisinnaavoq, tak. ilinniagaqarnersiutit pillugit Inatsisartut inatsisaat, ilinniagaqarniartoq ilaqutariinnikkut Kalaallit Nunaannut immikkut attaveqarpat, assersuutigalugu katissimaneq aqqutigalugu, imaluunniit ilinniagaqarniartoq Kalaallit Nunaanni angajoqqaaqarpat.

 

  § 9.  Ilinniagaqartut ilinniagaqarnermik unitsitsigallartut, tassunga ilanngullugit erninermut atatillugu ilinniarnermik unitsitsigallartut, taamaattoq tak. § 33, imm. 1, nr. 8, ilinniagaqarnersiuteqarsinnaatitaanngillat. Ilinniagaqartulli erninerminnut atatillugu sulinngiffeqartut immikkut tapiissutinik pisinnaatitaapput.
  Imm. 2.  Ilinniagaqartut qiortakkamik imaluunniit stipendianik atuiunnaarallartut, piffissani taakkuninnga atuiunnaarallarfimminni immikkut tapiissutinik imaluunniit nunatta karsianit aningaasalersorneqartunik ilinniarnermi attartortakkanik pisartagaqarsinnaanngillat, tak. kapitalit 6 aamma 7.
  Imm. 3.  Ilinniagaqarniartut, tunniunneqartartut kapitalini 6-imi aamma 7-imi pineqartut pillugit qinnuteqannginnertik sioqqullugu, qaammatini 3-ni stipendianik ataavartumik pisartagaqarsimanngitsut, imaluunniit immikkut tapiissutisisinnaanatillu nunatta karsianit aningaasalersorneqartunik ilinniarnermi attartorsinnaatitaanngillat. Taamaattoq tamanna ilinniarnerup aallartinnerani imaluunniit ilinniarnerup qaammataani siullerni 3-ni atuutinngilaq.
  Imm. 4.  Ilinniagaqartunut Naalagaaffiup ilinniagaqarnersiuteqartitsineranit stipendianik pisartagaqartunut, kapitalit 6 aamma 7 naapertorlugit immikkut  tapiissuteqartitsisoqarsinnaavoq aamma nunatta karsianit aningaasalersorneqartunik ilinniarnermi attartortitsisoqarsinnaavoq, taamaattoq tak. § 52, naggatit aappaat, nalunaarut una naapertorlugu aammalu ilinniagaqarnersiutit pillugit Inatsisartut inatsisaat naapertorlugu ilinniagaqarnersiuteqarsinnaanermut piumasaqaatinik naammassinnissimappata.

 

Ilinniagaqarnermik ingerlatsineq

 

  § 10.  Ilinniagaqarnermik ingerlatsineq imatut paasineqassaaq, ilinniartup ilinniagaqarnerup ingerlanissaanut malittarisassat naapertorlugit ilinniartitsinermut pinngitsoorani peqataaffiusussamut aamma misilitsinnernut soraarummeernernullu piumasarineqartunut peqataanera, suliassiissutinik tunniussisarnera, takkuttussaatitaanermik piumasaqaammik malinninnera il.il., imaluunniit misilitsinnerni soraarummeernernilu peqataannginnissamik nalunaarnerup takkutinngitsoornerulluunniit ilinniarfimmit akuerineqareernikkut pisimanera.
  Imm. 2.  Ilinniagaqartoq uppernarsarneqartumik piffissami sivisuumi annertuumik napparsimasoq, ilinniagaqartutut isigineqartarpoq, ilinniagaqartoq misilitsinnissanut soraarummeernissanullu nalunaarutigineqarsimappat.
  Imm. 3. Ilinniagaqarnermi ilinniarfimmut pinngitsoorani takkuttariaqarfiunngitsumi ilinniarnermi ilinniartoq qaammatit aqqaneq marluk sinnerlugit kinguaattoorsimanngippat ilinniagaqartutut isigineqassaaq. Aningaasat ilinniarnermi tunniunneqartartut imaluunniit qiortakkat ilinniagaqarnermut atatillugu tunniunneqarsimasut akornanni assigiinngissutaasoq kinguaattoorneruvoq, taamatullu ilinniagaqarnermut maleruagassat atuuttut najoqqutaralugit ilinniagaqarnermi siuariartorneq qaammatinut uuttorneqartarluni, taamaattorli tak. § 58, imm. 3, oqaaseqatigiit aappaat. Ilinniagaqartup ilinniarnini qaammatini aalajangersimasuni amerlassusilinni stipendianik tunniunneqartartunik pisarnissamut qiortakkanillu pissarsisinnaatitaalluni sivitsorsimappagu stipendiat imaluunniit qiortakkat naatsorsuinermut ilanngunneqassanngillat.
  Imm. 4.  Imm. 1-imi aalajangersakkat timersornermik immikkut piginnaanilinnut timersortartutullu piukkunnassuseqartunut atuutinngillat. Ilinniagaqartoq timersornermik immikkut piginnaanilinnut timersortartutullu piukkunnassuseqartunut piumasaqaatinik naammassinnissinnaajunnaarpat, Elite Sport Greenlandip ingerlaannaq Ilinniagaqarnersiuteqarnermut Naalakkersuisoqarfik nalunaarfigissavaa.
  Imm. 5  Ilinniagaqarnersiuteqarnermut Naalakkersuisoqarfiup tamanna pillugu qinnuteqarneq naapertorlugu immikkut akuersissutigisinnaavaa qaammatinik 12-inik kinguartoorsinnaaneq pillugu aalajangersakkap imm. 3, oqaaseqatigiinni siullerniittup saneqqunneqarsinnaanera, kandidatinngorniarluni ilinniagaqartoq qiorsinernik suli atugassaqarpat, tak. § 21, ilinniarfiullu uppernarsarpagu ilinniagaqartoq suli ilinniakkamik ingerlatsisuusoq.

 

  § 11.  Ilinniagaqartup ilinniarnerminik ingerlatsinera ilinniarfiup aamma Kalaallit Illuutaasa ingerlaavartumik nakkutigissavaat, ilinniagaqartullu ilinniarnermik ingerlatsinissaq pillugu piumasaqaatinik piviusunngortitsineranut tunngatillugu aalajangiisassallutik, tak. § 10.


Kapitali 3
Ilinniagaqarnersiutit suuneri annertussusaallu

 

Stipendiat

 

  § 12.  Aningaasanut inatsimmi annertussutsit aalajangersarneqarsimasut naapertorlugit makkununnga stipendiaqartitsisoqartarpoq:
1)  Ilinniagaqarnissamut piareersaataasumik Kalaallit Nunaanni ilinniagaqartunut 18-it inorlugit ukiulinnut.
2)  Ilinniagaqarnissamut piareersaataasumik Kalaallit Nunaanni ilinniagaqartunut 18-ileereersimasunut.
3)  Kalaallit Nunaanni inuutissarsiummik ilinniagaqartunut sulisitsisumit aningaasarsiaqartinneqanngitsunut, tamatumani aamma sulisitsisup ilinniartumik soraarsitsinerani, soraarsitsineq ilinniartumut tutsinneqarsinnaanngippat, tak. imm. 2.
4)  Kalaallit Nunaanni ingerlaqqiffiusumik ilinniagaqartunut.
5)  Kalaallit Nunaata Danmarkillu avataanni ilinniarfinni ilinniagaqartunut.
6)  Ilinniagaqartunut 20-it inorlugit ukiulinnut Danmarkimi ilinniarnertuunngorniarfinni aamma inuutissarsiutinik ilinniarfinni ilinniagaqartunut.
7)  Ilinniagaqartunut Danmarkimi ilinniarnertuunngorniarfinni ilassutitut ilinniarnertuunngorniarfimmi ilinniartitsissutit ataasiakkaat, tak. § 15.
8)  Ilinniagaqartunut Danmarkimi inuutissarsiummik ilinniagaqartunut, tunngaviusumik ilinniakkamik ingerlatsereernermik kingorna, qaammatit marluk angullugit sivisussusilimmik sungiusarlutik sulilernissaminnik imaluunniit ilinniarfimmiuutigalutik sungiusarlutik sulilernissaminnik utaqqisunut.
9) Ilinniagaqartut Majoriami ilinniakkamik ingerlatsisut.
10)  Ilinniartunut Danmarkimi immikkut ittumik atugassarititaasut naapertorlugit ilinniartuusunut.
  Imm. 2.  Soraarsitsineq ilinniartumut tutsinneqarsinnaanngilaq, ima pisoqarpat:
1)  soraarsitsineq piviusorsiortumik tunngavilersugaanngippat, imaluunniit inatsisitigut tunngavissanik pingaaruteqartunik amigaateqarpat, imaluunniit
2)  soraarsitsineq sungiusarluni suliffiusup aningaasaqarnikkut atugaanik tunngaveqartinneqarpat, tamatumunnga ilanngullugu akiliisinnaajunnaarneq.
  Imm. 3.  Ilinniagaqartunut ilinniarnerminnut atatillugu akeqanngitsumik nerisaqartitaallutillu najugaqartitaasunut tamatumunnga akiliutit stidpendianiit ilanngaanneqartassapput, ilinniagaqartoq kollegiani najugaqanngippat 18-illu inorlugit ukioqanngippat.
  Imm. 4.  Kalaallit Nunaanni ilinniagaqarnissamut piareersaataasumik ilinniagaqartut, 18-it inorlugit ukiullit illoqarfigisap avataani kollegiani najugaqartut nerisaqarnissamulli periarfissaqanngitsut ullormulluunniit ataasiaannarlutik nerisaqartinneqarsinnaasut nerisassanut tapiiffigineqartarput.
  Imm. 5.  Ilinniagaqartoq imm. 1-imi pineqartut arlaanni allatut inissisimalerpat, stipendiap annertussusia piffissamit qinnuteqarfiusumiit allanngortinneqassaaq, taamaattoq siusinnerpaamik ulloq inissisimaffiup allanngorfia aallarnerfigalugu.


Meeqqanut tapit

 

  § 13.  Ilinniagaqartoq meeqqanut 18-it inorlugit ukiulinnut pilersuisussaatitaappat imaluunniit akilersuisussaatitaappat, meeqqanut ataasiakkaanut tamanut tapiissuteqartoqassaaq (meeqqanut tapit), ilinniagaqartoq Kalaallit Nunaanni Namminersorlutik Oqartussanit stipendianik pisartagaqarpat, taamaattoq tak. § 60. Tamanna aamma atuuppoq ilinniagaqartoq inuutissarsiummik ilinniagaqarnerminut atatillugu ilinniagaqarnermini akissarsiaqarpat, tamatumanilu sulisitsisua akissarsiaritinneqartunut tapiissutisiatut ilinniagaqarnersiutinik, Inuutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaat naapertorlugu, imaluunniit lærlinginik Kalaallit Nunaanni sungiusarlutik suliffeqartartunut Danmarkimilu ilinniarfimmiittartunut tunngatillugu pisartagaqarpat,
  Imm. 2  Meeraq Kalaallit Nunaanni najugaqarpat, akilersuutip nalinginnaasup assinganik tapiissuteqartoqassaaq. Meeraq Danmarkimi najugaqarpat Danmarkimi akilersuutip nalinginnaasup assinganik tapiissuteqartoqassaaq. Meeraq Kalaallit Nunaanni imaluunniit Danmarkimi najugaqanngippat, Kalaallit Nunaanni akilersuutip nalinginnaasup assinganik tapiissuteqartoqassaaq.
  Imm. 3.  Ilinniagaqartup meerai pisortanit tamakkiisumik pilersorneqarpata ilinniartumut meeqqanut tapiissuteqartoqassanngilaq.
  Imm. 4.  Ilinniagaqartup piffissani qiortakkanik atugaqannginnissamik aalajangiiffigisaani, ilinniagaqartumut meeqqanut tapiissuteqartitsisoqassanngilaq, tak. § 55.


