Kapitali 1
Atuuffia

§ 1.  Inatsisartut inatsisaat manna ilinniagaqarnersiutinut, Namminersorlutik Oqartussat ilinniakkat naammassinissaannut ikiorsiissutitut tapiissutigisartagaannut atuuppoq.

Kapitali 2
Ilinniagaqarnersiuteqarsinnaanermut piumasaqaatit

Ilinniagaqarnersiuteqartitsinissamut piumasaqaatit inunnut tunngasut

§ 2. Ilinniartut qinnuteqarnermikkut ilinniagaqarnersiuteqarsinnaapput
1) danskisut innuttaassuseqarunik imaluunniit nunani tamalaani isumaqatigiissutit Kalaallit Nunaannut atuuffeqartut naapertorlugit danskisut innuttaasunut naligiissinneqarlutik ilinniagaqarnersiuteqarsinnaagunik, aamma
2) ilinniakkami ilinniagaqarnersiuteqarfiusinnaasumi ilinniartussatut akuerisaagunik ilinniagarlu ingerlallugu, tak. §§ 7 aamma 8.
Imm. 2.  Ilinniartut ilinniagaqarnersiuteqarsinnaassagunik, paasissutissat ilinniagaqarnersiuteqarnissamut attuumassuteqartut tamaasa Naalakkersuisunut nalunaarutigissavaat, soorlu inuup normua, siusinnerusukkut ilinniakkamik naammassinnissimanermut tunngasut, pisortanit ikiorsiissutinik allanik pisartagaqarneq, soraarummeernermi misilitsinnermilu angusat, meeqqanut 18-it inorlugit ukiulinnut pilersuisussaatitaaneq imaluunniit akilersuisussaatitaaneq, nunami innuttaassuseqarneq, ilinniakkamik akuerisaaneq, suliffimmik sungiusarfissamik pissarsisimaneq, ilinniakkamik allannguineq, ilaqutariittut inissisimaneq, peqqissutsimut tunngasunik paasissutissiineq, pissutsillu kingusinnerusukkut allannguuteqartillugit piaartumik Naalakkersuisunut nalunaarutigisassallugit.
Imm.3.  Ilinniagaqartut inuuniarnerminni aningaasartuutaasa tamakkiisumik akilerneqarnissaat siunertaralugu pisortanit ikiorsiissutinik allanik ataavartumik pisartagaqartinneqartut, ilinniagaqarnersiutinik (stipendiamik) pisinnaatitaanngillat. Tamannattaaq atuuppoq ilinniartunut ilinniarnermik nalaanni inuuniarnerminni aningaasartuutiminnik matussusiinissaq siunertaralugu ilinniarnerminni akissarsiaqartunut allatulluunniit ilinniarnerminnut tunngasumik aningaasarsiaqartunut.
Imm. 4.  Kalaallit Nunaata avataani inuutissarsiutinik tunngaviusumik ilinniarfinni ilinniarnerni ilinniagaqarnersiutisiaqartitsisoqartarpoq, ilinniartoq ilinnialersussatut akuerisaanerminut atatillugu suliffimmi sungiusarnissamut taarsiullugu ilinniarfimmi sungiusarfissaminik pissarsisimappat, akissarsiaqaatigalugu suliffimmi sungiusarfissaminik pissarsisimappat imaluunniit tunngaviusumik ilinniarnini naammassereeruniuk akissarsiaqaatigalugu suliffimmi sungiusalernissaminut allakkatigut akuerisaasimappat. Piumasaqaatilli taakkua Danmarkimi tunngaviusumik inuutissarsiutinik ilinniarfinnut ilinniarnissamik qularnaveeqqusiisimanermut ilaasunut atuutinngillat.
Imm. 5.  Immikkut ittunik pisoqartillugu § 2, imm. 1-2-milu piumasaqaatit sanioqqunneqarsinnaanerat pillugu Naalakkersuisut malittarisassanik aalajangersaasinnaapput.

§ 3. Ilinniartut Kalaallit Nunaanni ilinniakkani ilinniagaqarnersiuteqarsinnaassagunik Kalaallit Nunaanni aalajangersimasumik najugaqassapput.
Imm. 2. Naalakkersuisut aalajangersimasumik najugaqarnissamik aalajangersakkatut piumasaqaatit atortinneqannginnissaannik, tak. imm. 1, immikkut akuersissuteqarsinnaapput, pineqartup pissusiviusut malillugit  Kalaallit Nunaanni najugaqavinnera uppernarsarneqarsinnaappat, naak Kalaallit Nunaata avataani pisortatigoortumik aalajangersimasumik najugaqaraluarluni.

§ 4. Ilinniartut Kalaallit Nunaata avataani ilinniakkani ilinniagaqarnersiuteqassagunik
1) qinnuteqarnermi nalaani Kalaallit Nunaanni aalajangersimasumik najugaqartuussapput, tamannalu sioqqullugu sivikinnerpaamik ukiuni tallimani ataannartumik najugaqarsimassallutik, imaluunniit
2) sivikinnerpaamik ukiuni qulini Kalaallit Nunaanni aalajangersimasumik najugaqarsimassallutik. Tamatuma ilutigisaanik ilinniartoq 18-ileereernermi kingorna Kalaallit Nunaata avataani sivisunerpaamik katillugit ukiuni pingasuni najugaqarsimassaaq.
Imm. 2.  18-ileereernerup kingorna, tak. imm. 1, nr. 2, naggatit aappaat, Kalaallit Nunaata avataani najugaqarnertut isigineqassanngillat ilinniartup najugaqarneri
1) ilinniarnermut, imaluunniit
2) inunnik isumaginninnermut, Kalaallit Nunaanni oqartussanit peqataaffigineqartunik tunngassuteqarpata.
Imm. 3.  Imm. 1-imi Kalaallit Nunaanni aalajangersimasumik najugaqarnissamik piumasaqaat Naalakkersuisut sanioqqussinnaavaat, taamaaliornissaq immikkorluinnaq pissutissaqarpat, tassunga ilanngullugu Kalaallit Nunaata avataani aalajangersimasumik najugaqarsimanerup ilaqutariinnermut tunngasunik immikkut pissuteqarnera, ilinniartup imm. 1-imi piumasaqaatinik piviusunngortitsinissaminut qanoq qanitsigineranut sanilliullugu.

§ 5.   Naalakkersuisut ilinniagaqartut kattuffiinut tusarniaareernikkut ilinniagaqarnersiuteqarnissamut piumasaqaatit inunnut tunngasut pillugit allanik malittarisassiorsinnaapput, tassunga ilanngullugu assersuutigalugu ilinniakkamik ingerlatsineq, ilinniakkami akuerisaaneq oqaatsinillu atuisinnaanermut misilitsinnnermi angusisimaneq.

Ilinniakkat ilinniagaqarnersiuteqarfiusinnaasut

§ 6.  Ilinniagaqarnersiutisiaqartitsisoqartarpoq ilinniartunut ilinniagaqarnissamut piareersarluni ilinniakkanik, inuussutissarsiutinut tunngaviusumik ilinniakkanik imaluunniit ingerlaqqiffiusumik ilinniakkanik ingerlatsisunut, ilinniagaq ilinniagaqarnersiutisiaqaataasinnaasutut akuerineqarsimappat, tak. §§ 7-8.

§ 7. Kalaallit Nunaanni ilinniagaq ilinniagaqarnersiuteqarfiusinnaavoq, ilinniagaq Naalakkersuisunit akuerineqarsimappat, tak. imm. 2 aamma 3.
Imm. 2.  Akuersisoqassappat, tak. imm. 1, piumasaqaataavoq ilinniagaq:
1) sivikinnerpaamik qaammatinik pingasunik sivisussuseqassasoq,
2) Kalaallit Nunaanni suliffeqartitsisinnaasutut naatsorsuutigineqassasoq, taamaattoq tak. § 6 ilinnialernissamut piareersarluni ilinniakkanut tunngasoq, aamma
3) ilinniarfimmi Namminersorlutik Oqartussanit pilersinneqarlunilu ingerlanneqartumi ilinniarneq ingerlanneqarpat imaluunniit suliamut tunngatillugu imarisamigut, pisortaqarnermigut, ilinniartitsisoqarnermigut avatangiisimigullu, ilinniarfinnut Kalaallit Nunaanni Namminersorlutik Oqartussanit pilersinneqartuni ingerlanneqartunilu pitsaassutsikkut piumasaqaatinut atuuttunut naleqqiullugu naammaginartumik pitsaassuseqarnini ilinniarfiup uppernarsarsinnaappagu.
Imm. 3.  Naalakkersuisut imm. 1 naapertorlugu aalajangiisassapput ilinniartitsinermut politikkikkut, suliffeqarfeqarnermut tunngasutigut aningaasaqarnikkullu mianerisassat aallaavigalugit, tassungalu atatillugu ilinniakkat pitsaassusiinik naliliisartutut tamanit akuerisaasumit ilinniakkap pitsaassusaa nalilertissinnaallugu.
Imm. 4. Kalaallit Nunaanni ilinniarfiit ilinniagaqarnersiutisiaqarfiusinnaasutut akuerisaasut, Naalakkersuisut tamanut saqqummiuttassavaat.

§ 8.  Danmarkimi ilinniagaq tapiiffigineqarsinnaavoq, ilinniagaq pineqartoq Danmarkimi Ilinniartitaanermut ministeeriaqarfimmit tapiiffigineqarsinnaasutut akuerineqarsimappat. Tamannali atuutinngilaq Naalakkersuisut aalajangiiffigisimappassuk, ilinniagaq pineqartoq tapiiffigineqarsinnaassanngitsoq.
Imm. 2.  Naalakkersuisut ilinniakkanut Danmarkimi Ilinniartitaanermut ministeeriaqarfimmit tapiiffigineqarsinnaasutut akuerisanut atatillugu, ilaannakortumik ilinniagaqarnersiaqartitsinissaq aalajangiussinnaavaat.
Imm. 3. Aammattaaq Naalakkersuisut Kalaallit Nunaata avataani, tassunga ilanngullugu Danmarkimi ilinniagaq, tapiiffigineqarsinnaatitaasutut akuerisinnaavaat, ilinniagaq
1) sivikinnerpaamik qaammatinik pingasunik sivisussuseqarpat,
2) piffissamik tamakkiisumik atuilluni ilinniarnertut aaqqissuussaappat,
3) Kalaallit Nunaanni suliffeqartitsisinnaasutut naatsorsuutigineqarpat, taamaattoq tak. § 6 ilinnialernissamut piareersarnermut tunngasoq, aamma
4) ilinniarfimmi pisortat akuerisaanni ingerlanneqarpat, imaluunniit suliamut tunngatillugu imarisamigut, pisortaqarnermigut, ilinniartitsisoqarnermigut avatangiisimigullu pisortat ilinniarfiinut pitsaassusissamik piumasaaqaatit atuuttut naapertorlugit naammaginartumik pitsaassuseqarpat.
Imm. 4.  Naalakkersuisut imm. 1 - 3 naapertorlugit aalajangiisassapput ilinniartitsinermut politikkikkut, suliffeqarfeqarnermut tunngasutigut aningaasaqarnikkullu mianerisassat aallaavigalugit, tassungalu atatillugu ilinniakkat pitsaassusiinik naliliisartutut tamanit akuerisaasumit ilinniakkat pitsaassusii nalilertissinnaallugit. Aalajangiinermi ilinniartut ilinniakkami assingusumi ilinniagaqarnersiuteqarfiusinnaasumi ilinnialersinnaanersut immikkut eqqarsaatigineqarsinnaavoq.
Imm. 5.  Naalakkersuisut tamanut saqqummiutissavaat
1) ilinniakkat Ilinniartitaanermut ministeeriaqarfimmit ilinniagaqarnersiuteqarfiusinnaasutut akuerisaasut, kisianni Namminersorlutik Oqartussanit ilinniagaqarfiusinnaasutut akuerisaanngitsut,
2) ilinniakkat Ilinniartitaanermut ministeeriaqarfimmit ilinniagaqarnersiuteqarfiusinnaasutut akuerisaasut imm. 2 naapertorlugu ilaannakortumik ilinniagaqarnersiuteqarfiusinnaasut,
3) ilinniakkat Kalaallit Nunaata avataani, Danmarki ilanngullugu, Naalakkersuisunit akuerisaasut, tak. imm. 3.