Ilinniagaqarnermut akiliut misilitsinnermullu akiliut

 

§ 14.  Ilinniagaqarnermi akiliutit 75 %-iinik ukiumut tapiisoqartarpoq, ukiumut aningaasat qaffasinnerpaaffissaannut 80.000 kr.-inut, taamaattoq tak. imm. 4. Ukiumut ilinniagaqarnermut akiliutit qaffasinnerpaaffissaat 80.000 kr.-it qaangersimappatigit, taakkua avataanniittunut akiliutit 50 %-iinik tapiisoqarsinnaavoq, taamaattoq tak. imm. 3 aamma 4.
  Imm. 2.  Ilinniagaqarnermi akiliutinut imm. 1-imi pineqartunit tapiissutinit matuneqartanngitsunut tapiisoqarsinnaavoq ilinniagaqarnermi akiliutissamut attartukkanik qaffasinnerpaamik ukiumut 60.000 kr.-inik, taamaattoq tak. imm. 3 aamma 4.
  Imm. 3. Ilinniagaqartumut pineqartumut ukiumut qaffasinnerpaamik tapiissuteqartoqarsinnaavoq 100.000 kr.-inik ilinniagaqarnermut akiliummut matussutissanik.
  Imm. 4.  Tapiissuteqartoqassanngilaq imaluunniit ilinniagaqarnermi akiliummut attartortitsisoqassanani
1)  Ilinniagaqarnersiuteqarnermut Naalakkersuisoqarfiup aningaasaqarnikkut suliffeqarnikkullu nalilersuutit naapertorlugit nalilerpagu, ilinniagaq pineqartoq Kalaallit Nunaannut naleqqutinngitsoq, imaluunniit Kalaallit Nunaanni inuiaqatigiinnut ilinniakkatut appasinnerusumik naleqartuusoq, ilinniakkanut allanut tapiiffigineqarsinnaasunut Kalaallit Nunaanni Danmarkimiluunniit ersarissumik appasinnerusumik naleqartoq,
2)  ilinniagaqartoq qiortakkanik pineq ajorpat, imaluunniit
3)  ilinniagaqartoq siusinnerusukkut ilinniagaqarnermut akiliummut tapiissutinik tunineqarsimasoq ilinniakkamut allamut, ilinniagaq pissusissamisoortumik ilinniakkamut naammassisamut ilassutaanngippat.
  Imm. 5.  Ilinniakkami ilinniagaqarnersiuteqarfiusinnaasumi misilitsinnernut akiliutit tamakkiisumik akilerneqassapput, aningaasartuutit pisortanit allanit akilerneqanngippata.


Kapitali 4
Piumasaqaatit ilinniakkanut ataasiakkaanut tunngasut

 

Ilinniagaqarnissamut piareersarluni ilinniarnerit

 

  § 15.  Ilinniarnertuunngorniarfimmi ilassutaasumik ilinniarnerit aamma ilinniarnertuunngorniarfimmi ilinniartitsissutinik ataasiakkaanik ilinniarnerit, tak. ilinniartitsissutit ataasiakkaat, ilassutaasumik pikkorissarnerit namminerlu ilinniartut pillugit nalunaarut, ima pisoqarpat:
1)  ilinniartoq ilassutaasumik pikkorissarnissamik aamma ilinniarnertuunngorniarfimmi ilinniartitsissutini ataasiakkaani ilitsersuisumit ilitsersorneqarsimappat aamma
2)  ingerlatami agguaqatigiissillugu sapaatip-akunneranut lektionini 23-ni ilassutaasumik ilinniartoqarpat.
  Imm. 2.  Ilinniarnertuunngorniarfimmi ilassutaasumik ilinniarnerit imaluunniit ilinniarnertuunngorniarfimmi ilinniartitsissutit ataasiakkaat tapiiffigineqarsinnaanngillat, ilinniagaqartoq ilinniartitsissutini misilitsinnermi soraarummeernermiluunniit 7-skala malillugu 02-mik qaangerluguluunniit karakteereqareerpat, imaluunniit soraarummeernermi karakteeri E GGS-skala atorlugu, ilinniagassatut kissaatigisami ilinniartunngortinneqarnissamut qaffasinnerusumik karakteereqarnissaq qaffasissuserluunniit qaffasinnerusoq piumasaqaataanngippat.
  Imm. 3.  Ilassutaasumik pikkorissarnermi taamaallaat ilinniartitsissummut ataatsimut imaluunniit ilinniarnertuunngorniarfimmi ilinniartitsissutit ataasiakkaat ataasiaannarluni ilinniagaqarnersiuteqartitsisoqarsinnaavoq, ilinniartitsissutip siusinnerusukkut angusiffiusimannginnera apeqqutaatinnagu.
  Imm. 4.  Ilinniagaqarnersiuteqarnermut Naalakkersuisoqarfiup akuersineratigut ilinniagaqarnersiuteqartitsisoqarsinnaavoq immikkut aallarnisaalluni ingerlatsinernut, ilinniartitaanerup aallartinneranut atasumik aaqqissuunneqartumut, ilinniagaqartussamik ilinniakkamut piareersaanerusumut.

 

  § 16.  Ilinniagaqalernissamut piareersaataasumik ilinniakkamut ataasiinnarmut tapiisoqarsinnaavoq, taamaattoq tak. imm. 4 aamma § 15.
  Imm. 2.  Ilinniagaqalernissamut piareersaataasumik ilinniakkamut tapiisoqarsinnaanngilaq, ilinniartoq ingerlaqqiffiusumik ilinniakkamik naammassinnissimappat.
  Imm. 3.  Ilinniagaqarnersiuteqarnermut Naalakkersuisoqarfik imm. 1-ip sanioqqunneqarnissaanik akuerisinnaavoq, ilinniakkanut aalajangersimasunut Naalakkersuisoqarfimmit tamanut saqqummiunneqartunut naleqqiullugu.
  Imm. 4.  Imm. 1 atortinneqassanngilaq immikkut aallarnisaalluni ingerlatsinernut, ilinniartitaanerup aallartinneranut atasumik ingerlanneqartunut.

 

§ 17.  Ilinniagaqalernissamut piareersaataasumik ilinniartumut ilinniagaqarsiaqartitsisoqarsinnaanngilaq, ilinniartoq ilinniakkap aallartinneranut naleqqiullugu ukiuni kingullerni 5-ini ilinniagaqalernissamut piareersaataasumik ilinniagaq ataasiaannarani unitsissimappagu.
  Imm. 2.  Imm. 1 malillugu unitsitsinertut isigineqanngillat ilinniarnermik unitsitsigallarneq, tamatumunnga ilanngullugit erninermut atatillugu unitsitsigallarneq aamma uppernarsineqarsinnaasumik napparsimaneq pissutigalugu peqannginneq.
  Imm. 3.  Ilinniagaqarnersiuteqarnermut Naalakkersuisoqarfik imm. 1-ip sanioqqunneqarnissaanik akuersisinnaavoq, ilinniarfiup nalilerpagu, ilinniartup ilinniagaq qinnutigineqartoq naammassisinnaagaa, Ilinniagaqarnersiuteqarnermullu Naalakkersuisoqarfimmut sanioqqutitsinissaq inassutigalugu.


Inuutissarsiutinut ilinniartitaanerit

 

  § 18.  Ilinniagaq naammassisaq ataaseq sinnerlugu ilinniagaqarnersiuteqartitsisoqarsinnaanngilaq. Taamaattoq ilinniaqarnersiuteqartitsisoqarsinnaavoq ilinniakkamut allamut ataatsimut suliamik ilinniagaqarsimasutut nalilimmut imaappat:
1)  ilinniarneq siusinnerusukkut ilinniagarisimasamut pissusissamisuuginnartumik ilassutaappat, imaluunniit
2)  ilinniarneq tassaappat inuutissarsiorsinnaajunnaarneq pissutigalugu pisariaqartumik allamik ilinniaqqinneq.
  Imm. 2.  Ilinniartoq sivikitsumik inuutissarsiummik ilinniakkatut qaffasissusilimmik qaffasinnerusumiluunniit ilinniareersimasoq, sivikitsumik inuutissarsiummik ilinniakkami ilinniagaqarnersiaqarsinnaanngilaq.
  Imm. 3.  Ilinniagaqarnersiuteqartitsisoqarsinnaanngilaq inuussutissarsiutinut ilinniartitaanermut imaluunniit inuussutissarsiutinut ilinniakkamut sivikitsumut, ilinniagaqartoq ingerlaqqiffiusumik ilinniagaqareersimappat.
  Imm. 4.  Ilinniagaqarnersiuteqarnermut Naalakkersuisoqarfiup imm. 1 aamma 3 sanioqqunneqarnissaa akuersissutigisinnaavaa pissutsit immikkut ittut apeqqutaatillugit, tamatumunnga ilanngullugit:
1)  ilinniagaqarniartup suliffeqarnissamut periarfissai killeqarpata, imaluunniit
2)  ilinniakkami qinnuteqarfiusumi ilinniarsimasunik Kalaallit Nunaat immikkut ittumik pisariaqartitsippat.

 

  § 19.  Inuussutissarsiutinik ilinniartitaanermi ilinniartumut imaluunniit inuussutissarsiutinut ilinniakkamut sivikitsumut ilinniagaqarsiaqartitsisoqarsinnaanngilaq, ilinniartoq ilinniakkap aallartinneranut naleqqiullugu ukiuni kingullerni 5-ini ilinniagaq imaluunniit inuussutissarsiutinut ilinniagaq sivikitsoq ataasiaannarani unitsissimappagu.
  Imm. 2.  Taamaattoq imm. 1 naapertorlugu unitsitsinertut naatsorsuunneqanngillat sungiusarluni suliffissamik pissarsisimannginneq, tassunga ilanngullugit naartunermi ernereernermilu ilinnianngiffeqarallarneq uppernarsaateqarlunilu napparsimalluni peqannginneq pissutigalugit ilinniarnermik unitsitsigallarnerit.
  Imm. 3.  Ilinniarfiup inassutigippagu ilinniagaqartup ilinniagaq qinnutigisani naammassisinnaassagaa, Ilinniagaqarnersiuteqarnermut Naalakkersuisoqarfiup tamatumunnga qinnuteqartoqarnera naapertorlugu imm. 1-imik saneqqutsisinnaaneq akuersissuteqarfigisinnaavaa, pissutsit immikkut ittut tamanna aqqutissiuunneqarsinnaatippassuk, tamatumani aamma:
1)  ilinniartup suliffeqarnissamut periarfissai killeqarpata, imaluunniit
2)  Kalaallit Nunaat ilinniarniakkamut qinnuteqarfiusumut ilinniarsimasunik immikkut ittumik pisariaqartitsippat, imaluunniit
3)  unitsitsineq piffissap misiliinerup nalaani pippat.

Ingerlaqqiffiusumik ilinniarnerit

 

  § 20.  Qiortakkap iluani qiortakkanik katillugit 82-inik tunisisoqarsinnaavoq (killissarititaq), taamaattoq tak. §§ 25-28
  Imm. 2.  Ilinniagaqarnermut qiortakkamik aaqqissuussinermut ilaasumut annerpaamik killissarititap aammalu qiortakkat atoreersimasat assigiinngissusaata amerlaqataanik qiugassanik tunniussisoqarsinnaavoq.
  Imm. 3.  Ilinniagaqartoq ingerlaqqiffiusumik ilinniakkamik atuagarsornerup akissarsiaqaatigalugulu sungiusarluni sulinerup paarlakaaffigisaannik naammassisaqarsimasoq, qiortakkatigut killigisaminit ilanngaanneqassaaq, ilinniakkap sivisussusissaata nalinginik, piffissamik atuagarsornermik qaangiinerusimasinnaasumik ilallugit.
  Imm. 4.  Ilinniagaqartoq qiugassanik ilinniarnermi atuagarsornermut atugassatut naatsorsuussanik  ikinnerusunik atugaqarsimaguni, killissarititamini qiugassanik ilinniarnermut atugassat assinginik ilanngaavigineqassaaq, qiugassat atorneqanngitsut ilanngaallugit.
  Imm. 5.  Ingerlaqqiffiusumik ilinniakkamik unitsitsinermi taamaallaat qiugassanik tunniunneqareersimasunik killissarititaq ilanngaavigineqassaaq.