§ 9. Ilinniakkat §§ 7 aamma 8 naapertorlugit ilinniagaqarnersiuteqarfiusinnaanerannik akuersinerit, piffissami killilimmi ukiunik 4-nik sivisussuseqartumi atuuttussatut pisarput.
Imm. 2.  Ilinniakkanik Namminersorlutik Oqartussanit pilersinneqarlutillu ingerlanneqartunik aamma Kalaallit Nunaata avataani ilinniakkanik akuersissuteqarneq ilinniarfimmit qinuteqartitsisoqaqqaarani pisarpoq. Kalaallit Nunaanni ilinniakkat sinnerinik akuersissuteqarneq qinnuteqaqqaarnikkut pisarpoq, qinnuteqaallu Naalakkersuisuneereertassaaq ilinniakkap aallartinnissaa kingusinnerpaamik qaammatinik 7-nik sioqqullugu.
Imm. 3.  Ilinniarfik, qinnuteqaateqareerluni ilinniakkamut akuersissummik tunineqarsimasoq, akuersissutip sivitsorneqarnissaanik kissaateqartoq, piffissap akuersissuteqarfiusup naanissaa kingusinnerpaamik qaammatinik 7-nik sioqqullugu akuersissutip sivitsornissaanik qinnuteqareersimassaaq.
Imm. 4.  Naalakkersuisut akuersissummut piumasaqaatinik atugassarititaasunillu ilanngussaqarsinnaapput, tamatumunnga ilanngullugit paasissutissanik nassiussisarnermut tunngasut, ilinniagaqarnersiutinik aqutsineq aamma ilinniagaqarnersiuteqartitsinermi piumasaqaatit immikkut ittut aalajangersarneri, assersuutigalugu ilinniakkap pineqartup naammassinissaanut ilaannakortumik ilinniagaqarnersiuteqartitsisinnaaneq pillugu.

§ 10.  Ilinniakkamut ilinniagaqarnersiuteqarfiusinnaasumut akuersissut uterteqquneqarsinnaavoq ima pisoqarpat:
1) Naalakkersuisut isumaqarpata, ilinniakkap akuerinissaanut piumasaqaatit imaluunniit atugassarititaasut atuukkunnaartut, tamatumunnga ilanngullugit § 7, imm. 2-mi aamma 3-mi, aamma § 8, imm. 3-mi aamma 4-mi piumasaqaatinut naleqqiullugu.
2) Naalakkersuisut naliliippata akuersinerup attatiinnarnissaa ilinniartitsineq pillugu politikkikkut, suliffeqarnermi atugaasutigut imaluunniit aningaasaqarnikkut tunuliaqutaasutigut tunngavissaaruttoq, imaluunniit
3) ilinniagaqarnersiutinik aqutsinissamut ilinniarfinnit piumasaqaataasut ilinniarfiup eqquu-tissinnaajunnaarpagit.
Imm. 2.  Naalakkersuisut imm. 1 malillugu akuersissummik tunuartitsinissap aalajangiiffiginissaanut atugassamik, suliffeqarfimmit ilinniakkanik naliliisarfittut tamanit akuerineqarsimasumit ilinniakkap pitsaassusianik naliliisitsisinnaapput.

Tapiiffigineqarnissamut immikkut piumasaqaatit

§ 11.  Naalakkersuisut ilinniakkap nammineq akiliuteqarfiginissaanut, immikkut karakteerit, suliaq inuutissarsiullu pillugu piginnaaneqarfigeriigassat imaluunniit oqaatsinik misilitsissimanissaq pillugit aalajangersagaliorsinnaapput, kiisalu ilinniakkani aalajangersimasuni Namminersorlutik Oqartussanit ilinniagaqarnersiuteqarlutik ilinniagaqartut qassiuneri killilersorsinnaallugit, taakkununnga ilanngullugit qinnuteqartunik ilinniagaqarnersiuteqarsinaasunik tulleriissaarisinnaaneq.
Imm. 2.  Naalakkersuisut piumasaqaatit, immikkut atugassarititaasut, killilersuinerit annertussusaat tulleriissaarinermilu piumasaqaatit tamanut saqqummiuttassavaat. 

§ 12.  Naalakkersuisut ilinniartut ilinniakkanut ilinniagaqarnersiuteqarfiunngitsunut peqataanerini ilinniagaqarnersiuteqartitsiniarlutik aalajangiisinnaapput,
1) Kalaallit Nunaata ilinniakkamik pineqartumik ilinniarsimasut pisariaqartippagit,
2) ilinniartoq ilinniakkami assingusumi ilinniagaqarnersiuteqarfiusinnaasumi ilinnialersinnaanngippat, aamma
3) ilinniarneq pineqartoq piffissamik tamakkiisumik atuilluni ilinniarnertut aaqqissuussaappat.
Imm. 2.  Naalakkersuisut imm. 1, nr.1-imi aalajangersakkamik sanioqqutitsisinnaapput, ilinniartoq eqqumiitsuliornerup, nipilersornerup allatulluunniit kulturikkut suliaqarnerup iluani suliaqartuuppat, imm. 1, nr. 3-millu sanioqqutsisinnaallutik ilinniartup peqqissutsikkut atugarisaasa tamanna pisariaqartippassuk.

Sulisitsisunut tapiissutit

§ 13.  Ilinniagaqarnersiutit sulisitsisunut tunniunneqarsinnaapput, sulisitsisup atorfinitsitsinermini akissarsianut aningaasartuutigisaanut tapiissutitut
1) inuutissarsiutinik ilinniartitsineq pikkorissaanerillu pillugit Inatsisartut inatsisaat malillugu lærlingit tunngaviusumik inuutissarsiummik ilinniagaqartunut aamma
2) lærlingit Kalaallit Nunaanni sungiusarlutik sulisut Danmarkimilu ilinniarfimmiittunut.