 

  § 21.  Ilinniakkanut ataasiakkaanut qiugassat tunniunneqassapput, qaammatit ilinniarnermut naatsorsuussat nalingi qiugassanik 12-inik ilallugit (piffissaq ilinniagaqarnersiuteqarfiusinnaasoq), taamaattoq tak. § 23, imm. 5 aamma §§ 24-26.
  Imm. 2.  Ilinniagaq bacheloritut aamma kandidatitut ilinniarnermik immikkoortoqarpat, piffissamut tapiiffigineqarsinnaasumut naleqqiullugu, ilinniakkatut marluttut immikkuullarissutut isigineqassaaq.
  Imm. 3.  Ingerlaqqiffiusumik ilinniakkami atuagarsornerup akissarsiaqarlunilu sungiusarluni sulinerup paarlakaaffigisaanni, piffissap tapiiffigineqarsinnaasup assingaa, piffissaq atuagarsornermut atugassatut naatsorsuussaq qaammatinut naatsorsorlugu, qiorsinernik 12-inik ilassusigaq.
  Imm. 4.  Siusinnerusukkut ilinniagarisimasaq pissutigalugu, ingerlaqqiffiusumik ilinniakkami kingusinnerusukkut aallartitami, piffissamik ilinniarfiusussamik sivikillisaasoqarsimappat, ilinniakkami aallartitami qiugassat ilanngarneqassapput, qaammatit ilinniarnerup sivikillineqarnerisa assinganik.

 

  § 22.  Ilinniakkani ataasiakkaani atuanngiffeqarnermi akiliunneqarluni angalasoqarsinnaavoq, angalanissamut atasumik akiliunneqarluni angalasinnaanissamut piumasaqaatit naammassineqarsimappata, tak. §§ 39-41.
  Imm. 2.  Akiliunneqarluni angalasoqarsinnaavoq, tak. § 39, aatsaat ilinniagaqartoq:
1)  piffissap qinnuteqarfigisap nalaani qiortakkanik pissarsisarpat, aamma
2)  akiliunneqarluni sulinngiffeqarluni angalanerup aallartinnerani minnerpaamik qiorsinernik arfineq-marlunnik sinneqarpat.
  Imm. 3.  Juullimi ilinniagaqanngiffeqarnermut atatillugu, tak. § 41, akiliunneqarluni aatsaat angalasoqarsinnaavoq ilinniagaqartoq:
1)  piffissami qinnuteqarfigisap nalaani qiortakkanik pissarsisarpat, aamma
2)  1. november ukiumi ilinniagaqarnersiuteqarfiusumi minnerpaamik qiorsinernik 7-inik tapiissutisiassaqarpat.

 

  § 23.  Killissarititaq, tak. § 20, imm. 1, naleqqiussinikkut annertusineqassaaq, piffissaq ilinniakkamut naatsorsuussaq, tamatumani bacheloritut kandidatitullu assingusunulluunniit ilinniakkanut tamarmiusumik piffissaliussat ilanngullugit, qaammatinik 60-inik sivisuneruppat. Ilinniakkamik taamatut ittumik ilinniartoq unitsitsippat qiugassat amerlinissaat atorunnaarsinneqassaaq.
  Imm. 2.  Ilinniagaqartup qiugassanik aalajangersimasunik piffissaq ilinniagaqarnersiuteqarfigisani sivitsorsimappagu, tak. § 20, imm. 1, taassuma assinganik qiugassanut killissarititaq sivitsorneqassaaq. Ilinniagaqartup ilinniakkani tapiiffigineqarsinnaanermigut sivitsugaq unitsippagu, killissarititap sivitsornerata assinganik qiugassat killiliussat ilanngarneqassapput. Ilinniagaqartup piffissaq tapiiffigineqarsinnaasoq ilinniarnerminik sivikillisaanneqarneq pissutigalugu sivikillisissimappagu, tak. § 21, imm. 4, killissarititaq annikillisinneqassanngilaq, tak. § 20, imm. 1.
  Imm. 3.  Ilinniagaqarnersiuteqarnermut Naalakkersuisoqarfiup tamanna pillugu qinnuteqartoqareerneratigut aalajangersinnaavaa, killissarititamik ilassutitut qiugassat amerlineqarnissaat, tak. § 20, imm. 1, uppernarsineqarsinnaasumik napparsimanerup imaluunniit pissutsit immikkut ittut allat ilinniagaqartumut namminermut tutsinneqarsinnaanngitsut nassatarisimappassuk, ilinniagaqartup ilinniakkaminik naammassinnissinnaannginnini pissutigalugu ilinniakkamut allamut nuuttariaqarnera. Ilinniagaqarnersiuteqarnermut Naalakkersuisoqarfiup aalajangissavaa qiugassanik qassinik killissarititaq ilaneqassanersoq.
  Imm. 4.  Ilinniagaqartoq ingerlaqqiffiusumik ilinniarnermut Naalagaaffiup ilinniagaqarnersiuteqartitsineranit stipendianik pissarsisimappat, killissarititaq, tak. § 20, imm. 1, qaammatinik SU-mit pissarsianik ilanngaavigineqassaaq.
  Imm. 5.  Ilinniagaqartoq ingerlaannarluni ilinniakkami nangitsiviusumi, qiortakkanik atuiffiusumi ilinniakkallu naammassisap pissusissamisuuginnartumik nanginnerisaani ingerlaqqittoq, ilinniakkamit naammasseqqammisaminit qiortakkat marluk tikillugit tunineqarsinnaavoq. Qiortakkat ilinniakkat marluk akornanni tunniunneqassappat, uterteqquneqarsinnaallutillu ilinniagaqartoq ilinniakkami nangitsiviusumi aallartinngippat.

 

  § 24.  Ilinniagaqartoq meerartaarnerminut imaluunniit qitornavissiartaarnerminut atatillugu ilinniagaqarnersiutiminut qiortakkamik tapiliussanik pisinnaatitaaffeqarpoq, tamatumani ilinniagaqartup meeraq najugaqatigippagu aammalu erninerminut atatillugu ilinniakkaminik unitsitsigallarsimanngikkuni, tak. imm. 5. Ilinniagaqartup ilinniarnermi naammassissutigisassaanik akissarsiaqarluni sungiusarluni sulinerani, ernineq qitornavissiartaarnerluunniit pippat, qiortakkamik immikkut tunniussisoqassanngilaq.
  Imm. 2.  Anaanaasoq qiortakkanik 7-inik ilassutinik pisinnaatitaavoq, 9-nut annertusineqarsinnaasunik marlulisoqarsimappat.
  Imm. 3.  Ataataasoq qiortakkanik 3-nik ilassutinik pisinnaatitaavoq, 4-nut annertusineqarsinnaasunik marlulisoqarsimappat.
  Imm. 4.  Ilinniagaqartoq erninermut atatillugu ilinniakkaminik unitsitsigallarnerup kingorna ilinniakkap ilusiligaanera pissutigalugu, malittarisassat ilinniakkamut atuuttut naapertorlugit ilinniakkamigut tamakkiisumik siuariartornissaminut periarfissaqarluni, ilinniakkaminut uteqqissinnaanngitsoq, ilinniarfiup inassuteqareerneratigut immikkut qiortakkanik tallimat angullugit tunineqarsinnaavoq, imm. 2-mi aamma 3-mi tapiliussat taaneqartut saniatigut piffissamut ilinniarfimmut atugassanik.
  Imm. 5.  Ilinniagaqartoq erninermut atatillugu ilinniakkaminik unitsitsigallartutut isigineqassaaq, erninermut atatillugu ilinniakkamik unitsitsigallarnermi nalaani ECTS-pointit 20-t tikillugit ilinniagaqaraluaruniluunniit.

 

  § 25.  Elite Sport Greenlandimit innersuunneqarlutik Ilinniagaqarnersiuteqarnermut Naalakkersuisoqarfimmit timersornermik immikkut piginnaanilittut imaluunniit timersortartutut piukkunnassuseqartutut akuerisaasut, ilinniarnerullu ingerlaneranik immikkut ittumik aaqqissuussamik Ilinniagaqarnersiuteqarnermut Naalakkersuisoqarfimmit akuerisaasumik ingerlataqartut, piffissamut tapisiaqarfiusumut ilassutinik qiortakkanik immikkut tunineqarsinnaapput.
  Imm. 2.  Ilinniarnerup immikkut ittumik aaqqissuussap sivisussusissaatut ilimagineqartoq tunngavigalugu immikkut qiortakkanik qanoq amerlatigisunik tunisisoqarnissaa Ilinniagaqarnersiuteqarnermut Naalakkersuisoqarfiup aalajangiiffigissavaa.

 

  § 26.  Ilinniagaqartoq aqqutissiuisumut, tak. § 5, imaluunniit ilinniarfimmut qinnuteqareernermi kingorna, qiortakkanik 12-t angullugit immikkut tunineqarsinnaavoq, ilinniagaqartoq ilinniakkamini kinguaattoorsimappat, makkuninnga uppernarsarneqarsinnaasunik pissuteqarluni:
1)  ilinniarfiup aqutsisoqarfiani, ilinniagaqartut siunnersuisoqatigiivini ilinniarfimmullu atasumik kattuffinnut assingusunut peqataaneq, imaluunniit
2)  nammineq napparsimaneq imaluunniit qaniginerpaasat napparsimanerat toquneralluunniit.
  Imm. 2.  Kinguaattoorneq ilinniagaqarnersiuteqarnerup nalaani pisimassaaq. Immikkut qiortakkat amerlassusaasa ilinniagaqartup ilinniarnermini qaammatit kinguaattoorfigisai amerlaqatigissavaat.

 

  § 27.  Ilinniagaqartoq qiortakkat pinnginnissaanik qinigaqarsinnaavoq, tak. § 55. Qiortakkat pinnginnissaanik toqqaaneq, killissarititamik imaluunniit piffissamik tapiissuteqarfimmik allannguinermik nassataqassanngilaq.


Timersornermik immikkut piginnaanilinnut timersortartutullu piukkunnassuseqartunut ilinniartitsinerit immikkut aaqqissuussat

 

  § 28.  Timersornermik immikkut piginnaanillit timersortartutullu piukkunnassuseqartut ilinniartitsinerni immikkut aaqqissuussani ilinniagaqarnersiuteqarsinnaapput, timersornermik immikkut piginnaanillit timersortartutullu piukkunnassuseqartut, timersornertik pissutigalugu ilinniakkanik tapiiffigineqarsinnaasunik naammassinninnissamut periarfissaqanngippata.
  Imm. 2.  Timersornermik immikkut piginnaanillip timersortartutulluunniit piukkunnassuseqartup ilinniarnini katitissavaa, timersorneq ilinniarnerlu katillutik piffissaq tamaat ilinniarnertut annertussuseqartillugit. Ingerlatsineq Elite Sport Greenlandimiit inassuteqaateqartoqareerneratigut Ilinniagaqarnersiuteqarnermut Naalakkersuisoqarfimmit akuerineqassaaq.