Kapitali 3
Ilinniagaqarnersiuteqartitseriaatsit aningaasartaasalu amerlassusii

§ 14.  Ilinniagaqarnersiutit tunniunneqarsinnaapput stipendiatut, meeqqanut tapiissutitut, immikkut aningaasaliissutitut, sulisitsisunut akissarsianut tapiissutitut aamma ilinniarnermi taarsigassarsiatut. Ingerlaqqiffiusumik ilinniagaqartunut ilinniagaqarnersiutit qiortartakkanut periuseq malillugu piffissami aalajangersimasumi killilikkami tunniunneqartassapput.
Imm. 2.  Immikkut aningaasaliissutit tassaasinnaapput akiliunneqarluni angalanerit, inissinneqarnermut aningaasartuutit akilerneqarneri, inissinneqarnermut aningaasartuutinik akiliigallarnerit, angallassinermut aningaasartuutinik matussusiinerit, pisattanik assartuinerit, ilinniagaqarnermut akiliutit, katsorsartinnermut aningaasartuutit, atuakkanut aningaasartuutit, kalaallisut ilinniarluni peqataanermut aningaasartuutit, bussinut qimuttuitsunullu kortinut tapiissutit, pisariaqartumik immikkut atuartinneqarnermut aningaasartuutit aamma Kalaallit Nunaanni avataanilu ilinniakkamut attuumassuteqartumik ilinniarfimmi allamiikkallarneq.
Imm. 3.  Naalakkersuisut ilinniagaqartullu kattuffiisa tamanna pillugu sioqqutsisumik isumasioqatigeereernerisigut stipendiat taarsigassarsiarineqarsinnaasullu annertussusissaat, ikaarsaariarnermi aaqqissuussinerit aamma immikkut aningaasaliissutaajunnartut annertussusissaat aningaasanut inatsimmi aalajangersarneqassapput.
Imm. 4.  Naalakkersuisut kalaallit ilinniagaqartut kattuffiinik tusarniaareerlutik aalajangersassavaat ilinniagaqarnersiutit siunertaat, suussusissaat annertussussaallu, ikaarsaariarnermi aaqqissuussinerit, kiisalu ilinniagaqarnersiutit sorliit ilinniakkanut ataasiakkaanut naleqqiullugit tunniunneqartarnissaat ilinniagaqarnersiuteqarnissamullu piumasaqaatit allat pillugit malittarisassat.
Imm. 5.  Naalakkersuisut kalaallit ilinniagaqartut kattuffiinik tusarniaareerlutik qiortartakkatut periutsit ilusilernissaat pillugit malittarisassaliorsinnaapput.

§ 15.  Sulisitsisunut tapiissutit amerlassusissaat, tak. § 13, aningaasanut inatsimmi aalajangersarneqartassapput.
Imm. 2.  Tapiissuteqarnermut siunertat, taakkuninnga aqutsineq, tapiissuteqarnissamut piumasaqaatit kiisalu tapiissutit annertussusissaat qanorlu tunniunneqartarnissaat pillugit malittarisassat Naalakkersuisut aalajangersarsinnaavaat.

Kapitali 4
Ilinniarnermi taarsigassarsianik ernialersuineq

§ 16.  Ilinniartoq Namminersorlutik Oqartussanit imaluunniit Ilinniartitaanermut ministeeriaqarfimmit inatsisit malillugit ilinniagaqarnersiuteqarunnaarpat, ilinniagaqarnersiutit uninneraniit ullup tulliani aallartittumik ilinniarnermut atatillugu taarsigassarsianit qaqugukkulluunniit akiitsorineqartut ernialersorneqalissapput, pisortat qaqugukkulluunniit diskontoat procentimik ataatsimik ilasaq erniarineqartinneqarluni. Erniat ukiut tamaasa 31. december imaluunniit ullormi akiitsut akilerneqarfianni naatsorsuusiorneqartassapput.
Imm. 2.  Naalakkersuisut ernialersuinerup aallartiffissaa, tak. imm. 1, immikkut pissutissaqartillugu sanioqqussinnaavaat.

§ 17.  Sungiusarluni suliffissamik pissarsimannginneq, ilinnianngiffeqarallarneq, tamatumunnga ilanngullugu erninermi sulinngiffeqarallarneq aamma uppernarsaaserneqartumik napparsimaneq pissutigalugit ilinniagaqarnersiuteqarneq unitsinneqarallarpat, § 16, imm. 1 naapertorlugu ernialersuisoqassanngilaq.
Imm. 2.  Ilinniarnermik unitsitsigallarneq, tak. imm. 1, ukioq ataaseq sinnerlugu sivisussuseqarpat, pineqartup ilinniagaqarnermut atatillugu taarsigassarsiaanut qaqugukkulluunniit akiitsut § 16, imm. 1-imi aalajangersagaq malillugu ernialersorneqalissapput, unitsitsinerup ukiumik ataatsimik sivisussuseqalerneraniit aallartittumik.

§ 18.  Ilinniagaqartoq ilinniarnerup unitsinnerata naammassinerataluunniit kingorna ilinniarnermik ilinniagaqarnersiutisiaqarfiusinnaasumik aallartitseqqippat nutaammilluunniit aallartitsippat, malittarisassallu malillugit Namminersorlutik Oqartussanit imaluunnit Ilinniartitaanermut ministeeriaqarfimmit ilinniagaqarnersiutisisalerpat, pineqartup ilinniagaqarnermi taarsiagassarsianut qaqugukkulluunniit akiitsuisa ernialersorneqarnerat unitsikkallarneqassaaq, ilinniakkap ilinniartuunersiaqataasinnaasup aallarteqqinnerata imaluunniit ilinniakkap nutaap aallartinnerata ulluanit siullermiit atuutilersumik.
Imm. 2.  Ilinniarnerup unitsinneqarnerata naammassineqarnerataluunniit aqaguani atuutilersumik pineqartup ilinniagaqarnermi taarsigassarsianut qaqugukkulluunniit akiitsuisa ernialersorneqarnerat § 16, imm. 1-imi periaasissatut taaneqartoq malillugu aallarteqqinneqassaaq.
Imm. 3.  Immikkut pissutissaqartillugu, tassunga ilanngullugit pissutsit § 17, imm. 1-imi taaneqartut, imm. 2-p sanioqqunnissaa Naalakkersuisut aalajangiussinnaavaat.

§ 19.  Immikkut pissutissaqartillugu Naalakkersuisut taarsigassarsisumut allakkatigut nalunaarutigisinnaavaat
1)  tamakkiisumik ilaannakortumilluunniit ernialiisoqassanngitsoq imaluunniit
2)  ernialiunneqareersut tamakkiisumik ilaannakortumilluunniit isumakkeerneqassasut.

Kapitali 5
Ilinniagaqarnermi taarsigassarsiat akilersorneqartarnerat

§ 20.  Ilinniagaqarnermi taarsigassarsiat akilersorneqarnerat ilinniarnerup naammassinerata kingorna kingusinnerpaamik ukiup ataatsip qaangiunnerani aallartinneqassaaq. Ilinniarneq unitsinneqarpat akilersuineq unitsitsinermiit kingusinnerpaamik qaammatit pingasut qaangiunnerani aallartinneqassaaq.
Imm. 2.  Sungiusarluni suliffissamik pissarsisimannginneq, ilinnianngiffeqarallarneq, tamatumunnga ilanngullugu erninermi sulinngiffeqarallarneq aamma uppernarsaaserneqartumik napparsimaneq pissutigalugit ilinniarnermik unitsitsigallarnerit imm. 1 malillugu unitsitsinertut isigineqassanngillat.
Imm. 3.  Unitsitsigallarneq ukioq ataaseq sinnerlugu sivisussuseqarpat taarsigassarsianik akilersuineq, Naalakkersuisut tamanna pillugu piumasaqaateqarneratigut aallartinneqassaaq.
Imm. 4.  Ilinniagaqartoq Namminersorlutik Oqartussanit imaluunniit Ilinniartitaanermut ministeeriaqarfimmit ilinniarnerminik ilinniagaqarnersiutisiaqarfiusinnaatitaasumik nutaamik aallartitsippat imaluunniit ilinniarnermik unitsitaminik aallartitseqqippat ilinniagaqarnersiuteqarsinnaanermullu piumasaqaatinik eqqortitsippat, siornatigut taarsigassarsiaasimasunik akilersuisussaatitaaneq unitsikkallarneqassaaq. Ilinniarnerup naammassineqarnerani unitsinneqarneraniluunniit akilersuisussaatitaaneq imm. 1-imi aalajangersagaq malillugu atuutileqqissaaq.

§ 21.  Ilinniarnermi taarsigassarsiat erniaallu utertitsilluni akilersuisussaatitaanerup aallartinneraniit ukiut 15-it qaangiutsinnagit akilerneqareersimassapput. Akilersuinerli pissaaq qaammammut minnerpaamik 500 kr.-inik akiliisarnikkut.
Imm. 2.  § 20, imm. 4 tunngavigalugu akilersuisussaatitaaneq unitsikkallarneqarpat imm. 1-imi piffissap akilersuiffissap sivisunerpaaffissaa piffissap akilersuinerup unitsinneqarfigisimasaata sivisoqataanik sivitsorneqassaaq.
Imm. 3.  Piffissap akilersuisussaatittaaffiusup aallartinnginnerani ilinniartoq ilinniarnermi taarsigassarsiat akilersorneqarnissaat pillugu Naalakkersuisunik isumaqatigiissuteqarnissamut pisussaatitaavoq.
Imm. 4.  Ilinniartoq Naalakkersuisunit qinnuigineqaraluarluni ilinniarnermi taarsigassarsiaasimasunik akilersuinissamut piffissaagallartillugu isumaqatigiissuteqarsimanngippat, Naalakkersuisut killissarititaasut imm. 1-imi taaneqartut iluanni akilersuinermik aaqqissuussineq ilinniartumut oqinnerpaaq aalajangersassavaat.
Imm. 5.  Tamanna pillugu qinnuteqartoqarneratigut akilersuinissamut atugassarititaasunik Naalakkersuisut oqilisaasinnaapput imaluunniit akilersuinissamik kinguartitsisinnaallutik, ilinniartoq suliffissaaleqineq, napparsimaneq, ernineq imaluunniit pissutsit immikkut ittut allat pissutigalugit utertitsilluni akilersuinissamut aaqqissuussinermik eqquutitsinnaanngippat. Taamaattorli sivisunerpaamik ukiut 15-it, tak. imm. 1, ingerlaneranni akiitsut akilereersimanissaat saneqqunneqarsinnaanngilaq.

§ 22.  Ilinniartoq akilersuinissamik isumaqatigiissutaasumik imaluunniit akilersuinissamik aalajangersakkamik eqquutitsinngippat, Naalakkersuisut piumaffiginnereerlutik, akiitsut ernialiunneqarsimasut ilanngullugit, annaasaqataasussaanngitsumik ingerlaannartumik akileqqussavaat.

Kapitali 6
Ilinniagaqarnersiutinik tigusassarinagit tigusanik ernialersuineq utertitsillunilu akiliineq

§ 23.  Ilinniartoq pissutsit § 2, imm. 2-mi taaneqartut pillugit eqqunngitsumik amigartumilluunniit paasissutissiippat, imaluunniit pissutsit allannguutaasut nalunaarutiginngippagit, imaluunniit ilinniagaqarnersiutinik peqquserlulluni tigusaqartarsimappat, ilinniagaqarnersiutit tigusassarinagit tiguneqarsimasut ernialerlugit akilerneqarnissaat Naalakkersuisut piumasaqaatigissavaat.
Imm. 2.  Ilinniagaqarnersiutit tunniunneqarsimasut Naalakkersuisunit uterteqquneqarsinnaapput, ilinniagaqarnersiutit pisussaanagit pineqarsimappata siunertaasumulluunniit akuerisaasumut atorneqarsimanngippata imaluunniit ilinniartoq ilinniakkaminik kipititsinermini kipititsinerminut pissutaasunik Naalakkersuisunut allakkatigut nassuiaateqanngippat.
Imm. 3.  Ilinniagaqarnersiutit tunniunneqarsimasut Naalakkersuisunit uterteqquneqarsinnaapput, tamatumani ilinniartup ilinniarnera ima sivisussuseqarpat ilinniarneq aallartinneqavissimasutut nalilerneqarsinnaanani, aammalu unitsitsineq naammaginartumik tunngavilersorneqarsinnaanani.