Kapitali 5
Stipendiat meeqqanullu tapit naatsorsorneqartarnerat akilerneqartarnerallu

 

  § 29.  Ilinniakkanut qiortakkanut ilaanngitsunut stipendiat meeqqanullu tapit qaammatikkaartumik naatsorsorneqartarput. Ilinniarnerup aallartinnerani, naammassinerani, unitsinnerani aamma unitsikkallarnerani stipendiat meeqqanullu tapit ullut ilinniarfigisat ataasiakkaarlugit naatsorsorneqartarput. Ullup killiliussap  aalajangiunnerani pisariaqartumik piffissat angalaffiit akunniffiillu ilanngunneqarsinnaapput. Ilinniarfimmik sungiusarlunilu suliffimmik paarlaanermi, ilinniarfimmiinnermi ullut ilinniartitsiffiusut ataasiakkaarlugit stipendiat naatsorsorneqartarput.
  Imm. 2.  Stipendiat aamma meeqqanut tapit tunniunneqartarput, ullormit allakkatigut qinnuteqaatip tiguneqarfianit. Meeraq piffissap tapisiaqarfiup nalaani inunngorpat, meeqqanut tapit piffissamit inunngorfiusumit tunniunneqassapput, ilinniagaqartoq meeqqap inunngornerata kingorna qaammatit marluk qaangiutsinnagit meeqqanut tapinik qinnuteqarpat.
  Imm. 3.  Stipendiat meeqqanullu tapit qaammatikkaartumik siumoortumik tunniunneqartarput, qaammammiillu qinnuteqaatip tiguneqarfianiit siusinnerpaamik aallartissinnaallutik, ilinniagaqartup nalunaarummi ilinniagaqarnersiuteqarnissamut piumasaqaatit eqquutissimappagit.
  Imm. 4.  Stipendianik aamma meeqqanut tapit tunniunneqartarunnaassapput ilinniagaqartoq ilinniarnerminik ingerlatsiunnaarpat taamaalillunilu ilinniagaqarnersiuteqarsinnaajunnaarluni. Akiliisarneq aallarteqqinneqassaaq piffissamit ilinniagaqartup ilinniarnerminik ingerlatseqqilerfianit.
  Imm. 5.  Ilinniagaqartup takkutinngitsoornerata malitsigisaanik stipendiat meeqqanullu tapit annikillisarneqarsinnaanngillat, tak. taamaattoq imm. 6.
  Imm. 6.  Ilinniakkamik Majoriami ingerlatsinermi kommunalbestyrelsip ilinniarnermut tapiissutit ilanngaavigissavai, tak. imm. 7, takkuttannginnermi imaluunniit inortuisarnermi takkuffissaasumut ilinniartitsinermi, imaluunniit isumaqatigiissutaasutut sungiusaammik ingerlatsinissami, tamanna ilinniarfimmit akuerisaasumik pisimanngippat.
  Imm. 7.  Imm. 6-imi eqqaaneqartoq stipendianik ilanngaaneq, tak. § 12, imm. 1, nr. 9 naatsorsorneqassaaq qaammammut agguaqatigiissillugit nal. ak. 173,3 atorlugit, ilinniagaqarnersiutit annertussusissaat naapertorlugit naatsorsorneqartumik. Nalunaaquttap akunneranut annertussusissaq tamatuma kingorna agguarneqassaaq § 12, imm. 1, nr. 9-mi aalajangersagaq naapertorlugu 173,3-mik agguaalluni.

 

§ 30.  Ilinniagaqartoq ilinniarnermi aallartinnerani ilinniarnerullu nalaani qiortakkanik pisinnaatinneqassaaq, ilinniagaqartoq qaammatip akiliiffiusussap ulluisa 15-iat killigalugu ilinniarnerminik ingerlatsippat. Ilinniarnerup aallartinnerani ilinniagaqartut, qaammatip akiliiffiusup 15-iata kingorna ilinniarnerminnik ingerlatsilersut, tamanna pillugu allakkatigut qinnuteqareernermikkut qiugassaq ataaseq siuartissinnaavaat, taannalu ilutigisaanik killissarititaasumit piffissamillu ilinniarfimmit ilanngaanneqassaaq. Ilinniagaqartup ilinniarnerup aallartinnerani naammassineranilu ilinniarnerminik ingerlatsinera aalajangiunneqassatillugu, pisariaqartumik angalanissat akunninnerillu ilanngullugit naatsorsuutigineqassapput, tamatumunnga ilanngullugit ilinniarnerup aallartinneranut atasumik ilisarititsissutinik ingerlatsinerit.
  Imm. 2.  Qiortakkat qaammatikkaartumik siumoortumik akilerneqartarput, siusinnerpaamillu ilinnigaqarnersiuteqarnissamik qinnuteqaammik qaammammi tigusiffimmit aallartinneqartarlutik, ilinniagaqartup nalunaarummi ilinniagaqarnersiuteqarnissamut piumasaqaatit eqquutissimappagit. Taamaattoq meeqqanut tapit ernisoqarneraniit tunniunneqarsinnaapput, ilinniartoq ernereernermi kingorna qaammatit marluk qaangiutsinnagit meeqqamut tapinik qinnuteqarsimappat.
  Imm. 3.  Ilinniagaqartup piffissamit ilinniarnerminik ingerlatsiunnaarfianiit, taamaalillunilu ilinniagaqarnersiuteqarnissamik pisinnaatitaaffeerunneraniit qiortakkat tunniunneqartarunnaassapput. Piffissaq taanna qaammatip ulluisa 15-iata kingornaniippat, qiortakkanik akiliisarneq qaammammit tullermit atuutilersumik unitsinneqassaaq.
  Imm. 4.  Ilinniagaqartup piffissamit ilinniagaqaqqilerfianiit qiortakkanik akiliisarneq aallarteqqinneqassaaq. Piffissaq taanna qaammatip ulluisa 15-iata kingornaniippat, qiortakkanik akiliisarneq aatsaat qaammatip tullianiit atuutilissaaq.
  Imm. 5.  Ilinniagaqartup takkutinngitsoornerata malitsigisaanik stipendiat meeqqanullu tapiujunnartut qiortakkatut naleqartut annikillisarneqarsinnaanngillat.


Kapitali 6
Immikkut tapiissutit

 

Ineqarneq

 

  § 31.  Ilinniarnerup aallartinneranut, unitsinneranut imaluunniit naammassineranut atatillugu, pissutsit immikkut illuinnartut atuutsillugit, qinnuteqareernikkut ilinniagaqartup sapaatip-akunneri pingasut tikillugit ineqarallarnermut aningaasartuutit tamakkiisumik ilaannakortumilluunniit akilerallartissinnaavai, tassunga ilanngullugit:
1) angallannermi pissutsit tunngavigalugit ineqarallartariaqarneq pisariaqarpat, imaluunniit
2) ilinniartup nammineq inissarsiornera, imaluunniit ineqartuaannarnera imaluunniit allatut ineqarniarnera pissutsit ilinniartup pisuussutiginngisai pissutigalugit iluatsissimanngippat.
  Imm. 2.  Akiliussigallarnermut aningaasartuutit nunatta karsianit aningaasalersorneqartumik ilinniarnermi taarsigassarsianngortinneqassapput, taakkulu ilinniagaqarnersiutit pillugit Inatsisartut inatsisaanni kapitali 5-imi maleruagassatut aalajangiussat naapertorlugit ernialersorlugillu utertillugit akilersorneqassapput.

 

  § 32.  Ilinniagaqartut Kalaallit Nunaanni Danmarkimiluunniit ilinniarfimmiittut imaluunniit sungiusarlutik sulisut, qinnuteqareernermikkut ilinniarfimmiinnerminni imaluunniit sungiusarlutik sulinerminni ineqarnermut qaammammut tapiiffigineqassapput ilinniartut ineqarfiini akigitinneqartumut naapertuuttumut , ima pisoqartillugu:
1)  ilinniarfimmiinneq imaluunniit sungiusarluni sulineq qaammatit arfinillit ataallugit sivisussuseqarpat,
2)  ilinniagaqartup ineqarnermut aningaasartuutini uppernarsarsinnaappagit, aamma
3)  ilinniagaqartoq Kalaallit Nunaanni najugaqarfimmini angerlarsimaffimmik namminerisaminik pilersitsisimallunilu ataavartitsippat, najugaqarnermut uppernarsaammik aamma attartornissamut isumaqatigiissummik akuerisaasumik, piginneqataanermut uppernarsaammik imaluunniit illumik piginnittuunermut uppernarsaammik uppernarsaaserneqartumik. Namminerisamik angerlarsimaffik angajoqqaat najugaqarfiannit immikkuussaaq, aningaasaqarnikkullu namminersortuussalluni.

 

Akiliunneqarluni angalanerit

 

 § 33.  Ukununnga atatillugu akiliunneqarluni angalasoqarsinnaavoq:
1)  ilinniagaqarnerup aallartinnerani, unitsinnerani, unitsinneqarallarnerani naammassineraniluunniit, tak. §§ 35 aamma 37,
2)  ernereernerup kingorna ilinniagaqarnermik unitsitsigallarnermi, tak. § 38,
3)  sulinngiffeqarneq, tak. §§ 39-40,
4)  juullimi atuanngiffeqarneq, tak. § 41,
5)  ilinniakkamut attuumassuteqartumik najugaqarneq il.il. tak. § 42,
6)  pinartumik napparsimasoqarnera toqusoqarneralu, tak. § 43,
7)  soraarummeeqqinneq imaluunniit napparsimareernermi soraarummeerneq, tak. § 36 aamma
8) atuanngiffeqarallarneq ilinniagaqartup uppernarsarneqarsinnaasumik annertuumik Nappaateqarnerani, tak. § 35, imm. 3.
  Imm. 2.  Angalanermik akiliussisoqassanngilaq ilinniagaqartoq suliffimmini suliunnaarluni imaluunniit suliffissamini sulilissalluni sulisitsisumit akiliunneqarluni angalassappat.
  Imm. 3.  Aapparisat akiliunneqarlutik angalasinnaanngillat, tak. § 6, § 37, kisianni imm. 3-mi aamma § 41, imm. 3-mi 4-milu pisut taaneqartut eqqaassanngikkaanni.

 

  § 34.  Angallassinermut periarfissat sapinngisamik akikinnerpaat atorneqarneranni bilitsimut unnuinernullu aningaasartuutit akiliunneqarluni angalanernut ilaapput.
  Imm. 2.  Bilitsinik utertinneqarsinnaanngitsunik atuinngitsoqarsimatillugu, ilinniagaqartunut 18-it sinnerlugit ukiulinnut ilinniarnermut taarsigassarsisitsisoqarsinnaavoq, tak. § 51, imm. 4, bilitsimik taartissamik pisinissamut aamma pisariaqartumik unnuinerni aningaasartuutinut, taarsiullugu bilitsip atorneqarsinnaalernissaata tungaanut. Ilinniarnermut taarsigassarsiat ernialersorneqarlutillu akilerneqassapput ilinniagaqarnersiutit pillugit Inatsisartut inatsisaanni kapitali 5-imi maleruagassat malillugit.
  Imm. 3.  Aqqut alla atorlugu angalasoqarsimappat, annerpaamik angallassinermut akikinnerpaamut akiusup nalinganut aningaasartuutit matussuserneqassapput.
  Imm. 4.  Bilitsinik allannguinerni aningaasartuutit matussuserneqassanngillat.
  Imm. 5.  Ilitsersuisup aqqutit akikinnerpaat qularnaarnissaat siunertaralugu, piffissatut angallavissatut kissaatigineqartoq, ullunik pingasunik sioqqullugu kingoqqulluguluunniit ullormik aallarfissamik inaarutaasumik aalajangiisinnaavoq, taamaattorli ilinniagaqartoq ilinniarnerup aallartinneranut atatillugu angalanermini, ilinniarnerup aallartinnerani illoqarfimmi ilinniarfissaminiittussanngorlugu.

 

  § 35.  Ilinniagaqarnissap aallartinneranut atatillugu, aalajangersimasumik najugaqarfiup aamma illoqarfimmut ilinniarfissamut naleqqiullugu mittarfiup, umiarsualiviup imaluunniit qimuttuitsut unittarfiata qaninnerup akornanni angalaneq akilerneqassaaq. Ilinniagaq naammasseqqammisaq nangiinnarlugu ilinniakkamik allamik aallartitsinermi, Kalaallit Nunaanni aalajangersimasumik kingullertut angerlarsimaffigisap aamma illoqarfiup ilinniarfiusup qaninnerpaamik timmisartoqarfiata, umiarsualiviata imaluunniit qimuttuitsut unittarfiata akornanni aqqummut akiliunneqarluni angalasoqassaaq, pisattanik assartuinertaqanngitsumik, ilinniagaqarniartoq illoqarfimmi ilinniarfiusimi aalajangersimasumik najukkani attatiinnaraluarpaguluunniit.
  Imm. 2.  Ilinniagaqarnerup naammassineranut atatillugu illoqarfimmut ilinniarfigisamut naleqqiullugu mittarfiup, umiarsualiviup imaluunniit qimuttuitsut unittarfiata qaninnerup akornanni angalaneq akilerneqassaaq aamma ilinniarnerup aallartinnginnerani Kalaallit Nunaanni aalajangersimasumik najugaqarfigisap akornanni angalaneq akilerneqassaaq. Naammassinermiit kingusinnerpaamik ukiup ataatsip qaangiunnerani angalasoqareersimassaaq.
  Imm. 3.  Ilinniagaqarnermik unitsitsinermi unitsitsigallarnermiluunniit, tassunga ilanngullugu atuanngiffeqarallarneq ilinniagaqartup uppernarsarneqarsinnaasumik annertuumik nappaateqarnerani, illoqarfimmut ilinniarfiusumut naleqqiullugu timmisartoqarfiup, umiarsualiviup imaluunniit qimuttuitsut unittarfiata qaninnerpaap aamma ilinniagaqarnerup aallartinnerani Kalaallit Nunaanni kingullermik aalajangersimasumik angerlarsimaffiup akornanni akiliunneqarluni angalasoqassaaq, ilinniagaqarnerup aallartinneranut atatillugu illoqarfimmut ilinniagaqarfimmut akiliunneqarluni angalanissaq akuerineqarsimappat. Ilinniarnerup unitsinnerata unitsikkallarnerataluunniit kingorna kingusinnerpaamik ukioq ataaseq qaangiuppat angalasoqassaaq. Ilinniagaqartoq ilinniagaqalernissamut piareersaataasumik ilinniakkap, ilinniarnertuunngorniarfimmi ilassutaasumik ilinniarnerup, inuutissarsiummik ilinniakkap imaluunniit bacheloritut ilinniarnerup unitsinnerani naammassineraniluunniit Kalaallit Nunaanni aalajangersimasumik najugaqarfimminut kingullermut akiliunneqarluni angalasinnaatitaasup, Kalaallit Nunaanni aalajangersimasumik najugaqarfimminut kingullermut akiliunneqarluni  angalasinnaatitaanini attatiinnassavaa, ilinniagaqartoq ilinniakkamik unitsitsinermi naammassinninnermiluunniit kingorna kingusinnerpaamik qaammatit 15-it qaangiunneranni ilinniakkamik nutaamik ilinniagaqarnersiuteqarfiusinnaasumik aallartitsiguni.
  Imm. 4.  Ilinniarfinni assigiinngitsuniinnermut, ilinniarfimmiillunilu sungiusarluni sulinernut aamma  sungiusarluni suliffiit assigiinngitsut paarlaannerinut atatillugu akiliunneqarluni angalasoqarsinnaavoq, ilinniarnerup aaqqissuunnerata tamanna pisariaqalersippagu, nikinnissarlu aqqutissiuisumit allakkatigut akuerineqarsimappat.
  Imm. 5.  Kalaallit Nunaanni sumiiffimmut ilinniagaqartup ornitassarinngikkaluagaanut akiliunneqarluni angalasoqarsinnaavoq, ornitassamut allamukarnerani aningaasartuutit ornitassavimmut naleqqiullugu aningaasartuutaasussanit annertunerunngippata.
  Imm. 6.  Ilinniagaqarnersiuteqarnermut Naalakkersuisoqarfiup qinnuteqaat tunngavigalugu imm. 2-mi naggammi siullermi aamma imm. 3-mi ornitassap allanngortinnissaa akuersissutigisinnaavaa, pissutsit immikkut ittut atuutsillugit, tamatumunnga ilanngullugit ilinniarnerup naammassinerani unitsinneraniluunniit angerlamut angalanissaq sioqqullugu uppernarsarneqarsinnaappat, ilinniagaqartoq illoqarfimmi akiliunneqarluni orninneqarniartumi atorfininnissaminik isumaqatigiissuteqarsimasoq, imaluunniit ilinniagaqartup ilaqutai qaninnerit illoqarfimmut allamut nuussimappata.

 

§ 36.  Ilinniagaqartoq Ilinniagaqarnersiuteqarnermut Naalakkersuisoqarfimmut tamanna pillugu qinnuteqareernermigut akiliunneqarluni angalanissamik akuerineqarsinnaavoq, siumut utimullu angalanissamut, illoqarfiup Kalaallit Nunaanni Danmarkimiluunniit ilinniarfiusup aamma Kalaallit Nunaanni illoqarfiup aalajangersimasumik najugaqarfiup akornanni, tak. § 39, imm. 1, soraarummeeqqinnissamut imaluunniit napparsimaneq pissutigalugu soraarummeernissamut atatillugu, imaappat:
1)  soraarummeeqqinnissaq imaluunniit napparsimaneq pissutigalugu soraarummeernissaq, ilinniagaqartup § 35, imm. 2, § 35, imm. 4 imaluunniit § 39, imm. 1 naapertorlugit akiliunneqarluni angalanini pissutigalugu, illoqarfimmi ilinniarfigisaminiinnginnerata nalaani pissappat – akiliunneqarluni angalanissani atoruniuk aamma
2)  soraarummeeqqinnissamut imaluunniit napparsimaneq pissutigalugu soraarummeernissamut pisussaaffik, ilinniagaqartup aatsaat paasisimappagu, § 35, imm. 2, § 35, imm. 4 imaluunniit § 39, imm. 1 naapertorlugit akiliunneqarluni angalanissap inniminnerneqareernerata kingorna.
  Imm. 2.  Qaammatit pingasut iluanni imm. 1 naapertorlugu akiliunneqarluni angalanissaq taamaallaat ataaseq akuereqqinneqarsinnaavoq.

 

  § 37.  Ilinniarnerup aallartinneranut, unitsinneranut, unitsikkallarneranut imaluunniit naammassineranut atatillugu ilinniagaqartumut ilinniarnerup ingerlanerani angalanermik akiliussisoqartillugu meeqqanut 18-it inorlugit ukiulinnut akiliussisoqarsinnaavoq, taamaattoq tak. imm. 4, tamatumani:
1)  meeraq ilinniagaqartumi najugaqarpat,
2)  meeraq ilinniagaqartup nammineq qitornarippagu, imaluunniit ilinniagaqartup aapparisaata qitornarippagu, tak. § 6,
3)  ilinniarneq imaluunniit ilinniarfimmiinneq minnerpaamik qaammatinik qulinik sivisussuseqarpat, taamaattoq tak. imm. 2, oqaaseqatigiit aappaat, aamma
4)  ilaqutariinnik inissami naapertuuttumi inissiisoqarnera uppernarsaasoqarsinnaappat.
  Imm. 2.  Ilinniarneq imaluunniit ilinniarfimmiinneq qaammatit qulit inorlugit sivisussuseqarpat, meeqqat angalanermut akiliunneqarsinnaanngillat. Ilinniagaqarnersiuteqarnermut Naalakkersuisoqarfik qinnuteqartoqareerneratigut pissutsillu immikkut illuinnartut atuutsillugit tamatuma sanioqqunneqarnissaanik akuersissuteqarsinnaavoq, tamatumunnga ilanngullugit meeqqap ukiuisa (0-imiit 6-imut), ineqarnermi atugarisat meeqqallu paarineqarnissaanut periarfissat tamanna tapersernartippassuk.
  Imm. 3.  Ilinniagaqartup aapparisaa, tak. § 6, angalanermut akiliunneqassaaq meeqqat akiliunneqarlutik angalanissaat imm. 1 najoqqutaralugu akuerineqarsimappat.
  Imm. 4.  Ilinniagaqarnerup naammassineranut, unitsinneqarneranut imaluunniit unitsikkallarneqarneranut atatillugu, meeqqat akiliunneqarlutik angalanissamut akuerisaasimasut ilinniarnerullu naammassinerani unitsinneraniluunniit 18-inik ukioqalereersimasut, akiliunneqassapput.

 

  § 38.  Naartunermi ernereernermilu ilinniarnerup unitsikkallarnerani ilinniagaqartup ilaqutaasa qaninnerit najugaqarfiannut siumut utimullu Kalaallit Nunaanni akiliunneqarluni angalasoqarsinnaavoq, tak. § 7.

 

§ 39.  Ukiup ilinniarfiusup iluani sulinngiffeqarnermut atatillugu angalanermut akiliutsittoqarsinnaavoq, illoqarfiup ilinniarfigisap aamma Kalaallit Nunaanni nammineq qitornat aalajangersimasumik najugaqarfiata akornanni siumut utimullu angalaneq imaluunniit ilinniagaqartup imaluunniit ilinniagaqartup angajoqqaavisa toqukkut qimagussimanngitsut Kalaallit Nunaanni aalajangersimasumik najugaqarfiannut siumut utimullu angalaneq, ilinniagaqartoq ilinniarnerup aallartinnerani akiliunneqarluni angalanissaminut akuerisaasimappat, taamaattoq tak. imm. 2 aamma 3. Akiliunneqarluni angalasinnaatitaaneq atuutissanngilaq, ilinniagaq qaammatit 12-it iluanni naammassineqassappat. Utimut angalaneq kingusinnerpaamik pissaaq ilinniakkami semesterip aallartinnerani.
  Imm. 2.  Akiliunneqarluni angalasinnaatitaaneq ilinniakkat nikinneranni attatiinnarneqassaaq, allamik ilinniagaqalerneq ilinniarfigileqqaakkap unitsinneraniit naammassineraniilluunniit qaammatit 15-it iluanni pisimappat, ilinnialeqqaakkamullu atatillugu akiliunneqarluni angalanissaq akuerineqarsimappat. Tamanna atuutissanngilaq ilinniagaq qaammatit 12-it iluanni naammassissappat.
  Imm. 3.  Akiliunneqarluni angalasoqarsinnaavoq, ilinniarnerup aallartinnerani akiliunneqarluni angalanissaq akuerineqarsimanngikkaluarpalluunniit, tak. imm. 1, naggat siulleq, makku uppernarsineqarsinnaappata:
1)  Kalaallit Nunaanni aalajangersimasumik najugaqarfigisamit kingullermit nuunneq, ilinniagaqartoq suli 18-inik ukioqalersinnagu pisimasoq,
2)  nuunnermut ilinniarnermi paaqqutarineqarnermiluunniit pissutsit tunngaviuppata,
3)  nuunneq aapparisap, tak. § 6, Kalaallit Nunaata avataani ilinniarneranik peqquteqarpat, tassungalu atatillugu aapparisaq akiliunneqarluni angalanissaminik akuerisaasimappat, imaluunniit
4)  ilinniagaqartoq akiliunneqarluni illoqarfimmut ilinniarfiusumut angalasimaguni ilinniakkap aallartinneranut atatillugu, aammalu ilinniarnerup naammassineraniit unitsinneraniilluunniit qaammatit 3-t iluanni illoqarfimmi ilinniagaqarfigisamini ilinniakkamik nutaamik aallartitsisimaguni.
  Imm. 4.  Imm. 1 aamma 2 naapertorlugit akiliunneqarluni angalaneq siusinnerpaamik pisinnaavoq ilinniarnerup aallartinneraniit qaammatit 9 qaangiunneranni. Ilinniagaq piffissami 1. novemberimiit 31. januaarimi aallartinneqarsimappat, akuliunneqarluni angalaneq siusinnerpaamik pisinnaavoq ilinniarnerup aallartinneraniit qaammatit 5 qaangiunneranni.
  Imm. 5.  Imm. 1 naapertorlugu akiliunneqarluni angalaneq Kalaallit Nunaanni sumiiffimmut allamut pisinnaavoq, angalanermut aningaasartuutit aalajangersimasumik najugaqarfimmut kingullermut angalanissamit akisunerunngippat.
  Imm. 6.  Imm. 1 aamma 2 naapertorlugit siumut utimullu angalaneq akilerneqassaaq qitornanut 18-it inorlugit ukiulinnut ilinniartumi najugaqartunut, ilinniartullu pilersuisutut pisussaaffigisaanut.
  Imm. 7.  Bilitsit angalanissaq kingusinnerpaamik sapaatip-akunneri sisamat sioqqullugit inniminnerneqassapput. Kingusinnerusukkut inniminniinermi aningaasartuutit annertuseriaatigisinnaasaat matussuserneqassanngillat.