§ 24.  Ilinniagaqarnersiutit ilinniartup eqqunngitsunik amigartunilluunniit paasissutissiinerup kingunerisaanik tigusimasai, piffissamit tigusiffiusumit aallartittumik ernialersorneqassapput.
Imm. 2.  Ilinniagaqarnersiutit ilinniartup peqquserlulluni tigusimasai, piffissamit tigusisup ilinniagaqarnersiutinik eqqunngitsumik tigusinerminik ilisimaarinnilerfigisimasaatut naatsorsuutigineqartumit ernialersorneqalissapput.
Imm. 3.  Ilinniagaqarnersiutisiaqarsinnaatitaanani ilinniagaqarnersiutit tiguneqartut, tak. imm. 1 aamma 2, ukiumoortumik ernialersorneqassapput pisortat qaqugumulluunniit diskontoat 6 procentimik ilallugu. Akiitsut qaqugukkulluunniit annertussusaat aallaavigalugu ernialersorneqassapput. Ernialiineq ukiut tamaasa 31. december imaluunniit ullormi akiitsut akilerneqarfianni pisassaaq.

§ 25.  Ilinniagaqarnersiutit ilinniartumit tigusussaanagit peqquserlunnani tiguneqarsimasut, ingerlaannartumillu ilinniartumit akilerneqarsinnaanngitsut, ilinniarnermi taarsigassarsianngortillugit Naalakkersuisunit allanngortinneqassapput.
Imm. 2.  Ilinniagaqarnersiutinik ilinniarnermi taarsiagassarsianngortinneqarsimasunik ernialersuineq akilersuinerlu pisassaaq ilinniarnermi taarsigassarsianik ernialersuisarneq akilersuisarnerlu pillugit maleruagassat malillugit, tak. §§ 16-22.

Kapitali 7
Ilinniagaqarnersiutinit ilanngaassisarneq

§ 26.  Ilinniagaqarnersiutinit Naalakkersuisut ilanngaatigisinnaavaat
1) ilinniartut ineqarfiini ineqarfinnilu allani Namminersorlutik Oqartussanit kommunalbestyrelsinilluunniit pigineqartuni ingerlanneqartunilluunniit nerisaqarnermut ineqarnermullu akiliutit,
2) ilinniartut ineqarfiini ineqarfinnilu allani Namminersorlutik Oqartussanit kommunalbestyrelsinilluunniit akilersorneqartuni nerisaqarnermut ineqarnermullu akiliutit aamma
3) ilinniartut kattuffiinut ilaasortaanermut akiliutit.
Imm. 2.  Nerisaqarnermut ineqarnermullu akiliutissanik ilanngaaneq, tak. imm. 1, nr. 1 aamma 2, tamaallaat pisinnaavoq, piffissamut ilinniartup isumaqatigiissuteqareernikkut nerisaqartinneqarlunilu ineqartinneqarfigisaanut atatillugu.
Imm. 3. Ilinniartut kattuffii, tak. imm. 1, nr. 3, ingerlaannartumik allakkatigut Naalakkersuisunut nalunaartassapput, ilinniartoq kattuffimmiit ilaasortaajunnaaraangat.

§ 27.  Ilinniartup ilinniagaqarnersiutisiaqarsinnaanera akiligassaqarfinnit malersugassanngortinneqarsinnaanngilaq.
Imm. 2.  Allanut akiligassat nammineq piumassuseq naapertorlugu ilinniagaqarnersiatigut akilersornissaannik isumaqatigiissuteqarnerit maleruarnissaat, Naalakkersuisut taamaallaat pisussaaffigaat aningaasartaasut qaammammut 500 kr.-it sinnersimanngippatigit.

§ 28.  Ilinniartup ilinniagaqarnersiutitigut pisassarisaanit ilinniagaqarnersiutit amerlanaarlugit ilinniartup peqquserluuteqarluni tigusimasai Naalakkersuisut ilanngaatigisinnaavaat. Qaammammut annerpaamik 500 kr.-it ilanngaatigineqarsinnaapput.
Imm. 2.  Ilinniakkap aallartinissaanut piffissaliussaq imaluunniit sungiusarluni sulinissamik isumaqatigiissutaasoq eqqorlugu ilinniartoq takkutinngippat, ilinniarfillu isumaqatigiissuteqarfigeqqaarneqarsimanngippat stipendianit ilanngaassinissaq pillugu Naalakkersuisut malittarisassanik aalajangersaasinnaapput.

Kapitali 8
Ilinniarnermi taarsigassarsiat akilersorneqarnerinut ikiorsiineq

§ 29.  Namminersorlutik Oqartussat ilinniagaqarneq naammassineqarsimagaangat imaluunniit kipitinneqarsimagaangat, ilinniarnermi taarsigassarsiat akilersorneqarnissaannut, tamatuminnga qinnuteqarneq tunuliaqutaralugu, inunnut Kalaallit Nunaanni aalajangersimasumik najugalinnut tapiisarput, ilinniarnermi taarsigassarsiat pisussaanagit ilinniagaqarneqarnersiuteqarsimanermik pissuteqanngippata.
Imm. 2.  Immikkorluinnaq pissutissaqartillugu inunnut Kalaallit Nunaata avataani najugaqartunut ilinniarnermi taarsigassarsiat akilersorneqarneranut tapiissuteqartoqarsinnaavoq.