 

  § 40.  Ilinniagaqartut ilinniaqqinnissamut piareersaataasumik ilinniarnermik, ilinniarnertuunngorniarluni ilassutitut ilinniarnermik imaluunniit bacheloritut ilinniarnermik naammassineranut atatillugu Kalaallit Nunaanni aalajangersimasumik kingullertut angerlarsimaffigisamut akiliunneqarlutik angalasinnaatitaasut, tak. § 35, imm. 2, aamma Kalaallit Nunaanni aalajangersimasumik kingullertut angerlarsimaffigisap illoqarfimmut ilinniarfiusumut naleqqiullugu timmisartoqarfiup, umiarsualiviup imaluunniit qimuttuitsut unittarfiata qaninnerpaap akornanni angalanermut akiliunneqarsinnaatitaasut, ilinniarnerminnik naammassisaminnut atatillugu ilinniarnermik nutaamik ingerlaqqillutik sivitsuisut, tak. § 35, imm. 1, naggatit aappaat, angalanernik pineqartunik nuussisinnaapput, § 39, malillugu siumut utimullu angalanissanngorlugu.
  Imm. 2.  Nuussinermik nalunaaruteqartoqassaaq, tak. imm. 1, siumut-utimullu angalanissaq kingusinnerpaamik qaammatinik pingasunik sioqqullugu.

 

  § 41.  Ilinniagaqartumut, qitornanut najugaqatiginngisaminut angajoqqaatut oqartussaassuseqartumut, meeqqat arlaata Kalaallit Nunaanni najugaata aalajangersimasup illoqarfiullu ilinniarfigisap akornanni juullimut siumut utimullu angalatitsisoqarsinnaavoq. Tamannali atuutissanngilaq ilinniagaqartup meeraq ilinniagaqarfiusumut ukiumi ilinniarfiusumi tassani ilagisimappagu, imaluunniit ilinniagaqartup ilinniarnini qaammatisiutit malillugit ukiup tulliani 1. marts nallertinnagu naammassinissaa ilimagineqarpat.
  Imm. 2.  Meeqqat, aappaasoq pinnagu, tak. § 6, illoqarfimmut ilinniarfigisamut ilagineqarsimappata, ilinniagaqartoq meeqqallu siumut utimullu angalanissamut akiliunneqassapput, aappaasoq aamma meeqqat ilaannut minnerpaamik ataatsimut angajoqqaatut oqartussaassuseqarpat. Illoqarfiup ilinniarfigisap aammalu aappaasup aalajangersimasumik Kalaallit Nunaanni najugaata akornanni siumut utimullu angalanermut akiliussisoqassaaq.
  Imm. 3.  Illoqarfik ilinniarfigisaq Kalaallit Nunaanniippat, imm. 2 malillugu angalanermut taarsiullugu, aappaasoq meeqqallu ilinniartup angajoqqaatut oqartussaaffigisai, illoqarfimmut ilinniarfigisamut siumut utimullu angalanissamut akiliunneqarsinnaapput. Imm. 2 naapertorlugu angalanermut akiliunneqarsinnaasumut naleqqiullugu aningaasartuutit annertuseriaatigisinnaasaat matussuserneqassanngillat.
  Imm. 4.  Illoqarfik ilinniarfigisaq Kalaallit Nunaata avataaniippat, tassunga Danmarki ilanngullugu, imm. 2 malillugu angalanermut taarsiullugu, aappaasoq, tak. § 6, meeqqallu ilinniartup angajoqqaatut oqartussaaffigisai, illoqarfimmut ilinniarfigisamut siumut utimullu angalanissamut akiliunneqarsinnaapput, ilinniagaqarnermi pissutsit immikkut ittut tassani atuuppata, tassunga ilanngullugit soraarummeernerit aamma immikkut sammisamik suliaqarneq. Imm. 2 naapertorlugu angalanermut akiliunneqarsinnaasumut naleqqiullugu aningaasartuutit annertunerulersimappata matussuserneqassanngillat.
  Imm. 5.  Illoqarfimmi ilinniarfimmiinneq qaammatinik qulinik sivikinneruppat imm. 1-4 malillugit angalanermut akiliussisoqarsinnaanngilaq.
  Imm. 6.  Bilitsit aallarnissaq kingusinnerpaamik sapaatip-akunnerinik sisamanik sioqqullugu inniminnerneqassapput. Kingusinnerusukkut inniminniisoqarneratigut aningaasartuutaanerusinnaasut matussuserneqassanngillat.

 

  § 42.  Ilinniarfimmit imaluunniit aqqutissiuisumit inassuteqartoqareerneratigut qinnuteqartoqareerneratigullu Ilinniagaqarnersiuteqarnermut Naalakkersuisoqarfik, ilinniagaqartumik ilinniagaqarnersiuteqartitsisinnaavoq, tamatumunnga ilanngullugit angalanermut aningaasartuutit pisariaqartut tamakkiisumik matussusernissaat aamma pisariaqartumik akunninnerni aningaasartuutinut tapiissutit, tak. imm. 2-5 makkununnga atatillugu:
1)  pinngitsoorani suliassanut ilutsit ungasissumiit atuartitsinerni,
2)  ingerlaqqiffiusumik ilinniakkani immikkut pinngitsoorani suliassat suliassallu pingaarnerit, pinngitsoorani ilinniakkap aaqqissugaanerani nalunaarsorneqartut suliarinerat imaluunniit immikkut suliaq suliarluunniit pingaarneq ilinniakkamut pineqartumut naleqqiullugu immikkut naleqartinneqarpat,
3)  ilinniakkamut naapertuuttumik sungiusarluni sulinerit qaammat ataaseq sinnerlugu sivisussuseqartut,
4)  ilinniakkamut naapertuuttumik ilinniarfimmi allamiinnerit qaammat ataaseq sinnerlugu sivisussuseqartut, ilinniarfimmilu allamiinnissaq ilinniakkami pinngitsoorani piumasaappat ilinniakkallu aaqqissugaanerani nalunaarsorneqarsimappat imaluunniit ilinniakkamut pineqartumut naleqqiullugu immikkut naleqartinneqarpat,
5)  pinngitsoorani ilinnialernissamut misilitsinnerit, aamma
6)  sakkutuussatut misilitsinnerit.
  Imm. 2.  Kalaallit Nunaanni Kalaallillu Nunaata avataani ilinniarfimmiinnermi aningaasartuutinut pisariaqartunut tapiissutit aalajangerneqassapput, ilinniarfimmiinnermi qaammammut aningaasartuutinit procentinngorlugit, taamaattoq annerpaamik qaammammut 10.000 kr-nit taamaalilluni ilinniarfimmiinnermi
1)  kr. 4000 tikillugit aningaasartuutit 100%-imik matuneqassallutik aamma,
2)  kr. 4000 sinnerlugit aningaasartuutit 75%-imik matuneqassallutik.
  Imm. 3.  Imm. 1-imi 2-milu aningaasartuutit taaneqartut tamarmik pisariaqartutut uppernarsarneqarsimassapput ilitsersuisumillu siumut akuerineqarsimassallutik. Imm. 1, nr. 1-imi eqqaaneqartut pissutsit eqqaassanngikkaanni tapiissutit annertunerpaamik semesterimut ataatsimut tapiissutigineqartassapput. Imm. 1, nr. 2-imi taaneqartut eqqaassanngikkaanni, ilinniarnermi  taamaallaat ataasiaannarluni tapiisoqassaaq.
  Imm. 4.  Angalanermut aningaasartuutinut pisariaqartunut matussusiineq aamma tapiissutit pisariaqartumik unnuinernut aningaasartuutinut imm. 1, nr. 1 naapertorlugu, annertunerpaamik ukiumi atuarfiusumi pingasoriarluni akilerneqarsinnaapput. Ilinniartitaanersiuteqarnermut Naalakkersuisoqarfik tassanngaaniit immikkut akuersissuteqarsinnaavoq, pissutsit immikkut illuinnartut tamanna tunngavissaqartippassuk.
  Imm. 5.  Angalaneq taamaaliortoqarsinnaappat ukiumoortumik ilinniagaqannginnermi angalanermut atatillugu inissinneqassaaq, tak. § 39.
  Imm. 6.  Paasisassarsiorluni angalanernut paasisassarsiornernullu tapiisoqarsinnaanngilaq.

 

  § 43.  Ilinniagaqartup qanigisaani napparsimaruluttoqartillugu toqusoqartilluguluunniit , tak. § 7, ilinniagaqartumut taassumalu meeraanut, taakku ilinniagaqartumi najugaqarpata, angalanermut aningaasartuutit allanit matuneqarsimatinnagit akiliussilluni angalatitsisoqassaaq. Akiliussilluni angalatitsisoqassaaq illoqarfiup ilinniarfiusup qaniginerpaasallu pineqartup najugaata akornanni siumut utimullu angalanertut.
  Imm. 2.  Napparsimaruloornerup kingunerisaanik toqusoqartillugu, tamatumunngalu atatillugu ilinniagaqartup akiliunneqarluni angalanissamik akuersissuteqarfigineqarfigisaani, ilinniagaqartoq Kalaallit Nunaanni ilisinissamut akiliunneqarluni angalasinnaatitaavoq, tamanna najugarisap avataani pissappat, aammalu illoqarfimmut ilinniagaqarfigisamut uteqqinnermut.
  Imm. 3.  Aallarnissaq sioqqullugu nakorsap nalunaarutaatigut uppernarsarneqassaaq nappaat ima peruluutaatigisoq ilaqutaasut pisarnertut aggersarneqarlutik. Toqusoqarnera toqusup toquneranik uppernarsaatitut allagartap assigisaataluunniit nuutinneranik uppernarsarneqassaaq.
  Imm. 4.  Ilinniagaqartoq toquppat, ilaquttat qaninnerit najugaqarfiannut toqusup angallanneqarnera akilerneqassaaq. Angallassinermut ilaapput toqusumik Kalaallit Nunaannut angallassinermi aningaasartuutit pisariaqartut pisortanit piumasaqaatinik tunngaveqartut tamakkerlugit.


Pisattanik assartuisarneq

 

  § 44.  Pisattanik assartuinermut akiliussisoqarsinnaavoq, tak. imm. 2, nr. 2-4, ilinniagaqarnerup aallartinneranut, unitsinneranut imaluunniit naammassineranut atatillugu angalanermut akiliussisoqarnissaa akuersissutigineqarsimagaangat, taamaattoq tak. § 37, imm. 1, oqaaseqatigiit aappaat,
  Imm. 2.  Pisattanik assartuinermut akiliussisoqarsinnaavoq:
1)  ilinniagaqartunut qaammatit arfinillit sinnerlugit ilinniarfimmiittussanut imaluunniit sungiusarlutik suliffimmiittussanut, meeqqat akiliunneqarlutik angalanissaat akuersissutigineqarsimagaangat,
2)  ilinniagaqartunut aappariinnut angalaqatigiittunut, tak. § 6, ilinniarnissaq qaammatinik 20-nik sivisunerusussatut naatsorsuutigineqarpat,
3)  qaammatinit 20-nit sivisunerusumik ataannartumik ilinniareerluni angerlarnermut atatillugu, imaluunniit
4)  pisattat ornigassamut angallanneqarnerannut akiliussisoqarsimatillugu, takukkit nr. 2 aamma 3.
  Imm. 3.  Ilinniagaqarnermik unitsitsisoqarallartillugu, tassunga ilanngullugit ilinniagaqarnermik unitsitsigallarneq, pisattanik assartuinermut akiliussisoqarsinnaanngilaq.
  Imm. 4.  Ilinniagaqartunut Nunat Avannarliit avataanni ilinniagaqarnermi ilinniagaqarnersiuteqarnissamik akuerineqartunut pisattanik assartuinermut akiliussisoqarsinnaanngilaq.