§ 30.  Tapiiffigineqarnissamut piumasaqaataavoq
1) qaammatisiutit malillugit ukiup siuliani, matuma kingorna ukiumik akilersuiffimmik taagorneqartumi, akiliutigisimasat tamarmiusut minnerpaamik 6000 kr.-iusimanissaat,
2) akiliutigisat ukiumi akilersuiffiusumi ernialiunneqartunit amerlanerunissaat,
3) tapiiffigineqarnissamik qinnuteqaatip ukiup akilersuiffiusup tulliani 1. september nallertinnagu Naalakkersuisunit tiguneqarsimanissaa aamma
4) ilinniartup qinnuteqaatip Naalakkersuisunut tunniutinnginnerani minnerpaamik qaammatini pingasuni Kalaallit Nunaanni aalajangersimasumik najugaqarsimanerminik uppernarsaasinnaanissaa.

§ 31.  Tapiissutit ukiup akilersuiffiup ingerlanerani akiliutaasimasut nalinginik amerlassuseqartinneqartassapput.
Imm. 2.  Akiliutigineqartut akiitsunut ernianulluunniit akiliutaasimanerat apeqqutaatinnagu tapiissuteqartoqartassaaq.
Imm. 3.  Ukiumi tapiiffiusumi 1. december akiitsut sinneruttut tamarmiusut sinnerlugit tapiissuteqartoqarsinnaanngilaq.
Imm. 4.  Ukiup akilersuiffiup tulliani 1. december tapiissutit tunniunneqartassapput.

§ 32.  Taarsigassarsisoq Kalaallit Nunaanni aalajangersimasumik najugalik ilinniarnerminik naammassinninnermi unitsitsinermiluunniit kingorna immikkut ajornartorsiorpat, ilinniagaqarnermut akiitsunik tapiissuteqartarnermi piumasaqaatit naammassinngikkaluarpagilluunniit, qinnuteqarnera naapertorlugu Naalakkersuisut aningaasanut inatsimmi amerlassusileriikkat iluanni, ilinniagaqarnermut akiitsut tamakkerlugit ilaannaaluunniit isumakkeersinnaavaat. Taarsigassarsisoq immikkut ajornartorsiortutut nalilerneqassaaq, inuussutissarsiornernissamut piginnaasai annertuumik annikillisimappata peersimappataluunniit imaluunniit taarsigassarsisoq sivisuumik napparsimasimappat nalilinnillu peqarani.
Imm. 2.  Ilinniarnermi taarsigassarsiat tamatigut isumakkeerneqartassapput taarsigassarsisoq toquppat imaluunniit tamakkiisumik innarluuteqarpat, taamaalillunilu akiliisinnaajunnaavippat.
Imm. 3.  Imm. 1 aamma 2 naapertorlugit ilinniarnermi taarsigassarsianik isumakkeerisarneq pillugu Naalakkersuisut erseqqinnerusumik malittarisassiorsinnaapput.

§ 33.  Ilinniarnermi taarsigassarsiat akilersornissaannut ikioqqulluni qinnuteqarnermut atatillugu, Naalakkersuisut taarsigassarsisoq ilinniarnermi taarsiagassarsiat akilersornissaannut tapiissutinik naatsorsuinermut, kiisalu ilinniarnermi taarsigassarsiat tamakkiisumik ilaannakortumilluunniit isumakkeerneqartariaqarnerannik naliliinissamut atugassanik paasissutissanik pisariaqartinneqartunik tamanik tunniusseqqusinnaavaat. Paasissutissat pisariaqartut tassaasinnaapput akiliisimanermut uppernarsaatit, akileraartarnermut oqartussanit ukiumoortumik nalunaarut, najugaqarnermut uppernarsaat, inuup normua, nalilinnik pigisanut paasissutissat aamma pisortanit tapiissutit, meeqqanut 18-it inorlugit ukiulinnut pilersuisussaanermut akilersuisussaanermullu pisussaaneq, inunnik isumaginninnermi oqartussanit oqaaseqaat aamma qinnuteqartup peqqissusaa pillugu paasissutissat.
Imm. 2  Qinnuteqartoq eqqunngitsunik amigartunilluunniit paasissutissiippat, tapiissutit isumakkeerinninnerluunniit pisussaanagit pissarsiarineqartut ernialersorlugit uterteqquneqarsinnaapput, § 24-mi malittarisassat malillugit naatsorsorneqartumik.
Imm. 3.  Ilinniarnermi taarsigassarsiat akilersornissaannut ikioqqulluni qinnuteqarnermut atatillugu qinnuteqarnermi suliaqariaaseq pillugu Naalakkersuisut malittarisassiorsinnaapput, tassani ilaallutik imm. 1-imi paasiaautissat taaneqartut.

Kapitali 9
Aqutsineq naammagittaalliuuteqartarnerlu

§ 34.  Ilinniagaqarnersiutit pillugit malittarisassat Naalakkersuisunit aqunneqarput, taamaattorli tak. imm. 2 aamma 3.
Imm. 2.  Naalakkersuisut ilinniagaqarnersiutit pillugit malittarisassat aqunneqarnerat, Namminersorlutik Oqartussani oqartussaasunut sullissiveqarfinnullu allanut kommunalbestyrelsimullu tamakkiisumik ilaannakortumilluunniit tunniussinnaavaat.
Imm. 3.  Ilinniagaqarnersiutit pillugit malittarisassanik aqutsineq allakkatigut isumaqatigiissuteqarnikkut suliffeqarfimmut namminersortumut Naalakkersuisut tunniussinnaavaat.
Imm. 4.  Ilinniagaqarnersiutit pillugit imm. 2 aamma 3-mi oqartussaasunit, suliffeqarfinnit aamma namminesortut suliffiutaannit aalajangiinerit, aalajangiinermit sapaatip akunneri arfinillit qaangiutsinnagit, Naalakkersuisunut allakkatigut maalaarutigineqarsinnaapput. Naalakkersuisut maalaarnissamut killigititaq pillugu immikkut aalajangiisinnaapput, pissutsit immikkut ittut atuuppata
1) sila pissutsilluunniit allat pissutigalugit maalaarutaasoq kinguartoorpat, imaluunniit
2) ilinniartoq maalaaruteqarnissap tungaanut sivisuumik napparsimasimappat.
Imm. 5.  Naalakkersuisut ilinniagaqarnersiutit pillugit malittarisassat maalaaruteqarnissamullu periarfissap aqunneqarnerat pillugu malittarisassanik erseqqinnerusunik aalajangersaasinnaapput, taakununnga ilanngullugit ilinniagaqarnersiutit pillugit qinnuteqaatit ilusissaat tunniussinissamullu killiliussat, kiisalu ilinniartup Naalakkersuisullu akornanni qarasaasiakkut attaveqaqatigiinneq.
Imm. 6.  Ilinniagaqarnersiutit ilinniartup Kalaallit Nunaanni Danmarkimiluunniit aningaaserivimmi kontoanut ikineqartassapput.

§ 35.  Oqartussaasut, suliffeqarfiit suliffeqarfiillu namminersortut § 34, imm. 1-3-mi taaneqartut
1) pisortani oqartussaasunit ilinniartoq pillugu paasissutissanik, ilinniagaqarnersiutit pillugit malittarisassat aqunneqarnerannut pisariaqartunik, pissarsiniarsinnaapput,
2) ilinniagaqartoq pillugu paasissutissanik ilinniagaqarnersiutit pillugit malittarisassat aqunneqarnerannut pisariaqartunik paarlaateqatigiillutik ingerlatitseqqissinnaapput, paasissutissallu taamaattut imminnut atugassanngorteqatigiissinnaallugit,
3) Nunani avannarlerni ilinniagaqarnersiutinik aqutsisoqarfinnut, Kalaallit Nunaanni Namminersorlutik Oqartussanit Kalaallit Nunaanni nunanilu avannarlerni innuttaasunut ilinniagaqarnersiutinik tunniussineq pillugu paasissutissanik, Kalaallit Nunaanniit nunamillu avannarlermiit piffissami ataatsimi eqqunngitsumik ilinniagaqarnersiuteqartitsinngineranik nakkutilliinermut atugassanik, ingerlatitseqqissinnaapput,
4) Kalaallit Nunaanni pisortat namminersortullu suliffeqarfiutaannut ilinniartut aqqi najugaalu pillugit paasissutissanik, ilinniartut ilinniarnerminnik naammassinerini Kalaallit Nunaanni sulisussiarinerinut, aamma ilinnianeranni sungiusarlutik suliffissarsiniarnerinut ilisimatusarlutillu sulinissaanut atugassanik, ingerlatitseqqissinnaapput. Tamanna aatsaat pisinnaavoq ilinniartoq akuersiteqqaarlugu.
Imm. 2.  Imm. 1 tunngavigalugu paasissutissanik pissarsiniartarneq ingerlatitseqqittarnerlu pillugit malittarisassat erseqqinnerusut Naalakkersuisut aalajangersarsinnaavaat, tamatumunnga ilanngullugit paasissutissat qarasaasiakkoortumik pissarsiariniaqquneqarsinnaanerat ingerlateqquneqarsinnaanerallu.

§ 36.  Naalakkersuisut akiligassanik akilerneqartussanngorsimasunik akileeqqusissutinik nassitsinermut immikkut akiligassiisinnaapput 200 kr.-inik.
Imm. 2.  Naalakkersuisut akiligassanik akileeqqusinermut akiliutit annerpaamik pingasut akileqqusinnaavaat.

Kapitali 10
Atuutilersitsineq, ikaarsaariarneq atorunnaarsitsinerlu pillugit aalajangersakkat

§ 37.  Inatsisartut inatsisaat 1. januar 2012-mi atuutilissaaq, ilutigisaanillu ilinniagaqarnersiutit pillugit Inatsisartut peqqussutaat nr. 5, 14. november 2004-meersoq, kiisalu ilinniagaqarnermut akiitsunik taarsersuinermut tapiissuteqartarneq pillugu Inatsisartut inatsisaat nr. 24, 3. november 1994-meersoq atorunnaarsinneqassapput.
Imm. 2.  Malittarisassat ilinniagaqarnersiutit pillugit Inatsisartut peqqussutaat nr. 5, 14. november 2004-meersoq, kiisalu ilinniagaqarnermut akiitsunik taarsersuinermut tapiissuteqartarneq pillugu Inatsisartut inatsisaat nr. 24, 3. november 1994-meersoq naapertorlugit aalajangersarneqarsimasut Inatsisartut inatsisaanni aalajangersakkanut assortuuttuunngikkunik atuutiinnassapput, allanngortinneqarnissamik imaluunniit aalajangersakkanit Inatsisartut inatsisaat manna allalluunniit naapertorlugit aalajangersarneqarsimasunit atorunnaarsinneqarnissamik tungaanut.
Imm. 3.  Ilinniagaqarnermi akiitsunut Inatsisartut inatsisaanni nr. 24-mi, 3. november 1994-imeersumi malittarisassat suli atuutiinnassapput taarsigassarsianut 1. januar 2012 sioqqullugu taarsigassarsiarineqartunut.

§ 38. Ilinniarnermi taarsigassarsiat naalagaaffimmit nunattalu karsianit aningaasalersorneqartut 1. januar 2012 sioqqullugu taarsigassarsiaritinneqartut, taakku pillugit malittarisassat maannamut atuuttut naapertorlugit ernialersorneqassapput.
Imm. 2.  Ilinniagaqarnersiutit 1. januar 2012 sioqqullugu pisussaanagit pissarsiarineqarsimasut taakku pillugit malittarisassat maannamut atuuttut naapertorlugit ernialersorneqassapput. Tamatuma kingorna ilinniagaqarnersiutit pisussaanagit pissarsiarineqarsimasut § 24 aamma § 25 naapertorlugit ernialersorneqassapput.
Imm. 3.  § 21, imm. 1 aamma 5 ilinniagaqarnermi taarsigassarsianut 1. januar 2012-mi akilersuinissaq pillugu aalajangersaaffioreersunut isumaqatigiissuteqarfioreersunulluunniit atuutinngillat.

Namminersorlutik Oqartussat, ulloq 22. november 2011.

Kuupik Kleist