 

  § 45.  Pisattanik assartuineq umiarsuakkut nassiussinertut pissaaq, tassaassallunilu containeri mikisoq ataaseq, imaluunniit ataasiakkaanik nassiussatut 5,5 m3 tikillugit initussusilittut nassiussat, nassiussinermullu ataatsimut 100.000 kr. angullugit sillimmaserneqassalluni.
  Imm. 2.  Pisuni immikkut ittuni umiarsuartigut angallassinissaq ajornarallartillugu toqqortarinnikkallartitsinermut aningaasartuutinik matussusiisoqarsinnaavoq.
  Imm. 3.  Ilinniagaqartut Kalaallit Nunaaliartut Kalaallit Nunaanneersulluunniit pisataannik angallassineq akilerneqaraangat, poortuinermut puuiaanermullu aningaasaliineq ilanngunneqartarpoq.
  Imm. 4.  Ilinniagaqartut aappariit, tak. § 6, assigiimmik angallaveqartussat annerpaamik containerimut mikisumut ataatsimut nassiussanulluunniit 5,5 m3-isut initutigisunut akiliunneqarsinnaapput. Aappariit tamarmik ilinniakkani tamarmik immikkut qaammatit 20-t sinnerlugit sivisussuseqartuni ilinniagaqarsimappata, containerit mikisut marluk imaluunniit nassiussat katillugit 11 m3-isut initutigisut akilerneqarsinnaapput.
  Imm. 5.  Ilinniagaqartut pingasunik amerlanernilluunniit meeraqartut  annerpaamik containerit mikisut marluk imaluunniit nassiussanut katillugit 11 m3-isut initussuseqartunut akiliunneqarsinnaapput.

 

  § 46.  Nassatanik akiliussisoqartillugu, taamaattorli umiarsuartigut assartuinissaq ajornarallartillugu, angalanermut akiliunneqartumut ataatsimut naammaginartumik uppernarsaasiinikkut ilinniarnerup aallartinnerani, unitsinnerani naammassineraniluunniit timmisartukkut nassatanut 10 kg angullugu oqimaappallaarutaasunut aningaasartuutit utertinneqarsinnaapput.

 

  § 47.  Pisattanik assartuinermut akiliussisoqassanngilaq, ilinniagaqartoq suliffimmini suliunnaarluni imaluunniit suliffissamini sulilissalluni sulisitsisup akiligassarisaanik pigisanik angallassissappat.


Ilassutitut ilinniartinneqarneq aamma katsorsartinnermut aningaasartuutit

 

  § 48.  Ilinniarfimmi ilitsersuisumit inassuteqartoqareerneratigut, kalaallit oqaasiinik allamiullu oqaasiinik pisariaqartunik ilinniartitsinermut peqataanermut aningaasartuutit tamakkiisumik matussuserneqassapput.
  Imm. 2.  Ilinniarfimmi ilitsersuisumit inassuteqartoqareerneratigut ilinniakkami ilinniartitsissummi pisariaqartumik immikkut ilinniartinneqarnermut aningaasartuutit tamakkiisumik matussuserneqassapput. Ilassutitut ilinniartitsinermi ilikkagassani nal. ak. ilinniartitsiviusussat sinnerlugit ilinniartitsineq sivisussuseqarsinnaanngilaq. Ilinniakkami ataatsimi immikkut semesterimi ilinniartinneqarnermut ataatsimut tapiisoqarsinnaavoq.

 

  § 49.  Kalaallit Nunaata avataani, tassunga Danmarki ilanngullugu, ilinniagaqartut nakorsamit uppernarsaaserneqartumik anigorsinnaanngisaminnik nappaateqaraangata nakorsamit innersuunneqartunik nakorsaatinut aningaasartuutaat matussuserneqassapput.
  Imm. 2.  Kalaallit Nunaata avataani, ilanngullugu Danmarkimi, ilinniagaqartut nakorsamit innersuunneqartumik katsorsarneqarnermut piffissami nakorsap innersuussaani aningaasartuutaat matussuserneqassapput.
  Imm. 3.  Kalaallit Nunaata avataani ilinniagaqartut, ilanngullugu Danmarkimi, pisariaqartumik kigutinik suliarititsisariaqaleriataarneranni aningaasartuutinut tamakkiisumik matussusiisoqartassaaq, suliaritinneq Ilinniagaqarnersiuteqarnermut Naalakkersuisoqarfimmit akuerineqarpat.
  Imm. 4.  Imm. 1-3 naapertorlugit aningaasartuutit taamaallaat pisortanit allanit imaluunniit sillimmasiinikkut aaqqissuussinernit matussuserneqanngitsut akilerneqassapput.
  Imm. 5.  Imm. 1-imi aalajangersakkami aamma ilaapput ilinniagaqartup nammineq meerai, ilinniagaqartumi najugaqartut.


Atuakkanut aningaasartuutinut tapiissutit

 

  § 50.  Ingerlaqqiffiusumik ilinniagaqartunut, semesterit aallartinneranni kr. 1100-nik tapiisoqartassaaq, atuakkat ilinniarnermi pinngitsoorani atugassat, atortussat ataatsimoortut, atuagassat katitikkat assigisaasalu pisiarinissaannut tapiissutitut.


Kapitali 7

Ilinniarnermi taarsigassarsiat nunatta karsianit aningaasalersorneqartut

 

  § 51.  Tapiiffigineqarsinnaasunik ingerlaqqiffiusumik ilinniagaqartunut, kapitali 2-mi aamma 4-mi piumasaqaatinik piviusunngortitsisinnaasunut, 18-inillu ukioqalereersimasunut, ilinniarnermi taarsigassarsititsisoqarsinnaavoq. Taarsigassarsineq ilinniarnermi ataasiaannarluni taarsigassarsinertut pissaaq, ukiup affakkaartumik semesterimut taarsigassarsiatut, taamaattoq tak. §§ 52, 53 aamma § 34, imm. 2, aamma ilinniarnermut akiliutinut taarsigassarsiatut, tak. § 14, imm. 2. Ataasiaannarluni taarsigassarsiat aamma ukiumut taarsigassarsiarisinnaasat annerpaaffissaasa annertussusaat aningaasanut inatsimmi ersipput.
  Imm. 2.  Semesterimut taarsigassarsiat upernaakkut semesterimut ukiakkullu semesterimut taarsigassarsiaritinneqartarput. Tassunga atatillugu upernaakkut semesteri tassaatinneqarpoq 1. januaarimiit 31. juli ilanngullugu, ukiakkullu semesteri tassaatinneqarluni 1. augustimiit 31. december ilanngullugu. Semesterimut taarsigassarsiat semesterip pineqartup naanerani tamakkiisumik atorneqarsimanngitsut, semesterip tullianut nuunneqarsinnaapput.
  Imm. 3.  Ataasiaannartumik allanik taarsigassarsisitsisoqaqqissinnaavoq, pissutsit immikkut illuinnartut pissutaatillugit, ilinniakkap allamik taarserneratigut imaluunniit ilinniakkamik allamik aallartitsinermi, tamatumani ilaallutik nuunnermut aningaasartuutigisanut aammalu inissiamut nutaamut qularnaveeqqutitut akiliutit.
  Imm. 4.  Ilinniagaqarnermi taarsigassarsisoqassaaq akiitsunut allagartaliussaq Ilinniagaqarnersiuteqarnermut Naalakkersuisoqarfimmit akuerineqartoq atorlugu. Ilinniagaqarnermi taarsigassarsiat siusinnerpaamik tunniunneqarsinnaapput, Ilinniagaqarneq aallartinneqareerpat akiitsunullu allagartaq atsiorneqarnikoq Ilinniagaqarnersiuteqarnermut Naalakkersuisoqarfimmit tiguneqareerpat.

 

  § 52.  Ilinniakkat 1. marts imaluunniit 1. oktober sioqqullugit naammassineqartut semesterimi pineqartumi taarsigassarsinissamut pisinnaatitaaffigineqanngillat. Naalagaaffiup ilinniagaqarnersiuteqartitsineranit ilinniagaqarnersiuteqartunut semesterimut taarsigassarsianik tapiissuteqartoqarsinnaanngilaq, taamaattoq tak. § 34, imm. 2.

 

  § 53.  Ilinniagaqartunut ilinnialernissamut piareersaataasumik ilinniagaqartunut, inuutissarsiummik ilinniagaqartunut imaluunniit naatsumik inuussutissarsiutinut ilinniagaqartunut ilinniarnermi taarsigassarsisitsisoqarsinnaanngilaq, taamaattoq tak. imm. 3 aamma § 34, imm. 2, oqaaseqatigiit aappaat.
  Imm. 2.  Ilinniagaqartunut ilinniarnermi taarsigassarsisitsisoqarsinnaanngilaq ilinniareernerup kingorna ilinniagaqarnermi akiitsugarilikkat ima amerlatigilersimassappata taarsersornissaat ajornartorsiutaalertussatut nalilerneqarluni. Naliliinermi makku mianerineqassapput:
1)  akiitsut annertussusaat ilinniareernermi isertitassatut ilimagisanut naleqqiullugit,
2)  ilinniagaqartup ilinniarnermi taarsigassarsiaminik naafferartumik akilersuinissaata qanoq sivisutiginissaata ilimagineqarnera.
3)  ilinniagaqarnermi taarsigassarsiat pillugit naafferartumik akilersuinermik aaqqissuussinermik ilinniagaqartoq siusinnerusukkut ingasattumik ilaginnaasimanersoq.
  Imm. 3.  Ilinniagaqartunut ilinnialernissamut piareersaataasumik ilinniartunut, inuutissarsiummik ilinniartunut imaluunniit naatsumik inuussutissarsiutinut ilinniagaqartunut 18-inillu ukioqalereersimasunut ataasiaannakkamik taarsigassarsititsisoqarsinnaavoq.

 

Kapitali 8
Allaffissorneq

 

  § 54.  Kalaallit Nunaanni ilinniakkamut peqataanermi ilinniagaqarnersiaqarumalluni qinnuteqaat, qinnuteqarnermi immersugassaq Ilinniagaqarnersiuteqarnermut Naalakkersuisoqarfimmit akuerineqartoq atorlugu nassiunneqassaaq. Ilinniagaqarnersiuteqarnermut Naalakkersuisoqarfiup ilinniagaqarnersiutinik qinnuteqaatit suliarinissaannut periusissat aalajangersassavai, tamanullu saqqummiullugit.
  Imm. 2.  Immikkut akuerineqarnissamik qinnuteqaatit Ilinniagaqarnersiuteqarnermut Naalakkersuisoqarfimmut nassiunneqassapput.
  Imm. 3.  Ilinniagaqarnersiuteqarnermut Naalakkersuisoqarfiup ilinniagaqarnersianik qinnuteqaateqarnissamut ullussaliussat aalajangersarsinnaavai.
  Imm. 4.  Ilinniagaqarnersiuteqarnissamut qinnuteqaatit Majoriami ilinniakkamik ingerlatsinermi kommunabestyrelsimit allaffissornikkut aqunneqarput, naammassisassanut isumaqatigiissummik tunngaveqartumik, Namminersorlutik Oqartussat aamma kommunalebstyrelsip akornanni isumaqatigiissutaasoq tunngavigalugu.
  Imm. 5.  Ilinniagaqarnersiuteqarnermut Naalakkersuisoqarfiup ukiut tamaasa Majoriami ilinniagaqarsinnaasut amerlassusissaat aalajangertarpaa. Ukiumut tulliuttumut annertussusissat kommunalbestyrelsimut oktobari naatinnagu nalunaarutigineqartassaaq.
  Imm. 6.  Kommunalbestyrelse qinnuteqaatinut imm. 4-mi pineqartunut aalajangiisassaaq. Ilinniagaqarnersiutit kommunalbestyrelsimit akilerneqassapput, kingornagullu akiliutit Ilinniagaqarnersiuteqarnermut Naalakkersuisoqarfimmut akiligassiissutigineqassallutik.
  Imm. 7.  Kommunalbestyrelsip ilinniagaqarnersiutit pillugit imm. 6 naapertorlugu aalajangiinera allaffissornikkut oqartussanut allanut suliassanngortinneqarsinnaanngilaq.

 

  § 55.  Ilinniagaqartup ukiuni ilinniagaqarnersiuteqartitsiviusartuni tamani qaammammi arlalinniluunniit ilinniagaqarnersiuteqannginnissaq toqqarsinnaavaa. Ilinniagaqarnersiuteqarnissamik qinnuteqannginneq ilinniagaqarnersiuteqannginnissamik toqqaanermut sanilliunneqassaaq. Ilinniagaqartoq qaammatini qassini ilinniagaqarnersiuteqannginnissamik nalunaaruteqarani ilinniagaqarnersiuteqannginnissaq toqqarpagu, tamassuminnga nutaamik allaganngorlugu qinnuteqarnissaq ilinniagaqarnersiutit akileqqittalernissaannut piumasaqaataavoq.
  Imm. 2.  Ilinniagaqarnersiuteqannginnissamik allaganngorlugu qinnuteqaat, qaammatip akiliiffiusussap 15-ianni ilitsersuisup tigoreersimassavaa. Ilinniagaqarnersiutit akilerneqartarnerisa aallarteqqinneqarnissaat pillugu qinnuteqaat, qaammatip akiliiffiusussap 15-ianni ilitsersuisup tigoreersimassavaa.

 

Kapitali 9
Atuutilersitsinermut, ikaarsaariarnermut atorunnaarsitsinermullu aalajangersakkat

 

  § 56.  Nalunaarut 1. august 2017 atuutilerpoq.
  Imm. 2.  Tassunga peqatigitillugu Ilinniagaqarnersiutit pillugit Namminersornerullutik Oqartussat nalunaarutaat nr. 28, 25. november 2016-imeersoq atorunnaarsinneqarpoq.

 

§ 57.  Ilinniagaqartut 1. august 2017 sioqqullugu ingerlaqqiffiusumik ilinniakkamik naammassisaqarsimasut, Namminersorlutik Oqartussanit ilinniagaqarnersiuteqarlutik imaluunniit Naalagaaffiup Ilinniagaqarnersiuteqartitsivianiit - Statens Uddannelsesstøtte – ilinniagaqarnersiuteqarlutik qiorsinernik ilanngaavigineqassapput tapiissutinut naapertuuttunik.
  Imm. 2.  Ilinniagaqartut ingerlaqqiffiusumik ilinniakkamik piffissami 1. august 2005 aamma 1. august 2017-ip akornanni ilinniakkaminnik taamaatitsisimasut Namminersorlutik Oqartussaniit ilinniagaqarnersiuteqarfiusumik, qiorsinernik tapiissutinut naapertuuttunik ilanngaavigineqassapput.   

 

  § 58.  Ilinniagaqartut 1. august 2005 sioqqullugu Namminersorlutik Oqartussanit ilinniagaqarnersiuteqarlutik ingerlaqqiffiusumik ilinniakkamik naammassinnissimasut, ilinniakkamik kingulliup naammassisap sivisussusissaatut aalajangiussap nalinganik qiortakkanut killissarititamit ilanngaanneqassapput. Ilinniagaqarneq bachelorinngornissamut aamma kandidatinngornissamut immikkoortoqartoq ilinniagaqarnertut ataatsitut matumani isigineqassaaq. Ilinniagaqartoq Namminersornerullutik Oqartussanit ilinniagaqarnersiuteqarluni 1. august 2005-imi ingerlaqqiffiusumik ilinniakkamik nutaamik ingerlatsisimaguni, ilinniakkamut naammassisamut killissarititami qiortakkanik ilanngaavigineqassanngilaq.
  Imm. 2.  Ilinniagaqartut Namminersornerullutik Oqartussanit ilinniagaqarnersiuteqarlutik 1. august 2005 sioqqullugu ingerlaqqiffiusumik ilinniagaqarnermik unitsitsisimasut killissarititami qiortakkanik ilanngaavigineqassanngillat. Ingerlaqqiffiusumik ilinniagaqartoq 1. august 2005-imi kingusinnerusukkulluunniit aallartitaanut naleqqiullugu ilinniakkami unitsissimasamini piginnaaffeqarfinnik pissarsisimappat, ilinniakkap aallartinnerani piffissami tapiissuteqarfiusumi killissarititamilu qiortakkanik ilinniakkami pineqartumi piginnaaffeqarfinnik pissarsiffiusunut qaammatinut aalajangersimasunut ilanngaasoqassaaq.
  Imm. 3.  Ilinniagaqartut Namminersornerullutik Oqartussanit ilinniagaqarnersiuteqarlutik 1. august 2005-imi ingerlaqqiffiusumik ilinniagaqartuusut killissarititami ilinniakkap maannakkut inissisimaffiani ilinniarfiginissaanik sivisussusiata assinganik qiortakkanik ilanngaavigineqassapput. Ilinniagaqarneq bachelorinngornissamut aamma kandidatinngornissamut immikkoortoqartoq ilinniagaqarnertut ataatsitut matumani isigineqassaaq. Tamanna ilutigalugu ilinniakkami ingerlanneqartumi piffissaq tapisiaqartitsiviusoq sivitsorneqassaaq, aningaasanik tapisiaqartitsiviusup ilinniagaqarnerullu sivisussutsimikkut inissisimaffiisa akornanni qaammatit amerlassusiisa assigiinngissutaannik qiugassat amerlassusilerlugit.

 

  § 59.  Ilinniagaqartunut tapiiffigineqarsinnaasunut 1. januar 2013 sioqqullugu tapiiffigineqarsinnaasumik ingerlaqqiffiusumik ilinniakkamik Danmarkimi aallartitsisimasunut, aammalu 1. januar 2013-ip kingorna suli ilinniakkaminnik kipitinnagu ingerlatsisunut, stipendianik tunniussisoqarsinnaavoq, tak. § 12, danskit ilinniagaqarnersiuteqarnermut malittarisassaat naapertorlugit qiortakkat nungussimagunikkit. Piumasaqaatit § 13-imiittut naammassineqarsimappata ilutigisaanik meeqqanut tapisianik pisartagaqartitsisoqarsinnaavoq.
  Imm. 2.  Imm. 1 malillugu stipendiat meeqqanullu tapit annerpaamik qaammatinut aqqaneq marlunnut tunniunneqarsinnaapput.
  Imm. 3.  Ilinniagaqartunut ilinniagaqarnersiuteqarsinnaasunut, 1. januar 2013 sioqqullugu ingerlaqqiffiusumik ilinniakkamik tapiiffigineqarsinnaasumik Danmarkimi aallartitsisimasunut, aammalu 1. januar 2013-ip kingorna unitsinnagu ilinniakkaminnik suli ingerlatsisunut, ilitsersuisumut qinnuteqarnermikkut ilassutitut qiortakkanik 12-inik pissarsisinnaapput, tak. § 26, ilinniagaqartoq peqqutit imaluunniit ilinniagaqartup qanigisaani peruluttoqarnera toqusoqarneraluunniit pissutigalugit ilinniarnermini kinguartoorsimappat, pissutsit § 26, imm. 1-imi pineqartut tunngavigalugit.

 

  § 60.  Meeqqanut tapisiaqartitsisoqarsinnaavoq, tak. § 13, ilinniagaqartunut tapiiffigineqarsinnaasunut Danmarkimi najugaqartunut, 1. januar 2013-imi Naalagaaffiup ilinniagaqarnersiuteqarfianiit, stipendianik pisartagaqalertunut, ilinniagaqartoq pilersuisutut tapisianik danskit ilinniagaqarnersiuteqarnermut malittarisassaat naapertorlugit tapisiaqarsinnaatitaanngippat.
  Imm. 2.  Ilinniagaqarnersiuteqarnermut Naalakkersuisoqarfik qinnuteqartoqarnera tunngavigalugu meeqqanut tapisiaqartitsisinnaavoq ilinniagaqarnersiuteqarnissamut pisinnaatitaasunut Danmarkimi ilinniagaqartunut. 1. januar 2013-imi Naalagaaffiup ilinniagaqarnersiuteqarfianiit, stipendianik pisartagaqalertunut, ilinniagaqartoq pilersuisutut tapinik, meeqqanut tapitut pisassaraluaminit annikinnerusunik pisinnaatitaappat, tak. § 13. Meeqqanut tapit annertussuserissavaat, pilersuisutut tapit ilinniagaqartullu meeqqanut tapitut pisassaraluisa nikingassutaat.

 

  § 61.  Ilinniagaqartut tapiiffigineqarsinnaasut, 1. januar 2013 sioqqullugu ilinniakkamik tapiiffigineqarsinnaasumik Danmarkimi aallartitsisimasut, aammalu 1. januar 2013-ip kingorna unitsinnagu ilinniakkaminnik ingerlatsisut, Ilinniagaqarnersiuteqarnermut Naalakkersuisoqarfimmut qinnuteqarnermikkut ilassutitut ilinniagaqarnersiutinik Namminersorlutik Oqartussaniit tapiiffigineqarsinnaapput, ilinniagaqartup aningaasat ilinniarnermi tunniunneqartartunut danskit ilinniagaqarnersiuteqartitsinermut malittarisassaannut nuunnermi kingorna ajornerusumik pineqannginnissaa siunertaralugu.
  Imm. 2.  Ilinniagaqarnersiutit ilassutaasut, tak. imm. 1, annertussusaat taamaallaat tassaasinnaapput, ilinniagaqarnersiutit ilinniagaqartup danskit ilinniagaqarnersiuteqartitsinermi malittarisassaat naapertorlugit pisinnaasaasa aamma ilinniagaqartup Namminersorlutik Oqartussanit stipendiaqaannarsimaguni pisinnaasaraluisa uppernarsarneqarsinnaasumik nikingassutaat.

 

§ 62.  Aalajangersakkat maannamut atuuttut malillugit qularnaveeqqusiissuteqarnermi pisussaaffiit atuuffissamik naanissaata tungaanut atuutiinnassapput piumasarisaasut allanngortinnagit.
  Imm. 2.  Qularnaveeqqusiissuteqarnermi pisussaaffiit 1. januar 1997 sioqqullugu akilerneqartut aalajangersakkat maannamut atuuttut malillugit ernialersorneqassapput.
  Imm. 3.  Qularnaveeqqusiissuteqarnermi pisussaaffiit 1. januar 1997 kingoqqullugu akilerneqartut, akiliinerup kingorna ullormit aallartittumit ernialersorneqalissapput. Sukkulluunniit akiitsuusut ukiumoortumik ernialersorneqassapput pisortat sukkulluunniit diskontoata 5%-imik ilasap angeqataanik ernialersorlugit. Ernialiineq ukiut tamaasa 31. december piffissamiluunniit ilinniagaqartup akiitsunik akiliinerani pisassaaq.

 

 

Namminersorlutik Oqartussat, ulloq 19. juli 2017

 

 

Doris J. Jensen

/

Lone Nukaaraq Møller